Giꞌhiaj yu̱gui nej sij dàj gi̱da̱ꞌa nej sij Ma̱ꞌan Jesús
26
Nga gisîj ganahuij Ma̱ꞌan Jesús gidiganj daranꞌ nej nuguanꞌ nânj, ni̱ gata gu̱nïn nej sí ꞌna̱ꞌ ga̱huin chru̱n riñanj:
2 —Gàꞌ niꞌin nej suj si yichrá huìj gui ni̱ gùyùmàn giꞌñanj pascua, ni̱ nàgàꞌhuìꞌ nej síi Ma̱ꞌan Cristo guendâ du̱nikòꞌ rùgùtsì nej sij riñan rugutsìi Ma̱ꞌan.
3 Ni̱ huê gè gui dânj ni̱ ganahuin chre̱ꞌ nej rej huin ña̱an, nga nej maestrû chru̱n ley ni̱ nej síchìj achij màn ruhuâ yumanꞌan riñan hueꞌ huin dukuâ rej huin ña̱n nï̀nꞌ gùꞌnàj Kaifás.
4 Ni̱ ganarïsnaꞌanj nej sij dàj ga̱ꞌhue gi̱di̱gañuꞌunj nej sij ni̱ gidaꞌa nej sij Ma̱ꞌan Jesús, guendâ da̱gahuiꞌ nej sij Ma̱ꞌan.
5 Sani̱ gataj nej sí dânj:
—Si̱ gidaꞌa nêꞌ sij gui nga ga̱huin giꞌñanj an, dadinꞌ ûta ga̱gua̱j nej guiì yùmànꞌan gi̱ni̱ꞌin ninj nêꞌ.
Gachrîj ꞌngo̱ siyànàa gasîti Ma̱ꞌan Jesús
6 Ni̱ nne Ma̱ꞌan Jesús yumanꞌ Betania; dukuâ Simón sí ginûn yiꞌì lepra,
7 Ni̱ gaꞌnaꞌ ꞌngo̱ siyànàa riñan Ma̱ꞌan, ni̱ ni̱ka̱j siyànà dânj ꞌngo̱ basû nu̱n nne gïnꞌ dàj a ni̱ ûta nìko sanꞌanj an du̱ꞌhue̱, ni̱ gutâj siyànà dânj ahui Ma̱ꞌan Jesús, nga nï̀nꞌ nne yiꞌnḯn mesa.
8 Ni̱ nga giniꞌin, nej sí ꞌna̱ꞌ ga̱huin chru̱un dàj giꞌhiaj siyànà nânj ngà Ma̱ꞌan Jesús ni̱ ginaꞌan ruhuâ nej sôꞌ ni̱ gataj nej sôꞌ:
—Nùnj huin saj ni̱ girëꞌ chre nne gïnꞌ dàj nânj ràꞌaj.
9 Dadinꞌ ga̱ꞌhue gànèꞌ nne gïnꞌ dàj nânj ni̱ ûta nìko sanꞌanj an gìrìꞌ duꞌhue ni̱ sanꞌanj nânj, gàꞌhuìꞌ raꞌa nej guiì gànìki.
10 Ni̱ garânj daꞌngaꞌ ruhuâ Ma̱ꞌan Jesús dàj ganï̂n ruhuâ nej sij ni̱ gata gu̱nïn nej sij:
—Nùnj huin saj ni̱ garanꞌ ñuꞌunj nej suj siyànà nânj ràꞌaj. Dadinꞌ dùgùnàj hua sa sàꞌ giꞌhia ngàj.
11 Dadinꞌ daranꞌ diû gimàn nej guiì gànìki ngà nej suj, sani̱ ñùnj ni̱ sê daranꞌ diû ga̱né ngà nej suj mánj.
12 Dadinꞌ guendâ gutâj siyànà nânj nne gïnꞌ dàj a nneè kû, ni̱ gàꞌ giꞌhiaj yu̱gui nneè kû guendâ gàchìnꞌ nej sij ñùnj.
13 Yàngàꞌ hia nï̀nꞌ gàtà ni̱ dànèꞌ gahuin ga̱ꞌmi̱n nej sij nuguanꞌ gi̱ꞌhiaj ga̱na̱ni̱n nej guiì, ni̱ nï̀nꞌ gàchràꞌ ruhuâ yumiguìi ni̱ gu̱nu̱na̱ nej sij sa giꞌhiaj siyànà nânj ngàj, guendâ ga̱na̱nun ruhuâ nej guiì sa giꞌhiaj siyànà nânj ngàj.
Nagaꞌhuiꞌ Judas Ma̱ꞌan Jesús
14 Hiôꞌ ni̱ gaꞌanj ꞌngo̱ sí gùꞌnàj Judas, riñan nej rej huin ña̱an, ni̱ huin sôꞌ ꞌngo̱ nej yùhuìj sí gaꞌnaꞌ ga̱huin chru̱n riñan Ma̱ꞌan Jesús.
15 Ni̱ gataj sôꞌ:
—Andaj gu̱ruꞌhue nej suj duꞌhuêj, ni̱ ga̱ꞌhue nàrìkìj Ma̱ꞌan Jesús riñan nej suj ràꞌaj.
Hiôꞌ ni̱ gaꞌhuiꞌ nej sí dânj ko̱ chi̱ꞌ sanꞌanj huin plata gahuin duꞌhue sij.
16 Ni̱ àsìj gui dânj ni̱ nanaꞌhuiꞌ Judas dàj gi̱ꞌhiaj sôꞌ ga̱ꞌhue nàgàꞌhuìꞌ sôꞌ Ma̱ꞌan Cristo riñan nej rej huin ña̱an.
Gaꞌnïnꞌ su̱n Ma̱ꞌan Jesús si gi̱daꞌa nej sij Sena
17 Gui si̱nï̱n nga guyumân giꞌñanj ya̱ nej sij rachrún nitaj si ꞌnï̱nj chru dunuꞌmanꞌan, ni̱ gaꞌnaꞌ nej sí ꞌna̱ꞌ ga̱huin chru̱n riñan Ma̱ꞌan Jesús, ni̱ gataj nej sôꞌ:
—Dànèꞌ garanꞌ ruhuâ Ma̱ꞌân rèꞌ si gi̱ꞌhiaj yu̱gui nej ñûnj ñan ya̱ Ma̱ꞌân rèꞌ pascua ràꞌaj.
18 Ni̱ gataj Ma̱ꞌan Jesús:
—Ga̱ꞌa̱nj nej suj yumanꞌ snàꞌànj ñan nne ꞌngo̱ sí dânj, ni̱ ga̱ta̱j nej suj gu̱nïn sôꞌ: “Ma̱ꞌan Maestrû gataj: Ni̱ gàꞌ gahuin nìchrùnꞌ diû gàhuìj; ni̱ ruhuâj gùchìj dukuât gi̱ꞌhiâ giꞌñanj pascua ngà nej sí ꞌna̱ꞌ ga̱huin chru̱n riñânj.”
19 Ni̱ giꞌhiaj nej sí ꞌna̱ꞌ ga̱huin chru̱un dàj rûnꞌ gaꞌnïnꞌ su̱n Ma̱ꞌan Jesús riñan nej sôꞌ ni̱ giꞌhiaj yu̱gui nej sôꞌ sa ya̱ nej sij pascua.
20 Nga ginìn ni̱ gaꞌanj ga̱ne Ma̱ꞌan Jesús yiꞌnḯn mesa, ngà nej yùhuìj sí ꞌna̱ꞌ ga̱huin chru̱n riñanj.
21 Ni̱ nga nï̀nꞌ yâ nej sij mân nej sij ni̱ gataj Ma̱ꞌan Jesús:
—Yàngàꞌ hia nï̀nꞌ gàtà ni̱ hua̱ ꞌngo̱ nej suj nàgàꞌhuìꞌ ñùnj riñan nej rej huin ña̱an.
22 Ni̱ nga gunïn nej sí ꞌna̱ꞌ ga̱huin chru̱un dànanj ni̱ ûta gananï̂n ruhuâ nej sô, ni̱ gayiꞌì daꞌ goꞌngo̱ nej sôꞌ ni̱ gataj nej sôꞌ:
—Ñùnj huin nîꞌ Señor.
23 Hiôꞌ ni̱ nanikàj Ma̱ꞌan Jesús ni̱ gata:
—Sí gidigï̂j raꞌa ngàj ruhuâ goꞌo, ni̱ sí dânj huin sa nàgàꞌhuìꞌ ñùnj na̱nj ánj.
24 Yàngàꞌ ni̱ gàꞌ huà gàꞌàn, dàj rûnꞌ taj riñan ñanj si-nùguànꞌ Ma̱ꞌan Ñaꞌanj an rayiꞌí, sani̱ ûta gi̱ranꞌ sa̱ñu̱n sí nàgàꞌhuìꞌ ñùnj raꞌa nej sí kï̱j huaa. Ni̱ dùgùnàj huaj si nun ga̱ꞌnga̱ sôꞌ saj áj.
25 Hiôꞌ ni̱ gaꞌmin Judas, sí nàgàꞌhuìꞌ Ma̱ꞌan Jesús ni̱ gataj sôꞌ:
—Ñùnj huin nîꞌ, Maestrûj.
Ni̱ gataj Ma̱ꞌan Jesús:
—Hueꞌ huin na̱nj ánj.
26 Ni̱ nga nï̀nꞌ yâ nej sij mân nej sij ni̱ gidaꞌa Ma̱ꞌan Jesús rachrúun, ni̱ gaꞌhuij si guruhuâ Ma̱ꞌan Ñaꞌanj an ni̱ gaꞌneꞌ da̱ꞌa, ni̱ gata:
—Gi̱da̱ꞌa nej suj ni̱ ya̱ nej suj; dadinꞌ nânj huin nneè ku.
27 Ni̱ gidaꞌa basû nu̱n nne uba ni̱ nga gisîj gaꞌhuij si guruhuâ Ma̱ꞌan Ñaꞌanj an, ni̱ gaꞌhuij raꞌa nej sí ꞌna̱ꞌ ga̱huin chru̱un ni̱ gata gu̱nïn nej sôꞌ:
—Go̱ꞌo̱ daranꞌ nej suj nne chruj uba.
28 Dadinꞌ huê nânj huin tún guendâ ga̱na̱huin nàkà si-nùguànꞌànj ngà nej suj, dadinꞌ gañan rayiꞌî ûta gàꞌì nej guiì guendâ gànàrë̀ꞌ si-ga̱kïnꞌ ninj.
29 Ni̱ gàꞌ gatâ gu̱nïn nej suj si àsìj gui hia̱j ni̱ si̱ goꞌój nne chruj uba nda gui go̱ꞌo̱ nàkà ñún ngà nej suj ñan nne Ma̱ꞌan Rê Ñaꞌanj ginikaj sùnj.
Gataj Ma̱ꞌan Jesús si gùyùmàn ꞌngo̱ orâ ni̱ ga̱ta̱j Pedro si nun niꞌin sôꞌ Ma̱ꞌan
30 Ni̱ nga gisîj gachrá nej sij chraꞌ huin salmos, ni̱ gaꞌanj nej sij kïj ñan màn chrun olibo.
31 Hiôꞌ ni̱ gataj Ma̱ꞌan Jesús:
—Daranꞌ nej suj gùrùguìꞌ chìꞌ ruhuâ niꞌin ñùnj ñanꞌ hia̱j; dadinꞌ huê danj taj riñan ñanj: “Ni̱ gu̱du̱ranꞌ yiꞌìj Ma̱ꞌan sôꞌ ni̱kï̱nꞌ dugumîn nej matsïj ï, ni̱ gàyàꞌnï̀n nej matsïj màn ruhuâ yingâ.”
32 Sani̱ neꞌ rùkù nga ga̱na̱huin nìꞌnàj siganï̂nj nej nîman, ni̱ ga̱ꞌa̱n neꞌ ña̱an riñan nej suj nda Galilea.
33 Nanikàj Pedro ni̱ gataj sôꞌ:
—Nùnj huin si gùrùguìꞌ chìꞌ ruhuâ daranꞌ nej sij niꞌin nej sij Ma̱ꞌân rèꞌ, sani̱ ñùnj ni̱ nitaj àmàn gùrùguìꞌ chìꞌ ruhuâj niꞌín Ma̱ꞌân rèꞌ mánj.
34 Ni̱ gataj Ma̱ꞌan Jesús:
—Yàngàꞌ hia nï̀nꞌ gàtà si ñanꞌ hia̱j ni̱ nga nï̀nꞌ gàchin ga̱gua̱j dêꞌlo̱j o, ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj na̱nj ánj.
35 Ni̱ gataj Pedro:
—Si huaj gàhuìj ngà Maꞌân rèꞌ, ni̱ ga̱ꞌhue gàhuìj.
Ni̱ huê dànanj gataj daranꞌ nej sí ꞌna̱ꞌ ga̱huin chru̱n riñan Ma̱ꞌan Jesús.
Gaꞌanj ga̱ꞌmi̱n Ma̱ꞌan Jesús ngà Ma̱ꞌan Ñaꞌanj an ñan gùꞌnàj Getsemaní
36 Hiôꞌ ni̱ guchiꞌ Ma̱ꞌan Jesús ngà nej sí ꞌna̱ꞌ ga̱huin chru̱n riñanj ñan gùꞌnàj Getsemaní, ni̱ gata gu̱nïn nej sôꞌ:
—Ga̱ne nej suj hiuj nânj ni̱ ga̱ꞌa̱nj gàꞌmìn ngà Ma̱ꞌan Ñaꞌanj an dangaꞌ mánj ni̱ gàꞌnàj.
37 Ni̱ ginika Pedro ngà nguèj daꞌní Zebedeo gaꞌan, ni̱ gayi̱ꞌij ni̱ ûta gananï̂n ruhuaj ni̱ guruguiꞌ si ûta gahuin ruhuaj.
38 Hiôꞌ ni̱ gata:
—Ûta gananï̂n ruhuâ ma̱ꞌan nimânj, ni̱ nda akuanꞌ nï̱n gàhuìj rûnꞌ ꞌhia; gùnàj nej suj hiuj nânj ni̱ ga̱ne nìꞌnàꞌ nej suj ngàj.
39 Ni̱ gaꞌan neꞌ ña̱n doj ni̱ ganikïnꞌ rúdako ni̱ gaganꞌ hio riñan hioꞌóo, ni̱ gaꞌmin ngà Ma̱ꞌan Ñaꞌanj an ni̱ gata:
—Tâj huê Maꞌân rèꞌ huin Rê, si ga̱ꞌhue ni̱ gi̱ꞌhiaj Ma̱ꞌân rèꞌ si ga̱huin anêj kopa nânj riñânj; sani̱ sê sa garanꞌ ruhuâj huin sa gi̱ꞌhiaj Ma̱ꞌân rèꞌ mánj, gi̱ꞌhiaj Ma̱ꞌân rèꞌ sa garanꞌ ruhuâ Ma̱ꞌân rèꞌ.
40 Ni̱ nani̱ka gaꞌnaj ñan nne nej sí ꞌna̱ꞌ ga̱huin chru̱n riñanj ni̱ ganariꞌij si gàꞌ atoj nej sôꞌ mân nej sôꞌ hiuj dânj ni̱ gata gu̱nïn Pedro:
—Hiôꞌ ni̱ nun gùnùkuaj nej suj ga̱ne nìꞌnàꞌ nej suj ꞌngo̱ orâ ngàj nga ûnꞌ.
41 Dugumîn hueꞌê nej suj ma̱ꞌan nej suj ni̱ ga̱ꞌmi̱n nej suj ngà Ma̱ꞌan Ñaꞌanj an; daꞌnga ni̱ si̱ gininj nej suj riñan gakï̱nꞌïn nga duguaneꞌ sichre riñan nej suj, dadinꞌ hua ruhuâ nanè nimân nej suj, sani̱ nneè kú nej suj huin sa nitaj si hua̱ ruhuâ mánj.
42 Ni̱ gaꞌanj ñûn Ma̱ꞌan Jesús, ni̱ nânj huin gisîj huàꞌ gaꞌmin ngà Ma̱ꞌan Ñaꞌanj an ni̱ gata:
—Huê Ma̱ꞌân rèꞌ huin Rê, ni̱ si ga̱ꞌhue ni̱ gi̱ꞌhiaj anêj Ma̱ꞌân rèꞌ sañun nan riñânj, sani̱ giꞌhiaj Ma̱ꞌân rèꞌ sa garanꞌ ruhuâ Ma̱ꞌân rèꞌ na̱nj ánj.
43 Ni̱ nga gunumân Ma̱ꞌan Jesús aꞌngô ñûn ni̱ ganariꞌij si gàꞌ atoj ñûn nej sij mân nej sij, dadinꞌ ûta ꞌna̱ꞌ nnej e riñan nej sij.
44 Ni̱ guduna nej sij ni̱ gaꞌan aꞌngô ñûn, ni̱ nânj huin gisîj huàꞌnï̀nj gaꞌmin ngà Ma̱ꞌan Ñaꞌanj an, ni̱ huê gè nej nuguanꞌ gaꞌmin si̱nïnj huê danj gaꞌmin ñunj.
45 Hiôꞌ ni̱ gaꞌnaj ñan màn nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
—Ga̱to̱j nej suj ni̱ ga̱na̱ra̱n ruhuâ nej suj hia̱j, dadinꞌ gàꞌ gisîj orâ, nàgàꞌhuìꞌ nej sij ñùnj riñan nej sí gakï̱nꞌïn.
46 Ga̱na̱chi nej suj ni̱ ga̱ꞌa̱nj nêꞌ; ni̱ gi̱ni̱ꞌhiaj nej suj, dadinꞌ gàꞌ gahuin nìchrùnꞌ sí nàgàꞌhuìꞌ ñùnj.
Gaꞌnaꞌ gi̱daꞌa nej sij Ma̱ꞌan Jesús
47 Nga nï̀nꞌ aꞌmin Ma̱ꞌan Jesús nikïnj hiuj dânj, ni̱ guyumân Judas Iscariote, ni̱ sôꞌ huin ꞌngo̱ nej yùhuìj sí gaꞌnaꞌ ga̱huin chru̱n riñan Ma̱ꞌan, ni̱ ꞌna̱ꞌ ûta gàꞌì nej guiì ngà sôꞌ ni̱ ni̱ka̱j nej guiì dânj yîti ngà chrun gurûtin ꞌna̱ꞌ ninj, dadinꞌ gaꞌnḯn nej rej huin ña̱an nga nej síchìj achij i gaꞌnaꞌ ninj.
48 Ni̱ gaꞌhuiꞌ Judas, ꞌngo̱ daꞌngaꞌa ni̱ gataj sôꞌ:
—Sí ga̱chru̱n duꞌhuá, ni̱ sí dan huin; ni̱ gi̱daꞌa nej suj sôꞌ na̱nj ánj.
49 Ni̱ aché sôꞌ ꞌna̱ꞌ sôꞌ ni̱ gataj sôꞌ:
—Hua̱ nìn nne Ma̱ꞌân rèꞌ gàꞌ Maestruꞌ.
—Sòꞌ huin sí ni̱ka̱j duguiꞌ ngàj ni̱ ahuin sun ꞌnaꞌ ràꞌaj.
Hiôꞌ ni̱ gaꞌnaꞌ nichì nej sí dânj ni̱ gidaꞌa nej sôꞌ Ma̱ꞌan Jesús, ni̱ ginikaj nej sôꞌ gaꞌanj nej sôꞌ.
51 Sani̱ giri ꞌngo̱ sí ni̱kï̱nꞌ ngà Ma̱ꞌan Jesús si-yitî sôꞌ, ni̱ gaꞌneꞌ sôꞌ rakïj si-musû rej huin ña̱n nï̀nꞌïnj.
52 Hiôꞌ ni̱ gataj Ma̱ꞌan Jesús gu̱nïn sí dânj:
—Gànàꞌnï̀nj sàꞌ si-yitîꞌ ñan nunj; dadinꞌ daranꞌ nej sí dagahuiꞌ ngà yîti ni̱ ngà yîti gàhuìꞌ nej sij na̱nj ánj.
53 Ganï̂n ruhuâꞌ sisi̱ si̱ gaꞌhue gàꞌmìn ngà Ma̱ꞌan Rê akuanꞌ nï̱n, ni̱ si̱ rikij yùhuìj batayón nej ángel ga̱ꞌna̱ꞌ du̱nanin ninj ñùnj ràꞌ saj ûnꞌ.
54 Sani̱ dàj ga̱ꞌhue gìsìj nuguanꞌ nnùn riñan si-nùguànꞌ Ma̱ꞌan Ñaꞌanj an, dadinꞌ hua̱ ni̱ña̱n si dànanj ga̱huin hia̱j do̱j.
55 Ni̱ orâ dânj ni̱ gataj Ma̱ꞌan Jesús gu̱nïn nej guiì rìgì màn hiuj dânj:
—Dàj rûnꞌ giꞌhiaj nej suj nga ꞌna̱ꞌ gi̱daꞌa nej suj sí tu̱u ni̱ ni̱ka̱j nej suj yîti ngà chrun gurûtin, huê danj giꞌhiaj nej suj ngàj. Daranꞌ nej gui gané ngà nej suj guendâ gidigán ruhuâ nuhuî nìko, sani̱ nun gi̱daꞌa nej suj ñùnj.
56 Sani̱ huê dànanj ga̱huin daꞌnga, ni̱ gisîj si-nùguànꞌ Ma̱ꞌan Ñaꞌanj an dàj rûnꞌ gaꞌmin nej sôꞌ gataj dàj ga̱huin àsìj diû ri̱ki.
Hiôꞌ ni̱ gudunâj nej sí ꞌna̱ꞌ ga̱huin chru̱un Ma̱ꞌan Jesús, ni̱ gunânj nej sôꞌ ni̱ gaꞌanj nej sôꞌ.
Ni̱ka̱j nej sij gaꞌanj nej sij Ma̱ꞌan Jesús riñan junta nìko ñan giyiꞌnïnꞌ daranꞌ nej gakï̱nꞌ
57 Ni̱ gidaꞌa nej sôꞌ Ma̱ꞌan Jesús ni̱ ni̱ka̱j nej sôꞌ gaꞌanj nej sôꞌ riñan rej huin ña̱n nï̀nꞌ gùꞌnàj Kaifás, ni̱ màn chreꞌ nej maestrû chru̱n ley ngà nej síchìj achij i.
58 Ni̱ ginikòꞌ Pedro nda gànꞌ huaj sôꞌ rukû nej sí gidaꞌa Ma̱ꞌan Jesús ni̱ guchiꞌ sôꞌ riñan dukuâ rej huin ña̱n nï̀nꞌïn; ni̱ gatûj sôꞌ, ni̱ gaꞌanj ga̱ne sôꞌ ngà nej sí dugumîn hueꞌ huin nûhui, dadinꞌ ruhuâ sôꞌ gi̱ni̱ꞌin sôꞌ dàj gi̱ranꞌ Ma̱ꞌan Jesús ni̱ dàj ga̱na̱huij daranꞌanj.
59 Huê danj ni̱ ganahuin chre̱ꞌ nej rej huin ña̱an ngà nej síchìj achij i ni̱ daranꞌ nej sí huin yiꞌnïnꞌ nej sí ni̱ka̱j su̱n riñan yumanꞌan, guendâ nànàꞌhuìꞌ nej sôꞌ sí ga̱ra̱n ruhuâ nuguanꞌ gidigañuꞌunj un rayiꞌî Ma̱ꞌan Jesús, daꞌnga ni̱ gaꞌhue da̱gahuiꞌ nej sôꞌ Ma̱ꞌan.
60 Sani̱ nun gìrìꞌ nej sôꞌ sí ga̱ra̱n ruhuâ rayiꞌij, nùnj huin si gaꞌnaꞌ gàꞌì nej sí gaꞌmin nuguanꞌ gidigañuꞌunj un, ni̱ nda neꞌ rùkù nï̀nꞌ gaꞌnaꞌ huìj sí ganataꞌ nuguanꞌ gidigañuꞌunj un,
61 ni̱ gataj nguèj sí dânj:
—Sí nânj gataj: “Ga̱ꞌhue du̱guanêj hueꞌ huin si-nùhuì Ma̱ꞌan Ñaꞌanj an, ni̱ ga̱chi̱n huàꞌnï̀nj gui ni̱ na̱gi̱ꞌhiaj ñún aꞌngoj.”
62 Ni̱ ganayumàn rej huin ña̱n nï̀nꞌïn ni̱ gataj sôꞌ:
—Nitaj gàꞌ si ꞌngo̱ nuguanꞌan nikaj rèꞌ ga̱ta̱j rèꞌ ûnꞌ. Dadinꞌ garânj ruhuâ nguèj sí nânj rayiꞌî rèꞌ ûnꞌ.
63 Sani̱ dḯn ga duꞌhua Ma̱ꞌan Jesús. Hiôꞌ ni̱ gataj rej huin ña̱nꞌ nï̀nꞌïn:
—Niꞌin Ma̱ꞌan Ñaꞌanj hua̱ nìꞌnàꞌa si gachín nìꞌhia riñanꞌ, ni̱ gànàtàꞌ gu̱nïn nej ñûnj si huê Ma̱ꞌânꞌ huin Cristo, Daꞌní Ma̱ꞌan Ñaꞌanj an.
64 Ni̱ gataj Ma̱ꞌan Jesús:
—Ni̱ huê dàj rûnꞌ gatajꞌ ni̱ huê danj huín; ni̱ hua̱ sa gàtà gu̱nïnꞌ ni̱ si àsìj gui hia̱j ni̱ gi̱ni̱ꞌin nej suj gané ràꞌa neꞌ huàꞌ Ma̱ꞌan Ñaꞌanj nùkuaj, ni̱ gàꞌnàj riñan nnga màn neꞌ yàtàꞌa.
65 Nga gunïn rej huin ña̱n nï̀nꞌïn nej nuguanꞌ gaꞌmin Ma̱ꞌan Jesús hiôꞌ ni̱ gutù sôꞌ siganꞌ sôꞌ ni̱ gataj sôꞌ:
—Gaꞌmin kï̱j sí nan riñan Ma̱ꞌan Ñaꞌanj an na̱nj ánj. Nùnj huin si gi̱ꞌhiôꞌ nànàꞌhuìꞌ aꞌngô nej sí ga̱ra̱n ruhuâ rayiꞌî sij gàꞌ ûnj. Gàꞌ gunïn nej suj, si akuanꞌ nï̱n ni̱ gaꞌmin kï̱j sij riñan Ma̱ꞌan Ñaꞌanj an na̱nj ánj.
66 Dàj huin ruhuâ nej suj ràꞌaj.
Ni̱ nanikàj nej sí dânj ni̱ gataj nej sôꞌ:
—Hua̱ ni̱ña̱n si daꞌhui sij gàhuìꞌ sij.
67 Hiôꞌ ni̱ gachra stanûj nej sí dânj riñan Ma̱ꞌan Jesús, ni̱ gaꞌhuiꞌ nej sôꞌ guchruꞌu ni̱ garaꞌhui nej sij riñan Ma̱ꞌan.
68 Ni̱ gataj nej sôꞌ gu̱nïn Ma̱ꞌan:
—Cristo, ga̱ta̱j sòꞌ ahuin goꞌngo̱ nej ñûnj gaꞌhuiꞌ niꞌhiâꞌ staj.
Gataj Pedro si nun niꞌin sôꞌ Ma̱ꞌan Jesús
69 Ni̱ nne Pedro ne̱ꞌ ye̱ꞌ riñan dukuâ rej huin ña̱n nï̀nꞌïn; ni̱ gaꞌnaꞌ nichì ꞌngo̱ siyànà giꞌhiaj sun riñan rej huin ña̱n nï̀nꞌïn, ni̱ gataj siyànà dânj gu̱nïn sôꞌ:
—Huê sòꞌ huin sa ni̱ka̱j duguiꞌ ngà Jesús sa ꞌna̱ꞌ riñan hioꞌó Galilea huaj.
70 Sani̱ nun ga̱ꞌhue̱j sôꞌ si huê sôꞌ huin sí ni̱ka̱j duguiꞌ ngà Ma̱ꞌan Jesús riñan daranꞌ nej guiì màn hiuj dânj, ni̱ gataj sôꞌ:
—Nun niꞌín sôꞌ ràyìꞌì gaꞌminꞌ dan mánj.
71 Ni̱ gahui sôꞌ ni̱ gaꞌanj sôꞌ neꞌ ri̱ña̱n rahueꞌ dânj, ni̱ giniꞌin aꞌngô siyànàa sôꞌ, ni̱ gataj siyànà dânj gu̱nïn nej guiì màn hiuj dânj:
—Huê si sinaꞌu ni̱kï̱nꞌ hiuj nânj huin sa ni̱ka̱j duguiꞌ ngà Ma̱ꞌan Jesús sa ꞌna̱ꞌ riñan hioꞌó Nazaret.
72 Sani̱ nun ga̱ꞌhue̱j ñûn Pedro si ni̱ka̱j duguiꞌ sôꞌ ngà Ma̱ꞌan Jesús ni̱ gataj sôꞌ:
—Niꞌin yàngàꞌ Ma̱ꞌan Ñaꞌanj an, si nun niꞌín sí ràyìꞌì gataj nej suj dânj mánj.
73 Neꞌ rùkù doj ni̱ gaꞌnaꞌ nichì nej sí màn hiuj dânj ni̱ gataj nej sôꞌ gu̱nïn Pedro:
—Yàngàꞌ hia nï̀nꞌ ni̱ huêꞌ huin sí ni̱ka̱j duguiꞌ ngà nej sôꞌ nìkòꞌ rukû sí nan, dadinꞌ dàj rûnꞌ aꞌmin nej sij huê danj gaꞌminꞌ na̱nj ánj.
74 Hiôꞌ ni̱ gayiꞌì Pedro ni̱ gaꞌmin kï̱j sôꞌ ni̱ gataj sôꞌ:
—Niꞌin yàngàꞌ Ma̱ꞌan Ñaꞌanj an si nun niꞌín sí ràyìꞌì aꞌminꞌ dânj mánj: