Nej musû aꞌnanꞌ chre
12
Hiôꞌ ni̱ gayiꞌì Ma̱ꞌan Jesús gaꞌmin nuguanꞌ ráan ni̱ gata:
—ꞌNgo̱ sí dânj ni̱ ganachrîj sôꞌ gàꞌì chrun uba,
ni̱ giꞌhiaj sôꞌ yingâ ganikàj sôꞌ rukû nej chrun uba,
ni̱ giꞌhiaj yu̱gui sôꞌ ꞌngo̱ hiuꞌuj u ñan ga̱nïn sôꞌ chruj uba,
ni̱ giꞌhiaj sôꞌ ꞌngo̱ hueꞌ yàkàan.
’Ni̱ girïꞌïnj sôꞌ riñan ꞌngo̱ nej sí giꞌhiaj sun,
ni̱ gahui sôꞌ ni̱ gaꞌanj gànꞌ sôꞌ.
2 Ni̱ nga guyumân diû ga̱ne chruj uba ni̱ gaꞌnḯn sí yi̱ruꞌhue dânj ꞌngo̱ sí huin si-musû sôꞌ gaꞌnaꞌ riñan nej sí giꞌhiaj suun,
ni̱ ꞌna̱ꞌ sôꞌ guendâ ga̱na̱huin ra̱ꞌa sôꞌ nej chruj uba riñan sí ri̱ña̱n girïꞌïnj sôꞌ.
3 Sani̱ gidaꞌa nej sí màn giꞌhiaj sun hiuj dânj sí huin si-musû sí yi̱ruꞌhue dânj,
ni̱ gaꞌhuiꞌ nej sôꞌ niꞌhiaj sí dânj,
ni̱ ganaꞌnḯn nej sôꞌ nanꞌ sí dânj ni̱ nitaj nùnj ginikaj sôꞌ huaj nanꞌ sôꞌ riñan si-yi̱ruꞌhue sôꞌ.
4 Ni̱ gaꞌnḯn ñûn sí yiruꞌhue dânj gaꞌanj aꞌngô sí huin si-musû sôꞌ;
sani̱ garrûn nej sij hiëj sí dânj ni̱ giranꞌ yiꞌì ahui sôꞌ,
ni̱ ganaꞌnï̂n nej sij nanꞌ sôꞌ ni̱ nun ga̱ꞌmi̱n hueꞌê nej sij riñan sôꞌ.
5 Ni̱ gaꞌnḯn ñûn sí yi̱ruꞌhue dânj gaꞌanj aꞌngô mûsu sani̱ da̱gahuiꞌ nej sij sôꞌ;
ni̱ huê danj na̱nj giꞌhiaj nej sij ngà aꞌngô nej sôꞌ,
ni̱ gaꞌhuiꞌ nej sij niꞌhiaj aꞌngô da̱ꞌa̱j nej sôꞌ ni̱ aꞌngô da̱ꞌa̱j nej sôꞌ dagahuiꞌ nej sij.
6 ’Ni̱ hua̱ ꞌngo̱ rïn daꞌní sí yi̱ruꞌhue dânj,
ni̱ ûta ꞌì ruhuâ sôꞌ niꞌin sôꞌ daꞌní sôꞌ,
ni̱ nda neꞌ rùkù nï̀nꞌ ni̱ gaꞌnḯn sôꞌ gaꞌanj daꞌní sôꞌ riñan nej sí dânj ni̱ gataj sôꞌ:
“Gi̱nikaj chre̱j nej sij ngà da̱ꞌnin na̱nj ánj.”
7 Sani̱ gataj nej sí giꞌhiaj sun si-su̱n sí yi̱ruꞌhue nânj:
“Sí nânj huin sí ga̱na̱huin ra̱ꞌa daranꞌ nej rasu̱n huin siꞌhiaj Rej sôꞌ nga nne síchìj dânj gàhuìꞌ sôꞌ.
Ni̱ ga̱ꞌna̱ꞌ nej suj ni̱ da̱gahuiꞌ nêꞌ sij,
ni̱ nej rasu̱n ga̱na̱huin ra̱ꞌa sij ni̱ ga̱na̱huin siꞌhiaj nêꞌ nej rasu̱n dânj.”
8 Ni̱ gidaꞌa nej sij daꞌní sí yi̱ruꞌhue dânj ni̱ dagahuiꞌ nej sij sôꞌ,
ni̱ gi̱rë̱ꞌë̱j nej sij neꞌ ye̱ꞌ ñan màn nej chrun uba sôꞌ.
9 Hiôꞌ ni̱ gachín naꞌanj Ma̱ꞌan Jesús:
—Ni̱ nùnj huin si gi̱ꞌhiaj sí huin siꞌhiaj nej chrun uba dânj ràꞌaj.
Ga̱ꞌna̱ꞌ sôꞌ ni̱ du̱nahuij sôꞌ nej sí giꞌhiaj sun riki nej chrun uba,
ni̱ nàgàꞌhuìꞌ sôꞌ nej chrun uba dânj raꞌa aꞌngô nej síi.
10 ’Ni̱ nun ga̱hia̱ nej suj dàj taj riñan ñanj rayiꞌî nuguanꞌ nânj ràꞌ saj ûnꞌ:
Hiëj gudunâj nej sí giꞌhiaj sun hueꞌe,
gaꞌnaj ni̱ huej huin hiëj si̱nï̱n nne sikûj hueꞌe.
11 Ma̱ꞌan Ñaꞌanj an huin sa giꞌhiaj nej nânj,
ni̱ ûta gahuin ña̱ꞌanj ruhuâ nej suj nga giniꞌin nej suj na̱nj nî.
12 Ni̱ ûta huin ruhuâ nej sij gi̱daꞌa nej sij Ma̱ꞌan Jesús,
dadinꞌ garânj daꞌngaꞌ ruhuâ nej sij si rayiꞌî nej sij gaꞌmin Ma̱ꞌan nuguanꞌ rán nânj;
sani̱ yuꞌhuiꞌ nej sij niꞌin nej sij nej guiì rigìi ni̱ gudunâj nej sij Ma̱ꞌan ni̱ gaꞌanj nej sij.
Gaꞌmin Ma̱ꞌan Jesús rayiꞌî sanꞌanj kuestu
13 Ni̱ gaꞌnḯn nej sij gaꞌanj da̱ꞌa̱j nej sí fariseo ngà da̱ꞌa̱j nej sí herodianos,
guendâ ruhuâ nej sij gànàrìꞌ nej sij ꞌngo̱ nuguanꞌ ga̱che̱j ga̱ꞌmi̱n Ma̱ꞌan Jesús.
14 Ni̱ gaꞌnaꞌ nej sôꞌ ni̱ gataj nej sôꞌ:
—Maestrûj,
niꞌin nej ñûnj si daranꞌ diû ni̱ gaꞌmin Ma̱ꞌân rèꞌ nuguanꞌ yàngàꞌa,
ni̱ nitaj si guyuꞌhuiꞌ Ma̱ꞌân rèꞌ riñan gàꞌ si ꞌngo̱ nej síi,
dadinꞌ nitaj si niꞌhiaj Ma̱ꞌân rèꞌ dàj hua neꞌ ye̱ꞌ nej síi,
dadinꞌ giniꞌhiaj Ma̱ꞌân rèꞌ dàj hua ruhuâ nimân nej sij,
ni̱ gidigân Ma̱ꞌân rèꞌ si-chrej yàngàꞌ Ma̱ꞌan Ñaꞌanj an.
Ni̱ dùgùnàj huaj na̱ruꞌhueꞌ sanꞌanj an riñan César nîꞌ si nitaj si dùgùnàj huaj sàꞌ.
Ga̱ꞌhue gu̱ruꞌhue nej ñûnj nîꞌ sisi̱ si̱ gaꞌhue gu̱ruꞌhue nej ñûnj sàꞌ.
15 Sani̱ garânj daꞌngaꞌ ruhuâ Ma̱ꞌan Jesús niꞌin sisi̱ si̱ gidigañuꞌunj un nej sí dânj niꞌin nej sôꞌ Ma̱ꞌan ni̱ gata gu̱nïn nej sôꞌ:
—Nùnj huin saj ni̱ gayakaj nej suj daꞌngaꞌa ngàj ràꞌaj.
Gi̱nikaj nej suj ꞌngo̱ denario ga̱ꞌna̱ꞌ nej suj ni̱ gi̱niꞌhiâ dàj huaj.
16 Ni̱ gaꞌhuiꞌ nej sí dânj ꞌngo̱ sanꞌanj denario raꞌa Ma̱ꞌan Jesús;
ni̱ gata gu̱nïn nej sôꞌ:
—Ahuin sí ñan du̱ꞌhua ni̱ ahuin sí siyu̱gui nnûn riñan sanꞌanj nânj ràꞌaj.
Ni̱ gataj nej sij:
—Ñan duꞌhua César nnûn riñanj na̱nj ánj.
17 Nanikàj Ma̱ꞌan Jesús ni̱ gata gu̱nïn nej sí dânj:
—Nàgàꞌhuìꞌ nej suj raꞌa César sanꞌanj huin siꞌhiaj César,
ni̱ nàgàꞌhuìꞌ nej suj riñan Ma̱ꞌan Ñaꞌanj an sanꞌanj huin siꞌhiaj Ma̱ꞌan Ñaꞌanj an.
Ni̱ gahuin ña̱ꞌanj ruhuâ nej sij nga gunïn nej sij nej nuguanꞌ gaꞌmin Ma̱ꞌan Jesús.
Gachín naꞌanj nej sij si gànàꞌnï̀nj nej nîman
18 Hiôꞌ ni̱ gaꞌnaꞌ nej sí saduseo riñan Ma̱ꞌan Jesús,
dadinꞌ gataj nej sôꞌ si nitaj si ganaꞌnï̂nj nej nîman ni̱ gachín naꞌanj nej sôꞌ ni̱ gataj nej sôꞌ:
19 —Maestrûj,
gachrûn Moisés riñan nej ñûnj ni̱ gataj sôꞌ si hua̱ ꞌngo̱ nej sí gahuiꞌ dinḯn ni̱ gunâj nika sí dânj,
sani̱ nitaj daꞌní sôꞌ ga ngà siyànà gahuin nika sôꞌ ni̱ ga̱ꞌhue ga̱na̱ka̱j dinḯn sôꞌ siyànà minj dânj,
daꞌnga ni̱ ga̱ꞌnga̱ daꞌní sí dânj ni̱ ga̱na̱huin ña̱n silíj dânj riñan sí gàꞌ gahuiꞌi.
20 Ga chi̱j dìnï̀nj sí dânj;
ni̱ gayakaj sí yàhuàꞌa nika sôꞌ;
sani̱ gahuiꞌ sôꞌ:
Ni̱ nun ga̱ daꞌní sôꞌ ngà nika sôꞌ.
21 Ni̱ ganakaj dinḯn sôꞌ sí huìj i siyànà gunâj dânj,
ni̱ huê danj na̱nj gahuiꞌ sí dânj ni̱ nun ga̱ daꞌní sôꞌ ngà siyànà dânj;
ni̱ ganakaj dinḯn sôꞌ sí huàꞌnï̀nj ïn siyànà dânj,
ni̱ gahuiꞌ sí dânj ni̱ nun ga̱ daꞌní sôꞌ ngà siyànà dânj.
22 Ni̱ gane nej chi̱j dìnï̀nj sôꞌ ngà siyànà dânj huê danj ni̱ gahuiꞌ nej sôꞌ,
ni̱ nun ga̱ daꞌní nej sôꞌ ngà siyànà minj dânj;
ni̱ neꞌ rùkù nga gisîj gahuiꞌ daranꞌ nej sôꞌ ni̱ gahuiꞌ siyànà dânj.
23 Nga gànàꞌnï̀nj nej nîman ni̱ nga gànàꞌnï̀nj nej sij,
ahuin goꞌngo̱ nej dìnï̀nj sí nânj ga̱huin hia nika siyànà nânj ràꞌaj.
24 Hiôꞌ ni̱ nanikàj Ma̱ꞌan Jesús ni̱ gata gu̱nïn nej sij:
—Nun niꞌin nej suj sa aꞌmin nej suj rayiꞌî nej nânj,
ni̱ nun niꞌin nej suj dàj taj si-nùguànꞌ Ma̱ꞌan Ñaꞌanj an,
ni̱ dàj nùkuaj hua Ma̱ꞌan Ñaꞌanj an ràꞌ saj ûnꞌ.
25 Dadinꞌ nga gànàꞌnï̀nj nej sij siganï̂nj nej nîman,
ni̱ si̱ gayakaj nej sij nika nej sij ni̱ gàꞌ si̱ garan ra̱ꞌa nej sij mánj,
dadinꞌ ga̱ nej sij dàj rûnꞌ hua nej ángel màn neꞌ yàtàꞌa.
26 Sani̱ rayiꞌî guendâ gànàꞌnï̀nj nej nîman.
Ni̱ nun ga̱hia̱ nej suj riñan librû gachrûn Moisés ni̱ gu̱nïn nej suj dàj gataj Ma̱ꞌan Ñaꞌanj an nga gaꞌmin riñan koj tanj an mínj:
“Ñùnj huin Daꞌanj Abraham,
ni̱ huê huin Daꞌanj Isaac ni̱ huê huin Daꞌanj Jacob.”
27 Ma̱ꞌan Ñaꞌanj an ni̱ sê Daꞌanj nej nîman huin mánj,
dadinꞌ huej huin Daꞌanj nej guiì hua̱ nìꞌnàꞌa;
sani̱ nun niꞌin nej suj dàj taj si-nùguànꞌ Ma̱ꞌan Ñaꞌanj an mánj.
Sun nìko giyiꞌnïn su̱n giꞌhiaj Ma̱ꞌan Ñaꞌanj an
28 Ni̱ gunïn ꞌngo̱ sí chru̱n ley,
si gaꞌmin chìꞌ nej sij rayiꞌî nej nuguanꞌ nânj,
ni̱ giniꞌin sôꞌ si ûta hueꞌê dunanikàj Ma̱ꞌan Jesús nuguanꞌan riñan nej sí nânj,
ni̱ gachín naꞌanj sôꞌ ni̱ gataj sôꞌ:
—Ahuin nuguanꞌ huin sa si̱nï̱n giyiꞌnïnꞌ su̱n riñan si-ley Ma̱ꞌan Ñaꞌanj an ràꞌaj.
29 Nanikàj Ma̱ꞌan Jesús ni̱ gata:
—ꞌNgo̱ nuguanꞌ si̱nï̱n huin ña̱n riñan daranꞌanj huin nânj:
“Gu̱nïn sòꞌ Israel;
dadinꞌ Ma̱ꞌan Señor huin Duꞌunꞌ,
Ma̱ꞌan Señor ni̱ ꞌngo̱ rïn huin.
30 Ni̱ ga̱ ꞌì ruhuâꞌ niꞌînꞌ Ma̱ꞌan Señor huin Daꞌanjt ngà daranꞌ nimânt ni̱ ngà daranꞌ ma̱ꞌan nimant ni̱ ngà daranꞌ daꞌngaꞌ ni̱ ngà daranꞌ sa hua̱ nùkuaj nneè kút.”
Huê nânj huin nuguanꞌ si̱nï̱n giyiꞌnïnꞌ su̱n.
31 Ni̱ nuguanꞌ ꞌna̱ꞌ neꞌ rùkùu hua dàj rûnꞌ hua nuguanꞌ si̱nï̱n nânj:
“Ga̱ ꞌì ruhuâꞌ niꞌînꞌ nej duguît dàj rûnꞌ ꞌì ruhuâꞌ niꞌînꞌ ma̱ꞌânꞌ.”
Ni̱ nitaj aꞌngô nuguanꞌ giyiꞌnïnꞌ su̱n hua nìko doj gàꞌ da̱ꞌ nguèj nuguanꞌ nânj mánj.
32 Hiôꞌ ni̱ gataj sí chru̱n ley:
—Dùgùnàj hua sa gataj rèꞌ na̱nj Maestrûj,
sa yàngàꞌa huin sa gataj rèꞌ,
dadinꞌ ꞌngo̱ rïn Ma̱ꞌan Ñaꞌanj an huin ni̱ nitaj aꞌngô Ñaꞌanj an hua gàꞌ mánj;
33 ni̱ ga̱ ꞌì ruhuôꞌ ngà daranꞌ nimûnt,
ni̱ ngà daranꞌ sa garânj daꞌngaꞌ ruhuôꞌ,
ni̱ ngà daranꞌ ma̱ꞌan nimûnt,
ni̱ nga daranꞌ sa nùkuaj hua riñan nneè kuꞌ,
ni̱ ga̱ ꞌì ruhuôꞌ niꞌînꞌ nej duguîꞌ dàj rûnꞌ ꞌì ruhuôꞌ niꞌînꞌ mu̱ꞌûnꞌ ni̱ dànanj nìko doj huin gàꞌ daꞌ si da̱gahuiꞌ ûta gàꞌì nej yuku gàꞌhuìꞌ riñan Ma̱ꞌan Ñaꞌanj an na̱nj ánj.
34 Hiôꞌ ni̱ giniꞌin Ma̱ꞌan Jesús si ûta sàꞌ ganataꞌ sí nânj nuguanꞌan riñanj ni̱ gata gu̱nïn sôꞌ:
—Nitaj si hua̱j gànꞌ nìkoꞌ guendâ ga̱tu̱ꞌ ñan ni̱ka̱j su̱n Ma̱ꞌan Ñaꞌanj an mánj.
Huê danj ni̱ nitaj gàꞌ si ꞌngo̱ síi huin ruhuâ gàchìnj naꞌanj Ma̱ꞌan Jesús gàꞌ mánj.
Ahuin si Da̱ꞌni̱nj huin Ma̱ꞌan Cristo ràꞌaj
35 Ni̱ gidigân Ma̱ꞌan Jesús riñan nej guiì ruhuâ hueꞌ huin nûhui nìko ni̱ gata:
—Nùnj huin saj ni̱ gataj nej sí chru̱n ley si Ma̱ꞌan Cristo huin daꞌní David ràꞌaj.
36 Dadinꞌ gaꞌmin David giꞌhiaj Ma̱ꞌan Espíritu Santo:
Gataj Ma̱ꞌan Ñaꞌanj an gu̱nïn Ma̱ꞌan si-Señoj:
“Ga̱ne Ma̱ꞌân rèꞌ raꞌá neꞌ huàꞌàj,
nda gu̱nu̱kua gùchrù ga̱ꞌa̱nj gi̱ngaj nej sí unïnꞌ ngà Ma̱ꞌân rèꞌ riki dakó Ma̱ꞌân rèꞌ.”
37 Ni̱ si du̱gûꞌnàj David Señor;
hiôꞌ ni̱ ga̱ꞌhue,
ga̱huin daꞌní sij na̱nj nîꞌ.
Ni̱ ûta gahuin nìhiàꞌ ruhuâ nej guiì rigì màn hiuj dânj nga gunïn ninj nej nuguanꞌ gaꞌmin Ma̱ꞌan Jesús.
Gununâ Ma̱ꞌan Jesús rayiꞌî nej sa aꞌnanꞌ giꞌhiaj nej maestrû chru̱n ley ngà nej fariseo
38 Ni̱ gataj Ma̱ꞌan Jesús nga gidiganj nej yìꞌnï̀nꞌ nuguanꞌ gidiganj:
—Ga̱ gu̱dadû nej suj ngà nej sí chru̱n ley,
dadinꞌ ûta garanꞌ ruhuâ nej sôꞌ gi̱nun nej sôꞌ atsîj ye̱ꞌe gininj nda yihiâ yiꞌî nej sôꞌ,
ni̱ garanꞌ ruhuâ nej sôꞌ si ga̱chru̱n duꞌhua nej guiì raꞌa nej sôꞌ nga huaj nej sôꞌ ñan hua̱ rahueꞌee,
39 ni̱ garanꞌ ruhuâ nej sôꞌ ga̱ne nej sôꞌ riñan chrun yilâ ni̱kï̱nꞌ dukuán neꞌ ña̱an ruhuâ hueꞌ huin nûhui,
ni̱ garanꞌ ruhuâ nej sôꞌ ga̱ne nej sôꞌ riñan chrun yilâ ni̱kï̱nꞌ neꞌ ña̱n ñan huin nihia stiꞌnï̀ïn;
40 Ni̱ ganahuij nï̀nꞌ nej rasu̱n huin siꞌhiaj nej siyànà minj in gaꞌnêj nej sôꞌ,
ni̱ mân si giꞌhiaj nej sôꞌ si ûta ye̱ꞌe gaꞌmin nej sôꞌ ngà Ma̱ꞌan Ñaꞌanj an.
Nej sí giꞌhiaj dànanj ni̱ ûta nìko kastîgu ga̱na̱huin ra̱ꞌa nej sôꞌ.
Ofrenda gaꞌhuiꞌ siyànà mi̱nj in
41 Ni̱ nne Ma̱ꞌan Jesús nda neꞌ ña̱n ñan tàj chrún gaꞌnḯn nej guiì sanꞌanj an riñan Ma̱ꞌan Ñaꞌanj an,
ni̱ nne niꞌhia dàj giꞌhiaj nej guiì yumanꞌan nga gaꞌnḯn ninj sanꞌanj an ruhuâ chrún dânj;
ni̱ ûta nìko sanꞌanj an gaꞌnḯn ûta gàꞌì nej sí yi̱ruꞌhuee.
42 Ni̱ gaꞌnaꞌ ꞌngo̱ yugûnꞌ yànà minj in ni̱ ûta àko ranꞌ ñûnꞌ sani̱ gaꞌnḯn ñûnꞌ huìj pesu,
ruhuâ chrún tàj hiuj dânj ni̱ nguèj pesu nânj huin sanꞌanj gùꞌnàj cuadrante.
43 Hiôꞌ ni̱ gakḯn Ma̱ꞌan Jesús nej sí ꞌna̱ꞌ ga̱huin chru̱n riñanj ni̱ gata gu̱nïn nej sôꞌ:
—Yàngàꞌ hia nï̀nꞌ gàtà,
ni̱ siyànà minj nânj huin ꞌngo̱ sa ranꞌ àko sani̱ dànanj nìko doj sanꞌanj an gaꞌnïn ruhuâ chrún nânj gàꞌ daꞌ daranꞌ nej guiì gaꞌnḯn sanꞌanj an ruhuâ chrún nânj;
44 dadinꞌ daranꞌ nej guiì gaꞌnḯn sanꞌanj an ruhuâ chrún nânj,
ni̱ man sanꞌanj gunâj riñan ninj huin;
sani̱ siyànà nânj huin ꞌngo̱ sa ranꞌ àko sani̱ gaꞌnïn daranꞌ sanꞌanj ni̱ka,
ni̱ sanꞌanj nânj ga̱huin sanꞌanj gi̱ranj sa yaj.