Ûta aꞌmin hueꞌê nej guiì yiꞌî Ma̱ꞌan Jesús nga gatu hua ngà ninj ruhuâ yumanꞌ snàꞌànj Jerusalén
11
Nga huaj ga̱huin nìchrùnꞌ nej sij Jerusalén,
ni̱ hua̱j nej sij ñan nngaj yumanꞌ Betania,
neꞌ ri̱ña̱n kïj ñan màn chrun olibo,
ni̱ gaꞌnḯn Ma̱ꞌan Jesús gaꞌanj huìj sí ꞌna̱ꞌ ga̱huin chru̱n riñanj.
2 Ni̱ gata gu̱nïn nguèj sí dânj:
—Ga̱ꞌa̱nj nguèj suj yumanꞌ nngaj neꞌ ña̱n mánj ni̱ nga gatûj nguèj suj ruhuâ yumanꞌ dânj,
ni̱ gànàrìꞌ nguèj suj ꞌngo̱ urruj u ni̱ a̱nu̱min xuj ni̱ gàꞌ si ꞌngo̱ síi nun gitàj yichrá xuj;
ni̱ ga̱na̱chi nguèj suj ni̱ gi̱nikaj nguèj suj ga̱ꞌna̱ꞌ nguèj suj.
3 Ni̱ si hua̱ ꞌngo̱ sí gàchìnj naꞌanj ni̱ ga̱ta̱j sôꞌ:
Nùnj huin saj ni̱ ganachi nguèj suj yuku dânj ràꞌaj.
Ni̱ ga̱ta̱j nguèj suj gu̱nïn sôꞌ,
Ma̱ꞌan Señor ga̱ra̱n sunj xuj,
ni̱ neꞌ rùkù ni̱ ga̱ꞌna̱ꞌ na̱rë̱ꞌë̱j nguèj ñûnj xuj.
4 Ni̱ gaꞌanj nguèj sí dânj,
ni̱ ganariꞌ nguèj sôꞌ urruj u ni̱ a̱nu̱min yôꞌ neꞌ ye̱ꞌ riñan hueꞌ dânj,
ñan ganachranꞌ chrej gàchràꞌa ni̱ ganachi nguèj sôꞌ urrûj dânj.
5 Ni̱ ni̱kï̱nꞌ gàꞌì nej síi hiuj dânj ni̱ gataj nej sôꞌ:
—Nùnj huin saj ni̱ ganachi nguèj suj urrûj dânj ràꞌaj.
6 Hiôꞌ ni̱ gataj nguèj sij dàj rûnꞌ gaꞌnïnꞌ su̱n Ma̱ꞌan Jesús riñan nguèj sij;
ni̱ garânj yina nej sí dânj,
huê danj ni̱ ginikaj nguèj sij urrûj ni̱ gaꞌanj nguèj sij.
7 Ni̱ ni̱ka̱j nguèj sij gaꞌnaꞌ nguèj sij urrûj dânj riñan Ma̱ꞌan Jesús,
ni̱ gutaꞌ nej sij atsîj ni̱ke̱ nej sij yichrá yôꞌ.
8 Ni̱ guchruj gàchràꞌ nej sí màn hiuj dânj atsîj ni̱ke̱ nej sôꞌ ruhuâ chrej ñan gachîn Ma̱ꞌan Jesús hua,
ni̱ aꞌngô da̱ꞌa̱j nej sôꞌ gaꞌneꞌ rekoj raꞌa nej chrun,
ni̱ guchruj nej sôꞌ ruhuâ chrej e.
9 Ni̱ gaꞌmin nùkuaj nej sí huaj neꞌ ña̱an ngà nej sí ꞌna̱ꞌ neꞌ rùkùu ni̱ gataj nej sôꞌ:
—Hosanna.
Ûta hueꞌê giꞌhiaj Ma̱ꞌan sa ꞌna̱ꞌ ngà siyu̱gui Ma̱ꞌan Señor.
10 Ûta hueꞌê giꞌhiaj Ma̱ꞌan sa gaꞌnaꞌ gi̱nikaj su̱n riñan rej nêꞌ David.
Ni̱ ga̱ꞌmin hueꞌê nêꞌ yiꞌî Ma̱ꞌan Ñaꞌanj nne yàtàꞌa.
11 Ni̱ gatûj Ma̱ꞌan Jesús ruhuâ yumanꞌ snàꞌànj Jerusalén,
ni̱ gatu ruhuâ nûhui nìko;
ni̱ giniꞌhia riñan daranꞌ nej rasu̱n màn nï̀nꞌ gàchràꞌ hiuj dânj,
sani̱ gàꞌ ꞌna̱ꞌ ga̱huin ru̱mi̱nꞌ ni̱ gaꞌan yumanꞌ Betania ngà nej yùhuìj nej sí ꞌna̱ꞌ ga̱huin chru̱n riñanj.
Gaꞌmin yìꞌì Ma̱ꞌan Jesús riñan chrun igû a̱tïn
12 Ni̱ nga giyigï̀n aꞌngô gui dânj ni̱ gahui neꞌ ye̱ꞌ yumanꞌ Betania,
ni̱ ganachinj yiꞌnaa riki Ma̱ꞌan.
13 Ni̱ nda ga̱nꞌ hua ni̱ giniꞌin nikïnꞌ ꞌngo̱ chrun îgu ni̱ màn koj o raꞌa chrun dânj,
ni̱ gaꞌanj gi̱niꞌhiâ ñan ni̱kï̱nꞌ chrun dânj dadinꞌ ruhuaj gìrìꞌij chruj îgu yaj raa̱ chrun dânj,
sani̱ nitaj gàꞌ si ꞌngo̱ chruj îgu nnûn raꞌa chrun dânj giniꞌin dadinꞌ man koj o mân raꞌa chrun dânj,
dadinꞌ sê diû gimàn chruj îgu huin nga huaj nej sij hiuj dânj.
14 Hiôꞌ ni̱ gataj Ma̱ꞌan Jesús gu̱nïn chrun dânj:
—Nitaj àmàn gìrìꞌ nej guiì ya̱ ninj chruj îgu ga̱hiu râꞌ gàꞌ mánj.
Ni̱ gunïn nej sí ꞌna̱ꞌ ga̱huin chru̱un dàj gataj Ma̱ꞌan Jesús gu̱nïn chrun dânj.
Nagiꞌhiaj hueꞌê Ma̱ꞌan Jesús ruhuâ nuhuî nìko nne Jerusalén
15 Gaꞌnaꞌ nej sij ñan nngaj,
yumanꞌ snàꞌànj Jerusalén;
ni̱ gatûj Ma̱ꞌan Jesús ruhuâ hueꞌ huin nûhui nìko,
ni̱ gayiꞌij ni̱ girij daranꞌ nej sí guduꞌhuêj nej rasu̱un ngà nej sí girânj nej rasu̱un ruhuâ nûhui nìko;
ni̱ dunatu si-mesa nej sí nadunâ sanꞌanj an,
ni̱ dunatu nej chrun yilâ huin siꞌhiaj nej sí guduꞌhuêj nej yaꞌàan;
16 Ni̱ nun ga̱ꞌnï̱n Ma̱ꞌan Jesús ga̱chi̱n gàꞌ si ꞌngo̱ nej sí ata nej rasu̱un nga huaj nej sôꞌ ga̱chi̱n nej sôꞌ ruhuâ nûhui dânj.
17 Ni̱ gidiganj ni̱ gata:
—Sê gàꞌ danj taj riñan ñanj ra̱ꞌ saj ûnꞌ:
“Hueꞌ huin dukuá ni̱ gùꞌnaꞌ hueꞌ ñan ga̱ꞌmi̱n nej guiì màn nï̀nꞌ gàchràꞌ ruhuâ yumiguìi ngà Ma̱ꞌan Ñaꞌanj an”;
Sani̱ giꞌhiaj nej suj si ga̱huin ꞌngo̱ huej ñan màn nej sí tu̱u.
18 Ni̱ gunïn nej sí chru̱n ley ngà nej rej huin ña̱an sa giꞌhiaj Ma̱ꞌan Jesús,
ni̱ nadigiꞌñûn nej sôꞌ dàj giꞌhiaj nej sôꞌ ga̱ꞌhue gàhuìꞌ Ma̱ꞌan Jesús;
sani̱ yuꞌhuiꞌ nej sôꞌ niꞌin nej sôꞌ Ma̱ꞌan Jesús,
dadinꞌ nï̀nꞌ gàchràꞌ yumanꞌan garanꞌ ruhuâ niꞌin nej yìꞌnï̀nꞌ nuguanꞌ gidigân Ma̱ꞌan Jesús.
19 Sani̱ nga ginìn ni̱ gahui Ma̱ꞌan Jesús ruhuâ yumanꞌ snàꞌànj dânj,
ni̱ gaꞌan aꞌngô hiuj u.
Ganakò chrun igû a̱tïn ri̱ña̱n gaꞌmin yìꞌì Ma̱ꞌan Jesús
20 Ni̱ neꞌ ni̱ganꞌ aꞌngô gui gachin nej sij huaj nej sij hiuj dânj,
ni̱ giniꞌin nej sij si ganakò chrun îgu ni̱ ganakò nda hiaꞌa chrun dânj.
21 Hiôꞌ ni̱ gananun ruhuâ Pedro ni̱ gataj sôꞌ:
—Maestrûj,
gi̱ni̱ꞌhiaj sòꞌ,
hua chrun igû ri̱ña̱n gaꞌmin yìꞌì Ma̱ꞌân rèꞌ ni̱ ganakò man ndaj.
22 Nanikàj Ma̱ꞌan Jesús ni̱ gata:
—Gùyùmàn yìtï̀nj ruhuâ nej suj niꞌin nej suj Ma̱ꞌan Ñaꞌanj an.
23 Dadinꞌ yàngàꞌ hia nï̀nꞌ gàtà ni̱ ahuin na̱nj sí ga̱ta̱j gu̱nïn kïj nânj:
“Gu̱xu̱n ma̱ꞌânꞌ ni̱ ga̱ꞌa̱njꞌ gi̱nunꞌ ruhuâ nne ña̱ꞌa̱nj”,
ni̱ sisi̱ si̱ ganï̂n huàꞌ ruhuâ sôꞌ ngà ruhuâ nimân sôꞌ,
ni̱ si gùyùmàn yìtï̀nj ruhuâ sôꞌ si ga̱huin dàj rûnꞌ gataj sôꞌ,
ni̱ ga̱huin yàngàꞌ sa gataj sôꞌ.
24 Hia̱j ni̱ gàtà,
si ni̱ daranꞌ sa gàchìnj nej suj nga ga̱ꞌmi̱n nej suj ngà Ma̱ꞌan Ñaꞌanj an,
ni̱ si gùyùmàn ruhuâ nej suj si ga̱na̱huin ra̱ꞌa nej suj sa gachín nej suj ni̱ gùyùmanj ga̱na̱huin ra̱ꞌa nej suj.
25 Ni̱ nga aꞌmin nej suj ngà Ma̱ꞌan Ñaꞌanj an,
ni̱ gi̱nikaj nej suj nimân nìko,
rayiꞌî sí ruhuâ ga̱ra̱nꞌ ñuꞌunj nej suj,
daꞌnga ni̱ gi̱nikaj Ma̱ꞌan Rê Ñaꞌanj nne yàtàꞌa nimân nìko rayiꞌî si-ga̱kïnꞌ nej suj.
26 Dadinꞌ si nitaj si ni̱ka̱j nej suj nimân nìko rayiꞌî nej duguiꞌ nej suj,
huê danj na̱nj si̱ ginikaj Ma̱ꞌan Rê Ña̱ꞌa̱nj nne yàtàꞌa nimân nìko rayiꞌî si-ga̱kïnꞌ nej suj mánj.
Gaꞌmin Ma̱ꞌan Jesús dàj rûnꞌ gaꞌmin sí ni̱ka̱j suun
27 Nanikàj ñûn nej sij gaꞌnaꞌ nej sij Jerusalén;
ni̱ gaché nun Ma̱ꞌan Jesús ruhuâ hueꞌ nûhui nìko,
ni̱ gaꞌnaꞌ nej rej huin ña̱an ngà nej sí chru̱n ley,
ni̱ ngà nej síchìj achij i.
28 Ni̱ gachín naꞌanj nej sôꞌ:
—Ahuin sun nikajꞌ ni̱ giꞌhiâꞌ dànanj,
ni̱ ahuin sa girikî suun riñanꞌ ni̱ giꞌhiâꞌ dànanj ràꞌaj.
29 Nanikàj Ma̱ꞌan Jesús ni̱ gata gu̱nïn nej sij:
—Ruhuâj gàchìnj naꞌân ꞌngo̱ nuguanꞌan riñan nej suj;
ni̱ du̱nanikàj nej suj nuguanꞌ dânj riñânj,
hiôꞌ ni̱ ga̱ꞌhue gàtà gu̱nïn nej suj ahuin sun nikâ ni̱ giꞌhiâ dànanj.
30 Nga duguataꞌ nne Juan nej guiì,
ni̱ Ñaꞌanj an gaꞌnïnꞌ su̱n riñan sij guendâ du̱guataꞌ nne sij nîꞌ,
si nej síi gaꞌhuiꞌ sun dânj raꞌa sij sàꞌ.
Ga̱ta̱j nej suj nuguanꞌ gachín naꞌân riñan nej suj àj nï̂n.
31 Hiôꞌ ni̱ naduyâ nej sij nuguanꞌan siganï̂nj nej ma̱ꞌan nej sij,
dàj gataj nej sij riñan Ma̱ꞌan Jesús ni̱ gataj nej sij:
—Si ga̱ta̱j nêꞌ si Ña̱ꞌa̱nj nne yàtàꞌa gaꞌhuiꞌ sun dânj riñan sôꞌ,
hiôꞌ ni̱ nànìkàj sij ni̱ ga̱ta̱j sij gùnï̀nꞌ:
“Nùnj huin saj ni̱ nun gùyùmàn ruhuâ nej suj niꞌin nej suj sôꞌ ràꞌaj ga̱ta̱j sij gu̱nïnꞌ.”
32 Ni̱ si ga̱ta̱j nêꞌ si nej síi gaꞌhuiꞌ sun dânj raꞌa sí dânj.
Sani̱ yuꞌhuiꞌ nej sij niꞌin nej sij nej sí yùmànꞌan,
dadinꞌ daranꞌ nej sôꞌ niꞌin si Juan ni̱ yàngàꞌ huin sôꞌ sí gataj dàj ga̱huin.
33 Huê danj ni̱ nanikàj nej sij ni̱ gataj nej sij gu̱nïn Ma̱ꞌan Jesús:
—Nun niꞌin nej ñûnj mánj.
Ni̱ nanikàj Ma̱ꞌan Jesús ni̱ gata gu̱nïn nej sij:
—Huê danj na̱nj ñùnj ni̱ si̱ gaꞌhue gàtà gu̱nïn nej suj ahuin sa rikî sun nânj riñânj ni̱ giꞌhia dànanj mánj.