Gataj Ma̱ꞌan Jesús si du̱guane nej sij nuhuî nìko nne ruhuâ yumanꞌ snàꞌànj Jerusalén
24
Nga gahui Ma̱ꞌan Jesús ruhuâ nuhuî nìko ni̱ hua ga̱ꞌan, ni̱ gaꞌnaꞌ nej sí ꞌna̱ꞌ ga̱huin chru̱n riñanj ni̱ gayiꞌì nej sôꞌ ni̱ gidigân nej sôꞌ nej hueꞌ sàꞌ xi màn ñan nne nuhuî nìko.
2 Ni̱ nanikàj Ma̱ꞌan Jesús ni̱ gata:
—Niꞌin nej suj si ûta sàꞌ hua nej hueꞌ xi nânj nîꞌ. Yàngàꞌ hia nï̀nꞌ gàtà, ni̱ gùyùmàn diû ni̱ si̱ gitá nej hiëj yichrá nej duguiꞌij, dadinꞌ du̱guane nej síi daranꞌ nej hiëj dan na̱nj ánj.
Nej daꞌngaꞌ ga̱huin nga nï̀nꞌ ga̱chin ga̱na̱huij yumiguìi
3 Ni̱ nne Ma̱ꞌan Jesús raa̱ kïj ñan màn chrun olibo, ni̱ gaꞌnaꞌ anêj nej sí ꞌna̱ꞌ ga̱huin chru̱n riñanj ni̱ gataj nej sôꞌ gu̱nïn:
—Ga̱ta̱j Ma̱ꞌân rèꞌ àmàn ga̱huin nej nânj, ni̱ ahuin daꞌngaꞌ huin sa gi̱ni̱ꞌin nej ñûnj nga ga̱ꞌna̱ꞌ ñûn Ma̱ꞌân rèꞌ, ni̱ nga ga̱na̱huij yumiguìi.
4 Nanikàj Ma̱ꞌan Jesús ni̱ gata:
—Ga̱ gu̱dadû nej suj ni̱ si̱ gidigañuꞌunj gàꞌ si ꞌngo̱ nej síi nej suj mánj.
5 Dadinꞌ ga̱ꞌna̱ꞌ ûta gàꞌì nej síi ni̱ ga̱ra̱n sun nej sôꞌ siyu̱guí ni̱ ga̱ta̱j nej sôꞌ: “Ñùnj huin Ma̱ꞌan Cristo”; ni̱ gi̱di̱gañuꞌunj nej sôꞌ ûta gàꞌì nej guiì.
6 Ni̱ gunïn nej suj si ga̱huin sañuun ni̱ gùtàꞌ nej stâdu neꞌ dànanj ni̱ gùtàꞌ nej sôꞌ neꞌ dàmanj; sani̱ si̱ guyuꞌhuiꞌ nej suj, dadinꞌ hua̱ ni̱ña̱n si huê danj ga̱huin; sani̱ hua̱ nï̀nꞌ ga̱chin ga̱na̱huij yumiguìi.
7 Dadinꞌ gu̱nï̱nꞌ ꞌngo̱ país ngà aꞌngô país, ni̱ gu̱nï̱nꞌ ꞌngo̱ rey ngà aꞌngô rey; ni̱ ga̱huin yiꞌnaa, ni̱ ga̱ꞌhuij ñûn nùkuaj xi ûta gàꞌì nej yumanꞌ màn ruhuâ yumiguìi.
8 Sani̱ daranꞌ nej sa ga̱huin ni̱ hia̱j gayiꞌì si̱nï̱n sañuun riñan nej guiì na̱nj ánj.
9 ’Hiôꞌ ni̱ nàgàꞌhuìꞌ nej síi nej suj ni̱ gi̱ranꞌ sa̱ñu̱n nej suj, ni̱ da̱gahuiꞌ nej sôꞌ nej suj, ni̱ ga̱ta̱ rùhuà daranꞌ nej guiì nej suj rayiꞌî siyu̱guí.
10 Hiôꞌ ni̱ ûta gàꞌì nej guiì gàꞌ giniꞌin si-nùguànꞌ Ma̱ꞌan Ñaꞌanj an nanikàj gi̱ꞌhiaj gakï̱nꞌïn, ni̱ ûta gininj ꞌì nej duguiꞌ ninj riñanj ninj ni̱ nàgàꞌhuìꞌ ninj nej duguiꞌ ninj riñan nej sí ni̱ka̱j suun.
11 Ni̱ ga̱ꞌna̱ꞌ ûta gàꞌì nej sí profeta gidigañuꞌunj un, ni̱ gi̱di̱gañuꞌunj nej sôꞌ ûta gàꞌì nej guiì.
12 Ni̱ guendâ ûta giyiꞌnanj nej gakï̱nꞌïn, ni̱ si̱ ga ꞌì ruhuâ nej guiì niꞌin ninj nej duguiꞌ ninj mánj.
13 Sani̱ nej guiì gunùkuaj ganikïnꞌ ran ngà Ma̱ꞌan Ñaꞌanj an nda gui gàhuìꞌ ninj, ni̱ guiì dânj huin sa ga̱na̱ni̱n.
14 Ni̱ gànàtàꞌ nej sij nuguanꞌ gi̱ꞌhiaj ga̱na̱ni̱n nej guiì nï̀nꞌ gàchràꞌ ruhuâ yumiguìi; ni̱ ña̱ꞌa̱n huaj si gu̱nïn daranꞌ nej guiì màn nï̀nꞌ gàchràꞌ ruhuâ yumiguìi; hiôꞌ ni̱ gùyùmàn diû ni̱ ga̱na̱huij yumiguìi.
15 ’Hia̱j rûꞌhuaj, ni̱ nga giniꞌin nej suj gaꞌanj ga̱ne sí kï̱j huaa ruhuâ nuhuî nìko nne Jerusalén ni̱ nagiꞌhiaj kï̱j sôꞌ ni̱ gudurëꞌ sôꞌ ley ni̱ka̱j nej guiì màn hiuj dânj —sí gahia ni̱ ga̱ra̱n daꞌngaꞌ ruhuâ sôꞌ—,
16 Hiôꞌ ni̱ nej guiì nne riñan hioꞌó Judea, ni̱ gu̱na̱nj ninj ni̱ ga̱ꞌa̱nj ninj riki kïj ï.
17 Guiì tàj yichrá dukuâ, ni̱ si̱ gananinj ninj guendâ ga̱na̱ka̱j ninj nej rasu̱n màn ruhuâ dukuâ ninj mánj.
18 Ni̱ sí gaꞌanj gi̱ꞌhiaj sun kïj ï, ni̱ si̱ gananikàj sôꞌ na̱ꞌna̱ꞌ sôꞌ dukuâ sôꞌ guendâ ga̱na̱ka̱j sôꞌ si-chamarâ sôꞌ mánj.
19 Sani̱ ûta ni̱ki nej siyànà nu̱n ri̱ki, ngà nej siyànà dugutsi neꞌej si gi̱ranꞌ ninj nga gùyùmàn gui dânj.
20 Gàchìnj nìꞌhiaj nej suj riñan Ma̱ꞌan Ñaꞌanj an, sisi̱ si̱ gaꞌnaꞌ sañun nânj riñan nej suj nga ga̱huin diû gahiu ꞌhueꞌe nej si nga ga̱huin gui ganarânj rûhua mánj.
21 Dadinꞌ gaꞌnaꞌ ꞌngo̱ sañun nìko xi riñan nej guiì ni̱ ûta gi̱ranꞌ sa̱ñu̱n ninj, ni̱ àsìj nga gahuin yumiguìi ni̱ nitaj àmàn ga sañun xi dânj, ni̱ gàꞌ si gaj neꞌ rùkù nga gisîj gahuin sañun xi nânj mánj.
22 Ni̱ si nuhuiꞌ si ganaduguaꞌ Ma̱ꞌan Ñaꞌanj an nej gui ga̱huin sañun dânj, hiôꞌ ni̱ gàꞌ si ꞌngo̱ nej guiì si gananin; sani̱ rayiꞌî nej guiì gàꞌ ganagui Ma̱ꞌan Ñaꞌanj an. Hiôꞌ ni̱ gànàgàꞌ nej gui ga̱huin sañuun.
23 ’Hiôꞌ ni̱ si hua̱ ꞌngo̱ guiì ga̱ta̱j gu̱nïn nej suj: “Gi̱ni̱ꞌhiaj nej suj, dadinꞌ hiuj nânj nikïnꞌ Ma̱ꞌan Cristo”, nej si ga̱ta̱j ninj “gi̱ni̱ꞌhiaj nej suj dadinꞌ neꞌ dàmanj nikïnꞌ Ma̱ꞌan Cristo”, ni̱ si̱ guyumân ruhuâ nej suj mánj.
24 Dadinꞌ ga̱ꞌna̱ꞌ nej sí gidigañuꞌunj un ni̱ ga̱ta̱j nej sôꞌ si huê nej sôꞌ huin Ma̱ꞌan Cristo, ni̱ huê danj na̱nj ga̱ꞌna̱ꞌ nej sí profeta gidigañuꞌunj un, ni̱ ûta nìko ga̱ nej daꞌngaꞌ gi̱ꞌhiaj nej sôꞌ ni̱ orâ chre ni̱ ga̱na̱huin nej guiì aꞌnanꞌan gi̱ꞌhiaj nej sôꞌ, ni̱ ga̱huin ni̱ gi̱di̱gañuꞌunj nej sôꞌ nej guiì gàꞌ ganagui Ma̱ꞌan Ñaꞌanj an.
25 Ni̱ huê danj gàꞌ gatâ gu̱nïn nej suj àsìj si̱nï̱ïn.
26 Huê danj ni̱ si ga̱ta̱j nej sôꞌ gu̱nïn nej suj: “Gi̱ni̱ꞌhiaj nej suj dadinꞌ huê Ma̱ꞌan Cristo nne riñan hioꞌó hua̱ nàkòo”, ni̱ si̱ gahui nej suj ga̱ꞌa̱nj nej suj; ni̱ si ga̱ta̱j nej sôꞌ gi̱ni̱ꞌhiaj nej suj dadinꞌ”, huê Ma̱ꞌan Cristo nne huì ruhuâ hueꞌ huin nûhui tàj yàkàan, ni̱ si̱ guyumân ruhuâ nej suj mánj.
27 Dadinꞌ dàj rûnꞌ giràn giꞌhiaj duꞌhui neꞌ gisîj gui ni̱ gachinj nda neꞌ gatûj gui, ni̱ huê danj ga̱huin nga ga̱ꞌna̱ꞌ ñun Maꞌán.
28 Dadinꞌ dànèꞌ gahuin gi̱ngaj nneè kú nej nîman, ni̱ hiuj dânj nàràꞌhuìꞌ nej yachrúu guendâ ya̱ nej yôꞌ nneè nej nîman.
Nga gaꞌnaꞌ ñûn Ma̱ꞌan Jesús
29 ’Ni̱ orâ chre nga ganahuij nej gui ga̱huin sañuun, ni̱ ga̱huin ru̱mi̱nꞌ riñan gui, ni̱ si̱ giyigï̀n riñan ahuii, ni̱ gi̱ni̱nj nej atïꞌ màn neꞌ yàtàꞌa, ni̱ gìsìkìꞌ nej sa nùkuaj màn yàtàꞌa.
30 Hiôꞌ ni̱ nga gàꞌnàj ni̱ gùrùguìꞌ daꞌngaꞌa neꞌ yàtàꞌa; hiôꞌ ni̱ ûta gu̱yuꞌhuiꞌ daranꞌ nej guiì màn riñan hioꞌóo ni̱ ûta gu̱du̱gue̱ꞌe ninj ni̱ gaguâj hia ninj, ni̱ gi̱ni̱ꞌin ninj gàꞌnàj riñan nej nnga màn neꞌ yàtàꞌa, ni̱ ûta nìko hua suun gi̱nika nga gàꞌnàj ni̱ nda giràn chre nï̀nꞌ gàchràꞌ gi̱ꞌhiâ.
31 Ni̱ gàꞌnï̀n nej ángel ni̱ ga̱gua̱j nùkuaj staꞌu ninj dàj rûnꞌ aguâj chrun âꞌñànj an, ni̱ na̱gi̱ꞌhiaj chre̱ꞌ ninj nej guiì gàꞌ ganaguîj, nej guiì màn neꞌ yìchràj a, neꞌ ri̱ki, neꞌ gisîj gui, neꞌ gatûj gui ni̱ nda ñan ganahuij riki yàtàꞌa.
32 ’Ni̱ ga̱huin chru̱n nej suj dàj taj nuguanꞌ ráan rayiꞌî chrun îgu: Nga ꞌna̱ꞌ ga̱na̱huin ꞌnìnj raꞌa chrun igû, ni̱ ganasîj koj o raꞌa, ni̱ ga̱ra̱n daꞌngaꞌ ruhuâ nej suj si gàꞌ doj huaj gùyùmàn diû ñaꞌan.
33 Huê danj ni̱ nga giniꞌin nej suj daranꞌ nej nânj, hiôꞌ ni̱ ga̱ra̱n daꞌngaꞌ ruhuâ nej suj si gàꞌ gahuin nìchrùnj ni̱ gàꞌ nìkï̀nj riñan rahueꞌe.
34 Yàngàꞌ hia nï̀nꞌ gàtà, si nga nï̀nꞌ gàchin ga̱na̱huij nej guiì riñan hioꞌó ni̱ hua̱ ni̱ña̱n si ga̱huin daranꞌ nej nânj.
35 Yàtàꞌa ngà hioꞌó ni̱ ga̱na̱huij ngue sani̱ si̱ gahuin chre gàꞌ si ꞌngo̱ si-nùguànꞌànj mánj.
36 ’Sani̱ gui ga̱huin daranꞌ nej nânj ni̱ dàj orâ ga̱huin ni̱ gàꞌ si ꞌngo̱ síi nun niꞌin, ni̱ gàꞌ nun niꞌin nej ángel màn neꞌ yàtàꞌa, màn ꞌngo̱ rïn Ma̱ꞌan Rê Ñaꞌanj an huin sa niꞌin.
37 ’Sani̱ dàj rûnꞌ gahuin nej gui nga gane Noé, huê danj ga̱huin nga ga̱ꞌna̱ꞌ ñûn Maꞌán.
38 Dadinꞌ nej gui nga nï̀nꞌ gàchin ga̱ꞌna̱ꞌ gumàn nùgui ni̱ nej guiì gimân diû dânj ni̱ yâ ni̱ goꞌo ninj, ni̱ gayakaj ninj nika ninj ni̱ ga̱ra̱n ràꞌa ninj.
39 Ni̱ nu̱n ga̱ra̱n daꞌngaꞌ ruhuâ ninj nda gui gaꞌnaꞌ gumàan ni̱ gata daranꞌ ninj gaꞌan, ni̱ huê dànanj ga̱huin nga ga̱ꞌna̱ꞌ ñûn Maꞌán.
40 Hiôꞌ ni̱ nu̱n huìj síi giꞌhiaj sun nguèj sôꞌ doꞌó nguèj sôꞌ, ni̱ ꞌngo̱ sí dânj ga̱na̱ka̱j Ma̱ꞌan Ñaꞌanj an, ni̱ aꞌngô sí dânj gùnàj gi̱ꞌhia.
41 Nu̱n huìj siyànàa guchraꞌ nguèj ninj nihiaj a riñan molino: Ni̱ ꞌngo̱ siyànà dânj ga̱na̱ka̱j Ma̱ꞌan Ñaꞌanj an ni̱ aꞌngô siyànà dânj gùnàj giꞌhiaj Ma̱ꞌan Ñaꞌanj an.
42 ’Hueꞌê du̱gumîn nej suj ma̱ꞌan nej suj riñan gakï̱nꞌïn ni̱ du̱guꞌnïnꞌ nej suj gi̱ꞌhiaj nej suj sa sàꞌaj ngà nej guiì, dadinꞌ nun niꞌin nej suj dàj orâ ga̱ꞌna̱ꞌ Ma̱ꞌan si-Seño nej suj mánj.
43 Sani̱ ga̱ra̱n daꞌngaꞌ ruhuâ nej suj nej nânj, ni̱ si ꞌngo̱ sí aꞌnïnꞌ riñan nej duguiꞌ gàꞌ niꞌin dàj orâ ga̱ꞌna̱ꞌ gi̱ꞌhiaj tu̱ sí tu̱u dukuâ sôꞌ, ni̱ gàꞌ ga̱ne chru̱n sôꞌ guendâ du̱gumîn sôꞌ dukuâ sôꞌ ni̱ si̱ gaꞌnï̂nj sôꞌ, gi̱ꞌhiaj tu̱ sí dânj sa màn ruhuâ dukuâ sôꞌ.
44 Huê danj ni̱ ga̱ yu̱gui nej suj; dadinꞌ gàꞌnàj ꞌngo̱ gui nga nitaj si ànàꞌhuìj nej suj ñùnj.
Musû dagahuin hueꞌê ni̱ musû nun ga̱ꞌhue da̱gahuin hueꞌê
45 ’Ahuin sí huin musû hueꞌê dagahuin, ni̱ hueꞌê garânj daꞌngaꞌ ruhuâ sôꞌ sun giyiꞌnïnꞌ su̱n giꞌhiaj si-yi̱ruꞌhue sôꞌ, ni̱ ginikaj su̱n sôꞌ dukuâ si-yi̱ruꞌhue sôꞌ ni̱ ûta ganahuij ruhuâ sôꞌ ni̱ giꞌhiaj yu̱gui sôꞌ sa yâ nej guiì dugûta su̱n si-yi̱ruꞌhue sôꞌ.
46 Ga̱ nìhiàꞌ ruhuâ sí musû dânj, si dànanj giꞌhiaj sôꞌ nga ga̱ꞌna̱ꞌ si-yi̱ruꞌhue sôꞌ.
47 Yàngàꞌ hia nï̀nꞌ gàtà ni̱ ga̱na̱huin ràꞌa sôꞌ su̱n yàkàan ni̱ gi̱nikaj ñuꞌunj sôꞌ riñan daranꞌ nej rasu̱n huin siꞌhiaj si-yi̱ruꞌhue sôꞌ.
48 Sani̱ si huin sôꞌ musu kï̱j hua ni̱ gaꞌmin sôꞌ ngà nimân sôꞌ ni̱ gataj sôꞌ: Gahuin ra̱n si-yi̱ruꞌhue ga̱ꞌna̱ꞌ sôꞌ;
49 Ni̱ gayiꞌì sôꞌ ni̱ gàꞌhuìꞌ sôꞌ niꞌhiaj aꞌngô nej sí musû giꞌhiaj su̱n ngà sôꞌ, ni̱ man sun yaa ngà sun goꞌoo giꞌhiaj sôꞌ ngà nej sí àyìnï̀ïn.
50 Sani̱ ga̱ꞌna̱ꞌ si-yi̱ruꞌhue sôꞌ gui nga nitaj si ànàꞌhuìj sôꞌ, orâ ngà nitaj si niꞌin sôꞌ,
51 ni̱ ûta ga̱na̱huin ra̱ꞌa sôꞌ kastîgu gi̱ꞌhiaj si-yi̱ruꞌhue sôꞌ, ni̱ gu̱ne̱ꞌ sôꞌ ga̱ne sí dânj ngà nej sí gidigañuꞌunj un; ni̱ hiuj dânj ga̱ne sôꞌ ni̱ ûta gu̱du̱gue̱ꞌe sôꞌ ni̱ nda ya̱ rùj ñanꞌ sôꞌ.