Si̱ gutaꞌ gakï̱nꞌïn yichrá nej duguîꞌ
(Lc. 6:37-38, 41-42)
7
’Si̱ gutaꞌ nej suj gakï̱nꞌïn nej duguiꞌ nej suj, hiôꞌ ni̱ si̱ gaꞌmin gakï̱nꞌ Ma̱ꞌan Ñaꞌanj an riñan nej suj mánj.
2 Dadinꞌ dàj rûnꞌ gutaꞌ nej suj gakï̱nꞌïn nej duguiꞌ nej suj, ni̱ huê danj ga̱ꞌmi̱n gakï̱nꞌ Ma̱ꞌan Ñaꞌanj an riñan nej suj, ni̱ dàj rûnꞌ giriñun nej suj nej duguiꞌ nej suj, ni̱ huê danj gi̱ri̱ñu̱n Ma̱ꞌan Ñaꞌanj an nej suj.
3 Ni̱ nùnj huin saj ni̱ giniꞌhiajꞌ do̱j sa gachej giꞌhiaj dinḯnt, ni̱ nitaj si giniꞌhiajꞌ gakï̱nꞌ giꞌhiaj ma̱ꞌânꞌ ràꞌaj.
4 Ni̱ ga̱ꞌhue ga̱ta̱j gu̱nïn dinḯnt: Ga̱ꞌnï̱n gìrìj akò nun ruhuâ rune ñant, si ruhuâ rune ñan ma̱ꞌânꞌ nun ꞌngo̱ kaj a na̱nj nîꞌ,
5 Sí gidigañuꞌunj un sòꞌ gàꞌ manꞌ, gi̱ri̱ si̱nï̱n sòꞌ kaj nu̱n ruhuâ rune ñan hiôꞌ ni̱ ga̱ꞌhue gi̱ni̱ꞌin hueꞌêꞌ ni̱ gi̱ri̱ꞌ akò nu̱n ruhuâ rune ñan dinḯnt raj.
6 ’Si̱ gaꞌhuiꞌ nej suj si-nùguànꞌ Ma̱ꞌan Ñaꞌanj an riñan nej guiì gàꞌ gananikàj rùkù dadinꞌ huin ninj dàj rûnꞌ huin yuhue, ni̱ si̱ gaꞌhuiꞌ nej suj si-nùguàn Ma̱ꞌan Ñaꞌanj an riñan nej guiì gàꞌ giniꞌin dadinꞌ nikòꞌ huaj giꞌhiaj ninj gakï̱nꞌïn ni̱ huin ninj dàj rûnꞌ huin yakáa, dadinꞌ gùrùn ninj riñanj, ni̱ ga̱ꞌmi̱n aꞌnanꞌ ninj rayiꞌî si-nùguànꞌ Ma̱ꞌan Ñaꞌanj an.
Gidigân Ma̱ꞌan Jesús dàj gaꞌminꞌ ngà Ma̱ꞌan Ñaꞌanj an
(Lc. 11:9-13; 6:31)
7 ’Gàchìnj nej suj ni̱ ri̱ki̱ Ma̱ꞌan Ñaꞌanj an; nànàꞌhuìꞌ nej suj, ni̱ gànàrìꞌ nej suj; gi̱ta raꞌa nej suj riñan rahueꞌe, ni̱ ga̱na̱ꞌnï̱n nej sij riñan rahueꞌe.
8 Dadinꞌ daranꞌ sí gachín ni̱ ga̱na̱huin ra̱ꞌa sôꞌ, ni̱ sí nanaꞌhuiꞌ ni̱ gànàrìꞌ sôꞌ; ni̱ sí gita raꞌa riñan rahueꞌe ni̱ ga̱na̱ꞌnï̱n nej sij ga̱tu̱ sôꞌ ruhuâ hueꞌe.
9 ’Ni̱ si gachín ꞌngo̱ daꞌní nej suj, rachrúun ya̱ sôꞌ ni̱ gìsìj ruhuâ nej suj gàꞌhuìꞌ nej suj ꞌngo̱ hiëj ya̱ sôꞌ na̱nj nîꞌ.
10 Ni̱ si gàchìnj sôꞌ ꞌngo̱ yukuaj a ya̱ sôꞌ, ni̱ gìsìj ruhuâ nej suj gàꞌhuìꞌ nej suj ꞌngo̱ yukuáa ya̱ sôꞌ na̱nj nîꞌ.
11 Sani̱ si nej suj ni̱ huin nej suj sí aꞌnanꞌan, ni̱ chru̱n nej suj gàꞌhuìꞌ nej suj sa sàꞌa raꞌa daꞌní nej suj, dàj gàꞌ Ma̱ꞌan Rej nej suj nne yàtàꞌa ni̱ chrunj ga̱ꞌhuij sa sàꞌa riñan nej guiì gàchìnj riñanj na̱nj ánj.
12 ’Huê danj ni̱ daranꞌ sa garanꞌ ruhuâ nej suj gi̱ꞌhiaj nej síi ngà nej suj, ni̱ gàꞌ si̱ꞌnï̱n gi̱ꞌhiaj nej suj sa sàꞌa ngà nej sôꞌ; dadinꞌ huê dànanj giyiꞌnïnꞌ suun riñan si-ley Ma̱ꞌan Ñaꞌanj an ni̱ huê dànanj gidigân nej sôꞌ gataj dàj ga̱huin.
Chrej gatï̀nꞌïn
13 ’Ga̱tu̱ nej suj riñan rahueꞌ hua̱ chruj riñan; dadinꞌ hua̱ gàꞌchràꞌ riñan rahueꞌ hua̱ nìko riñan, ni̱ hua̱ gàchràꞌ chrej e sani̱ ga̱ꞌa̱nj ni̱ꞌhia nej suj gi̱ꞌhia, ni̱ ûta gàꞌì nej guiì aché ruhuâ chrej gàchràꞌa.
14 Dadinꞌ hua̱ chruj riñan rahueꞌe, ni̱ hua̱ gàtï̀n chrej gi̱nikaj gùchìꞌ ninj ñan ga̱ne nìgànj ninj, sani̱ do̱j ninj huin sa ganariꞌ chrej gàtï̀ïn na̱nj ánj.
Sa giꞌhiaj ꞌngo̱ guiì gidigân ni̱ gi̱ni̱ꞌînꞌ ahuin guiì huin ninj
15 ’Ga̱ gu̱dadû nej suj ngà nej profeta gidigañuꞌunj un, dadinꞌ dàj rûnꞌ nìn giꞌhiaj matsïj ï huê danj nìn giꞌhiaj nej sij, sani̱ ruhuâ nimân nej sij ni̱ huin dàj rûnꞌ hua ꞌngo̱ yuku stuj hu̱e.
16 Ngà nej sa giꞌhiaj nej sij ni̱ ga̱ꞌhue gi̱ni̱ꞌin nej suj ahuin guiì huin nej sij. Ga̱ꞌhue ga̱hiu chruj uba raa̱ chrun tanj an na̱nj nîꞌ, ni̱ ga̱ꞌhue ga̱hiu chruj îgu raa̱ tanj hia̱ꞌa na̱nj nîꞌ.
17 Huê danj ni̱, daranꞌ nej chrun sàꞌa ni̱ ga̱hiu chruj sàꞌa raj, sani̱ chrun aꞌnanꞌan ni̱ ga̱hiu chruj aꞌnanꞌan raj.
18 Ni̱ si̱ gaꞌhue ga̱hiu chruj aꞌnanꞌan raa̱ chrun sàꞌa mánj, huê danj na̱nj ni̱ si̱ gaꞌhue ga̱hiu chruj sàꞌaj raa̱ chrun aꞌnanꞌan mánj.
19 Daranꞌ nej chrun nitaj si gahiu chruj sàꞌa raa̱ ni̱ gìyìꞌnej ni̱ gàꞌnï̀nj nej sij riñan ñaꞌaan gi̱nunj.
20 Huê danj ni̱, ngà nej sa giꞌhiaj nej sij ni̱ gi̱ni̱ꞌin nej suj ahuin guiì huin nej sij na̱nj ánj.
Nitaj àmàn giniꞌín nej suj mánj
21 ’Sê daranꞌ nej guiì gataj: Señor, Señor, ga̱tu̱ ga̱ne ñan ni̱ka̱j su̱n Ma̱ꞌan Ñaꞌanj nne yàtàꞌa mánj, man nej guiì giꞌhiaj sa garanꞌ ruhuâ Ma̱ꞌan Rê Ñaꞌanj nne yàtàꞌa huin sa ga̱tu̱ ga̱ne ñan ni̱ka̱j su̱n Ma̱ꞌan na̱nj ánj.
22 Ûta gàꞌì nej guiì ga̱ta̱j gu̱nḯn nga gùyùmàn gui dânj: “Señor, Señor, sê ngà siyu̱gui Ma̱ꞌân rèꞌ gataj nej ñûnj dàj ga̱huin ni̱ ngà siyu̱gui Ma̱ꞌân rèꞌ giri nej ñûnj nej sa kï̱j ï ruhuâ nimân nej guiì, ni̱ garânj sun nej ñûnj siyu̱gui Ma̱ꞌân rèꞌ ni̱ ûta ganahuin nej guiì giꞌhiaj nej ñûnj ràꞌ saj ûnꞌ.”
23 Hiôꞌ ni̱ gàtà gu̱nïn nej suj: “Nitaj àmàn giniꞌín nej suj mánj; gu̱xu̱n nej suj ma̱ꞌan nej suj riñânj, dadinꞌ huin nej suj sí giꞌhiaj sa kï̱j huaa.”
Sí giꞌhiaj dukuâ riñan huej e ni̱ sí giꞌhiaj dukuâ riñan hioꞌó chru̱u
24 ’Ahuin na̱nj guiì, gunïn nej nuguanꞌ nânj ni̱ dagahuin ninj, ni̱ giꞌhiâ si ga̱huin ninj dàj rûnꞌ huin ꞌngo̱ guiì ûta sàꞌ gayakaj guendâ, dadinꞌ giꞌhiaj ninj dukuâ ninj riñan huej e.
25 Ni̱ gamanꞌ gumàan ni̱ gaché kïn, ni̱ gaꞌhuij nanèe ni̱ gaganꞌanj ngà hueꞌ dânj; sani̱ nun ga̱na̱tu dadinꞌ nne ran yiꞌij riñan huej e.
26 Sani̱ ahuin na̱nj guiì gunïn nej nuguanꞌ nânj ni̱ nitaj si dagahuin ninj, ni̱ gi̱ꞌhiâ si ga̱huin ninj dàj rûnꞌ huin nej guiì naꞌhue ga̱na̱ka̱j guendâ, dadinꞌ giꞌhiaj ninj dukuâ ninj riñan hioꞌó chru̱u.
27 Ni̱ gamanꞌ gumàan ni̱ gaꞌnaꞌ kïn, ni̱ gaꞌhuij nanèe ni̱ ûta nùkuaj gaganꞌanj ngà hueꞌ dânj, ni̱ ganatu ni̱ ûta nìko rasu̱un girëꞌ giꞌhia dadinꞌ gàꞌ ꞌngo̱ gane daranꞌanj.