Ahuin sí huin sí aꞌnïnꞌ doj ràꞌaj
18
Ni̱ diû dânj ni̱ gaꞌnaꞌ nichì nej sí ꞌna̱ꞌ ga̱huin chru̱n riñan Ma̱ꞌan Jesús, ni̱ gachín naꞌanj nej sôꞌ ni̱ gataj nej sôꞌ:
—Ahuin goꞌngo̱ nej ñûnj gi̱nikaj sun yàkàn doj nga ga̱ne nej ñûnj ñan gi̱nikaj su̱n Ma̱ꞌan sa ni̱ka̱j su̱n yàtàꞌa ràꞌaj.
2 Hiôꞌ ni̱ gakḯn Ma̱ꞌan Jesús gaꞌnaꞌ ꞌngo̱ sílìj i riñanj; ni̱ ganïnj ganikïnꞌ silíj dânj da̱nï̱n ñan màn nej sij.
3 Ni̱ gata:
—Yàngàꞌ hia nï̀nꞌ gàtà, ni̱ sisi̱ si̱ ganadunâ nej suj ma̱ꞌan nej suj ni̱ sisi̱ si̱ giꞌhiaj nej suj dàj rûnꞌ giꞌhiaj nej sílìj i, ni̱ si̱ gaꞌhue ga̱tu̱ nej suj ni̱ ga̱ne nej suj ñan ni̱ka̱j su̱n Ma̱ꞌan sa ni̱ka̱j su̱n yàtàꞌa mánj.
4 Sí gi̱nikaj sun yàkàn doj ñan ni̱ka̱j su̱n Ma̱ꞌan sa ni̱ka̱j su̱n yàtàꞌa, huin sí ganakaj guendâ si huin sôꞌ sí gakï̱nꞌïn ni̱ nagiꞌhiaj lij sôꞌ ma̱ꞌan sôꞌ.
5 Ni̱ sí ganahuin ra̱ꞌa ꞌngo̱ sílìj i ngà siyu̱guí dàj rûnꞌ hua silíj nânj, ni̱ ñùnj ga̱na̱huin ra̱ꞌa sôꞌ.
Huaj ga̱ꞌhue gi̱ni̱nj riñan gakï̱nꞌïn
6 ’Ni̱ ahuin na̱nj sí gidigân gi̱ꞌhiaj nej silíj gàꞌ guyumân ruhuâ niꞌin ñùnj gakï̱nꞌïn, ni̱ dùgùnàj huaj si du̱nikòꞌ nej sôꞌ ꞌngo̱ hiëj to molino guchraꞌ nihiaj guduguâj urruj u yihiâ sí dânj, ni̱ gu̱du̱guêj nej sôꞌ ga̱ꞌa̱nj sij nda gùnùn daki nne ña̱ꞌa̱nj.
7 Ni̱ ûta aꞌnanꞌ hua nej gakï̱nꞌ màn ruhuâ yumiguìi. Ni̱ hua̱ ni̱ña̱n si gùyùmàn gakï̱nꞌïn riñan nej guiì, sani̱ ûta gi̱ranꞌ sa̱ñu̱n sí gi̱digân gi̱ꞌhiaj aꞌngô nej guiì gakï̱nꞌïn.
8 ’Rayiꞌî dan ni̱ si raꞌât ngà dakót giꞌhiaj gi̱ni̱njꞌ riñan gakï̱nꞌïn, ni̱ gàꞌnèꞌ ni̱ gu̱xu̱n riñan nneè kút; dadinꞌ dànanj dùgùnàj huaj si ga̱tu̱ꞌ ñan ni̱ka̱j sun Cristo, nùnj huin si gàchin ꞌngo̱ raꞌât ngà ꞌngo̱ dakót, dadinꞌ nùnj huin si hua̱ nguèj raꞌât ni̱ hua̱ nguèj dakót sani̱ ga̱ꞌa̱njꞌ ruhuâ rúnâko gi̱nun nìgànj chreꞌ.
9 Ni̱ si rune ñant giꞌhiaj gi̱ni̱njꞌ riñan gakï̱nꞌïn gi̱ri̱ ni̱ gu̱xu̱n riñan nneè kút; dadinꞌ dànanj dùgùnàj huaj si ga̱tu̱ꞌ ñan ni̱ka̱j su̱n Ma̱ꞌan sa ni̱ka̱j sun yàtàꞌa ngà ꞌngo̱ rïn rune ñant, dadinꞌ nùnj huin si hua̱ nguèj rune ñant sani̱ ga̱ꞌa̱njꞌ ruhuâ rúnâko gi̱nun nìgànj.
Nuguanꞌ rán gaꞌmin rayiꞌî matsïj gaꞌanj ni̱ꞌhia̱a
10 ’Ni̱ꞌhiaj nej suj ni̱ si̱ gininj ꞌì gàꞌ si ꞌngo̱ nej silíj nânj riñan nej suj; dadinꞌ gatâ gu̱nïn nej suj si ni̱kï̱nꞌ si-ángel nej sij neꞌ yàtàꞌa ni̱ daranꞌ diû ganataj gu̱nïn Ma̱ꞌan Rê nne yàtàꞌa sa giꞌhiaj nej suj ngà nej sij.
11 Dadinꞌ gaꞌná guendâ gi̱ꞌhia si ga̱na̱ni̱n nej guiì gàꞌ gaꞌanj ni̱ꞌhia.
12 ’Ni̱ dàj huin ruhuâ nej suj ràꞌaj. ꞌNgo̱ sí dânj ni̱ ni̱ka̱j sôꞌ ꞌngo̱ sientu matsïj ï, ni̱ si gaꞌanj ni̱ꞌhia̱ ꞌngo̱ yuku dânj, ni̱ gu̱dunâj sôꞌ gaꞌânj xia yi̱nu̱nꞌ gaꞌânj nej matsïj ï riki kïj ï ni̱ gaꞌanj nànàꞌhuìꞌ sôꞌ aꞌngô matsïj gaꞌanj ni̱ꞌhia̱ dânj.
13 Ni̱ nga ganariꞌ sôꞌ matsïj gaꞌanj ni̱ꞌhia̱a, yàngàꞌ hia nï̀nꞌ gàtà ni̱ dànanj ûta ga̱na̱huin nìhiàꞌ ruhuâ sôꞌ ni̱ꞌin sôꞌ matsïj gaꞌanj ni̱ꞌhia̱ dânj, gàꞌ daꞌ aꞌngô gaꞌânj xia yi̱nu̱nꞌ gaꞌânj nej matsïj nun ga̱ꞌa̱nj ni̱ꞌhia̱.
14 Huê danj ni̱ nun ga̱ra̱nꞌ ruhuâ Ma̱ꞌan Rêj nej suj nne yàtàꞌa, si ga̱ꞌa̱nj ni̱ꞌhia gàꞌ si ꞌngo̱ nej silíj hua̱ lij mánj.
Dàj gaꞌhue gi̱ni̱kajꞌ nimân nìko rayiꞌî dinḯnt ràꞌaj
15 ’Ni̱ si giꞌhiaj dinḯnt gakï̱nꞌïn riñanꞌ, ni̱ ga̱ꞌa̱njꞌ ni̱ du̱gunïn gàꞌì sij nga nne ꞌngo̱ rï̂nꞌ ngà sij ni̱ si ganakaj guendâ sij ni̱ gunïn sij nuguanꞌ gaꞌminꞌ, ni̱ giꞌhiaj ga̱nânꞌ dinḯnt.
16 Sani̱ si nun gu̱nïn sij nuguanꞌ gatajꞌ gu̱nïn sij, hiôꞌ ni̱ gi̱nikajꞌ sòꞌ ꞌngo̱ síi, huìj síi ga̱ꞌa̱njꞌ, daꞌnga ni̱ nuguanꞌ ga̱ꞌmi̱n huìj huàꞌnï̀nj ranꞌ nej suj ni̱ huê nuguanꞌ dânj gahuin ꞌngo̱ sa yìtï̀nj huaa.
17 Ni̱ si nun ga̱na̱ka̱j guendâ sij sa gataj nej suj gu̱nïn sij, ni̱ gànàtàꞌ nej suj riñan nej dinï̂nt huin si-nùhuì Ma̱ꞌan Jesús rayiꞌî si-ga̱kïnꞌ sij, ni̱ si nun ga̱na̱ka̱j guendâ sij nuguanꞌ gataj nej sôꞌ huin si-nùhuì Ma̱ꞌan Jesús, hiôꞌ ni̱ gi̱ꞌhia̱j nej suj si ga̱huin sij sí gakï̱nꞌïn ni̱ sí nàsìnùnj un na̱nj ánj.
18 ’Yàngàꞌ hia nï̀nꞌ tâ ni̱ daranꞌ nej nuguanꞌ nun ga̱ꞌhue gi̱ꞌhiaj hia nej suj riñan hioꞌóo ni̱ hua̱ nîꞌnïnj man riñan Ma̱ꞌan Ñaꞌanj an neꞌ yàtàꞌa, ni̱ daranꞌ nej nuguanꞌ gaꞌhue giꞌhiaj hia nej suj riñan hioꞌóo ni̱ gahuin hia man riñan Ma̱ꞌan Ñaꞌanj an nne yàtàꞌa.
19 ’Aꞌngô ñûn gatâ gu̱nïn nej suj, ni̱ si riñan hioꞌó nânj nne huìj ranꞌ nej suj hua̱ ni̱ka̱ ruhuâ ni̱ gu̱ña̱n gàchìnj nìꞌhiaj nej suj rayiꞌî ꞌngo̱ rasu̱un. Ni̱ ga̱ꞌhue ri̱ki̱ Ma̱ꞌan Rê nne yàtàꞌa riñan nej suj.
20 Dadinꞌ ñan naraꞌhuiꞌ huìj nej guiì nej si huàꞌnï̀nj nej guiì ngà siyu̱guí, ni̱ nné siganï̂nj ninj.
21 Hiôꞌ ni̱ gaꞌanj nichì Pedro ni̱ gataj sôꞌ:
—Señor, nda andaj daꞌhuí gi̱nikâ nimân nìko ngà dinï̂n nga giꞌhiaj sôꞌ gakï̱nꞌïn riñânj ràꞌaj. Nda chi̱j nîꞌ.
22 Ni̱ gataj Ma̱ꞌan Jesús.
—Sê man nda chi̱j gi̱nikajꞌ nimân nìko gatâ mánj, daꞌhuíꞌ gi̱nikajꞌ nimân nìko nda huàꞌnï̀nj xia chi̱ꞌ sa chi̱j i gatâ.
Huìj sí daꞌhui
23 ’Huê danj ni̱ Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin ꞌngo̱ sí rey nagiꞌhiaj guenda ngà nej sí giꞌhiaj sun riñan sôꞌ.
24 Ni̱ gayiꞌì sôꞌ ni̱ nagiꞌhiaj sôꞌ guenda ngà nej sí giꞌhiaj sun riñan sôꞌ, huê danj ni̱ ni̱ka̱j nej sôꞌ gaꞌnaꞌ nej sôꞌ ꞌngo̱ sí daꞌhui ûta nìko xi sanꞌanj an riñan rey nânj.
25 Sani̱ ñan nitaj sanꞌanj an hua riñan sí nânj ga̱na̱ruꞌhue sôꞌ yikḯn daꞌhuiꞌ sôꞌ riñan rey, ni̱ gaꞌnïnꞌ rey suun sí gu̱du̱ꞌhue̱ nej sij sí nânj ga̱huin sôꞌ sí gi̱ꞌhiaj sun chre, huê danj na̱nj gu̱du̱ꞌhue̱ nej sij nika sôꞌ ni̱ nej daꞌní sôꞌ, ni̱ daranꞌ nej rasu̱n hua̱ riñan sôꞌ, daꞌnga ni̱ naruꞌhue nej sij sanꞌanj daꞌhui sí danj riñan rey.
26 Sani̱ ganikïnꞌ rúdàkòj sí dânj riñan rey; ni̱ gaꞌmin àko sôꞌ ni̱ gataj sôꞌ: “Ga̱ nùkuaj ruhuâ rèꞌ niꞌîn rèꞌ ñùnj, ni̱ neꞌ rùkù ni̱ na̱ru̱ꞌhuej daranꞌ sa daꞌhuí riñan rèꞌ.”
27 Huê danj ni̱ gananï̂n àko ruhuâ sí yiruꞌhue dânj niꞌîn sôꞌ sí dânj; ni̱ giri sôꞌ sí dânj ruhuâ dukuâ gaꞌa, ni̱ ginikaj sôꞌ nimân nìko rayiꞌî nej si-yìkï̀nj sí nânj.
28 Sani̱ nga gahui sí dânj ruhuâ dukuâ gaꞌa, ni̱ ganariꞌ sôꞌ aꞌngô sí giꞌhiaj sun ngà sôꞌ ni̱ daꞌhui sí nânj ꞌngo̱ sientu sanꞌanj plata riñan sôꞌ, ni̱ gidaꞌa sôꞌ sí nânj ni̱ ganï̂n sôꞌ yihiâ sí nânj ni̱ gataj sôꞌ gu̱nïn sí nânj: “Na̱ru̱ꞌhue sòꞌ saꞌanj daꞌhuîꞌ riñânj àj nï̂n.”
29 Huê danj ni̱ ganikïnꞌ rúdàkòj sí nânj riñan sôꞌ, ni̱ ûta àko gachín nìꞌhiaj sí dânj ni̱ gataj sôꞌ: “Ga̱ nùkuaj ruhuâ sòꞌ niꞌînꞌ ñùnj ni̱ na̱ru̱ꞌhuêj daranꞌ saꞌanj daꞌhuí riñanꞌ na̱nj ánj.”
30 Sani̱ nun ga̱ꞌhue̱j sôꞌ ga̱ra̱n yina sôꞌ nuguanꞌ gachín nìꞌhiaj sí nânj riñan sôꞌ, ni̱ gaꞌanj ga̱ra̱n ruhuâ sôꞌ yiꞌî sí nânj ni̱ gachrîj sôꞌ dukuâ gaꞌa sí dânj, ni̱ dàñùn giꞌhiaj sôꞌ si ga̱na̱ruꞌhue sí nânj daranꞌ sanꞌanj daꞌhui sôꞌ riñan sij.
31 Ni̱ giniꞌin aꞌngô da̱ꞌa̱j nej sí giꞌhiaj sun ngà sij dàj giꞌhiaj sij, ni̱ ûta gananï̂n ruhuâ nej sôꞌ rayiꞌî sa giꞌhiaj sij, Huê danj ni̱ gaꞌanj gànàtàꞌ nej sôꞌ riñan rey daranꞌ sa giniꞌin nej sôꞌ giꞌhiaj sij.
32 Hiôꞌ ni̱ gaꞌnḯn rey gaꞌanj gànàkï̀nj nej sij sí dânj ni̱ gataj sôꞌ gu̱nïn sí dânj: “Musû ûta kï̱j huaa huînꞌ dadinꞌ daranꞌ nej sa daꞌhuîꞌ riñânj ni̱ ginikâ nimân nìko rayiꞌîꞌ, dadinꞌ ûta àko gachín nìꞌhiâꞌ riñânj.
33 Sê daꞌhuîꞌ ni̱ ga̱na̱nï̱n àko ruhuâꞌ niꞌînꞌ sí daꞌhui riñanꞌ, dàj rûnꞌ gananï̂n àko ruhuâj niꞌín sòꞌ ràꞌ saj ûnꞌ.”
34 Hiôꞌ ni̱ ûta ginaꞌan ruhuâ rey niꞌin sôꞌ sí danj, ni̱ ganachrîj sôꞌ raꞌa nej sí ni̱ka̱j ñuꞌunj dukuâ gaꞌa ni̱ gachrîj nej sôꞌ dukuâ gaꞌa sí dânj, nda naruꞌhue sôꞌ daranꞌ saꞌanj daꞌhui sôꞌ riñan sí yi̱ruꞌhue dânj.
35 Ni̱ gataj Ma̱ꞌan Jesús:
—Huê danj na̱nj gi̱ꞌhiaj Ma̱ꞌan Rê Ñaꞌanj nne yàtàꞌa ngà daꞌ goꞌngo̱ nej suj sisi̱ si̱ ginikaj nej suj nimân nìko rayiꞌî nej gakï̱nꞌ giꞌhiaj daꞌ goꞌngo̱ nej dinḯn nej suj ngà nej suj mánj.