Giꞌhiaj Ma̱ꞌan Jesús ganahuin sí nnùn yiꞌì lepra
8
Nga gananinj Ma̱ꞌan Jesús raa̱ kïj dânj, ni̱ ûta gàꞌì nej guiì ginikòꞌ gaꞌnaꞌ rukû Ma̱ꞌan.
2 Ni̱ gaꞌnaꞌ ꞌngo̱ sí nnùn yiꞌì lepra ni̱ ganikïnꞌ rúdàkòj sôꞌ riñan Ma̱ꞌan, ni̱ gataj sôꞌ:
—Señor, si ruhuâ rèꞌ ni̱ ga̱ꞌhue gi̱ꞌhiâ rèꞌ si ga̱na̱huin sàꞌ nneè ku riñan yiꞌì nnùn ñùnj.
3 Ni̱ dunukuâ Ma̱ꞌan Jesús raꞌa ni̱ gaganꞌ raꞌa nneè kú sí dânj, ni̱ gata:
—Ruhuâj si ga̱na̱huin sàꞌ nneè kú raj. Huê danj ni̱ orâ chre ni̱ giyiꞌnêj yiꞌì lepra ni̱ ganahuin sàꞌ nneè kú sí dan.
4 Hiôꞌ ni̱ gataj Ma̱ꞌan Jesús gu̱nïn sí dânj:
—Niꞌhiaj sòꞌ ni̱ si̱ ganatâꞌ gu̱nïn gàꞌ si ꞌngo̱ guiì mánj; sani̱ ga̱ꞌa̱njꞌ ni̱ gi̱digânꞌ ma̱ꞌânꞌ riñan nej síchìj rej, ni̱ gàꞌhuìꞌ ꞌngo̱ ofrenda riñan Ma̱ꞌan Ñaꞌanj an dàj rûnꞌ gaꞌnïnꞌ su̱n Moisés, daꞌnga ni̱ giniꞌin nej sij sa sàꞌ giꞌhiaj Ma̱ꞌan Ñaꞌanj an ngàꞌ na̱nj ánj.
Giꞌhiaj Ma̱ꞌan Jesús ganahuin si-musû síchìj Senturión
5 Nga gatûj Ma̱ꞌan Jesús ruhuâ yumanꞌ Kapernaúm ni̱ gaꞌnaꞌ ꞌngo̱ sí stadû huin kapitán riñanj, ni̱ ûta àko gachín nìꞌhiaj sôꞌ,
6 ni̱ gataj sôꞌ:
—Señor, sí huin si musûj nngaj aꞌnanꞌ ñan nne dukuá, ni̱ naꞌhue gìsìkìꞌ nneè kú sij ni̱ ûta ranꞌ sa̱ñu̱n sij.
7 Ni̱ gataj Ma̱ꞌan Jesús:
—Gàꞌàn ni̱ gi̱ꞌhiâ ga̱na̱huin sij na̱nj ánj.
8 Nanikàj síchìj kapitán dânj ni̱ gataj sôꞌ:
—Señor, nitaj guèndàj si ga̱tu̱ Ma̱ꞌân rèꞌ ruhuâ dukuá, man si gàꞌnï̀nꞌ Ma̱ꞌân rèꞌ suun ni̱ ga̱na̱huin si-musû na̱nj ánj.
9 Dadinꞌ ñùnj ni̱ ni̱ka̱j ñuꞌûn riñan ꞌngo̱ yiꞌnïnꞌ nej síi, ni̱ ni̱ka̱j ñuꞌûn riñan nej stâdu; ni̱ gatâ gu̱nïn ꞌngo̱ sí dânj: Ga̱ꞌa̱nj sòꞌ ꞌngo̱ sun gàtà gu̱nïnꞌ ni̱ gaꞌanj sôꞌ; ni̱ gatâ gu̱nïn aꞌngô sôꞌ: Gu̱hua̱ꞌ sòꞌ ni̱ gaꞌnaꞌ sôꞌ; ni̱ gatâ gu̱nïn sí huin si-musûj: Gi̱ꞌhiá sòꞌ su̱n nânj gatâ gu̱nïn sôꞌ, ni̱ giꞌhiaj sôꞌ sun gatâ gu̱nïn sôꞌ.
10 Ni̱ nga gunïn Ma̱ꞌan Jesús nej nuguanꞌ nânj, ni̱ ûta gahuin ña̱ꞌanj ruhuaj ni̱ gata gu̱nïn nej sí ginikòꞌ rukuj:
—Yàngàꞌ hia nï̀nꞌ tâ ni̱ gàꞌ yumanꞌ Israel nun gànàrìꞌìj ꞌngo̱ sí guyumân ruhuâ nìko doj gàꞌ daꞌ sí nânj mánj.
11 Ni̱ gatâ gu̱nïn nej suj si ga̱ꞌna̱ꞌ ûta gàꞌì nej sí ꞌna̱ꞌ neꞌ gisîj gui ngà nej sí ꞌna̱ꞌ neꞌ gatûj gui, ni̱ ga̱ꞌa̱nj ga̱ne nej sij ngà Abraham, ngà Isaac ni̱ ngà Jacob ñan gi̱nikaj su̱n Ma̱ꞌan Ñaꞌanj nne yàtàꞌa;
12 sani̱ nej sí nun gùyùmàn ruhuâ ni̱ gàꞌnï̀nj Ma̱ꞌan Ñaꞌanj an ga̱ꞌa̱nj nej sôꞌ ñan hua̱ ru̱mi̱nꞌ neꞌ ye̱ꞌe; ni̱ hiuj dânj ga̱ne nej sij ni̱ gu̱du̱gue̱ꞌe nej sij ni̱ nda ya̱ rùj ñanꞌ nej sij.
13 Hiôꞌ ni̱ gataj Ma̱ꞌan Jesús riñan sí huin stadû Senturión:
—Gui̱j na̱nꞌ dukuât, ni̱ dàj rûnꞌ guyumân ruhuâꞌ, ni̱ huê danj gi̱ꞌhia. Ni̱ ganahuin sí huin si-musû sí dânj huê gè orâ nga gaꞌmin Ma̱ꞌan Jesús dànanj.
Giꞌhiaj Ma̱ꞌan Jesús ganahuin nni yìchèj Pedro
14 Gaꞌanj Ma̱ꞌan Jesús dukuâ Pedro, ni̱ giniꞌin si nngaj nni yìchèj sôꞌ riñan na, ni̱ nu̱n gachiꞌi sachij dânj.
15 Ni̱ gaganꞌ raꞌa Ma̱ꞌan Jesús sachij dânj, ni̱ giyîꞌnej gachiꞌi; ni̱ ganachi sachij dânj, ni̱ gunânj gi̱tsi ñûnꞌ riñan nej sij.
Giꞌhiaj Ma̱ꞌan Jesús si ganahuin ûta gàꞌì nej guiì
16 Ni̱ nga ꞌnaꞌ ga̱huin ru̱mi̱nꞌ ni̱ ni̱ka̱j nej sij ûta gàꞌì nej sí nu̱n nanè kï̱j ï huaa ruhuâ nimân gaꞌnaꞌ nej sij riñan Ma̱ꞌan Jesús, ni̱ ngà nuguanꞌan ni̱ girij daranꞌ nej nanè kï̱j huaa, ni̱ giꞌhia si ga̱na̱huin daranꞌ nej guiì aꞌnanꞌan;
17 daꞌnga ni̱ gisîj si-nùguànꞌ Ma̱ꞌan Ñaꞌanj an dàj rûnꞌ gataj Isaias, sôꞌ gataj dàj ga̱huin nga gaꞌmin sôꞌ: “Ni̱ huê Ma̱ꞌan gidaꞌa garaꞌhue̱ꞌ ñùnꞌ nga gininaj ruhuôꞌ, ni̱ ginika gaꞌan si-yìꞌìt.”
Nej guiì hua̱ ruhuâ gi̱nikòꞌ rukû Ma̱ꞌan Jesús
18 Ni̱ giniꞌin Ma̱ꞌan Jesús si nda ganikàj chre mân ûta gàꞌì nej guiì rukuj, ni̱ gaꞌnïnj suun ni̱ gata si gi̱nikaj nej sij ni̱ ga̱chinj ané duꞌhua dahue̱ dânj gaꞌan.
19 Ni̱ gaꞌnaꞌ ꞌngo̱ sí Maestrû niꞌin hueꞌê si-ley Ma̱ꞌan Ñaꞌanj an ni̱ gataj sôꞌ:
—Maestrûj ruhuâj gi̱nikòj rukû Maꞌân rèꞌ ni̱ gàꞌàn dànèꞌ gahuin ga̱ꞌa̱nj Ma̱ꞌân rèꞌ ni̱ gàꞌàn ngà Ma̱ꞌân rèꞌ.
20 Ni̱ gataj Ma̱ꞌan Jesús gu̱nïn sí dânj:
—Nej yune ni̱ hua̱ ñan ganarânj ruhuâ nej yôꞌ, nej yataj aché yàtàꞌa ni̱ hua̱ sigï̂tï̀nj ïn ginun nej yôꞌ; sani̱ ñùnj ni̱ nitaj dànèꞌ hua gùtàj ahuí mánj.
21 Ni̱ gataj aꞌngô sí ꞌna̱ꞌ ga̱huin chru̱un:
—Señor, ri̱ki̱ rèꞌ permisu ga̱ꞌa̱n ni̱ nga gahuiꞌ rê ni̱ gàchìnj sij ni̱ neꞌ rùkù ni̱ gàꞌnàj ni̱ gi̱nikó rukû Ma̱ꞌân rèꞌ.
22 Ni̱ gataj Ma̱ꞌan Jesús gu̱nïn sí dânj:
—Gi̱nikòꞌ sòꞌ rukú; ni̱ gu̱du̱nâj sòꞌ si nej sí gàꞌ gahuiꞌi ni̱ gàchìnꞌ nej sôꞌ sí gàꞌ gahuiꞌi na̱nj ánj.
Giꞌhiaj Ma̱ꞌan Jesús si giyichinꞌ si ga̱ꞌhuij nanè du̱ꞌhui ruhuâ nne ña̱ꞌa̱nj
23 Ni̱ gatûj Ma̱ꞌan Jesús ruhuâ barku, ni̱ ginikòꞌ nej sí ꞌna̱ꞌ ga̱huin chru̱n riñanj gaꞌanj nej sôꞌ rukuj.
24 Ni̱ ûta nùkuaj gaꞌhuij nanèe ruhuâ nne ña̱ꞌa̱nj ni̱ ûta nayumàn nne ña̱ꞌa̱nj giꞌhiaj nanèe ni̱ nda gachîn nnee yichrá barkû nu̱n nej sij huaj nej sij, sani̱ do̱ꞌ si atoj Ma̱ꞌan Jesús nga ruhuâ barkû.
25 Ni̱ gaꞌnaꞌ nej sí ꞌna̱ꞌ ga̱huin chru̱n riñan Ma̱ꞌan Jesús ni̱ ganari nej sôꞌ nnej e riñanj ni̱ gataj nej sôꞌ:
—Señor, gi̱ꞌhiaj Ma̱ꞌân rèꞌ si ga̱na̱ni̱n nêꞌ dadinꞌ ga̱na̱huij neꞌ gàhuìꞌ.
26 Nanikàj Ma̱ꞌan Jesús ni̱ gata:
—Nùnj huin saj ni̱ ûta yuꞌhuiꞌ nej suj ràꞌaj, aya̱ꞌ nej suj dadinꞌ do̱j nï̀nꞌ guyumân ruhuâ nej suj gàꞌ mánj.
Hiôꞌ ni̱ ganayumanj ni̱ dugunïn gàꞌìj nanèe ngà nne ña̱ꞌa̱nj, ni̱ dḯn chre gahuin nï̀nꞌ gàchràꞌ.
27 Ni̱ ûta gahuin ña̱ꞌanj ruhuâ nej sí huaj ruhuâ barkû dânj ni̱ gataj nej sôꞌ:
—Ahuin sí huin sí nânj dadinꞌ nej nanèe ngà nne ña̱ꞌa̱nj ni̱ gadagahuin ninj sa gaꞌmin sôꞌ ràꞌaj.
Riñan hioꞌó Gadara nne nej sí nu̱n sa kï̱j ï huaa ruhuâ nimân
28 Nga gachinj ané duꞌhua nne ña̱ꞌa̱nj riñan doꞌó nej sí gùꞌnàj gadarenos, ni̱ gaꞌnaꞌ huìj sí dânj ni̱ nu̱n nanè kï̱j huaa ruhuâ nimân nguèj sôꞌ ni̱ nne nguèj sôꞌ ñan gachinꞌ nej sij nej nîman, ni̱ ûta hu̱e nguèj sôꞌ ni̱ gàꞌ si ꞌngo̱ guiì nitaj si gachîn chrej hua̱j hiuj dânj.
29 Ni̱ gaguâj nùkuaj nguèj sôꞌ ni̱ gataj nguèj sôꞌ:
—Nùnj huin si gaj ruhuâ rèꞌ niꞌîn rèꞌ nguèj ñûnj, ràꞌaj Jesús, huê rèꞌ huin Daꞌní Ma̱ꞌan Ñaꞌanj an. Gaꞌnâꞌ rèꞌ neꞌ dànanj guendâ gi̱ꞌhiâ rèꞌ si gi̱ranꞌ sa̱ñu̱n nguèj ñûnj sani̱ hua nï̀nꞌ ga̱chin ga̱na̱huij diû na̱nj ánj.
30 Ni̱ nda anêj doj ñan nne nguèj sí dânj mân ûta gàꞌì yakáa ya nej yôꞌ.
31 Ni̱ gachín nìꞌhiaj nej sa kï̱j ï riñan Ma̱ꞌan Jesús ni̱ gataj ninj:
—Si gi̱ri̱ rèꞌ ga̱ꞌa̱nj nej ñûnj ruhuâ nimân nguèj sí nânj, ni̱ ri̱ki̱ rèꞌ permisu ga̱tu̱ nej ñûnj ruhuâ nimân nej yaká màn hiuj mánj.
32 Ni̱ gataj Ma̱ꞌan Jesús:
—Ga̱ꞌhue ga̱tu̱ nej suj.
Ni̱ gahui nej nanè kï̱j hua dânj ruhuâ nimân nguèj sí dânj; hiôꞌ ni̱ gaꞌanj ninj ni̱ gatûj daranꞌ ninj ruhuâ nimân nej yaká rìgì màn hiuj dânj ni̱ gunânj nej yôꞌ ni̱ gaꞌanj nej yôꞌ ñan ni̱kï̱nꞌ ꞌngo̱ huej yàkàan ni̱ guduninj nej yôꞌ ma̱ꞌan nej yôꞌ riñan ganee ni̱ gininj nej yôꞌ ruhuâ nne ña̱ꞌa̱nj, ni̱ nga gininj nej yôꞌ ruhuâ nnee ni̱ gahuiꞌ nej yôꞌ.
33 Ni̱ gunânj nej sí màn guduyâ nej yakáa ni̱ gaꞌanj nej sôꞌ ñan nngaj yumanꞌ snàꞌànj huin yiñán nej sôꞌ, ni̱ ganataꞌ nej sôꞌ daranꞌ nej sa giniꞌin nej sôꞌ gahuin hiuj dânj, ni̱ dàj giranꞌ nguèj sí ginun nanè kï̱j huaa ruhuâ nimân.
34 Ni̱ gahui daranꞌ nej guiì màn yumanꞌ snàꞌànj dânj ni̱ ganariꞌ duguiꞌ ninj ngà Ma̱ꞌan Jesús; ni̱ nga giniꞌin ninj Ma̱ꞌan Jesús, ni̱ gachín nìꞌhiaj ninj riñanj si gu̱xunj Ma̱ꞌan ni̱ ga̱ꞌa̱nj ane riñan doꞌó ninj.