Gataj Ma̱ꞌan Jesús si giꞌhiaj nej maestrû chru̱n ley ngà nej fariseo sa aꞌnanꞌan
23
Hiôꞌ ni̱ gaꞌmin Ma̱ꞌan Jesús riñan nej guiì ngà riñan nej sí ꞌna̱ꞌ ga̱huin chru̱n riñanj ni̱ gata:
2 —Gidigân nej maestrû chru̱n sàꞌ ley ngà nej fariseo si-nùguànꞌ Ma̱ꞌan Ñaꞌanj an,
dadinꞌ ganakaj nej sôꞌ sun ginikaj Moisés.
3 Huê danj ni̱ daranꞌ sa gataj nej sij gada̱gahuin nej suj ni̱ da̱gahuin nej suj,
ni̱ gànàꞌnï̀nj sàꞌ nej suj ni̱ da̱gahuin nej suj;
sani̱ si̱ gi̱daꞌa nej suj chrej giꞌhiaj nej sij,
dadinꞌ ûta giri ra̱ nej sij sani̱ nitaj si gadagahuin nej sij mánj.
4 Dadinꞌ dàj rûnꞌ àꞌì hua nej rasu̱un huê danj ûta chìꞌ hua nej chrej gaꞌnïnꞌ su̱n nej sij,
ni̱ gaꞌnï̂nꞌ su̱n nej sij si da̱gahuin nej guiì,
sani̱ nej ma̱ꞌan nej sij ni̱ gàꞌ si do̱j nitaj si dagahuin nej sij nej chrej chìꞌ gaꞌnïnꞌ su̱n nej sij mánj.
5 Sa si̱nï̱n giꞌhiaj nej sij huin si ûta garanꞌ ruhuâ nej sij,
si gi̱ni̱ꞌin daranꞌ nej guiì sa giꞌhiaj nej sij.
Ni̱ nagiꞌhiaj gàchràꞌ nej sij nnïnj màn ñanj si-nùguànꞌ Ma̱ꞌan Ñaꞌanj an,
ni̱ nagiꞌhiaj yèꞌè nej sij nej ꞌhuej nìkòꞌ duꞌhua atsîj ni̱ke̱ nej sij;
6 Ni̱ ûta huin ruhuâ nej sij ga̱ne nej sij riñan chrun yilâ hua̱ yu̱gui ga̱ne nej sí huin ña̱n doj ñan huin giꞌñanj an,
ni̱ nìhiàꞌ ruhuâ nej sij ga̱ne nej sij riñan chrun yilâ hua̱ yu̱gui ga̱ne nej sí huin ña̱n doj.
7 Ni̱ ûta garanꞌ ruhuâ nej sij si ga̱ꞌmi̱n hueꞌê nej guiì ni̱ nda gi̱daꞌa ninj raꞌa nej sij ñan hua̱ raꞌhuee,
ni̱ nìhiàꞌ ruhuâ nej sij si ga̱ta̱j nej guiì:
Maestrû gu̱nïn nej sij.
8 ’Sani̱ si̱ gahuin staꞌu ruhuâ nej suj si ga̱ta̱j nej guiì maestrû gu̱nïn nej suj;
dadinꞌ ꞌngo̱ rïn si-maestrû nej suj hua,
ni̱ huej huin Ma̱ꞌan Cristo,
ni̱ dinḯn nej suj ni̱ yuguej nej suj huin daꞌ goꞌngo̱ nej duguiꞌ nej suj.
9 Ni̱ si̱ gaꞌhue ga̱ta̱j nej suj si rej nej suj huin nej sí màn riñan hioꞌó nânj;
dadinꞌ ꞌngo̱ rïn Ma̱ꞌan Ñaꞌanj an huin Rej nej suj ni̱ huê Ma̱ꞌan nne yàtàꞌa.
10 Ni̱ si̱ gaꞌhue ga̱ta̱j nej suj si maestrû huin nej suj,
dadinꞌ ꞌngo̱ rïn si-Maestrû nej suj hua ni̱ huej huin Ma̱ꞌan Cristo.
11 Ni̱ sí huin ña̱n doj siganï̂nj nej suj ni̱ ga̱huin sôꞌ sí gu̱na̱nj gi̱tsi riñan nej suj.
12 Dadinꞌ sí ganï̂n ruhuâ ga̱huin ña̱n doj siganï̂nj nej suj ni̱ ga̱na̱huin sôꞌ sí gi̱nikòꞌ neꞌ rùkùu,
ni̱ sí ginikòꞌ neꞌ rùkùu ni̱ ga̱na̱huin ña̱n sôꞌ.
13 ’Sani̱ ûta gi̱ranꞌ sa̱ñu̱n nej suj,
maestrû chru̱n sàꞌ ley ngà nej fariseo,
dadinꞌ huin nej suj sí gidigañuꞌunj un.
Dadinꞌ ganarán nej suj rahueꞌe ga̱tu̱ nej guiì ñan nne Ma̱ꞌan sa ni̱ka̱j su̱n yàtàꞌa;
sani̱ gàꞌ nitaj si gatûj nej ma̱ꞌan nej suj,
ni̱ gàꞌ nitaj si gaꞌnï̂nj nej suj ga̱tu̱ aꞌngô nej guiì nga ruhuâ ninj ga̱tu̱ ninj ñan nne Ma̱ꞌan Ñaꞌanj an mánj.
14 ’Ûta gi̱ranꞌ sa̱ñu̱n nej suj nej maestrû chru̱n sàꞌ ley ngà nej fariseo,
dadinꞌ huin nej suj sí gidigañuꞌunj un.
Dadinꞌ ganahuij nï̀nꞌ nej rasu̱n màn ruhuâ dukuâ nej siyànà minj in giꞌhiaj nej suj,
ni̱ giꞌhiaj nej suj si ûta huin nej suj sí sàꞌa;
ni̱ rayiꞌî guendâ giꞌhiaj nej suj dànanj ni̱ ga̱na̱huin ra̱ꞌa nej suj ûta nìko kastîgu.
15 ’Ûta gi̱ranꞌ sa̱ñu̱n nej suj maestrû,
chru̱n sàꞌ ley ngà nej fariseo dadinꞌ huin nej suj sí digaꞌñuꞌunj un.
Dadinꞌ ganahuij nej suj gaché nej suj ñan nu̱n nne ña̱ꞌa̱nj ngà riñan hioꞌóo guendâ gi̱di̱gân nej suj si-chrej nej ma̱ꞌan nej suj,
ni̱ nga gisîj gidigân nej suj nej nuguanꞌ dânj,
ni̱ nga giriꞌ nej suj sí gi̱nikòꞌ rukû nej suj ni̱ nda huìj ganahuin nej sôꞌ sí ga̱ꞌa̱nj ruhuâ rúnâko gàꞌ daꞌ nej suj.
16 ’Ûta gi̱ranꞌ sa̱ñu̱n nej suj gidigân aꞌngô nej guiì dadinꞌ hua̱ du̱chri nej suj.
“Ni̱ gataj nej suj:
Si hua̱ nej guiì gataj si hueꞌ huin nûhui huin sa giniꞌin yàngàꞌ sa giꞌhiaj ninj,
hiôꞌ ni̱ sê yàngàꞌ huin sa gataj ninj gataj nej suj;
ni̱ si hua̱ ꞌngo̱ guiì gataj si oro gurunûn nej sôꞌ ruhuâ hueꞌ huin nûhui huin sa giniꞌin yàngàꞌ sa giꞌhiaj ninj,
hioꞌ ni̱ yàngàꞌ huin sa gataj ninj gataj nej suj.”
17 Sí nitaj si ni̱ka̱j raa̱ huin nej suj ni̱ duchri huin nej suj.
Dadinꞌ ahuin sa huin doj ruhuâ nej suj ràꞌaj;
oro huin nîꞌ,
si hueꞌ nûhui sa nagiꞌhiaj gè oro huin doj sàꞌ.
18 Huê danj na̱nj gataj nej suj:
“Ni̱ si hua̱ ꞌngo̱ nej guiì gataj si si-na ñaꞌanj an huin sa giniꞌin yàngàꞌ sa giꞌhiaj ninj,
hiôꞌ ni̱ sê yàngàꞌ huin sa gataj ninj gataj nej suj;
sani̱ si hua̱ da̱ꞌa̱j nej guiì gataj si ofrenda tàj riñan si-na ñaꞌanj an huin sa giniꞌin yàngàꞌ sa giꞌhiaj ninj,
hiôꞌ ni̱ yàngàꞌ huin sa gataj ninj gataj nej suj.”
19 Huin nej suj sí nitaj si guyumân ruhuâ ni̱ duchri huin nej suj.
Dadinꞌ ahuin sa huin sa ña̱ꞌa̱n doj ruhuâ nej suj ràꞌaj;
ofrenda tàj riñan si-na ñaꞌanj an huin nîꞌ,
si si-na ñaꞌanj an sa nagiꞌhiaj gè ofrenda dan huin sàꞌ.
20 Dadinꞌ nej guiì gataj si si-na ñaꞌanj an huin sa giniꞌin yàngàꞌ sa giꞌhiaj ninj,
hiôꞌ ni̱ giniꞌin yàngàj sa giꞌhiaj ninj,
ni̱ huê danj na̱nj giniꞌin yàngàꞌ nej rasu̱n màn riñan si-na ñaꞌanj an na̱nj ánj.
21 Ni̱ nej guiì gataj si hueꞌ huin nûhui huin sa giniꞌin yàngàꞌ sa giꞌhiaj ninj,
ni̱ yàngàꞌ giniꞌin sa giꞌhiaj ninj,
ni̱ giniꞌin yàngàꞌ Ma̱ꞌan Ñaꞌanj an dadinꞌ nne ruhuâ hueꞌ huin nûhui dânj.
22 Ni̱ nej guiì gataj si yàtàꞌa huin sa giniꞌin yàngàꞌ sa giꞌhiaj ninj,
hiôꞌ ni̱ chrun yilâ nne Ma̱ꞌan Ñaꞌanj an huin sa giniꞌin yàngàꞌ sa giꞌhiaj ninj,
dadinꞌ nne Ma̱ꞌan riñan chrun yilâ dânj.
23 ’Ûta gi̱ranꞌ sa̱ñu̱n nej suj maestrû chru̱n hueꞌê ley ngà nej fariseo,
dadinꞌ sí gidigañuꞌunj un huin nej suj.
Dadinꞌ gaꞌhuiꞌ nej suj diezmo koj menta,
ni̱ gaꞌhuiꞌ nej suj diezmo koj eneldo,
ni̱ gaꞌhuiꞌ nej suj diezmo koj komino,
sani̱ gudunâj nej suj nuguanꞌ ña̱ꞌa̱n staꞌu gaꞌnïnꞌ su̱n Ma̱ꞌan Ñaꞌanj an:
Ni̱ nitaj si giꞌhiaj nej suj sa ni̱ka̱a,
ni̱ nitaj si ga̱na̱nï̱n àko ruhuâ nej suj niꞌin nej suj nej guiì ni̱ nitaj si guyumân yìtï̀nj ruhuâ nej suj niꞌin nej suj Ma̱ꞌan Ñaꞌanj an,
ni̱ nej nânj huin sa ña̱ꞌa̱n daꞌhui nej suj ga̱da̱gahuin nej suj,
sani̱ huê danj na̱nj nun daꞌhui nej suj gu̱du̱nâj nej suj nej nânj mánj.
24 Gidigân nej suj sani̱ huin nej suj sí du̱chri,
ni̱ aka nej suj yuku siꞌnïn nne goꞌo nej suj,
nânj huin nga nagiꞌhiaj ha̱i̱ nej suj rayiꞌî nej sa nitaj si huin gakï̱nꞌïn,
sani̱ gayamânj nej suj yuku kameyu,
nânj huin nga gaꞌnï̂nj nej suj si giꞌhiaj nej guiì gakï̱nꞌ hua̱ nìko ni̱ nitaj si nagiꞌhiaj ha̱i̱ nej suj mánj.
25 ’Ûta gi̱ranꞌ sa̱ñu̱n nej suj,
maestrû chru̱n ley ngà nej fariseo,
dadinꞌ sí gidigañuꞌunj un huin nej suj.
Dadinꞌ dàj rûnꞌ giꞌhiaj nej guiì nga ganaꞌnïnꞌ ninj yichrá basu ngà yichrá goꞌo huê danj hueꞌê nagiꞌhiaj nej suj ma̱ꞌan nej suj,
sani̱ ruhuâ nimân nej suj ni̱ ûta mân gakï̱nꞌ tu̱u ngà nej gakï̱nꞌ ganahuin ngà nej guiì giꞌhiaj gakï̱nꞌïn.
26 Fariseo duchri suj gàꞌ manꞌ.
Gànàꞌnï̀nꞌ si̱nï̱n nej suj ruhuâ basu ngà ruhuâ goꞌo,
ni̱ neꞌ rùkù ni̱ ga̱na̱huin sàꞌ neꞌ ye̱ꞌ goꞌo,
ni̱ nânj huin si gàꞌ si̱nï̱n daꞌhui ga̱na̱huin sàꞌ ruhuâ nimân nej suj,
daꞌnga ni̱ ganahuin sàꞌ neꞌ ye̱ꞌ nej suj.
27 ’Ûta gi̱ranꞌ sa̱ñu̱n nej suj maestrû chru̱n hueꞌê ley ngà nej fariseo,
dadinꞌ sí gidigañuꞌunj un huin nej suj.
Ni̱ huin nej suj dàj rûnꞌ huin chran gàtsì ñan gachinꞌ nej sij nej nîman dadinꞌ yàngàꞌ hia nï̀nꞌ,
ni̱ nda hueꞌê chre hua neꞌ ye̱ꞌ chran dânj,
sani̱ neꞌ rùhuà chran danj ni̱ nda nìchra chre mân kú nej nîman ni̱ ûta mân sa kï̱j huaa.
28 Huê danj hua nej suj;
ni̱ ûta hueꞌê nagiꞌhiaj nej suj ma̱ꞌan nej suj guendâ ruhuâ nej suj si ga̱ta̱j nej guiì si huin nej suj guiì giꞌhiaj sa ni̱ka̱a,
sani̱ ruhuâ nimân nej suj ni̱ ûta mân nuguanꞌ gidigañuꞌunj un ngà nej gakï̱nꞌïn.
29 ’Ûta gi̱ranꞌ sa̱ñu̱n nej suj maestrû,
chru̱n sàꞌ ley ngà nej sí fariseo,
dadinꞌ sí gidigañuꞌunj un huin nej suj.
Ni̱ nagiꞌhiaj nej suj chran ñan gachinꞌ nej sij nej sôꞌ gataj dàj ga̱huin,
ni̱ nagiꞌhiaj hueꞌê nej suj nej chran ñan gachinꞌ nej sij nej sí giꞌhiaj sa ni̱ka̱a.
30 Ni̱ gataj nej suj:
“Si nu̱n gane nej ñûnj diû nga gane rej nej ñûnj,
ni̱ si̱ gahuin nej ñûnj ngà nej sôꞌ guendâ da̱gahuiꞌ nej ñûnj,
ni̱ si̱ gañanj nej ñûnj tun nej sí gataj dàj ga̱huin sa mánj.”
31 Huê danj ni̱ ganakaj guendâ nej suj,
si huin nej suj daꞌní nej sôꞌ dagahuiꞌ nej sí gataj dàj ga̱huin.
32 Du̱guꞌnïnꞌ nej suj ni̱ gi̱ꞌhiaj nej suj dàj rûnꞌ giꞌhiaj rej nej suj.
33 ’Dàj rûnꞌ giꞌhiaj yukuáa huê danj giꞌhiaj nej suj,
yiꞌnïnꞌ nej yukuá suj gàꞌ manꞌ.
Dàj gi̱ꞌhiaj nej suj ga̱ꞌhue ga̱na̱ni̱n nej suj dadinꞌ gàꞌ giriꞌ nìꞌhiaj nej suj gi̱nun nej suj ruhuâ rúnâko ràꞌaj.
34 Huê danj ni̱,
gaꞌnï̂n nej sí ga̱ta̱j dàj ga̱huin ngà nej sí niꞌin sàꞌ nga nej sí chru̱n sàꞌ ley guchiꞌ nej sôꞌ riñan nej suj;
sani̱ da̱ꞌa̱j nej sôꞌ dagahuiꞌ nej suj,
ni̱ aꞌngô da̱ꞌa̱j nej sôꞌ dunikòꞌ nej suj riñan rugutsìi,
ni̱ gàꞌhuìꞌ nej suj niꞌhiaj aꞌngô da̱ꞌa̱j nej sôꞌ ruhuâ hueꞌ huin nûhui,
ni̱ ginikòꞌ nej suj ga̱ta̱ rùhuà nej suj nej sôꞌ ꞌngo̱ yumanꞌ snàꞌànj ni̱ aꞌngô yumanꞌ snàꞌanj an.
35 Huê danj ni̱ gi̱ranꞌ sa̱ñu̱n nej suj ni̱ gànàtàꞌ tun daranꞌ nej sí giꞌhiaj sa ni̱ka̱a yichrá nej suj,
àsìj tun Abel dadinꞌ gahuin sôꞌ sí giꞌhiaj sa ni̱ka̱a ngà tun Zacarías daꞌní Berequias,
sí dagahuiꞌ nej suj da̱nï̱n hueꞌ huin nûhui,
ñan ni̱kï̱nꞌ si-na ñaꞌanj an.
36 Yàngàꞌ hia nï̀nꞌ ni̱ gatâ si daranꞌ nej nânj ni̱ ga̱ꞌnaj riñan nej guiì màn diû hia̱j.
Ûta dugueꞌe Ma̱ꞌan Jesús rayiꞌî nej guiì màn ruhuâ yumanꞌ snàꞌànj Jerusalén
37 ’Jerusalén,
Jerusalén,
huêꞌ huin sa dagahuiꞌ nej sôꞌ gataj dàj ga̱huin,
ni̱ garrûnꞌ hiëj nej sí gaꞌnï̂n guchiꞌ riñanꞌ.
Ni̱ ûta gàꞌì giꞌhiâ si ga̱na̱huin chre̱ꞌ nej daꞌnít,
dàj rûnꞌ giꞌhiaj yuchee nga nagiꞌhiaj chre̱ꞌ xuj nej daꞌní xuj ni̱ ganachrîj xuj riki siga̱chi xuj,
sani̱ nun ga̱ra̱n yinaꞌ nej sa giꞌhiâ ngàꞌ mánj.
38 Hia̱j ni̱ gùnàj dukuâ nej suj ni̱ gahuin dïnꞌïnj ruhuaj ni̱ nitaj guiì ga̱ne ruhuaj mánj.
39 Dadinꞌ gàtà ni̱ àsìj gui hia̱j ni̱ si̱ giniꞌin nej suj ñùnj,
nda gui ga̱ta̱j nej suj:
“Si ûta hueꞌê giꞌhiaj Ma̱ꞌan sa gaꞌnaꞌ riñan siyu̱gui Ma̱ꞌan Señor.”