Sanꞌanj ganaranꞌ nej sij guendâ ga̱huin nej dinï̂nt
16
Rayiꞌî nej sanꞌanj ofrenda ganaranꞌ nej suj guendâ nej dinï̂nt màn ruhuâ yumanꞌ snàꞌànj Jerusalén,
ni̱ huê dàj rûnꞌ gaꞌnḯn suun riñan nej dinï̂nt huin si-nùhuì Ma̱ꞌan Jesús nne Galacia ni̱ huê danj gaꞌnḯn suun riñan nej suj na̱nj ánj.
2 Daꞌ guyumân gui gudûngu nga gayiꞌì semana ni̱ gi̱ꞌhiaj ni̱nï̱n daꞌ goꞌngo̱ nej suj doj sanꞌanj an,
dàj nìko ma̱ꞌan riki Ma̱ꞌan Ñaꞌanj an riñan nej suj,
ni̱ gànàꞌnï̀nj sàꞌ nej suj,
ni̱ nga gùchìj ni̱ si̱ ganachi nikaj nej suj ofrenda gàꞌ mánj.
3 Ni̱ nga guchí ñan màn nej suj,
ni̱ gàꞌnï̀n nej sôꞌ gachrûn su̱n nej suj ni̱ gàꞌhuìj ñanj karta gi̱nikaj nej sôꞌ ni̱ huê danj na̱nj ginikaj nej sôꞌ sanꞌanj an gàꞌànj nej sôꞌ ruhuâ yumanꞌ snàꞌànj Jerusalén.
4 Ni̱ si ña̱ꞌa̱n huaj si gàꞌàn,
ni̱ gàꞌàn ngà nej sôꞌ.
Gi̱ꞌhiaj yu̱gui Pablo ga̱hui̱ sôꞌ ga̱ꞌa̱nj sôꞌ
5 Ni̱ gùchìj ñan màn nej suj,
nga gàchìnj riñan hioꞌó Macedonia,
dadinꞌ dàñùn daꞌhuí gàchìnj riñan hioꞌó Macedonia nga gùchìj ñan màn nej suj.
6 Ni̱ si gu̱ru̱huaj ni̱ gu̱na̱ gané ngà nej suj,
nda ga̱na̱huij diû ga̱hiu ꞌhueꞌe,
ni̱ neꞌ rùkù ni̱ gidigân nej suj dànèꞌ huaj chrej e gàꞌàn.
7 Dadinꞌ nun ga̱ra̱nꞌ ruhuâj si man si gàchìnj ñan màn nej suj mánj,
dadinꞌ ganï̂n ruhuâj si ga̱huin ranj ꞌngo̱ diû ngà nej suj,
si ga̱ꞌhue̱j Ma̱ꞌan Señor ga̱ra̱n yinaj.
8 Sani̱ gàꞌàn yumanꞌ snàꞌànj Efeso nda gùyùmàn giꞌñanj Pentecostés;
9 dadinꞌ ûta mân nej guiì ruhuâ gu̱nïn si-nùguànꞌ Ma̱ꞌan Ñaꞌanj an ruhuâ yumanꞌ snàꞌànj dânj,
sani̱ yàngàꞌ ni̱ huê danj na̱nj ûta mân nej sí gata rùhuà ñùnj rayiꞌî si-nùguànꞌ Ma̱ꞌan Ñaꞌanj an.
10 Ni̱ asàꞌ guchiꞌ Timoteo ñan màn nej suj,
ni̱ ga̱ta̱j niꞌñanj nej suj sôꞌ daꞌnga ni̱ si̱ gananï̂n ruhuâ sôꞌ,
dadinꞌ giꞌhiaj sun hueꞌê sôꞌ si-su̱n Ma̱ꞌan Ñaꞌanj an dàj rûnꞌ giꞌhiaj sûnj siganï̂nj nej suj.
11 Huê danj ni̱ si̱ ganï̂n ruhuâ nej suj si nitaj si niꞌñanj sôꞌ,
ni̱ gi̱ꞌhiaj nej suj sunuj u ni̱ gi̱di̱gân nej suj chrej gàꞌnàꞌ sôꞌ ni̱ gùyùmàn sôꞌ neꞌ dànanj ni̱ ga̱ dïnꞌïnj ruhuâ nej suj ngà sôꞌ,
ni̱ ànàꞌhuì ngà aꞌngô nej dinï̂nt si gùyùmàn sôꞌ neꞌ dànanj.
12 Rayiꞌî dinï̂nt Apolos,
ni̱ ûta gachín ni̱ꞌhia riñan sôꞌ si gùchìꞌ sôꞌ ngà nej dinï̂nt ñan màn nej suj,
sani̱ gàꞌ do̱j nun ga̱ꞌhue̱j sôꞌ gùchìꞌ sôꞌ;
sani̱ nga huaj ga̱ꞌhue ni̱ gùchìꞌ sôꞌ ñan màn nej suj na̱nj ánj.
Nuguanꞌ ni̱ꞌña̱nj gaꞌnḯn Pablo gaꞌanj riñan nej dinï̂nt
13 Du̱gumin hueꞌê nej suj ma̱ꞌan nej suj,
ni̱ ga̱ yìtï̀nj ruhuâ nej suj ngà nuguanꞌ guyumân ruhuâ nej suj,
ni̱ gi̱ꞌhiaj nej suj dàj rûnꞌ gi̱ꞌhiaj nej sí staꞌuu ni̱ gi̱nun ña̱ꞌa̱n ruhuâ nej suj ngà si-nùguànꞌ Ma̱ꞌan Ñaꞌanj an.
14 Ni̱ ga̱ ꞌì ruhuâ nej suj niꞌin nej suj nej sôꞌ ngà daranꞌ nej sun gi̱ꞌhiaj nej suj ngà nej sôꞌ.
15 Di̱nï̂nj,
gàꞌ niꞌin nej suj si nej dùguìꞌ Estéfanas huin nej sí guyumân ruhuâ si̱nï̱n giꞌhiaj Acaya,
ni̱ nej dùguìꞌ nej sôꞌ huin sí gunânj gi̱tsi riñan nej dinï̂nt ran àko huin si-nùhuì Ma̱ꞌan Jesús.
16 Gachín ni̱ꞌhia si da̱gahuin nej suj dàj rûnꞌ gidigân nej sôꞌ,
ni̱ dagahuin nej suj daranꞌ sa gataj nej sôꞌ ni̱ huê danj gi̱ꞌhiaj nej suj ngà aꞌngô nej sôꞌ giꞌhiaj sun si-su̱n Ma̱ꞌan Ñaꞌanj an.
17 Ganahuin nìhiàꞌ ruhuâj si ga̱ꞌna̱ꞌ Estébanas,
ni̱ Fortunato ngà Acaico,
dadinꞌ nga nuhuiꞌ nej suj huaj ngàj ni̱ gaꞌnaꞌ nej sôꞌ ni̱ gaché nùguànꞌàn nej ñûnj.
18 Dadinꞌ gahuin dïnꞌïnj ruhuâj gi̱ꞌhiaj nej sôꞌ ni̱ huê danj na̱nj gahuin ran ruhuâ nanè nimânj nej suj giꞌhiaj nej sôꞌ;
ni̱ ga̱na̱ka̱j guendâ nej suj niꞌin nej suj nej sôꞌ.
19 Nej dinï̂nt huin si-nùhuì Ma̱ꞌan Jesús nne riñan hioꞌó Asia gaꞌnḯn ꞌngo̱ nuguanꞌ ni̱ꞌña̱nj an huaj riñan nej suj.
Ni̱ Aquila ngà Priscila,
ni̱ nej dinï̂nt huin si-nùhuì Ma̱ꞌan Jesús na̱ra̱hui̱ꞌ dukuâ nguèj ni̱ka̱ Aquila,
gaꞌnḯn ꞌngo̱ nuguanꞌ ni̱ꞌña̱nj an huaj riñan nej suj ngà siyu̱gui Ma̱ꞌan Señor.
20 Ni̱ ga̱na̱huin ràꞌa nej suj nuguanꞌ ni̱ꞌña̱nj gaꞌnḯn nej dinï̂nt huaj riñan nej suj.
Gàꞌhuìꞌ nej suj nuguanꞌ ni̱ꞌña̱nj an riñan ꞌngo̱ ni̱ aꞌngô nej suj ni̱ gi̱da̱ꞌa nej suj raꞌa ꞌngo̱ ni̱ aꞌngôꞌ nej duguiꞌ nej suj.
21 Ñùnj,
huin Pablo ni̱ gachrûnj ꞌngo̱ nuguanꞌ ni̱ꞌña̱nj an huaj riñan nej suj.
22 Nej guiì nitaj si ꞌì ruhuâ niꞌin Ma̱ꞌan Señor Jesucristo,
ni̱ gùyùmàn si kastîgu Ma̱ꞌan Ñaꞌanj an riñan ninj.
Ni̱ râꞌñanj ga̱ꞌna̱ꞌ Ma̱ꞌan Señor Jesús.