Nej musû giꞌhiaj sun riki chrun uba
20
’Dadinꞌ Ma̱ꞌan sa ni̱ka̱j su̱n neꞌ yàtàꞌa, huin dàj rûn huin ꞌngo̱ sí huin si-yi̱ruꞌhue nej guiì ni̱ gahui sôꞌ ni̱ gaꞌanj sôꞌ neꞌ ni̱ga̱nꞌan guendâ nànàꞌhuìꞌ sôꞌ nej sí gi̱ꞌhiaj sun riki nej chrun uba.
2 Ni̱ giꞌhiaj hia sôꞌ ngà nej sí gaꞌnaꞌ gi̱ꞌhiaj su̱n riñan sôꞌ ni̱ gataj sôꞌ si gu̱ruꞌhue sôꞌ dàj hua duꞌhue nej síi daꞌ gui riñan nej sí dânj, huê danj ni̱ gaꞌnḯn sôꞌ gaꞌanj gi̱ꞌhiaj su̱n nej sí dânj riki chrun uba.
3 Ni̱ gahui sôꞌ gaꞌanj sôꞌ daꞌnga ꞌngo̱ si agaꞌ ꞌï̀ïn neꞌ ni̱ganꞌan guendâ nànàꞌhuìꞌ sôꞌ nej sí gi̱ꞌhiaj sun, ni̱ giniꞌin sôꞌ si màn nej sí hua̱ niꞌnï̱nj riñan ñan hua̱ raꞌhuee.
4 Ni̱ gataj sôꞌ gu̱nïn nej sí dânj: “Ga̱ꞌa̱nj gi̱ꞌhiaj su̱n nej suj riki nej yichrûn chrun uba, ni̱ gu̱ruꞌhue hueꞌé duꞌhue nej suj.” Huê danj ni̱ gaꞌanj gi̱ꞌhiaj su̱n nej sí dânj.
5 Ni̱ gahui ñûn sôꞌ gaꞌanj sôꞌ daꞌngaꞌ ꞌngo̱ si agaꞌ yùhuìj i guendâ nànàꞌhuìꞌ sôꞌ nej sí gi̱ꞌhiaj suun, ni̱ gahui ñûn sôꞌ gaꞌanj sôꞌ daꞌnga ꞌngo̱ si agaꞌ huàꞌnï̀nj ïn guendâ nànàꞌhuìꞌ sôꞌ nej sí gi̱ꞌhiaj suun.
6 Ni̱ gahui ñûn sôꞌ gaꞌanj sôꞌ daꞌnga ꞌngo̱ si agaꞌ ùnꞌùnꞌun ñan hua̱ raꞌhuee, ni̱ ganariꞌ sôꞌ aꞌngô nej sí hua̱ niꞌnï̱nj riñan; ni̱ gataj sôꞌ gu̱nïn nej sí dânj: “Nùnj huin saj ni̱ nikïnꞌ nùgui nej suj hiuj nânj ni̱ nitaj si giꞌhiaj sun nej suj ràꞌaj.”
7 Ni̱ gataj nej sí dânj: “Ni̱kï̱nꞌ nùgui nej ñûnj dadinꞌ nitaj nej sí girïꞌïnj si gi̱ꞌhiaj sun nej ñûnj.” Ni̱ gataj sí dânj: “Ga̱ꞌa̱nj gi̱ꞌhiaj su̱n nej suj riki yichrûn chrun uba ni̱ gu̱ruꞌhue hueꞌé duꞌhue nej suj.”
8 Ni̱ nga gahuin ru̱mi̱nꞌ ni̱ gataj sí yi̱ruꞌhue dânj gu̱nïn sí ni̱ka̱j ñuꞌunj nej sí giꞌhiaj suun: “Ga̱ꞌa̱nj gànàkï̀nj sòꞌ nej sí giꞌhiaj suun ga̱ꞌna̱ꞌ nej sôꞌ ni̱ na̱ru̱ꞌhue̱ꞌ duꞌhue nej sôꞌ, ni̱ gàyìꞌìꞌ ni̱ na̱ruꞌhueꞌ duꞌhue nej sí gaꞌnaꞌ nda neꞌ rùkùu ni̱ huê danj na̱nj na̱ru̱ꞌhue̱ꞌ duꞌhue nej sí gaꞌnaꞌ ga̱ꞌhiaj sun si̱nï̱n.”
9 Ni̱ gaꞌnaꞌ nej sí gayiꞌì giꞌhiaj sun agaꞌ ùnꞌùnꞌun, ni̱ ganahuin ràꞌa nej sôꞌ daꞌ hua̱ duꞌhue nej síi ꞌngo̱ gui gahuin duꞌhue nej sôꞌ.
10 Ni̱ huê danj na̱nj gaꞌnaꞌ nej sí gayiꞌì giꞌhiaj sun si̱nï̱n, ni̱ ganï̂n ruhuâ nej sôꞌ si ga̱na̱huin ra̱ꞌa nìko nej sôꞌ doj duꞌhue nej sôꞌ, sani̱ ganahuin ra̱ꞌa nej sôꞌ dàj rûn hua duꞌhue nej sôꞌ ꞌngo̱ gui.
11 Ni̱ nga gisîj ganakaj nej sôꞌ duꞌhue nej sôꞌ, ni̱ gayiꞌì nej sôꞌ ni̱ gaꞌmin nej sôꞌ yiꞌî yiruꞌhue dânj.
12 Ni̱ gataj nej sôꞌ: “Nej sí gaꞌnaꞌ neꞌ rùkùu ni̱ ꞌngo̱ rïn orâ giꞌhiaj sun nej sôꞌ, ni̱ gu̱ña̱n chre guruꞌhue rèꞌ duꞌhue nej sôꞌ ngà nej ñûnj, sani̱ giꞌhiaj sun nùgui nej ñûnj, ni̱ huê danj na̱nj gunùkuaj nej ñûnj ginun nej ñûnj riñan nân.”
13 Ni̱ nanikàj sí yi̱ruꞌhue dânj ni̱ gataj sôꞌ, gu̱nïn ꞌngo̱ nej sí gaꞌnaꞌ ga̱ꞌmi̱n gakï̱nꞌ: “Tugûnj si̱ ganï̂n ruhuâ nej suj si gininj ꞌì nej suj riñanj mánj; sê gàꞌ guchiꞌ neꞌ ꞌngo̱ duꞌhua dàj hua duꞌhue nej síi ꞌngo̱ guiì ni̱ huê danj gu̱ruꞌhuej duꞌhue nej suj ràꞌ saj ûnꞌ.
14 Ga̱na̱ka̱j sòꞌ sanꞌanj huin duꞌhueꞌ ni̱ ga̱ꞌa̱nj râj; dadinꞌ huê dànanj garanꞌ ruhuâj gu̱ruꞌhuej duꞌhue nej sí gaꞌnaꞌ neꞌ rùkù nï̀nꞌ, dàj rûnꞌ guruꞌhuej duꞌhue nej suj.
15 Ni̱ si̱ gaꞌhue gi̱ꞌhiâ dàj garanꞌ ruhuâj ngà si-sànꞌàn ràꞌ saj ûnꞌ. Huin yìkòj ruhuâ nej suj guendâ huín ngo̱ sí sàꞌa na̱nj nîꞌ.”
16 Huê danj ni̱ nej sí huin ña̱n ruhuâ yumiguìi nânj, ni̱ ga̱na̱huin nej sô sí gi̱nikòꞌ neꞌ rùkùu, ni̱ nej sí nitaj nùnj huin ruhuâ yumiguìi nânj ni̱ ga̱na̱huin nej sôꞌ sí si̱nï̱ïn; dadinꞌ ûta gàꞌì nej guiì gakḯn Ma̱ꞌan Ñaꞌanj an gaꞌnaꞌ riñanj, sani̱ do̱j nï̀nꞌ ninj huin sa ganaguij.
Gataj ñûn Ma̱ꞌan Jesús si ga̱huij
17 Ni̱ gaꞌanj Ma̱ꞌan Jesús ñan nngaj yumanꞌ snàꞌànj Jerusalén, ni̱ gakḯn ane nej yùhuìj nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
18 —Gàꞌ niꞌin nej suj si hua̱ neꞌ nngaj yumanꞌ snàꞌànj Jerusalén, ni̱ nàgàꞌhuìꞌ nej síi ñùnj raꞌa nej rej huin ña̱an ngà raꞌa nej maestrû chru̱n ley, ni̱ da̱gahuiꞌ nej sij ñùnj.
19 Ni̱ nàgàꞌhuìꞌ nej sij ñùnj raꞌa nej sí nàsìnùnj un guendâ ga̱ꞌmi̱n duku nej sôꞌ riñânj, ni̱ gàꞌhuìꞌ nej sôꞌ ñùnj ni̱ du̱nikòꞌ nej sôꞌ ñùnj riñan rugutsìi; sani̱ ga̱chi̱n huàꞌnï̀nj gui ni̱ ganahuin nìꞌnàj siganï̂nj nej nîman.
Sa gachín nni Santiago ngà Juan
20 Hiôꞌ ni̱ gaꞌnaꞌ nichì nni nej daꞌní Zebedeo ngà nej daꞌní ñûnꞌ, ni̱ ganikïnꞌ rúdàkòj ñûnꞌ riñan Ma̱ꞌan Jesús guendâ gàchìnj ñûnꞌ ꞌngo̱ sunuj u riñanj.
21 Ni̱ gachín naꞌanj Ma̱ꞌan Jesús ni̱ gata:
—Nùnj huin si gaj ruhuâꞌ rèꞌ ràꞌaj.
Ni̱ gataj ñûnꞌ:
—Nga ga̱na̱ka̱j su̱n Maꞌân rèꞌ ni̱ gi̱ꞌhia Ma̱ꞌân rèꞌ, si ga̱ne ꞌngo̱ daꞌnin neꞌ huàꞌ Ma̱ꞌân rèꞌ ni̱ aꞌngoj ga̱ne neꞌ chrïn Ma̱ꞌân rèꞌ.
22 Hiôꞌ ni̱ nanikàj Ma̱ꞌan Jesús ni̱ gata:
—Nun niꞌin nguèj suj sa gachín nguèj suj mánj. Ga̱ꞌhue go̱ꞌo̱ nguèj suj sa nu̱n ruhuâ basû gàꞌ hua̱ yu̱gui gòꞌòj nîꞌ.
Ni̱ gataj nguèj sôꞌ:
—Ga̱ꞌhue.
23 Nanikàj Ma̱ꞌan Jesús ni̱ gata:
—Yàngàꞌ hia nï̀nꞌ ni̱ sa nu̱n ruhuâ basû gòꞌòj ni̱ ga̱ꞌhue go̱ꞌo̱ nguèj suj, sani̱ guendâ ruhuâ nguèj suj ga̱ne nguèj suj raꞌá neꞌ huàꞌàj ngà raꞌá neꞌ chrḯn. Ni̱ sê siꞌhiâ huin si gìrìkìj riñan nguèj suj mánj, dadinꞌ gàꞌ hua̱ yu̱gui guendâ ga̱na̱huin ra̱ꞌa nej sí ri̱ña̱n nàgàꞌhuìꞌ Ma̱ꞌan Rê.
24 Nga gunïn aꞌngô nej chi̱ꞌ nej sí ꞌna̱ꞌ ga̱huin chru̱n riñan Ma̱ꞌan Jesús nej nuguanꞌ nânj, ni̱ ginaꞌan ruhuâ nej sôꞌ niꞌin nej sôꞌ nguèj dìnï̀nj sí nânj.
25 Hiôꞌ ni̱ gakḯn Ma̱ꞌan Jesús nej sij, ni̱ gata:
—Niꞌin nej suj si nej sí aꞌnïnꞌ riñan nej yumanꞌan ni̱ ganahuin achij nej sij riñan nej guiì màn ruhuâ yumanꞌ dânj nîꞌ, ni̱ nej sí ni̱ka̱j sun yàkàan ni̱ gaꞌnïnꞌ nej sij suun riñan nej guiì.
26 Sani̱ siganï̂nj nej suj ni̱ si̱ gaj danj mánj, sí ruhuâ ga̱huin achij siganï̂nj nej suj ni̱ ga̱huin sôꞌ sí gi̱ꞌhiaj sun riñan nej suj.
27 Ni̱ sí ruhuâ ga̱huin sí si̱nï̱ïn siganï̂nj nej suj ni̱ ga̱huin sôꞌ sí gi̱ꞌhiaj sun chre riñan nej suj.
28 Dàj rûnꞌ ñùnj ni̱ nun gàꞌnàj guendâ gu̱na̱nj gi̱ꞌtsi nej guiì riñânj mánj. Gaꞌná guendâ gi̱ꞌhiaj sun chrê riñan nej guiì ni̱ gaꞌná guendâ gàhuìj ni̱ gi̱ꞌhia si ga̱na̱ni̱n ûta gàꞌì nej guiì.
Gi̱ꞌhiaj Ma̱ꞌan Jesús ganahuin rune ñan huìj sí du̱chri
29 Ni̱ nga gahui nej sij ruhuâ yumanꞌ Jerikó gaꞌanj nej sij, ni̱ ginikòꞌ ûta gàꞌì nej guiì gaꞌanj ninj rukû Ma̱ꞌan Jesús.
30 Ni̱ nne huìj sí du̱chri nìchrùnꞌ duꞌhua chrej e, ni̱ nga gunïn nguèj sôꞌ gachîn Ma̱ꞌan Jesús hua hiuj dânj, ni̱ gayiꞌì nguèj sôꞌ ni̱ gaguâj nùkuaj nguèj sôꞌ, ni̱ gataj nguèj sôꞌ:
—Señor Daꞌní David, ga̱na̱nï̱n àko ruhuâ Ma̱ꞌân rèꞌ niꞌîn rèꞌ nguèj ñûnj.
31 Ni̱ dugunïn gàꞌì nej guiì màn hiuj dânj si dḯn ga̱ne duꞌhua nguèj sij; sani̱ dànanj ûta duguꞌnïnꞌ nguèj sij gaguâj nùkuaj nguèj sij ni̱ gataj nguèj sij:
—Señor Daꞌní David, ga̱na̱nï̱n àko ruhuâ Ma̱ꞌân rèꞌ niꞌîn rèꞌ nguèj ñûnj.
32 Huê danj ni̱ ganikïnꞌ Ma̱ꞌan Jesús hiuj dânj, ni̱ gakïn gaꞌnaꞌ nguèj sí dânj ni̱ gata gu̱nïn nguèj sôꞌ:
—Nùnj huin si gi̱ꞌhiâ ruhuâ nguèj suj ràꞌaj.
33 Nanikàj nguèj sij ni̱ gataj nguèj sij gu̱nïn Ma̱ꞌan Jesús:
—Señor, ruhuâ nguèj ñûnj si gi̱ꞌhiaj Ma̱ꞌân rèꞌ si gànàyìgï̀n rune ñan nguèj ñûnj.
34 Huê danj ni̱ gananï̂n àko ruhuâ Ma̱ꞌan Jesús niꞌin nguèj sij, ni̱ gaganꞌ raꞌa rune ñan nguèj sij ni̱ orâ chre ni̱ nayigï̀n rune ñan nguèj sij, ni̱ ginikòꞌ nguèj sij rukû Ma̱ꞌan gaꞌanj nguèj sij.