2
Ni̱ ganï̂n ruhuâj si nga gùchìj ñan màn nej suj,
ni̱ si̱ gi̱ꞌhia si ga̱na̱nï̱n ruhuâ nej suj.
2 Dadinꞌ si gi̱ꞌhia si ga̱na̱nï̱n ruhuâ nej suj,
ni̱ ahuin sí gi̱ꞌhiaj ga̱na̱huin nìhiàꞌ ruhuâj ràꞌaj.
ꞌNgo̱ rïn nej suj huin sa ga̱ꞌhue gi̱ꞌhiaj ga̱na̱huin nìhiàꞌ ruhuâj.
3 Rayiꞌî dan ni̱ gachrûnj dànanj riñan nej suj ni̱ nga gùchìj ñan màn nej suj ni̱ si̱ gananï̂n ruhuâj gi̱ꞌhiaj nej suj mánj;
dadinꞌ dànanj daꞌhuí ga̱na̱huin nìhiàꞌ ruhuâj gi̱ꞌhiaj nej suj,
dadinꞌ dànanj daꞌhui nêꞌ ga̱na̱huin nìhiàꞌ nùguànꞌan ruhuâ nêꞌ.
4 Dadinꞌ ûta giranꞌ sàñùnj,
ni̱ ûta huin ruhuâ nimânj ni̱ ûta dugueꞌé nga gachrûnj ñanj karta nânj riñan nej suj,
sani̱ sê si̱ giꞌhia guendâ ga̱na̱nï̱n ruhuâ nej suj huin mánj,
gachrûnj dànanj guendâ gi̱ni̱ꞌin nej suj si ûta ꞌì ruhuâj niꞌín nej suj.
Ginikaj Pablo nimân nìko rayiꞌî sí gachín nuguanꞌan riñan sôꞌ
5 Sani̱ si hua̱ ꞌngo̱ sí giꞌhiaj gananï̂n ruhuâj,
ni̱ sê man riñan ꞌngo̱ rḯn giꞌhiaj yìꞌì sôꞌ mánj,
“dadinꞌ nda ñan huaj ga̱ꞌhue”,
ni̱ huê danj na̱nj giꞌhiaj sôꞌ si gananï̂n ruhuâ nej suj.
6 Sani̱ si gàꞌ gataj gàꞌì ranꞌ nej suj si hua̱ aꞌnanꞌ sa giꞌhiaj sí dânj ni̱ gàꞌ dùgùnàj hua sa gataj nej suj gu̱nïn sôꞌ.
7 Huê danj ni̱,
sa daꞌhui nej suj gi̱ꞌhiaj nej suj huin,
ni̱ gi̱ni̱kaj nej suj nimân nìko ngà sí dan ni̱ nàgàꞌhuìꞌ nej suj chrej nùkuaj rûhua riñan sôꞌ,
daꞌnga ni̱ si̱ gininaj ruhuâ sôꞌ guendâ gananï̂n ruhuâ sôꞌ.
8 Rayiꞌî dan ni̱ gachín nìꞌhia si gi̱di̱gân nej suj si yàngàꞌ gàꞌ ganahuin ꞌì ñûn ruhuâ nej suj niꞌin nej suj sí dânj.
9 Dadinꞌ huê rayiꞌî dan gachrûnj riñan nej suj,
guendâ ga̱ya̱ka̱j daꞌngá si hia chru̱n nej suj da̱gahuin nej suj daranꞌ sun giyiꞌnïnꞌ su̱n riñan nej suj.
10 Ni̱ sí ri̱ña̱n ginikaj nej suj nimân nìko,
ni̱ gi̱nika nimân nìko rayiꞌî sôꞌ;
dadinꞌ gàꞌ ginikâ nimân nìko rayiꞌî sôꞌ,
ni̱ si hua̱ ꞌngo̱ sa ràyìꞌì gi̱nikâ nimân nìko,
ni̱ giniꞌin Ma̱ꞌan Cristo sa giꞌhia.
11 Daꞌnga ni̱ si̱ giꞌhiaj ga̱nan Sichre riñan nêꞌ;
dadinꞌ gàꞌ niꞌînꞌ dàj hua sa ganï̂n ruhuaj.
Nitaj si hua̱ dïnꞌïnj ruhuâj nga guchí yumanꞌ snàꞌànj Troas
12 Nga guchí riñan hioꞌó Troas ni̱ gananï̂nj nuguanꞌ gi̱ꞌhiaj ga̱na̱ni̱n nej guiì ni̱ huej huin si-nùguànꞌ Ma̱ꞌan Cristo,
ni̱ nùnj huin si ganayiꞌnï̂nj riñan rahueꞌe guendâ gànànï̀nj si-nùguànꞌ Ma̱ꞌan riñan hioꞌó nânj,
13 sani̱ nun ga̱ dïnꞌïnj ruhuâ nanè nimânj,
rayiꞌî guendâ nun gànàrìꞌìj dinï̂nt Tito;
huê danj ni̱ gaꞌmînj ngà nej sôꞌ màn hiuj dânj ni̱ gahuî ni̱ gaꞌan riñan hioꞌó Macedonia.
Ma̱ꞌan Cristo gi̱ꞌhiaj ni̱ gu̱nu̱kua gi̱ꞌhiaj ga̱nanj
14 Sani̱ guruhuâ Ma̱ꞌan Ñaꞌanj an,
dadinꞌ huej huin sa giꞌhiaj ni̱ gu̱nu̱kuôꞌ gi̱ꞌhiaj ga̱nunꞌ dadinꞌ guruguñuꞌunj Ma̱ꞌan Cristo Jesús ñùnꞌ,
ni̱ huej giꞌhiaj ni̱ gaꞌhue ga̱na̱nï̱nꞌ nï̀nꞌ gàchràꞌ riñan hioꞌóo si-nùguànꞌ Ma̱ꞌan Ñaꞌanj an ni̱ si-nùguànꞌ Ma̱ꞌan Ñaꞌanj an huin dàj rûnꞌ huin datòꞌ gïnꞌ da̱j a.
15 Dadinꞌ guendâ Ma̱ꞌan Ñaꞌanj an ni̱ nêꞌ gàꞌ gananin ni̱ huînꞌ si-dàtòꞌ Ma̱ꞌan Cristo sa gïnꞌ da̱j a,
ni̱ nej guiì gaꞌanj ni̱ꞌhia;
16 ni̱ huin ninj datòꞌ gïnꞌ ri̱ꞌhiuj dadinꞌ gàꞌ gahuiꞌ ninj,
sani̱ nej guiì gàꞌ gananin ni̱ gïnꞌ da̱j ninj dadinꞌ hua̱ nìꞌnàꞌ ninj,
ni̱ ahuin guiì gàꞌ hua̱ yu̱gui gànàtàꞌ si-nùguànꞌ Ma̱ꞌan ràꞌaj.
17 Sani̱ nitaj si giꞌhiaj nej ñûnj dàj rûnꞌ giꞌhiaj ûta gàꞌì nej síi,
dadinꞌ nej sí dânj ni̱ guduꞌhuêj nej sôꞌ si-nùguànꞌ Ma̱ꞌan Ñaꞌanj an ni̱ gidigañuꞌunj nej sôꞌ gàꞌì nej guiì,
sani̱ nej ñûnj ni̱ gaꞌmin nej ñûnj nuguanꞌ yàngàꞌ riki Ma̱ꞌan Ñaꞌanj an,
ni̱ gàꞌ giniꞌin Ma̱ꞌan Ña̱ꞌanj an dàj giꞌhiaj nej ñûnj rayiꞌî Ma̱ꞌan Cristo.