Nuguanꞌ rán gananï̂n rayiꞌî nej chi̱ꞌ siyànà ña̱an
25
’Hiôꞌ ni̱ nej guiì nìkòꞌ rukû Ma̱ꞌan Jesús, huin dàj rûnꞌ huin chi̱ꞌ nej siyànà ña̱n gidaꞌa ñaꞌan gudugùun, ni̱ gahui ninj gaꞌanj ninj guendâ ruhuâ ninj ga̱tu̱ ninj giꞌñanj ñan ga̱ra̱n ràꞌa ꞌngo̱ síi.
2 Ni̱ ùnꞌùnꞌ nej siyànà ña̱n dânj ûta hueꞌê garânj daꞌngaꞌ ruhuâ, sani̱ aꞌngô unꞌunꞌ nej siyànà ña̱n dânj nun ga̱ꞌhue ga̱ra̱n daꞌngaꞌ ruhuâ.
3 Ni̱ nej siyànà ña̱n nun ga̱ꞌhue ga̱ra̱n daꞌngaꞌ ruhuâ ni̱ gidaꞌa ninj ñaꞌan gudugùun, sani̱ nun gi̱daꞌa ninj gasîti gi̱nikaj ninj ga̱ꞌa̱nj ninj;
4 sani̱ nej siyànà ña̱n hueꞌê garânj daꞌngaꞌ ruhuâ ni̱ gachra ninj gasîti ruhuâ sigùu, ni̱ ganakaj ninj ñaꞌan gudugùun ni̱ ganikïnꞌ chru̱n ninj.
5 Sani̱ gahuin ràn ga̱ꞌna̱ꞌ sí ga̱ya̱ka̱j nej siyànà dânj, huê danj ni̱ gayiꞌij ni̱ gaꞌnaꞌ nnej e riñan ninj huê danj ni̱ gatoj ninj.
6 Ni̱ nga gahuin da̱ꞌa̱j neꞌ ruhuâ ñànꞌan ni̱ gunïn ninj si ûta nùkuaj gaꞌmin ꞌngo̱ sa gaꞌmin ni̱ gata: “Gàꞌ ꞌna̱ꞌ sôꞌ ga̱huin nika nej suj; ni̱ ga̱hui̱ nej suj ni̱ ga̱na̱huin ra̱ꞌa nej suj sôꞌ na̱nj ánj.”
7 Hiôꞌ ni̱ ganachi daranꞌ nej siyànà ña̱n dânj, ni̱ gayiꞌì ninj ni̱ giꞌhiaj yùgui ninj ñaꞌan gudugùun.
8 Ni̱ gataj nej siyànà ña̱n nun ga̱ꞌhue ga̱ra̱n daꞌngaꞌ ruhuâ dânj, gu̱nïn nej siyànà ña̱n sàꞌ garânj daꞌngaꞌ ruhuâ: “Ri̱ki̱ nej suj do̱j si-gasîti nej suj gìrìꞌ nej ñûnj dadinꞌ gìnàꞌàj ñaꞌan gudugùn ni̱ka̱j nej ñûnj na̱nj ánj.”
9 Sani̱ nanikàj nej siyànà hueꞌê garânj daꞌngaꞌ ruhuâ dânj ni̱ gataj ninj: “Guendâ si̱ gachin gìrìꞌ nej suj ni̱ si̱ gachin gìrìꞌ nej ñûnj, ni̱ dànanj dùgùnàj huaj si ga̱ꞌa̱nj gi̱ra̱n nej suj ñan manj anej, ni̱ gìrìꞌ nej suj ga̱ra̱n sun nej suj na̱nj ánj.”
10 Sani̱ nga nï̀nꞌ gaꞌanj gi̱ra̱n nej siyànà ña̱n dânj, ni̱ gaꞌnaꞌ sí ga̱ya̱ka̱j ninj; ni̱ nej siyànà ña̱n gàꞌ hua̱ yu̱gui ni̱ gatûj ninj ñan garan ràꞌa ninj ngà sí ga̱ya̱ka̱j ninj, huê danj ni̱ ganarán riñan rahueꞌe.
11 Huê danj ni̱ nda neꞌ rùkù doj gaꞌnaꞌ aꞌngô da̱ꞌa̱j nej siyànà ña̱n dânj, ni̱ gataj ninj: “Señor, Señor, ga̱na̱ꞌnï̱n Ma̱ꞌân rèꞌ riñan rahueꞌe ga̱tu̱ nej ñûnj.”
12 Sani̱ nanikàj sí dânj, ni̱ gataj sôꞌ: “Yàngàꞌ hia nï̀nꞌ gàtà, ni̱ nun niꞌín nej suj mánj.”
13 Hiôꞌ ni̱ gataj Ma̱ꞌan Jesús:
—Du̱gumîn hueꞌê nej suj ma̱ꞌan nej suj, rûꞌhuaj, dadinꞌ nun niꞌin nej suj dàj orâ gàꞌnàj mánj.
Nuguanꞌ rán gaꞌmin rayiꞌî nej talento
14 ’Dadinꞌ Ma̱ꞌan sa ni̱ka̱j su̱n neꞌ yàtàꞌa huin dàj rûnꞌ huin ꞌngo̱ sí gaꞌanj nda ga̱nꞌ xi, ni̱ ganakḯn sôꞌ nej sí giꞌhiaj sun riñan sôꞌ guendâ nàgàꞌhuìꞌ sôꞌ nej rasu̱n huin siꞌhiaj sôꞌ du̱gumîn nej si-musû sôꞌ.
15 ’Ni̱ gaꞌhuiꞌ sôꞌ ùnꞌùnꞌ talento raꞌa ꞌngo̱ si-musû sôꞌ, ni̱ gaꞌhuiꞌ sôꞌ huìj talento raꞌa aꞌngô si-musû sôꞌ, ni̱ gaꞌhuiꞌ sôꞌ ꞌngo̱ talento raꞌa aꞌngô si-musû sôꞌ, ni̱ ganahuin ràꞌa daꞌ goꞌngo̱ nej sôꞌ dàj hua yu̱gui ma̱ꞌan nej sôꞌ gi̱ꞌhiaj sun nej sôꞌ; huê danj ni̱ nga gisîj ganachrîj sôꞌ talento raꞌa nej si-musû sôꞌ ni̱ gaꞌanj sôꞌ nda ga̱nꞌ xi.
16 Ni̱ sí ganahuin ra̱ꞌa ùnꞌùnꞌ talento ni̱ gaꞌanj sôꞌ ni̱ giꞌhiaj sun sôꞌ ngà nej talento dânj, ni̱ giꞌhiaj ga̱nan sôꞌ aꞌngô unꞌunꞌ talento ganataꞌ yichrá sa ganahuin ràꞌa sôꞌ.
17 Huê danj na̱nj giꞌhiaj sun musû ganahuin ràꞌa huìj talento, ni̱ giꞌhiaj ganân sôꞌ ganataꞌ ahuîj talento yichrá sa ganahuin ràꞌa sôꞌ.
18 Sani̱ sí musû ganahuin ràꞌa ꞌngo̱ talento ni̱ dòꞌ si̱ gaꞌanj gànj sôꞌ ꞌngo̱ hiuꞌuj u riki hioꞌóo, ni̱ gachrîj huì sôꞌ saꞌanj ganahuin ràꞌa sôꞌ.
19 ’Neꞌ rùkù nga gachîn ûta nìko diû ni̱ gaꞌnaꞌ sí yi̱ruꞌhue dânj; ni̱ nagiꞌhiaj sôꞌ guenda ngà daꞌ goꞌngo̱ nej sí dânj.
20 Ni̱ guyumân sí ganahuin ràꞌa ùnꞌùnꞌ talento, ni̱ ni̱ka̱j sôꞌ aꞌngô unꞌunꞌ talento gaꞌnaꞌ sôꞌ ni̱ gataj sôꞌ: “Señor, ùnꞌùnꞌ talento riki rèꞌ raꞌá ni̱ huej ꞌna̱ꞌ nan ni̱ ga̱na̱ka̱j rèꞌ, ni̱ giꞌhiaj ganânj aꞌngô unꞌunj ganataꞌ yichra.”
21 Ni̱ gataj síchìj huin yi̱ruꞌhue dânj: “Dùgùnàj giꞌhiâꞌ dadinꞌ hueꞌê gadagahuînꞌ; do̱j nï̀nꞌ huin sa rikîj raꞌa sani̱ ûta hueꞌê gadagahuînꞌ riñânj, sani̱ gi̱nikaj sunꞌ riñan ûta gàꞌì nej suun; ga̱tu̱ ni̱ ga̱na̱huin nìhiàꞌ ruhuâꞌ ngàj na̱nj ánj.”
22 Ni̱ guyumân sí ganahuin ràꞌa huìj talento ni̱ gataj sôꞌ: “Señor, huìj talento huin rikî rèꞌ raꞌá; huej ꞌnaꞌ nan ga̱na̱ka̱j rèꞌ, ni̱ giꞌhiaj ganânj ahui ganataꞌ yichra.”
23 Ni̱ gataj sí yi̱ruꞌhue dânj: “Dùgùnàj giꞌhiâꞌ dadinꞌ ûta hueꞌê dagahuînꞌ riñânj; ni̱ do̱j nï̀nꞌ huin sa girikîj riñanꞌ sani̱ ûta hueꞌê gadagahuînꞌ riñânj, hiôꞌ ni̱ gi̱nikaj su̱nꞌ riñan ûta gàꞌì nej suun; ga̱tu̱ ni̱ ga̱na̱huin nìhiàꞌ ruhuâꞌ ngàj na̱nj ánj.”
24 Huê danj ni̱ guyumân sí ganahuin ràꞌa ꞌngo̱ talento ni̱ gataj sôꞌ gu̱nïn si-yi̱ruꞌhue sôꞌ: “Señor niꞌín si ûta huê rèꞌ; dadinꞌ ganakaj rèꞌ ñan nun gu̱nu̱n rèꞌ ni̱ ganarânꞌ rèꞌ ñan nun dagamânꞌ rèꞌ;
25 rayiꞌî dânj ni̱ guyuꞌhuí, ni̱ gaꞌanj ga̱chri̱ huìj riki hioꞌóo si-talentô rèꞌ ni̱ huej ꞌnaꞌ nan ga̱na̱ka̱j rèꞌ.”
26 Nanikàj sí yiruꞌhue dânj ni̱ gataj sôꞌ gu̱nïn sí dânj: “Musû aꞌnanꞌan ni̱ sí rùmìin huînꞌ, niꞌînꞌ si ganakâ ñan nun gùnùnj ni̱ ganaraꞌán ñan nun da̱gamán.
27 Hua̱ ni̱ña̱n ni̱ asàꞌ ni̱ gaꞌhuiꞌ si-sànꞌàn riñan nej sí giꞌhiaj su̱n ngà sanꞌanj an, ni̱ nga ga̱ꞌna̱ꞌ ñún, hiôꞌ ni̱ ga̱na̱huin ra̱ꞌá si-sànꞌàn ngà sa ganataꞌ raj saj áj.”
28 “Ga̱ꞌne̱ nej suj ꞌngo̱ rïn talento raꞌa sij; ni̱ nàgàꞌhuìꞌ nej suj raꞌa sí ni̱ka̱j chi̱ꞌ talento.
29 Dadinꞌ sí huaj riñan ni̱ ga̱na̱huin ra̱ꞌa sôꞌ doj, ni̱ sí nitaj si huaj riñan ni̱ gi̱ye̱ꞌne̱ do̱j sa hua̱ riñan sôꞌ.
30 Ni̱ sí musû nitaj si niꞌñanj dânj ni̱ gi̱rë̱ꞌë̱j nej suj ga̱ꞌa̱nj sôꞌ neꞌ ye̱ꞌe ñan hua̱ ru̱mi̱nꞌ; ni̱ hiuj dânj ga̱ne sôꞌ ni̱ ûta gu̱du̱gue̱ꞌe sôꞌ ni̱ nda ya̱ ru̱j ñanꞌ sôꞌ.”
Na̱gi̱ꞌhiaj Ma̱ꞌan guenda ngà nej país màn ruhuâ yumiguìi
31 ’Nga ga̱ꞌna̱ꞌ Ma̱ꞌan Cristo gi̱nikaj sunj ruhuâ yumiguìi ni̱ ga̱ꞌna̱ꞌ daranꞌ nej ángel huin sa gèe ngà Ma̱ꞌan, hiôꞌ ni̱ ga̱ꞌna̱ꞌ ga̱ne riñan chrun yilâ raa̱n chre guendâ gi̱nikaj sunj.
32 Ni̱ ga̱na̱huin chre̱ꞌ daranꞌ nej yumanꞌ màn ruhuâ yumiguìi; ni̱ giꞌhiaj ane daꞌ goꞌngo̱ nej guiì siganï̂nj nej duguiꞌ ninj, dàj rûnꞌ giꞌhiaj anêj sí ni̱kï̱nꞌ dugumîn nej matsïj ï ngà nej stanee.
33 Ni̱ ga̱nïnj nej matsïj ï raꞌa neꞌ huàꞌaj, ni̱ ga̱nïnj nej stanee raꞌa neꞌ chrïn.
34 Hiôꞌ ni̱ gataj Ma̱ꞌan Rey gu̱nïn nej guiì ni̱kï̱nꞌ raꞌa neꞌ huàꞌaj: “Gu̱hua̱ꞌ nej suj ni̱ ga̱na̱huin nìhiàꞌ ruhuâ nej suj, dadinꞌ daꞌní Ma̱ꞌan Rê Ñaꞌanj an huin nej suj, ni̱ ga̱na̱huin ra̱ꞌa nej suj ñan ga̱ne nej suj dadinꞌ gàꞌ hua̱ yu̱gui lugâ guendâ ga̱ne nej suj àsìj nga giꞌhiaj Ma̱ꞌan Ñaꞌanj an yumiguìi.
35 Dadinꞌ ganachinj yiꞌnaa rikí, ni̱ girikî nej suj yâj; ganakó nnee ni̱ girikî nej suj nnee goꞌôj; gahuin sí gaꞌnaꞌ aꞌngô yumanꞌan ni̱ ganahuin ra̱ꞌa nej suj ñùnj.
36 Ga nnèj ni̱ girikî nej suj atsìj i ginûnj; gaꞌnán ni̱ gaꞌnaꞌ gi̱ni̱ꞌhiaj nej suj ñùnj; gané dukuâ gaꞌa ni̱ gaꞌnaꞌ gi̱ni̱ꞌhiaj nej suj ñùnj.”
37 Hiôꞌ ni̱ nanikàj nej sí giꞌhiaj sa ni̱ka̱a ni̱ ga̱ta̱j nej sôꞌ: “Señor àmàn giniꞌin nej ñûnj si ganachinj yiꞌnaa riki Ma̱ꞌân rèꞌ, ni̱ girikî nej ñûnj yâ Ma̱ꞌân rèꞌ, ni̱ ganakô Ma̱ꞌân rèꞌ nnee ni̱ rikî nej ñûnj nnee goꞌo Ma̱ꞌân rèꞌ ràꞌaj.
38 Ni̱ àmàn giniꞌin nej ñûnj si gahuin Ma̱ꞌân rèꞌ sí gaꞌnaꞌ aꞌngô yumanꞌan ni̱ ganahuin ra̱ꞌa nej ñûnj Ma̱ꞌân rèꞌ, ni̱ ga nnè Ma̱ꞌân rèꞌ ni̱ girikî nej ñûnj atsìj i ginun Ma̱ꞌân rèꞌ ràꞌaj.
39 Àmàn giniꞌin nej ñûnj gaꞌnanꞌ Ma̱ꞌân rèꞌ, ni̱ àmàn giniꞌin nej ñûnj gane Ma̱ꞌân rèꞌ dukuâ gaꞌa, ni̱ gaꞌnaꞌ gi̱ni̱ꞌhiaj nej ñûnj Ma̱ꞌân rèꞌ ràꞌaj.”
40 Nanikàj Ma̱ꞌan Rey ni̱ gata: “Yàngàꞌ hia nï̀nꞌ gàtà ni̱ si dànanj gi̱ꞌhiaj nej suj ngà goꞌngo̱ nej dinï̂n hua̱ lij doj, ni̱ huê ngà Ma̱ꞌán huin sa giꞌhiaj nej suj dànanj.”
41 ’Hiôꞌ ni̱ huê dànanj gataj Ma̱ꞌan Rey gu̱nïn nej guiì ni̱kï̱nꞌ raꞌa neꞌ chrïn: “Gu̱xu̱n nej suj Ma̱ꞌan nej suj riñânj, dadinꞌ sí kï̱j huaa huin nej suj, ga̱ꞌa̱nj gi̱nun nìgànj nej suj ruhuâ rúnâko dadinꞌ gàꞌ hua̱ yu̱gui gi̱nun sa nàsàꞌa ngà daranꞌ nej ángel gi̱nikòꞌ rukuj na̱nj ánj.
42 Dadinꞌ ganachinj yiꞌnaa rikí, sani̱ nun gi̱ri̱ki̱ nej suj yàj, ni̱ ganakó nnee, ni̱ nun gi̱ri̱ki̱ nej suj nnee gòꞌòj.
43 Gahuín ꞌngo̱ sí ꞌna̱ꞌ aꞌngô yumanꞌan ni̱ nun ga̱na̱huin ra̱ꞌa nej suj ñùnj; ga nnèj ni̱ nun gi̱ri̱ki̱ nej suj atsìj i gi̱nûnj; gaꞌnán ni̱ gané dukuâ gaꞌa, ni̱ nun ga̱ꞌna̱ꞌ gi̱ni̱ꞌhiaj nej suj ñùnj.”
44 Hiôꞌ ni̱ nanikàj nej sí dânj ni̱ ga̱ta̱j nej sôꞌ: “Señor, àmàn giniꞌin nej ñûnj si ganachinj yiꞌnaa riki Ma̱ꞌân rèꞌ, ni̱ ganakô Ma̱ꞌân rèꞌ nnee, ni̱ gahuin Ma̱ꞌân rèꞌ sí ꞌna̱ꞌ aꞌngô yumanꞌan, ni̱ ga nnè Ma̱ꞌân rèꞌ, ni̱ gaꞌnanꞌ Ma̱ꞌân rèꞌ, ni̱ gane Ma̱ꞌân rèꞌ dukuâ gaꞌa, ni̱ nun gu̱na̱nj gi̱tsi nej ñûnj ni̱ nun gi̱ri̱ki̱ nej ñûnj sa gachín Ma̱ꞌân rèꞌ ràꞌaj.”
45 Hiôꞌ ni̱ nanikàj Ma̱ꞌan Rey dânj ni̱ gataj sôꞌ: “Yàngàꞌ hia nï̀nꞌ gàtà ni̱ nga nun gàꞌhuìꞌ nej suj sa ga̱chin riñan nej sí hua̱ lij doj gàꞌ daꞌ ñùnj, ni̱ dàj rûnꞌ huin si nun gi̱ri̱ki̱ nej suj riñânj huin.”
46 Hiôꞌ ni̱ ga̱ꞌa̱nj nej guiì nânj ruhuâ rúnâko guendâ ga̱huin kastîgu ninj nìgànj chre, ni̱ nej guiì giꞌhiaj sa ni̱ka̱a ni̱ ga̱ne nìgànj ninj ngà Ma̱ꞌan Ñaꞌanj an na̱nj ánj.