Ofrenda gaꞌhuiꞌ siyànà mi̱nj in
21
Ni̱ ganachi nikaj ña̱n Ma̱ꞌan Jesús,
ni̱ giniꞌin si gaꞌnḯn nej sí yi̱ruꞌhuee saꞌanj ofrenda ruhuâ chrún nu̱n ofrenda.
2 Ni̱ huê danj na̱nj giniꞌin Ma̱ꞌan Jesús gaꞌnḯn ꞌngo̱ siyànà minj ganìki chre huìj pesu.
3 Ni̱ gataj Ma̱ꞌan Jesús:
—Yàngàꞌ hia nï̀nꞌ tâ,
ni̱ siyànà nânj huin ganìki sani̱ dànanj nìko sanꞌanj an gaꞌhuij riñan Ma̱ꞌan Ñaꞌanj an dadinꞌ gaꞌhuij ngà daranꞌ nimanj gàꞌ daꞌ nej guiì yi̱ruꞌhuee na̱nj ánj.
4 Dadinꞌ daranꞌ nej guiì nânj gaꞌhuiꞌ ofrenda riñan Ma̱ꞌan Ñaꞌanj an sani̱ gaꞌhuiꞌ ninj saꞌanj gunâj riñan ninj,
sani̱ siyànà nânj,
ni̱ ganìki huin sani̱ gaꞌhuij daranꞌ saꞌanj ni̱ka ni̱ sanꞌanj nânj huin sanꞌanj gi̱ranj sa yaj.
Gataj Ma̱ꞌan Jesús si du̱guane nej sij nuhuî nìko nne ruhuâ yumanꞌ snàꞌànj Jerusalén
5 Da̱ꞌa̱j nej guiì gaꞌmin rayiꞌî hueꞌ nûhui,
ni̱ gataj ninj si ûta nìhiàꞌ hua hueꞌ dânj ngà nej hiëj nìꞌhiàꞌa,
ni̱ nagiꞌhiaj nìhiàꞌ ninj hueꞌ dânj ngà nej ofrenda gaꞌhuiꞌ nej guiì riñan Ma̱ꞌan Ñaꞌanj an,
ni̱ gataj Ma̱ꞌan Jesús.
6 —Rayiꞌî nej hiëj ganachrâj nej sij nuhuî hua̱ sàꞌ nânj,
ni̱ gùyùmàn gui ni̱ si̱ gitá yichrá duguiꞌij,
dadinꞌ ga̱ne̱ daranꞌanj na̱nj ánj.
Sa ga̱huin ngà ga̱na̱huij yumiguìi
7 Ni̱ gachín naꞌanj nej sij,
ni̱ gataj nej sij:
—Maestrûj.
Àmàn ga̱huin nej sa gataj Ma̱ꞌân rèꞌ dânj ràꞌaj.
Ni̱ ahuin daꞌngaꞌ gi̱ni̱ꞌin nej ñûnj nga ga̱huin dàj rûnꞌ gataj Ma̱ꞌân rèꞌ ràꞌaj.
8 Hiôꞌ ni̱ gataj Ma̱ꞌan Jesús:
—Niꞌhiaj nej suj ni̱ si̱ gidigañuꞌunj nej síi nej suj;
dadinꞌ ga̱ꞌna̱ꞌ ûta gàꞌì nej síi ni̱ ga̱ra̱n sun nej sôꞌ siyu̱guí ni̱ ga̱ta̱j nej sôꞌ:
“Ñùnj huin Ma̱ꞌan Cristo”;
ni̱ “Gàꞌ gahuin nichrunꞌ diû.”
Sani̱ si̱ gaꞌanj nej suj ngà nej sôꞌ mánj.
9 Ni̱ nga gunïn nej suj si gùtàꞌ nej síi ni̱ ga̱huin sañuun,
ni̱ si̱ guyuꞌhuiꞌ nej suj;
dadinꞌ hua̱ ni̱ña̱n si gàꞌ si̱nï̱n ga̱huin nej nânj.
10 Hiôꞌ ni̱ gataj Ma̱ꞌan Jesús:
—Ni̱ gu̱nï̱nꞌ ꞌngo̱ país ngà aꞌngô país ni̱ gu̱nï̱nꞌ ngo̱ rey ngà aꞌngô rey.
11 Ni̱ ûta nùkuaj ga̱ꞌhuij ñûn,
ni̱ ga̱ yiꞌnaa,
ni̱ ga̱ yiꞌìi;
ni̱ ûta yuꞌhuîꞌ ga̱huin nï̀nꞌ gàchràꞌ ni̱ ga gàꞌì nej daꞌngaꞌa neꞌ yàtàꞌa.
12 ’Sani̱ nga nï̀nꞌ ga̱chin gìsìj nej nuguanꞌ nânj ni̱ gi̱daꞌa nej sij nej suj,
ni̱ ga̱ta̱ ra̱ꞌa nej sij nej suj,
ni̱ nàgàꞌhuìꞌ nej sij nej suj raꞌa nej rej ni̱kï̱nꞌ riñan nûhui,
ni̱ ga̱chri̱ nej sôꞌ dukuâ ga̱ꞌa nej suj,
ni̱ ginikaj nej sôꞌ ga̱ꞌa̱nj nej sôꞌ nej suj riñan nej rey ni̱ riñan nej sí ni̱ka̱j suun rayiꞌî siyu̱gui Maꞌán.
13 Hiôꞌ ni̱ nga giranꞌ nej suj dànanj ni̱ ga̱na̱nï̱n nej suj rayiꞌí riñan nej sí ni̱ka̱j suun.
14 Sani̱ si̱ nadigiꞌñûn si̱nï̱n nej suj ngà ruhuâ nimân nej suj dàj du̱naꞌhuej nej suj rayiꞌî nej suj mánj;
15 dadinꞌ rìkìj nuguanꞌan ga̱ꞌmi̱n nej suj ni̱ dàj rûnꞌ gaꞌmin nej sí chru̱n nï̀nꞌ rûhua,
huê danj ga̱ꞌmi̱n nej suj ni̱ si̱ giriꞌ nej sí dânj nuguanꞌan du̱nanikàj nej sôꞌ riñan nej suj.
16 Ni̱ rej nej ma̱ꞌan nej suj ga̱ra̱n ruhuâ rayiꞌî nej suj,
ni̱ ga̱ra̱n ruhuâ dinḯn nej suj rayiꞌî nej suj,
ga̱ra̱n ruhuâ nej duguiꞌ nej suj rayiꞌî nej suj,
ni̱ ga̱ra̱n ruhuâ nej sí ni̱ka̱j duguiꞌ ngà nej suj rayiꞌî nej suj;
ni̱ da̱gahui nej sôꞌ da̱ꞌa̱j nej suj;
17 gi̱ni̱nj ꞌì daranꞌ nej suj riñan nej sij rayiꞌî siyu̱guí.
18 Sani̱ si̱ gaꞌanj ni̱ꞌhia gàꞌ si̱ ꞌngo̱ rïn huê ahui nej suj mánj.
19 Ga̱ nùkuaj ruhuâ nej suj daꞌnga ni̱ gi̱ꞌhiaj nej suj si ga̱na̱ni̱n ma̱ꞌan nimân nej suj.
20 ’Sani̱ nga gi̱ni̱ꞌin nej suj si nda ganikàj chre gimàn stâdu rukû yumanꞌ snàꞌànj Jerusalén,
hiôꞌ ni̱ gi̱ni̱ꞌin nej suj si gàꞌ guyumân diû ga̱na̱huij yumanꞌ snàꞌànj dânj.
21 Hiôꞌ ni̱ nej suj nne Judea,
ni̱ gu̱na̱nj nej suj ga̱ꞌa̱nj nej suj riki kï̱j ï;
ni̱ nej suj nne ruhuâ yumanꞌ snàꞌànj Jerusalén ni̱ ga̱hui̱ nej suj ruhuâ yumanꞌ snàꞌànj dânj ga̱ꞌa̱nj nej suj aꞌngô yumanꞌan;
ni̱ nej suj nu̱n giꞌhiaj sun kïj ï,
ni̱ si̱ naꞌnaꞌ nej suj ruhuâ yumanꞌ snàꞌànj nânj gàꞌ mánj.
22 Dadinꞌ nej gui nânj ga̱huin nej gui sa̱ñu̱un,
daꞌnga ni̱ gìsìj daranꞌ nuguanꞌ nnùn riñanj ñanj si-nùguànꞌ Ma̱ꞌan Ñaꞌanj an.
23 Sani̱ ûta giranꞌ sa̱ñu̱n nej siyànà nu̱n ri̱ki,
ni̱ nej siyànà ni̱ka̱j neꞌej nï̀nꞌ gutsi nga gùyùmàn gui dânj,
dadinꞌ ûta gi̱ranꞌ sañun nej guiì màn riñan hioꞌó nânj,
dadinꞌ ga̱ꞌna̱ꞌ ꞌngo̱ sa̱ñu̱n nìko xi riñan ninj.
24 Ni̱ gàhuìꞌ da̱ꞌa̱j nej guiì,
ni̱ aꞌngô da̱ꞌa̱j ninj ginikaj nej sí dânj ga̱ꞌa̱nj nej sôꞌ aꞌngô nej yumanꞌ màn ruhuâ yumiguìi;
ni̱ gùrùn nej sí nàsìnùnj un ruhuâ yumanꞌ snàꞌànj Jerusalén,
nda ga̱na̱huij diû gi̱nikaj su̱n nej sôꞌ.
Gaꞌnaꞌ ñûn Ma̱ꞌan Jesús
25 ’Hiôꞌ ni̱ gùrùguìꞌ daꞌngaꞌa riñan gui,
ni̱ gùrùguìꞌ daꞌngaꞌa riñan ahuii ni̱ gùrùguìꞌ daꞌngaꞌa riñan nej atïꞌï,
ni̱ ûta gu̱yuꞌhuiꞌ nej guiì,
ni̱ ûta gùrùguìꞌ chìꞌ ruhuâ ninj dadinꞌ ûta garï̱n ga̱huin duꞌhua nne ña̱ꞌa̱nj ni̱ ûta nàyùmàn nne ña̱ꞌa̱nj;
26 ni̱ nda gi̱ni̱nj ruminꞌ nej guiì guendâ gu̱yuꞌhuiꞌ ninj rayiꞌî nej sa ga̱huin ni̱ ûta ga̱huin ruhuâ ninj rayiꞌî aꞌngô nej sa gahuin riñan nej sa màn riñan hioꞌóo;
dadinꞌ gìsìkìꞌ nej sa nùkuaj màn neꞌ yàtàꞌa.
27 Hiôꞌ ni̱ gi̱ni̱ꞌin ninj Daꞌní Ma̱ꞌan síi,
dadinꞌ gùyùmanj riñan nnga ni̱ ûta nìko hua sun gi̱nika ni̱ nda raa̱n chre huaj nga ga̱ꞌnaj.
28 Nga gayi̱ꞌij ga̱huin nej nânj,
ni̱ ga̱na̱nikïnꞌ ran nej suj ni̱ ga̱na̱chi nikaj ñan nej suj,
dadinꞌ gàꞌ ꞌna̱ꞌ ga̱huin nìchrùnꞌ sa gi̱ꞌhiaj ga̱na̱ni̱n nej suj.
29 Ni̱ ganataꞌ Ma̱ꞌan Jesús aꞌngo̱ nuguanꞌ ráan ni̱ gata:
—Gi̱ni̱ꞌhiaj nej suj dàj hua̱ chrun îgu ngà daranꞌ nej chrun.
30 Nga ꞌna̱ꞌ gìsìj koj raꞌa nej chrun dânj,
ni̱ gi̱ni̱ꞌin nej suj,
si gàꞌ ꞌna̱ꞌ ga̱huin nìchrùnꞌ diû ña̱ꞌan.
31 Huê danj na̱nj nej suj,
ni̱ nga gi̱ni̱ꞌin nej suj ga̱huin nej nânj,
ni̱ ga̱ra̱n daꞌngaꞌ ruhuâ nej suj si gàꞌ ꞌna̱ꞌ ga̱huin nìchrùnꞌ Ma̱ꞌan Ñaꞌanj an guendâ gi̱ni̱kaj sunj riñan nej suj.
32 ’Yàngàꞌ hia nï̀nꞌ gàtà,
ni̱ dàñùn ga̱huin nej nânj nga nï̀nꞌ ga̱chin ga̱na̱huij nej guiì màn riñan hioꞌóo.
33 Ga̱na̱huij yàtàꞌa ngà hioꞌóo,
sani̱ dàñùn gahuin daranꞌ sa taj riñan ñanj si-nùguànꞌ Ma̱ꞌan Ñaꞌanj an na̱nj ánj.
34 ’Ga̱ gu̱dadû nej suj ngà ma̱ꞌan nej suj,
ni̱ gi̱ni̱ꞌhiaj nej suj ni̱ si̱ ganahuin tsì nimân nej suj gi̱ꞌhiaj gakï̱nꞌïn,
ni̱ si̱ goꞌo nej suj nne berente ni̱ si̱ gahuin taꞌu ruhuâ nej suj guendâ ga̱ gàꞌì nej rasu̱n màn ruhuâ yumiguìi nânj riñan nej suj,
dadinꞌ si̱ giniꞌin daꞌngaꞌ nej suj gùyùmàn gui dânj riñan nej suj mánj.
35 Dadinꞌ dàj rûnꞌ ganaꞌmân yinùu huê danj gùyùmàn diû dânj riñan nej guiì màn nï̀nꞌ gàchràꞌ ruhuâ yumiguìi.
36 Dugumîn hueꞌê nej suj ma̱ꞌan nej suj riñan gakï̱nꞌïn,
ni̱ ga̱ꞌmi̱n nej suj ngà Ma̱ꞌan Ñaꞌanj an daranꞌ diû ni̱ gu̱ru̱gûñuꞌun ni̱ ga̱na̱ni̱n nej suj riñan nej sañun ga̱na̱ꞌa,
huê danj gi̱ꞌhiaj nej suj daꞌnga ni̱ ga̱ꞌhue ga̱ni̱kïnꞌ ran nej suj riñânj nga gùyùmàn gui dânj na̱nj ánj.