Ni̱ gachrîj nej sij ga̱sîti Ma̱ꞌan Jesús nga nne Yumanꞌ Betania
12
Ni̱ nï̀nꞌ gàchin gìsìj huàtànꞌ gui gùyùmàn giꞌñanj pascua,
ni̱ gaꞌanj Ma̱ꞌan Jesús yumanꞌ Betania,
ñan nne Lázaro,
sí gàꞌ gahuiꞌi,
sani̱ ganaꞌnï̂nj sôꞌ siganï̂nj nej nîman giꞌhiaj Ma̱ꞌan.
2 Ni̱ giꞌhiaj nej sij ꞌngo̱ nihia gahuin stiꞌnï̀ïn hiuj dânj;
ni̱ Marta nun gunânj gi̱tsi,
ni̱ Lázaro nne yiꞌnḯn mesa ngà Ma̱ꞌan Jesús.
María unge a Jesús (Juan 12.1-11)
3 Ni̱ gidaꞌa María ꞌngo̱ si da̱ꞌa̱j lîtruj nne gïnꞌ dàj gùꞌnàj nardo sa sàꞌ hia nï̀nꞌïn,
ni̱ ûta du̱ꞌhue̱ nne gïnꞌ dàj dânj,
ni̱ guta dakó Ma̱ꞌan Jesús,
ni̱ neꞌ rùkù ni̱ duna̱koj ngà duhuê ahui;
ni̱ nda gachra chre datòꞌ gïnꞌ dàj a ruhuâ hueꞌ ñan màn nej sij.
4 Ni̱ gataj Judas Iscariote ꞌngo̱ sí gaꞌnaꞌ ga̱huin chru̱n riñan Ma̱ꞌan Jesús,
ni̱ huê sôꞌ huin daꞌní Simón,
ni̱ sí nânj huin sí nàgàꞌhuìꞌ Ma̱ꞌan Jesús neꞌ rùkù doj,
ni̱ gataj sôꞌ:
5 — Nùnj huin saj ni̱ nun gu̱du̱ꞌhue̱ nêꞌ nne gïnꞌ dàj nânj ni̱ gìrìꞌ nêꞌ huàꞌnï̀nj siêntu denario,
ni̱ sanꞌanj nânj nadaꞌngôꞌ riñan nej guiì ga̱ni̱ki ràꞌaj.
6 Sani̱ gataj sôꞌ dànanj,
sani̱ sê guendâ yàngàꞌ gàꞌhuìꞌ sôꞌ raꞌa nej ga̱ni̱ki gahuin sanꞌanj dânj,
dadinꞌ huin sôꞌ ꞌngo̱ sí tu̱u,
ni̱ dugumîn sôꞌ gosa nu̱n sanꞌanj an,
ni̱ gidaꞌa huì sôꞌ sanꞌanj nu̱n ruhuâ gosa gutïnꞌ sôꞌ guendâ ma̱ꞌan sôꞌ.
7 Hiôꞌ ni̱ gataj Ma̱ꞌan Jesús:
—Gu̱du̱nâj sòꞌ si gi̱ꞌhia dànanj ngàj;
dadinꞌ giꞌhiaj yu̱gui ñùnj gui nga gàchìnꞌ nej sij ñùnj na̱nj ánj.
8 Dadinꞌ daranꞌ diû gimàn nej guiì ga̱ni̱ki ngà nej suj,
sani̱ ñùnj ni̱ sê daranꞌ diû gané ngà nej suj mánj.
Ganï̂n ruhuâ nej rej da̱gahuiꞌ nej sij Lázaro
9 Ni̱ ûta gàꞌì nej judío giniꞌin si nne Ma̱ꞌan Jesús hiuj dânj,
ni̱ gaꞌnaꞌ nej sôꞌ,
sani̱ sê man ꞌngo̱ rïn Ma̱ꞌan Jesús gaꞌnaꞌ gi̱niꞌhiaj nej sôꞌ,
dadinꞌ gaꞌnaꞌ gi̱niꞌhiaj nej sôꞌ Lázaro,
sí ganaꞌnï̂nj siganï̂nj nej nîman.
10 Sani̱ gàꞌ guchiꞌ nej rej ꞌngo̱ duꞌhua si da̱gahuiꞌ nej sôꞌ Lázaro,
11 dadinꞌ rayiꞌî sôꞌ ni̱ ûta gàꞌì nej sí judío gudunâj chrej yìñànj gidigân nej síchìj achij i ni̱ guyumân ruhuâ nej sôꞌ niꞌin nej sôꞌ Ma̱ꞌan Jesús.
Nga atûj Ma̱ꞌan Jesús hua ruhuâ yumanꞌ snàꞌànj Jerusalén ni̱ ûta huin nìhiàꞌ ruhuâ nej guiì hua̱j ngaj
12 Aꞌngô gui dânj,
ni̱ ûta gàꞌì nej guiì rìgìi gaꞌnaꞌ giꞌñanj dânj,
ni̱ nga gunïn ninj si ꞌna̱ꞌ Ma̱ꞌan Jesús yumanꞌ snàꞌànj Jerusalén,
Entrada triunfal a Jerusalén (Juan 12.12-19)
13 Ni̱ gidaꞌa ninj ñun ni̱ gahui ninj gaꞌanj ga̱na̱huin ra̱ꞌa ninj Ma̱ꞌan Jesús,
ni̱ gaguâj nùkuaj ninj ni̱ gataj ninj:
—Hosanna,
ûta hueꞌê hua sa giꞌhiaj Ma̱ꞌan sa ꞌna̱ꞌ ngà siyu̱gui Ma̱ꞌan Señor,
rey ni̱ka̱j su̱n riñan hioꞌó Israel.
14 Ni̱ giriꞌ Ma̱ꞌan Jesús ꞌngo̱ urruj u,
ni̱ gaꞌanj gita̱a yichrá xuj,
dàj rûnꞌ taj riñan ñanj si-nùguànꞌ Ma̱ꞌan Ñaꞌanj an.
15 Si̱ gi̱ri̱ñun ruhuâ sòꞌ,
huînꞌ daꞌnin yànà Sión;
dadinꞌ hiuj nan ꞌnaꞌ Rey ni̱ka̱j su̱n riñanꞌ,
ni̱ ta̱a yichrá ꞌngo̱ urruj huin daꞌní urrûj yànàa.
16 Ni̱ àsìj sinï̱ïn ni̱ nun ga̱ra̱n daꞌnga ruhuâ nej sí ꞌna̱ꞌ ga̱huin chru̱n riñan Ma̱ꞌan Jesús nej nuguanꞌ nânj;
sani̱ nga gahuiꞌ Ma̱ꞌan Jesús riñan rugutsìi ni̱ ganaꞌnïn siganï̂nj nîman ni̱ gananun ruhuâ nej sôꞌ ꞌna̱ꞌ ga̱huin chru̱n riñanj si huê danj aꞌmin riñan ñanj si-nùguànꞌ Ma̱ꞌan Ñaꞌanj an rayiꞌij,
si hua̱ ni̱ña̱n si huê dànanj giꞌhiaj nej guiì ngà Ma̱ꞌan.
17 Ni̱ ganataꞌ nej guiì giniꞌin nga giꞌhiaj Ma̱ꞌan Jesús ganaꞌnï̂nj Lázaro ni̱ guduyaꞌnï̱n ninj nuguanꞌan rayiꞌî sa giniꞌin ninj riñan aꞌngô nej guiì.
18 Rayiꞌî dânj ni̱ gaꞌnaꞌ ga̱na̱huin ra̱ꞌa nej guiì Ma̱ꞌan Jesús,
dadinꞌ gunïn ninj si giꞌhia ganaꞌnï̂nj Lázaro.
19 Sani̱ gaꞌmin nej ma̱ꞌan nej sí fariseo siganï̂nj nej sôꞌ ni̱ gataj nej sôꞌ:
—Niꞌin nej suj si nitaj nùnj guyumân ruhuâ nej guiì niꞌin ninj nêꞌ dadinꞌ nitaj si gidaꞌa ninj si-nùguànꞌ nêꞌ.
Ni̱ gi̱ni̱ꞌhiaj nej suj,
dadinꞌ ûta nanikòꞌ daran nej guiì rukû sí dan àj nï̂n.
Nanaꞌhuiꞌ da̱ꞌa̱j nej sí griego Ma̱ꞌan Jesús
20 Ni̱ màn da̱ꞌa̱j nej sí ꞌnaꞌ riñan hioꞌó Grecia siganï̂nj nej sí gaꞌnaꞌ giꞌñanj dânj guendâ ginu̱n ña̱ꞌa̱nj nej sôꞌ.
Jesús predice su muerte (Juan 12.20-36)
21 Ni̱ gaꞌnaꞌ nichì nej sôꞌ ñan ni̱kï̱nꞌ Felipe,
sôꞌ ꞌna̱ꞌ yumanꞌ Betsaida huin doꞌó Galilea,
ni̱ ûta àko gachín niꞌhiaj nej sôꞌ ni̱ gataj nej sôꞌ:
—Señor,
ruhuâ nej ñûnj gi̱ni̱ꞌin nej ñûnj Ma̱ꞌan Jesús.
22 Ni̱ gaꞌanj ga̱ta̱j Felipe gunïn Andrés,
ni̱ ni̱ka̱j duguiꞌ nguèj sôꞌ gaꞌanj gànàtàꞌ nguèj sôꞌ gu̱nïn Ma̱ꞌan Jesús.
23 Nanikàj Ma̱ꞌan Jesús ni̱ gata:
—Ni̱ gàꞌ guyumân diû si ga̱ꞌmi̱n hueꞌê nej guiì ni̱ gi̱ni̱ꞌin ninj ahuin sa huin yàngàꞌ Daꞌní Ma̱ꞌan Ñaꞌanj an.
24 Yàngàꞌ ni̱ yàngàꞌ hia nï̀nꞌ tâ,
ni̱ si nun gi̱ni̱nj ka̱n trigu riñan hioꞌóo ni̱ gahuij,
ni̱ gùnàj ꞌngo̱ rïn;
sani̱ si ginin riñan hioꞌóo ni̱ gahuij,
hiôꞌ ni̱ gìyìchraj ni̱ ûta ga̱hiu ka̱n trigu raj.
25 Sí naꞌhuej ruhuâ gi̱ranꞌ sa̱ñu̱n ngà nneè kú,
ni̱ ga̱ꞌa̱nj ni̱ꞌhia̱ sôꞌ;
ni̱ sí nitaj si yuꞌhuiꞌ guendâ gi̱ranꞌ sa̱ñu̱n ruhuâ yumiguì nânj,
ni̱ gànàrìꞌ sôꞌ ñan ga̱ne nìgànj sôꞌ.
26 Si hua̱ ꞌngo̱ nej suj gunânj gi̱ꞌtsi riñânj,
ni̱ gi̱nikòꞌ nej suj ñùnj;
ni̱ ñan gané,
ni̱ hiuj dânj ga̱ne sí gu̱na̱nj gi̱ꞌtsi riñânj.
Si hua̱ ꞌngo̱ sí gunânj gi̱ꞌtsi riñânj,
ni̱ gi̱nikaj chrej Ma̱ꞌan Rê ngà sôꞌ.
Gataj Ma̱ꞌan Jesús si ga̱huij
27 ’Hia̱j ni̱ ûta gananï̂n ruhuâ ma̱ꞌan nimânj;
ni̱ nùnj huin si gàtà hia̱j ràꞌaj:
“Taj,
gi̱ꞌhia sòꞌ si ga̱na̱ni̱nj riñan orâ chìꞌ nânj.”
Sani̱ hua̱ ni̱ña̱n si gàhuìj dadinꞌ huê rayiꞌî guendâ gàhuìj huin gaꞌná na̱nj ánj.
28 Taj,
na̱gi̱ꞌhiaj yàchìj Ma̱ꞌân rèꞌ siyu̱gui Ma̱ꞌân rèꞌ.
Hiôꞌ ni̱ gaꞌmin ꞌngo̱ sa gaꞌmin nda yàtàꞌa:
—Gàꞌ nagiꞌhiaj yàchì siyu̱gui,
sani̱ na̱gi̱ꞌhiaj yàchìj ñûn siyu̱guí.
29 Ni̱ gunïn nej guiì rìgì màn hiuj dânj,
nej nuguanꞌ gaꞌmin Ma̱ꞌan sa gaꞌmin nda neꞌ yàtàꞌa ni̱ gataj ninj,
si duꞌhui gaguâj.
Ni̱ aꞌngô ninj gataj:
—ꞌNgo̱ ángel gaꞌmin na̱nj ánj.
30 Nanikàj Ma̱ꞌan Jesús ni̱ gata:
—Nuguanꞌ nânj ni̱ gaꞌnaj sani̱ sê rayiꞌí huin gaꞌnaj mánj,
gaꞌnaj rayiꞌî nej suj na̱nj ánj.
31 Ni̱ gàꞌ guyumân diû si ga̱na̱ka̱j guendâ Ma̱ꞌan Ñaꞌanj an dàj giꞌhiaj nej guiì màn ruhuâ yumiguì nânj;
hia̱j ni̱ giri Ma̱ꞌan Ñaꞌanj an ga̱ꞌa̱nj sí aꞌnïnꞌ ni̱ka̱j su̱n ruhuâ yumiguì nânj neꞌ ye̱ꞌe.
32 Sani̱ nga go̱dokoꞌ rùgùtsì nej sij ñùnj riñan rugutsìi,
ni̱ ga̱ꞌhue gi̱ꞌhia ga̱na̱ni̱n daranꞌ nej guiì màn nï̀nꞌ gàchràꞌ ruhuâ yumiguìi ni̱ ga̱ne ninj ñan ga̱né.
33 Ni̱ huê dànanj gaꞌmin Ma̱ꞌan Jesús ni̱ giꞌhia si ga̱ꞌhue ga̱ra̱n daꞌngaꞌ ruhuôꞌ dàj gi̱ꞌhiaj nej sij nga da̱gahuiꞌ nej sij Ma̱ꞌan.
34 Nanikàj nej guiì ni̱ gataj ninj:
—Gunïn nej ñûnj dàj taj riñan si-nùguànꞌ Ma̱ꞌan Ñaꞌanj an,
si Cristo ni̱ ga̱ne nìgànj nï̀nꞌïnj.
Nùnj huin saj ni̱ gataj Ma̱ꞌân rèꞌ.
Si ña̱ꞌa̱n huaj si go̱dokoꞌ nej sij riñan rugutsìi Daꞌní síi ràꞌaj.
Ni̱ ahuin si huin daꞌní síi ràꞌaj.
35 Hiôꞌ ni̱ gataj Ma̱ꞌan Jesús:
—Do̱j nï̀nꞌ diû ga̱ne sa yigï̀ïn siganï̂nj nej suj;
ni̱ ga̱che̱ nej suj nga nï̀nꞌ nne sa yigï̀ïn ngà nej suj,
daꞌnga ni̱ si̱ guyumân sa ru̱mi̱nꞌ dânj riñan nej suj,
sí gaché ñan ru̱mi̱nꞌin ni̱ nun niꞌin daꞌnga sôꞌ dànèꞌ huaj sôꞌ.
36 Nga nï̀nꞌ nne sa yigï̀ïn ngà nej suj,
ni̱ gùyùmàn ruhuâ nej suj niꞌin nej suj sa yigï̀n dânj,
daꞌnga ni̱ gaꞌhue ga̱huin nej suj daꞌní sa yigï̀ïn.
Nitaj si yumân ruhuâ nej judío niꞌin nej sôꞌ Ma̱ꞌan Jesús
Huê nej nuguanꞌ nânj gaꞌmin Ma̱ꞌan Jesús,
ni̱ gaꞌan ni̱ giyiꞌîj huij riñan nej sij.
37 Ni̱ ûta nìko hua nej daꞌngaꞌ giꞌhiaj Ma̱ꞌan Jesús riñan nej sij,
sani̱ gàꞌ danj ni̱ nun gùyùmàn ruhuâ nej sij niꞌin nej sij Ma̱ꞌan mánj.
Creyentes y no creyentes (Juan 12.37-50)
38 Huê dànanj gahuin nej daꞌngaꞌa ni̱ gisîj nuguanꞌ gataj Isaias sôꞌ gataj dàj gahuin,
nga gaꞌmin sôꞌ:
Señor,
ahuin nej guiì guyumân ruhuâ nej nuguanꞌ duyingaꞌ nej ñûnj ràꞌaj.
Ni̱ ahuin nej guiì giniꞌin dàj nùkuaj Ma̱ꞌan Señor ràꞌaj.
39 Rayiꞌî guendâ naꞌhuej nej guiì gùyùmàn ruhuâ ninj,
ni̱ gataj ñûn Isaias:
40 Giꞌhiaj du̱chri rune ñan nej guiì,
ni̱ giꞌhia si ga̱na̱huin tsì nimân ninj;
ni̱ si̱ giyigï̀n gi̱ni̱ꞌhiaj ninj,
ni̱ si̱ gaꞌhue ga̱ra̱n daꞌngaꞌ ruhuâ ninj ngà ruhuâ nimân ninj,
ni̱ si̱ gaꞌhue ga̱na̱du̱na̱ ninj ma̱ꞌan ninj,
hiôꞌ ni̱ si̱ ganahuin ninj gi̱ꞌhiâ mánj.
41 Dànanj gataj Isaías dadinꞌ gàꞌ giniꞌin sôꞌ dàj nìko gi̱nikaj su̱n Ma̱ꞌan Jesús rayiꞌî dan gaꞌmin sôꞌ dànanj.
42 Huê danj,
ni̱ guyumân ruhuâ da̱ꞌa̱j nej sí ni̱ka̱j suun,
niꞌin nej sôꞌ Ma̱ꞌan Jesús,
sani̱ ñan yuꞌhuiꞌ nej sôꞌ si gi̱ri̱ nej sí fariseo nej sôꞌ,
ruhuâ si-nùhuì nej sôꞌ,
huê danj ni̱ naꞌhuej ruhuâ nej sôꞌ gànàtàꞌ nej sôꞌ si guyumân ruhuâ nej sôꞌ niꞌin sôꞌ Ma̱ꞌan Jesús.
43 Dadinꞌ dànanj garanꞌ ruhuâ nej sôꞌ si ga̱ꞌmi̱n hueꞌê nej síi rayiꞌî nej sôꞌ,
gàꞌ daꞌ si ga̱ꞌmi̱n hueꞌê Ma̱ꞌan Ñaꞌanj an rayiꞌî nej sôꞌ.
Si-nùguànꞌ Ma̱ꞌan Jesús huin sa na̱gi̱ꞌhiaj guendâ ngà nej guiì
44 Gaꞌmin nùkuaj Ma̱ꞌan Jesús ni̱ gata:
—Guiì guyumân ruhuâ niꞌin ñùnj,
ni̱ sê ñùnj huin sa guyumân ruhuâ ninj mánj,
guyumân ruhuâ ninj niꞌin ninj Ma̱ꞌan sa gaꞌnḯn gaꞌná na̱nj ánj;
45 ni̱ guiì giniꞌin ñùnj,
ni̱ giniꞌin ninj Ma̱ꞌan sa gaꞌnḯn gaꞌná.
46 Ñùnj,
huin sa yigï̀ïn,
ni̱ gaꞌná ruhuâ yumiguì nânj,
daꞌnga ni̱ daranꞌ nej guiì guyumân ruhuâ niꞌin ñùnj ni̱ si̱ gane ninj ñan ru̱mi̱nꞌin mánj.
47 Ni̱ guiì gunïn si-nùguànꞌanj,
sani̱ nitaj si dagahuin ninj,
ni̱ sê ñùnj huin sa ga̱ꞌmi̱n gakï̱nꞌ riñan ninj mánj;
dadinꞌ sê si gaꞌná guendâ ga̱ꞌmi̱n gakḯn riñan nej guiì mánj,
dadinꞌ gaꞌná guendâ gi̱ꞌhia ga̱na̱ni̱n nej guiì.
48 Guiì naꞌhuej gùyùmàn ruhuâ niꞌin ñùnj,
ni̱ naꞌhuej ruhuâ ninj ga̱na̱huin ra̱ꞌa ninj si-nùguànꞌànj,
ni̱ hua sa gayakaj guendâ sa giꞌhiaj ninj,
nuguanꞌ gaꞌmînj riñan ninj,
nuguanꞌ dânj huin sa gànàchìnꞌ guendâ riñan ninj nej gui ga̱ꞌna̱ꞌ neꞌ ña̱an.
49 Dadinꞌ sê si̱ gaꞌmînj guendâ Ma̱ꞌan mánj;
Ma̱ꞌan Rê huin sa gaꞌnïnꞌ suun riñânj,
dàj gàtà ni̱ dàj gàꞌmìn si-nùguànꞌanj riñan nej suj na̱nj ánj.
50 Ni̱ niꞌín si nej nuguanꞌ giyiꞌnïnꞌ su̱n giꞌhiaj Ma̱ꞌan Rê Ñaꞌanj an huin sa gi̱ꞌhiaj ni̱ ga̱ꞌhue ga̱ne nìgànj nej guiì ngà Ma̱ꞌan.
Huê danj ni̱,
nej nuguanꞌ gaꞌmînj,
ni̱ dàj rûnꞌ gataj Ma̱ꞌân Rê Ñaꞌanj an gunḯn ni̱ huê danj gaꞌmînj na̱nj ánj.