Ûta aꞌmin hueꞌê nej guiì yiꞌî Ma̱ꞌan Jesús nga gatu hua ruhuâ yumanꞌ snàꞌànj Jerusalén
21
Nga huaj ga̱huin nìchrùnꞌ nej sij ñan nngaj yumanꞌ snàꞌànj Jerusalén, ni̱ guyumân nej sij yumanꞌ Betfagé yiꞌnḯn kïj ñan màn chrun olibo, ni̱ gaꞌnḯn Ma̱ꞌan Jesús gaꞌanj huìj sí ꞌna̱ꞌ ga̱huin chru̱n riñanj,
2 Ni̱ gata gu̱nïn nguèj sôꞌ:
—Ga̱ꞌa̱nj nguèj suj ranchu nngaj neꞌ ri̱ña̱n neꞌ mánj, ni̱ gànàrìꞌ nguèj suj ꞌngo̱ urrûj yànàa ni̱ ni̱kï̱nꞌ xuj a̱nu̱min xuj, ni̱ ni̱kï̱nꞌ ꞌngo̱ daꞌní xuj ꞌngo̱ urrûj naꞌu lij ngà xuj: Ni̱ ga̱na̱chi nguèj suj urrûj dânj ni̱ gi̱nikaj nguèj suj ga̱ꞌna̱ꞌ nguèj suj riñânj.
3 Ni̱ si hua̱ ꞌngo̱ sí si̱ gaꞌhuej ga̱na̱chi nguèj suj urrûj dânj, ni̱ ga̱ta̱j nguèj suj gu̱nïn sôꞌ: Ma̱ꞌan Señor huin sa ga̱ra̱n sun xuj; ni̱ neꞌ rùkù ni̱ ga̱na̱ꞌnïn ga̱ꞌna̱ꞌ xuj riñan nej suj na̱nj ánj.
4 Daranꞌ nej nânj gahuin daꞌngaꞌa, ni̱ gisîj nuguanꞌ gaꞌmin sôꞌ gataj dàj ga̱huin àsìj diû ri̱ki nga gataj sôꞌ.
5 Ga̱ta̱j nej suj gu̱nïn daꞌnin yànà Sión:
“Gi̱ni̱ꞌhiaj dadinꞌ ꞌna̱ꞌ si-Rey riñanꞌ,
ni̱ huin ꞌngo̱ sa nìin, ni̱ ta yichrá ꞌngo̱ urrûj naꞌu,
daꞌní yuku ata rasu̱un.”
6 Huê danj ni̱ gaꞌanj nguèj sí gaꞌnaꞌ ga̱huin chru̱n riñan Ma̱ꞌan Jesús, ni̱ giꞌhiaj nguèj sôꞌ dàj rûnꞌ gataj Ma̱ꞌan Jesús gu̱nïn nguèj sôꞌ.
7 Ni̱ ni̱ka̱j nguèj sôꞌ gaꞌnaꞌ nguèj sôꞌ urrûj yànà dânj ngà daꞌnin naꞌu yôꞌ, ni̱ gutaꞌ nej sij yichrá nguèj yuku dânj atsîj ni̱ke̱ nej sij; ni̱ gaꞌanj ga̱ne Ma̱ꞌan Jesús yichrá urruj dânj.
8 Ni̱ màn ûta gàꞌì guiì rigìi hiuj dânj, ni̱ da̱ꞌa̱j ninj guchruj atsîj ni̱ke̱ ninj ni̱ aꞌngô da̱ꞌa̱j ninj gaꞌneꞌ rekoj raꞌa nej chrun; ni̱ guchruj ninj ruhuâ chrej ñan gachîn Ma̱ꞌan Jesús hua.
9 Ni̱ gaguâj nùkuaj nej guiì hua̱j neꞌ ña̱an ni̱ huê danj na̱nj gaguâj nùkuaj nej guiì ꞌna̱ꞌ neꞌ rùkùu, ni̱ gaꞌmin hueꞌê ninj rayiꞌî Ma̱ꞌan Jesús ni̱ gataj ninj:
—Daꞌní David huin sa gi̱ꞌhiaj ga̱na̱ni̱n nej guiì hia̱j. Ni̱ ga̱ꞌmi̱n hueꞌê neꞌ rayiꞌî Ma̱ꞌan sa ꞌna̱ꞌ ngà siyu̱gui Ma̱ꞌan Señor. Ni̱ huej gi̱ꞌhiaj ga̱na̱ni̱n nej guiì màn nda ga̱n xi.
10 Ni̱ nga gatûj Ma̱ꞌan Jesús ruhuâ yumanꞌ snàꞌànj Jerusalén. Ni̱ ûta huin duꞌhua nej guiì màn ruhuâ yumanꞌ snàꞌànj dânj ni̱ gataj ninj:
—Ahuin sí huin nânj ràꞌaj.
11 Ni̱ gataj nej guiì:
—Nânj huin Ma̱ꞌan Jesús sôꞌ gataj dàj ga̱huin, sôꞌ ꞌna̱ꞌ yumanꞌ Nazaret huin hioꞌó Galilea.
Nagiꞌhiaj sàꞌ Ma̱ꞌan Jesús ruhuâ nuhuî nìko nne Jerusalén
12 Ni̱ gatûj Ma̱ꞌan Jesús ruhuâ hueꞌ huin nûhui nìko, ni̱ girij neꞌ ye̱ꞌe nej guiì guduꞌhuêj nej rasu̱un ngà nej guiì girânj nej rasu̱un ruhuâ nuhuî nìko, ni̱ dunatu si-mesa nej sí nadunâ sanꞌanj an, ni̱ huê danj na̱nj dunatu chrun nne nej sí guduꞌhuêj yaꞌàan;
13 Ni̱ gata:
—Huê danj taj riñan ñanj: “Hueꞌ huin dukuá ni̱ ga̱huin hueꞌ ñan ga̱ꞌmi̱n nej guiì ngà Ma̱ꞌan Ñaꞌanj an”; sani̱ giꞌhiaj nej suj si ga̱huin ꞌngo̱ huej hue̱ꞌ ñan màn nej sí tu̱u.
14 Ni̱ nga nikïnꞌ Ma̱ꞌan Jesús ruhuâ hueꞌ huin nûhui nìko, ni̱ gaꞌnaꞌ nej sí du̱chri ngà nej sí go̱chro̱j o ni̱ giꞌhia ganahuin nej sôꞌ.
15 Sani̱ nga giniꞌin nej rej huin ña̱an ngà nej maestrû chru̱n ley daranꞌ nej sa nìko giꞌhiaj Ma̱ꞌan Jesús, ni̱ gunïn nej sij si gaꞌmin hueꞌê nej silíj màn ruhuâ hueꞌ huin nûhui nìko rayiꞌî Ma̱ꞌan Jesús dadinꞌ gataj nej silíj dânj: “Nne nìꞌnàꞌ Daꞌní David”, ni̱ nga gunïn nej sij nej nuguanꞌ nânj ni̱ ginaꞌan ruhuâ nej sij.
16 Ni̱ gataj nej sij gu̱nïn Ma̱ꞌan Jesús:
—Gunï̂n rèꞌ dàj gaꞌmin nej silíj nan nîꞌ.
Nanikàj Ma̱ꞌan Jesús ni̱ gata gu̱nïn nej sij:
—Gunḯn ruꞌmínj; nitaj àmàn gahia nej suj dàj taj si-nùguànꞌ Ma̱ꞌan Ñaꞌanj an rayiꞌî nej nânj ràꞌ saj ûnꞌ:
Duꞌhua nej sílìj i ngà duꞌhua nej neꞌej nï̀nꞌ gutsi
nagiꞌhiaj hueꞌê Ma̱ꞌan Ñaꞌanj an chraꞌa guendâ ga̱chra̱ nej sij.
17 Ni̱ guduna nej sij ni̱ gahui neꞌ ye̱ꞌ yumanꞌ snàꞌànj Jerusalén, ni̱ gaꞌan ñan nngaj yumanꞌ Betania ni̱ guna hiuj dânj.
Gaꞌmin yìꞌì Ma̱ꞌan Jesús riñan chrun îgu ni̱ ganakoj
18 Neꞌ nìganꞌ aꞌngô gui dânj, nga nanikàj Ma̱ꞌan Jesús gaꞌnaj yumanꞌ snàꞌànj Jerusalén ni̱ ganachinj yiꞌnaa riki.
19 Ni̱ giniꞌin nikïnꞌ ꞌngo̱ chrun îgu nìchrùnꞌ duꞌhua chrej e, ni̱ gaꞌan ñan ni̱kï̱nꞌ chrun dânj sani̱ nitaj chruj îgu mân raa̱ chrun dânj, man koj o mân raꞌa chrun dânj, ni̱ gata gu̱nïn chrun dânj:
—Nitaj àmàn ga̱hiu chruj râꞌ gàꞌ mánj.
—Ni̱ orâ chre ni̱ ganakò chrun îgu dânj giꞌhia.
20 Ni̱ nga giniꞌin nej sí ꞌna̱ꞌ ga̱huin chru̱n riñanj sa gahuin, ni̱ ûta gahuin ña̱ꞌanj ruhuâ nej sôꞌ ni̱ gataj nej sôꞌ:
—Nùnj huin saj ni̱ ganakò chrun igû nânj ràꞌaj.
21 Nanikàj Ma̱ꞌan Jesús ni̱ gata gu̱nïn nej sôꞌ:
—Yàngàꞌ hia nï̀nꞌ tâ ni̱ si gùyùmàn yìtï̀nj ruhuâ nej suj, ni̱ si̱ ganï̂n huàꞌ ruhuâ nej suj, ni̱ sê man ngà ꞌngo̱ rïn chrun igû nânj huin sa ga̱ꞌhue gi̱ꞌhiaj nej suj dànanj mánj, ni̱ si ga̱ta̱j nej suj gu̱nïn kïj nânj: “Gu̱xu̱n ma̱ꞌânꞌ ni̱ ga̱ꞌa̱njꞌ gi̱nunꞌ ruhuâ nne ña̱ꞌa̱nj”, ni̱ huê dàj rûnꞌ gataj nej suj ni̱ huê danj ga̱huin.
22 Ni̱ daranꞌ sa gàchìnj nej suj nga ga̱ꞌmi̱n nej suj ngà Ma̱ꞌan Ñaꞌanj an ni̱ si guyumân yìtï̀nj ruhuâ nej suj, ni̱ ga̱na̱huin ra̱ꞌa nej suj sa gàchìnj nej suj.
Gaꞌmin Ma̱ꞌan Jesús dàj rûnꞌ gaꞌmin sí ni̱ka̱j suun
23 Nga gaꞌnaꞌ Ma̱ꞌan Jesús ni̱ gatu ruhuâ hueꞌ huin nuhuî nìko, ni̱ ni̱kïnj gidiganj riñan nej guiì ni̱ gaꞌnaꞌ nichì nej síchìj aꞌnïnꞌ riñan nej rej huin ña̱an ngà nej síchìj achij màn ruhuâ yumanꞌan ni̱ gataj nej sôꞌ gu̱nïn: Ahuin sun nikajꞌ ni̱ giꞌhiâꞌ dànanj ràꞌaj.
—Ni̱ ahuin sa rikî sun nânj raꞌâꞌ ràꞌaj.
24 Nanikàj Ma̱ꞌan Jesús ni̱ gata gu̱nïn nej sij:
—Huê danj na̱nj gàchìnj naꞌân ꞌngo̱ nuguanꞌan nej suj, ni̱ asàꞌ ganariꞌ nej suj gànàtàꞌ nej suj nuguanꞌ gàchìnj naꞌân, ni̱ ga̱ꞌhue gàtà ahuin yiꞌnïnꞌ sun nikâ ni̱ giꞌhia dànanj na̱nj ánj.
25 Nga duguataꞌ nne Juan nej guiì, ni̱ ahuin sa gaꞌhuiꞌ sun dânj raꞌa sôꞌ ràꞌaj. Ma̱ꞌan Ñaꞌanj an gaꞌhuiꞌ sun dan raꞌa sij nîꞌ, si nej síi gaꞌhuiꞌ sun dan raꞌa sij sàꞌ.
Hiôꞌ ni̱ nadigiꞌñûn nej sij siganï̂nj nej ma̱ꞌan nej sij ni̱ gataj nej sij:
—Si ga̱ta̱j nêꞌ si Ma̱ꞌan Ñaꞌanj an gaꞌhuiꞌ sun dânj raꞌa sôꞌ, ni̱ ga̱ta̱j sij gu̱nï̂nꞌ: “Nùnj huin saj ni̱ nun gùyùmàn ruhuâ nej suj niꞌin nej suj sôꞌ ràꞌaj.”
26 Ni̱ si ga̱ta̱j nêꞌ si nej síi gaꞌhuiꞌ sun dânj raꞌa sôꞌ, sani̱ yuꞌhuiꞌ niꞌînꞌ nej sí yùmànꞌan; dadinꞌ daranꞌ nej sôꞌ guyumân ruhuâ si Juan huin ꞌngo̱ sôꞌ gataj dàj ga̱huin.
27 Nanikàj nej sij ni̱ gataj nej sij gu̱nïn Ma̱ꞌan Jesús:
—Nun niꞌin nej ñûnj mánj.
Ni̱ gataj Ma̱ꞌan Jesús gu̱nïn nej sij: Huê danj na̱nj ñùnj ni̱ si̱ gaꞌhue gàtà gu̱nïn nej suj ahuin sa rikî suun raꞌá ni̱ giꞌhia dànanj mánj.
Nuguanꞌ ráan aꞌmin rayiꞌî ꞌngo̱ síchìj hua̱ huìj daꞌní
28 Gataj Ma̱ꞌan Jesús:
—Sani̱ dàj huin ruhuâ nej suj ràꞌaj. ꞌNgo̱ sí dânj ni̱ hua̱ huìj daꞌní sôꞌ, ni̱ gaꞌanj nichì sôꞌ riñan daꞌní sôꞌ sí yàhuàꞌa ni̱ gataj sôꞌ gu̱nïn sí dânj: “Da̱ꞌninj, ga̱ꞌa̱nj gi̱ꞌhiaj sun sòꞌ riki yichrûn chrun uba ni̱ ga̱ꞌna̱ꞌ raj.”
29 Nanikàj sí dânj ni̱ gataj sôꞌ gu̱nïn rej sôꞌ: “Si̱ gaꞌân mánj.” Sani̱ neꞌ rùkù ni̱ gananikàj ruhuâ sôꞌ sa gataj sôꞌ, ni̱ gaꞌanj gi̱ꞌhiaj sun sôꞌ.
30 Ni̱ gaꞌanj nichì sí dânj riñan aꞌngô daꞌní sôꞌ ni̱ huê gè dànanj gataj sôꞌ gu̱nïn sí dânj; ni̱ nanikàj sí dânj ni̱ gataj sôꞌ: “Ga̱ꞌhue ga̱ꞌa̱n ánj” gataj sôꞌ. Sani̱ nun ga̱ꞌa̱nj gi̱ꞌhiaj sun sôꞌ si-su̱n rej sôꞌ.
31 Ahuin goꞌngo̱ nguèj sí nânj gadagahuin sa gataj rej nguèj sôꞌ ràꞌaj.
Ni̱ gataj nej sij:
—Sí yàhuàꞌa huin sí dagahuin.
Hiôꞌ ni̱ gataj Ma̱ꞌan Jesús:
—Yàngàꞌ hia nï̀nꞌ gàtà si dànanj raꞌña̱nj nànìkàj ruhuâ nej sí gaꞌnêj sanꞌanj ga̱huin nej sí ni̱ka̱j suun, ngà nej siyànà guduꞌhuêj ma̱ꞌan rayiꞌî si-ga̱kïnꞌ ni̱ ga̱tu̱ ninj ñan ni̱ka̱j su̱n Ma̱ꞌan Ñaꞌanj an.
32 Dadinꞌ gaꞌnaꞌ Juan riñan nej suj guendâ gi̱digân sôꞌ sa ni̱ka̱ daꞌhui nej suj gi̱ꞌhiaj nej suj, sani̱ nun gùyùmàn ruhuâ nej suj niꞌin nej suj sôꞌ; sani̱ dànanj guyumân ruhuâ nej sí gaꞌnêj sanꞌanj an guendâ nej sí ni̱ka̱j suun ngà nej siyànà guduꞌhuêj ma̱ꞌan, sani̱ nej suj ni̱ giniꞌhiaj nej suj nej daꞌngaꞌ nânj, sani̱ nun gànànìkàj ruhuâ nej suj ni̱ nun gùyùmàn ruhuâ nej suj rayiꞌî si-ga̱kïnꞌ nej suj mánj.
Nej musû kï̱j huaa
33 ’Gu̱nïn nej suj aꞌngô nuguanꞌ ráan: Ga ꞌngo̱ sí yi̱ruꞌhue dânj ni̱ ganachrîj sôꞌ gàꞌì chrun uba, ni̱ giꞌhiaj sôꞌ yingâ ganikàj sôꞌ rukû nej chrun uba, ni̱ giꞌhiaj yu̱gui sôꞌ ꞌngo̱ hueꞌ yàkàan, ni̱ giꞌhiaj yu̱gui sôꞌ ñan ga̱nïn sôꞌ uba,
’Ni̱ girïꞌïnj sôꞌ giꞌhiaj sun nej sí giꞌhiaj suun ni̱ gaꞌanj sôꞌ nda ga̱nꞌ xi.
34 Ni̱ nga guyumân diû ganê chruj uba, ni̱ gaꞌnḯn sí yi̱ruꞌhue dânj gaꞌanj nej sí giꞌhiaj sun riñan sôꞌ riñan nej sí ri̱ña̱n girïꞌïnj sôꞌ nej chrun uba, guendâ ga̱ꞌa̱nj ga̱na̱huin ra̱ꞌa nej sôꞌ nej chruj uba ga̱nunj riñan sí yi̱ruꞌhue dânj.
35 Sani̱ do̱ꞌ si gidaꞌa nej sí ri̱ña̱n giriꞌïnj sôꞌ nej chrun uba nej sí huin si-musû sôꞌ, ni̱ gaꞌhuiꞌ nej sôꞌ niꞌhiaj nej sí dânj ni̱ aꞌngô nej musû dânj dagahuiꞌ nej sôꞌ, ni̱ aꞌngô nej musû dânj garrûn nej sôꞌ hiëj.
36 Ni̱ gaꞌnḯn ñûn sí yi̱ruꞌhue dânj gaꞌanj aꞌngô da̱ꞌa̱j nej sí huin si-musû sôꞌ, ni̱ gaꞌanj gàꞌì nej sôꞌ doj gàꞌ daꞌ nej sí gaꞌanj si̱nï̱n dânj; ni̱ huê gè dàj rûnꞌ giranꞌ nej sí gaꞌanj si̱nï̱ïn huê danj giranꞌ nej sí gaꞌanj neꞌ rùkùu.
37 ’Ni̱ nda neꞌ rùkù nï̀nꞌ ni̱ gaꞌnḯn sí yi̱ruꞌhue dânj gaꞌanj daꞌní sôꞌ ni̱ gataj sôꞌ: “Gi̱nikaj chre̱j nej sij riñan daꞌnî.”
38 Sani̱ nga giniꞌin nej sí ri̱ña̱n girïꞌïnj sij nej chrun uba daꞌní sij, ni̱ gaꞌmin nej sôꞌ siganï̂nj nej ma̱ꞌan nej sôꞌ ni̱ gataj nej sôꞌ: “Sí nânj huin sí ga̱na̱huin ra̱ꞌa nej chrun uba; ga̱ꞌna̱ꞌ nej suj ni̱ da̱gahuiꞌ neꞌ sí dânj, ni̱ ga̱na̱huin ra̱ꞌa neꞌ nej chrun uba ga̱na̱huin ra̱ꞌa sij ni̱ ga̱na̱huin si̱ꞌhiaj neꞌ na̱nj ánj.”
39 Ni̱ gidaꞌa nej sôꞌ ni̱ giri nej sôꞌ neꞌ ye̱ꞌ ñan màn chrun uba, ni̱ dagahuiꞌ nej sôꞌ daꞌní sí yi̱ruꞌhue dânj.
40 Hiôꞌ ni̱ gachín naꞌanj Ma̱ꞌan Jesús:
—Nga ga̱ꞌna̱ꞌ Ma̱ꞌan sí yi̱ruꞌhue huin siꞌhiaj nej chrun uba dânj, ni̱ nùnj huin si gi̱ꞌhiaj sôꞌ ngà nej sí ri̱ña̱n gaꞌhuiꞌ yikḯn sôꞌ nej chrun uba ruhuâ nej suj ràꞌaj.
41 Ni̱ gataj nej sí dânj:
—Da̱gahuiꞌ sôꞌ ni̱ si̱ gananïn àko ruhuâ sôꞌ niꞌin sôꞌ nej sí kï̱j hua dânj, ni̱ girïꞌïnj sôꞌ nej yichrûn sôꞌ nej chrun uba riñan aꞌngô nej sí gi̱ꞌhiaj sun hueꞌê, dadinꞌ nga gùyùmàn diû ga̱ne̱ chruj uba ni̱ nàgàꞌhuìꞌ nej sij nej uba ga̱nunj riñan sí yi̱ruꞌhue giriꞌïnj nej chruj uba.
42 Hiôꞌ ni̱ gataj Ma̱ꞌan Jesús:
—Nitaj àmàn gahia nej suj dàj nnunj riñan ñanj si-nùguànꞌ Ma̱ꞌan Ñaꞌanj an mínj:
Hiëj gudunâj nej sí giꞌhiaj hueꞌe,
ni̱ huej huin hiëj aꞌnïnꞌ nne sikûj hueꞌe.
Ma̱ꞌan Señor huin sa giꞌhiaj daranꞌ nej nânj.
Ni̱ ûta gahuin ña̱ꞌanj ruhuâ nej suj na̱nj nînj.
43 Rayiꞌî dan ni̱ gatâ gu̱nïn nej suj ni̱ si̱ gi̱nikaj sùnj riñan nej suj gàꞌ mánj, ni̱ gi̱nikaj sùnj riñan aꞌngô nej guiì hua̱ ruhuâ da̱gahuin riñânj ni̱ hua̱ ruhuâ ninj gi̱ꞌhiaj ninj sa sàꞌaj.
44 Ni̱ nej guiì ga̱na̱tu̱ riñan hiëj nânj ni̱ nda chru chre ga̱chra̱nꞌ ninj gi̱ꞌhia; ni̱ guiì yìchràj gi̱ni̱nj hiëj nânj ni̱ nda hiaj chre gìyìtï̀nꞌ ninj gi̱ꞌhia.
45 Ni̱ gunïn nej rej huin ña̱an ngà nej sí chru̱n ley nej nuguanꞌ rán gaꞌmin Ma̱ꞌan Jesús, ni̱ garânj daꞌngaꞌ ruhuâ nej sòꞌ si rayiꞌî nej sôꞌ huin sa gaꞌmin Ma̱ꞌan.
46 Ni̱ nanaꞌhuiꞌ nej sij dàj gi̱ꞌhiaj nej sij ga̱ꞌhue gi̱daꞌa nej sij Ma̱ꞌan Jesús, sani̱ yuꞌhuiꞌ nej sij niꞌin nej sij nej guiì yùmànꞌan, dadinꞌ yumân ruhuâ ninj si Ma̱ꞌan Jesús huin sa ganataꞌ dàj ga̱huin.