Jesús ngà Saqueo
19
Ni̱ gatûj Ma̱ꞌan Jesús ruhuâ yumanꞌ snàꞌànj Jerikó,
ni̱ gachinj hua ruhuâ yumanꞌ snàꞌànj dânj.
2 Ni̱ giniꞌin ꞌngo̱ síchìj gùꞌnàj Saqueo,
ni̱ huin sôꞌ sí aꞌnïnꞌ riñan nej sí gaꞌne̱j sanꞌanj an ni̱ huin sôꞌ ꞌngo̱ sí yi̱ruꞌhuee,
3 ni̱ ûta huin ruhuâ sôꞌ gi̱ni̱ꞌi̱n sôꞌ Ma̱ꞌan Jesús;
sani̱ naꞌhue gi̱ni̱ꞌi̱n sôꞌ dadinꞌ ûta mân nej guiì rigìi,
dadinꞌ hua̱ nìkàꞌ sôꞌ.
4 Ni̱ gunânj sôꞌ gaꞌanj sôꞌ neꞌ ña̱an,
ni̱ gahui sôꞌ raa̱ ꞌngo̱ chrun gùꞌnàj sicómoro dadinꞌ ruhuâ sôꞌ gi̱ni̱ꞌin sôꞌ Ma̱ꞌan Jesús;
dadinꞌ hiuj dânj ga̱chinj ga̱ꞌan.
5 Ni̱ nga guchiꞌ Ma̱ꞌan Jesús hiuj dânj,
ni̱ ganahui ñanj ni̱ giniꞌhia raa̱ chrun dânj,
ni̱ giniꞌin si hiuj dânj tá síchìj Saqueo,
ni̱ gata gu̱nïn sôꞌ:
—Saqueo,
ûta hio ga̱na̱ni̱njꞌ,
dadinꞌ ñanꞌ hia̱j ni̱ dukuât gu̱na̱ na̱nj ánj.
6 Hiôꞌ ni̱ nda nanè chre gananinj sôꞌ,
ni̱ ûta ganahuin nìhiàꞌ ruhuâ sôꞌ ni̱ ganahuin ra̱ꞌa sôꞌ Ma̱ꞌan Jesús.
7 Ni̱ nga giniꞌin aꞌngô nej sí dânj nej nânj,
ni̱ gayiꞌì nej sôꞌ ni̱ gaꞌmin nej sôꞌ yiꞌî Ma̱ꞌan Jesús ni̱ gataj nej sôꞌ ganakaj duguiꞌ sij ni̱ gatûj sij dukuâ ꞌngo̱ sí giꞌhiaj gakï̱nꞌïn.
8 Hiôꞌ ni̱ ganayumàn Saqueo,
ni̱ gananikïnꞌ gahia sôꞌ ni̱ gataj sôꞌ gu̱nïn Ma̱ꞌan Jesús:
—Hia̱j rûꞌhuaj Señor,
ni̱ nàgàꞌhuìj da̱ꞌa̱j nej siꞌhia raꞌa nej guiì gànìki;
ni̱ si hua̱ ꞌngo̱ riñan nej guiì giꞌhiaj tu̱j,
ni̱ nda ga̱ꞌânj na̱ruꞌhuej sa giꞌhiaj tu̱j dânj riñan ninj na̱nj ánj.
9 Gataj Ma̱ꞌan Jesús:
—Hia̱j guyumân sa giꞌhiaj ga̱na̱ni̱n sôꞌ nne ruhuâ hueꞌ nânj;
dadinꞌ daꞌní sachij Abraham huin sôꞌ.
10 Dadinꞌ gaꞌnaꞌ nànàꞌhuìj ni̱ gaꞌnaꞌ gi̱ꞌhia si ga̱na̱ni̱n nej guiì gaꞌanj ni̱ꞌhia̱.
Nuguanꞌ rán aꞌmin rayiꞌî sanꞌanj agaꞌa
11 Ni̱ nga nï̀nꞌ gunïn nej guiì nej nuguanꞌ nânj,
ni̱ gaꞌmin Ma̱ꞌan Jesús ꞌngo̱ nuguanꞌ ráan,
dadinꞌ gàꞌ ni̱kï̱nꞌ nìchrunj ña̱n nngaj yumanꞌ Jerusalén,
ni̱ ganï̂n ruhuâ nej guiì si ûta raꞌñanj ga̱ꞌna̱ꞌ ginikaj su̱n Ma̱ꞌan Ñaꞌanj an riñan ninj.
12 Hiôꞌ ni̱ gata:
—ꞌNgo̱ sí dânj ni̱ huin sôꞌ sí gaꞌnïnꞌ doj riñan nej duguiꞌ,
ni̱ gaꞌanj sôꞌ ꞌngo̱ yumanꞌ nngaj nda ga̱nꞌ,
guendâ ga̱na̱huin ra̱ꞌa sôꞌ ꞌngo̱ su̱n yàkàan gi̱nikaj su̱n sôꞌ.
13 Ni̱ ganakḯn sôꞌ nej chi̱ꞌ nej si-musû sôꞌ,
ni̱ gaꞌhuiꞌ sôꞌ saꞌanj ûta duꞌhuee riñan nej sí dânj ni̱ gataj sôꞌ gu̱nïn nej sí dânj:
“Gi̱ꞌhiaj nej suj lesia ngà si-sànꞌàn dadinꞌ gàꞌàn nda gànꞌ xi sani̱ gùnùmàn ñún.”
14 Sani̱ gininj ꞌì sí nânj riñan nej sí huin si-musû sôꞌ,
ni̱ nga rukû sôꞌ gaꞌanj sôꞌ ni̱ gaꞌnḯn nej sí musû dânj gaꞌanj ꞌngo̱ sí gi̱nikaj si-nùguànꞌ nej sôꞌ riñan sí ni̱ka̱j sun nìko doj ni̱ gataj sí dânj:
“Nun ga̱ra̱nꞌ ruhuâ nej ñûnj si gi̱nikaj su̱n sí nânj riñan nej ñûnj.”
15 Ngo̱ gui dânj ni̱ nanikàj sí nânj gunumân sôꞌ,
ni̱ neꞌ rùkù nga gisîj ganahuin ra̱ꞌa sôꞌ suun,
ni̱ ganakḯn sôꞌ ga̱ꞌna̱ꞌ nej sí musû ri̱ña̱n gaꞌhuiꞌ sôꞌ sanꞌanj an,
dadinꞌ ruhuâ sôꞌ gi̱ni̱ꞌin sôꞌ dàj nìko giꞌhiaj ga̱nan daꞌ goꞌngo̱ nej sí dânj lesia ngà si-sa̱nꞌa̱nj sôꞌ.
16 Ni̱ gaꞌnaꞌ sí si̱nï̱ïn ni̱ gataj sôꞌ:
“Señor,
ganataꞌ aꞌngô chi̱ꞌ saꞌanj yichrá si-sa̱nꞌa̱nj rèꞌ giꞌhia.”
17 Ni̱ gataj síchìj aꞌnïnꞌ dânj:
“Dùgùnàj giꞌhiâꞌ ni̱ huînꞌ ꞌngo̱ musû sàꞌa;
dadinꞌ doj girikîj raꞌâꞌ sani̱ ûta hueꞌê dugumînꞌ sa girikîj,
hia̱j ni̱ gi̱nikaj su̱nꞌ riñan chi̱ꞌ yumanꞌ snàꞌànj an na̱nj ánj.”
18 Gaꞌnaꞌ sí huìj i ni̱ gataj sôꞌ:
“Señor,
ganataꞌ aꞌngô unꞌunꞌ sanꞌanj an yichrá si-sa̱nꞌa̱nj rèꞌ giꞌhia.”
19 Ni̱ gataj síchìj aꞌnïnꞌ dânj:
“Hia̱j ni̱ ginikaj sunꞌ riñan ùnꞌùnꞌ yumanꞌ snàꞌànj an.”
20 Ni̱ gaꞌnaꞌ sí huàꞌnï̀nj ïn ni̱ gataj sôꞌ:
“Señor,
huê si-sa̱nꞌa̱nj rèꞌ ꞌna̱ꞌ nânj,
dadinꞌ gaꞌnï̂n ginun sàꞌ si-sa̱nꞌa̱nj rèꞌ ruhuâ ꞌngo̱ mâñun;
21 dadinꞌ yuꞌhuí niꞌín Maꞌân rèꞌ,
dadinꞌ ûta huê Ma̱ꞌân rèꞌ ni̱ ganakaj rèꞌ saꞌanj nun gàꞌnï̀nj sàꞌ rèꞌ,
ni̱ gunutâ rèꞌ ña̱n nun gu̱nu̱n rèꞌ.”
22 Hiôꞌ ni̱ gataj Ma̱ꞌan síchìj aꞌnïnꞌ dânj:
Musû aꞌnanꞌan huînꞌ,
dadinꞌ ngà si-nùguànꞌ ni̱ ganakaj guendâj ni̱ giniꞌín si̱ huînꞌ sí gakï̱nꞌïn.
Ni̱ gàꞌ niꞌînꞌ si huín ꞌngo̱ sí hue,
dadinꞌ ganakâ saꞌanj nun gàꞌnï̀nj sàꞌàj,
ni̱ gunutá tanꞌan ñan nun gùnùnj;
23 Nùnj huin saj ni̱ nun ga̱ꞌa̱nj gàꞌnï̀njꞌ si-sànꞌàn ruhuâ ꞌngo̱ banko,
ni̱ nga gùnùmànj ni̱ ga̱na̱huin raꞌâ si-sànꞌàn ngà saꞌanj ganataꞌ raj gàꞌ ûnj.
24 Ni̱ gataj síchìj aꞌnïnꞌ dânj gu̱nïn nej sí màn riñan sôꞌ:
“Ga̱ꞌne̱ nej suj sanꞌanj an riñan sí dânj,
ni̱ nàgàꞌhuìꞌ nej suj riñan sí ni̱ka̱j chi̱ꞌ sanꞌanj an na̱nj ánj.”
25 Ni̱ gataj nej sí dânj:
“Señor,
sani̱ gàꞌ ni̱ka̱j sí nânj chi̱ꞌ sanꞌanj an na̱nj ánj.”
26 Sani̱ nanikàj rey dânj ni̱ gataj sôꞌ:
“Ñùnj taj si daranꞌ sí ni̱ka̱j,
ni̱ ga̱na̱huin ra̱ꞌa sôꞌ doj;
sani̱ sí nitaj si ni̱ka̱j ni̱ doj sa hua̱ riñan sôꞌ dânj ni̱ gi̱yi̱ꞌne riñan sôꞌ.
27 Ni̱ huê danj na̱nj ginikaj nej suj nej sí unïnꞌ ngàj,
nej sí nun ga̱ꞌhue̱j si ginikaj sùnj riñan nej sôꞌ,
ni̱ gàꞌnèꞌ nej suj yihiâ nej sí dânj riñânj.”
Ûta aꞌmin hueꞌê nej guiì yiꞌî Ma̱ꞌan Jesús nga gatu hua ngà ninj ruhuâ yumanꞌ snàꞌànj Jerusalén
28 Nga gisîj gaꞌmin Ma̱ꞌan Jesús nej nuguanꞌ nânj,
ni̱ gaꞌan ñan nngaj yumanꞌ snàꞌànj Jerusalén.
29 Ni̱ nga huaj ga̱huin ni̱chrunj ñan nngaj yumanꞌ Betfagé,
ngà yumanꞌ Betania,
ñan ni̱kï̱nꞌ kïj màn nej chrun Olibo,
ni̱ gaꞌnïn gaꞌanj huìj sí gaꞌnaꞌ ga̱huin chru̱n riñanj.
30 Ni̱ gata gu̱nïn nguèj sí dânj:
—Ga̱ꞌa̱nj nguèj suj yumanꞌ nngaj neꞌ ña̱n ñan ni̱kï̱nꞌ nêꞌ nânj,
ni̱ nga ga̱tu̱ nguèj suj ruhuâ yumanꞌ dânj,
ni̱ gànàrìꞌ nguèj suj ꞌngo̱ urruj u ni̱ a̱nu̱min xuj nikïnꞌ xuj hiuj dânj,
ni̱ gàꞌ si ꞌngo̱ síi nun gitàj yichrá xuj;
ni̱ ga̱na̱chi nguèj suj ni̱ gi̱nikaj nguèj suj ga̱ꞌna̱ꞌ nguèj suj xuj riñânj.
31 Ni̱ si̱ hua̱ ꞌngo̱ sí gàchìnj naꞌanj ni̱ gataj sôꞌ,
nùnj huin saj ni̱ ganachi nguèj suj urrûj dânj ràꞌaj.
Ni̱ huê dànanj ga̱ta̱j nguèj suj,
Ma̱ꞌan Señor gi̱ni̱ꞌñanj xuj na̱nj ánj.
32 Huê danj ni̱ gaꞌanj nguèj sí gunïn su̱n giꞌhiaj Ma̱ꞌan Jesús,
ni̱ ni̱kï̱nꞌ yàngàꞌ urruj u hiuj dânj ganariꞌ nguèj sôꞌ dàj rûnꞌ gataj Ma̱ꞌan Jesús.
33 Ni̱ nga ganachi nguèj sôꞌ urrûj dânj nun nguèj sôꞌ,
ni̱ gataj nej sí dàn urruj dânj:
—Nùnj huin saj ni̱ ganachi nguèj suj urruj dânj ràꞌaj.
34 Ni̱ gataj nguèj sôꞌ gu̱nïn nej sí dânj:
—Ganachi nguèj ñûnj dadinꞌ Ma̱ꞌan Señor gi̱ni̱ꞌñanj xuj.
35 Ni̱ ni̱ka̱j nguèj sij urrûj dânj gaꞌnaꞌ nguèj sij riñan Ma̱ꞌan Jesús;
ni̱ nga gisîj gutaꞌ nej sij atsîj ni̱ke̱ nej sij yichrá xuj,
ni̱ gutaꞌ nej sij Ma̱ꞌan Jesús yichrá yôꞌ.
36 Ni̱ nga nï̀nꞌ aché Ma̱ꞌan Jesús hua ni̱ guchruj nej sij ruhuâ chrej ñan gachinj hua atsîj ni̱ke̱ nej sij.
37 Ni̱ nga huaj gùchìꞌ nej sij ña̱n nanikòꞌ nìnj yiꞌî kïj ña̱n màn chrun Olibo,
ni̱ ûta ganahuin nìhiàꞌ ruhuâ daranꞌ nej sí rìgì gaꞌnaꞌ gahuin chru̱n riñan Ma̱ꞌan Jesús,
ni̱ gayiꞌì nej sôꞌ ni̱ gaꞌmin nùkuaj nej sôꞌ ni̱ gaꞌmin hueꞌê nej sôꞌ riñan Ma̱ꞌan Ñaꞌanj an rayiꞌî daranꞌ nej sa sàꞌ giniꞌin nej sôꞌ giꞌhiaj Ma̱ꞌan Ñaꞌanj an.
38 Gataj nej sôꞌ:
—Ûta hueꞌê hua̱ sa giꞌhiaj Ma̱ꞌan Rey gaꞌnḯn Ma̱ꞌan Ñaꞌanj an gaꞌnaꞌ riñan nêꞌ;
ni̱ ga̱ dïnꞌïnj yàtàꞌa,
ni̱ ga̱na̱ka̱j guendâ nej guiì si Ma̱ꞌan Ñaꞌanj an huin sa ni̱ka̱j su̱n.
39 Hiôꞌ ni̱ gataj da̱ꞌa̱j nej sí fariseo ꞌna̱ꞌ siganï̂nj nej sí rigìi:
—Maestrûj,
du̱gunïn gàꞌì rèꞌ si dḯn ga̱ne duꞌhua nej sí ꞌna̱ꞌ ga̱huin chru̱n riñan Ma̱ꞌân rèꞌ na̱nj ánj.
40 Nanikàj,
Ma̱ꞌan Jesús,
ni̱ gata:
—Ñùnj taj ni̱ nùnj huin si dḯn ga̱ne duꞌhua nej sij,
sani̱ gàyìꞌì nej hiëj ni̱ ga̱gua̱j ninj na̱nj ánj.
41 Ni̱ nga guchiꞌ Ma̱ꞌan Jesús nìchrùnꞌ ña̱n nngaj yumanꞌ snàꞌànj Jerusalén,
ni̱ nga giniꞌin yumanꞌ snàꞌànj dânj,
ni̱ gayi̱ꞌij ni̱ dugueꞌe rayiꞌî yumanꞌ snàꞌànj dânj.
42 Ni̱ gata:
—Si ga̱ꞌhue ni̱ ga̱ya̱ka̱j guendâꞌ,
oꞌ si man gui hia̱j,
ahuin sa gi̱ꞌhiaj ga̱ꞌhue ga̱na̱huin dïnꞌïnj ruhuâꞌ.
Sani̱ hua̱ hu̱ij ni̱ naꞌhue ga̱ra̱n daꞌngaꞌ ruhuâꞌ mánj.
43 Dadinꞌ gùyùmàn gui,
ni̱ nda ga̱ni̱ka̱j neꞌ rùkùꞌ gimàn nej sí gùnï̀nꞌ ngàꞌ,
ni̱ giꞌhiaj nej sij yingâ hiëj ga̱ni̱ka̱j neꞌ rùkùꞌ,
ni̱ daranꞌ ñan hua̱j nej chre̱j e garán nej sij,
44 Ni̱ gi̱ꞌhiaj nej sij si ga̱na̱tu̱ꞌ riñan hioꞌóo,
ni̱ huê danj na̱nj da̱gahuiꞌ nej sij nej daꞌnít màn ruhuâ dukuât,
ni̱ si̱ gudunâj nej sij si gitàj duguiꞌ nej hiëj yichrá nej duguiꞌij gàꞌ mánj,
guendâ nun ga̱ꞌhue ga̱na̱ni̱ꞌinꞌ diû gaꞌnaꞌ Ma̱ꞌan Ñaꞌanj an riñanꞌ.
Nagiꞌhiaj sàꞌ Ma̱ꞌan Jesús ruhuâ nuhuî nìko nne Jerusalén
45 Ni̱ gatûj Ma̱ꞌan Jesús ruhuâ hueꞌ huin nuhuî nìko,
ni̱ gayiꞌij ni̱ girij neꞌ ye̱ꞌe daranꞌ nej guiì guduꞌhuêj nej rasu̱un ni̱ nej guiì girânj nej rasu̱un.
46 Ni̱ gata gu̱nïn nej guiì:
—Huê danj taj riñan ñanj:
“Dukuá ni̱ huin hueꞌ ña̱n ga̱ꞌmi̱n nej guiì ngà Ma̱ꞌan Ñaꞌanj an huin”;
sani̱ nej suj ni̱ nagiꞌhiaj nej suj si ga̱na̱huin huej hueꞌ ñan màn nej sí tu̱u.
47 Ni̱ daranꞌ nej gui gidigân Ma̱ꞌan Jesús ruhuâ hueꞌ huin nûhui nne yumanꞌ snàꞌànj Jerusalén;
sani̱ ûta huin ruhuâ nej rej huin ña̱an ngà nej sí chru̱n ley ni̱ nej síchìj huin ña̱n riñan yumanꞌan guendâ da̱gahuiꞌ nej sôꞌ Ma̱ꞌan Jesús.
48 Sani̱ naꞌhue gànàrìꞌ nej sôꞌ dàj gi̱ꞌhiaj nej sôꞌ,
dadinꞌ daꞌ hua̱ gè yumanꞌan ûta garanꞌ ruhuâ gu̱nïn nej nuguanꞌ gaꞌmin Ma̱ꞌan Jesús.