Sisi̱ si̱ gananikàj ruhuâ nej suj rayiꞌî si-ga̱kïnꞌ nej suj ni̱ ga̱ꞌa̱nj niꞌhia nej suj
13
Ni̱ huê gè diû nânj nikïnꞌ da̱ꞌa̱j nej sí dânj ni̱ ganataꞌ nej sôꞌ riñan Ma̱ꞌan Jesús,
dàj giranꞌ nej sí màn yumanꞌ Galilea nga dagahuiꞌ Pilato ni̱ dunachej sôꞌ tun nej sí dânj,
ngà tun nej yuku gaꞌhuiꞌ nej sôꞌ riñan Ma̱ꞌan Ñaꞌanj an.
2 Nanikàj Ma̱ꞌan Jesús,
ni̱ gata:
—Ganï̂n ruhuâ nej suj si nej sí galileo giranꞌ dànanj,
ni̱ gahuin nej sôꞌ sí ga̱kï̱nꞌ doj gàꞌ daꞌ aꞌngô da̱ꞌa̱j nej sí galileo ruhuâ nej suj nîꞌ.
3 Ñùnj taj:
Ni̱ sê danj huin mánj;
ni̱ sisi̱ si̱ nanikàj ruhuâ nej suj rayiꞌî si-ga̱kïnꞌ nej suj,
ni̱ gu̱ña̱n chre ni̱ ga̱ꞌa̱nj ni̱ꞌhia̱ daranꞌ nej suj.
4 Ganï̂n ruhuâ nej suj si nej sí ga̱kï̱nꞌ doj gahuin nej yi̱nu̱nꞌ huàꞌnï̀nj nej sí yìchràj gataꞌ hueꞌ yàkàn gane Siloé gàꞌ daꞌ nej sí màn yumanꞌ Jerusalén nîꞌ.
5 Ñùnj taj:
Ni̱ sê danj huin mánj;
ni̱ sisi̱ si̱ gananikàj ruhuâ nej suj rayiꞌî nej gakï̱nꞌ giꞌhiaj nej suj,
ni̱ gu̱ña̱n chre ni̱ ga̱ꞌa̱nj ni̱ꞌhia̱ daranꞌ nej suj.
Nuguanꞌ rán aꞌmin rayiꞌî chrun igû a̱tïn
6 Ni̱ gaꞌmin Ma̱ꞌan Jesús nuguanꞌ ráan ni̱ gata:
—Ganaꞌchrîj ꞌngo̱ sí dânj ꞌngo̱ chrun îgu ñan màn nej chrun uba,
ni̱ gaꞌnaꞌ nànàꞌhuìꞌ sôꞌ chruj îgu raa̱ chrun dânj,
sani̱ nu̱n gìrìꞌ sôꞌ gàꞌ si̱ ꞌngo̱ chruj îgu ya̱ sôꞌ raa̱ chrun dânj.
7 Ni̱ gataj sôꞌ gu̱nïn sí dugumîn nej chrun uba:
“Gàꞌ gisîj hioꞌ huàꞌnï̀nj ïn ꞌnaꞌ nànàꞌhuìj chruj îgu raa̱ chrun nânj,
sani̱ nitaj chruj îgu mân raj mánj;
ga̱ꞌne̱ꞌ chrun dan na̱nj ánj.
Nùnj huin saj ni̱ gudurëꞌ chre hioꞌóo ràꞌaj.”
8 Hiôꞌ ni̱ nanikàj sí dugumîn chrun îgu ni̱ gataj sôꞌ:
“Señor gu̱du̱nâj sòꞌ ga̱ne chrun îgu dan daꞌ hua̱ gè hioꞌ nan,
ni̱ gàn gànìkà yiꞌij,
ni̱ ga̱chrá aꞌnuj yiꞌij.
9 Ni̱ si neꞌ ña̱n doj ni̱ nitaj chruj îgu ga̱hiu raj,
ni̱ dùgùnàj huaj;
ni̱ gìyìꞌnej na̱nj ánj.”
Giꞌhiaj Ma̱ꞌan Jesús ganahuin ꞌngo̱ siyànàa gui ganarânj rûhua
10 Ni̱ huin gui ganarânj ruhuâ nga gidigân Ma̱ꞌan Jesús ruhuâ hueꞌ huin nûhui.
11 Ni̱ hiuj dânj nne ꞌngo̱ siyànàa ni̱ gàꞌ gisîj yi̱nu̱nꞌ huàꞌnï̀nj hioꞌo garaꞌhue̱ꞌ yiꞌìi siyànà dânj,
ni̱ hua̱ ni̱tu̱ yichrá siyànà dânj,
ni̱ gàꞌ si do̱j sînj naꞌhue ga̱na̱huin ni̱ka̱ yichrá siyànà dânj.
12 Ni̱ nga giniꞌin Ma̱ꞌan Jesús siyànà nânj,
ni̱ gakïn ni̱ gata:
Hia̱j ni̱ gàꞌ giyîꞌnej si-yìꞌìt.
13 Ni̱ gutaꞌ Ma̱ꞌan Jesús raꞌa yichrá siyànà dânj;
ni̱ ganahuin ni̱ka̱ yichra ni̱ gaꞌmin hueꞌej yiꞌî Ma̱ꞌan Ñaꞌanj an.
14 Sani̱ ginaꞌan ruhuâ sí aꞌnïnꞌ riñan hueꞌ huin nuhuî nne hiuj dânj,
guendâ giꞌhiaj Ma̱ꞌan Jesús si̱ ganahuin siyànà dânj ꞌngo̱ gui ganarânj rûhua,
ni̱ gataj sôꞌ gu̱nïn nej guiì màn hiuj dânj:
—Huàtànꞌ gui ga̱ꞌhue giꞌhiaj sunꞌ;
ni̱ nej gui dânj ga̱ꞌna̱ꞌ nej suj,
ni̱ ga̱ꞌhue ga̱na̱huin nej suj,
sani̱ gui ganarânj ruhuâ ni̱ si̱ gaꞌhue mánj.
15 Hiôꞌ ni̱ nanikàj Ma̱ꞌan Jesús,
ni̱ gata:
—Sí digañuꞌunj un huin nej suj na̱nj ánj.
Nitaj si ganachi daꞌ goꞌngo̱ nej suj dân nej suj rô ngà dân nej suj urruj u gui ganarânj rûhua guendâ du̱goꞌo nej suj nnee nej yôꞌ ràꞌ saj ûnꞌ.
16 Dadinꞌ siyànà nânj ni̱ dànanj huin doj gàꞌ daꞌ dân nej suj rô ngà dân nej suj urruj u dadinꞌ huin daꞌní sachij Abraham,
ni̱ gàꞌ gisîj yi̱nu̱nꞌ huàꞌnï̀nj hioꞌo gumînj sichre siyànà dan.
Ni̱ si̱ gaꞌhue ga̱na̱chí ni̱ gi̱yi̱ꞌne̱ yiꞌì àràꞌhuèꞌ man gui ganarânj ruhuâ ràꞌ saj ûnꞌ.
17 Nga gisîj gataj Ma̱ꞌan Jesús nej nuguanꞌ nânj,
ni̱ giriꞌ daranꞌ nej sí gunïnꞌ nngaj sinàꞌàj a;
sani̱ ûta ganahuin nìhiàꞌ ruhuâ nej gui yùmànꞌan rayiꞌî nej sa sàꞌ giꞌhiaj Ma̱ꞌan.
Nuguanꞌ rán aꞌmin rayiꞌî ka̱n kuej staj
18 Ni̱ gataj Ma̱ꞌanj Jesús:
—Ahuin si ngà ga̱ꞌhue ga̱ya̱ko̱ꞌ daꞌngaꞌa ngà Ma̱ꞌan Ñaꞌanj ni̱ka̱j su̱n riñunꞌ,
ni̱ ahuin si ngà ga̱ꞌhue gi̱ꞌhiaj gu̱ñu̱nꞌ ngà Ma̱ꞌan ràꞌaj.
19 Huaj dàj rûnꞌ hua ka̱n kuej staj,
ni̱ gidaꞌa ꞌngo̱ sí dânj ka̱n nânj ni̱ gaꞌanj gùnùn sôꞌ ña̱n màn aꞌngô da̱ꞌa̱j nej kuej huin siꞌhiaj sôꞌ;
ni̱ gachi ni̱ gahuin ꞌngo̱ chrun nìko ni̱ giꞌhiaj nej yataj aché yàtàꞌa sigï̂tï̀nj raꞌa chrun dânj.
Nuguanꞌ rán aꞌmin rayiꞌî chru dunuꞌmanꞌan
20 Nanikàj ñûn Ma̱ꞌan Jesús ni̱ gata:
—Ahuin si̱ ngà gi̱ꞌhiaj gùñànj dàj nikaj su̱n Ma̱ꞌan Ña̱ꞌa̱nj an ràꞌaj.
21 Huin dàj rûn huin chru dunuꞌmanꞌan,
ni̱ gidaꞌa ꞌngo̱ siyànàa chru dunuꞌman dânj ni̱ gachri huìj huàꞌnï̀nj daꞌngaꞌ giriñunꞌ chru arina ngà aꞌngô nej kïnj sàꞌa,
huê danj ni̱ gunuꞌmanꞌ daranꞌ kïnj dânj giꞌhia.
Chrej gàtï̀ïn
(Mt. 7:13-14, 21-23)
22 Ni̱ gachîn Ma̱ꞌan Jesús ñan nngaj nej yumanꞌ snàꞌànj an,
ni̱ ñan nngaj nej yumanꞌan,
ni̱ gidiganj riñan nej guiì,
ni̱ gachinj gaꞌan Jerusalén.
23 Ni̱ gataj ꞌngo̱ nej sí màn hiuj dânj gu̱nïn Ma̱ꞌan Jesús:
—Señor,
do̱j nï̀nꞌ nej guiì huin sa ga̱na̱ni̱n na̱nj nîꞌ.
Nanikàj Ma̱ꞌan Jesús ni̱ gata:
24 —Gi̱ꞌhiaj guesâ nej suj ga̱tu̱ nej suj riñan rahueꞌ hua̱ chruj riñan;
dadinꞌ ñùnj taj si ûta gàꞌì nej guiì ga̱nï̱n ruhuâ ga̱tu̱,
sani̱ si̱ ga̱ꞌhue ga̱tu̱ ninj mánj.
25 Neꞌ rùkù nga gàꞌ ganachi sí ni̱ka̱j ñuꞌunj hueꞌ dânj ni̱ ganarán sôꞌ riñan rahueꞌe,
ni̱ nga nikïnꞌ nej suj neꞌ ye̱ꞌe ni̱ gàyìꞌì nej suj ni̱ gi̱ta raꞌa nej suj riñan rahueꞌ dânj,
ni̱ ga̱ta̱j nej suj:
“Señor,
Señor,
ga̱na̱ꞌnï̱n Ma̱ꞌân rèꞌ riñan rahueꞌe ga̱tu̱ nej ñûnj.”
Ni̱ nànìkàj sôꞌ ni̱ ga̱ta̱j sôꞌ gu̱nïn nej suj:
“Nun niꞌín dànèꞌ ꞌna̱ꞌ nej suj mánj.”
26 Hiôꞌ ni̱ gàyìꞌì nej suj ni̱ ga̱ta̱j nej suj:
“Yâ nej ñûnj ni̱ goꞌo nej ñûnj ngà Ma̱ꞌân rèꞌ,
ni̱ gidigân Ma̱ꞌân rèꞌ si-nùguànꞌ Ma̱ꞌan Ñaꞌanj an ruhuâ raꞌhue huin yiñán nej ñûnj.”
27 Sani̱ ga̱ta̱j Ma̱ꞌan Señor gu̱nïn nej suj:
“Gàꞌ gatâ si nun niꞌín ahuin yumanꞌ huin nej suj;
ni̱ gu̱xu̱n daranꞌ nej suj ma̱ꞌan nej suj riñânj,
dadinꞌ huin nej suj guiì ga̱ninï̀nꞌ huaa.”
28 Ni̱ nga giniꞌin nej suj sisi̱ si̱ ga̱ꞌhue ga̱tu̱ nej suj ña̱n ni̱ka̱j su̱n Ma̱ꞌan Ñaꞌanj an ga̱ne nej suj,
hiôꞌ ni̱ gayiꞌì nej suj ni̱ gu̱du̱gue̱ꞌe nej suj ni̱ nda ya̱ ru̱j ña̱nꞌ nej suj,
dadinꞌ gi̱ni̱ꞌi̱n nej suj si ñan ni̱ka̱j su̱n Ma̱ꞌan Ñaꞌanj an nne Abraham,
Isaac,
Jacob,
ni̱ daranꞌ nej sôꞌ gataj dàj ga̱huin.
29 Dadinꞌ ga̱ꞌna̱ꞌ nej guiì màn neꞌ gisîj gui ni̱ neꞌ gatûj gui,
ni̱ ga̱ꞌna̱ꞌ nej guiì màn neꞌ yìchràj a ni̱ neꞌ ri̱ki ni̱ ga̱ꞌna̱ꞌ ga̱ne ninj yiꞌnḯn mesa ña̱n nne Ma̱ꞌan Ñaꞌanj an gi̱nikaj sunj.
30 Hiôꞌ ni̱ nej guiì nitaj nùnj huin riñan yumiguìi nânj ni̱ ga̱na̱huin ninj guiì si̱nï̱ïn riñan Ma̱ꞌan Ñaꞌanj an,
ni̱ nej guiì ni̱ka̱j sun yàkàan ruhuâ yumiguìi nânj ni̱ nitaj nùnj ga̱huin ninj riñan Ma̱ꞌan Ñaꞌanj an mánj.
Dugueꞌe Ma̱ꞌan Jesús niꞌin nej guiì màn ruhuâ yumanꞌ snàꞌànj Jerusalén
31 Ni̱ huê gè gui dânj guyumân da̱ꞌa̱j nej sí fariseo,
ni̱ gataj nej sôꞌ:
—Gu̱xu̱n ma̱ꞌânꞌ ni̱ ga̱ꞌa̱njꞌ,
dadinꞌ da̱gahuiꞌ Herodes sòꞌ ruhuâ sij na̱nj ánj.
32 Ni̱ gataj Ma̱ꞌan Jesús gu̱nïn nej sí dânj:
—Ga̱ꞌa̱nj nej suj,
ni̱ ga̱ta̱j nej suj gu̱nïn yune dânj:
“Gi̱ni̱ꞌhiajꞌ dadinꞌ hia̱j ngà aꞌhioj gìrìj nej nanè kï̱j hua̱a ruhuâ nimân nej guiì ni̱ gi̱ꞌhia si̱ ga̱na̱huin nej guiì aꞌnanꞌan,
ni̱ ga̱chi̱n huàꞌnï̀nj gui ni̱ ga̱na̱hui si-sùnj.”
33 Sani̱ ña̱ꞌa̱n huaj,
si gàchè si-chrê hia̱j ngà aꞌhioj ni̱ ga̱chi̱n aꞌhioj,
dadinꞌ nitaj si dùgùnàj huaj si gàhuìꞌ ꞌngo̱ sí yàngàꞌ gataj dàj ga̱huin nda ga̱nꞌ xi riñan yumanꞌ snàꞌànj Jerusalén mánj.
34 ’Jerusalén,
Jerusalén,
ûta gi̱ranꞌ sàñùnꞌ dadinꞌ dagahuiꞌ nej sôꞌ gataj dàj ga̱huin,
ni̱ garrûnꞌ hiëj nej sí ga̱ꞌnḯn Ma̱ꞌan Ñaꞌanj an guchiꞌ riñanꞌ.
Ûta gàꞌì ganï̂n ruhuâj na̱gi̱ꞌhiaj chre̱j nej daꞌnít,
dàj rûnꞌ giꞌhiaj nej yuchee nga ganachrîj nej xuj nej daꞌní nej xuj riki si-ga̱chi nej xuj sani̱ nun ga̱ꞌhue̱j ga̱ra̱n yinaꞌ mánj.
35 Huê danj ni̱ gùnàj dukuâ nej suj ni̱ nda dïnꞌïnj chre ga̱huin ruhuaj;
huê danj gatâ ni̱ si̱ giniꞌînꞌ ñùnj gàꞌ mánj,
nda gùyùmàn diû nga ga̱ta̱j nej suj:
“Ûta hueꞌê hua sa gi̱ꞌhiaj sa ga̱ꞌna̱ꞌ ngà siyu̱gui Ma̱ꞌan Señor.”