11
Gi̱ꞌhiaj nej suj sa sàꞌaj dàj rûnꞌ giꞌhiâ,
dadinꞌ ñùnj ni̱ giꞌhia dàj rûnꞌ giꞌhiaj Ma̱ꞌan Cristo sa sàꞌaj na̱nj ánj.
Dàj gi̱ꞌhiaj nej siyànàa ngà ahui ninj
2 Gaꞌmin hueꞌê,
rayiꞌî nej suj na̱nj dinï̂n,
dadinꞌ gananun ruhuâ nej suj niꞌin nej suj daranꞌ sa gachin riñânj,
ni̱ huê danj na̱nj ûta hueꞌê dugumîn nej suj nej nuguanꞌan dàj rûnꞌ gidigán ni̱ dàj rûnꞌ gaꞌnḯn suun riñan nej suj.
3 Sani̱ garanꞌ ruhuâj si gi̱ni̱ꞌin nej suj si Ma̱ꞌan Cristo huin sa gaꞌnïnꞌ riñan daranꞌ nej síi,
ni̱ síi huin sa gaꞌnïnꞌ riñan siyànàa,
ni̱ Ma̱ꞌan Ñaꞌanj an huin sa gaꞌnïnꞌ riñan Ma̱ꞌan Cristo.
4 Daranꞌ nej sí garán atsìj i ahui nga gaꞌmin nej sôꞌ ngà Ma̱ꞌan Ñaꞌanj an ni̱ ganataꞌ nej sôꞌ dàj ga̱huin ni̱ giꞌhiaj nej sôꞌ si gìrìꞌ nàꞌàj ahui nej sôꞌ guendâ hua̱ nej sôꞌ dànanj.
5 Sani̱ daranꞌ nej siyànà nun garán ahui nga gaꞌmin ninj ngà Ma̱ꞌan Ñaꞌanj an ni̱ ganataꞌ ninj dàj gahuin,
ni̱ giꞌhiaj ninj si gìrìꞌ nàꞌàj ahui ninj;
dadinꞌ dàj rûn huin si gaka ninj huê màn ahui ninj huin.
6 Dadinꞌ si nitaj si garán siyànàa ahui,
hiôꞌ ni̱ dùgùnàj huaj si gàꞌnej huê ahui;
ni̱ si giriꞌij sinàꞌàj a gàꞌnej huê ahui nej si ga̱ka kan ahui,
hiôꞌ ni̱ dùgùnàj huaj si ga̱ran ahui.
7 Dadinꞌ si̱ gaꞌhue gùtàꞌ síi atsìj i ahui sij,
dadinꞌ huin sij si-da̱ꞌngaꞌ Ma̱ꞌan Ñaꞌanj an ni̱ huin sij sí gi̱digân dàj hueꞌê hua Ma̱ꞌan Ñaꞌanj an;
ni̱ siyànàa gidigân dàj hueꞌê hua síi.
8 Dadinꞌ nga gi̱ꞌhiaj Ma̱ꞌan Ñaꞌanj an síi ni̱ nun ga̱ra̱n sunj siyànàa mánj,
ni̱ nga giꞌhiaj Ma̱ꞌan Ñaꞌanj an siyànàa ni̱ garânj sunj síi,
9 ni̱ sê rayiꞌî siyànàa giꞌhiaj Ma̱ꞌan Ñaꞌanj an síi mánj,
rayiꞌî síi giꞌhiaj Ma̱ꞌan Ñaꞌanj an siyànàa.
10 Rayiꞌî dan ni̱ siyànàa ni̱ ga̱ran atsìj i ahui ni̱ ga̱huin ꞌngo̱ daꞌngaꞌ ni̱ka̱j su̱n riñanj,
rayiꞌî nej ángel.
11 Sani̱ guendâ nej sí nìkòꞌ rukû Ma̱ꞌan Cristo ni̱ si nuhuiꞌ síi ni̱ si̱ gaꞌhue ga̱ siyànàa,
ni̱ si nuhuiꞌ siyànàa ni̱ si̱ gaꞌhue ga̱ síi mánj;
12 dadinꞌ nga giꞌhiaj Ma̱ꞌan Ñaꞌanj an siyànàa ni̱ garânj sunj nneè kú síi,
sani̱ huê danj na̱nj gaꞌnga síi riki siyànàa;
ni̱ Ma̱ꞌan Ñaꞌanj an huin sa gi̱ꞌhiaj gu̱ña̱n nguèj sij.
13 Ga̱ya̱ka̱j guendâ nej ma̱ꞌan nej suj:
Ni̱ si dùgùnàj huaj si nga ga̱ꞌmi̱n siyànàa ngà Ma̱ꞌan Ñaꞌanj an ni̱ ña̱ꞌa̱n huaj si gu̱taj atsìj i ahui.
14 Ni̱ sê gidigân nej sa màn ruhuâ yumiguì nânj:
Si nitaj si dùgùnàj huaj si gu̱du̱nâj síi si ga̱huin yèꞌè duhuê ahui sôꞌ ràꞌ saj ûnꞌ.
15 Ni̱ si gudunâj siyànàa gahuin yèꞌè duhuê ahui ni̱ dùgùnàj huaj;
dadinꞌ si-lugâ atsîj gutaꞌ ninj ahui ninj ni̱ gaꞌhuiꞌ Ma̱ꞌan Ñaꞌanj an duhuê ahui ninj na̱nj ánj.
16 Ngà daranꞌ nej nuguanꞌ gatâ,
ni̱ si hua̱ da̱ꞌa̱j nej sôꞌ ruhuâ gu̱nïn rayiꞌî nej nuguanꞌ nânj,
ni̱ nitaj si ni̱ka̱j chre̱j nej ñûnj rayiꞌî nej nuguanꞌ nânj,
ni̱ gàꞌ nitaj si ni̱ka̱j chre̱j si-nùhuì Ma̱ꞌan Ñaꞌanj an nej chrej nânj.
Sa gi̱ꞌhiôꞌ ngà gi̱doꞌoꞌ si-sena Ma̱ꞌan Señor
17 Sani̱ nej nuguanꞌ gachrûnj huaj riñan nej suj,
ni̱ sê si̱ gàtà si ûta hueꞌê hua sa giꞌhiaj nej suj mánj;
dadinꞌ sê si̱ ganaraꞌhuiꞌ nej suj guendâ gi̱ꞌhiaj nej suj sa hua̱ hueꞌê doj mánj,
ganaraꞌhuiꞌ nej suj guendâ gi̱ꞌhiaj nej suj sa aꞌnanꞌan.
18 Gàꞌ si̱nï̱n nuguanꞌ ganahuin ra̱ꞌá gi̱ꞌhiaj nej suj huin,
ni̱ nga naraꞌhuiꞌ nej suj huin si-nùhuì Ma̱ꞌan Jesús ni̱ gunḯn si giyichraꞌ da̱ꞌa̱j nej suj;
ni̱ da̱ꞌa̱j da̱nï̱n ni̱ guyumân ruhuâj rayiꞌî nuguanꞌ nânj.
19 Dadinꞌ hua̱ ni̱ña̱n si gìyìchràꞌ da̱ꞌa̱j nej suj,
daꞌnga ni̱ guruguiꞌij ahuin goꞌngo̱ hi̱a nej suj huin daꞌní Ma̱ꞌan Ñaꞌanj an.
20 Nga naraꞌhuiꞌ nej suj ya nej suj ni̱ sê si-sena Ma̱ꞌan Señor gidaꞌa nej suj mánj.
21 Dadinꞌ nga naga̱ne nej suj yâ nej suj,
ni̱ hua̱ da̱ꞌa̱j nej suj gayiꞌì gahuin stiꞌnï̀n si̱nï̱n;
ni̱ hua aꞌngô da̱ꞌa̱j nej suj ganachinj yiꞌnaa riki ni̱ aꞌngô da̱ꞌa̱j nej suj goꞌo ni̱ nagunï̂n nej suj.
22 Nùnj huin saj ni̱ giꞌhiaj nej suj dànanj ràꞌaj,
ni̱ nitaj dukuá nej suj hua si ya̱ nej suj ni̱ go̱ꞌo̱ nej suj ràꞌ saj ûnꞌ.
Si̱ nagiꞌhiaj ninaj nej suj si-nùhuì Ma̱ꞌan Ñaꞌanj an mánj,
si giꞌhiaj nej suj si gìrìꞌ nàꞌàj nej sí ran àko sàꞌ.
Nùnj huin si huin ruhuâ nej suj ràꞌaj.
Ûta hueꞌê gàꞌmìn riñan nej suj guendâ gi̱ꞌhiaj nej suj dànanj ruhuâ nej suj nîꞌ.
Si̱ gaꞌmin hueꞌê rayiꞌî nej suj guendâ giꞌhiaj nej suj dànanj mánj.
Guchruj su̱n si gi̱ꞌhiaj si-sena Ma̱ꞌan Señor
23 Dadinꞌ ganahuin raꞌá nej nuguanꞌ riki Ma̱ꞌan Señor ni̱ huê danj gidigân riñan nej suj:
Dadinꞌ ñanꞌ nga nagaꞌhuiꞌ Judas Iscariote Ma̱ꞌan Señor Jesús,
ni̱ gidaꞌa Ma̱ꞌan rachrúun;
24 ni̱ nga gisîj gaꞌhuij si guruhuâ Ma̱ꞌan Ñaꞌanj an,
ni̱ guchraꞌ da̱ꞌa rachrúun ni̱ gata:
“Gi̱daꞌa nej suj,
ni̱ ya̱ nej suj;
dadinꞌ nânj huin nneè kû ni̱ rayiꞌî nej suj giyichraꞌ da̱ꞌa;
ni̱ gi̱ꞌhiaj nej suj dànanj ni̱ ga̱na̱nun ruhuâ nej suj dàj giranꞌán.”
25 Ni̱ huê danj na̱nj gidaꞌa basû nun nne chruj uba,
ni̱ neꞌ rùkù nga gisîj gahuin stiꞌnïnj,
ni̱ gata:
“Sa nu̱n ruhuâ basû nânj huin tún ni̱ nngaj nagiꞌhiaj nàkàj si-nùguànꞌànj ngà nej síi;
ni̱ daꞌ goꞌo nej suj nne chruj uba ni̱ ga̱na̱nun ruhuâ nej suj sa giranꞌán.”
26 Huê danj ni̱,
daran diû nga gidaꞌa nej suj ni̱ ya nej suj rachrún,
ni̱ go̱ꞌo̱ nej suj nne chruj uba nu̱n ruhuâ basû nânj,
ni̱ ganataꞌ naꞌanj nej suj riñan aꞌngô nej guiì si gahuiꞌ Ma̱ꞌan Señor Jesús ni̱ huê danj gi̱ꞌhiaj nej suj nda gui nànìkàj ñunj gàꞌnàj.
Guiì giꞌhiaj gakï̱nꞌïn ni̱ gidaꞌa ninj si-sena Ma̱ꞌan Señor ni̱ nitaj si hua̱ hueꞌej
27 Huê danj ni̱ ahuin na̱nj sí gidaꞌa Sena nga yâ sôꞌ rachrúun ni̱ goꞌo sôꞌ nne chruj uba nu̱n ruhuâ basû nânj ni̱ si nitaj si aché ni̱ka̱ sôꞌ riñan Ma̱ꞌan Ñaꞌanj an,
ni̱ giꞌhiaj sôꞌ gakï̱nꞌïn ngà nneè kú ni̱ ngà tun Ma̱ꞌan Señor Jesús na̱nj ánj.
28 Huê danj ni̱ ga̱na̱ka̱j guendâ nej suj dàj hua daꞌ goꞌngo̱ nej suj,
daꞌnga ni̱ gaꞌhue ya̱ nej suj rachrúun ni̱ go̱ꞌo̱ nej suj nne chruj uba nu̱n ruhuâ basû nânj.
29 Dadinꞌ nej guiì ni̱ yâ ni̱ goꞌo ninj sani̱ nitaj si aché ni̱ka̱ ninj riñan Ma̱ꞌan Ñaꞌanj an,
ni̱ nitaj si garânj daꞌnga ruhuâ ninj si sa ha̱i̱i huin nneè kú Ma̱ꞌan Señor,
ni̱ yâ ninj sani̱ hua̱ na̱nj giꞌhiaj ninj gakï̱nꞌïn ni̱ yâ ninj guendâ ma̱ꞌan ninj.
30 Guendâ rayiꞌî giꞌhiaj ninj dànanj ni̱ ûta mân nej guiì aꞌnanꞌan ni̱ màn nej guiì gininaj ruhuâ siganï̂nj ninj,
ni̱ ûta gàꞌì ninj gàꞌ gahuiꞌ ngà nimân ninj.
31 Ni̱ si hueꞌê na̱di̱giꞌñûnꞌ dàj huoꞌ riñan Ma̱ꞌan Ñaꞌanj an,
hiôꞌ ni̱ si̱ gitá gakï̱nꞌïn yichrôꞌ gi̱ꞌhiaj Ma̱ꞌan Ñaꞌanj an mánj.
32 Sani̱ si riki Ma̱ꞌan Señor kastîgu riñunꞌ,
ni̱ giꞌhia dànanj daꞌnga ni̱ gahuin chru̱nꞌ ni̱ si̱ gaꞌanj ni̱ꞌhio̱ꞌ dàj rûnꞌ gaꞌanj ni̱ꞌhia̱ nej guiì màn ruhuâ yumiguìi mánj.
33 Huê danj na̱nj,
nej suj dinḯn ma̱ꞌan,
ni̱ nga naraꞌhuiꞌ nej suj ya̱ nej suj,
ni̱ gànàꞌhuìj nej suj ꞌngo̱ ni̱ aꞌngô nej duguiꞌ nej suj.
34 Ni̱ si hua̱ ꞌngo̱ nej suj ganachinj yiꞌnaa riki,
ni̱ ya̱ nej suj dukuâ nej suj,
daꞌnga ni̱ si̱ gataꞌ gakï̱nꞌïn yichrá nej suj gi̱ꞌhiaj Ma̱ꞌan Ñaꞌanj an.
Ni̱ aꞌngô nej sa ga̱chin ga̱na̱huin ni̱ka̱ siganï̂nj nej suj ni̱ na̱gi̱ꞌhiaj ni̱ka̱j nga gùchìj ñan màn nej suj na̱nj ánj.