Gidigân Ma̱ꞌan Jesús dàj ga̱ꞌhue ga̱na̱chi nikaj ñanj acta gu̱du̱nâj síi nikaj sij
10
Gahui Ma̱ꞌan Jesús hiuj dânj,
ni̱ gaꞌan riñan hioꞌó Judea neꞌ ané duꞌhua kïn Jordán,
ni̱ naraꞌhuiꞌ ñûn nej guiì yumanꞌan riñan Ma̱ꞌan,
ni̱ gayiꞌij gidiganj dàj rûnꞌ giꞌhiaj si̱nïnj.
2 Ni̱ gaꞌnaꞌ nichì nej sí fariseo ni̱ gachín naꞌanj nej sôꞌ Ma̱ꞌan Jesús,
guendâ ruhuâ nej sôꞌ ga̱ra̱n hue̱ nej sôꞌ Ma̱ꞌan ni̱ gataj nej sôꞌ,
dùgùnàj huaj si ꞌngo̱ sí nne nika ni̱ gu̱du̱nâj sij nika sij nîꞌ.
3 Nanikàj Ma̱ꞌan Jesús ni̱ gata:
—Dàj gaꞌnïnꞌ Moisés suun riñan nej suj ràꞌaj.
4 Ni̱ gataj nej sij:
—Garânj yina Moisés si ga̱ꞌhue ga̱na̱chi nikaj ñanj ata,
guendâ gu̱du̱nâj síi nika sôꞌ.
5 Nanikàj Ma̱ꞌan Jesús ni̱ gata:
—Guendâ ûta ganahuin tsì nimân nej suj ni̱ rayiꞌî dânj ni̱ garânj yina sôꞌ ni̱ giyiꞌnïnꞌ suun si ga̱ꞌhue ga̱na̱chi nikaj na̱nj ata na̱nj ánj;
6 sani̱ àsìj si̱nï̱ïn nga giꞌhiaj Ma̱ꞌan Ñaꞌanj an yumiguìi,
“ni̱ giꞌhia síi ngà siyànàa na̱nj ánj”.
7 “Rayiꞌî dânj ni̱ ga̱huin anêj síi riñan rej sôꞌ ngà riñan nni sôꞌ,
ni̱ ga̱na̱huin nùguànꞌàn sôꞌ ngà nika sôꞌ.
8 Ni̱ ga̱na̱huin nguèj nika sôꞌ ꞌngo̱ rïn nneè.”
Huê danj ni̱ sê huìj ranꞌ nej sôꞌ huin gàꞌ mánj,
dadinꞌ ganahuin nguèj nika sôꞌ ꞌngo̱ rïn guiì.
9 Hia̱j rûꞌhuaj ni̱ sa gàꞌ nagiꞌhiaj dùguìꞌ Ma̱ꞌan Ñaꞌanj an ni̱ si gaꞌhue gi̱ꞌhiaj anêj síi gàꞌ mánj.
10 Ni̱ nga gunukuiꞌ nej sij hueꞌe,
ni̱ gachín naꞌanj ñûn nej sí ꞌna̱ꞌ ga̱huin chru̱un riñan Ma̱ꞌan Jesús rayiꞌî nuguanꞌ nânj.
11 Ni̱ gataj Ma̱ꞌan Jesús:
—Ahuin na̱nj sí dunachinikaj ñanj acta guendâ gu̱du̱nâj sôꞌ nika sôꞌ ni̱ ganakaj sôꞌ aꞌngô siyànàa,
ni̱ gininj sôꞌ riñan gakï̱nꞌ ni̱ka̱j nika duguiꞌ.
12 Ni̱ siyànà dunachinikaj ñanj acta guendâ gu̱du̱nâ nikaj ni̱ ganaka aꞌngô síi,
ni̱ ginin riñan gakï̱nꞌ ni̱ka̱j nika duguiꞌ.
Gachín nìꞌhiaj Ma̱ꞌan Jesús si ga̱ꞌna̱ꞌ sa hua̱ hueꞌê riñan nej sílìj i
13 Ni̱ ni̱ka̱j nej sij nej sílìj i gaꞌnaꞌ nej sij riñan Ma̱ꞌan Jesús guendâ gàgànꞌ raꞌa nej sôꞌ,
sani̱ dugunïn gàꞌì nej sí ꞌna̱ꞌ ga̱huin chru̱n riñanj sisi̱ si̱ ga̱ꞌa̱nj nej sílìj i riñanj na̱nj ánj.
14 Ni̱ giniꞌin Ma̱ꞌan Jesús si dànanj giꞌhiaj nej sij,
ni̱ gahuin ña̱ꞌanj ruhuaj ni̱ gata:
—Ga̱ꞌnï̱n nej suj si ga̱ꞌna̱ꞌ nichì nej silíj dânj riñânj,
ni̱ si garanꞌ ñuꞌunj nej suj mánj;
dadinꞌ huê nej silíj nânj huin daꞌní Ma̱ꞌan Ñaꞌanj an.
15 Yàngàꞌ hia nï̀nꞌ tâ,
ni̱ sí naꞌhuej ga̱na̱huin ra̱ꞌa Ma̱ꞌan Rey ni̱ka̱j sun neꞌ yàtàꞌa,
dàj rûnꞌ ꞌhioꞌ ngà ganahuin roꞌôꞌ ꞌngo̱ sílìj i,
ni̱ si gaꞌhue ga̱tu̱ sí dânj ñan ni̱ka̱j su̱n Ma̱ꞌan Ñaꞌanj an mánj.
16 Ni̱ nani̱ꞌña̱n Ma̱ꞌan Jesús nej sílìj i,
ni̱ gutaj raꞌa hio nej sôꞌ ni̱ gata,
si ga̱ꞌna̱ꞌ sa hua̱ hueꞌê riñan nej sôꞌ.
Sí yiruꞌhue hua̱ lij
17 Ni̱ nga gàꞌ aché Ma̱ꞌan Jesús hua ruhuâ chrej e,
ni̱ nda gunânj chre ꞌngo̱ sí dânj gaꞌnaꞌ sôꞌ riñanj,
ni̱ ganikïnꞌ rúdàkòj sôꞌ riñanj,
ni̱ gachín naꞌanj sôꞌ ni̱ gataj sôꞌ:
—Maestrûj huê rèꞌ huin ꞌngo̱ sí sàꞌa.
Nùnj huin si gi̱ꞌhia ni̱ ga̱ꞌhue gùnùkuìj ni̱ gané nìgànj chré ñan nne Ma̱ꞌan Ñaꞌanj an ràꞌaj.
18 Ni̱ gataj Ma̱ꞌan Jesús:
—Nùnj huin saj ni̱ tajꞌ si huín ꞌngo̱ sí sàꞌa ràꞌaj.
Dadinꞌ gàꞌ si ꞌngo̱ nej síi nitaj si huin nej sôꞌ sí sàꞌaj mánj,
dadinꞌ man ꞌngo̱ rïn Ma̱ꞌan Ñaꞌanj an,
huin sa sàꞌaj na̱nj ánj.
19 Ni̱ gàꞌ niꞌînꞌ nej nuguanꞌ gaꞌnïn su̱n Ma̱ꞌan Ñaꞌanj an:
“Ni̱ si̱ ginikaj nika duguiꞌ,
ni̱ si̱ dagahuiꞌ guiì,
ni̱ si̱ giꞌhiaj tu̱ꞌ,
ni̱ si̱ gutaꞌ chrêꞌ gakï̱nꞌïn nej duguiꞌ,
ni̱ si̱ gidigañuꞌunjꞌ,
ni̱ gi̱nikaj chre̱jꞌ riñan réꞌ ni̱ huê danj na̱nj gi̱nikaj chre̱jꞌ riñan nnîꞌ.”
20 Hiôꞌ ni̱ nanikàj sí dânj ni̱ gataj sôꞌ:
—Maestrûj,
daranꞌ nej nuguanꞌ nânj dagahuín àsìj hua li.
21 Hiôꞌ ni̱ giniꞌhiaj Ma̱ꞌan Jesús riñan sí dânj,
ni̱ ganahuin ꞌì ruhuaj niꞌin sôꞌ ni̱ gata gu̱nïn sôꞌ:
—Hua̱ ꞌngo̱ rïn sa gàchin ga̱da̱gahuînꞌ na̱nj ánj:
Ga̱ꞌa̱njꞌ ni̱ gu̱du̱ꞌhueꞌ daranꞌ nej rasu̱n huin siꞌhiát,
ni̱ ga̱daꞌngaꞌ riñan nej guiì ga̱ni̱ki,
ni̱ ga̱na̱huin raꞌâꞌ nìko doj neꞌ yàtàꞌa;
hiôꞌ ni̱ ga̱ꞌhue ga̱ꞌna̱ꞌ ni̱ gi̱nikôꞌ rukú.
22 Sani̱ ûta gananï̂n ruhuâ sí nânj,
nga gunïn sôꞌ nuguanꞌ nânj,
huê danj ni̱ gaꞌanj sôꞌ dadinꞌ huin sôꞌ ꞌngo̱ sí yi̱ruꞌhuee.
23 Hiôꞌ ni̱ giniꞌhiaj Ma̱ꞌan Jesús nï̀nꞌ gàchràꞌ neꞌ rùkuj,
ni̱ gata gu̱nïn nej sí ꞌna̱ꞌ ga̱huin chru̱n riñanj:
—Ûta chìꞌ huaj ga̱tu̱ sí yi̱ruꞌhuee ga̱ne sôꞌ ngà Ma̱ꞌan Ñaꞌanj an.
24 Ni̱ ûta gahuin ña̱ꞌanj ruhuâ nej sí ꞌna̱ꞌ ga̱huin chru̱n riñan Ma̱ꞌan Jesús nga gunïn nej sôꞌ nej nuguanꞌ nânj;
sani̱ nanikàj Ma̱ꞌan Jesús,
ni̱ gata gu̱nïn nej sôꞌ:
—Da̱ꞌninj,
ûta chìꞌ huaj ga̱tu̱ nej sí aꞌnḯn ñan riñan nej rasu̱n du̱ꞌhue̱e ga̱ne sôꞌ yàtàꞌa na̱nj ánj.
25 Dànanj nitaj si chìꞌ huaj ga̱chi̱n ꞌngo̱ yuku kameyu hiuꞌuj tàj dakḯn ganuhuâ,
gàꞌ daꞌ si ga̱tu̱ ꞌngo̱ sí yi̱ruꞌhuee yiñán Ma̱ꞌan Ña̱ꞌa̱nj nne yàtàꞌa.
26 Hiôꞌ ni̱ ûta gahuin ña̱ꞌanj ruhuâ nej sí ꞌna̱ꞌ ga̱huin chru̱n riñan Ma̱ꞌan Jesús nga gunïn nej sôꞌ nej nuguanꞌ nânj,
ni̱ gaꞌmin nej ma̱ꞌan nej sôꞌ ni̱ gataj nej sôꞌ:
—Ahuin sí gùnùkuaj ga̱na̱ni̱n gàꞌ ûnj.
27 Hiôꞌ ni̱ giniꞌhiaj Maꞌan Jesús riñan nej sij ni̱ gata gu̱nïn nej sij:
—Guendâ nej síi ni̱ ûta chìꞌ huaj ga̱ꞌhue ga̱da̱gahuin nej sij,
sani̱ guendâ Ma̱ꞌan Ñaꞌanj an ni̱ sê sa chìꞌ huin mánj;
dadinꞌ daranꞌanj huin sa ga̱ꞌhue̱j gi̱ꞌhiaj Ma̱ꞌan Ñaꞌanj an na̱nj ánj.
28 Hiôꞌ ni̱ gayiꞌì Pedro ni̱ gataj sôꞌ:
—Señor,
gudunâj nej ñûnj daranꞌ sa hua̱ riñan nej ñûnj ni̱ ginikòꞌ nej ñûnj rukû Ma̱ꞌân rèꞌ.
29 Nanikàj Ma̱ꞌan Jesús ni̱ gata:
—Yàngàꞌ hia nï̀nꞌ gàtà gu̱nïn nej suj ni̱ ahuin na̱nj sí gudunâj dukuâ,
gudunâj dinḯn,
gudunâj yuguej,
gudunâj rej,
gudunâj nni,
gudunâj nika,
gudunâj daꞌní,
gudunâj doꞌó,
rayiꞌî Maꞌán ngà rayiꞌî nuguanꞌ gi̱ꞌhiaj ga̱na̱ni̱n nej guiì.
30 Ni̱ gànàrìꞌ nej sij ꞌngo̱ sientu nej rasu̱n gudunâj nej sij;
ni̱ gànàrìꞌ nej sij dukuâ nej sij,
dinḯn nej sij,
yuguej nej sij,
nni nej sij,
daꞌní nej sij,
doꞌó nej sij ruhuâ yumiguìi nânj,
ni̱ hua̱ ni̱ña̱n si gi̱ranꞌ sa̱ñu̱n nej sij;
ni̱ nga gàhuìꞌ nej sij ni̱ gànàrìꞌ nej sij ñan ga̱ne nìgànj nej sij.
31 Sani̱ ûta gàꞌì nej sí si̱nï̱ïn ni̱ ga̱na̱huin nej sôꞌ sí na̱nikòꞌ neꞌ rùkùu,
ni̱ nej sí ꞌna̱ꞌ neꞌ rùkùu ni̱ ga̱na̱huin nej sôꞌ sí si̱nï̱ïn.
Gataj ñûn Ma̱ꞌan Jesús si ga̱huij
32 Ni̱ hua̱j nej sij chrej ahui huaꞌanj neꞌ Jerusalén;
ni̱ hua̱j Ma̱ꞌan Jesús neꞌ ña̱an,
ni̱ gahuin ña̱ꞌanj ruhuâ nej sí nìkòꞌ rukû Ma̱ꞌan huaj nej sôꞌ ni̱ guyuꞌhuiꞌ nej sôꞌ.
Hiôꞌ ni̱ nanikàj Ma̱ꞌan Jesús ni̱ gakḯn ane nej yùhuìj sí ꞌna̱ꞌ ga̱huin chru̱n riñanj.
33 Ni̱ gayiꞌij ni̱ gata:
—Hia̱j ni̱ gùchìꞌ nêꞌ Jerusalén,
ni̱ nàgàꞌhuìꞌ nej síi ñùnj riñan nej rej huin ña̱an ngà riñan nej sí chru̱n ley;
ni̱ ga̱ra̱n ruhuâ nej sôꞌ rayiꞌí guendâ gàhuìj ni̱ nàgàꞌhuìꞌ nej sôꞌ ñùnj riñan nej sí nàsìnùnj un.
34 Ni̱ ga̱ꞌmi̱n duku nej sij riñânj ni̱ ga̱chri̱ nej sij nneꞌe yichrâ,
ni̱ gachra stanûj nej sij riñânj,
ni̱ da̱gahuiꞌ nej sij ñùnj;
sani̱ ga̱chi̱n huàꞌnï̀nj gui ni̱ gànàꞌnï̀nj siganï̂nj nej nîman na̱nj ánj.
Gachín nìꞌhiaj Santiago ngà Juan riñan Ma̱ꞌan Jesús
35 Hiôꞌ ni̱ gaꞌnaꞌ nichì Jacobo ngà Juan ni̱ nguèj sôꞌ huin daꞌní Zebedeo,
riñan Ma̱ꞌan Jesús,
ni̱ gataj nguèj sôꞌ:
—Maestrûj,
ruhuâ nguèj ñûnj si ga̱da̱gahuin Ma̱ꞌân rèꞌ sa gàchìnj nguèj ñûnj riñan Ma̱ꞌân rèꞌ.
36 Ni̱ gataj Ma̱ꞌan Jesús:
—Nùnj huin si gi̱ꞌhia ruhuâ nguèj suj ràꞌaj.
37 Ni̱ gataj nguèj sí dânj:
—Nga gi̱nikaj su̱n Ma̱ꞌân rèꞌ ni̱ ga̱ra̱n yina Ma̱ꞌân rèꞌ si ngo̱ nguèj ñûnj ga̱ne neꞌ huàꞌ Ma̱ꞌân rèꞌ ni̱ aꞌngô nguèj ñûnj ga̱ne neꞌ chrïn Ma̱ꞌân rèꞌ.
38 Hiôꞌ ni̱ gataj Ma̱ꞌan Jesús:
—Nun niꞌin nguèj suj sa gachín nguèj suj mánj.
Ga̱ꞌhue go̱ꞌo̱ nguèj suj basû goꞌôj nîꞌ,
ni̱ ga̱ꞌhue gàtàꞌ nne nguèj suj dàj rûnꞌ gàtàꞌ nnêj nîꞌ.
39 Ni̱ gataj nguèj sij:
—Ga̱ꞌhue huê danj gi̱ꞌhiaj nguèj ñûnj.
Ni̱ gataj Ma̱ꞌan Jesús:
—Yàngàꞌ hia nï̀nꞌ ni̱ sa nu̱n ruhuâ si-basû,
ni̱ ga̱ꞌhue go̱ꞌo̱ nguèj suj,
ni̱ dàj rûnꞌ gàtàꞌ nnêj ni̱ huê danj ga̱ꞌhue gàtàꞌ nne nguèj suj;
40 sani̱ guendâ ruhuâ nguèj suj si ꞌngo̱ nguèj suj ga̱ne raꞌá neꞌ huàꞌàj ni̱ aꞌngô nguèj suj ga̱ne raꞌá neꞌ chrḯn,
ni̱ sê si-sùnj huin sun dânj si rìkìj riñan nguèj suj mánj,
dadinꞌ gàꞌ hua̱ yu̱gui nej sí ga̱na̱huin ra̱ꞌa ga̱ne hiuj dânj.
41 Nga gunïn aꞌngô nej chi̱ꞌ ranꞌ nej sí ꞌna̱ꞌ ga̱huin chru̱un,
ni̱ gayiꞌì nej sôꞌ ni̱ ginaꞌan ruhuâ nej sôꞌ niꞌin nej sôꞌ Jacobo ngà Juan.
42 Sani̱ gakḯn Ma̱ꞌan Jesús nej sij ni̱ gata gu̱nïn nej sij:
—Niꞌin nej suj si nej sí ni̱ka̱j su̱n riñan nej yumanꞌ màn ruhuâ yumiguìi ni̱ nagiꞌhiaj si̱ꞌhiaj nej sôꞌ nej sun ni̱ka̱j nej sôꞌ,
ni̱ nej sí ni̱ka̱j sun nìko doj ni̱ gaꞌnïnꞌ nej sôꞌ riñan nej sí ni̱ka̱j sun ninaj doj nîꞌ.
43 Sani̱ si̱ gaꞌhue danj gaj siganï̂nj nej suj mánj,
dadinꞌ sí ruhuâ ga̱huin ña̱n siganï̂nj nej suj ni̱ ga̱huin nej sôꞌ sí gu̱na̱nj gi̱ꞌtsi riñan nej suj,
44 ni̱ si hua̱ ꞌngo̱ nej suj ruhuâ ga̱huin ña̱n siganï̂nj nej suj,
ni̱ ga̱huin nej suj sí giꞌhiaj sun chre riñan aꞌngô nej duguiꞌ nej suj.
45 Dadinꞌ ñùnj ni̱ nun gàꞌnàj guendâ gu̱na̱nj gi̱ꞌtsi nej síi riñânj mánj,
gaꞌná guendâ na̱ruꞌhuej Ma̱ꞌán ni̱ ga̱na̱ni̱n ûta gàꞌì nej guiì gi̱ꞌhia na̱nj ánj.
Ganahuin riñan sí du̱chri gùꞌnàj Bartimeo
46 Hiôꞌ ni̱ gaꞌnaꞌ nej sij yumanꞌ Jerikó;
ni̱ nga gahui Ma̱ꞌan Jesús ngà nej sí ꞌna̱ꞌ ga̱huin chru̱n riñanj neꞌ ye̱ꞌ Jerikó,
ni̱ hua̱j ûta gàꞌì nej guiì ngà nej sij ni̱ nne Bartimeo nìchrùnꞌ yiꞌnḯn chrej e ni̱ rej sôꞌ huin Timeo,
ni̱ huin sôꞌ ꞌngo̱ sí hua̱ du̱chri,
ni̱ gachín sôꞌ karida riñan nej guiì gachîn huaj hiuj dânj.
47 Ni̱ gunïn sôꞌ si gachîn Ma̱ꞌan Jesús Nazareno hua hiuj dânj,
ni̱ gayiꞌì sôꞌ ni̱ gaguâj nùkuaj staꞌu sôꞌ ni̱ gataj sôꞌ:
—Jesús,
Daꞌní David,
ga̱na̱nï̱n àko ruhuâ Ma̱ꞌân rèꞌ niꞌîn rèꞌ ñùnj na̱nj ánj.
48 Ni̱ ranꞌ gàꞌì nej guiì sôꞌ ni̱ gataj ninj si dḯn ga̱ne duꞌhua sôꞌ,
sani̱ dànanj duguꞌnïnꞌ sôꞌ gaguâj nùkuaj sôꞌ doj:
Ni̱ gataj sôꞌ:
—Daꞌní David,
gu̱ru̱gûñuꞌunj Ma̱ꞌân rèꞌ ñùnj na̱nj ánj.
49 Hiôꞌ ni̱ nga gunïn Ma̱ꞌan Jesús gaꞌmin sôꞌ,
ni̱ ganikïnj ni̱ gata:
—Gàkï̀nj nej suj ga̱ꞌna̱ꞌ sí dânj;
ni̱ gakḯn nej sij ga̱ꞌna̱ꞌ sí hua̱ du̱chri dânj ni̱ gataj aꞌngô nej sij gu̱nïn sôꞌ:
—Gùyùmàn ruhuâ sòꞌ ni̱ gi̱ꞌhiaj guesâ ma̱ꞌânꞌ;
ni̱ ga̱na̱chi,
dadinꞌ gakḯn Ma̱ꞌan Jesús ga̱ꞌa̱nj râj.
50 Hiôꞌ ni̱ guduguêj sí dânj atsìj i tàj yichrá sôꞌ,
ni̱ ganachi sôꞌ ni̱ nda guêj,
guêj sôꞌ ni̱ gaꞌanj sôꞌ riñan Ma̱ꞌan Jesús.
51 Nanikàj Ma̱ꞌan Jesús ni̱ gachín naꞌan sí dânj:
—Nùnj si̱ gi̱ꞌhia ngàꞌ ruhuâꞌ ràꞌaj.
Ni̱ gataj sí du̱chri dânj:
—Maestrûj,
ruhuâj si gi̱ꞌhiaj Ma̱ꞌân rèꞌ si gànàyìgï̀n rune ñânj.
52 Ni̱ gataj Ma̱ꞌan Jesús:
—Gui̱j nanꞌ dukuât dadinꞌ guendâ guyumân ruhuâꞌ ni̱ rayiꞌî dan ni̱ ganahuînꞌ.
Ni̱ orâ chre ni̱ ganayigï̀n rune ñan sí dânj ni̱ nìkòꞌ sôꞌ gaꞌanj sôꞌ rukû Ma̱ꞌan Jesús.