Gahuiꞌ Lázaro
11
Hiôꞌ ni̱ aꞌnanꞌ ꞌngo̱ sí gùꞌnàj Lázaro,
ni̱ yiñán sôꞌ huin Betania,
ni̱ huê yumanꞌ dânj huin yiñán nguèj yu̱guej sôꞌ María ngà Marta.
2 Ni̱ yuguej María huin Lázaro ni̱ aꞌnanꞌ sôꞌ nngaj sôꞌ,
ni̱ huê siyànà nânj huin sa gachrîj nne gï̀nꞌ dàj a Ma̱ꞌan Jesús,
ni̱ guta nne riñanj dakó Ma̱ꞌan Jesús ni̱ duna̱koj ngà duhuê ahui dakó Ma̱ꞌan Jesús.
Jesús resucita a Lázaro (Juan 11.1-57)
—Señor,
aꞌnanꞌ Lázaro sa ni̱ka̱j duguiꞌ ngà Ma̱ꞌân rèꞌ.
4 Ni̱ nga gunïn Ma̱ꞌan Jesús nuguanꞌ nânj ni̱ gata:
—Sê si̱ gàhuìꞌ sij gi̱ꞌhiaj yiꞌì dânj mánj,
giranꞌ sij dànanj guendâ ga̱ꞌmi̱n hueꞌê nej guiì yiꞌî Ma̱ꞌan Ñaꞌanj an,
ni̱ huê danj na̱nj ga̱ꞌmi̱n hueꞌê ninj rayiꞌî na̱nj ánj.
5 Ni̱ ꞌì ruhuâ Ma̱ꞌan Jesús niꞌin Marta ngà yugui María ni̱ huê danj na̱nj ꞌì ruhuaj niꞌin Lázaro.
6 Ni̱ nga gunïn Ma̱ꞌan Jesús si aꞌnanꞌ Lázaro,
ni̱ gahuin ranj ahuîj gui ñan nne.
7 Ni̱ neꞌ rùkù nej nânj ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
—Ga̱ꞌa̱nj ñûn nêꞌ Judea.
8 Ni̱ gataj nej sí ꞌnaꞌ ga̱huin riñanj:
—Maestrûj,
sê hia̱j ûta ña̱ꞌa̱n huin ruhuâ nej judío ga̱rru̱n nej sij hiëj sòꞌ,
ni̱ ga̱ꞌa̱nj ñûn rèꞌ hiuj dan na̱nj nîꞌ.
9 Nanikàj Ma̱ꞌan Jesús ni̱ gata:
—Sê yùhuìj ora nikaj ꞌngo̱ gui ràꞌ saj ûnꞌ.
Sí aché neꞌ gu̱niꞌñanj an,
ni̱ nitaj si geꞌëj dakó sôꞌ,
dadinꞌ giyigï̀n giniꞌhiaj sôꞌ giꞌhiaj gui ni̱kï̱nꞌ ruhuâ yumiguì nânj;
10 Sani̱ guiì gaché neꞌ ñànꞌan,
ni̱ ganatûj ninj dadinꞌ nitaj si giyigï̀n giniꞌhiaj ninj mánj.
11 Neꞌ rùkù nga gisîj gaꞌmin Ma̱ꞌan Jesús nej nuguanꞌ nânj,
ni̱ gata:
—Si̱ atoj Lázaro sí ni̱ka̱j duguiꞌ ngà nêꞌ nngaj sôꞌ;
sani̱ ga̱ꞌa̱nj du̱naꞌnï̂nj ñânj sôꞌ.
12 Hiôꞌ ni̱ gataj nej sí ꞌna̱ꞌ ga̱huin chru̱n riñan Ma̱ꞌan Jesús:
—Señor,
sisi̱ si̱ atoj sij nngaj sij ni̱ ga̱na̱huin sij na̱nj ánj.
13 Sani̱ gaꞌmin Ma̱ꞌan Jesús dànanj dadinꞌ gàꞌ gahuiꞌ Lázaro;
sani̱ ganï̂n ruhuâ nej sí ꞌna̱ꞌ ga̱huin chru̱un si yàngàꞌ atoj Lázaro.
14 Hiôꞌ ni̱ gataj niꞌnï̀nj Ma̱ꞌan Jesús:
—Gàꞌ gahuiꞌ yàngà Lázaro na̱nj ánj.
15 Ni̱ ganahuin nìhiàꞌ ruhuâj niꞌín nej suj,
dadinꞌ nun ga̱ne nej suj ñan nngaj sôꞌ gahuiꞌ sôꞌ,
sani̱ ga̱ꞌa̱nj nêꞌ ñan nngaj sôꞌ.
16 Hiôꞌ ni̱ gataj Tomás sôꞌ gùꞌnàj ñaꞌàan,
gu̱nïn aꞌngô nej sí ꞌna̱ꞌ ga̱huin chru̱n ngà sôꞌ:
—Ga̱ꞌa̱nj nêꞌ ni̱ gàhuìꞌ nêꞌ,
ngà Ma̱ꞌan Maestrû na̱nj ánj.
Ma̱ꞌan Jesús gi̱ꞌhiaj gànàꞌnï̀nj ni̱ ga̱na̱huin nìꞌnàꞌ nej nîman
17 Hiôꞌ ni̱ gaꞌnaꞌ Ma̱ꞌan Jesús,
ni̱ ganariꞌij si gàꞌ gisîj gaꞌânj gui gachinꞌ nej sôꞌ Lázaro.
18 Ni̱ ꞌngo̱ si huàꞌnï̀nj kilometru gahuin nìchrùnꞌ nngaj Betania,
ngà yumanꞌ snàꞌànj Jerusalén;
19 ni̱ gaꞌnaꞌ ûta gàꞌì nej judío ñan nne Marta ngà María,
ni̱ gaꞌnaꞌ gi̱ꞌhiaj nej sôꞌ si ga̱na̱huin nìhiàꞌ ruhuâ nguèj yu̱gui rayiꞌî guendâ gahuiꞌ yuguej ngue Lázaro.
20 Hiôꞌ ni̱ nga gunïn Marta si ꞌna̱ꞌ Ma̱ꞌan Jesús,
ni̱ gahui Marta gaꞌanj ga̱na̱huin ra̱ꞌa Ma̱ꞌan Jesús;
sani̱ gunâj María ñan nne hueꞌe.
21 Ni̱ gataj Marta gu̱nïn Ma̱ꞌan Jesús:
—Señor,
si nu̱n gane Ma̱ꞌân rèꞌ hiuj nânj,
ni̱ nun gàhuìꞌ yugue saj mánj.
22 Sani̱ niꞌín si daranꞌ nej sa gàchìnj Ma̱ꞌân rèꞌ riñan Ma̱ꞌan Ñaꞌanj an,
ni̱ ga̱ꞌhue gi̱ri̱kij na̱nj ánj.
23 Gataj Ma̱ꞌan Jesús:
—Gànàꞌnï̀nj yuguejt siganï̂nj nej nîman na̱nj ánj.
24 Gataj Marta:
—Niꞌín si gànàꞌnï̀nj yuguê,
nej gui ga̱ꞌna̱ꞌ neꞌ ña̱an.
25 Gataj Ma̱ꞌan Jesús:
—Ñùnj huin sa gi̱ꞌhiaj gànàꞌnï̀nj nej nîman;
guiì guyumân ruhuâ niꞌin ñùnj,
ni nùnj huin si gàꞌ gahuiꞌ ninj sani̱ gànàꞌnï̀nj ninj.
26 Ni daranꞌ nej guiì nne nìꞌnàꞌ ni̱ gùyùmàn ruhuâ ninj niꞌin ninj ñùnj ni̱ si̱ gahuiꞌ nìgànj nï̀nꞌ ninj mánj.
Yumân ruhuâꞌ nej nuguanꞌ nânj nîꞌ.
27 Ni̱ gataj Marta:
—Yumân ruhuâj Señor;
yumân ruhuâj si Ma̱ꞌân rèꞌ huin Cristo,
ni̱ huê Ma̱ꞌân rèꞌ huin Daꞌní Ma̱ꞌan Ñaꞌanj an,
ni̱ gaꞌnaꞌ rèꞌ ruhuâ yumiguì nânj.
Dugueꞌe Ma̱ꞌan Jesús nikïnj ñan gachinꞌ nej sij Lázaro
28 Nga gisîj gataj Marta dànanj,
ni̱ gaꞌanj ga̱kïn yugui María,
ni̱ gaꞌmin huij yiꞌnḯn rakïj María ni̱ gata:
—Ma̱ꞌan Maestrû nikïnꞌ hiuj nan ni̱ gakïn ga̱ꞌa̱nj râj.
29 Ni̱ nga gunïn María,
nuguanꞌ nânj,
ni̱ nda nanè chre ganayumanj ni̱ gaꞌan ñan ni̱kï̱nꞌ Ma̱ꞌan Jesús.
30 Ni̱ hua̱ nun ga̱tu̱ Ma̱ꞌan Jesús ruhuâ yumanꞌ dânj,
dadinꞌ hua̱ nï̀nꞌ nikïnj ñan ganariꞌ Marta.
31 Ni̱ giꞌhiaj nej sí judío nne dukuâ María si ga̱na̱huin nìhiàꞌ ruhuaj,
ni̱ nga giniꞌin nej sôꞌ si nda nanè chre ganayumàn María ni̱ gahui neꞌ ye̱ꞌ hueꞌ dânj ni̱ gaꞌan,
ni̱ nìkòꞌ nej sôꞌ rukuj dadinꞌ gataj nej sôꞌ:
Hua̱j ga̱ꞌa̱nj du̱gueꞌe ñan gachinꞌ nej sôꞌ Lázaro.
32 Ni̱ nga guchiꞌ María ñan ni̱kï̱nꞌ Ma̱ꞌan Jesús,
giniꞌin ni̱ ganikïnꞌ rúdàko yiꞌî Ma̱ꞌan Jesús,
ni̱ gata:
—Señor,
si nu̱n gane Ma̱ꞌân rèꞌ hiuj nânj,
hiôꞌ ni̱ si̱ gahuiꞌ yuguê saj mánj.
33 Hiôꞌ ni̱ nga giniꞌin Ma̱ꞌan Jesús dugueꞌe María,
ni̱ huê danj na̱nj dugueꞌe nej síchìj judío,
ꞌna̱ꞌ nngaj,
ni̱ ûta gahuin ruhuâ nimanj ni̱ gananï̂n staꞌu ruhuaj,
34 ni̱ gataj Ma̱ꞌan Jesús:
—Dànèꞌ gachinꞌ nej suj sôꞌ ràꞌaj.
Ni̱ gataj nej sí dânj:
Señor,
ga̱ꞌna̱ꞌ Ma̱ꞌân rèꞌ ni̱ gi̱ni̱ꞌin Ma̱ꞌân rèꞌ.
—Niꞌhiaj nej suj dadinꞌ ûta ꞌì ruhuâ sij niꞌin sij Lázaro àj nï̂n.
37 Hiôꞌ ni̱ gataj da̱ꞌa̱j nej sí dânj:
—Si giꞌhiaj Jesús si ganahuin rune ñan nej sí du̱chri ni̱ si̱ gaꞌhue gi̱ꞌhia sisi̱ si̱ gahuiꞌ Lázaro ràꞌ saj ûnꞌ.
Ganaꞌnï̂nj Lázaro giꞌhiaj Ma̱ꞌan Jesús
38 Ni̱ ûta gananï̂n àko ñûn ruhuâ Ma̱ꞌan Jesús,
ngà nda ruhuâ nimanj,
ni̱ gaꞌnaꞌ gi̱niꞌhia ñan gachinꞌ nej sôꞌ nneè kú Lázaro.
Ni̱ riñan huej e nun hiuꞌuj ñan gachinꞌ nej sôꞌ,
ni̱ garán nej sôꞌ ꞌngo̱ hiëj xi riñan hiuꞌuj dânj.
39 Ni̱ gataj Ma̱ꞌan Jesús:
—Gu̱xu̱n nej suj hiëj garán riñan hiuꞌuj dânj.
Ni̱ gataj Marta yuguej Lázaro sôꞌ gàꞌ gahuiꞌi:
—Señor gàꞌ gïnꞌ ri̱ꞌhiuj man,
dadinꞌ gàꞌ gisîj gaꞌânj gui gahuij na̱nj ánj.
40 Gataj Ma̱ꞌan Jesús:
—Sê gàꞌ gatâ gunï̂nꞌ ni̱ si gùyùmàn ruhuâꞌ ni̱ gi̱ni̱ꞌînꞌ sa hueꞌê staꞌu gi̱ꞌhiaj Ma̱ꞌan Ñaꞌanj an ràꞌ saj ûnꞌ.
41 Hiôꞌ ni̱ guxunj nej sij hiëj garán riñan hiuꞌuj ñan gachinꞌ nej sij Lázaro.
Ni̱ ganachi nikaj ñan Ma̱ꞌan Jesús,
ni̱ giniꞌhia yàtàꞌa,
ni̱ gata:
—Taj,
guruhuâ Ma̱ꞌân rèꞌ guendâ gunïn Ma̱ꞌân rèꞌ si-nùguànꞌànj.
42 Gàꞌ niꞌín si daranꞌ diû ni̱ gunïn Ma̱ꞌân rèꞌ si-nùguànꞌànj;
sani̱ gatâ dànanj rayiꞌî nej guiì màn hiuj nânj,
daꞌnga ni̱ giniꞌin ninj si sòꞌ gaꞌnḯn gaꞌná.
43 Ni̱ nga gisîj gaꞌmin dànanj,
ni̱ ûta nùkuaj gaꞌmin ni̱ gata:
—Lázaro,
ga̱hui̱ ga̱ꞌna̱ꞌ neꞌ ye̱ꞌe na̱nj ánj.
44 Ni̱ gahui sí gàꞌ gahuiꞌ dânj neꞌ ye̱ꞌe,
ni̱ a̱nu̱min atsîj gàtsìi raꞌa sôꞌ ngà dakó sôꞌ,
ni̱ garán ꞌngo̱ atsîj gàtsìi riñan sôꞌ.
Ni̱ gataj Ma̱ꞌan Jesús:
—Ga̱na̱chi nej suj atsîj a̱nu̱min raꞌa sij,
ngà dakó sij,
ni̱ gàꞌnï̀nj nej suj ga̱che̱ sij na̱nj ánj.
Gi̱daꞌa nej sij Ma̱ꞌan Jesús guendâ da̱gahuiꞌ nej sij
45 Hiôꞌ ni̱ ûta gàꞌì nej síchìj judío gaꞌnaꞌ nàgàꞌhuìꞌ chrej nùkuaj ruhuâ riñan María ngà Marta,
ni̱ nga giniꞌin nej sôꞌ sa giꞌhiaj Ma̱ꞌan Jesús ni̱ guyumân ruhuâ nej sôꞌ niꞌin nej sôꞌ Ma̱ꞌan.
46 Sani̱ gaꞌanj da̱ꞌa̱j nej síchìj judío dânj riñan nej fariseo,
ni̱ ganataꞌ nej sôꞌ sa hueꞌê staꞌu giꞌhiaj Ma̱ꞌan Jesús.
47 Hiôꞌ ni̱ naraꞌhuiꞌ nej rej huin ña̱an ngà nej sí fariseo riñan junta,
ni̱ gataj nej sôꞌ:
—Nùnj huin si gi̱ꞌhiaj nêꞌ ràꞌaj.
Dadinꞌ ûta nìko hua nej daꞌngaꞌa giꞌhiaj sí nânj ràꞌaj.
48 Ni̱ si ga̱ꞌnï̱n nêꞌ gi̱ꞌhiaj sij dànanj,
ni̱ gùyùmàn ruhuâ daranꞌ nej guiì niꞌin ninj sij;
ni̱ gaꞌnaꞌ nej síchìj romano,
ni̱ gu̱du̱rëꞌ nej sôꞌ ñan nne si-nùhuì nêꞌ,
ni̱ dunahuij nej sôꞌ yiñán nêꞌ na̱nj ánj.
49 Hioꞌ dânj huin Kaifás,
ꞌngo̱ nej rej huin ña̱an ni̱ gataj sôꞌ:
—Nitaj nùnj niꞌin nej suj mánj.
50 Nûn garânj daꞌnga ruhuâ nej suj si dànanj dùgùnàj huaj si gàꞌhuìꞌ ꞌngo̱ síi riñan yumanꞌan gàꞌ daꞌ si gàhuìꞌ daranꞌ nej guiì màn ruhuâ yumanꞌan mínj.
51 Sani̱ sê guendâ ma̱ꞌan sôꞌ gaꞌmin sôꞌ nuguanꞌ nânj mánj,
gaꞌmin sôꞌ dànanj dadinꞌ rej huin ña̱n nï̀nꞌïn huin sôꞌ hioꞌ dânj,
ni̱ gataj sôꞌ si hua̱ ni̱ña̱n si gàhuìꞌ Ma̱ꞌan Jesús rayiꞌî nej israelita;
52 sani̱ sê man rayiꞌî ꞌngo̱ rïn nej israelita gàhuij,
dadinꞌ gàhuij rayiꞌî aꞌngô nej daꞌní Ma̱ꞌan Ñaꞌanj an nej sôꞌ màn nï̀nꞌ gàchràꞌ ruhuâ yumiguìi.
53 Huê danj ni̱ àsìj gui dânj,
ni̱ guchiꞌ nej sij ꞌngo̱ duꞌhua si da̱gahuiꞌ nej sij Ma̱ꞌan Jesús.
54 Huê danj ni̱,
nitaj si gaché ràngàꞌ nìko Ma̱ꞌan Jesús siganï̂nj nej judío,
ni guxunj Ma̱ꞌan hiuj dânj ni̱ gaꞌan riñan hioꞌó nngaj nìchrùnꞌ yiꞌnï̂n hioꞌó nàkò,
huin ꞌngo̱ yumanꞌ snàꞌànj gùꞌnàj Efraín;
ni̱ guna hiuj dânj ngà nej sí gaꞌnaꞌ ga̱huin chru̱n riñanj.
55 Ni̱ gàꞌ ꞌna̱ꞌ ga̱huin nìchrùnꞌ pascua huin si-gi̱ꞌña̱nj nej sí judío;
ni̱ gaꞌanj ûta gàꞌì nej gui man riñan hioꞌó dânj ñan nngaj yumanꞌ snàꞌànj Jerusalén nga nï̀nꞌ ga̱chin gùyùmàn giꞌñanj pascua,
guendâ na̱gi̱ꞌhiaj sàꞌ nej sij ma̱ꞌan nej sij.
56 Ni̱ nanaꞌhuiꞌ nej sij Ma̱ꞌan Jesús,
nga mân nej sij ruhuâ nûhui,
ni̱ ganachinꞌ naꞌanj nej sij daꞌ goꞌngo̱ nej duguiꞌ nej sij ni̱ gataj nej sij:
—Dàj ganï̂n ruhuâ sòꞌ na̱nj únj.
Ga̱ꞌna̱ꞌ sij giꞌñanj an ruhuâ sòꞌ nínj.
57 Ni̱ gaꞌnïnꞌ nej rej huin ña̱an ngà nej sí fariseo suun riñan nej guiì si ga̱ta̱j snàꞌànj ninj,
asàꞌ giniꞌin ninj ñan ni̱kï̱nꞌ Ma̱ꞌan Jesús,
ni̱ gànàtàꞌ ninj gunïn nej sôꞌ,
daꞌnga ni̱ gidaꞌa nej sôꞌ Ma̱ꞌan Jesús.