Gataj Ma̱ꞌan Jesús si gùyùmàn gui ni̱ du̱guane nej sij nûhui nìko nne Jerusalén
13
Ni̱ gahui Ma̱ꞌan Jesús ruhuâ nûhui nìko nne Jerusalén,
ni̱ gataj ꞌngo̱ nej sôꞌ ꞌna̱ꞌ ga̱huin chru̱n riñanj:
—Maestrûj,
gi̱ni̱ꞌhiaj sòꞌ ni̱ ûta hueꞌê hua nej hiëj ganachrâj nej sij hueꞌ nûhui nìko nânj,
ni̱ ûta sàꞌ hua nej hueꞌ yàkàn xi nânj.
2 Nanikàj Ma̱ꞌan Jesús ni̱ gata gu̱nïn sí dânj:
—Giniꞌînꞌ dàj hua hueꞌ yàkàn xi nânj nîꞌ.
Ni̱ gàtà gu̱nïnꞌ si gùyùmàn diû ni̱ gàꞌ si ꞌngo̱ nej hiëj nânj ni̱ si̱ gitâ yichrá nej duguiꞌij,
dadinꞌ ga̱ne̱ daranꞌanj na̱nj ánj.
Nej daꞌngaꞌ ga̱huin nga nï̀nꞌ ga̱chin ga̱na̱huij yumiguìi
3 Ni̱ gaꞌanj Ma̱ꞌan Jesús raa̱ kïj màn chrun olibo,
ni̱ gaꞌanj ga̱ne ni̱ giniꞌhia ñan nne hueꞌ huin nuhuî nìko.
Ni̱ gaꞌanj anêj Pedro,
Jacobo,
Juan ngà Andrés riñanj ni̱ gachín naꞌanj nej sôꞌ ni̱ gataj nej sôꞌ.
4 —Àmàn ga̱huin nej sa gataj Ma̱ꞌân rèꞌ ràꞌaj.
Ni̱ ahuin sa ga̱huin daꞌngaꞌa nga gìsìj nej nuguanꞌ gataj Maꞌân rèꞌ ràꞌaj.
5 Ni̱ nanikàj Ma̱ꞌan Jesús ni̱ gayiꞌij gata gu̱nïn nej sôꞌ:
—Ga̱ gu̱dadû nej suj ni̱ gi̱ni̱ꞌhiaj nej suj ni̱ si̱ gidigañuꞌunj gàꞌ si ꞌngo̱ nej síi nej suj mánj.
6 Dadinꞌ ga̱ꞌna̱ꞌ ûta gàꞌì nej síi ni̱ ga̱ra̱n sun nej sôꞌ siyu̱guí ni̱ ga̱ta̱j nej sôꞌ:
“Ñùnj huin Ma̱ꞌan Cristo”;
ni̱ gi̱di̱gaꞌñuꞌunj nej sôꞌ ûta gàꞌì nej guiì.
7 ’Ni̱ nga gunïn nej suj si ꞌna̱ꞌ sañuun ni̱ gùtàꞌ nej síi ni̱ gaꞌmin nej guiì rayiꞌî sañun dânj,
sani̱ si̱ guyuꞌhuiꞌ nej suj mánj,
dadinꞌ hua̱ ni̱ña̱n si huê dànanj ga̱huin;
sani̱ hua̱ nï̀nꞌ ga̱chin ga̱na̱huij yumiguìi.
8 Dadinꞌ ga̱yi̱ꞌij ni̱ gùtàꞌ ꞌngo̱ país ngà aꞌngô país,
ni̱ gùtàꞌ ꞌngo̱ rey ngà aꞌngô rey;
ni̱ ga̱ꞌhuij ñûn nùkuaj xi ûta gàꞌì nej yumanꞌ màn ruhuâ yumiguìi ni̱ gahuin yiꞌnaa,
ni̱ ûta gùnï̀nꞌ nej guiì,
sani̱ hia̱j gàyìꞌì si̱nï̱n nej sañuun huin nej nânj.
9 ’Sani̱ gi̱ni̱ꞌhiaj nej suj ni̱ ga̱ gudadû nej suj ngà nej ma̱ꞌan nej suj;
dadinꞌ nàgàꞌhuìꞌ nej síi nej suj riñan yiꞌnïnꞌ nej sí ni̱ka̱j su̱n riñan yumanꞌan,
ni̱ gàꞌhuìꞌ nej sí dânj nej suj ruhuâ hueꞌ huin nûhui;
ni̱ gi̱nikaj nej sij ga̱ꞌa̱nj nej sij nej suj riñan nej sí ni̱ka̱j suun ni̱ huê danj na̱nj gi̱nikaj nej sij ga̱ꞌa̱nj nej sij nej suj riñan sí huin rey,
guendâ gànàtàꞌ nej suj rayiꞌí riñan nej sôꞌ.
10 Nga nï̀nꞌ ga̱chin ga̱na̱huij yumiguìi ni̱ ña̱ꞌa̱n huaj si gànàtàꞌ nej sij nuguanꞌ gi̱ꞌhiaj ga̱na̱ni̱n nej guiì nï̀nꞌ gàchràꞌ ruhuâ yumiguìi.
11 Sani̱ nga gi̱nikaj nej sij ga̱ꞌa̱nj nej sij nej suj guendâ nàgàꞌhuìꞌ nej sij riñan nej sí ni̱ka̱j suun,
ni̱ si̱ giriñun ruhuâ nej suj dàj ga̱ta̱j nej suj;
ni̱ si giriñun ruhuâ nej suj dàj ga̱ꞌmi̱n nej suj,
dadinꞌ Ma̱ꞌan Ñaꞌanj an huin sa ri̱ki̱ nuguanꞌ ga̱ꞌmi̱n nej suj;
ni̱ sê nej suj huin sa ga̱ꞌmi̱n orâ dânj mánj,
dadinꞌ Ma̱ꞌan Espíritu Santo huin sa ga̱ꞌmi̱n.
12 Ni̱ nàgàꞌhuìꞌ ꞌngo̱ sí dânj dinḯn sôꞌ guendâ da̱gahuiꞌ nej síi,
ni̱ huê danj na̱nj nàgàꞌhuìꞌ ꞌngo̱ sí dânj daꞌní sôꞌ guendâ da̱gahuiꞌ nej síi,
ni̱ ga̱ta̱ rùhuà aꞌngô nej sí dânj niꞌin nej sôꞌ rej nej sôꞌ,
ni̱ da̱gahuiꞌ nej sôꞌ rej nej sôꞌ rayiꞌî si-nùguànꞌ Ma̱ꞌan Ñaꞌanj an.
13 Ni̱ si̱ gahuin yìñànꞌ ruhuâ nej síi niꞌin nej sôꞌ nej suj rayiꞌî siyu̱guí;
sani̱ sí gunùkuaj ganikïnꞌ ran nda gui gàhuìꞌ sôꞌ ni̱ ga̱na̱ni̱n sôꞌ.
14 ’Sani̱ nga giniꞌin nej suj gaꞌanj ga̱ne ꞌngo̱ sí dânj ruhuâ nuhuî nìko ni̱ nagiꞌhiaj kï̱j sôꞌ ni̱ gu̱du̱rëꞌ sôꞌ daranꞌ nej chrej ni̱ka̱j yumanꞌ Israel —si ahia,
ni̱ ga̱ra̱n daꞌngaꞌ ruhuâ sôꞌ—,
hiôꞌ ni̱ nej sí nne yumanꞌ Judea,
ni̱ gu̱na̱nj nej sôꞌ ga̱ꞌa̱nj nej sôꞌ riki kïj ï,
15 Ni̱ sí tàj yichrá hueꞌe ni̱ si̱ gananinj sôꞌ guendâ ga̱tu̱ sôꞌ ruhuâ dukuâ sôꞌ,
ni̱ gàꞌ si ganï̂n ruhuâ sôꞌ ga̱na̱ka̱j sôꞌ goꞌngo̱ nej rasu̱n màn ruhuâ dukuâ sôꞌ mánj.
16 Sí gaꞌanj kïj ï,
ni̱ si̱ nanikàj sôꞌ ga̱ꞌna̱ꞌ ga̱na̱ka̱j sôꞌ atsîj ni̱ke̱ sôꞌ mánj.
17 Nej gui dânj ni̱ ûta gi̱ranꞌ sa̱ñu̱n nej siyànà nu̱n ri̱ki̱,
ngà nej siyànà nï̀nꞌ hua lij daꞌní.
18 Sani̱ Gàchìnj nìꞌhiaj nej suj riñan Ma̱ꞌan Ñaꞌanj an,
sisi̱ si̱ guyumân sañun dânj riñan nej suj nga gahuin diû nu̱huij.
19 Dadinꞌ nej gui dânj ni̱ ûta gi̱ranꞌ sa̱ñu̱n nej guiì ni̱ nitaj àmàn ga̱ sañun dânj àsìj si̱nï̱ïn nga giꞌhiaj Ma̱ꞌan Ñaꞌanj an yumiguìi,
nda diû nânj ga̱huin sañuun dânj,
ni̱ gàꞌ si gaj nej gui ꞌna̱ꞌ neꞌ ña̱an mánj.
20 Ni̱ si nuhuiꞌ si guduguaꞌ Ma̱ꞌan Ñaꞌanj an nej gui ga̱huin sañun nânj,
hiôꞌ ni̱ gàꞌ si ꞌngo̱ rïn nej guiì si̱ gananin;
sani̱ rayiꞌî nej guiì ganagui Ma̱ꞌan Señor,
hiôꞌ ni̱ ganagaꞌ nej gui ga̱huin sañun dânj na̱nj ánj.
21 ’Hiôꞌ ni̱ si hua̱ ꞌngo̱ sí ga̱ta̱j gu̱nïn nej suj:
“Gi̱ni̱ꞌhiaj nej suj dadinꞌ hiuj nânj nikïnꞌ Ma̱ꞌan Cristo”,
nej si ga̱ta̱j ꞌngo̱ sí dânj gi̱ni̱ꞌhiaj nej suj dadinꞌ hiuj mánj nikïnj,
ni̱ si̱ guyumân ruhuâ nej suj mánj.
22 Dadinꞌ ga̱ꞌna̱ꞌ nej sí ga̱ta̱j si huê nej sij huin Ma̱ꞌan Cristo sani̱ huin nej sij sí gidigañuꞌunj un,
ni̱ ga̱ꞌna̱ꞌ nej sí ga̱ta̱j si huê nej sij huin sí ga̱ta̱j dàj gahuin sani̱ huin nej sij sí gidigañuꞌunj un,
ni̱ gi̱ꞌhiaj nej sij gàꞌì daꞌngaꞌa,
ni̱ ga̱na̱huin nej guiì aꞌnanꞌan gi̱ꞌhiaj nej sij,
ni̱ gi̱ꞌhiaj nej sij dànanj guendâ gi̱di̱gañuꞌunj nej sij nej guiì ni̱ ga̱huin ni̱ gùyùmàn ruhuâ nej guiì gàꞌ ganagui Ma̱ꞌan Ñaꞌanj an gi̱ꞌhiaj nej sij na̱nj ánj.
23 Sani̱ hueꞌê gi̱ni̱ꞌhiaj nej suj;
dadinꞌ gàꞌ gataj sìnï̀nj dàj gahuin.
Ga̱ꞌna̱ꞌ ñûn Ma̱ꞌan Jesús
24 ’Sani̱ nej gui dânj ni̱ neꞌ rùkù nga gisîj gahuin sañun dânj,
ni̱ ga̱huin ru̱mi̱nꞌ riñan gui,
ni̱ si̱ giyigï̀n riñan ahuii,
25 ni̱ gi̱ni̱nj nej atïꞌ màn neꞌ yàtàꞌa,
ni̱ gìyìnànꞌ nej sa nùkuaj màn neꞌ yàtàꞌa.
26 Hiôꞌ ni̱ gi̱ni̱ꞌin nej guiì ñùnj,
dadinꞌ gàꞌnàj riñan nnga ni̱ ûta nìko gi̱nikaj sùnj ni̱ nda gìyìgï̀n nï̀nꞌ gàchràꞌ gi̱ꞌhiâ.
27 Hiôꞌ ni̱ gàꞌnï̀n ga̱ꞌa̱nj nej ángel ni̱ na̱giꞌhiaj chre̱ꞌ ninj nej guiì gàꞌ ganaguîj,
nej guiì màn neꞌ yìchràj a,
neꞌ ri̱ki,
neꞌ gisîj gui,
neꞌ gatûj gui,
nda nï̀nꞌ gàchràꞌ ñan ganûn riñan hioꞌóo,
nda nï̀nꞌ gàchràꞌ ñan ganahuij riki yàtàꞌa.
28 ’Ni̱ ga̱huin chru̱n nej suj dàj rûnꞌ gidigân nuguanꞌ rán gaꞌmin rayiꞌî chrun îgu:
Nga ga̱na̱huin ꞌninj nej chrun raꞌa,
ni̱ ganasîj koj o raꞌa chrun dânj,
ni̱ gi̱ni̱ꞌin nej suj si gàꞌ gahuin nichrunꞌ diû.
29 Huê danj na̱nj nej suj;
ni̱ nga giniꞌin nej suj gahuin nej nânj,
ni̱ gi̱nun ruhuâ nej suj si gàꞌ ni̱kï̱nꞌ nìchrùnj riñan rahueꞌe.
30 Yàngàꞌ hia nï̀nꞌ gàtà ni̱ nga nï̀nꞌ gàchin ga̱na̱huij daranꞌ nej guiì màn diû nânj gàhuìꞌ ni̱ daꞌhui ga̱huin daranꞌ nej sa gatâ.
31 Yàtàꞌa ni̱ hioꞌóo ni̱ ga̱na̱hui;
sani̱ si-nùguànꞌànj ni̱ si̱ ganahui mánj.
32 ’Sani̱ gui dânj ni̱ dàj orâ ga̱huin ni̱ gàꞌ si ꞌngo̱ nej guiì nun niꞌin,
ni̱ gàꞌ nej ángel màn neꞌ yàtàꞌa nun niꞌin ni̱ gàꞌ nun niꞌín mánj,
man ꞌngo̱ rïn Ma̱ꞌan Rê Ña̱ꞌa̱nj nne yàtàꞌa huin sa niꞌin na̱nj ánj.
33 ’Hueꞌê du̱gumîn nej suj ma̱ꞌan nej suj ni̱ ga̱ gu̱dadû nej suj,
dadinꞌ nun niꞌin nej suj ahuin diû ga̱huin daranꞌ nej nânj mánj.
34 Huin dàj rûnꞌ huin ꞌngo̱ sí gaꞌanj nda gànꞌ ni̱ gudunâj sôꞌ dukuâ sôꞌ,
ni̱ gaꞌhuiꞌ sôꞌ suun raꞌa nej sí huin si-musû sôꞌ,
ni̱ hua̱ daꞌ si-su̱n daꞌ goꞌngo̱ nej sí musûj dânj,
ni̱ giyiꞌnïnꞌ suun riñan sí ni̱kï̱nꞌ ganaꞌnï̂nj riñan rahueꞌe,
si ûta hueꞌê gi̱ni̱ꞌhiaj sôꞌ ni̱ hueꞌê du̱gumîn sôꞌ.
35 Hueꞌê du̱gumîn nej suj ma̱ꞌan nej suj ni̱ ga̱ gudadû nej suj;
dadinꞌ nun niꞌin nej suj dàj orâ ga̱ꞌna̱ꞌ sí huin si-yi̱ruꞌhue nej suj;
ga̱ꞌhue ga̱ꞌna̱ꞌ sôꞌ nga gàꞌ ginìn,
nej si ga̱ꞌna̱ꞌ sôꞌ nga gahuin da̱ꞌa̱j neꞌ ñànꞌan,
nej si nga gaguâj dêꞌlo̱j o,
nej si nga ruhuâ giyigï̀n neꞌ ni̱ga̱nꞌan;
36 Dadinꞌ dàj na̱nj orâ ma̱ꞌan ga̱ꞌna̱ꞌ sôꞌ,
gaꞌhue si gùyùmàn sôꞌ nga gatoj nej suj nngaj nej suj.
37 Nej sa gatâ riñan nej suj,
ni̱ riñan daranꞌ nej suj gatâ:
Hueꞌê du̱gumîn nej suj ma̱ꞌan nej suj ni̱ ga̱ gudadû nej suj ma̱ꞌan nej suj.