Gaꞌmin Ma̱ꞌan Jesús dàj rûnꞌ gaꞌmin sí ni̱ka̱j suun
20
Gahuin ꞌngo̱ gui dânj,
nga nne Ma̱ꞌan Jesús gidiganj riñan nej guiì yùmànꞌan ruhuâ hueꞌ huin nûhui,
ni̱ ganataj si-nùguàn Ma̱ꞌan Ñaꞌanj an riñan ninj,
ni̱ guchiꞌ nej rej huin ña̱an ni̱ nej sí chru̱n ley ngà nej síchìj achij i.
2 Ni̱ gaꞌmin nej sôꞌ ni̱ gataj nej sôꞌ:
Ga̱ta̱j sòꞌ:
—Ahuin su̱n nikajꞌ ni̱ giꞌhiâꞌ dànanj.
Ni̱ ahuin si girikî sun nânj riñanꞌ ni̱ giꞌhiâꞌ dànanj áj nï̂nj.
3 Nanikàj Ma̱ꞌan Jesús,
ni̱ gata:
—Huê danj na̱nj gàchìnj naꞌan ꞌngo̱ nuguanꞌan nej suj nej;
ni̱ du̱nanikàj nej suj nuguanꞌ gàchìnj naꞌan riñan nej suj staj nï̂nj:
4 Nga duguataꞌ nne Juan nej guiì,
ni̱ Ma̱ꞌan Ñaꞌanj an gataj du̱guataꞌ nne sij nej guiì nîꞌ,
si nej síi gataj du̱guataꞌ nne sij sàꞌ.
5 Hiôꞌ ni̱ ganarïsnaꞌanj nej sij rayiꞌî nuguanꞌ nânj,
ni̱ gataj nej sij:
—Si ga̱ta̱j nêꞌ,
si Ma̱ꞌan Ñaꞌanj an gaꞌnïnꞌ su̱n riñan sôꞌ,
hiôꞌ ni̱ gataj sij gu̱nïn nêꞌ:
“Nùnj huin saj ni̱ nun gùyùmàn ruhuâ nej suj niꞌin nej suj sôꞌ ràꞌaj.”
6 Ni̱ si ga̱ta̱j nêꞌ,
si̱ nej síi gataj gu̱nïn sôꞌ,
ni̱ ga̱rru̱n daranꞌ nej guiì yùmànꞌan hiëj nêꞌ;
dadinꞌ yìtï̀nj guyumân ruhuâ ninj si Juan huin ꞌngo̱ si-profeta Ma̱ꞌan Ñaꞌanj an na̱nj ánj.
7 Ni̱ dunanikàj nej sij nuguanꞌan ni̱ gataj nej sij,
si nun niꞌin nej sij ahuin sa gaꞌhuiꞌ sun dânj raꞌa Juan.
8 Hiôꞌ ni̱ gataj Ma̱ꞌan Jesús:
—Huê danj na̱nj ñùnj ni̱ si̱ ga̱ꞌhue gàtà gu̱nïn nej suj ahuin sa rikî sun nânj raꞌá ni̱ giꞌhia dànanj mánj.
Nej musû kï̱j huaa
9 Orâ dânj ni̱ gayiꞌì Ma̱ꞌan Jesús gaꞌmin ꞌngo̱ nuguanꞌ ráan riñan nej guiì yùmànꞌan ni̱ gata:
—Sí yi̱ruꞌhue huin ꞌngo̱ sí dânj ni̱ gunun sôꞌ chrun uba,
sani̱ girïꞌïnj sôꞌ riñan nej sí giꞌhiaj sun ngà nej chrun uba,
neꞌ rùkù ni̱ gahui sôꞌ ni̱ gaꞌanj ga̱nꞌ sôꞌ ni̱ gahuin ra̱n sôꞌ ûta nìko diû.
10 Ni̱ nga guyumân diû ga̱ne̱ nej chruj uba ni̱ gaꞌnḯn sôꞌ ꞌngo̱ sí huin si-musû sôꞌ gaꞌanj riñan nej sí giꞌhiaj sun ngà nej chrun uba;
guendâ ga̱na̱huin ra̱ꞌa sôꞌ nej chruj uba gànunj riñan sôꞌ;
sani̱ doꞌ si gaꞌhuiꞌ nej sij niꞌhiaj sí musû nânj,
ni̱ ganaꞌnï̂n nej sij nanꞌ sôꞌ ni̱ hua̱ chre sôꞌ hua̱j nanꞌ sôꞌ ñan nne si-yi̱ruꞌhue sôꞌ.
11 Ni̱ gaꞌnḯn ñûn sí yiruꞌhue dânj gaꞌanj aꞌngô sí huin si-musû sôꞌ;
sani̱ huê dàj rûnꞌ gaꞌhuiꞌ nej sij niꞌhiaj sí musû gaꞌanj si̱nï̱ïn huê danj gaꞌhuiꞌ nej sij niꞌhiaj sí nânj,
ni̱ ganaꞌnḯn nej sij nanꞌ sôꞌ ni̱ hua̱ chre sôꞌ hua̱j nanꞌ sôꞌ ñan nne si-yi̱ruꞌhue sôꞌ.
12 Ni̱ gaꞌnï̂n ñûn sí yi̱ruꞌhue nânj gaꞌanj aꞌngô si-musû sôꞌ sí huàꞌnï̀nj ïn;
sani̱ huê dàj rûnꞌ giꞌhiaj nej sij ngà nguèj sí ga̱ꞌanj si̱nï̱n dânj,
huê danj giri nej sij neꞌ yèꞌe sí nânj,
ni̱ guduranꞌ yiꞌì nej sij sôꞌ.
13 ’Hiôꞌ ni̱ gataj sí yiruꞌhue huin siꞌhiaj nej chrun uba:
“Nùnj huin si gi̱ꞌhia hia̱j ràꞌaj.
Gàꞌnï̀n Ma̱ꞌan daꞌnî sôꞌ ûta ꞌì ruhuâj ga̱ꞌa̱nj;
ni̱ nga giniꞌin nej sij Ma̱ꞌan sôꞌ,
ni̱ gi̱nikaj chre̱j nej sij ngà sôꞌ si ruhuaj na̱nj ánj.”
14 Sani̱ nga giniꞌin nej sí giꞌhiaj su̱n riki nej chrun uba daꞌní sí yi̱ruꞌhue nânj,
ni̱ ganarïsnaꞌanj nej sôꞌ ni̱ gataj nej sôꞌ:
“Sí nânj huin sí ga̱na̱huin ra̱ꞌa nej chrun uba;
ni̱ ga̱ꞌna̱ꞌ nej suj ni̱ da̱gahuiꞌ nêꞌ sij,
ni̱ ga̱na̱huin siꞌhiôꞌ nej chrun uba na̱nj ánj.”
15 Huê danj ni̱ giri nej sij gaꞌanj daꞌní yi̱ruꞌhue dânj neꞌ ye̱ꞌ ña̱n màn nej chrun uba,
ni̱ dagahuiꞌ nej sij sôꞌ.
Hiôꞌ ni̱ gachín naꞌanj ma̱ꞌan Jesús.
—Ni̱ nùnj huin si̱ gi̱ꞌhiaj,
yi̱ruꞌhue huin siꞌhiaj nej chrun uba nânj ngà nej sí nânj ràꞌaj.
16 Ga̱ꞌna̱ꞌ sí yi̱ruꞌhue nânj ni̱ da̱gahuiꞌ sôꞌ nej sí giꞌhiaj sun riki nej chrun uba,
ni̱ nàgàꞌhuìꞌ sôꞌ nej chrun uba nânj raꞌa aꞌngô nej sí giꞌhiaj suun.
Nga gunïn nej sí màn hiuj nânj nej nuguanꞌ nânj,
ni̱ gataj nej sôꞌ:
—Ñaꞌanj an gu̱ru̱gûñuꞌunj ni̱ si̱ girûnꞌ dànanj mánj.
17 Sani̱ ûta sàꞌ giniꞌhiaj Ma̱ꞌan Jesús riñan nej sij,
ni̱ gata:
—Dàj nnunj riñan ñanj ràꞌaj.
Hiëj gudunâj nej sí giꞌhiaj sun hueꞌe,
ni̱ huej huin hiëj si̱nï̱n tàj sikûj hueꞌe.
18 Daranꞌ nej guiì gininj riñan hiëj nânj,
ni̱ gìyìtï̀nꞌ nï̀nꞌ ninj gi̱ꞌhia;
sani̱ nej guiì yìchràj gàtàꞌ hiëj nânj ni̱ ga̱na̱huin ninj hioꞌó hiaj gi̱ꞌhia na̱nj ánj.
Gidigân Ma̱ꞌan Jesús rayiꞌî sanꞌanj kuestu
19 Orâ dânj,
ni̱ ûta huin ruhuâ nej rej huin ña̱an ngà nej sí chru̱n ley gi̱daꞌa nej sôꞌ Ma̱ꞌan Jesús,
dadinꞌ garânj daꞌngaꞌ ruhuâ nej sôꞌ si riñan nej sôꞌ gaꞌmin Ma̱ꞌan Jesús nuguanꞌ rán nânj;
sani̱ guyuꞌhuiꞌ nej sôꞌ niꞌin nej sôꞌ nej guiì yùmànꞌan.
20 Hiôꞌ ni̱ guendâ ruhuâ nej sôꞌ gànàrìꞌ nej sôꞌ ꞌngo̱ nuguanꞌ ga̱che̱j,
ga̱ꞌmi̱n Ma̱ꞌan Jesús ni̱ gaꞌnḯn nej sôꞌ gaꞌanj nej duguiꞌ nej sôꞌ ni̱ man si giꞌhiaj nej sôꞌ si sí ni̱ka̱a huin nej sôꞌ,
daꞌnga ni̱ ga̱ꞌhue ga̱ra̱n ruhuâ nej sôꞌ yiꞌî Ma̱ꞌan Jesús riñan nej sí ni̱ka̱j suun ngà riñan nej síchìj achij i.
21 Ni̱ gachín naꞌanj nej sôꞌ ni̱ gataj nej sôꞌ:
—Maestrû,
niꞌin nej ñûnj si daranꞌ diû gaꞌmin Ma̱ꞌân rèꞌ ni̱ gidigân Ma̱ꞌân rèꞌ nuguanꞌ yàngàꞌa,
ni̱ nitaj si giꞌhiaj ninï̱n Ma̱ꞌân rèꞌ nej guiì riñan nej duguiꞌ ninj.
22 Dùgùnàj huaj si gàꞌhuìꞌ nej ñûnj sanꞌanj huin kuestu raꞌa César nîꞌ,
si nitaj si dùgùnàj huaj sàꞌ.
23 Sani̱ garânj daꞌnga ruhuâ Ma̱ꞌan Jesús,
si do̱ꞌ si ganï̂n aꞌnanꞌ ruhuâ nej sij niꞌin nej sij Ma̱ꞌan,
ni̱ gata gu̱nïn nej sij:
—Nùnj huin saj ni̱ gayakaj nej suj daꞌngaꞌa ngàj ràꞌaj.
24 Riki nej suj ꞌngo̱ sanꞌanj an gi̱niꞌhiâ staj.
Ni̱ ahuin si ñan du̱ꞌhua ni̱ ahuin siyu̱gui nnûn riñan saꞌanj nânj ràꞌaj.
Nanikàj nej sí dânj ni̱ gataj nej sôꞌ:
—Ña̱n duꞌhua César ni̱ siyu̱gui sôꞌ nnûn riñanj.
25 Hiôꞌ ni̱ gataj Ma̱ꞌan Jesús:
—Gàꞌhuìꞌ nej suj riñan César saꞌanj huin siꞌhiaj César,
ni̱ gàꞌhuìꞌ nej suj riñan Ma̱ꞌan Ñaꞌanj an saꞌanj huin si-sa̱nꞌa̱nj Ma̱ꞌan Ñaꞌanj an.
26 Gàꞌ si̱ ꞌngo̱ nuguanꞌan nun ga̱che̱j ga̱ꞌmi̱n Ma̱ꞌan Jesús gu̱nïn nej guiì yùmànꞌan,
huê danj ni̱ ûta gahuin ña̱ꞌanj ruhuâ nej sij nga gunïn nej sij nej nuguanꞌ dunanikàj Ma̱ꞌan Jesús riñan nej sij,
ni̱ dḯn gane duꞌhua nej sij.
Gachín naꞌanj nej sij rayiꞌî guendâ ganaꞌnï̂nj nej nîman
27 Huê danj ni̱ guyumân da̱ꞌa̱j nej sí huin yiꞌnïnꞌ gùꞌnàj saduseo,
ni̱ nej sí nânj nitaj si guyumân ruhuâ si ganaꞌnï̂nj nej nîman,
ni̱ gachín naꞌanj nej sôꞌ Ma̱ꞌan Jesús,
28 —Maestrûj,
gachrûn Moisés riñan nej ñûnj,
ni̱ si gàhuìꞌ ꞌngo̱ sí dânj ni̱ gunâj nika sôꞌ sani̱ nitaj daꞌní sôꞌ ga ngà siyànà dânj,
ni̱ daꞌhui dinḯn sôꞌ ga̱na̱ka̱j sôꞌ siyànà minj dânj,
daꞌnga ni̱ ga̱ daꞌní sí dânj ngà siyànà nânj ni̱ silíj gaꞌnga dânj na̱ga̱ne riñan sí yàhuàꞌ gàꞌ gahuiꞌ dânj.
29 Ga chi̱j dìnï̀nj nej sí dânj;
ni̱ gayakaj sí yàhuàꞌa nika sôꞌ,
sani̱ nu̱n ga̱ daꞌní sôꞌ ngà nika sôꞌ.
30 Ni̱ ganakaj dinḯn sôꞌ sí huìj i siyànà gahuin nika sôꞌ dânj,
ni̱ huê danj na̱nj gahuiꞌ gè sí nânj sani̱ nun ga̱ daꞌní sôꞌ ngà siyànà nânj.
31 Ni̱ ganakaj sí huàꞌnï̀nj ïn siyànà minj nânj,
sani̱ huê danj na̱nj gahuiꞌ nej chi̱j dìnï̀nj sôꞌ sani̱ nun ga̱ daꞌní nej sôꞌ ngà siyànà nânj.
32 Ni̱ nda neꞌ rùkù nï̀nꞌ ni̱ gahuiꞌ siyànà nânj.
33 Nga gànàꞌnï̀nj nej nîman,
ni̱ ahuin goꞌngo̱ nej sí nânj ga̱huin nika siyànà nânj,
dadinꞌ nej chi̱j dìnï̀nj sôꞌ gane ni̱ka̱ ngà siyànà nânj ràꞌaj.
34 Hiôꞌ ni̱ nanikàj Ma̱ꞌan Jesús,
ni̱ gata:
—Nej guiì màn ruhuâ yumiguìi nânj ni̱ gayakaj ninj nika ninj,
ni̱ garan ra̱ꞌa ninj;
35 Sani̱ nej guiì giriꞌ nìꞌhiaj gùchìꞌ aꞌngô yumiguìi ni̱ nej guiì ganaꞌnïnj siganï̂nj nej nîman,
ni̱ si̱ gayakaj ninj nika ninj,
ni̱ si̱ garan ra̱ꞌa ninj mánj.
36 Ni̱ nitaj àmàn huaj gàhuìꞌ ninj gàꞌ mánj,
dadinꞌ dàj rûnꞌ huin nej ángel huê danj ga̱huin ninj,
ni̱ ga̱huin ninj daꞌní Ma̱ꞌan Ñaꞌanj an,
dadinꞌ ganaꞌnï̂nj ninj siganï̂nj nej nîman gi̱ꞌhiaj Ma̱ꞌan Ñaꞌanj an na̱nj ánj.
37 Sani̱ rayiꞌî guendâ gànàꞌnï̀nj nej nimân,
ni̱ gàꞌ gataj Moisés dàj ga̱ꞌhue ga̱ra̱n daꞌngaꞌ ruhuâ nêꞌ rayiꞌî chrun zarza,
nga gataj sôꞌ gu̱nïn Ma̱ꞌan Señor,
sòꞌ huin Daꞌanj Abraham,
ni̱ huêꞌ huin Daꞌanj Isaac,
ni̱ huêꞌ huin Daꞌanj Jacob.
38 Dadinꞌ Ma̱ꞌan Ñaꞌanj an ni̱ sê Daꞌanj nej nîman huin mánj,
huej huin Daꞌanj nej guiì hua̱ nìꞌnàꞌa,
dadinꞌ guendâ Ma̱ꞌan Ñaꞌanj an ni̱ nùnj huin si gàꞌ gahuiꞌ ninj sani̱ hua̱ nìꞌnàꞌ daranꞌ ninj na̱nj ánj.
39 Ni̱ nanikàj da̱ꞌa̱j nej sí chru̱n ley ni̱ gataj nej sôꞌ:
—Ûta dùgùnàj hua sa gataj Ma̱ꞌân rèꞌ na̱nj Maestrû.
40 Huê danj ni̱ nun ga̱ꞌhue̱j ruhuâ nej sij gàchìnj naꞌan nej sij gàꞌ mánj.
Ahuin si da̱ꞌni̱nj huin Ma̱ꞌan Cristo ràꞌaj
41 Hiôꞌ ni̱ gataj Ma̱ꞌan Jesús:
—Nùnj huin saj ni̱ gataj nej guiì si daꞌní David huin Ma̱ꞌan Cristo ràꞌaj.
42 Dadinꞌ huê Ma̱ꞌan David gataj nga gachrûn sôꞌ riñan ñanj librû gùꞌnàj Salmos:
Gataj Ma̱ꞌan Señor gu̱nïn si-Seño maꞌán:
“Ga̱ne sòꞌ raꞌá neꞌ huàꞌàj.
43 Nda gùnùkua gùchrù ga̱ꞌa̱nj gi̱ngaj nej sí gunïnꞌ ngàꞌ riki dakót.”
44 Ni̱ si David,
gataj si huin si-Seño sôꞌ;
hiôꞌ ni̱ nùnj huin saj ni̱ gahuin daꞌní sôꞌ ràꞌaj.
Giꞌhiaj nej maestrû chru̱n ley sa aꞌnanꞌan
45 Ni̱ gunïn daranꞌ nej guiì yùmànꞌan,
ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj:
46 —Ga̱ gu̱dadû nej suj ngà nej sí chru̱n ley,
dadinꞌ ûta garanꞌ ruhuâ nej sij gi̱nun nej sij atsîj yèꞌè xi gininj nda yihiâ yiꞌî nej sij,
ni̱ garanꞌ ruhuâ nej sij si ga̱chru̱n duꞌhua nej guiì raꞌa nej sij,
nga nikïnꞌ nej sij riñan raꞌhuee,
ni̱ nìhiàꞌ ruhuâ nej sij ga̱ꞌa̱nj ga̱ne nej sij,
riñan chrun yilâ ni̱kï̱nꞌ dukuán neꞌ ña̱n ñan huin nihia stiꞌnï̀ïn.
47 Gaꞌnêj nï̀nꞌ nej sij nej rasu̱n huin siꞌhiaj nej siyànà minj in,
ni̱ giꞌhiaj nej sij si ûta nìko gaꞌmin nej sij ngà Ma̱ꞌan Ñaꞌanj an;
ni̱ ûta nìko kastîgu ga̱na̱huin ra̱ꞌa nej sij guendâ giꞌhiaj nej sij dànanj na̱nj ánj.