Giꞌhiaj Ma̱ꞌan Jesús ganahuin si-musû sachij kapitán
7
Neꞌ rùkù nga gisîj gaꞌmin Ma̱ꞌan Jesús si-nùguànꞌ Ma̱ꞌan Ñaꞌanj an riñan nej guiì yumanꞌan,
ni̱ gatu ruhuâ yumanꞌ Kapernaúm.
2 Ni̱ aꞌnanꞌ ꞌngo̱ si-musû sí stadû kapitán,
ni̱ ûta ꞌì ruhuâ sôꞌ niꞌin sôꞌ sí dânj,
sani̱ do̱j gàchin ni̱ gàhuìꞌ sí dânj.
3 Ni̱ nga gunïn sí stadû kapitán si gununâ nej guiì rayiꞌî Ma̱ꞌan Jesús,
ni̱ gaꞌnḯn sôꞌ gaꞌanj da̱ꞌa̱j nej síchìj achij i huin judío,
guendâ ga̱ꞌa̱nj ga̱ꞌmi̱n àko nej sôꞌ riñan Ma̱ꞌan Jesús si gi̱ꞌhia sunuj u ni̱ gàꞌnaj ni̱ gi̱ꞌhia si̱ ga̱na̱huin si-musû sí nânj.
4 Ni̱ gaꞌnaꞌ nej síchìj nânj riñan Ma̱ꞌan Jesús ni̱ ûta àko gachín nìꞌhiaj nej sôꞌ ni̱ gataj nej sôꞌ:
—Gi̱ꞌhiá rèꞌ sunuj u ni̱ ga̱na̱huin si-musû sí nânj;
5 dadinꞌ ꞌì ruhuâ sij niꞌin sij nej guiì màn yiñûnꞌ,
dadinꞌ huê sij giꞌhiaj ꞌngo̱ hueꞌ nûhui hiuj nânj.
6 Ni̱ gaꞌanj Ma̱ꞌan Jesús ngà nej síchìj nânj,
sani̱ nga nï̀nꞌ gàchin gùchìꞌ nej sij ñan nne dukuâ stadû kapitán,
ni̱ gaꞌnḯn sôꞌ gaꞌanj nej sí ni̱ka̱j duguiꞌ ngà sôꞌ riñan Ma̱ꞌan Jesús ni̱ gataj nej sôꞌ:
—Señor,
si̱ giriñun ruhuâ Ma̱ꞌân rèꞌ,
dadinꞌ hia ni̱ nitaj guèndàj si ga̱tu̱ Ma̱ꞌân rèꞌ ruhuâ dukuá;
7 dadinꞌ gàꞌ niꞌín si sê sí sàꞌa huín rayiꞌî dânj ni̱ nun gùchìj riñan Ma̱ꞌân rèꞌ;
sani̱ ga̱ꞌnï̱nꞌ Ma̱ꞌân rèꞌ suun ni̱ ga̱ꞌhue ga̱na̱huin sí huin si-musûj.
8 Dadinꞌ ñùnj ni̱ huín ꞌngo̱ sí ni̱ka̱j suun,
ni̱ ni̱ka̱j sùnj riñan nej stâdu;
ni̱ gata gu̱nïn ꞌngo̱ sí dânj:
Gui̱j sòꞌ si-sùnj ni̱ huaꞌanj sôꞌ;
ni̱ gatâ gu̱nïn aꞌngô sí dânj:
Gu̱hua̱ꞌ sòꞌ ni̱ gaꞌnaꞌ sôꞌ;
ni̱ gatâ gu̱nïn sí huin si-musûj:
Gi̱ꞌhiâ sòꞌ sun nan ni̱ dagahuin sôꞌ sa gatâ gu̱nïn sôꞌ.
9 Ni̱ nga gunïn Ma̱ꞌan Jesús nej nuguanꞌ nânj,
ni̱ ûta gahuin ña̱ꞌanj ruhuaj niꞌin sí nânj,
ni̱ nani̱ka ni̱ gata gu̱nïn nej guiì nìkòꞌ rukuj:
—Yàngàꞌ hia nï̀nꞌ tâ ni̱ gàꞌ ruhuâ yumanꞌ Israel nun gànàrìꞌìj gàꞌ si̱ ꞌngo̱ nej guiì guyumân ruhuâ nìko doj dàj rûnꞌ guyumân ruhuâ sí nânj gàꞌ mánj.
10 Ni̱ nga nanikàj nej sí gaꞌanj riñan Ma̱ꞌan Jesús nanꞌ nej sôꞌ dukuâ stadû kapitán,
ni̱ gàꞌ ganahuin sí aꞌnanꞌ dânj nga gunukuiꞌ nej sôꞌ.
Giꞌhiaj Ma̱ꞌan Jesús ganaꞌnï̂nj daꞌnin naꞌu ꞌngo̱ yugûnꞌ yànà minj in
11 Gahuin nga gachin gui dânj,
ni̱ hua̱j Ma̱ꞌan Jesús yumanꞌ snàꞌànj gùꞌnàj Naín,
ni̱ ûta huaj nej sí ꞌna̱ꞌ ga̱huin chru̱un ngà Ma̱ꞌan,
ni̱ ûta gàꞌì nej guiì huaj nngaj.
12 Ni̱ nga guchiꞌ Ma̱ꞌan Jesús nìchrùnꞌ riñan rahueꞌ nu̱n riñan yumanꞌ snàꞌànj dânj,
ni̱ gàꞌ ata nej sôꞌ ꞌngo̱ nîman hua̱j nej sôꞌ guendâ ga̱ꞌa̱nj gàchìnꞌ nej sôꞌ ni̱ ꞌngo̱ rïn sí gàꞌ gahuiꞌ dânj huin riñan nni sôꞌ,
dadinꞌ siyànà minj in huin siyànà dânj;
ni̱ ûta gàꞌì nej guiì màn yumanꞌ snàꞌànj nânj ꞌna̱ꞌ ngà siyànà dânj.
13 Ni̱ nga giniꞌin Ma̱ꞌan Señor Jesús siyànà nânj,
ni̱ gananï̂n àko ruhuaj niꞌin siyànà dânj,
ni̱ gata gu̱nïn siyànà dânj:
—Si̱ gudugueꞌêꞌ mánj.
14 Ni̱ gaꞌanj nichì Ma̱ꞌan Jesús,
ni̱ gaganꞌ raꞌa chrún nu̱n nîman dânj;
ni̱ ganikïnꞌ nej sí ata chrún nu̱n nîman hiuj dânj.
Ni̱ gataj Ma̱ꞌan:
—Lâꞌuj gu̱nïn sòꞌ sa tâ ni̱ ga̱na̱chiꞌ râj.
15 Hiôꞌ ni̱ ganaꞌnï̂nj nimân dânj,
ni̱ gayiꞌij ni̱ gaꞌmin.
Huê danj ni̱ nagaꞌhuiꞌ Ma̱ꞌan Jesús sí nânj raꞌa nni sôꞌ.
16 Ni̱ ûta guyuꞌhuiꞌ daranꞌ nej guiì màn hiuj dânj,
ni̱ gaꞌmin hueꞌê ninj yiꞌî Ma̱ꞌan Ñaꞌanj an ni̱ gataj ninj:
—Ûta nìko hua ꞌngo̱ sôꞌ gataj dàj ga̱huin,
ganachinikaj Ma̱ꞌan Ñaꞌanj an siganï̂nj nêꞌ:
Ni̱ gaꞌnaꞌ gi̱ni̱ꞌhiaj Ma̱ꞌan Ñaꞌanj an yiñan.
17 Ni̱ gayaꞌnï̀n sa sàꞌ giꞌhiaj Ma̱ꞌan Jesús daꞌ hua̱ nï̀nꞌ gàchràꞌ riñan hioꞌó Judea,
ni̱ daꞌ hua̱ nï̀nꞌ gàchràꞌ riñan nej hioꞌó màn ganikàj rukû Judea.
Gaꞌnḯn Juan Bautista gaꞌanj gàchìnj naꞌanj nej sôꞌ gaꞌnaꞌ ga̱huin chru̱n riñan sôꞌ riñan Ma̱ꞌan Jesús
18 Ni̱ ganataꞌ nej sôꞌ gaꞌnaꞌ gahuin chru̱n riñan Juan daranꞌ nej sa giniꞌin nej sôꞌ.
Ni̱ gakḯn sôꞌ huìj sí gaꞌnaꞌ ga̱huin chru̱n riñan sôꞌ.
19 Ni̱ gaꞌnḯn sôꞌ gaꞌanj gàchìnj naꞌanj nguèj sí gaꞌnaꞌ ga̱huin chru̱n riñan sôꞌ Ma̱ꞌan Jesús ni̱ gataj nguèj sí dânj gu̱nïn Ma̱ꞌan Jesús:
Huê Ma̱ꞌân rèꞌ huin sí gaꞌnḯn Ma̱ꞌan Ñaꞌanj an ga̱ꞌna̱ꞌ riñan nej ñûnj nîꞌ,
si gànàꞌhuìj nej ñûnj ga̱ꞌna̱ꞌ aꞌngô síi sàꞌ.
20 Nga guyumân nguèj sí nânj riñan Ma̱ꞌan Jesús ni̱ gataj nguèj sôꞌ:
—Juan Bautista gaꞌnḯn gaꞌnaꞌ nguèj ñûnj riñan Maꞌân rèꞌ,
guendâ gàchìnj naꞌanj nguèj ñûnj Ma̱ꞌân rèꞌ:
Sòꞌ huin sa ga̱ꞌnaꞌ giꞌhiaj Ma̱ꞌan Ñaꞌanj an nîꞌ,
si gànàꞌhuìj nej ñûnj ga̱ꞌna̱ꞌ aꞌngô síi sàꞌ.
21 Ni̱ orâ dânj ni̱ giꞌhiaj Ma̱ꞌan Jesús ganahuin ûta gàꞌì nej guiì aꞌnanꞌan ni̱ nej guiì àràꞌhuèꞌ sa yìꞌìi,
ni̱ huê danj na̱nj ganahuin gàꞌì nej guiì àràꞌhuèꞌ nej nanè kï̱j hua̱a,
ni̱ gaꞌhue gi̱niꞌhiaj ûta gàꞌì nej sí du̱chri giꞌhiaj Ma̱ꞌan Jesús.
22 Ni̱ nanikàj Ma̱ꞌan Jesús ni̱ gata:
—Ga̱ꞌa̱nj nej suj,
ni̱ gànàtàꞌ nej suj gu̱nïn Juan sa giniꞌin nej suj ngà nej sa gunïn nej suj:
Ni̱ ganayigï̀n rune ñan nej sí du̱chri,
ni̱ gaché nej sí go̱chro̱j o,
ni̱ ganahuin sàꞌ nneè nej sí nnùn yiꞌì lepra,
ni̱ ganayiꞌnï̂nj ruhuâ rakïj nej sí sòꞌo,
ni̱ ganaꞌnï̂nj nej nîman,
ni̱ ganataꞌ nej sij si-nùguànꞌ Ma̱ꞌan Ñaꞌanj an riñan nej guiì gànìki.
23 Ni̱ ganahuin nìhiàꞌ ruhuâ sí nun nànìkàj rùkù nga gunïn sôꞌ sa gaꞌmînj.
24 Ni̱ nga gaꞌanj nguèj sí gaꞌnḯn Juan gaꞌnaꞌ,
ni̱ gayiꞌì Ma̱ꞌan Jesús gununaj rayiꞌî Juan riñan nej guiì màn hiuj dânj ni̱ gata:
—Ahuin sa giniꞌin nej suj nga gahui nej suj gaꞌanj nej suj riñan hioꞌó nàkòo ràꞌaj.
Giniꞌin nej suj ꞌngo̱ hio nagunanꞌ nanèe nîꞌ.
25 Sani̱.
Dàj hua sôꞌ giniꞌin nej suj ràꞌaj.
Ûta sàꞌ hua atsîj nu̱n sij nîꞌ.
Gi̱ni̱ꞌhiaj nej suj dadinꞌ nej sí nu̱n atsîj sàꞌ xi ni̱ nne nej sij ruhuâ hueꞌ ñan ni̱ka̱j su̱n ꞌngo̱ rey.
26 Sani̱.
Nga gahui nej suj gaꞌanj nej suj ni̱ ahuin sa giniꞌin nej suj ràꞌaj.
Giniꞌin nej suj ꞌngo̱ sôꞌ gataj dàj gahuin nîꞌ.
Yàngàꞌ,
hia nï̀nꞌ tâ,
si Juan ni̱ ni̱ka̱j sôꞌ sun yàkàn doj gàꞌ daꞌ aꞌngô nej sôꞌ gataj dàj gahuin.
27 Ni̱ huê rayiꞌî sí nânj huin sa taj riñan ñanj:
Hia̱j rûꞌhuaj,
ni̱ gàꞌnï̀n ga̱ꞌa̱nj si̱nï̱n ꞌngo̱ sí gu̱na̱nj gi̱tsi riñanꞌ ni̱ ga̱ꞌa̱nj si̱nï̱n sôꞌ neꞌ ña̱an riñanꞌ,
ni̱ sí nânj gi̱ꞌhiaj yu̱gui si-chrej Ma̱ꞌânꞌ.
28 Ni̱ gàtà,
si nej sí gaꞌnga riki nej siyànàa ni̱ nitaj aꞌngô sí gataj dàj gahuin huin ña̱n doj gàꞌ daꞌ Juan Bautista;
sani̱ Ma̱ꞌan sa hua̱ lij doj ni̱ dànanj ginika su̱n yàkàn doj riñan Juan gui nga gi̱nikaj su̱n Ma̱ꞌan Ñaꞌanj an na̱nj ánj.
29 Ni̱ nga gunïn daꞌ hua̱ gè yumanꞌan,
ngà daranꞌ nej sí gaꞌnêj sanꞌanj an,
ni̱ ganakaj guendâ nej sôꞌ si Ñaꞌanj an huin ꞌngo̱ sa ni̱ka̱a huê danj ni̱ gataꞌ nne nej sôꞌ dàj rûnꞌ gidigân Juan.
30 Sani̱ nej sí fariseo ngà nej sí gananï̂n rayiꞌî ley ni̱ nun ga̱na̱daꞌa nej sôꞌ nej chrej garanꞌ ruhuâ Ma̱ꞌan Ñaꞌanj an ga̱da̱gahuin nej sôꞌ ni̱ huê danj na̱nj nun ga̱ꞌhue̱j nej sôꞌ gàtàꞌ nne nej sôꞌ mánj.
31 Ni̱ gataj Ma̱ꞌan Señor:
—Ahuin si ngà,
ga̱ꞌhue ga̱ya̱ka̱j daꞌngá ngà nej guiì màn diû nânj,
ni̱ ahuin si ngà na̱gi̱ꞌhiaj gùñànj ninj ràꞌaj.
32 Ni̱ huin ninj dàj rûnꞌ giꞌhiaj nej silíj nne riñan raꞌhuee,
dadinꞌ aꞌmin nej sôꞌ riñan aꞌngô nej duguiꞌ nej sôꞌ ni̱ gataj nej sôꞌ:
“Gachrá nej ñûnj chraꞌa ngà rihiaa,
sani̱ nun gi̱ra̱nꞌa̱nj nej suj;
ni̱ gachrá nej ñûnj chraꞌ hua̱ rùguìꞌi sani̱ nun gu̱du̱gue̱ꞌe nej suj.”
33 Dadinꞌ gaꞌnaꞌ Juan Bautista,
ni̱ nun ya̱ sôꞌ rachrúun ni̱ nun go̱ꞌo̱ sôꞌ nne bino ni̱ gataj nej suj:
Sí nu̱n sa kï̱j ï ruhuâ nimân huin sôꞌ.
34 Ni̱ gaꞌná ni̱ yaj ni̱ goꞌoj,
ni̱ gataj nej suj:
Sí nânj ni̱ ûta gachîn gàꞌ yâ sôꞌ ni̱ gachîn gàꞌ goꞌo sôꞌ.
Ni̱ ni̱ka̱j duguiꞌ sôꞌ ngà nej sí gaꞌnêj sanꞌanj an ni̱ ni̱ka̱j duguiꞌ sôꞌ ngà nej sí giꞌhiaj gakï̱nꞌïn.
35 Sani̱ nej sa sàꞌ niꞌin sôꞌ,
huê nej sa sàꞌ dânj huin sa guruguiꞌ giꞌhiaj daranꞌ nej daꞌní sôꞌ.
Nne Ma̱ꞌan Jesús dukuâ Simón fariseo
36 Ni̱ gakḯn ꞌngo̱ sí fariseo si ga̱ꞌa̱nj Ma̱ꞌan Jesús ni̱ yaj ngà sôꞌ.
Ni̱ nga gatûj Ma̱ꞌan Jesús ruhuâ dukuâ sí fariseo,
ni̱ gaꞌanj ga̱ne rukû Mesa.
37 Hiôꞌ ni̱ gaꞌnaꞌ ꞌngo̱ siyànà nne ruhuâ yumanꞌ snàꞌànj nânj,
ni̱ gahuin siyànà dânj ꞌngo̱ siyànà gakï̱nꞌïn,
ni̱ nga gunïn si nne Ma̱ꞌan Jesús yiꞌnḯn mesa ruhuâ dukuâ sí fariseo,
ni̱ ginika ꞌngo̱ agaꞌ nu̱n nne gï̀nꞌ dàj a gaꞌnaj ña̱n nne Ma̱ꞌan Jesús.
38 Ni̱ nne siyànà dânj neꞌ rùkù Ma̱ꞌan Jesús nìchrùnꞌ yiꞌij,
ni̱ dugueꞌe ni̱ gayiꞌij ni̱ guta nne riñanj dakó Ma̱ꞌan Jesús,
ni̱ duna̱koj ngà duhuê ahui;
ni̱ gachrûn du̱ꞌhua,
ni̱ guta nne gï̀nꞌ da̱ꞌa̱j dakó Ma̱ꞌan Jesús.
39 Nga giniꞌin sí fariseo gakḯn hueꞌ ñan guchiꞌ Ma̱ꞌan Jesús,
dàj giꞌhiaj siyànà nânj ngà Ma̱ꞌan Jesús,
ni̱ gataj sôꞌ gu̱nïn ma̱ꞌan sôꞌ:
“Si huin sí nânj,
ꞌngo̱ sí gataj dàj ga̱huin,
ni̱ ga̱ꞌhue gi̱ni̱ꞌin sôꞌ dàj hua si-ga̱kïnꞌ siyànà nânj ni̱ gi̱niꞌin sôꞌ sun ꞌnï̱nj siyànà nânj,
dadinꞌ huin ꞌngo̱ siyànà gakï̱nꞌïn.”
40 Hiôꞌ ni̱ nanikàj Ma̱ꞌan Jesús,
ni̱ gata:
—Simón,
hua̱ ꞌngo̱ nuguanꞌan nika gàtà gu̱nïnꞌ râj.
Ni̱ gataj sí dânj:
—Ga̱ꞌhue ga̱ta̱j Ma̱ꞌân rèꞌ gu̱nḯn na̱nj Maestrûj.
41 Ni̱ gataj Ma̱ꞌan Jesús:
—ꞌNgo̱ sí dânj ni̱ sí guruguñuꞌunj sanꞌanj an huin sôꞌ ni̱ hua̱ huìj sí daꞌhui riñan sôꞌ,
ꞌngo̱ sí dânj daꞌhui ùnꞌùnꞌ sientu denario,
ni̱ aꞌngô sí dânj daꞌhui huìj xia chiꞌ denario riñan sôꞌ.
42 Sani̱ nitaj sanꞌanj an riñan nguèj sôꞌ guendâ na̱ru̱ꞌhue nguèj sôꞌ riñan sí guruguñuꞌunj sanꞌanj an riñan nguèj sôꞌ,
ni̱ ginikaj sí yiruꞌhue dânj nimân nìko ngà nguèj sí dânj.
Ni̱ gataj Ma̱ꞌan Jesús riñan Simón.
Ga̱ta̱j sòꞌ ahuin goꞌngo̱ nguèj sí nânj ga ꞌì doj ruhuâ niꞌin sí yiruꞌhuê dânj staj.
43 Nanikàj Simón,
ni̱ gataj sôꞌ:
—Anï̂n ruhuâj si ga ꞌì doj ruhuâ sí gadaꞌhui nìko riñan sí yiruꞌhue dânj.
Huê danj ni̱ gataj Ma̱ꞌan Jesús:
—Ûta hueꞌê ganakaj guendâꞌ na̱nj ánj.
44 Huê danj ni̱ nanikàj Ma̱ꞌan Jesús ni̱ giniꞌhia riñan siyànà nânj,
hiôꞌ ni̱ gata gu̱nïn Simón sí fariseo:
—Niꞌînꞌ dàj giꞌhiaj siyànà nânj ngàj nîꞌ.
Dadinꞌ gatû ruhuâ dukuât,
sani̱ nun ri̱ki̱ꞌ nnee gu̱ta̱ dakô;
sani̱ siyànà nânj ni̱ ganaꞌnïnj nne rune ñanj dakô,
ni̱ duna̱koj ngà duhuê ahui dakô.
45 Ni̱ nun ga̱chru̱n duꞌhuâꞌ yiꞌnḯn riñânj;
sani̱ siyànà nânj,
ni̱ àsìj nga gatû ruhuâ dukuât ni̱ nitaj àmàn giyichinꞌ ruhuaj si ga̱chru̱n du̱ꞌhua dakô mánj.
46 Ni̱ nun gu̱ta̱ꞌ nne gasîti ahuí;
sani̱ siyànà nânj ni̱ guta nne gï̀nꞌ da̱ꞌa̱j nguèj dakô.
47 Rayiꞌî dan ni̱ gatâ gu̱nïnꞌ si gàꞌ na̱du̱rëꞌë́ daranꞌ nej si-ga̱kïnj,
dadinꞌ ûta ganahuin ꞌì ruhuaj niꞌin ñùnj;
sani̱ sí riñan do̱j gi̱nika nimân nìko,
ni̱ do̱j ga̱na̱huin ꞌì ruhuâ sôꞌ niꞌin sôꞌ ñùnj.
48 Ni̱ gataj Ma̱ꞌan Jesús gu̱nïn siyànà dânj:
—Ni̱ gàꞌ ginika nimân nìko rayiꞌî nej si-ga̱kï̂nt na̱nj ánj.
49 Ni̱ gayiꞌì nej sí nne rukû mesa ngà Ma̱ꞌan Jesús,
ni̱ gaꞌmin nej sôꞌ ngà ma̱ꞌan nej sôꞌ ni̱ gataj nej sôꞌ:
—Ahuin sí huin nânj,
ni̱ ga̱ꞌhue gi̱ni̱kaj sôꞌ nimân nìko rayiꞌî si-ga̱kïnꞌ nej guiì ràꞌaj.
50 Ni̱ gataj Ma̱ꞌan Jesús gu̱nïn siyànà nânj:
—Guendâ guyumân ruhuâꞌ ni̱ rayiꞌî dan ni̱ gananinꞌ,
ni̱ ga̱ dïnꞌïnj ruhuâꞌ ni̱ na̱nꞌ dukuât na̱nj ánj.