Huaj ga̱ꞌhue gi̱ni̱njꞌ riñan gakï̱nꞌïn
17
Ni̱ gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
—Nitaj àmàn huaj gìyìchìnꞌ si guyumân gakï̱nꞌïn riñan ꞌngo̱ guiì,
sani̱ ûta gi̱ranꞌ sa̱ñu̱n nej guiì giꞌhiaj si gi̱ni̱nj aꞌngô nej guiì gakï̱nꞌïn na̱nj ánj.
2 Dànanj dùgùnàj huaj si go̱dokôꞌ hiëj to guduguâj molino yihiâ ninj,
ni̱ gu̱du̱guêꞌ ga̱ꞌa̱nj ninj ruhuâ nne ña̱ꞌa̱nj,
daꞌnga ni̱ si̱ gidigân ninj gi̱ꞌhiaj aꞌngô nej guiì hia̱j guyumân ruhuâ niꞌin Ma̱ꞌan Ñaꞌanj an gakï̱nꞌïn mánj.
3 Ga̱ya̱ka̱j guendâ sòꞌ dàj giꞌhiaj ma̱ꞌânꞌ.
’Ni̱ si giꞌhiaj dinḯnt gakï̱nꞌïn riñanꞌ,
ni̱ ga̱ꞌmi̱nꞌ ngà sôꞌ rayiꞌî gakï̱nꞌ giꞌhiaj sôꞌ riñanꞌ;
ni̱ si ganakaj guendâ sôꞌ sa giꞌhiaj sôꞌ ni̱ gananikàj ruhuâ sôꞌ,
ni̱ gi̱nikajꞌ nimân nìko rayiꞌî sôꞌ.
4 Ni̱ si ꞌngo̱ gui ni̱ nda chi̱j giꞌhiaj sôꞌ gakï̱nꞌïn riñanꞌ,
ni̱ nda chi̱j gaꞌnaꞌ sôꞌ gui dânj riñanꞌ,
ni̱ gataj sôꞌ gu̱nïnꞌ:
“Gananikàj ruhuâj rayiꞌî nej gakï̱nꞌ giꞌhiâ riñanꞌ”,
huê danj ni̱ gi̱nikajꞌ nimân nìko rayiꞌî sij na̱nj ánj.
Giꞌhiaj Ma̱ꞌân rèꞌ si gùyùmàn nìko doj ruhuâj
5 Ni̱ gataj nej sí gaꞌanj gi̱di̱gân si̱nï̱n si-nùguàn Ma̱ꞌan Ñaꞌanj an:
—Gi̱ꞌhiaj Ma̱ꞌân rèꞌ si ga̱huin nìko doj sa gùyùmàn ruhuâ nej ñûnj.
6 Hiôꞌ ni̱ gataj Ma̱ꞌan Señor:
—Ni̱ si gùyùmàn ruhuâ nej suj dàj rûnꞌ hua ka̱n kuej staj,
ni̱ ga̱ꞌhue ga̱ta̱j nej suj gu̱nïn ꞌngo̱ chrun nânj:
“Ga̱hui̱ hiaꞌaꞌ riñan hioꞌóo,
ni̱ ga̱ꞌa̱njꞌ ga̱nêꞌ ruhuâ nne ña̱ꞌa̱nj”,
ni̱ gu̱nïn sa ga̱ꞌmi̱nꞌ nej suj na̱nj ánj.
Sa daꞌhui sí unânj gi̱tsi da̱gahuin sôꞌ
7 ’Ahuin goꞌngo̱ nej suj,
ni̱ si hua̱ ꞌngo̱ musû gaꞌanj ga̱na̱che̱j doꞌó nej suj ni̱ si gaꞌanj gu̱du̱gumîn sôꞌ dân nej suj yuku,
ni̱ nga gunumân sôꞌ gaꞌanj sôꞌ kï̱j ï ni̱ ga̱ta̱j nej suj gu̱nïn sôꞌ:
“Ga̱chi̱n ga̱ꞌna̱ꞌ ni̱ ga̱neꞌ ni̱ ya̱ ráj.”
8 Sê dànanj gataj nej suj ràꞌ saj ûnꞌ:
“Gu̱nu̱mi̱n ran sòꞌ rikîꞌ ni̱ gi̱ꞌhiaj yu̱guiꞌ nihia stiꞌnï̀ïn,
ni̱ gàꞌnï̀nj yàj ni̱ gòꞌòj ni̱ neꞌ rùkù nga gisîj yâj ni̱ gisîj goꞌôj,
ni̱ na̱ga̱neꞌ ni̱ yâꞌ ni̱ go̱ꞌo̱ꞌ râj.”
9 Ni̱ gaꞌhuiꞌ nej suj si guruhuâ sí musû dânj guendâ dagahuin sôꞌ,
sun gaꞌnïnꞌ nej suj riñan sôꞌ nîꞌ.
Ganï̂n ruhuâj si nitaj si gaꞌhuiꞌ nej suj si guruhuâ sôꞌ mánj.
10 Ni̱ huê danj na̱nj nej suj,
ni̱ nga gisîj dagahuin nej suj daranꞌ nej sun giyiꞌnïnꞌ su̱n riñan nej suj,
ni̱ si̱ ganaꞌhuìj nej suj si ri̱ki̱ Ma̱ꞌan Ñaꞌanj an si guruhuâ nej suj ni̱ ga̱ta̱j nej suj:
“Musû nitaj si niꞌñanj an huin nej ñûnj,
dadinꞌ nej sun daꞌhui nej ñûnj gi̱ꞌhiaj nej ñûnj,
ni̱ sun dânj dagahuin nej ñûnj na̱nj ánj.”
Ganahuin chi̱ꞌ sí nnùn yiꞌì lepra
11 Ni̱ gaché Ma̱ꞌan Jesús hua neꞌ Jerusalén,
ni̱ gachinj da̱nï̱n hioꞌó Samaria ngà Galilea.
12 Ni̱ nga gatûj Ma̱ꞌan Jesús ruhuâ ꞌngo̱ rânchu,
ni̱ ganariꞌ duguiꞌij ngà chi̱ꞌ sí nnùn yiꞌì lepra ni̱ nda gànꞌ ganikïnꞌ nej sôꞌ riñanj,
13 ni̱ gaꞌmin nùkuaj nej sôꞌ,
ni̱ gataj nej sôꞌ:
—Maestrûj,
ga̱na̱nï̱n àko ruhuâ Ma̱ꞌân rèꞌ niꞌîn rèꞌ nej ñûnj.
14 Ni̱ nga giniꞌin Ma̱ꞌan Jesús nej sí dânj,
ni̱ gata gu̱nïn nej sôꞌ:
—Ga̱ꞌa̱nj gi̱di̱gân nej suj ma̱ꞌan nej suj riñan nej síchìj rej.
Ni̱ gahuin nga nï̀nꞌ gaché nej sôꞌ huaj nej sôꞌ ni̱ giyiꞌnèj yiꞌì lepra nnùn nneè nej sôꞌ.
15 Hiôꞌ ni̱ giniꞌin ꞌngo̱ sí dânj,
si gàꞌ ganahuin hueꞌêꞌ nneè kú sôꞌ,
ni̱ nanikàj sôꞌ gaꞌnaꞌ sôꞌ riñan Ma̱ꞌan Jesús ni̱ ûta nùkuaj gaꞌmin sôꞌ,
ni̱ ûta gaꞌmin hueꞌê sôꞌ riñan Ma̱ꞌan Ñaꞌanj an guendâ ganahuin hueꞌê nneè kú sôꞌ.
16 Ni̱ ganikïnꞌ rúdàkòj sôꞌ yiꞌî Ma̱ꞌan Jesús,
ni̱ gaꞌhuiꞌ sôꞌ si guruhuaj;
sani̱ sí ꞌna̱ꞌ yumanꞌ Samaria huin sí dânj.
17 Nanikàj Ma̱ꞌan Jesús,
ni̱ gata gu̱nïn nej sí gaꞌnaꞌ ga̱huin riñanj:
—Sê chi̱ꞌ ranꞌ nej sij ganahuin nneè kú ràꞌ saj ûnꞌ.
Ni̱ dànèꞌ gaꞌanj aꞌngô ꞌï̀n ranꞌ nej sôꞌ ràꞌaj.
18 Dadinꞌ nun gànànìkàj nej sôꞌ guendâ nàgàꞌhuìꞌ nej sôꞌ si̱ guruhuâ Ma̱ꞌan Ñaꞌanj an ni̱ sí judío huin nej sôꞌ,
sani̱ sí nânj ni̱ sí màn yumanꞌ Samaria huîn sôꞌ ràꞌaj.
19 Ni̱ gataj Ma̱ꞌan Jesús gu̱nïn sí nânj:
—Gànàyùmàn sòꞌ ni̱ na̱nꞌ dukuât;
dadinꞌ guendâ guyumân ruhuâꞌ ni̱ rayiꞌî dan ni̱ ganahuînꞌ na̱nj ánj.
Nga ga̱ꞌna̱ꞌ gi̱nikaj su̱n Ma̱ꞌan Ñaꞌanj nne yàtàꞌa
20 Gachín naꞌanj nej sí fariseo Ma̱ꞌan Jesús ni̱ gataj nej sôꞌ:
Àmàn ga̱ꞌna̱ꞌ ginikaj su̱n Ma̱ꞌan Ñaꞌanj an ràꞌaj,
nanikàj Ma̱ꞌan Jesús ni̱ gata:
—Sê si̱ ga̱ta̱j snaꞌan àmàn ga̱ꞌna̱ꞌ gi̱ni̱kaj sunj mánj,
21 ni̱ gàꞌ si gataj nej guiì:
“Huej nikïnꞌ hiuj nan”,
“nej si huej nikïnꞌ dàmanj”;
dadinꞌ gàꞌ nne Ma̱ꞌan Ñaꞌanj an ginikaj sunj siganï̂nj nej guiì na̱nj ánj.
22 Ni̱ gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
—Ga̱ diû ni̱ ga̱nï̱n ruhuâ nej suj gi̱ni̱ꞌin nej suj ñùnj,
sani̱ si̱ giniꞌin nej suj ñùnj mánj.
23 Ni̱ gataj nej guiì:
“Huej nikïnꞌ hiuj nan”,
“huej nikïnꞌ dàmanj.”
Sani̱ si̱ gaꞌanj nej suj,
ni̱ si̱ ginikòꞌ nej suj ga̱ꞌa̱nj nej suj mánj.
24 Dadinꞌ dàj rûnꞌ giꞌhia nga giràn giꞌhiaj sinàn duꞌhui ni̱ giyigï̀n nï̀nꞌ gàchràꞌ neꞌ yàtàꞌa ngà riñan hioꞌóo,
ni̱ huê danj ga̱huin gui nga gàꞌnàj.
25 Sani̱ gàꞌ si̱nï̱n gi̱ranꞌ sa̱ñu̱n staꞌûj,
ni̱ si̱ ganahuin ra̱ꞌa nej guiì màn diû nânj ñùnj mánj.
26 Ni̱ dàj rûnꞌ gahuin nej gui nga gane sachij Noé,
ni̱ huê danj ga̱huin nga gàꞌnàj.
27 Dadinꞌ do̱ꞌ si yâ nej guiì,
ni̱ goꞌo nej guiì,
ni̱ garan ra̱ꞌa ninj,
ni̱ huê dànanj giꞌhiaj ninj nda gui gatûj Noé ruhuâ barku nìko xi,
ni̱ ûta gamanꞌ ni̱ ganahuij daranꞌ nej guiì gimân nga diû dânj gahuiꞌ.
28 Ni̱ huê danj giꞌhiaj nej guiì gimân diû nga gane sachij Lot;
ni̱ do̱ꞌ si yâ ninj,
ni̱ goꞌo ninj,
ni̱ girânj ninj nej rasu̱un,
ni̱ guduꞌhuêj ninj rasu̱un,
ni̱ ganachrîj ninj nej chrun,
ni̱ giꞌhiaj ninj hueꞌe.
29 Sani̱ gui nga gahui sachij Lot ruhuâ yumanꞌ Sodoma,
ni̱ gamanꞌ gumàn hioꞌó asufri ni̱ ganahuij daranꞌ nej guiì gahuiꞌ.
30 Ni̱ huê dànanj ga̱huin gui nga ga̱ꞌna̱ꞌ gi̱digân ñún Ma̱ꞌán riñan nej guiì.
31 ’Ni̱ gui dânj ni̱ guiì tàj yichrá hueꞌe ni̱ si màn siꞌhiaj ninj ruhuâ dukuâ ninj,
ni̱ si̱ gananinj ninj guendâ ga̱na̱ka̱j ninj siꞌhiaj ninj ruhuâ dukuâ ninj mánj;
huê danj na̱nj nej guiì nu̱n gi̱ꞌhiaj su̱n riñan doꞌó,
ni̱ si̱ gaꞌnaꞌ ga̱na̱ka̱j ninj sa màn ruhuâ dukuâ ninj mánj.
32 Ga̱na̱nun ruhuâ nej suj dàj giranꞌ siyànà gahuin nika Lot.
33 Daranꞌ nej guiì naꞌhuej ruhuâ gàhuìꞌ rayiꞌî Maꞌán,
ni̱ ga̱ꞌa̱nj ni̱ꞌhia̱ ninj,
sani̱ daranꞌ nej guiì hua̱ ruhuâ gàꞌhuìꞌ rayiꞌî Maꞌán ni̱ ga̱na̱ni̱n ninj.
34 ’Ni̱ gàtà gu̱nïn nej suj si ñanꞌ dânj ni̱ nngaj huìj ranꞌ guiì riñan ꞌngo̱ na;
ni̱ ngo̱ ninj ga̱na̱ka̱j Ma̱ꞌan Ñaꞌanj an ni̱ aꞌngô ninj gu̱du̱nâj Ma̱ꞌan Ñaꞌanj an.
35 Ni̱ si nu̱n huìj siyànà huâj nguèj ninj:
Ni̱ ꞌngo̱ ninj ga̱na̱ka̱j Ma̱ꞌan Ñaꞌanj an ni̱ aꞌngô ninj gu̱du̱nâj Maꞌan Ñaꞌanj an.
36 Ni̱ si nu̱n huìj síi giꞌhiaj sun nguèj sôꞌ riñan doꞌó nguèj sôꞌ,
ni̱ ga̱na̱ka̱j Ma̱ꞌan Ñaꞌanj an ꞌngo̱ sôꞌ ni̱ aꞌngô sôꞌ gu̱du̱nâj Ma̱ꞌan.
37 Nanikàj nej sí dânj ni̱ gachîn naꞌanj nej sôꞌ:
—Dànèꞌ ga̱huin sa gataj Maꞌân rèꞌ ràꞌaj Señor.
Ni̱ gataj Ma̱ꞌan Jesús:
—Ñan gi̱ngaj nneè kú nej nîman ni̱ hiuj dânj,
ga̱na̱huin chreꞌ nej yachrúu ni̱ ya̱ nej yôꞌ nneè nej nîman.