Sa ꞌì ruhuôꞌ huin sa ña̱ꞌa̱n doj
13
Si chrùnj gàꞌmìn aꞌngô nânj aꞌmin nej guiì ni̱ chrùnj gàꞌmìn aꞌngô nej nânj gaꞌmin nej ángel,
sani̱ si nitaj si ꞌì ruhuâj niꞌín nej duguiꞌí,
ni̱ gahuín dàj rûnꞌ huin agaꞌ ânun,
nej si gahuín dàj rûnꞌ huin agaꞌ chra.
2 Ni̱ si chrùnj gànàtàj dàj gàhuin,
ni̱ si chrùnj garan daꞌngaꞌ ruhuâj daranꞌ nej nuguanꞌ hua̱ huìi ni̱ nùnj huin si chru̱n nï̀nꞌ ruhuâj,
ni̱ nùnj si ûta nìko guyumân ruhuâj,
ni̱ ga̱ꞌhue gi̱ꞌhia ga̱huin anêj kïj ï riñan nej duguiꞌij,
sani̱ si nitaj si ꞌì ruhuâj niꞌín nej duguiꞌí,
hiôꞌ ni̱ nitaj nùnj huín mánj.
3 Ni̱ nùnj huin si gùnùchràꞌ dàꞌà daranꞌ nej siꞌhia ni̱ gàꞌhuìj ya nej guiì gànìki,
ni̱ nùnj huin si ga̱ ruhuâj si ga̱chri̱ ñaꞌan nej sij nneè ku,
sani̱ si nitaj si ꞌì ruhuâj niꞌín nej duguiꞌí,
hiôꞌ ni̱ nitaj nùnj gue̱nda̱ niꞌñanj nej sa gi̱ꞌhia mánj.
4 Ni̱ sí ꞌì ruhuâ ni̱ ga̱ ruhuâ sôꞌ gi̱ranꞌ sa̱ñu̱n sôꞌ,
ni̱ sí ꞌì ruhuâ ni̱ ga̱ ni̱ꞌña̱nj sôꞌ ngà nej guiì;
sí ꞌì ruhuâ ni̱ nitaj si huin yìkòj ruhuâ sôꞌ,
sí ꞌì ruhuâ ni̱ nitaj si ûta nne̱ sôꞌ,
ni̱ nitaj si giꞌhiaj sôꞌ si ûta huin sôꞌ;
5 nitaj si giꞌhiaj sôꞌ sa dugu̱ꞌna huaa,
nitaj si ganï̂n ruhuâ sôꞌ man guendâ ꞌngo̱ rïn sôꞌ,
ni̱ nitaj si ginaꞌan ruhuâ sôꞌ,
nitaj si gananun ruhuâ sôꞌ sa aꞌnanꞌ giꞌhiaj nej guiì ngà sôꞌ;
6 nitaj si ganahuin nìhiàꞌ ruhuâ sôꞌ nga giꞌhiaj nej guiì gakï̱nꞌïn mánj,
ganahuin nìhiàꞌ ruhuâ sôꞌ ngà nej guiì gaꞌmin nuguanꞌ yàngàꞌa.
7 Giranꞌ sa̱ñu̱n sôꞌ rayiꞌî daranꞌanj,
ni̱ yìtï̀nj guyumân ruhuâ sôꞌ,
ni̱ daranꞌ diû anaꞌhuìj sôꞌ,
ni̱ hua̱ nùkuaj ruhuâ sôꞌ nga giranꞌ sa̱ñu̱n sôꞌ.
8 Sa ꞌì ruhuôꞌ ni̱ nìgànj chre gaj;
sani̱ ga̱na̱huij nej sí gànàtàꞌ dàj ga̱huin,
ni̱ ga̱na̱huij nej nânj gaꞌmin nej guiì,
ni̱ si̱ gimân nej sí chru̱n nï̀nꞌ ruhuâ gàꞌ mánj.
9 Dadinꞌ sìgànï̀nj niꞌînꞌ,
ni̱ man da̱ꞌa̱j ganatôꞌ dàj ga̱huin;
10 sani̱ nga gùyùmàn diû gaꞌna sa chru̱nꞌ nï̀nꞌ daranꞌanj,
hiôꞌ ni̱ ga̱na̱huij sa sìgànï̀nj niꞌînꞌ.
11 Nga gahuín sílìj i,
ni̱ gaꞌmînj dàj rûnꞌ gaꞌmin sílìj i,
ni̱ ganï̂n ruhuâj dàj rûnꞌ ganï̂n ruhuâ sílìj i;
ni̱ ganakaj guendaj dàj rûn ganakaj guendâ sílìj i;
sani̱ nga gahuín sí achij i,
ni̱ guduna nej sa giꞌhia nga gahuín sílìj i.
12 Hia̱j ni̱ niꞌînꞌ Ma̱ꞌan Ñaꞌanj an dàj rûnꞌ ꞌhioꞌ nga giniꞌhio riñunꞌ riñan nne gunïnꞌïn,
ni̱ nda dàchrè chre ruguiꞌ giniꞌhioꞌ;
sani̱ nga gùyùmàn gui dânj ni̱ gi̱niꞌînꞌ riñan Ma̱ꞌan Ñaꞌanj an.
Hia̱j ni̱ mân sìgànï̀nj niꞌînꞌ;
sani̱ nga gùyùmàn gui dânj ni̱ gi̱ni̱ꞌînꞌ dàj daꞌhuí gi̱ni̱ꞌînꞌ na̱nj ánj.
13 Hia̱j ni̱ gùyùmàn yìtï̀nj ruhuôꞌ,
ni̱ gànàꞌhuìꞌ,
ni̱ ga̱ ꞌì ruhuôꞌ niꞌinꞌ nej duguiꞌ,
sani̱ sa nìko doj siganï̂nj nej huàꞌnï̀nj nuguanꞌ nânj huin si ga̱ ꞌì ruhuôꞌ niꞌînꞌ nej duguiꞌ na̱nj ánj.