Gaꞌmin aꞌngô nej nânj màn ruhuâ yumiguì
14
Ga̱ ꞌì ruhuâ nej suj niꞌin nej suj nej duguiꞌ nej suj;
ni̱ du̱guꞌnïnꞌ nej suj gàchìnj nej suj sun ri̱ki̱ Ma̱ꞌan Espíritu Santo riñan nej suj,
sani̱ sa ña̱ꞌa̱n doj huin si gànàtàꞌ nej suj dàj ga̱huin.
2 Dadinꞌ sí gaꞌmin aꞌngô nuguanꞌan ni̱ sê riñan nej guiì gaꞌmin sôꞌ,
dadinꞌ ngà Ma̱ꞌan Ñaꞌanj an gaꞌmin sôꞌ;
dadinꞌ si̱ gaꞌhue ga̱ra̱n daꞌngaꞌ ruhuâ gàꞌ si ꞌngo̱ nej guiì nej nuguanꞌ ga̱ꞌmi̱n sôꞌ,
nùnj huin si hua̱ nuguanꞌ huì gataj naꞌanj Ma̱ꞌan Espíritu Santo riñan nej guiì.
3 Sani̱ sí gataj dàj ga̱huin ni̱ gaꞌmin sôꞌ riñan nej guiì guendâ na̱gi̱ꞌhiaj nùkuaj sôꞌ ruhuâ ninj,
ni̱ nagiꞌhiaj yìtï̀nj sôꞌ doj ruhuâ ninj ni̱ giꞌhiaj sôꞌ si gànàrìꞌ doj ruhuâ ninj.
4 Sani̱ sí gaꞌmin aꞌngô nej nânj gaꞌmin nej guiì ni̱ man ꞌngo̱ rïn sôꞌ ganahuin nùkuaj doj;
sani̱ sôꞌ ganataꞌ dàj gahuin,
ni̱ nagiꞌhiaj nùkuaj sôꞌ ruhuâ nej guiì huin si-nùhuì Ma̱ꞌan Jesús.
5 Huê danj na̱nj garanꞌ ruhuâj si daranꞌ nej suj ga̱ꞌmi̱n aꞌngô nânj ri̱ki̱ Ma̱ꞌan Espíritu Santo riñan nej suj;
sani̱ sa ña̱ꞌa̱n doj huin si gànàtàꞌ nej suj dàj ga̱huin;
dadinꞌ dànanj sí ni̱ka̱j sun nìko doj huin sí gànàtàꞌ dàj ga̱huin gàꞌ daꞌ sí aꞌmin nânj riki Ma̱ꞌan Espíritu Santo,
huê gàꞌhue ga̱ꞌmi̱n sí dânj si hua̱ sí gànàtàꞌ rayiꞌî nuguanꞌ ga̱ꞌmi̱n sôꞌ,
daꞌnga ni̱ gaꞌhue ga̱na̱huin nùkuaj doj nej guiì huin si-nùhuì Ma̱ꞌan Jesús.
6 Hia̱j di̱nï̂nj,
ni̱ si gàꞌmìn aꞌngô nânj aꞌmin aꞌngô nej guiì nga gùchìj ñan màn nej suj,
ni̱ ahuin si niꞌñanj si gàꞌmìn aꞌngô nânj gaꞌmin nej guiì riñan nej suj,
si nitaj si chrùnj gànàtàj rayiꞌî nânj dânj,
ni̱ si nitaj si gaꞌmînj dàj ga̱huin,
ni̱ si nitaj si gidigán nej yìꞌnï̀nꞌ nuguanꞌ ga̱huin chru̱n nej suj doj ràꞌaj.
7 Daranꞌ nej rasu̱n gasin sani̱ nitaj si niꞌin daꞌngaꞌ man,
dàj rûnꞌ nga achrá sij ngà rihia,
ñâꞌanj an,
ni̱ dàj gi̱ꞌhiôꞌ gi̱ni̱ꞌînꞌ ahuin chraꞌ achrá sôꞌ nga rihiaa ni̱ ngà ñâꞌanj an si dugu̱ꞌna gànàtàꞌ raꞌa sôꞌ riñan nej rasu̱n achrá dânj ràꞌaj.
8 Ni̱ sisi̱ si̱ gunïn hueꞌê nej síi nga gaꞌñanj nej sôꞌ chrun âꞌñànj an,
ni̱ ahuin nej sí gi̱ꞌhiaj yu̱gui ma̱ꞌan guendâ gàꞌànj gùtàꞌ nej sôꞌ ràꞌaj.
9 Huê danj na̱nj nej suj,
ni̱ nga gaꞌmin nej suj aꞌngô nânj gaꞌmin nej guiì sani̱ si nitaj si garânj daꞌngaꞌ ruhuâ nej guiì nej nuguanꞌ gaꞌmin nej suj,
ni̱ dàj gi̱ꞌhiaj ninj ga̱ra̱n daꞌnga ruhuâ ninj nga gaꞌmin nej suj ràꞌaj.
Hiôꞌ ni̱ man riñan nanèe gaꞌmin nej suj na̱nj ánj.
10 Ûta gàꞌì nej nânj gaꞌmin nej guiì hua ruhuâ yumiguìi,
ni̱ daranꞌ nej nânj dânj ni̱ nga gaꞌmin nej guiì ꞌngo̱ nuguanꞌan ni̱ dàñùn hua̱ sa ga̱ta̱j nuguanꞌ gaꞌmin ninj na̱nj ánj.
11 Sani̱ si gaꞌmin ꞌngo̱ guiì nuguanꞌan riñânj sani̱ nitaj si gunḯn sa gataj ninj,
ni̱ huín dàj rûnꞌ huin sí ꞌna̱ꞌ aꞌngô país,
ni̱ si gaꞌmînj nuguanꞌan riñan ꞌngo̱ guiì sani̱ nitaj si gunïn ninj nej nuguanꞌ gaꞌmînj riñan ninj ni̱ huin ninj dàj rûnꞌ huin sí ꞌna̱ꞌ aꞌngô país.
12 Huê danj na̱nj nej suj;
ni̱ si ûta huin ruhuâ nej suj ga̱na̱huin ra̱ꞌa nej suj ꞌngo̱ sun ri̱ki̱ Ma̱ꞌan Ñaꞌanj an riñan nej suj,
ni̱ du̱guꞌnïnꞌ nej suj gàchìnj nej suj sun gi̱niꞌñanj guendâ ga̱na̱huin nùkuaj ruhuâ nej dinï̂nt huin si-nùhuì Ma̱ꞌan Jesús.
13 Huê danj ni̱ nej suj aꞌmin nânj aꞌmin aꞌngô nej guiì,
ni̱ gàchìnj nìꞌhiaj nej suj riñan Ma̱ꞌan Ñaꞌanj an ni̱ gu̱ru̱gûñuꞌun ni̱ gàꞌhue gu̱nïn nej suj nej nuguanꞌ gaꞌmin nej suj ni̱ gànàtàꞌ nej suj riñan nej guiì.
14 Dadinꞌ si gaꞌmînj ngà Ma̱ꞌan Ñaꞌanj an nânj gaꞌmin aꞌngô nej guiì,
sani̱ naꞌhue ga̱ra̱n daꞌngaꞌ ruhuâj nùnj huin si gaꞌmînj,
ni̱ yàngàꞌ ni̱ gaꞌmin nanè nimânj ngà Ma̱ꞌan Ñaꞌanj an,
sani̱ nitaj nùnj garânj daꞌngaꞌ ruhuâj sa gaꞌmînj huê danj ni̱ nitaj si niꞌñanj sa gaꞌmînj mánj.
15 Hiôꞌ ni̱ nùnj si gi̱ꞌhia ràꞌaj.
Dùgùnàj huaj si gàꞌmìn ngà Ma̱ꞌan Ñaꞌanj an ngà nanè nimânj,
sani̱ huê danj na̱nj ña̱ꞌa̱n huaj si ga̱ra̱n daꞌnga ruhuâj rayiꞌî nuguanꞌ gàchìnj nìꞌhia;
ni̱ si gachra ngà nanè nimânj,
sani̱ huê danj na̱nj ña̱ꞌa̱n huaj si ga̱ra̱n daꞌngaꞌ ruhuâj nùnj huin si ga̱ta̱j nuguanꞌ ni̱ka̱j chraꞌ gachrâ.
16 Dadinꞌ si gaꞌmin hueꞌêꞌ rayiꞌî Ma̱ꞌan Ñaꞌanj an ngà nanè nimânt,
sani̱ ñan nnêꞌ dânj nne ꞌngo̱ sí nàsìnùnj un ni̱ gunïn sôꞌ si gaꞌminꞌ ngà Ma̱ꞌan Ñaꞌanj an.
Ni̱ dàj gi̱ꞌhiaj sôꞌ gàꞌhue gataj sôꞌ si huê danj huin yàngàꞌ,
si nitaj si garânj daꞌngaꞌ ruhuâ sôꞌ rayiꞌî nuguanꞌ gaꞌminꞌ ràꞌaj.
17 Dadinꞌ yàngàꞌ hia ni̱ sòꞌ,
ni̱ gaꞌhuiꞌ si guruhuâ Ma̱ꞌan Ñaꞌanj an;
sani̱ aꞌngô sí dânj ni̱ nitaj si ganahuin nùkuaj sôꞌ ngà si-chrej Ma̱ꞌan Ñaꞌanj an mánj.
18 Gaꞌhuí si guruhuâ Ma̱ꞌan Ñaꞌanj an dadinꞌ dànanj gaꞌmînj gàꞌì nej nânj aꞌmin aꞌngô nej guiì gàꞌ daꞌ daranꞌ nej suj.
19 Sani̱ garanꞌ ruhuâj ga̱ꞌmi̱n riñan nej dinï̂nt nìkòꞌ rukû Ma̱ꞌan Jesús ùnꞌùnꞌ nuguanꞌ ga̱ꞌhue ga̱ra̱n daꞌnga ruhuâ nej sij,
ni̱ ga̱huin chru̱n nej sij,
gàꞌ daꞌ si gàꞌmìn chi̱ꞌ mîn nej nuguanꞌ si̱ gaꞌhue ga̱ra̱n daꞌngàꞌ ruhuâ nej sij na̱nj ánj.
20 Nej suj di̱nï̂nj,
si̱ giꞌhiaj nej suj dàj rûnꞌ giꞌhiaj nej sílìj i mánj,
sani̱ ga̱nï̱n ruhuâ nej suj dàj rûnꞌ ga̱nï̱n ruhuâ nej sôꞌ dadinꞌ nej sôꞌ ni̱ nitaj si ganï̂n ruhuâ nej sôꞌ niꞌin nej sôꞌ gakï̱nꞌïn mánj,
na̱gi̱ꞌhiaj achij nej suj ma̱ꞌan nej suj.
21 Huê danj nnunj riñan si-ley Ma̱ꞌan Ñaꞌanj an ni̱ ta:
“Gàꞌmìn aꞌngô nânj màn ruhuâ yumiguìi riñan nej guiì,
ni̱ garan sûnj duꞌhua aꞌngô nej guiì ngà yumanꞌ nânj;
sani̱ gàꞌ danj ni̱ si̱ gunïn ninj sa gàꞌmìn mánj,
gataj Ma̱ꞌan Señor.”
22 Huê danj ni̱ aꞌngô nej nânj an huin ꞌngo̱ daꞌngaꞌa,
sani̱ sê riñan nej guiì gàꞌ guyumân ruhuâ niꞌin Ma̱ꞌan Ñaꞌanj an huin mánj,
daꞌngaꞌ nânj huin riñan nej guiì nitaj si guyumân ruhuâ niꞌin Ma̱ꞌan Ñaꞌanj an;
sani̱ nej nuguanꞌ dàj ga̱huin ni̱ sê riñan nej guiì nun gùyùmàn ruhuâ niꞌin Ma̱ꞌan Ñaꞌanj an huin mánj,
nej nuguanꞌ dàj ga̱huin guyumân riñan nej guiì gàꞌ guyumân ruhuâ niꞌin Ma̱ꞌan Ñaꞌanj an na̱nj ánj.
23 Huê danj,
ni̱ si màn chreꞌ daranꞌ nej dinï̂nt huin si-nùhuì Ma̱ꞌan Jesús ruhuâ ꞌngo̱ hueꞌe,
ni̱ gayiꞌì daranꞌ nej sôꞌ ni̱ gaꞌmin nej sôꞌ aꞌngô nânj aꞌmin nej guiì,
ni̱ gatûj ꞌngo̱ sí nitaj si chru̱n ya̱ya̱ka̱j guendâ ni̱ ꞌngo̱ sí nitaj si guyumân ruhuâ niꞌin Ma̱ꞌan Ñaꞌanj an.
Ni̱ si̱ ganï̂n ruhuâ sôꞌ si sinún nej suj ràꞌ saj ûn.
24 Sani̱ si daranꞌ nej sôꞌ màn hiuj dânj ganataꞌ dàj ga̱huin,
ni̱ gatûj ꞌngo̱ sí nun yumân ruhuâ niꞌin Ma̱ꞌan Ñaꞌanj an nej si gatûj ꞌngo̱ sí nitaj si chru̱n gahia ñan màn nej suj,
ni̱ gàꞌhue ga̱na̱ka̱j guendâ sôꞌ si huin sôꞌ sí gakï̱nꞌïn,
ni̱ na̱di̱giꞌñûn sôꞌ ma̱ꞌan sôꞌ riñan Ma̱ꞌan Ñaꞌanj an na̱nj ánj;
25 ni̱ gànàrùguìꞌ nej gakï̱nꞌ màn huì ruhuâ nimân sôꞌ;
huê danj ni̱ ganikï̂nꞌ rúdàkòj sôꞌ riñan hioꞌóo,
ni̱ ginûn ña̱ꞌa̱nj sôꞌ Ma̱ꞌan Ñaꞌanj an,
ni̱ gùyùmàn ruhuâ sôꞌ ni̱ ga̱ta̱j sôꞌ si yàngàꞌ hia ni̱ nne Ma̱ꞌan Ñaꞌanj an siganï̂nj nej suj.
Daꞌhui nej suj ga̱ꞌmi̱n nej suj daꞌ nìkòꞌ duguiꞌij
26 Hia̱j ni̱ dàj giꞌhiôꞌ ràꞌaj di̱nï̂nj.
Ni̱ nga naraꞌhuiꞌ nej suj,
ni̱ hua̱ ꞌngo̱ nej suj nikaj salmo,
hua̱ aꞌngô nej suj gi̱di̱gân nej yìꞌnï̀nꞌ nuguanꞌ sàꞌa,
hua̱ aꞌngô nej suj ga̱ꞌmi̱n aꞌngô nânj màn ruhuâ yumiguìi,
hua̱ aꞌngô nej suj ruhuâ gànàtàꞌ rayiꞌî nânj dânj,
ni̱ hua̱ aꞌngô nej suj ruhuâ ga̱na̱di̱gân nuguanꞌ huì rikî Ma̱ꞌan Ñaꞌanj an riñan nej suj.
Sani̱ ga̱ꞌmi̱n nej suj nuguanꞌ gi̱ꞌhiaj gànàrìꞌ ruhuâ nej dinï̂nt nìkòꞌ rukû Ma̱ꞌan Jesús.
27 Ni̱ si hua̱ ꞌngo̱ nej suj ga̱ꞌmi̱n aꞌngô nânj an,
ni̱ gàꞌhue si hua̱ huìj nej suj,
huàꞌnï̀nj nej suj ni̱ ga̱ꞌmi̱n nej suj,
sani̱ gànàꞌhuìj nej suj ni̱ nga gisîj gaꞌmin ꞌngo̱ nej suj ni̱ gàyìꞌì aꞌngô nej suj ga̱ꞌmi̱n nej suj;
ni̱ gànàtàꞌ nej suj rayiꞌî nuguanꞌ dânj.
28 Ni̱ si nitaj gànàtàꞌ rayiꞌî nânj dânj,
ni̱ si̱ gaꞌmin nej suj nânj dânj riñan nej dinï̂nt huin si-nùhuì Ma̱ꞌan Jesús mánj,
ga̱ꞌhue ga̱ꞌmi̱n nej suj nga nne ꞌngo̱ rïn nej suj riñan Ma̱ꞌan Ñaꞌanj an.
29 Huê danj na̱nj,
si màn nej sôꞌ ganataꞌ dàj gahuin ni̱ gaꞌmin huìj ni̱ huàꞌnï̀nj nej sôꞌ,
ni̱ aꞌngô nej sôꞌ ga̱ne ga̱na̱ka̱j guendâ rayiꞌî nej nuguanꞌ gunïn nej sôꞌ dânj.
30 Ni̱ si riñan ꞌngo̱ nej suj nne riñan chrun yîla ganadigân Ma̱ꞌan Ñaꞌanj an nùnj huin si ga̱ta̱j nuguanꞌ dânj,
ni̱ nga gisîj ganadigân sí si̱nï̱n dânj nuguan ga̱na̱huin ra̱ꞌa sôꞌ ni̱ dḯn ga̱ne duꞌhua sôꞌ daꞌnga ni̱ gaꞌmin aꞌngô sí dânj.
31 Dadinꞌ gàꞌhue gànàtàꞌ daranꞌ nej suj dàj ga̱huin sani̱ daꞌ goꞌngo̱ nej suj ga̱ꞌmi̱n,
daꞌnga ni̱ gaꞌhue ga̱huin chru̱n nej guiì,
ni̱ ga̱na̱huin yìtï̀nj ruhuâ ninj.
32 Ni̱ ni̱ka̱j chre̱j nanè nimân nej sôꞌ ganataꞌ dàj ga̱huin riñan nej sôꞌ;
33 dadinꞌ Ma̱ꞌan Ñaꞌanj an ni̱ nitaj si huin Ñaꞌanj gi̱ꞌhiaj ga̱che̱j ruhuâ nej guiì mánj.
Dadinꞌ giꞌhia si ga̱ dïnꞌïnj ruhuâ nej guiì,
dàj rûnꞌ giꞌhiaj sunj ngà daranꞌ nej guiì gè huin si-nùhuì Ma̱ꞌan Jesús,
34 dḯn ga̱ne duꞌhua nej siyànàa ñan màn nej dinï̂nt nìkòꞌ rukû Ma̱ꞌan Cristo;
dadinꞌ nitaj si giyiꞌnïnꞌ suun si ga̱ꞌmi̱n ninj,
dadinꞌ daꞌhui ninj gi̱nikaj chre̱j ni̱nj riñan nej síi,
dadinꞌ huê danj taj riñan si-ley Ma̱ꞌan Ñaꞌanj an.
35 Ni̱ si hua̱ ꞌngo̱ nuguanꞌ ruhuâ ninj ga̱huin chru̱n ninj,
ni̱ gàchìnj naꞌanj ninj nika ninj nga nne ninj dukuâ ninj;
dadinꞌ nitaj si dùgùnàj huaj si ga̱ꞌmi̱n ninj ñan màn nej sôꞌ nìkòꞌ rukû Ma̱ꞌan Cristo mánj.
36 Siganï̂nj nej suj gahui si-nùguànꞌ Ma̱ꞌan Ñaꞌanj an na̱nj nîꞌ,
ni̱ riñan ꞌngo̱ rïn nej suj guyumân si-nùguànꞌ Ma̱ꞌan Ñaꞌanj an nîꞌ.
37 Si hua̱ ꞌngo̱ nej suj ganï̂n ruhuâ si huin nej suj sí ganataꞌ dàj ga̱huin,
ni̱ ga̱na̱ka̱j guendâ nej suj si nej nuguanꞌ gachrûnj ni̱ huin nej nuguanꞌ giyiꞌnïnꞌ su̱n giꞌhiaj Ma̱ꞌan Señor.
38 Sani̱ si naꞌhuej nej suj ga̱na̱ka̱j guendâ nej suj ni̱ si̱ ganakaj guendâ nej suj mánj.