Giꞌhiaj yu̱gui nej sij gi̱da̱ꞌa nej sij ni̱ dagahuiꞌ nej sij Ma̱ꞌan Jesús
22
ꞌNa̱ꞌ ga̱huin nichrunꞌ giꞌñanj pascua,
nga yâ nej sij rachrún nitaj si ꞌnï̱nj chru dunuꞌmanꞌan.
2 Ni̱ nanaꞌhuiꞌ nej rej huin ña̱an ngà nej sí chru̱n ley dàj giꞌhiaj nej sôꞌ ga̱ꞌhue da̱gahuiꞌ nej sôꞌ Ma̱ꞌan Jesús;
sani̱ guyuꞌhuiꞌ nej sôꞌ niꞌin nej sôꞌ nej guiì yùmànꞌan.
3 Ni̱ gatûj sichre ruhuâ nimân Judas,
ni̱ huê sôꞌ gùꞌnàj Judas Iscariote,
ni̱ sí nânj huin ꞌngo̱ nej yùhuìj sí gaꞌnaꞌ ga̱huin chru̱n riñan Ma̱ꞌan Jesús.
4 Sí nânj gaꞌanj ga̱ꞌmi̱n ngà nej rej huin ña̱an,
ni̱ ngà nej sí aꞌnïnꞌ riñan nej sí dugumîn riñan hueꞌ huin nûhui,
dàj gi̱ꞌhiaj sôꞌ ga̱ꞌhue nàgàꞌhuìꞌ sôꞌ Ma̱ꞌan Jesús.
5 Ni̱ ûta gahuin nìhiàꞌ ruhuâ nej sí dânj,
ni̱ guchiꞌ nej sôꞌ ꞌngo̱ duꞌhua si ga̱ꞌhue gàꞌhuìꞌ nej sôꞌ sanꞌanj an riñan Judas.
6 Ni̱ garânj yina sôꞌ ni̱ nanaꞌhuiꞌ sôꞌ dàj giꞌhiaj sôꞌ ni̱ si̱ giniꞌin nej guiì yùmànꞌan nga nàgàꞌhuìꞌ sôꞌ Ma̱ꞌan Jesús.
Gaꞌnïnꞌ su̱n Ma̱ꞌan Jesús si gi̱daꞌa nej sij Sena
7 Ni̱ guyumân gui nga ya̱ nej sij rachrún nitaj si ꞌnï̱nj chru dunuꞌmanꞌan,
ni̱ giꞌñanj nânj ña̱ꞌa̱n huaj si gàhuìꞌ ꞌngo̱ matsïj ꞌnìnj in ya̱ nej sij pascua.
8 Ni̱ gaꞌnḯn Ma̱ꞌan Jesús gaꞌanj Pedro ngà Juan,
ni̱ gata gu̱nïn nguèj sôꞌ:
—Ga̱ꞌa̱nj nguèj suj ni̱ gi̱ꞌhiaj yu̱gui nguèj suj sa ya̱ nêꞌ giꞌñanj pascua.
9 Ni̱ gataj nguèj sôꞌ:
—Dànèꞌ garanꞌ ruhuâ Ma̱ꞌân rèꞌ si gi̱ꞌhiaj yu̱gui nguèj ñûnj ràꞌaj.
10 Ni̱ gataj Ma̱ꞌan Jesús gu̱nïn nguèj sij:
—Gi̱ni̱ꞌhiaj nguèj suj ni̱ nga ga̱tu̱ nguèj suj ruhuâ yumanꞌ snàꞌànj an ni̱ gànàrìꞌ nguèj suj ꞌngo̱ sí dânj ni̱ ata sôꞌ ꞌngo̱ sigù nu̱n nnee hua̱j sôꞌ;
ni̱ gi̱nikòꞌ nguèj suj ga̱ꞌa̱nj nguèj suj nda ña̱n nne hueꞌ ga̱tu̱ sôꞌ,
11 ni̱ ga̱ta̱j nguèj suj gu̱nïn sí dùkuà hueꞌ dânj:
“Ma̱ꞌan Maestrû gaꞌnḯn ꞌnaꞌ nguèj ñûnj ni̱ gataj sôꞌ:
Dànèꞌ nne hueꞌ ñan yàj ngà nej sí ꞌna̱ꞌ ga̱huin chru̱n riñânj ràꞌaj.”
12 Hiôꞌ ni̱ gi̱di̱gân sí dânj ꞌngo̱ hueꞌ ganataꞌ hua̱ nìko ni̱ gàꞌ hua̱ yu̱guiꞌ;
ni̱ hiuj dânj giꞌhiaj yu̱gui nguèj suj ya̱ nêꞌ.
13 Huê danj,
ni̱ gaꞌanj nguèj sí dânj,
ni̱ ganariꞌ nguèj sôꞌ dàj rûnꞌ gataj Ma̱ꞌan Jesús;
ni̱ hiuj dânj giꞌhiaj yu̱gui nguèj sôꞌ giꞌñanj pascua ya̱ nej sij.
14 Ni̱ nga gisîj orâ ya̱ nej sij,
ni̱ gaꞌanj ga̱ne Ma̱ꞌan Jesús yiꞌnḯn mesa,
ngà nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an.
15 Ni̱ gata:
—Ûta huin ruhuâj yàj ngà nej suj giꞌñanj pascua nga nï̀nꞌ ga̱chin gàhuìj.
16 Dadinꞌ si̱ yâj ngà nej suj gàꞌ mánj,
nda gùyùmàn diû gaꞌnaꞌ gi̱nikaj su̱n Ma̱ꞌan Ñaꞌanj nne yàtàꞌa.
17 Ni̱ nga gisîj gidaꞌa Ma̱ꞌan Jesús basu nu̱n nne bino,
ni̱ gaꞌhuij si guruhuâ Ma̱ꞌan Ñaꞌanj an,
ni̱ gata:
—Gi̱da̱ꞌa̱ nej suj basû nânj ni̱ gùnùchràꞌ da̱ꞌa̱j nej suj riñan daꞌ goꞌngo̱ nej suj;
18 dadinꞌ ñùnj taj gu̱nïn nej suj ni̱ nitaj àmàn gòꞌòj nne chruj uba,
nda ga̱ꞌna̱ꞌ gi̱nikaj su̱n Ma̱ꞌan Ñaꞌanj an riñan daranꞌ nej guiì màn ruhuâ yumiguìi.
19 Ni̱ gidaꞌa rachrúun ni̱ gaꞌhuij si guruhuâ Ma̱ꞌan Ñaꞌanj an,
ni̱ guchraꞌ da̱ꞌa ni̱ gaꞌhuij raꞌa nej sí ꞌna̱ꞌ ga̱huin chru̱n riñanj ni̱ gata:
—Nânj huin nneè kû ni̱ riñan nej suj ga̱na̱ruꞌhuej,
ni̱ ya̱ nej suj rachrún nânj ni̱ ga̱na̱nun ruhuâ nej suj niꞌin nej suj ñùnj.
20 Ni̱ nga gisîj yâ stiꞌnï̀n nej sij ni̱ huê danj na̱nj gidaꞌa basu nu̱n nne bino ni̱ gata:
—Sa nu̱n ruhuâ basu nânj huin tún ni̱ nânj huin nuguanꞌ na̱gi̱ꞌhiaj nàkàj ngà nej suj,
dadinꞌ huê rayiꞌî nej suj huin gañan na̱nj ánj.
21 ’Sani̱ ñan tàj raꞌá,
ni̱ huê hiuj dan tá raꞌa sí nàgàꞌhuìꞌ ñùnj.
22 Yàngàꞌ hia nï̀nꞌ ni̱ hua̱ gàꞌàn,
dàj rûnꞌ giyiꞌnïnꞌ suun rayiꞌí;
sani̱ ûta gi̱ranꞌ sa̱ñu̱n sí nàgàꞌhuìꞌ ñùnj.
23 Hiôꞌ ni̱ gayiꞌì nej sí ꞌna̱ꞌ ga̱huin chru̱un ni̱ ganarïsnaꞌanj nej sôꞌ siganï̂nj nej ma̱ꞌan nej sôꞌ ni̱ gataj nej sôꞌ,
ahuin goꞌngo̱ nej sôꞌ huin sí nàgàꞌhuìꞌ Ma̱ꞌan Jesús.
Ahuin goꞌngo̱ nej sij ga̱huin sí aꞌnïnꞌ doj
24 Ni̱ huê danj na̱nj gunïnꞌ nej sí ꞌna̱ꞌ ga̱huin chru̱un rayiꞌî guendâ ahuin goꞌngo̱ nej sôꞌ ga̱huin sí huin ña̱n doj siganï̂nj nej sôꞌ.
25 Sani̱ gataj Ma̱ꞌan Jesús:
—Nej rey ni̱ka̱j su̱n riñan nej país ni̱ gahuin achij nej sôꞌ riñan siꞌhiaj nej guiì màn ruhuâ país dânj,
ni̱ sí ni̱ka̱j su̱n riñan nej guiì màn ruhuâ país dânj gataj si huin nej sôꞌ sí sàꞌaj;
26 sani̱ si̱ ga̱ꞌhue danj gaj siganï̂nj nej suj mánj,
ni̱ sí gahuin achij riñan nej suj ni̱ ga̱huin sôꞌ sí hua̱ lij doj siganï̂nj nej suj,
ni̱ sí ginikaj su̱n riñan nej suj,
ni̱ ga̱huin sôꞌ ꞌngo̱ sí gu̱na̱nj gi̱tsi riñan nej suj.
27 Dadinꞌ.
Ahuin sí huin sí aꞌnïnꞌ doj gataj nej guiì ràꞌaj.
Sí gunânj gi̱ꞌtsi huin nîꞌ si sí nne yiꞌnḯn mesa huin sàꞌ.
Sê sí aꞌnïnꞌ doj huin sí nne yiꞌnḯn mesa gataj nej guiì ràꞌ saj ûnꞌ.
Sani̱ ñùnj ni̱ nné siganï̂nj nej suj sani̱ huín ꞌngo̱ sí gunânj gi̱tsi riñan nej suj.
28 ’Sani̱ nej suj ni̱ gunukuaj nej suj gane nej suj ni̱ nun gu̱du̱nâj nej suj ñùnj nga giranꞌ sàñùnj mánj.
29 Ni̱ rikîj suun ni̱ gi̱nikaj su̱n nej suj riñan yumiguìi,
dàj rûnꞌ girikî Ma̱ꞌan Rê suun ginikaj sùnj riñan yumiguìi.
30 Daꞌnga ni̱ ya̱ nej suj ni̱ go̱ꞌo̱ nej suj ña̱n ga̱né ginikaj sùnj,
ni̱ ga̱ne nej suj riñan chru̱n yîla ni̱ ginikaj su̱n nej suj riñan nej yùhuìj nej yiꞌnïnꞌ huin daꞌní Israel.
Gataj Ma̱ꞌan Jesús si gùyùmàn ꞌngo̱ ora ni̱ ga̱ta̱j Pedro si nun niꞌin sôꞌ Ma̱ꞌan
31 Gataj Ma̱ꞌan Señor:
—Simón,
Simón,
niꞌhiaj sòꞌ dadinꞌ gachín sichre nej suj guendâ ga̱ya̱ka daꞌngaꞌa ngà nej suj ni̱ na̱gu̱nanj nej suj dàj rûnꞌ giꞌhiaj nej síi nga nagunanꞌ nej sij trigu.
32 Sani̱ gàꞌ gachín ni̱ꞌhia riñan Ma̱ꞌan Ñaꞌanj an rayiꞌîꞌ,
sisi̱ si̱ gininaj ruhuâꞌ;
ni̱ nga nanikàj ruhuâꞌ ni̱ ga̱na̱ꞌmi̱nꞌ ngàj,
ni̱ giꞌhiâꞌ si ga̱na̱huin nùkuaj nej dinḯnt.
33 Ni̱ gataj pedro gu̱nïn Ma̱ꞌan Jesús:
Señor,
hua̱ ruhuâj ga̱ꞌa̱n ngà Ma̱ꞌân rèꞌ sani̱ sê man dukuâ ga̱ꞌa mánj,
dadinꞌ hua̱ ruhuâj gàhuìj ngà Ma̱ꞌân rèꞌ.
34 Hiôꞌ ni̱ gataj Ma̱ꞌan Jesús:
—Pedro,
tâ si̱ huê gè gui hia̱j,
nga nï̀nꞌ gachin ga̱gua̱j dêꞌlo̱j o,
ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj.
Nga ga̱ꞌa̱nj nej suj ni̱ ga̱ꞌhue gi̱nikaj nej suj nnanj, sichra̱nꞌan ni̱ yîti ga̱ꞌa̱nj nej suj
35 Ni̱ gataj Ma̱ꞌan Jesús gu̱nïn nej sí gaꞌnaꞌ ga̱huin chru̱n riñanj:
—Nga gaꞌnï̂n gaꞌanj nej suj ni̱ nun ga̱ꞌhue̱ si gi̱nikaj nej suj nnanj,
ni̱ sichra̱nꞌan,
kanj,
ni̱ hua̱ ꞌngo̱ sa gachin riñan nej suj na̱nj nîꞌ:
Gataj nej sij:
—Nitaj nùnj gachin riñan nej ñûnj man Señor.
36 Ni̱ gataj Ma̱ꞌan Jesús:
—Sani̱ hia̱j ni̱ si̱ hua̱ ꞌngo̱ nej suj hua̱ nnanj giꞌhiaj,
ni̱ ga̱ꞌhue gi̱nikaj nej suj ga̱ꞌa̱nj nej suj,
ni̱ ga̱ꞌhue gi̱nikaj nej suj sichra̱nꞌan ga̱ꞌa̱nj nej suj,
ni̱ si nitaj yîti nikaj nej suj ni̱ ga̱ꞌhue guduꞌhue nej suj atsîj ni̱ke̱ nej suj ni̱ gi̱ra̱n nej suj ꞌngo̱ yîti ginikaj nej suj.
37 Dadinꞌ ña̱ꞌa̱n huaj si gìsìj daranꞌ nej nuguanꞌ gachrûn nej sôꞌ rayiꞌí dadinꞌ huê danj taj riñan ñanj:
“Gi̱ꞌhiaj nej sij ngà sôꞌ dàj rûnꞌ giꞌhiaj nej sij ngà nej sí gakï̱nꞌïn.”
Dadinꞌ dàj rûn taj riñan ñanj rayiꞌí ni̱ huê danj ga̱huin ni̱ña̱n na̱nj ánj.
38 Hiôꞌ ni̱ gataj nej sí ꞌna̱ꞌ ga̱huin chru̱un:
—Señor,
hiuj nan nngaj huìj yîti.
Ni̱ gataj Ma̱ꞌan Jesús:
—Huê dânj gaj ni̱ si̱ gaꞌminꞌ doj gàꞌ mánj.
Gaꞌanj ga̱ꞌmi̱n Ma̱ꞌan Jesús ngà Ma̱ꞌan Ñaꞌanj an ñan gùꞌnàj Getsemaní
39 Gahui ni̱ gaꞌan kï̱j ña̱n màn nej chrun olibo,
dàj rûnꞌ hua chrej ni̱ka,
ni̱ huê danj na̱nj gaꞌanj nej sí ꞌna̱ꞌ ga̱huin chru̱un nngaj.
40 Ni̱ nga guchiꞌ Ma̱ꞌan Jesús hiuj dânj,
ni̱ gata gu̱nïn nej sôꞌ:
—Gàchìnj nìꞌhiaj nej suj daꞌnga ni̱ si̱ gininj nej suj riñan gakï̱nꞌïn nga du̱guane sichre riñan nej suj.
41 Ni̱ gahuin anêj Ma̱ꞌan Jesús riñan nej sí ꞌna̱ꞌ ga̱huin chru̱n riñanj dàj rûnꞌ ga̱nꞌ gininj ꞌngo̱ hiëj garrûn ꞌngo̱ síi;
ni̱ ganikïnꞌ rúdàko ni̱ gayiꞌij ni̱ gaꞌmin ngà Ma̱ꞌan Ñaꞌanj an,
42 Ni̱ gata:
—Taj,
si ruhuâ Ma̱ꞌân rèꞌ,
ni̱ si̱ giꞌhiaj Ma̱ꞌân rèꞌ si gi̱ranꞌ sàñùnj mánj;
sani̱ si̱ giꞌhiaj Ma̱ꞌân rèꞌ sa garanꞌ ruhuâj mánj,
giꞌhiaj Ma̱ꞌân rèꞌ ngàj dàj rûnꞌ garanꞌ ruhuâ Ma̱ꞌan rèꞌ.
43 Huê danj ni̱ gaꞌnaꞌ ꞌngo̱ ángel ꞌna̱ꞌ neꞌ yàtàꞌa guendâ na̱gi̱ꞌhiaj nu̱kua Ma̱ꞌan Jesús.
44 Ni̱ ûta giranꞌ sa̱ñu̱n Ma̱ꞌan Jesús,
hiôꞌ ni̱ dànanj ûta nùkuaj gayiꞌij gaꞌmin ngà Ma̱ꞌan Ñaꞌanj an;
ni̱ dàj rûnꞌ nìko hua tsin tun nga gañan ñan giranꞌ yiꞌìi huê danj nìko hua tsin nihia̱a nìkòꞌ riñan Ma̱ꞌan Jesús.
45 Ni̱ nga gisîj gaꞌmin Ma̱ꞌan Jesús ngà Ma̱ꞌan Ñaꞌanj an,
ni̱ ganayumanj ni̱ gaꞌnaj ña̱n màn nej sí ꞌna̱ꞌ ga̱huin chru̱n riñanj,
ni̱ doꞌ si atoj nej sôꞌ nngaj nej sôꞌ ganariꞌij dadinꞌ si ûta gananï̂n ruhuâ nej sôꞌ;
46 ni̱ gataj Ma̱ꞌan Jesús gu̱nïn nej sôꞌ:
—Nùnj huin saj ni̱ atoj nej suj ràꞌaj.
Ga̱na̱chi nej suj,
ni̱ ga̱ꞌmi̱n nej suj ngà Ma̱ꞌan Ñaꞌanj an daꞌnga ni̱ si̱ gininj nej suj riñan gakï̱nꞌïn nga duguaneꞌ sichre riñan nej suj mánj.
Gaꞌnaꞌ gi̱daꞌa nej sij Ma̱ꞌan Jesús
47 Nga nï̀nꞌ aꞌmin Ma̱ꞌan Jesús nikïnj hiuj dânj,
ni̱ guyumân ꞌngo̱ yiꞌnïnꞌ nej síi riñanj;
ni̱ sí gùꞌnàj Judas ꞌnaꞌ neꞌ ña̱an riñan nej sí dânj,
ni̱ huin sôꞌ ꞌngo̱ nej yùhuìj sí gaꞌnaꞌ ga̱huin chru̱n riñanj;
ni̱ gaꞌnaꞌ sôꞌ nda ñan nìkï̀nj guendâ ga̱chru̱n du̱ꞌhua sôꞌ yiꞌnḯn riñanj.
48 Ni̱ gata gu̱nïn sôꞌ:
—Judas.
Gachrûn du̱ꞌhuâꞌ ñùnj guendâ nàgàꞌhuìꞌ ñùnj na̱nj nînꞌ.
49 Ni̱ giniꞌin nej sí gaꞌnaꞌ ga̱huin chru̱n riñan Ma̱ꞌan Jesús nej sa gahuin,
ni̱ gataj nej sôꞌ:
—Señor,
gu̱du̱ranꞌ yiꞌì nej ñûnj nej sí nânj ngà yîti nîꞌ.
50 Ni̱ guduranꞌ yiꞌì ꞌngo̱ nej sí gaꞌnaꞌ ga̱huin chru̱n riñan Ma̱ꞌan Jesús ꞌngo̱ si-musû rej huin ña̱an,
ni̱ gaꞌneꞌ sôꞌ rakïj sí dânj neꞌ huàꞌ sôꞌ.
51 Hiôꞌ ni̱ nanikàj Ma̱ꞌan Jesús,
ni̱ gata:
—Si̱ giꞌhiaj nej suj dànanj mánj.
Ni̱ gaganꞌ raꞌa Ma̱ꞌan Jesús rakïj sí dânj,
ni̱ gananûn rakïj sôꞌ giꞌhia.
52 Ni̱ gataj Ma̱ꞌan Jesús gu̱nïn nej rej huin ña̱an,
ngà riñan nej sí aꞌnïnꞌ riñan nej sí ni̱kï̱nꞌ dugumîn hueꞌ huin nûhui ngà nej síchìj achij i,
dadinꞌ nej sí nânj gaꞌnaꞌ gi̱da̱ꞌa̱ Ma̱ꞌan ni̱ gata gu̱nïn nej sôꞌ:
—Dàj rûnꞌ giꞌhiaj nej suj nga huaj gi̱da̱ꞌa̱ nej suj ꞌngo̱ sí tu̱u,
huê danj giꞌhiaj nej suj ngàj dadinꞌ ni̱ka̱j nej suj yîti ngà chrun gurûtin gaꞌnaꞌ gi̱da̱ꞌa̱ nej suj ñùnj na̱nj nîꞌ.
53 Ni̱ gané daranꞌ nej gui ngà nej suj ruhuâ hueꞌ huin nûhui,
ni̱ nun gi̱da̱ꞌa nej suj ñùnj;
sani̱ gàꞌ guyumân ora si hua̱ ni̱ña̱n si dànanj gi̱ꞌhiaj nej suj ngàj,
dadinꞌ sichre huin si ni̱ka̱j su̱n riñan nej suj ni̱ guyumân si orâj na̱nj ánj.
Gataj Pedro si nun niꞌin sôꞌ Ma̱ꞌan Jesús
54 Ni̱ gidaꞌa nej sij Ma̱ꞌan Jesús,
ni̱ ni̱ka̱j nej sij gaꞌanj nej sij,
ñan nne dukuâ si-su̱n rej huin ña̱an.
Ni̱ nìkòꞌ Pedro huaj sôꞌ nda gànꞌ.
55 Ni̱ da̱nï̱n hueꞌ dukuâ si-su̱n rej dânj ganaranꞌ nej sí dânj ñaꞌaan,
ni̱ nda ganikàj mân nej sôꞌ ganahuin gï̀n nej sôꞌ ñaꞌaan;
ni̱ gaꞌanj ga̱ne Pedro siganï̂nj nej sôꞌ.
56 Sani̱ giniꞌin ꞌngo̱ siyànàa,
nne Pedro ganahuin gï̀n sôꞌ ñaꞌaan,
ni̱ ûta sàꞌ gaꞌnï̂n ñan siyànà danj riñan sôꞌ,
ni̱ gata gu̱nïn sôꞌ:
—Sinaꞌu nne hiuj dânj nikaj duguiꞌ ngà Ma̱ꞌan Jesús.
57 Sani̱ nun ga̱ꞌhue̱j Pedro si ni̱ka̱j duguiꞌ sôꞌ ngà Ma̱ꞌan Jesús ni̱ gataj sô:
—Nun niꞌín sí gataj dânj mánj.
58 Neꞌ rùkù doj ni̱ giniꞌin aꞌngô sí dânj,
Pedro ni̱ gataj sôꞌ:
—Huê sòꞌ huin sí ni̱ka̱j duguiꞌ ngà Jesús,
ni̱ gataj Pedro:
Nitaj si ni̱ka̱j duguiꞌí ngà sí gataj dânj mánj.
59 Neꞌ rùkù nga gachîn daꞌnga si ꞌngo̱ ora,
ni̱ huê gè danj gataj aꞌngô sí dânj gu̱nïn Pedro:
—Yàngàꞌ hia nï̀nꞌ ni̱ gaché sí nânj ngà Ma̱ꞌan Jesús,
dadinꞌ sí ꞌna̱ꞌ hioꞌó Galilea huin sôꞌ.
60 Ni̱ gataj Pedro:
—Nun niꞌín ahuin ràyìꞌì gaꞌminꞌ mánj.
Ni̱ nga nï̀nꞌ aꞌmin Pedro dànanj,
ni̱ orâ chre,
ni̱ gaguâj dêꞌlo̱j o.
61 Hiôꞌ ni̱ nanikàj Ma̱ꞌan Jesús,
ni̱ giniꞌhia riñan Pedro;
hiôꞌ ni̱ gananun ruhuâ sôꞌ nej nuguanꞌ gataj Ma̱ꞌan Jesús gu̱nïn sôꞌ,
dadinꞌ gàꞌ gata:
“Nga nï̀nꞌ ga̱chin ga̱gua̱j dêꞌlo̱j o,
ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj.”
62 Ni̱ gananun ruhuâ Pedro rayiꞌî nuguanꞌ nânj ni̱ gahui sôꞌ neꞌ ye̱ꞌ hueꞌ dânj ni̱ nanikàj ruhuâ sôꞌ sa giꞌhiaj sôꞌ ngà Ma̱ꞌan Jesús ni̱ gayiꞌì sôꞌ ni̱ ûta gudugueꞌe sôꞌ.
Gaꞌmin duku nej sí màn dugumîn dânj Ma̱ꞌan Jesús ni̱ gaꞌhuiꞌ nej sôꞌ niꞌhia
63 Ni̱ gaꞌmin duku nej sí màn dugumîn Ma̱ꞌan Jesús,
ni̱ gaꞌhuiꞌ nej sôꞌ niꞌhia;
64 Ni̱ garán nej sôꞌ atsìj i rune ñanj,
ni̱ gaꞌhuiꞌ nej sôꞌ guchruꞌu riñanj,
ni̱ gachín naꞌanj nej sôꞌ ni̱ gataj nej sôꞌ:
—Ga̱ta̱j sòꞌ ahuin sí gaꞌhuiꞌ niꞌhiâꞌ staj.
65 Ni̱ ûta gàꞌì aꞌngô nej nuguanꞌ kï̱j hua̱a gaꞌmin nej sij riñan Ma̱ꞌan Jesús.
Ni̱ka̱j nej sij gaꞌanj nej sij Ma̱ꞌan Jesús riñan junta nìko ñan giyiꞌnïnꞌ daranꞌ nej gakï̱nꞌ
66 Nga giyigï̀n aꞌngô gui dânj,
ni̱ ganaruꞌhuiꞌ nej síchìj achij màn ruhuâ yumanꞌan,
ngà nej rej huin ña̱an ni̱ nej sí chru̱n ley,
ni̱ ni̱ka̱j nej sij Ma̱ꞌan Jesús gaꞌnaꞌ nej sij riñan nej síchìj ni̱ka̱j su̱n riñan yumanꞌan ni̱ gataj nej sij:
67 —Ga̱ta̱j sòꞌ gu̱nïn nej ñûnj si huêꞌ huin Ma̱ꞌan Cristo staj nï̂nj.
Ni̱ gataj Ma̱ꞌan Jesús gu̱nïn nej sij:
—Si gàtà si hué huin,
ni̱ si̱ guyumân ruhuâ nej suj;
68 ni̱ si gàchìnj naꞌân nej suj,
ni̱ si̱ ganariꞌ nej suj gànàtàꞌ nej suj sa gàchìnj naꞌân mánj.
69 Sani̱ àsìj hia̱j ni̱ na̱ga̱né neꞌ raꞌa neꞌ huàꞌ Ma̱ꞌan Ñaꞌanj ûta nùkuaj.
70 Gataj daranꞌ nej sí dânj:
—Ni̱ huêꞌ huin Daꞌní Ma̱ꞌan Ñaꞌanj an nîꞌ.
Nanikàj Ma̱ꞌan Jesús ni̱ gata:
Nej suj gataj si huê danj huín.
71 Hiôꞌ ni̱ gataj nej sí dânj:
—Nùnj huin si gi̱ꞌhioꞌ gu̱nïnꞌ si-nùguànꞌ aꞌngô síi gàꞌ ûnj.
Dadinꞌ gàꞌ gunïnꞌ rakï̂ꞌ dàj gataj sij na̱nj ánj.