Gidigân Ma̱ꞌan Jesús dàj gaꞌminꞌ ngà Ma̱ꞌan Ñaꞌanj an
(Mt. 6:9-15; 7:7-11)
11
Gahuin ꞌngo̱ gui dânj nga nne Ma̱ꞌan Jesús aꞌmin ngà Ma̱ꞌan Ñaꞌanj an ꞌngo̱ hiuj dânj,
ni̱ nga gisîj gaꞌmin Ma̱ꞌan ngà Ma̱ꞌan Ñaꞌanj an ni̱ gataj ꞌngo̱ nej sí ꞌna̱ꞌ ga̱huin chru̱n riñanj:
—Señor,
gi̱digân Ma̱ꞌân rèꞌ dàj ga̱ꞌmi̱n nej ñûnj ngà Ma̱ꞌan Ñaꞌanj an,
dadinꞌ Juan Bautista ni̱ gidigân sôꞌ dàj gaꞌmin nej sí gaꞌnaꞌ ga̱huin chru̱n riñan sôꞌ ngà Ma̱ꞌan Ñaꞌanj an.
2 Ni̱ gataj Ma̱ꞌan Jesús:
—Nga ruhuâ nej suj ga̱ꞌmi̱n nej suj ngà Ma̱ꞌan Ñaꞌanj an,
ni̱ dànanj gataj nej suj:
Taj Ma̱ꞌân rèꞌ huin Rej nej ñûnj nne yàtàꞌa,
sa gèe huin siyu̱gui Ma̱ꞌân rèꞌ.
Ga̱ꞌna̱ꞌ gi̱nikaj su̱n Ma̱ꞌân rèꞌ riñan nej ñûnj.
Dàj rûnꞌ ginikaj su̱n Ma̱ꞌân rèꞌ yàtàꞌà,
huê danj gi̱nikaj su̱n Ma̱ꞌân rèꞌ riñan hioꞌó nânj.
3 Ni̱ rachrún rikî Ma̱ꞌân rèꞌ ya nej ñûnj hia̱j aꞌhioj,
ni̱ ri̱ki̱ Ma̱ꞌân rèꞌ daranꞌ nej gui ya̱ nej ñûnj.
4 Ni̱ ginikaj Ma̱ꞌân rèꞌ nimân nìko rayiꞌî nej gakï̱nꞌ giꞌhiaj nej ñûnj riñan Ma̱ꞌan Ma̱ꞌân rèꞌ,
dadinꞌ huê danj ginikaj nej ñûnj nimân nìko rayiꞌî daranꞌ nej sí giꞌhiaj gakï̱nꞌïn riñan nej ñûnj.
Ni̱ si̱ gaꞌnḯn raꞌa Ma̱ꞌân rèꞌ si gi̱ni̱nj nej ñûnj riñan gakï̱nꞌïn nga duguaneꞌ sichre riñan nej ñûnj,
ni̱ gi̱ꞌhiaj Ma̱ꞌân rèꞌ si ga̱na̱ni̱n nej ñûnj riñan daranꞌ nej sa aꞌnanꞌan.
5 Ni̱ gataj Ma̱ꞌan Jesús:
—Ahuin goꞌngo̱ nej suj ni̱ si̱ hua̱ ꞌngo̱ sí ni̱ka̱j duguiꞌ ngà nej suj,
ni̱ gaꞌanj nej suj dukuâ sí dânj da̱ꞌa̱j neꞌ nàꞌan ni̱ ga̱ta̱j nej suj gu̱nïn sôꞌ:
“Di̱nï̂nj,
ri̱ki̱ yikḯn rèꞌ huàꞌnï̀nj rachrún gìrìꞌìj,
6 Dadinꞌ ñan nné guyumân ꞌngo̱ sí ni̱ka̱j duguiꞌ ngàj ni̱ nda gànꞌ gaꞌnaꞌ sôꞌ,
ni̱ nitaj nùnj hua gàꞌhuìj yâ sôꞌ mánj.”
7 Ni̱ gi̱ꞌhiaj nêꞌ guenda si sí ni̱ka̱j duguiꞌ ngà nej suj ni̱ ga̱ꞌmi̱n sôꞌ nda ruhuâ dukuâ sôꞌ ni̱ ga̱ta̱j sôꞌ:
“Si̱ ganariꞌ nnej e riñânj mánj;
dadinꞌ gàꞌ ganaran riñan rahueꞌe,
ni̱ gàꞌ nngaj nej daꞌnin riñan na ngàj;
ni̱ si̱ gaꞌhue ga̱na̱chí ni̱ rìkìj sa gachînꞌ mánj.”
8 Ñùnj taj ni̱ nùnj huin si̱ naꞌhuej ruhuâ sí dânj ga̱hui̱ sôꞌ ruhuâ dukuâ sôꞌ,
sani̱ guendâ nun ga̱ra̱nꞌ ruhuâ sôꞌ si gi̱ꞌhiaj sí dânj si gi̱ri̱ ruhuâ sôꞌ huê danj,
ni̱ ga̱hui̱ sí dânj ruhuâ dukuâ sôꞌ ni̱ gàꞌhuìꞌ sôꞌ sa gachín sí ni̱ka̱j duguiꞌ ngà sôꞌ.
9 Ñùnj taj:
Ni̱ gàchìnj nej suj ni̱ ri̱ki̱ Ma̱ꞌan Ñaꞌanj an;
nànàꞌhuìꞌ nej suj ni̱ gànàrìꞌ nej suj;
gi̱ta raꞌa nej suj riñan rahueꞌe,
ni̱ ga̱na̱ꞌnï̱n nej sij ga̱tu̱ nej suj.
10 Dadinꞌ daranꞌ sí gachín ni̱ ga̱na̱huin ra̱ꞌa sôꞌ;
ni̱ sí nanaꞌhuiꞌ ni̱ gànàrìꞌ sôꞌ;
ni̱ sí gita raꞌa riñan rahueꞌe,
ni̱ ga̱na̱ꞌnï̱n nej sôꞌ riñan rahueꞌe ga̱tu̱ sí dânj.
11 ’Ni̱ si̱ hua̱ daꞌní nej suj,
ni̱ si gàchìnj sôꞌ rachrúun ya̱ sôꞌ ni̱ gìsìj ruhuâ nej suj gàꞌhuìꞌ nej suj hiëj ya̱ sôꞌ na̱nj nîꞌ.
Ni̱ si gàchìnj sôꞌ yukuaj a ya̱ sôꞌ ni̱ gìsìj ruhuâ nej suj gàꞌhuìꞌ nej suj yukuáa ya̱ sôꞌ na̱nj nîꞌ.
12 Ni̱ si gàchìnj sôꞌ chruj yâ sôꞌ,
ni̱ gìsìj ruhuâ nej suj gàꞌhuìꞌ nej suj yikïïn ya̱ sôꞌ na̱nj nîꞌ.
13 Ni̱ si nej suj ni̱ huin nej suj sí aꞌnanꞌan,
ni̱ niꞌin sàꞌ nej suj dàj hua sa gàꞌhuìꞌ nej suj raꞌa daꞌní nej suj.
Dàj gàꞌ Ma̱ꞌan Rê nne yàtàꞌa ni̱ ga̱ꞌhue ga̱ꞌhuij Espíritu Santo raꞌa nej guiì gàchìnj riñanj.
ꞌNgo̱ hueꞌ giyichraꞌ da̱ꞌa̱j ni̱ si̱ gaꞌhue ga̱ne naj doj gàꞌ mánj
14 Ni̱ giri Ma̱ꞌan Jesús ꞌngo̱ sa kï̱j ï ruhuâ nimân ꞌngo̱ sí ꞌmìnj in;
ni̱ nga gahui nanè kï̱j hua̱ dânj,
ni̱ gaꞌhue gaꞌmin sí ꞌmìnj dânj;
ni̱ ûta gahuin ña̱ꞌanj ruhuâ nej guiì rayiꞌî sa ga̱huin.
15 Sani̱ gataj da̱ꞌa̱j nej sí màn hiuj dânj:
—Giri sí nânj sa kï̱j ï,
ruhuâ nimân nej guiì dadinꞌ Beelzebú sa aꞌnïnꞌ riñan nej sa kïj ï gaꞌhuiꞌ su̱n dânj raꞌa sôꞌ rayiꞌî dan gaꞌhue giri sôꞌ nej sa kï̱j ï ruhuâ nimân nej guiì.
16 Ni̱ aꞌngô da̱ꞌa̱j nej sí dan gachín ꞌngo̱ daꞌngaꞌ gaꞌnaꞌ neꞌ yàtàꞌa riñan Ma̱ꞌan Jesús,
guendâ ruhuâ nej sôꞌ ga̱ya̱ka̱j nej sôꞌ daꞌngaꞌa ngà Ma̱ꞌan.
17 Sani̱ niꞌin Ma̱ꞌan Jesús,
dàj ganï̂n ruhuâ nej sij ni̱ gata gu̱nïn nej sij:
—Daranꞌ yumanꞌan nga giyiꞌchraꞌ da̱ꞌa ni̱ ga̱na̱hui;
ni̱ ꞌngo̱ hueꞌ gàꞌ giyichraꞌ da̱ꞌa̱j ni̱ man si̱ nne guendâ ga̱na̱tu.
18 Ni̱ si̱ sichre ni̱ guchra da̱ꞌa nej duguiꞌij,
ni̱ dàj gi̱ꞌhia ga̱ꞌhue gùnùkua ga̱ne naj doj ràꞌaj.
Dadinꞌ gataj nej suj si Beelzebú huin sa giꞌhiaj rayiꞌî dânj gaꞌhue girîj neꞌ ye̱ꞌe nej sa kï̱j ï hia̱j do̱j.
19 Ni̱ si Beelzebú huin sa giꞌhiaj ni̱ rayiꞌî dânj ni̱ gaꞌhue girîj neꞌ ye̱ꞌe nej sa kï̱j ï.
Ni̱ ahuin sa gaꞌhuiꞌ suun riñan daꞌní nej suj ni̱ gaꞌhue giri nej sôꞌ nej sa kï̱j ï neꞌ ye̱ꞌe ràꞌaj.
Hia̱j ni̱ nej sôꞌ huin sa ga̱na̱ka̱j guendâ nej nuguanꞌ gaꞌmin nej suj.
20 Ni̱ si ngà dë̂j raꞌa Ma̱ꞌan Ñaꞌanj an huin sa giꞌhiaj ni̱ gaꞌhue girîj neꞌ yèꞌe nej sa kï̱j ï hiôꞌ ni̱ ruhuaj ga̱ta si yàngàꞌ hia nï̀nꞌ ni̱ gàꞌ gahuin nichrunꞌ Ma̱ꞌan Ñaꞌanj an guendâ gi̱ni̱kaj sunj riñan nej suj.
21 ’Ni̱ si ꞌngo̱ síi ni̱ hua̱ ran nne sôꞌ ni̱ hua̱ chrun rihiaꞌa giꞌhiaj sôꞌ guendâ du̱gumîn sôꞌ nej sa màn ruhuâ dukuâ sôꞌ,
hiôꞌ ni̱ hua̱ dïnꞌïnj mân daranꞌ nej rasu̱n hua̱ riñan sôꞌ.
22 Sani̱ ñùnj huin sí nùkuaj dânj ni̱ gaꞌnê daranꞌ nej sa garânj sun sichre riñanj,
ni̱ giꞌhiaj ga̱nânj sichre,
dadinꞌ nej sa garânj sun dânj huin sa giꞌhiaj ni̱ ûta giriꞌ nukua,
huê danj ni̱ ganakâ daranꞌ nej sa gahuin siꞌhiaj sichre.
23 ’Sí nitaj si huin ngàj ni̱ gunïnꞌ sôꞌ ngàj;
ni̱ sí nitaj si ganaranꞌ ngàj ni̱ dànanj duyaꞌnï̀n nï̀nꞌ sôꞌ.
Nanikàj ñûn nanè kï̱j huaa gatu ruhuâ dukuaj
24 ’Nga gahui ꞌngo̱ nanè kï̱j hua̱a ruhuâ nimân nej guiì,
ni̱ gaché nunj riñan hioꞌó nakòo,
ni̱ nanaꞌhuij ñan ga̱na̱ra̱n ruhuaj;
ni̱ naꞌhue gànàrìꞌij ñan ga̱na̱ra̱n ruhuaj,
ni̱ gata:
“Nànìkàj ñún na̱ꞌa̱nj ñan gahui gaꞌná.”
25 Ni̱ nga gunukuij ña̱n gane si̱nïnj,
ni̱ ganariꞌij si̱ gàꞌ ganakaꞌ nej sôꞌ ni̱ gàꞌ nagiꞌhiaj nìhiàꞌ nej sôꞌ ruhuâ hueꞌ ña̱n gane.
26 Hiôꞌ ni̱ gaꞌanj ga̱kïn,
aꞌngô chi̱j nej nanè kï̱j hua̱ doj gàꞌ daꞌaj:
Ni̱ gatûj ninj ni̱ gaꞌanj ga̱ne ninj ruhuâ nimân sí dânj;
ni̱ dànanj ûta kï̱j ganahuin sí nânj gàꞌ daꞌ sa giꞌhiaj si̱nï̱n sôꞌ.
Ga̱na̱huin nìhiàꞌ ruhuâ nej guiì gunïn si-nùguànꞌ Ma̱ꞌan Ñaꞌanj an
27 Nga nï̀nꞌ gaꞌmin Ma̱ꞌan Jesús nej nuguanꞌ nânj,
ni̱ gayiꞌì ꞌngo̱ siyànà ꞌna̱ꞌ siganï̂nj nej guiì rigìi ni̱ gaꞌmin ni̱ gata:
—Ûta ga̱na̱huin nìhiàꞌ ruhuâ siyànà ginun ri̱ki sòꞌ,
ni̱ sa yi̱ꞌña̱nj gutsîꞌ.
28 Sani̱ dànanj gataj Ma̱ꞌan Jesús:
—Dànanj ga̱na̱huin nìhiàꞌ ruhuâ nej guiì gunïn si-nùguànꞌ Ma̱ꞌan Ñaꞌanj an,
si ganaꞌnḯn sàꞌ ninj si-nùguànꞌ Ma̱ꞌan Ñaꞌanj an ni̱ dagahuin ninj na̱nj ánj.
Yiꞌnïnꞌ kïj huaa gachín daꞌngaꞌa gi̱ni̱ꞌin
29 Ni̱ ganahuin mintû nï̀nꞌ nej guiì rigìi,
ni̱ gayiꞌì Ma̱ꞌan Jesús ni̱ gata gu̱nïn ninj:
—Nej yìꞌnï̀nꞌ nej guiì màn nânj ni̱ guiì kï̱j hua̱a huin ninj;
ni̱ gachín ninj daꞌngaꞌa gi̱ni̱ꞌin ninj,
sani̱ si̱ gaꞌhue gi̱niꞌin ninj daꞌngaꞌa mánj,
dadinꞌ sa giranꞌ Jonás huin sa ga̱na̱ka̱j guendâ ninj.
30 Dadinꞌ sa giranꞌ Jonás ga̱huin ꞌngo̱ daꞌngaꞌa riñan nej guiì gimân yumanꞌ Ninive,
ni̱ huê danj na̱nj ñùnj ni̱ huín ꞌngo̱ daꞌngaꞌa riñan nej yi̱ꞌnï̱nꞌ nej guiì màn diû nânj.
31 Reyna gaꞌnaꞌ neꞌ ri̱ki ni̱ gànàyùmàn ñûnꞌ gui nga na̱gi̱ꞌhiaj Ma̱ꞌan Ñaꞌanj an guenda ngà yiꞌnïnꞌ nej guiì nânj ni̱ ga̱ra̱n ruhuâ ñûnꞌ rayiꞌî ninj,
ni̱ gi̱ꞌhia̱j ñûnꞌ si ga̱huin kastîgu ninj;
dadinꞌ gaꞌnaꞌ ñûnꞌ nda ga̱nꞌ xi guendâ ruhuâ ñûnꞌ gi̱ni̱ꞌin ñûnꞌ dàj nìko niꞌin Salomón,
sani̱ dànanj hua̱j huin sa ni̱kï̱nꞌ hiuj nânj gàꞌ daꞌ Salomón.
32 Nej guiì gimân yumanꞌ Ninive ni̱ gànàyùmàn ninj gui nga na̱giꞌhiaj Ma̱ꞌan Ñaꞌanj an guenda riñan nej yiꞌnïnꞌ nânj,
ni̱ ga̱ra̱n ruhuâ ninj rayiꞌî nej guiì nânj,
ni̱ gi̱ꞌhiaj ninj si ga̱ꞌa̱nj ni̱ꞌhia̱ nej guiì nânj;
dadinꞌ nga gaꞌmin Jonás si-nùguànꞌ Ma̱ꞌan Ñaꞌanj an riñan ninj ni̱ gananikàj ruhuâ ninj ngà rayiꞌî si-ga̱kïnꞌ ninj,
ni̱ dànanj nìko hua̱ sa ni̱kï̱nꞌ hiuj nânj gàꞌ daꞌ Jonás.
Rune ñunꞌ huin sa gudugùn riñan nneè kuꞌ
33 ’Gàꞌ si̱ ꞌngo̱ guiì si̱ gaꞌhue ga̱chri̱ huì lampara giꞌnïnj huìj riki ꞌngo̱ chrún giriñun ninj mánj,
dadinꞌ gutaꞌ ninj lampara dânj ñan hua yàkàan,
daꞌnga ni̱ gudugunj riñan nej guiì nga ga̱tu̱ ninj ruhuâ hueꞌe.
34 Ñaꞌan gudugùn nneè kút huin rune ñant,
ni̱ si rune ñant huin sa sàꞌa;
ni̱ nï̀nꞌ gàchràꞌ nneè kút giyigï̀n,
ni̱ si rune ñant huin sa yiꞌìi ni̱ hua̱ ru̱mi̱nꞌ nï̀nꞌ gàchràꞌ nneè kút.
35 Gi̱ni̱ꞌhiaj sòꞌ dadinꞌ si nuhuij ni̱ sa giyigï̀n hua̱ nneè kút,
ni̱ huin sa ru̱mi̱nꞌin.
36 Ni̱ huê danj ni̱ si nï̀nꞌ gàchràꞌ nneè kút giyigï̀n,
hiôꞌ ni̱ nitaj si hua̱ do̱j sa ru̱mi̱nꞌin nneè kút mánj,
ni̱ huaj dàj rûnꞌ hua nga gudugùn ñaꞌaan hiôꞌ ni̱ nda hueꞌê chre giyigï̀n nï̀nꞌ gàchràꞌ nneè kút.
Gataj Ma̱ꞌan Jesús si giꞌhiaj nej maestrû chru̱n ley ngà nej fariseo sa aꞌnanꞌan
37 Ni̱ nga gisîj gaꞌmin Ma̱ꞌan Jesús,
ni̱ ûta àko gachín nìꞌhiaj ꞌngo̱ sí fariseo si gàꞌan dukuâ sôꞌ ni̱ yaj ngà sôꞌ,
ni̱ nga gatûj Ma̱ꞌan Jesús ruhuâ hueꞌe,
ni̱ gaꞌanj ga̱ne yiꞌnḯn mesa.
38 Ni̱ giniꞌin sí fariseo si nun nànìꞌhiàꞌ Ma̱ꞌan Jesús raꞌa nga yaj,
ni̱ gahuin ña̱ꞌanj ruhuâ sôꞌ.
39 Sani̱ gataj Ma̱ꞌan Señor:
—Hia̱j ni̱ nitaj si dùgùnàj hua sa giꞌhiaj nej suj nej sí fariseo,
dadinꞌ giꞌhiaj nej suj dàj rûnꞌ giꞌhiaj nej guiì ganaꞌnïnꞌ neꞌ ye̱ꞌ basu ni̱ ne̱ꞌ ye̱ꞌ goꞌo,
ni̱ huê danj giꞌhiaj nej suj ni̱ ûta hueꞌê nagiꞌhiaj nej suj neꞌ ye̱ꞌ nej suj sani̱ ruhuâ nimân nej suj ni̱ nda nìchra chre mân gakï̱nꞌ tu̱u ngà aꞌngô nej gakï̱nꞌïn.
40 Sí naꞌhuej ga̱ya̱ka̱j guendâ huin nej suj.
Ni̱ Ma̱ꞌan sa giꞌhiaj nneè kú nej suj,
ni̱ sê Ma̱ꞌan giꞌhiaj nimân nej suj ràꞌ saj ûn.
41 Gàꞌhuìꞌ nej suj sa hua̱ riñan nej suj riñan nej guiì gànìki ni̱ ga̱na̱huin sàꞌ nï̀nꞌ gàchràꞌ nej suj.
42 ’Sani̱ ûta gi̱ranꞌ sa̱ñu̱n nej suj nej sí fariseo.
Dadinꞌ gaꞌhuiꞌ nej suj diezmo koj menta,
ni̱ gaꞌhuiꞌ nej suj diezmo koj ruda ni̱ gaꞌhuiꞌ nej suj diezmo daranꞌ nej kuej gunun nej suj,
sani̱ gudunâj nej suj guendâ gi̱ꞌhiaj nej suj sa ni̱ka̱a ni̱ gudunâj nej suj guendâ ga̱ ꞌì ruhuâ nej suj niꞌin nej suj Ma̱ꞌan Ñaꞌanj an.
Nej nânj huin sa ña̱ꞌa̱n daꞌhui nej suj gi̱ꞌhiaj nej suj,
ni̱ nun daꞌhui nej suj gu̱du̱nâj nej suj guendâ gàꞌhuìꞌ nej suj diezmo nej mánj.
43 ’Ûta gi̱ranꞌ sa̱ñu̱n nej suj nej sí fariseo dânj.
Dadinꞌ ûta huin ruhuâ nej suj ga̱ne nej suj riñan nej chrun yilâ.
ni̱kï̱nꞌ si̱nï̱n dukuán neꞌ ña̱an,
ni̱ ûta huin ruhuâ nej suj si gi̱daꞌa nej guiì ra̱ꞌa nej suj nga nikïnꞌ nej suj riñan raꞌhuee,
44 ’Ûta gi̱ranꞌ sa̱ñu̱n nej suj,
nej sí chru̱n ley ni̱ nej suj sí fariseo,
dadinꞌ huin nej suj sí gidigañuꞌunj un.
Ni̱ huin nej suj dàj rûnꞌ huin ñan gachinꞌ nej sô nej nîman dadinꞌ nitaj si ruguiꞌ si nngaj nîman hiuj dânj,
ni̱ nej sí aché neꞌ ña̱n ñan gachinꞌ nej sôꞌ nej nîman ni̱ nun niꞌin nej sôꞌ si nngaj nîman riki hioꞌó ña̱n aché nej sôꞌ hua̱j nej sôꞌ.
45 Nanikàj ꞌngo̱ sí ganataꞌ si-ley Ma̱ꞌan Ñaꞌanj an ni̱ gataj sôꞌ:
—Maestrûj,
nga gaꞌmin Ma̱ꞌân rèꞌ nej nuguanꞌ nânj,
ni̱ riñan nej ñûnj gaꞌmin Ma̱ꞌân rèꞌ ni̱ giꞌhiá rèꞌ si gìrìꞌ nej ñûnj sinàꞌàj a.
46 Ni̱ gataj Ma̱ꞌan Jesús:
—Ûta gi̱ranꞌ sa̱ñu̱n nej suj nej sí ganataꞌ si-nùguànꞌ Ma̱ꞌan Ñaꞌanj an.
Dadinꞌ gutaꞌ nej suj rasu̱n aꞌìi dakan yikó nej síi guendâ ga̱ta nej sôꞌ sani̱ naꞌhue gùnùkuaj nej sôꞌ ga̱ta nej sôꞌ dadinꞌ ûta àꞌij,
sani̱ nej ma̱ꞌan nej suj ni̱ gàꞌ si ꞌngo̱ dë̂j raꞌa nej suj nitaj si gata nej suj nej rasu̱n dânj mánj.
47 ’Ûta gi̱ranꞌ sa̱ñu̱n nej suj,
nej sí na̱giꞌhiaj ñan gachinꞌ nej sij nej sôꞌ gataj dàj gahuin dadinꞌ nej sôꞌ dânj dagahuiꞌ rej nej suj.
48 Huê danj ni̱ giniꞌin nej suj dàj giranꞌ nej sôꞌ ni̱ ga gu̱ña̱n ruhuâ nej suj ngà nej sa giꞌhiaj rej nej suj;
dadinꞌ yàngàꞌ hia nï̀nꞌ ni̱ huê nej sôꞌ dagahuiꞌ nej si-profeta Ma̱ꞌan Ñaꞌanj an,
ni̱ hua̱ ruhuâ nej suj ngà sa giꞌhiaj nej sôꞌ dadinꞌ nagiꞌhiaj nej suj ñan nngaj nneè kú nej sôꞌ.
49 ’Huê danj ni̱ gàꞌ ûta sàꞌ niꞌin Ma̱ꞌan Ñaꞌanj an nej nânj rayiꞌî dan ni̱ gata:
“Gàꞌnï̀n nej sôꞌ ga̱ta̱j dàj gahuin ni̱ gàꞌnï̀n nej sôꞌ gi̱di̱gân si̱nï̱n si-nùguànꞌ Ma̱ꞌan Ñaꞌanj an;
ni̱ da̱gahuiꞌ nej suj nej sôꞌ ni̱ aꞌngô da̱ꞌa̱j nej sôꞌ gata rùhuà nej suj.”
50 Daꞌnga ni̱ gànàchìnꞌ Ma̱ꞌan Ñaꞌanj an guenda riñan nej yiꞌnïnꞌ nej guiì nânj rayiꞌî tun nej sôꞌ gataj dàj gahuin àsìj nga giꞌhiaj Ma̱ꞌan Ñaꞌanj an yumiguìi,
51 àsìj tun Abel ni̱ nda tun Zacarías,
sôꞌ gahuiꞌ da̱nï̱n ñan ni̱kï̱nꞌ si-na ñaꞌanj an ruhuâ hueꞌ nûhui;
ni̱ huê danj gatâ ni̱ ga̱na̱chi̱nꞌ Ma̱ꞌan Ñaꞌanj an guenda riñan nej guiì nânj.
52 ’Ûta gi̱ranꞌ sa̱ñu̱n nej suj,
nej sí ganataꞌ si-nùguànꞌ Ma̱ꞌan Ñaꞌanj an.
Dadinꞌ gaꞌnêj nej suj agaꞌ ra̱ꞌa guendâ ga̱ꞌhue gi̱ni̱ꞌin nej guiì Ma̱ꞌan Ñaꞌanj an;
ni̱ nitaj si gatûj nej suj yiñán Ma̱ꞌan Ñaꞌanj an,
ni̱ huê danj na̱nj nitaj si gaꞌnï̂nj nej suj ga̱tu̱ aꞌngô nej guiì ruhuâ ga̱tu̱ yiñán Ma̱ꞌan Ñaꞌanj an mánj.
53 Ni̱ nga aꞌmin Ma̱ꞌan Jesús nej nuguanꞌ nânj,
ni̱ gayiꞌì nej sí chru̱n ley nga nej sí Fariseo ni̱ ûta nagiꞌhiaj chìꞌ nej sôꞌ ngà Ma̱ꞌan,
ni̱ ûta giꞌhiaj nej sôꞌ si ga̱ꞌmi̱n Ma̱ꞌan rayiꞌî ûta gàꞌì nej nuguanꞌan;
54 Ni̱ ûta gayakaj nej sôꞌ daꞌngaꞌa,
ni̱ ûta gahuin ruhuâ nej sôꞌ gu̱nïn nej sôꞌ si ga̱che̱j ꞌngo̱ nuguanꞌan ga̱ꞌmi̱n Ma̱ꞌan Jesús daꞌnga ni̱ gaꞌhue ga̱ra̱n ruhuâ nej sôꞌ rayiꞌî Ma̱ꞌan.