Sun rikî Ma̱ꞌan Ñaꞌanj an
12
Garanꞌ ruhuâj,
si gi̱ni̱ꞌin nej suj si ûta nìko hua sa gàꞌhue ri̱ki̱ Ma̱ꞌan Espíritu Santo riñan daꞌ goꞌngo̱ nej suj.
2 Gàꞌ niꞌin nej suj nga gahuin nej suj sí nàsìnùnj un,
ni̱ daꞌ gui ni̱ nìkòꞌ nej suj huaꞌanj nej suj rukû aꞌngô nej síi ni̱ gaꞌanj nìꞌhia nej suj,
ni̱ dàj rûnꞌ gata nej sôꞌ nej ñaꞌanj naꞌhue ga̱ꞌmi̱n,
huê danj giꞌhiaj nej sôꞌ ngà nej suj.
3 Huê danj ni̱ gataj naꞌân gu̱nïn nej suj si gàꞌ si ꞌngo̱ nej sí gaꞌmin gi̱ꞌhiaj Ma̱ꞌan si-Espíritu Ma̱ꞌan Ñaꞌanj an ni̱ si̱ gaꞌhue ga̱ta̱j nej sôꞌ:
“Si sa kï̱j huaa huin Ma̱ꞌan Jesús;”
ni̱ gàꞌ si ꞌngo̱ nej síi si̱ gaꞌhue ga̱ta̱j:
“Si Señor huin Ma̱ꞌan Jesús”,
si nuhuiꞌ Ma̱ꞌan Espíritu Santo giꞌhiaj ga̱ꞌmi̱n sôꞌ mánj.
4 Ni̱ hua̱ gàꞌì nej sa gàꞌhue ga̱ra̱n sunꞌ rikî Ma̱ꞌan Espíritu Santo,
sani̱ ꞌngo̱ rïn Ma̱ꞌan hua.
5 Ni̱ hua̱ gàꞌì yìꞌnï̀nꞌ nej sun ri̱ki̱ Ma̱ꞌan Señor riñunꞌ,
sani̱ ꞌngo̱ rïn Ma̱ꞌan huin.
6 Ni̱ hua gàꞌì sa gàꞌhue gi̱ꞌhiôꞌ,
sani̱ Ma̱ꞌan Ñaꞌanj an,
huin sa gu̱ru̱gûñuꞌunj daꞌnga ni̱ gaꞌhue gi̱ꞌhioꞌ nej sun dânj.
7 Sani̱ Ma̱ꞌan Espíritu Santo huin sa nadigân si gaꞌhuij ꞌngo̱ suun riñan nej sij guendâ ga̱ꞌhue ga̱na̱huin yìtï̀nj ruhuâ daꞌ goꞌngo̱ nej sij.
8 Dadinꞌ gaꞌhuiꞌ Ma̱ꞌan Espíritu Santo riñan da̱ꞌa̱j nej sij nuguanꞌ chru̱n nï̀nꞌ ruhuâ nej sij ni̱ riñan aꞌngô da̱ꞌa̱j nej sij gaꞌhuij si gi̱ni̱ꞌin nï̀nꞌ ruhuâ nej sij;
ni̱ Ma̱ꞌan Espíritu Santo gaꞌhuiꞌ dàj garanꞌ ruhuaj riñan nej sij;
9 ni̱ huê gè Ma̱ꞌan Espíritu Santo,
gaꞌhuiꞌ si gùyùmàn nìko ruhuâ aꞌngô nej sij;
ni̱ riñan aꞌngô nej sij gaꞌhuij si gaꞌhue gi̱ꞌhiaj nej sij si ga̱na̱huin nej guiì.
10 Ni̱ aꞌngô nej sij gaꞌhuij si gi̱ꞌhiaj nej sij si ga̱na̱huin nej guiì orâ chre;
ni̱ aꞌngô nej sij ganahuin ra̱ꞌa sun gànàtàꞌ dàj gahuin;
ni̱ aꞌngô nej sij ganahuin ra̱ꞌa sun chru̱n ga̱ra̱n daꞌnga ruhuâ;
ni̱ aꞌngô nej sij gaꞌhuij si ga̱ꞌmi̱n nej sij gàꞌì yiꞌnï̀nꞌ nej nânj an;
ni̱ aꞌngô nej sij chru̱n gànàtàꞌ rayiꞌî nej nânj dânj.
11 Sani̱ huê gè Ma̱ꞌan Espíritu Santo huin sa giꞌhiaj daranꞌ nej sun nânj,
ni̱ gadaꞌngaj riñan daꞌ goꞌngo̱ nej guiì dàj garanꞌ ma̱ꞌan ruhuaj.
ꞌNgo̱ rïn nneè kúu huin daranꞌ nêꞌ
12 Dadinꞌ dàj rûnꞌ hua ꞌngo̱ rïn nneè kûꞌ,
ni̱ hua̱ gàꞌì yìꞌnï̀nꞌ man,
sani̱ daranꞌ nej yìꞌnï̀nꞌ nej sa hua̱ nneè kûꞌ,
ni̱ ꞌngo̱ rïn nneè kûꞌ huin,
ni̱ huê danj hua Ma̱ꞌan Cristo.
13 Dadinꞌ darûnꞌ,
ni̱ nùnj huin si huînꞌ sí judío ni̱ huînꞌ sí griego,
nej si hua̱ yi̱ruꞌhue,
nej si hua̱ nîꞌnïnj riñunꞌ;
ni̱ nga gataꞌ nneꞌ,
ni̱ ganahuînꞌ ꞌngo̱ rïn nneè kúu ngà Ma̱ꞌan Cristo gi̱ꞌhiaj Ma̱ꞌan Espíritu Santo,
ni̱ ganahuin ro̱ꞌoꞌ ngo̱ rïn Ma̱ꞌan Espíritu Santo.
14 Dadinꞌ nneè kûꞌ ni̱ sê ꞌngo̱ rïn huin mánj,
ûta gàꞌì yiꞌnï̀nꞌïn hua.
15 Ni̱ si ga̱ta̱j dakôt gu̱nïn nneè kûꞌ:
“Sê raꞌât huín ni̱ sê nneè kúꞌ huín mánj”,
hiôꞌ ni̱ ga̱ꞌhue gu̱na neꞌ ye̱ꞌ nneè kûꞌ na̱nj nîꞌ.
16 Ni̱ si ga̱ta̱j rakï̂t gu̱nïn nneè kûꞌ:
“Ñan sê rune ñant huín ni̱ sê nneè kúꞌ huín”,
hiôꞌ ni̱ ga̱ꞌhue gu̱na neꞌ yèꞌ nneè kûꞌ na̱nj nîꞌ.
17 Ni̱ si daꞌ hua gè nneè kûꞌ ni̱ gahuin rune ñunꞌ,
ni̱ dànèꞌ gùnàj hiuꞌuj rakï̂t ràꞌaj.
Ni̱ si daꞌ hua̱ gè nneè kûꞌ gahuin hiuꞌuj tàj rakï̂t,
ni̱ dànèꞌ gùnàj dakï̂nꞌ ràꞌaj.
18 Sani̱ Ma̱ꞌan Ñaꞌanj an huin sa gachrûn daꞌ goꞌngo̱ nej yiꞌnï̀nꞌ dânj riñan nneè kûꞌ,
dàj rûnꞌ garanꞌ ruhuaj.
19 Dadinꞌ si ni̱ gahuînꞌ ꞌngo̱ rïn yiꞌnï̀nꞌin.
Ni̱ dànèꞌ gùnàj nè kûꞌ ràꞌaj.
20 Ûta gàꞌì yiꞌnï̀nꞌïn nikaj nneè kûꞌ,
sani̱ ꞌngo̱ rïn nneè kûꞌ huin.
21 Ni̱ si̱ gaꞌhue ga̱ta̱j rune ñunꞌ gu̱nïn roꞌôꞌ:
“Nitaj si niꞌñân sòꞌ mánj”,
ni̱ si̱ gaꞌhue ga̱ta̱j ahuîꞌ gu̱nïn dakôt:
Nitaj si niꞌñân sòꞌ mánj.
22 Si ganï̂n ruhuôꞌ si nitaj nùnj niꞌñanj ꞌngo̱ yiꞌnïnꞌ nneè kûꞌ,
sani̱ huej huin sa ña̱ꞌa̱n doj;
23 ni̱ yiꞌnïnꞌ nneè kûꞌ sa ganï̂n ruhuôꞌ si nitaj si huin sa ña̱ꞌa̱n doj,
ni̱ huej huin sa nagiꞌhiaj nìhiòꞌ doj;
ni̱ yiꞌnï̀nꞌ nneè kûꞌ sa nitaj si ganahuij ruhuôꞌ na̱gi̱ꞌhiaj nìhiòꞌ nìkôꞌ ni̱ huej huin sa nagiꞌhiaj nìhiàꞌ nìkôꞌ doj.
24 Dadinꞌ yiꞌnïnꞌ nneè kûꞌ sa nagiꞌhiaj nìhiòꞌ doj,
ni̱ nun daꞌhui ga̱ nìhiaj doj gàꞌ saj mánj;
sani̱ Ma̱ꞌan Ñaꞌanj an huin sa gaꞌnïnꞌ suun riñan nneè kûꞌ si huê danj ganahuin nìhiaj doj riñan aꞌngô nej yiꞌnï̀nꞌ nneè kûꞌ sa ri̱ña̱n nitaj si hua̱ nìhiàꞌ nìko doj,
25 daꞌnga ni̱ ga̱ gu̱ña̱n ruhuâ nneè kûꞌ,
ni̱ ganahuij ruhuaj niꞌin daꞌ goꞌngo̱ nej duguiꞌij.
26 Huê danj ni̱ si giranꞌ sa̱ñu̱n ꞌngo̱ nej sa hua̱ riñan nneè kûꞌ,
huê danj ni̱ giranꞌ sa̱ñu̱n nï̀nꞌ gàchràꞌ nneè kûꞌ,
huê danj ni̱ si hua̱ ꞌngo̱ sa hua̱ riñan nneè kûꞌ ganahuin ra̱ꞌa sa hua̱ hueꞌê,
huê danj ni̱ ganahuin hueꞌê ruhuâ nï̀nꞌ gàchràꞌ nneè kûꞌ.
27 Ni̱ nej suj,
huin nneè kú Ma̱ꞌan Cristo,
ni̱ daꞌ goꞌngo̱ nej suj nikaj ꞌngo̱ suun riñan Ma̱ꞌan Cristo.
28 Ni̱ ganï̂n Ma̱ꞌan Ñaꞌanj an da̱ꞌa̱j nej sôꞌ siganï̂nj nej sôꞌ huin si-nùhuì Ma̱ꞌan Jesús,
ni̱ gàꞌ si̱nï̱n ganïnj nej sôꞌ gaꞌanj gi̱di̱gân si̱nï̱n,
neꞌ rùkù ganïnj nej sôꞌ ganataꞌ dàj ga̱huin,
neꞌ rùkù ganïnj nej sôꞌ chru̱n gi̱di̱gân,
ni̱ gaꞌhuij suun ginikaj nej sí giꞌhiaj ga̱na̱huin nej guiì orâ chre,
ganïnj nej sí gi̱ꞌhiaj ga̱na̱huin nej guiì ràn doj,
ni̱ ganïnj nej sí guruguñuꞌunj,
ni̱ ganïnj nej sí ni̱ka̱j ñuꞌunj,
ni̱ ganïnj nej sí ga̱ꞌmi̱n aꞌngô nej nânj aꞌmin nej guiì.
29 Ni̱ daranꞌ nej sij huin sí gaꞌanj gi̱di̱gân si̱nï̱n na̱nj nîꞌ.
Daranꞌ nej sij huin sí gànàtàꞌ dàj ga̱huin na̱nj nîꞌ.
Daranꞌ nej sij huin sí chru̱n gi̱di̱gân na̱nj nîꞌ.
Daranꞌ nej sij huin sí giꞌhiaj ga̱na̱huin nej guiì orâ chre na̱nj nîꞌ,
sê danj huin mánj.
30 Ni̱ka̱j daranꞌ nej sij sun gi̱ꞌhiaj ga̱na̱huin nej guiì ràn doj na̱nj nîꞌ.
Daranꞌ nej sij gaꞌmin aꞌngô nânj gaꞌmin aꞌngô nej guiì na̱nj nînꞌ.
Ni̱ daranꞌ nej sij ganataꞌ rayiꞌî nânj gaꞌmin aꞌngô nej guiì na̱nj nîꞌ.
31 Du̱guꞌnïnꞌ nej suj,
gi̱ni̱kaj nej suj nej sun hua̱ hueꞌê doj.
Sani̱ gidigán aꞌngô chrej hua̱ hueꞌê doj riñan nej suj na̱nj ánj.