Ginikaj nej sij Ma̱ꞌan Jesús gaꞌanj nej sij dukuâ gaꞌa
18
Nga gisîj gaꞌmin Ma̱ꞌan Jesús nej nuguanꞌ nânj,
ni̱ gahui gaꞌan ni̱ gachinj ané yiné nne ꞌna̱ꞌ riñan hioꞌó Sedrón,
ni̱ hiuj dânj mân chrun gahiu chruj tsìꞌi,
ni̱ siganï̂nj nej chrun nânj gatûj Ma̱ꞌan Jesús ngà nej sí ꞌna̱ꞌ ga̱huin chru̱n riñanj.
2 Ni̱ gàꞌ niꞌin Judas,
sôꞌ nagaꞌhuiꞌ Ma̱ꞌan Jesús,
ñan màn nej chrun nânj,
dadinꞌ gàꞌ ûta gàꞌì gaꞌanj Ma̱ꞌan Jesús ngà nej sí ꞌna̱ꞌ ga̱huin chrun riñan hiuj nânj.
Jesús traicionado y arrestado (Juan 18.1-14)
3 Ni̱ gaꞌanj ꞌngo̱ yiꞌnïnꞌ nìko nej stâdu,
ni̱ huê danj na̱nj gaꞌanj ꞌngo̱ yiꞌnïnꞌ nej sí ni̱kï̱nꞌ dugumîn giꞌhiaj nej rej huin ña̱an ni̱ nej sí fariseo ngà Judas ni̱ ni̱ka̱j nej sôꞌ chrun tàj ñaꞌan dugùun huaj nej sôꞌ,
ni̱ ni̱ka̱j nej sôꞌ yîti huaj nej sôꞌ.
4 Sani̱ gàꞌ niꞌin Ma̱ꞌan Jesús,
dàj gi̱ranꞌanj rayiꞌî dan ni̱ gaꞌmin si̱nïnj ni̱ gata gu̱nïn nej sôꞌ:
—Ahuin si na̱na̱ꞌhui̱ꞌ nej suj ràꞌaj.
5 Nanikàj nej sí dânj ni̱ gataj nej sôꞌ:
—Nanaꞌhuiꞌ nej ñûnj Ma̱ꞌan Jesús Nazareno.
Ni̱ gataj Ma̱ꞌan Jesús:
—Ñùnj huin na̱nj ánj.
Ni̱ ni̱kï̱nꞌ Judas ngà nej sí dânj,
sí nânj huin sí nagaꞌhuiꞌ Ma̱ꞌan Jesús.
6 Ni̱ nga gataj Ma̱ꞌan Jesús:
“Ñùnj huin”,
ni̱ nga gunïn nej sôꞌ nuguanꞌ nânj ni̱ gananikàj rùkù nej sôꞌ,
ni̱ ganatûj nej sôꞌ riñan hioꞌóo.
7 Nanikàj ñûn Ma̱ꞌan Jesús,
gachín naꞌan ni̱ gata:
—Ahuin sí nanaꞌhuiꞌ nej suj ûnj.
Ni̱ gataj nej sí dânj:
—Ma̱ꞌan Jesús ꞌna̱ꞌ riñan hioꞌó Nazaret nanaꞌhuiꞌ nej ñûnj na̱nj ánj.
8 Nanikàj ñûn Ma̱ꞌan Jesús ni̱ gata:
—Gàꞌ gatâ si hué huin;
ni̱ si nanaꞌhuiꞌ nej suj ñùnj,
ni̱ gàꞌnï̀nj raꞌa nej suj ga̱ꞌa̱nj nej sí màn ngàj.
9 Huê dànanj gataj Ma̱ꞌan Jesús daꞌnga ni̱ gisîj nej nuguanꞌ gaꞌmin Ma̱ꞌan nga gata:
“Nej sí girikî Ma̱ꞌân rèꞌ raꞌá,
ni̱ nun ga̱ꞌa̱nj ni̱ꞌhia gàꞌ si ꞌngo̱ nej sij gi̱ꞌhia mánj.”
10 Hiôꞌ ni̱ ni̱ka̱j Simón Pedro,
ngo̱ yîti,
ni̱ giri sôꞌ yiti dânj ruhuâ nnïnj nìkòꞌ yiꞌnḯn sôꞌ,
ni̱ guduranꞌ yiꞌì sôꞌ Malco,
sí huin si-musû rej huin ña̱n nï̀nꞌïn,
ni̱ gaꞌneꞌ sôꞌ rakïj neꞌ hua̱ꞌ sí dânj.
11 Hiôꞌ ni̱ gataj Ma̱ꞌan Jesús gunïn Pedro:
—Gànàꞌnï̀nj sàꞌ sòꞌ si-yitît ruhuâ nnïnj nùnj ánj;
sê hua̱ ni̱ña̱n si gòꞌòj sa nu̱n ruhuâ basu riki Ma̱ꞌan Rê ni̱ hua̱ ni̱ña̱n si gi̱ranꞌ sàñùnj ràꞌ saj ûnꞌ.
Ni̱kï̱nꞌ Ma̱ꞌan Jesús riñan rej huin ña̱n nï̀nꞌin
12 Hiôꞌ ni̱ gidaꞌa,
yiꞌnïnꞌ nej stadû ngà sí aꞌnïnꞌ riñan nej sôꞌ ni̱ nej sí dugumîn riñan nuhuî nìko huin si-nùhuì nej judío,
Ma̱ꞌan Jesús ni̱ gumînj nej sôꞌ,
13 ni̱ gàꞌ si̱nï̱n ginikaj nej sôꞌ Ma̱ꞌan Jesús gaꞌanj nej sôꞌ riñan síchìj Anás,
dadinꞌ sí nânj huin rej yìchèj Kaifás,
ni̱ huin sôꞌ rej huin ña̱n nï̀nꞌïn hioꞌ dânj.
14 Ni̱ Kaifás huin sí nagaꞌhuiꞌ chrej e riñan nej judío,
ni̱ gataj sôꞌ si dùgùnàj huaj si gàhuìꞌ ngo̱ rïn síi riñan yumanꞌan.
Ni̱kï̱nꞌ Pedro riñan dukuâ Anás
15 Ni̱ nìkòꞌ Simón Pedro ngà aꞌngô sí gaꞌnaꞌ ga̱huin chru̱n riñan Ma̱ꞌan Jesús gaꞌanj nguèj sôꞌ rukû Ma̱ꞌan Jesús.
Ni̱ niꞌin hueꞌê rej huin ña̱n nï̀nꞌïn sí nânj,
ni̱ gatûj sôꞌ ngà Ma̱ꞌan Jesús nda riñan rahueꞌ huin dukuâ rej huin ña̱n nï̀nꞌïn;
Pedro niega conocer a Jesús y Anás pregunta a Jesús (Juan 18.15-27)
16 sani̱ gunâj Pedro neꞌ ye̱ꞌ hueꞌ dânj,
ni̱ ni̱kï̱nꞌ nìchrùnꞌ sôꞌ riñan rahueꞌe.
Ni̱ gaꞌanj sí gaꞌnaꞌ ga̱huin chru̱n riñan Ma̱ꞌan Jesús,
riñan siyànà ni̱kï̱nꞌ ganaꞌnï̂nj riñan rahueꞌe ni̱ gachín nìꞌhiaj sôꞌ si ga̱na̱ꞌnï̱n siyànà dânj riñan rahueꞌe ga̱tu̱ Pedro,
huê danj ni̱ ganaꞌnï̂nj siyànà dânj gatûj Pedro.
17 Hiôꞌ ni̱ gataj siyànà ꞌnï̱nj sun ganaꞌnï̂nj riñan rahueꞌe gunïn Pedro:
—Sê huêꞌ huin sa gaꞌnaꞌ ga̱huin chru̱n riñan reꞌ nan ràꞌ saj ûnꞌ.
Ni̱ gataj Pedro:
—Sê huín mánj.
18 Ni̱ ni̱kï̱nꞌ ga̱hia nej sí huin si-musû rej huin ña̱n nï̀nꞌïn,
dadinꞌ si̱ màn nej sôꞌ ganahuin gï̀n nej sôꞌ ñaꞌaan hiuj dânj;
ni̱ huê danj na̱nj nï̱kï̱nꞌ Pedro ganahuin gï̀n sôꞌ ñaꞌaan ngà nej sí dânj.
Gachín naꞌanj Anás Ma̱ꞌan Jesús
19 Ni̱ gachín naꞌanj rej huin ña̱an Ma̱ꞌan Jesús rayiꞌî nej sí nìkòꞌ rukuj ni̱ rayiꞌî nej yìꞌnï̀nꞌ nej nuguanꞌ gidiganj.
20 Nanikàj Ma̱ꞌan Jesús ni̱ gata:
—Ñùnj ni̱ gaꞌmin ràꞌngàj ni̱ ri̱ña̱n gaꞌmînj riñan daranꞌ nej guiì,
ni̱ daranꞌ diû gidigán ruhuâ hueꞌ huin si-nùhuì nej suj ni̱ huê danj na̱nj gidigán ruhuâ nuhuî nìko,
ñan naraꞌhuiꞌ daranꞌ nej judío,
ni̱ nitaj àmàn gaꞌmin huìj mánj.
21 Nùnj huin saj ni̱ gachín naꞌanjꞌ ñùnj ràꞌaj.
Gàchìnj naꞌanj sòꞌ nej sí gunïn,
ahuin rayiꞌî nej nuguanꞌ gaꞌmînj;
dadinꞌ nej sôꞌ,
huin nej sí niꞌin ahuin rayìꞌì gaꞌmînj.
22 Nga gisîj gaꞌmin Ma̱ꞌan Jesús nej nuguanꞌ nânj,
ni̱ garaꞌhui ngo̱ sí ni̱kï̱nꞌ dugumîn riñan nûhui nìko yiꞌnḯn riñan Ma̱ꞌan Jesús ni̱ gataj sôꞌ:
—Dànanj gaꞌminꞌ riñan rej huin ña̱n nï̀nꞌïn na̱nj nîꞌ.
23 Nanikàj Ma̱ꞌan Jesús ni̱ gata:
—Si gaꞌmînj ꞌngo̱ nuguanꞌ aꞌnanꞌan,
ni̱ gataj sòꞌ ahuin rayìꞌì nuguanꞌ aꞌnanꞌ gaꞌmînj àj nï̂n;
ni̱ si gaꞌmînj ꞌngo̱ nuguanꞌ hua̱ hueꞌê,
ni̱ nùnj huin saj ni̱ gaꞌhuiꞌ niꞌhiâ nga nï̂nꞌ.
24 Hiôꞌ ni̱ gumînj Anás Ma̱ꞌan Jesús ni̱ gaꞌnḯn sôꞌ gaꞌan riñan Kaifás,
rej huin ña̱n nï̀nꞌïn.
Gataj ñûn Pedro si nun niꞌin sôꞌ Ma̱ꞌan Jesús
25 Hiôꞌ ni̱ nï̱kï̱nꞌ Pedro,
ganahuin gï̀n sôꞌ ñaꞌaan.
Ni̱ gataj nej sí màn hiuj dânj gu̱nïn sôꞌ:
—Sê sòꞌ huin sí nìkòꞌ rukû sí na̱n nej ràꞌ saj ûnꞌ.
Nun ga̱ꞌhue̱j Pedro si huê sôꞌ huin ni̱ gataj sôꞌ:
—Sê huin mánj.
26 ꞌNgo̱ si-musû rej huin ña̱n nï̀nꞌïn,
sí dùguìꞌ gaꞌneꞌ Pedro rakïj,
gataj:
—Sê giniꞌín nikï̂nꞌ ngà sij ñan màn chrun gahiu chruj tsìꞌi ràꞌ saj ûnꞌ.
27 Ni̱ gataj ñûn Pedro si nun niꞌin sôꞌ Ma̱ꞌan Jesús;
neꞌ rùkù nga gisîj gaꞌmin sôꞌ dànanj ni̱ gaguâj dêꞌlo̱j o.
Ni̱kï̱nꞌ Ma̱ꞌan Jesús riñan Pilato
28 Ñan nne dukuâ Kaifás mân nej sij huê danj ni̱ ginikaj nej sij gaꞌanj nej sij Ma̱ꞌan Jesús,
ñan nne dukuâ si-su̱n Pilato.
Ni̱ neꞌ ni̱gaꞌan huin nga ginikaj nej sij gaꞌanj nej sij Ma̱ꞌan Jesús,
ni̱ nun ga̱tu̱ nej sij ruhuâ dukuâ sun dânj,
dadinꞌ naꞌhuej ruhuâ nej sij ga̱na̱huin nej sij sí gakï̱nꞌïn,
daꞌnga ni̱ gaꞌhue ga̱tu̱ nej sij ya̱ nej sij pascua.
Pilato le pregunta a Jesús (Juan 18.28-40)
—Ahuin ràyìꞌì garânj ruhuâ nej suj rayiꞌî sí nânj ràꞌaj.
30 Nanikàj nej sí dânj ni̱ gataj nej sôꞌ:
—Si sê sí aꞌnanꞌan huin sí nânj,
ni̱ nitaj si gi̱ꞌhiaj nej ñûnj gi̱nikaj nej ñûnj ga̱ꞌna̱ꞌ nej ñûnj riñanꞌ saj mánj.
31 Hiôꞌ ni̱ gataj Pilato:
—Gi̱daꞌa nej suj sí dânj,
ni̱ giꞌhiaj hia nej suj rayiꞌî sij dàj rûnꞌ giri daꞌngaj riñan si-ley nej suj.
Ni̱ gataj nej judío:
—Nitaj si aꞌnï̂nj si-ley nej ñûnj si da̱gahuiꞌ nej ñûnj gàꞌ si ꞌngo̱ guiì mánj;
32 Huê dànanj gahuin daꞌnga ni̱ gisîj nuguanꞌ gataj Ma̱ꞌan Jesús,
ni̱ rikij ga̱ra̱n daꞌngaꞌ ruhuôꞌ si ga̱huij riñan rugutsìi.
33 Hiôꞌ ni̱ gatûj ñûn Pilato ruhuâ dukuâ si-su̱n sôꞌ,
ni̱ gakḯn sôꞌ gaꞌnaꞌ Ma̱ꞌan Jesús ni̱ gataj sôꞌ gunïn:
—Huê rèꞌ huin Rey ni̱ka̱j su̱n riñan nej judío nîꞌ.
34 Nanikàj Ma̱ꞌan Jesús ni̱ gata:
—Raa̱ Ma̱ꞌânꞌ giriꞌ nej nuguanꞌ dânj nîꞌ,
si aꞌngô nej síi gataj nej nuguanꞌ dânj gu̱nïnꞌ sàꞌ.
35 Nanikàj Pilato ni̱ gataj sôꞌ:
—Sí judío huín nej nanj nîꞌ.
Ni̱ gaꞌnḯn riñan yumanꞌ yiñânꞌ na̱nj nîꞌ,
sê nej rej huin ña̱an,
narikî sòꞌ riñânj ràꞌ saj ûnꞌ.
Nùnj huin si gi̱ꞌhiaꞌ na̱nj ûnj.
36 Nanikàj Ma̱ꞌan Jesús ni̱ gata:
—Sê ruhuâ yumiguì nan huin ñan gi̱nikaj sùnj mánj;
ni̱ si ñan gi̱nikaj sùnj huin ruhuâ yumiguì nânj,
ni̱ hua̱ nej guiì gu̱na̱nj gi̱tsi riñânj ni̱ gùtàꞌ ninj ni̱ du̱naꞌhuej ninj rayiꞌí huê danj ni̱ si̱ gidaꞌa nej sí judío ñùnj sa mánj;
sani̱ sê hiuj nânj huin ñan gi̱nikaj sùnj mánj.
37 Hiôꞌ ni̱ gataj Pilato:
—Rey huînꞌ nîꞌ.
Nanikàj Ma̱ꞌan Jesús ni̱ gata:
—Sòꞌ taj si rey huín.
Ni̱ nga gaꞌngâj ruhuâ yumiguì nânj ni̱ hua̱ ni̱ña̱n si rey gahuín,
ni̱ huê rayiꞌî sun dânj gaꞌná ruhuâ yumiguì nânj,
guendâ gànàtàj rayiꞌî nuguanꞌ yàngàꞌa,
ni̱ daranꞌ nej sí huin daꞌní Ma̱ꞌan Ñaꞌanj yàngàꞌa,
ni̱ gunïn nej sôꞌ si-nùguànꞌànj.
38 Ni̱ gataj Pilato:
—Ahuin sa huin sa yàngàꞌa ràꞌaj.
Giriꞌ nìꞌhiaj Ma̱ꞌan Jesús ga̱huij
Ni̱ nga gisîj gaꞌmin sôꞌ nuguanꞌ nânj,
ni̱ gahui sôꞌ ni̱ gaꞌanj ñûn sôꞌ ñan màn nej judío,
ni̱ gataj sôꞌ:
—Gàꞌ si ꞌngo̱ gakï̱nꞌïn nun gànàrìꞌìj giꞌhiaj sí nânj mánj.
39 Sani̱ ni̱ka̱j nej suj chrej yìñànj an,
ni̱ daꞌ guyumân giꞌñanj pascua,
ni̱ ganaꞌnḯn raꞌa nej suj ꞌngo̱ sí giꞌhiaj gakï̱nꞌïn.
Ni̱ ruhuâ nej suj,
si gànàꞌnï̀nj raꞌá ga̱ꞌa̱nj rey ni̱ka̱j su̱n riñan nej judío nîꞌ.
40 Hiôꞌ ni̱ gaꞌmin gu̱ña̱n nej sí dânj aꞌngô ñûn,
ni̱ gataj nej sôꞌ:
—Nun ga̱ra̱nꞌ ruhuâ nej ñûnj si gànàꞌnï̀nj raꞌâꞌ sí dan mánj,
ruhuâ nej ñûnj si gànàꞌnï̀nj raꞌâꞌ sí gùꞌnàj Barrabás.
Ni̱ Barrabás huin ꞌngo̱ sí tu̱u.