Nuguanꞌ rán aꞌmin rayiꞌî siyànà minj in ngà guesì
18
Ni̱ huê danj na̱nj gataj Ma̱ꞌan Jesús ꞌngo̱ nuguanꞌ ráan guenda gi̱di̱ganj si hua̱ ni̱ña̱n si̱ daꞌhui daranꞌ nej guiì ni̱ ga̱ꞌmi̱n ninj ngà Ma̱ꞌan Ñaꞌanj an daꞌnga ni̱ si̱ gininaj ruhuâ ninj.
2 Ni̱ gataj Ma̱ꞌan Jesús:
—Nne ꞌngo̱ sí guesì ruhuâ ꞌngo̱ yumanꞌ snàꞌànj dânj,
ni̱ nitaj si yuꞌhuiꞌ sôꞌ niꞌin sôꞌ Ma̱ꞌan Ñaꞌanj an,
ni̱ huê danj na̱nj nitaj si ni̱ka̱j chre̱j sôꞌ ngà nej guiì.
3 Ni̱ ruhuâ yumanꞌ snàꞌànj dânj nne ꞌngo̱ siyànà minj in,
ni̱ gaꞌnaꞌ siyànà dânj riñan guesì nne ruhuâ yumanꞌ snàꞌànj nânj,
ni̱ gataj siyànà dânj gu̱nïn guesì:
ꞌNa̱ꞌ ga̱ra̱n ruhuâj rayiꞌî ꞌngo̱ guiì gunïnꞌ ngàj ni̱ ruhuâj si du̱naꞌhuej rèꞌ rayiꞌí.
4 Ni̱ ûta gàꞌì gaꞌnaꞌ gùtàꞌ siyànà nânj gakï̱nꞌïn riñan sôꞌ sani̱ nu̱n ga̱ꞌhue̱j sôꞌ gi̱da̱ꞌa̱ sôꞌ gakï̱nꞌ gaꞌnaꞌ gu̱ta̱ꞌ siyànà nânj riñan sôꞌ;
sani̱ neꞌ rùkù ni̱ gananï̂n ruhuâ sôꞌ ni̱ gataj sôꞌ gu̱nïn ma̱ꞌan sôꞌ:
“Nùnj huin si nitaj si guyuꞌhuí niꞌín Ma̱ꞌan Ñaꞌanj an,
ni̱ nitaj si ni̱ka̱j chre̱ riñan nej guiì,
5 Sani̱ guendâ si̱ gaꞌnaꞌ ga̱ꞌmi̱n gi̱tsi siyànà nânj nikòꞌ huaj riñânj,
hiôꞌ ni̱ gi̱ꞌhia̱j hiá gakï̱nꞌ gaꞌnaꞌ gu̱taj riñânj,
dadinꞌ si nuhuij ni̱ nikòꞌ hua̱j ga̱ꞌna̱j riñânj,
ni̱ ûta gi̱ri̱ ruhuâj gi̱ꞌhia na̱nj ánj.”
6 Ni̱ gataj Ma̱ꞌan Señor:
—Gu̱nïn nej suj sa ga̱ta̱j síchìj guesì nitaj si giꞌhiaj sa ni̱ka̱ nânj.
7 Ni̱ si̱ dunaꞌhuej Ma̱ꞌan Ñaꞌanj an ni̱ si̱ giꞌhia sa ni̱ka̱a ngà nej guiì gàꞌ ganaguij,
nga gachín nìꞌhiaj ninj neꞌ gu̱niꞌñanj an,
ngà neꞌ ñànꞌan riñanj ràꞌ saj ûnꞌ.
Ni̱ si̱ ga nùkuaj ruhuaj ngà ninj ràꞌ saj ûnꞌ.
8 Ñùnj taj ni̱ nda râꞌñanj chre gu̱ru̱gûñuꞌun ni̱ gi̱ꞌhia sa ni̱ka̱a ngà nej guiì gachín nìꞌhiaj riñânj ni̱ si̱ gahuin ra̱nj mánj.
Sani̱ nga gàꞌnàj riñan hioꞌóo ni̱ gànàrìꞌij nej guiì guyumân yìtï̀nj ruhuâ niꞌin ñùnj gàꞌ nînꞌ si gàꞌ gananikàj ñûn ninj riñan gakï̱nꞌïn sàꞌ.
Nuguanꞌ rán aꞌmin rayiꞌî sí fariseo ngà sí gaꞌne̱j sanꞌanj an
9 Hua̱ da̱ꞌa̱j nej guiì ni̱ ganï̂n ruhuâ ninj si̱ ûta hueꞌê dagahuin ninj riñan Ma̱ꞌan Ñaꞌanj an,
ni̱ gininj ꞌì aꞌngô nej duguiꞌ ninj riñan ninj,
ni̱ gaꞌmin Ma̱ꞌan Jesús ꞌngo̱ nuguanꞌ ráan riñan ninj ni̱ gata:
10 —Huìj ranꞌ sí dânj gaꞌanj ga̱ꞌmi̱n ngà Ma̱ꞌan Ñaꞌanj an ruhuâ hueꞌ nûhui:
Ni̱ ꞌngo̱ sí dânj huin sí fariseo,
ni̱ aꞌngô sí dânj huin sí gaꞌnêj sanꞌanj an guendâ nej sí ni̱ka̱j su̱un.
11 Ni̱ ni̱kï̱nꞌ ga̱hia sí fariseo,
ni̱ dànanj aꞌmin sôꞌ ngà Ma̱ꞌan Ñaꞌanj an:
“Huê Maꞌân rèꞌ huin Daꞌân,
ni̱ narikîj si guruhuâ Ma̱ꞌân rèꞌ dadinꞌ nitaj si̱ giꞌhia dàj rûnꞌ giꞌhiaj aꞌngô nej síi,
dadinꞌ huin nej sôꞌ sí ꞌnï̱nj su̱n tu̱u,
huin nej sôꞌ sí kï̱j hua̱a,
ni̱ ni̱ka̱j nej sôꞌ nika duguiꞌ nej sôꞌ.
Sani̱ ñùnj ni̱ nitaj si̱ giꞌhiâ dàj rûnꞌ giꞌhiaj nej sí gaꞌnêj sanꞌanj an mánj.
12 Ni̱ huìj gui ga gìnìnè siganï̂nj ꞌngo̱ semana,
ni̱ gaꞌhuí sàꞌanj huin diezmo riñan Ma̱ꞌan Ñaꞌanj an.”
13 Sani̱ nda ga̱nꞌ nikïnꞌ sí gaꞌnêj sanꞌanj an guendâ sí ni̱ka̱j suun,
ni̱ nàꞌàj ñan sôꞌ ni̱ naꞌhuej ruhuâ sôꞌ ga̱na̱chi nikaj ña̱n sôꞌ yàtàꞌa,
ni̱ ita raꞌa sôꞌ yiꞌñanj sôꞌ nikïnꞌ sôꞌ,
ni̱ gataj sôꞌ gu̱nïn Ma̱ꞌan Ñaꞌanj an:
“Huê Maꞌân rèꞌ huin Ñaꞌanj an,
ni̱ ga̱na̱nï̱n àko ruhuâ Ma̱ꞌân rèꞌ niꞌîn rèꞌ ñùnj,
dadinꞌ huín ꞌngo̱ sí gakï̱nꞌïn riñan Ma̱ꞌân rèꞌ.”
14 Ñùnj taj ni̱ nga nanꞌ sí nânj dukuâ sôꞌ ni̱ nda dïnꞌïnj chre ganahuin ruhuâ sôꞌ dadinꞌ gunïn Ma̱ꞌan Ñaꞌanj an si-nùguàn sôꞌ,
sani̱ aꞌngô sí nânj ni̱ nun gu̱nïn Ma̱ꞌan Ñaꞌanj an sa gaꞌmin sôꞌ;
dadinꞌ daranꞌ nej sí ganï̂n ruhuâ si ûta huin nej sôꞌ ni̱ gananikòꞌ nej sôꞌ neꞌ rùkùu giꞌhiaj Ma̱ꞌan Ñaꞌanj an,
ni̱ nej sí nagiꞌhiaj lij ma̱ꞌan ni̱ ga̱na̱huin nej sôꞌ sí achij i giꞌhiaj Ma̱ꞌan Ñaꞌanj an.
Gataj Ma̱ꞌan Jesús si ga̱ꞌna̱ꞌ sa sàꞌa riñan nej sílìj i
15 Ni̱ ni̱ka̱j nej guiì nej sílìj i gaꞌnaꞌ ninj guendâ gàgànꞌ raꞌa Ma̱ꞌan Jesús ni̱ gàchìnj nìꞌhia rayiꞌî nej silíj dânj riñan Ma̱ꞌan Ñaꞌanj an;
ni̱ nga giniꞌin nej sí ꞌna̱ꞌ ga̱huin chru̱un ni̱ dugunïn gàꞌì nej sôꞌ nej guiì nânj.
16 Sani̱ gakḯn Ma̱ꞌan Jesús nej sí gaꞌnaꞌ ga̱huin chru̱n riñanj ni̱ gata gu̱nïn nej sôꞌ:
—Ga̱ꞌnï̱n nej suj ga̱ꞌna̱ꞌ nej sílìj i riñânj ni̱ si̱ garanꞌ ñuꞌunj nej suj mánj;
dadinꞌ nej sí nagiꞌhiaj lij ma̱ꞌan dàj rûnꞌ ꞌhiaj nej silíj nânj ni̱ gaꞌhue gi̱nikaj su̱n Ma̱ꞌan Ñaꞌanj an riñan nej sôꞌ.
17 Yàngàꞌ hia nï̀nꞌ tâ,
ni̱ sí naꞌhuej ga̱na̱huin ra̱ꞌa si-nùguànꞌ Ma̱ꞌan Ñaꞌanj an ni̱ si nitaj si giꞌhiaj sôꞌ dàj rûnꞌ ꞌhiaj ꞌngo̱ sílìj i,
ni̱ si̱ gaꞌhue gi̱nikaj su̱n Ma̱ꞌan Ñaꞌanj an riñan sôꞌ mánj.
Sí yi̱ruꞌhue hua̱ lij
18 Gachín naꞌanj ꞌngo̱ sí ni̱ka̱j su̱n huin ña̱an Ma̱ꞌan Jesús,
ni̱ gataj sôꞌ:
—Maestrûj sí sàꞌa huin Ma̱ꞌân rèꞌ,
ni̱ nùnj huin si gi̱ꞌhia ni̱ ga̱ꞌhue ga̱na̱huin raꞌá ña̱n gane nìgànj chre ràꞌaj.
19 Ni̱ gataj Ma̱ꞌan Jesús gu̱nïn sí dânj:
—Nùnj huin saj ni̱ gatajꞌ si huín sí sàꞌaj ràꞌaj.
Dadinꞌ nitaj gàꞌ si ꞌngo̱ guiì huin sa sàꞌaj mánj,
man ꞌngo̱ rïn Ma̱ꞌan Ñaꞌanj an huin sa sàꞌaj.
20 Gàꞌ niꞌînꞌ nej yìꞌnï̀nꞌ nej nuguanꞌ gaꞌnïnꞌ su̱n Ma̱ꞌan Ñaꞌanj an nîꞌ:
“Si̱ ginikaj nika duguiꞌ,
ni̱ si̱ da̱gahuiꞌ,
ni̱ si̱ giꞌhiaj tu̱ꞌ,
ni̱ si nun gi̱ni̱ꞌînꞌ ni̱ si̱ ga̱ꞌhue ga̱ta̱jꞌ si giniꞌînꞌ,
ginikaj chre̱j ngà rêt ni̱ huê danj na̱nj gi̱nikajꞌ chre̱j ngà nnît.”
21 Ni̱ gataj sí dânj:
—Daranꞌ nej nânj dagahuin àsìj hua̱ li.
22 Nga gunïn Ma̱ꞌan Jesús nej nuguanꞌ nânj,
ni̱ gata gu̱nïn sí dânj:
—Hua̱ aꞌngô rïn sa ga̱chin da̱gahuînꞌ râj:
Gu̱du̱ꞌhue̱ daranꞌ nej rasu̱n huin si-hiât,
ni̱ gadaꞌngaꞌ riñan nej guiì gànìki,
ni̱ ûta ga̱ nej rasu̱un riñanꞌ nga gùnùkuìꞌ yàtàꞌa;
ni̱ ga̱ꞌna̱ꞌ ni̱ gi̱nikòꞌ rukú.
23 Ni̱ nga gunïn sí dânj nej nuguanꞌ nânj,
ni̱ ûta gananï̂n ruhuâ sôꞌ dadinꞌ ûta hua̱ yi̱ruꞌhue sôꞌ.
24 Ni̱ nga giniꞌin Ma̱ꞌan Jesús si ûta gananï̂n ruhuâ sí dânj,
ni̱ gata:
—Ûta chìꞌ huaj ga̱tu̱ nej sí yi̱ruꞌhuee ñan ni̱ka̱j su̱n Ma̱ꞌan Ñaꞌanj an na̱nj ánj.
25 Yàngàꞌ ni̱ dànanj nitaj si chìꞌ huaj ga̱chi̱n ꞌngo̱ yuku kameyu hiuꞌuj tàj dakḯn ganuhuâ,
dadinꞌ ꞌngo̱ sí yi̱ruꞌhue ni̱ ûta chìꞌ huaj ga̱tu̱ sôꞌ yiñán Ma̱ꞌan Ñaꞌanj an na̱nj ánj.
26 Hiôꞌ ni̱ gataj nej sí gunïn nej nuguanꞌ nânj:
—Ni̱ ahuin nej guiì gùnùkuaj ga̱na̱ni̱n gàꞌ únj.
27 Ni̱ gataj Ma̱ꞌan Jesús:
—Guendâ nej síi ni̱ ûta chìꞌ hua̱j,
sani̱ guendâ Ma̱ꞌan Ñaꞌanj an ni̱ sê sa chìꞌi huin mánj.
28 Hiôꞌ ni̱ gataj Pedro:
—Niꞌhiaj sòꞌ ni̱ nej ñûnj ni̱ gudunâj nej ñûnj daranꞌ nej sa hua̱ riñan nej ñûnj ni̱ ginikòꞌ nej ñûnj rukû Ma̱ꞌân rèꞌ.
29 Hiôꞌ ni̱ nanikàj Ma̱ꞌan Jesús ni̱ gata:
—Yàngàꞌ hia nï̀nꞌ tâ,
ni̱ ahuin na̱nj sí gudunâj dukuâ,
ni̱ gudunâj sij rej sij,
ni̱ gudunâj sij nej dinḯn sij,
ni̱ gudunâj sij nika sij,
ni̱ gudunâj sij nej daꞌní sij,
rayiꞌî si-nùguànꞌ Ma̱ꞌan Ñaꞌanj an.
30 Ni̱ dànanj nìko ga̱na̱huin ra̱ꞌa sij diû hia̱j ni̱ gìrìꞌ nìꞌhiaj sij ga̱ne sij nìgànj chre yàtàꞌa.
Gataj ñûn Ma̱ꞌan Jesús si ga̱huij
31 Ni̱ gakḯn Ma̱ꞌan Jesús nej yùhuìj sí gaꞌnaꞌ ga̱huin chru̱n riñanj,
ni̱ gata gu̱nïn nej sôꞌ:
—Hia̱j ni̱ gahui nêꞌ ni̱ ga̱ꞌa̱nj nêꞌ Jerusalén,
dadinꞌ hiuj dânj gìsìj daranꞌ nej nuguanꞌ gachrûn nej sôꞌ gataj dàj ga̱huin rayiꞌí.
32 Ni̱ nàgàꞌhuìꞌ nej sij ñùnj raꞌa nej sí nàsìnùnj un,
ni̱ ga̱ꞌmi̱n duku nej sôꞌ riñânj,
ni̱ ranꞌ nej sôꞌ ñùnj,
ni̱ ga̱chra stanûj nej sôꞌ ñùnj.
33 Ni̱ neꞌ rùkù nga gisîj gaꞌhuiꞌ nej sij niꞌhiâ,
ni̱ da̱gahuiꞌ nej sij ñùnj;
sani̱ ga̱chi̱n huàꞌnï̀nj gui ni̱ gànàꞌnï̀n siganï̂nj nej nîman.
34 Sani̱ gàꞌ si̱ do̱j nun ga̱ꞌhue ga̱ra̱n daꞌnga ruhuâ nej sij nej nuguanꞌ nânj,
ni̱ hua̱ huì nej nuguanꞌ nânj riñan nej sij,
ni̱ naꞌhue ga̱ra̱n daꞌngaꞌ ruhuâ nej sij.
Giꞌhiaj Ma̱ꞌan Jesús si ga̱na̱huin ꞌngo̱ sí hua̱ duchri rune ñan
35 Ni̱ gahuin ꞌngo̱ gui dânj nga ꞌna̱ꞌ gùyùmàn Ma̱ꞌan Jesús ña̱n nngaj yumanꞌ snàꞌànj Jerikó,
ni̱ nne ꞌngo̱ sí du̱chri duꞌhua chrej e ni̱ gachín sôꞌ sanꞌanj an riñan nej guiì gachîn huaj chrej dânj;
36 ni̱ nga gunïn sôꞌ gachîn nej guiì rigìi huaj ninj chrej dânj,
ni̱ gachín naꞌanj sôꞌ nùnj huin saj ni̱ gachin nej guiì huaj ninj chrej dânj.
37 Ni̱ gataj nej guiì,
si Ma̱ꞌan Jesús Nazareno huin sa gachîn huaj hiuj dânj.
38 Hiôꞌ ni̱ gayiꞌì sôꞌ ni̱ gaguâj nùkuaj sôꞌ ni̱ gataj sôꞌ:
—Jesús,
Daꞌní David,
ga̱na̱nï̱n àko ruhuâ Ma̱ꞌân rèꞌ niꞌîn rèꞌ ñùnj na̱nj ánj.
39 Ni̱ dugunïn gàꞌì nej sí huaj neꞌ ña̱an si dḯn ga̱ne duꞌhua síchìj nânj;
sani̱ dànanj duguꞌnïnꞌ sôꞌ gaguâj nùkuaj sôꞌ ni̱ gataj sô:
—Daꞌní David,
ga̱na̱nï̱n ruhuâ Ma̱ꞌân rèꞌ niꞌîn rèꞌ ñùnj na̱nj ánj.
40 Hiôꞌ ni̱ ganikïnꞌ Ma̱ꞌân Jesús hiuj dânj,
ni̱ gata si ginikaj nej sij ga̱ꞌna̱ꞌ nej sij síchìj aꞌnanꞌ dânj riñanj;
ni̱ nga guchiꞌ síchìj dânj,
ni̱ gachîn naꞌanj Ma̱ꞌân Jesús sôꞌ.
41 —Ni̱ gata gu̱nïn sôꞌ:
Nùnj huin si gi̱ꞌhia ruhuâꞌ ràꞌaj.
Ni̱ gataj síchìj dânj:
—Señor,
ruhuâj ga̱na̱huin sàꞌ rune ñânj gi̱ꞌhiaj Ma̱ꞌân rèꞌ.
42 Ni̱ gataj Ma̱ꞌan Jesús:
—Gànàyìgï̀n rune ñant,
dadinꞌ rayiꞌî guendâ guyumân ruhuâꞌ ni̱ ganahuînꞌ na̱nj ánj.
43 Ni̱ orâ chre ni̱ ganayigï̀n rune ña̱n sí dânj ni̱ ginikòꞌ sôꞌ rukû Ma̱ꞌan Jesús,
ni̱ nitaj àmàn giyichinꞌ ruhuâ sôꞌ si ga̱ꞌmi̱n hueꞌê sôꞌ yiꞌî Ma̱ꞌan Ñaꞌanj an;
ni̱ nga giniꞌin,
daranꞌ nej guiì yùmànꞌan nej sa gahuin,
ni̱ ûta gaꞌmin hueꞌê ninj yiꞌî Ma̱ꞌan Ñaꞌanj an.