Gidigân Ma̱ꞌan Jesús dàj ga̱ꞌhue ga̱na̱chi nikaj ñanj acta gu̱du̱nâj síi nikaj sij
19
Ni̱ neꞌ rùkù nga gisîj gaꞌmin Ma̱ꞌan Jesús nej nuguanꞌ nânj, ni̱ gahuin ane riñan hioꞌó Galilea ni̱ gaꞌan riñan hioꞌó Judea ni̱ gachinj gaꞌan neꞌ ané duꞌhua kïn Jordán.
2 Ni̱ ginikòꞌ nej guiì rigìi ni̱ gaꞌanj ninj nngaj, ni̱ giꞌhia si ga̱na̱huin nej guiì aꞌnaꞌan hiuj dânj.
3 Hiôꞌ ni̱ gaꞌnaꞌ nej sí chru̱n ley riñan Ma̱ꞌan Jesús guendâ ga̱ra̱n huè nej sôꞌ Ma̱ꞌan ni̱ gachín naꞌanj nej sôꞌ ni̱ gataj nej sôꞌ:
—Dùgùnàj huaj si gudunâj síi nika sij ngà ahuin na̱nj rayiꞌî nuguanꞌ gunïnꞌ nguèj nika sij nîꞌ.
4 Nanikàj Ma̱ꞌan Jesús ni̱ gata:
—Nun ga̱hia̱ nej suj riñan ñanj si-nùguànꞌ Ma̱ꞌan Ñaꞌanj an dadinꞌ àsìj sinï̱ïn ni̱ Ma̱ꞌan Ñaꞌanj an huin sa giꞌhiaj, “síi ngà siyànàa ràꞌ saj ûnꞌ”.
5 Ni̱ gata: “Rayiꞌî dânj ni̱ gu̱du̱nâj síi rej sôꞌ ngà nni sôꞌ, ni̱ ga̱na̱huin dùguìꞌ sôꞌ ngà nika sôꞌ, ni̱ ga̱na̱huin nguèj nika sôꞌ ꞌngo̱ rïn nneè.”
6 Huê danj ni̱ sê huìj guiì huin gàꞌ mánj, ga̱na̱huin nguèj sij ꞌngo̱ rïn guiì; huê danj ni̱ si̱ gaꞌhue gi̱ꞌhiaj anêj síi sa nagiꞌhiaj dùguìꞌ Ma̱ꞌan Ñaꞌanj an mánj.
7 Ni̱ gataj nej sí dânj:
—Nùnj huin saj ni̱ gaꞌnïnꞌ Moisés suun si ga̱ꞌhue ga̱na̱chi̱ nikaj ñanj ata guendâ ga̱ꞌhue gu̱du̱nâj síi nika sôꞌ ràꞌaj.
8 Ni̱ gataj Ma̱ꞌan Jesús:
—Guendâ gahuin rùmìn sij sa gahuin duꞌhua nej suj huê dânj ni̱ garânj yina sij si ga̱ꞌhue gu̱du̱nâj nej suj nika nej suj; sani̱ àsìj si̱nï̱ïn ni̱ sê danj gaj mánj.
9 Sani̱ ñùnj taj ni̱ ahuin na̱nj sí dunachinikaj ñanj acta guendâ gu̱du̱nâj sôꞌ nika sôꞌ, ni̱ si sê rayiꞌî guendâ gininj siyànà dânj riñan gakï̱nꞌïn ngà aꞌngô síi huin rûꞌhuaj, ni̱ ganakaj sôꞌ aꞌngô siyànàa, ni̱ gininj sôꞌ gakï̱nꞌ ni̱ka̱j nika duguiꞌ ni̱ sí ganakaj siyànà gunâj dânj ni̱ gininj sôꞌ riñan gakï̱nꞌ ni̱ka̱j nika duguiꞌ.
10 Ni̱ gataj nej sí ꞌna̱ꞌ ga̱huin chru̱n riñan Ma̱ꞌan Jesús:
—Ni̱ si dànanj daꞌhui gaj siganï̂nj síi ngà nika sôꞌ, ni̱ dùgùnàj huaj sisi̱ si̱ gayakaj sôꞌ nika sôꞌ mánj.
11 Hiôꞌ ni̱ gataj Ma̱ꞌan Jesús:
—Sê daranꞌ nej síi ga̱ꞌhue ga̱ne ꞌngo̱ rïn mánj, man nej sí giriꞌ ni̱ꞌhia̱j giꞌhiaj Ma̱ꞌan Ñaꞌanj an huê nej sôꞌ huin nej sí gùnùkuaj ga̱ne ꞌngo̱ rïn na̱nj ánj.
12 Hua̱ nej sí ni̱ gàꞌ giriꞌ nìꞌhiaj nej sôꞌ àsìj ginun nej sôꞌ ruhuâ riki nni nej sôꞌ huê danj ni̱ nitaj si ganaꞌhuiꞌ nej sôꞌ siyànàa ga̱ya̱ka̱j nej sôꞌ, hua̱ nej sí naꞌhuej ruhuâ ga̱ya̱ka̱j nika dadinꞌ nitaj si hua̱ sàꞌ nneè kú nej sôꞌ giꞌhiaj aꞌngô nej síi, ni̱ hua̱ nej sí naꞌhuej ruhuâ ga̱ya̱ka̱j nika guendâ ruhuâ nej sôꞌ gi̱ꞌhiaj su̱n nej sôꞌ si-su̱n Ma̱ꞌan sa ni̱ka̱j su̱n yàtàꞌa ni̱ sí gu̱nu̱kuaj ga̱da̱gahuin nej nânj, ni̱ huê danj gi̱ꞌhiaj nej sij.
Gataj Ma̱ꞌan Jesús si ga̱ꞌna̱ꞌ sa hua̱ hueꞌê riñan nej sílìj i
13 Hiôꞌ ni̱ ni̱ka̱j nej guiì nej silíj hua̱ lij gaꞌnaꞌ ninj riñan Ma̱ꞌan Jesús, guendâ gu̱taj raꞌa ahui nej sôꞌ; ni̱ gàchìnj nìꞌhia rayiꞌî nej sôꞌ riñan Ma̱ꞌan Ñaꞌanj an, sani̱ dugunïn gàꞌì nej sí ꞌna̱ꞌ ga̱huin chru̱un nej guiì ni̱ka̱j gaꞌnaꞌ nej silíj hua̱ lij.
14 Sani̱ gataj Ma̱ꞌan Jesús:
—Ga̱ꞌnï̱n nej suj ga̱ꞌna̱ꞌ nej silíj dânj riñânj ni̱ si̱ garanꞌ ñuꞌunj nej suj mánj; dadinꞌ huê nej sij huin gùchìꞌ ga̱ne ñan ni̱ka̱j sun Ma̱ꞌan Ñaꞌanj an na̱nj ánj.
15 Ni̱ nga gisîj gutaꞌ Ma̱ꞌan Jesús raꞌa ahui nej silíj dânj, ni̱ gaꞌan aꞌngô hiuj u.
Gaꞌmin ꞌngo̱ sí yiruꞌhue hua̱ lij ngà Ma̱ꞌan Jesús
16 Hiôꞌ ni̱ gaꞌanj ꞌngo̱ sí dânj ni̱ gataj sôꞌ:
—Maestrû sàꞌa huin Ma̱ꞌân rèꞌ. Ahuin sa sàꞌ gi̱ꞌhia ni̱ ga̱ꞌhue ga̱ne nìgàn ñan nne Ma̱ꞌan Ñaꞌanj an ràꞌaj.
17 Nanikàj Ma̱ꞌan Jesús ni̱ gata:
—Nùnj huin saj ni̱ gatajꞌ si huín sí sàꞌaj ràꞌaj. Gàꞌ si ꞌngo̱ nej sa màn nânj nitaj si huin sa sàꞌ nï̀nꞌïn mánj, man ꞌngo̱ rïn Ma̱ꞌan Ñaꞌanj an huin sa sàꞌ nï̀nꞌïn na̱nj ánj. Sani̱ si ruhuâꞌ ga̱tu̱ꞌ yiñân Ma̱ꞌan Ñaꞌanj an ni̱ da̱gahuînꞌ nej nuguanꞌ gaꞌnïnꞌ su̱n Ma̱ꞌan Ñaꞌanj an na̱nj ánj.
18 Ni̱ gataj sí dânj:
—Ahuin nej nuguanꞌ gaꞌnïnꞌ su̱n Ma̱ꞌan Ñaꞌanj an si da̱gahuín ràꞌaj.
Ni̱ gataj Ma̱ꞌan Jesús:
—Si̱ dagahuîꞌ. Si̱ ginikajꞌ nika duguiꞌ. Si̱ giꞌhiaj tuꞌ. Si̱ gaꞌminꞌ nuguanꞌ gidigañuꞌunj un rayiꞌî nej duguiꞌ.
19 Gi̱ni̱kaj chrej riñan rét ngà riñan nnît; ni̱ ga̱ ꞌì ruhuâꞌ niꞌînꞌ nej duguiꞌ dàj rûnꞌ ꞌì ruhuâꞌ niꞌînꞌ ma̱ꞌânꞌ.
20 Gataj sí ña̱n dânj:
—Daranꞌ nej nuguanꞌ gataj rèꞌ ni̱ gàꞌ dagahuín àsìj ga li doj. Ni̱ ahuin sa gàchin da̱gahuín ràꞌaj.
21 Ni̱ gataj Ma̱ꞌan Jesús:
—Si ruhuâꞌ ga̱huinꞌ ꞌngo̱ sí gi̱ꞌhiaj sa ni̱ka̱ nï̀nꞌïn, ni̱ ga̱ꞌa̱njꞌ ni̱ gu̱du̱ꞌhue̱ꞌ daranꞌ nej rasu̱n huin siꞌhiâꞌ, ni̱ gàꞌhuìꞌ raꞌa nej guiì ga̱ni̱ki, ni̱ ga̱na̱huin ra̱ꞌâꞌ sa sàꞌ doj nga gùchìꞌ yàtàꞌa; ni̱ ga̱ꞌna̱ꞌ ni̱ gi̱nikôꞌ rukú.
22 Nga gunïn sí yi̱ruꞌhue hua̱ lij nânj nej nuguanꞌ nânj, ni̱ nda gananï̂n chre ruhuâ sôꞌ ni̱ gaꞌanj sôꞌ dadinꞌ hua̱ yi̱ruꞌhue nï̀nꞌ ruhuâ sôꞌ.
23 Hiôꞌ ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
—Yàngàꞌ hia nï̀nꞌ tâ ni̱ ûta chìꞌ huaj ga̱tu̱ ꞌngo̱ sí yi̱ruꞌhue ga̱ne sôꞌ ñan ni̱ka̱j sùnj.
24 Aꞌngô ñûn tâ, si dànanj nitaj si chìꞌ huaj si ga̱chi̱n ꞌngo̱ yuku kameyu hiuꞌuj tàj dakḯn ꞌngo̱ ganuhuâ gàꞌ daꞌ si ga̱tu̱ ꞌngo̱ sí yi̱ruꞌhue ga̱ne sôꞌ ñan ni̱ka̱j su̱n Ma̱ꞌan Ñaꞌanj an na̱nj ánj.
25 Ni̱ nga gunïn nej sí ꞌna̱ꞌ ga̱huin chru̱un nej nuguanꞌ nânj, ni̱ ûta gahuin ña̱ꞌanj ruhuâ nej sôꞌ ni̱ gataj nej sôꞌ:
—Hiôꞌ ni̱ ahuin nej guiì ga̱na̱ni̱n gàꞌ ûnj.
26 Ni̱ giniꞌhiaj Ma̱ꞌan Jesús riñan nej sij ni̱ gata gu̱nïn nej sij:
—Nej síi ni̱ nitaj àmàn huaj ga̱na̱ni̱n nej sôꞌ guendâ Ma̱ꞌan nej sôꞌ mánj, sani̱ guendâ Ma̱ꞌan Ñaꞌanj an ni̱ nitaj si chìꞌ huaj dadinꞌ ga̱ꞌhue ga̱na̱ni̱n nej sij na̱nj ánj.
27 Hiôꞌ ni̱ nanikàj Pedro ni̱ gataj sôꞌ:
—Gudunâj nej ñûnj daranꞌ sa hua̱ riñan nej ñûnj, ni̱ ginikòꞌ nej ñûnj rukû Ma̱ꞌân rèꞌ; hiôꞌ ni̱ nùnj huin si ga̱na̱huin ra̱ꞌa nej ñûnj ràꞌaj.
28 Ni̱ gataj Ma̱ꞌan Jesús:
—Yàngàꞌ hia nï̀nꞌ tâ ni̱ nga ga̱na̱huin nàkà daranꞌanj, ni̱ ga̱ꞌa̱nj ga̱né riñan ꞌngo̱ chrun yîla guendâ gi̱nika sun yàkàan, ni̱ nej suj ginikòꞌ rukú ni̱ gìrìꞌ nìꞌhiaj nej suj ga̱ꞌa̱nj ga̱ne nej suj riñan yùhuìj chrun yîla; guendâ ga̱na̱ka̱j guendâ nej suj si-ga̱kïnꞌ nej yùhuìj yiꞌnïnꞌ huin daꞌní Israel.
29 Ni̱ daranꞌ nej sí gudunâj dukuâ, ni̱ gudunâj nej sij dinḯn nej sij yuguej nej sij, rej nej sij ngà nni nej sij, nika nej sij daꞌní nej sij, ni̱ gudunâj nej sij doꞌó nej sij rayiꞌí, ni̱ ga̱na̱huin ra̱ꞌa nej sij ꞌngo̱ sientu nej sa gudunâj nej sij, ni̱ gùchìꞌ nej sij ñan nne Ma̱ꞌan Ñaꞌanj an ga̱ne nìgànj nej sij.
30 Ni̱ ûta gàꞌì nej sí huin ña̱n doj ruhuâ yumiguìi ni̱ ga̱na̱huin nej sôꞌ sí gi̱nikòꞌ neꞌ rùkùu, ni̱ nej sí nitaj nùnj huin ruhuâ yumiguìi ni̱ ga̱na̱huin nej sôꞌ sí si̱nï̱ïn.