Ganaꞌnï̂nj Ma̱ꞌan Jesús siganï̂nj nej nîman
15
Ni̱ ruhuâj si ga̱na̱nun ruhuâ nej suj di̱nï̂nj,
dadinꞌ ñùnj ganataꞌ nuguanꞌ giꞌhiaj gananin nej suj,
ni̱ ganahuin ràꞌa nej suj nuguanꞌ dânj,
ni̱ hua̱ na̱nj guyumân ruhuâ nej suj nuguanꞌ ganatá.
2 Huê danj ni̱ si hua̱ na̱nj dugumîn nej suj nuguanꞌ ganatá gu̱nïn nej suj,
hiôꞌ ni̱ ga̱na̱ni̱n nej suj si dagahuin nej suj nuguanꞌ ganatá,
sani̱ si nitaj si dagahuin nej suj nuguanꞌ dânj hiôꞌ ni̱ nitaj gue̱nda̱ niꞌñanj guyumân ruhuâ nej suj mánj.
3 Dadinꞌ gàꞌ si̱nï̱n gidigán riñan nej suj nej nuguanꞌ ganahuin raꞌá:
Si gahuiꞌ Ma̱ꞌan Cristo rayiꞌî si-ga̱kïnꞌ nêꞌ,
dàj rûnꞌ taj riñan ñanj si-nùguànꞌ Ma̱ꞌan Ñaꞌanj an;
4 ni̱ gachinꞌ nej sij Ma̱ꞌan,
sani̱ ganaꞌnïn siganï̂nj nej nîman;
dàj rûnꞌ taj riñan ñanj si-nùguànꞌ Ma̱ꞌan Ñaꞌanj an;
5 ni̱ ganikïnj riñan Cefas,
ni̱ neꞌ rùkù ni̱ ganikïnj riñan nej yùhuìj nej sí gaꞌnaꞌ ga̱huin chru̱n riñanj.
6 Neꞌ rùkù ni̱ ganikïnj riñan nda ùnꞌùnꞌ sientu nej dinï̂nt,
ni̱ ûta gàꞌì nej sôꞌ giniꞌin Ma̱ꞌan ni̱ hua̱ na̱nj nne nej sôꞌ,
ni̱ aꞌngô da̱ꞌa̱j nej sôꞌ gàꞌ gahuiꞌ.
7 Neꞌ rùkù ni̱ ganikïnj riñan Jacobo;
ni̱ neꞌ rùkù ni̱ ganikïnj riñan daranꞌ nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an.
8 Ni̱ nda neꞌ rùkù nga ganikïnj riñan daranꞌ nej sôꞌ,
ni̱ ganikïnj riñânj dadinꞌ gahuín dàj rûnꞌ huin ꞌngo̱ neꞌej nun ga̱chi̱j hueꞌê riki nni dadinꞌ nda neꞌ rùkù ganaguij ñùnj guendâ gu̱na̱nj gi̱tsí riñanj.
9 Dadinꞌ ñùnj ni̱ huín ꞌngo̱ sí ninaj doj gàꞌ daꞌ aꞌngô nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an,
ni̱ nitaj guèndàj si ga̱ta̱j nej sij si huín sí gaꞌanj gi̱di̱gân si̱nï̱n,
dadinꞌ gata rùhuàj nej sôꞌ huin si-nùhuì Ma̱ꞌan Ñaꞌanj an.
10 Sani̱ ngà si-su̱nu̱j Ma̱ꞌan Ñaꞌanj an ni̱ huín dàj rûnꞌ huín;
ni̱ sê si̱ gahuin chre si-su̱nu̱j Ma̱ꞌan Ñaꞌanj an giꞌhia mánj,
dadinꞌ dànanj giꞌhiaj sûnj doj gàꞌ daꞌ aꞌngô nej sôꞌ gaꞌnaꞌ ga̱huin chru̱n riñan Ma̱ꞌan Jesús,
sani̱ sê ñùnj huin sa giꞌhiaj sun mánj,
dadinꞌ ganï̂n su̱nu̱j ruhuâ Ma̱ꞌan Ñaꞌanj an ni̱ giꞌhiaj sunj ngàj.
11 Dadinꞌ gàꞌhue si ñùnj gaꞌmin ni̱ ga̱ꞌhue si nej sij gaꞌmin riñan nej suj,
ni̱ huê dànanj ganataꞌ nej ñûnj si-nùguànꞌ Ma̱ꞌan Ñaꞌanj an riñan nej suj ni̱ guyumân ruhuâ nej suj na̱nj ánj.
Gànàꞌnï̀nj nej nîman
12 Ni̱ si ganataꞌ nej ñûnj riñan nej suj si gànàꞌnï̀nj Ma̱ꞌan Cristo siganï̂nj nej nîman.
Ni̱ nùnj huin saj ni̱ gataj da̱ꞌa̱j nej sôꞌ siganï̂nj nej suj si nitaj si ganaꞌnï̂nj nej nîman ràꞌaj.
13 Dadinꞌ si nitaj si ganaꞌnï̂nj nej nîman,
hiôꞌ ni̱ nun gànàꞌnï̀nj Ma̱ꞌan Cristo mánj.
14 Ni̱ si nun gànàꞌnï̀nj Ma̱ꞌan Cristo,
hiôꞌ ni̱ nitaj nùnj gue̱nda̱ niꞌñanj si ganataꞌ nej nûnj si-nùguànꞌ Ma̱ꞌan Ñaꞌanj an riñan nej suj mánj,
huê danj na̱nj nitaj si niꞌñanj si guyumân ruhuâ nej suj nej mánj.
15 Ni̱ gahuin nej ñûnj sí gidigañuꞌunj un riñan Ma̱ꞌan Ñaꞌanj an;
dadinꞌ ganataꞌ nej ñûnj si Ma̱ꞌan Ñaꞌanj an huin sa giꞌhiaj ni̱ ganaꞌnï̂nj Ma̱ꞌan Cristo,
hiôꞌ ni̱ si sê yàngàꞌ ganaꞌnï̂nj Ma̱ꞌan Cristo siganï̂nj nej nîman,
ni̱ sê yàngàꞌ gànàꞌnï̀nj nej nîman mánj.
16 Dadinꞌ si nun gànàꞌnï̀nj nej nîman,
ni̱ huê danj na̱nj nun gànàꞌnï̀nj Ma̱ꞌan Cristo mánj;
17 ni̱ si nun gànàꞌnï̀nj Ma̱ꞌan Cristo,
hiôꞌ ni̱ nitaj gue̱nda̱ niꞌñanj guyumân ruhuâ nej suj;
hiôꞌ ni̱ hua̱ na̱nj hua̱ gakï̱nꞌïn riñan nej suj na̱nj ánj.
18 Hiôꞌ ni̱ huê danj na̱nj gaꞌanj ni̱ꞌhia̱ nej guiì gahuiꞌ nùnj si gàꞌ guyumân ruhuâ ninj niꞌin ninj Ma̱ꞌan Cristo na̱nj ánj.
19 Ni̱ si man nga neꞌ riñan hioꞌó nânj niꞌñanj guendâ guyumân ruhuôꞌ niꞌînꞌ Ma̱ꞌan Cristo,
hiôꞌ ni̱ nitaj gue̱nda̱ niꞌñanj si giranꞌ sàñùnꞌ rayiꞌî Ma̱ꞌan Jesús hiôꞌ ni̱ huînꞌ sí ninaj doj gàꞌ daꞌ daranꞌ nej guiì na̱nj ánj.
20 Sani̱ hia̱j ni̱ gàꞌ ganaꞌnï̂nj Ma̱ꞌan Cristo siganï̂nj nej nîman;
ni̱ Ma̱ꞌan huin sa ganaꞌnï̂nj si̱nï̱n siganï̂nj nej guiì gàꞌ gahuiꞌ na̱nj ánj.
21 Dadinꞌ rayiꞌî guendâ giꞌhiaj Adán gakï̱nꞌïn ni̱ gahuiꞌ sôꞌ,
rayiꞌî dan ni̱ gahuiꞌ darûnꞌ,
sani̱ guendâ ganaꞌnï̂nj Ma̱ꞌan Cristo siganï̂nj nej nîman ni̱ giriꞌ nìꞌhiôꞌ ni̱ gànàꞌnï̀nj siganï̂nj nej nîman na̱nj ánj.
22 Dadin dàj rûnꞌ gahuiꞌ Adán ni̱ huê danj na̱nj gahuiꞌ daranꞌ nej guiì,
ni̱ huê dàj rûnꞌ ganaꞌnï̂nj Ma̱ꞌan Cristo siganï̂nj nej nîman ni̱ huê danj na̱nj gànàꞌnï̀nj daranꞌ nej guiì na̱nj ánj.
23 Sani̱ gahuin daꞌ nikòꞌ duguiꞌij.
Ni̱ Ma̱ꞌan Cristo huin sa si̱nï̱n ganaꞌnï̂nj siganï̂nj nej nîman;
ni̱ neꞌ rùkù nga ga̱ꞌna̱ꞌ ñunj ni̱ gànàꞌnï̀nj nej guiì guyumân ruhuâ niꞌin Ma̱ꞌan na̱nj ánj.
24 Ni̱ nga ganahuij Ma̱ꞌan Jesús giꞌhiaj ga̱nanj daranꞌ nej sa ni̱ka̱j suun ni̱ nej sa nùkuaj hua̱ riñan hioꞌó nânj ni̱ neꞌ rùkù dânj ni̱ ga̱na̱huij daranꞌanj,
huê danj ni̱ nàgàꞌhuij si-sùnj raꞌa Ma̱ꞌan Ñaꞌanj an huin Re na̱nj ánj.
25 Dadinꞌ ña̱ꞌa̱n huaj si gi̱nikaj su̱n Ma̱ꞌan Cristo riñan daranꞌ nej sa unïnꞌ nngaj ni̱ ga̱chri̱ riki dako daranꞌ ninj.
26 Ni̱ riñan aꞌngô rïn sa gùnùkuaj Ma̱ꞌan Cristo gi̱ꞌhiaj ga̱nanj huin sa giꞌhiaj gahuiꞌ nej guiì dadinꞌ nânj huin sa unïnꞌ nngaj.
27 Dadinꞌ Ma̱ꞌan Ñaꞌanj an huin sa gachrîj daranꞌanj riki dakó Ma̱ꞌan Cristo.
Sani̱ nga gata si ga̱chri̱ daranꞌ nej dânj riki dakó Ma̱ꞌan Cristo,
ni̱ sê danj ruhuaj ga̱ta si ni̱ka̱j su̱n Ma̱ꞌan Cristo riñan Ma̱ꞌan Ñaꞌanj an mánj,
dadin Ma̱ꞌan Ñaꞌanj an huin sa gachrîj daranꞌ nej nânj riki dakó Ma̱ꞌan Cristo.
28 Ni̱ nga gunùkuaj Ma̱ꞌan Cristo gi̱ni̱kaj sunj riñan daranꞌ nej nânj,
ni̱ huê danj na̱nj ga̱ra̱n yinaj si gi̱ni̱kaj su̱n Ma̱ꞌan Ñaꞌanj an riñanj dadinꞌ huin daꞌní Ma̱ꞌan Ñaꞌanj an,
dadinꞌ Ma̱ꞌan Ñaꞌanj an giꞌhiaj si gi̱ni̱kaj sunj riñan daranꞌ nej rasu̱un.
Ni̱ huê danj na̱nj gi̱nikaj su̱n Ma̱ꞌan Ñaꞌanj an riñan daranꞌ nej sa màn nï̀nꞌ gàchràꞌ.
29 Ni̱ si danj huaj.
Ni̱ nùnj huin saj ni̱ gataꞌ nne nej guiì rayiꞌî nej nîman ràꞌaj,
ni̱ si nitaj si ganaꞌnï̂nj nej nîman.
Ni̱ nùnj huin saj ni̱ gataꞌ nne nej sôꞌ rayiꞌî nej nîman ràꞌaj.
30 Nùnj huin saj ni̱ gaꞌnï̂n nimân nêꞌ ni̱ gidaꞌa nêꞌ chrej ha̱i̱ hua nânj dadinꞌ daranꞌ ora hua ha̱i̱ riñunꞌ ràꞌaj.
31 Dadinꞌ ñùnj ni̱ ûta gahuin nnèj rayiꞌî nej suj dadinꞌ gahuin ran ruhuâ nej suj niꞌin nej suj Ma̱ꞌan Señor Jesús,
ni̱ daranꞌ nej gui huaj gàhuìj.
32 Si dàj rûnꞌ giranꞌ sa̱ñu̱n ꞌngo̱ síi giranꞌ sàñùnj ruhuâ yumanꞌ snàꞌànj Efeso nga gutá ngà nej yuku hu̱e.
Ni̱ ahuin gue̱nda̱ niꞌñanj si giranꞌ sàñùnj,
si nitaj si ganaꞌnï̂nj nej nîman ràꞌaj:
“Hiôꞌ ni̱ yo̱ꞌ ni̱ go̱ꞌo̱ꞌ,
dadinꞌ gui aꞌhioj ni̱ gàhuìꞌ na̱nj ánj.”
33 Si̱ gachej ruhuâ nej suj mánj.
Dàj rûnꞌ taj ꞌngo̱ guentu:
“Ni̱ si̱ gi̱nikaj duguiꞌ nej suj guendâ gi̱rï̱snaꞌanj nej suj ngà nej sí ga̱ninï̀nꞌ huaa,
dadinꞌ gu̱du̱rëꞌ nej sôꞌ nej suj ngà si-nùguànꞌ nej sôꞌ.”
34 Du̱gumîn hueꞌê nej suj ma̱ꞌan nej suj,
ni̱ si̱ giꞌhiaj nej suj gakï̱nꞌïn mánj;
dadinꞌ hua̱ da̱ꞌa̱j nej suj ni̱ hua̱ na̱nj nun niꞌin nej suj Ma̱ꞌan Ñaꞌanj an;
ni̱ gatâ nuguanꞌ nânj guendâ ga̱na̱ka̱j nej suj sinàꞌàj nej suj na̱nj ánj.
Gàꞌ si̱nï̱n ga̱hui̱ꞌ nej guiì ni̱ neꞌ rùkù ni̱ gànàꞌnï̀nj ninj
35 Si gu̱ru̱huaj ni̱ hua̱ da̱ꞌa̱j nej suj gàchìnj naꞌanj ni̱ ga̱ta̱j nej suj:
“Dàj gàꞌhue gànàꞌnï̀nj nej nîman ràꞌaj.
Ni̱ dàj ga̱ nneè kú gi̱ni̱kaj nej nîman nga gàꞌnàꞌ ninj ràꞌaj.”
36 Naꞌhue ga̱ra̱n daꞌngaꞌ ruhuâ nej suj mánj,
ka̱n gununꞌ ni̱ sê hua̱ ni̱ña̱n si ga̱huij daꞌnga ni̱ giyichraꞌ aꞌngô koj o ràꞌ saj ûnꞌ.
37 Nga gununꞌ ni̱ sê koj o gununꞌ mánj,
sa gununꞌ huin ka̱n hua̱ daj,
gàꞌhue si gununꞌ ka̱n trigu nej si gu̱nu̱nꞌ aꞌngô nej ka̱an;
38 sani̱ Ma̱ꞌan Ñaꞌanj an giꞌhiaj giyichraꞌ nej koj o dàj garanꞌ ruhuâ Ma̱ꞌan,
ni̱ dàj hua ma̱ꞌan nej ka̱an ni̱ huê danj ga̱ nej koj gìyìchràꞌ.
39 Sê si̱ gu̱ña̱n hua daranꞌ nej nneè mánj,
dadinꞌ ꞌngoj huin nneè nej guiì,
ni̱ aꞌngôj huin nneè nej yuku,
ni̱ aꞌngoj huin nneè nej yukuaj a,
ni̱ aꞌngoj huin nneè nej yataj a.
40 Ni̱ da̱ꞌa mân neꞌ yàtàꞌa,
ni̱ aꞌngô da̱ꞌa mân riñan hioꞌóo;
sani̱ hua̱ ꞌngo̱ sa hua̱ nìhiàꞌ doj gàꞌ daꞌ riñan aꞌngô nej sa màn neꞌ yàtàꞌa ni̱ huê danj na̱nj hua̱ ꞌngo̱ sa hua̱ nìhiàꞌ doj riñan aꞌngô nej sa màn riñan hioꞌóo.
41 Ni̱ dànanj hua hueꞌê doj sinàn gui gàꞌ daꞌ sinàn ahuii,
ni̱ dànanj hua hueꞌê doj sinàn ahuii gàꞌ daꞌ sinàn atïꞌï,
ni̱ sê gu̱ña̱n hua sinàn nej atïꞌï mánj.
42 Ni̱ huê danj huaj nga gànàꞌnï̀nj nej nîman.
Dadinꞌ gachinꞌ nneè kú nîman sani̱ gi̱ri̱ꞌhuij man.
Sani̱ nga gànàꞌnï̀nj nej nîman ni̱ ganakaj ninj aꞌngô nneè nitaj àmàn huaj gàhuìꞌ.
43 Dadinꞌ nga gachinꞌ nneè kú nej nîman ni̱ sa gi̱ri̱ꞌhiuj huin man,
sani̱ nga gànàꞌnï̀nj man ni̱ nitaj àmàn huaj ga̱huij gàꞌ mánj;
nga gachînꞌ ni̱ huin ꞌngo̱ sa nitaj si nùkuaj,
sani̱ nga gànàꞌnï̀nj man ni̱ ga̱na̱huin man ꞌngo̱ sa ûta nùkuaj.
44 Gàchìnꞌ nneè gàꞌ gahuiꞌ,
sani̱ nga gànàꞌnï̀nj man siganï̂nj nej nîman ni̱ ga̱na̱huin nìꞌnaj gi̱ꞌhiaj Ma̱ꞌan Cristo.
Hua̱ nneè gàꞌ ꞌngo̱ gàhuìꞌ sani̱ hua̱ nneè gànàꞌnï̀nj ni̱ ga̱na̱huin nìꞌnàj giꞌhiaj Ma̱ꞌan Cristo.
45 Huê danj nnunj riñan ñanj:
“Ni̱ gi̱ꞌhiaj Ma̱ꞌan Ñaꞌanj an Adán ni̱ gahuin sôꞌ sí si̱nï̱ïn ni̱ gisikiꞌ sôꞌ ni̱ gaché sôꞌ”;
ni̱ Ma̱ꞌan Cristo huin aꞌngô Adán gaꞌnaꞌ ñûn,
ni̱ giꞌhiaj Ma̱ꞌan Cristo ganahuin nìꞌnàꞌ nimân nej guiì.
46 Sani̱ sê nneè hua̱ nìꞌnàꞌa ganaꞌnï̂nj si̱nï̱n giꞌhiaj Ma̱ꞌan Cristo mánj,
sa ganaꞌnï̂nj si̱nï̱n huin nneè nej gui gàꞌ gahuiꞌi.
47 Sí sinï̱ïn gahuin hioꞌóo,
ni̱ gane sôꞌ riñan hioꞌóo;
ni̱ Ma̱ꞌan sa gàꞌnaꞌ neꞌ rùkùu huin Ma̱ꞌan Señor gaꞌnaꞌ neꞌ yàtàꞌa.
48 Ni̱ dàj rûnꞌ gahuin Adán hioꞌóo ni̱ huê danj gahuin daranꞌ nej guiì hioꞌóo,
ni̱ daranꞌ nej sa màn yàtàꞌa ni̱ huaj dàj rûnꞌ hua Ma̱ꞌan Cristo na̱nj ánj.
49 Ni̱ dàj rûnꞌ ga nneè kú ginikaj Adán nga gahuin sôꞌ sí si̱nï̱ïn huê danj hua nneè kú ni̱ko̱ꞌ,
ni̱ gùyùmàn ꞌngo̱ gui nga gànàꞌnï̀nj siganï̂nj nej nîman ni̱ ga̱na̱huînꞌ dàj rûnꞌ hua Ma̱ꞌan Cristo nga ga̱na̱ꞌnïn siganï̂nj nej nîman na̱nj ánj.
50 Sani̱ sa gàtà gunïn nej suj huin di̱nï̂nj:
Si tun ngà nneè ni̱ si̱ gatu yàtàꞌa mánj,
ni̱ huê danj na̱nj gakï̱nꞌïn ni̱ si̱ gaꞌhue ga̱tu yàtàꞌa ñan nne Ma̱ꞌan Ñaꞌanj an mánj.
51 Hia̱j ni̱ gàtà gu̱nïn nej suj ꞌngo̱ nuguanꞌ hua̱ huìi:
Ni̱ sê daranꞌ nêꞌ gàhuìꞌ mánj;
sani̱ na̱du̱na̱ darûnꞌ mu̱ꞌunꞌ,
52 ni̱ nda nanè chre,
ni̱ dàj rûnꞌ gahuin nga gadï̱nꞌ ni̱ naguchrôꞌ rune ñunꞌ,
ni̱ aꞌngô rïn ga̱ꞌña̱nj nej sij chrun âꞌñànj an,
dadinꞌ ga̱ꞌña̱nj nej ángel chrun âꞌñànj an,
ni̱ gànàꞌnï̀nj nej nîman ni̱ huê danj ni̱ nitaj si huaj gàhuìꞌ ninj gàꞌ mánj,
ni̱ na̱du̱na̱ Ma̱ꞌan Ñaꞌanj an nneè kûꞌ.
53 Dadinꞌ ña̱ꞌa̱n huaj si nneè kûꞌ sa gi̱ri̱ꞌhiuj nânj ni̱ ganaka aꞌngô nneè ni̱ nitaj si huaj gànàrë̀ꞌ mánj,
ni̱ hua̱ ni̱ña̱n si nneè kûꞌ ni̱ ga̱huij sani̱ neꞌ rùkù ni̱ ga̱na̱ꞌnïn siganï̂nj nej nîman ni̱ ga̱ne nìgan na̱nj ánj.
54 Ni̱ nga ganahuin hueꞌê nneè kûꞌ sa giriꞌhiuj nânj,
ni̱ gìrìꞌ nìꞌhia ga̱ne ni̱gan,
hiôꞌ ni̱ gìsìj nuguanꞌ nnùn riñanj ñanj:
“Ni̱ gàꞌ ꞌngo̱ gìrë̀ꞌ sa giꞌhiaj gàhuìꞌ.
55 Dànèꞌ gaꞌanj sañun giꞌhiaj gàhuìꞌ ràꞌaj.
Dànèꞌ gaꞌanj ñan gachinꞌ nej sij ñùnꞌ ni̱ nun gi̱ꞌhiaj ga̱nanj riñunꞌ ràꞌaj.”
56 Dadinꞌ sañun giꞌhiaj gàhuìꞌ huin gakï̱nꞌïn,
ni̱ gahuin nùkuaj gakï̱nꞌïn giꞌhiaj ley.
57 Sani̱ guruhuâ Ma̱ꞌan Ñaꞌanj an dadinꞌ giꞌhia si gùnùkuôꞌ gi̱ꞌhiaj ga̱nunꞌ riñan gakï̱nꞌïn rayiꞌî Ma̱ꞌan Señor Jesús.
58 Huê danj ni̱ ꞌì ruhuâj niꞌín nej suj di̱nï̂nj,
ni̱ ga̱nikïnꞌ ran nej suj ni̱ si̱ ginichre ruhuâ nej suj mánj,
ni̱ si̱ gudunâj nej suj guendâ gi̱ꞌhiaj sun nej suj si-su̱n Ma̱ꞌan Ñaꞌanj an,
ni̱ gi̱nun ruhuâ nej suj si sê si̱ ga̱huin chre sun gi̱ꞌhiaj nej suj mánj.