Ni̱kï̱nꞌ Ma̱ꞌan Jesús riñan Pilato
15
Ni̱ nga nï̀nꞌ ûta hua ni̱ganꞌ,
ni̱ gàꞌ gisîj dagaꞌmin duguiꞌ nej rej huin ña̱an ngà nej síchìj achij i,
ni̱ ngà nej sí chru̱n ley ni̱ ngà daranꞌ nej sí ni̱ka̱j sun riñan yumanꞌan,
hiôꞌ ni̱ gumînj nej sij Ma̱ꞌan Jesús ni̱ ni̱ka̱j nej sij gaꞌanj nej sij,
ni̱ nagaꞌhuiꞌ nej sij raꞌa Pilato.
2 Ni̱ gachín naꞌanj Pilato Ma̱ꞌan Jesús ni̱ gataj sôꞌ:
—Huê Ma̱ꞌan rèꞌ huin Rey ni̱ka̱j su̱n riñan nej sí judío nîꞌ.
—Nanikàj Ma̱ꞌan Jesús ni̱ gata:
Dàj rûnꞌ tajꞌ ni̱ huê danj huín.
3 Ni̱ ûta gàꞌì gakï̱nꞌïn gutaꞌ nej rej huin ña̱an,
rayiꞌî Ma̱ꞌan Jesús.
4 Ni̱ gachín naꞌanj ñûn Pilato Ma̱ꞌan Jesús ni̱ gataj sôꞌ:
—Nitaj gàꞌ si ꞌngo̱ nuguanꞌan nikajꞌ ga̱ta̱jꞌ ûnꞌ.
Gi̱ni̱ꞌhiaj sòꞌ dadinꞌ ûta gàꞌì nuguanꞌan garânj ruhuâ nej sij rayiꞌî râj.
5 Sani̱ gàꞌ si ꞌngo̱ nuguanꞌan nun du̱nanikàj Maꞌan Jesús riñan nej sij;
ni̱ gahuin ña̱ꞌanj ruhuâ Pilato niꞌin sôꞌ sa giꞌhiaj Ma̱ꞌan Jesús.
Giyiꞌnïn suun ga̱hui̱ꞌ Ma̱ꞌan Jesús
6 Hia̱j ni̱ dùgùnàj huaj dadinꞌ gui huin giꞌñanj an ni̱ ganaꞌnï̂n raꞌa Pilato ꞌngo̱ sí nne dukuâ gaꞌa,
ahuin na̱nj sí gàchìnj nej sí yumanꞌan.
7 Ni̱ hua̱ ꞌngo̱ sí dânj ni̱ gùꞌnàj sôꞌ Barrabás,
ni̱ ꞌnïnj sôꞌ dukuâ gaꞌa ngà aꞌngô nej sí ni̱ka̱j duguiꞌ ngà sôꞌ dadinꞌ gunïnꞌ nej sôꞌ ngà nej sí ni̱ka̱j suun ni̱ dagahuiꞌ nej sôꞌ nîman nga gutaꞌ nej sôꞌ.
8 Ni̱ gaꞌnaꞌ ûta gàꞌì nej guiì ni̱ gayiꞌì ninj ni̱ gataj ninj gu̱nïn Pilato si gànàꞌnï̀nj raꞌa sôꞌ ꞌngo̱ síi dàj rûnꞌ giꞌhiaj sôꞌ daranꞌ nej hioꞌo.
9 Nanikàj Pilato ni̱ gataj sôꞌ:
—Ruhuâ nej suj si gìrìj ruhuâ dukuâ gaꞌa Rey ni̱ka̱j sun riñan nej judío nîꞌ.
10 Dadinꞌ niꞌin Pilato sisi̱ si̱ huin yìkòj ruhuâ nej rej huin ña̱n nï̀nꞌin niꞌin nej sôꞌ Jesús rayiꞌî dânj ni̱ garânj ruhuâ nej sôꞌ rayiꞌij.
11 Sani̱ dagaꞌmin nej rej huin ña̱an ngà nej sí yumanꞌan si gàchìnj nìꞌhiaj nej guiì riñan Pilato si gi̱ri̱ sôꞌ dukuâ gaꞌa sí gùꞌnàj Barrabás.
12 Nanikàj ñûn Pilato ni̱ gataj sôꞌ:
—Nùnj si gi̱ꞌhia ngà sí dugûnàj nej suj Rey ni̱ka̱j su̱n riñan nej judío ràꞌaj.
13 Ni̱ gayiꞌì ñûn nej sí dânj ni̱ gaguâj nùkuaj nej sôꞌ ni̱ gataj nej sôꞌ:
—Ruhuâ nej ñûnj si du̱nikòꞌ rùgùtsì rèꞌ sí dânj riñan rugutsìi.
14 Ni̱ gataj Pilato gu̱nïn nej sij:
—Ahuin gakï̱nꞌ giꞌhiaj sí nânj ràꞌaj.
Sani̱ dànanj duguꞌnïnꞌ nej sij gaguâj nùkuaj nej sij doj ni̱ gataj nej sij:
—Ruhuâ nej ñûnj si du̱nikòꞌ rùgùtsì rèꞌ riñan rugutsìi sí dânj.
15 Ni̱ guendâ garanꞌ ruhuâ Pilato,
si ga̱na̱huin nìhiàꞌ ruhuâ nej guiì yumanꞌan,
ni̱ giri sôꞌ ruhuâ dukuâ gaꞌa sí gùꞌnàj Barrabás,
ni̱ nagaꞌhuiꞌ sôꞌ Ma̱ꞌan Jesús guendâ du̱guañun nej stâdu Ma̱ꞌan,
ni̱ neꞌ rùkù nga gisîj duguañun nej stâdu Ma̱ꞌan Jesús ni̱ gaꞌanj du̱nikòꞌ rùgùtsì nej sôꞌ riñan rugutsìi Ma̱ꞌan.
16 Hiôꞌ ni̱ ginikaj nej stâdu gaꞌanj nej sôꞌ Ma̱ꞌan Jesús riñan dukuâ suun,
ñan nne nej sôꞌ,
ni̱ ganakḯn nej sôꞌ ni̱ ganahuin chre̱ꞌ daranꞌ nej stâdu hiuj dânj.
17 Ni̱ ganaꞌnḯn nej sôꞌ ꞌngo̱ atsîj ma̱re ginun Ma̱ꞌan Jesús,
ni̱ gaꞌnḯn nej sôꞌ ꞌngo̱ korona tanj ganachrâj nej ma̱ꞌan nej sôꞌ ahui Ma̱ꞌan.
18 Ni̱ gayiꞌì nej sôꞌ ni̱ gaꞌmin nej sôꞌ ngà Ma̱ꞌan Jesús ni̱ gataj nej sôꞌ:
—Huê Ma̱ꞌan rèꞌ huin rey ni̱ka̱j su̱n riñan nej sí judío.
Ni̱ nne nìꞌnàꞌ Ma̱ꞌan Rey ni̱ka̱j su̱n riñan nej sí judío.
19 Ni̱ gutaꞌ nej sôꞌ chrun ahui,
ni̱ gachra stanûj nej sôꞌ riñanj,
ni̱ ganikïnꞌ rúdàkòj nej sôꞌ riñanj ni̱ man si giꞌhiaj nej sôꞌ si ginikaj chre̱j nej sôꞌ riñanj.
20 Neꞌ rùkù nga gisîj gaꞌmin duku nej sôꞌ riñanj,
ni̱ giri nej sôꞌ atsîj ma̱re gaꞌnḯn nej sôꞌ Ma̱ꞌan,
ni̱ ganaꞌnḯn nej sôꞌ siganꞌanj,
ni̱ giri nej sôꞌ neꞌ ye̱ꞌe guendâ ga̱ꞌa̱nj du̱nikòꞌ rùgùtsì nej sôꞌ riñan rugutsìi Ma̱ꞌan.
Dunikòꞌ nej sij riñan rugutsìi Ma̱ꞌan Jesús ni̱ gahuij
21 Ni̱ giꞌhiaj guesâ nej sij riñan ꞌngo̱ sí gachîn huaj hiuj dânj,
ni̱ huê sôꞌ huin Simón sí ꞌna̱ꞌ riñan hioꞌó Sirene ni̱ huin sôꞌ rej Alejandro ngà Rufo,
dadinꞌ hia̱j ꞌnaꞌ niki sôꞌ gaꞌanj sôꞌ kïj ï,
ni̱ giꞌhiaj guesâ nej sij si ga̱ta sôꞌ rugutsìi ga̱ꞌa̱nj sôꞌ.
22 Ni̱ ni̱ka̱j nej sij gaꞌanj nej sij Ma̱ꞌan Jesús ñan gùꞌnàj Golgota,
ni̱ nuguanꞌ nânj ruhuaj ga̱ta:
Ñan màn kúu.
23 Ni̱ gaꞌhuiꞌ nej sij nne bino ganachej duguiꞌ ngà gonoꞌô gùꞌnàj mirra go̱ꞌo̱ Ma̱ꞌan Jesús;
sani̱ nun go̱ꞌoj.
24 Nga gisîj dunikòꞌ rùgùtsì nej sij Ma̱ꞌan,
ni̱ gunuchraꞌ da̱ꞌa̱j nej sij atsîj yèꞌè nunj,
ni̱ guduku nej sij número dadinꞌ ruhuâ nej sij gi̱ni̱ꞌin nej sij ahuin sa ga̱nunj riñan daꞌ goꞌngo̱ nej sij.
25 Ni̱ gàꞌ gisîj agaꞌ ꞌï̀ïn nga dunikòꞌ rùgùtsì nej sij Ma̱ꞌan.
26 Ni̱ nuguanꞌ ràyìꞌì gahuiꞌ Ma̱ꞌan Jesús huin:
“REY NI̱KA̱J SU̱N RIÑAN NEJ JUDÍO.”
27 Ni̱ huê danj na̱nj dunikòꞌ nej sij ngà Ma̱ꞌan Jesús huìj sí giꞌnïnj sun tu̱u riñan rugutsìi,
ꞌngo̱ sí dânj ginikòꞌ raꞌa neꞌ huàꞌaj,
ni̱ aꞌngô sí dânj ginikòꞌ raꞌa neꞌ chrïn.
28 Ni̱ gahuin yàngàꞌ dàj rûnꞌ taj riñan ñanj si-nùguànꞌ Ma̱ꞌan Ñaꞌanj an:
“Dadinꞌ dàj rûnꞌ giꞌhiaj nej sij ngà nej sí gakï̱nꞌïn huê danj giꞌhiaj nej sij ngà Ma̱ꞌan Jesús.”
29 Ni̱ nej sí gachîn huaj ñan nìkòꞌ Ma̱ꞌan Jesús ni̱ gaꞌmin kï̱j nej sôꞌ riñan Ma̱ꞌan,
ni̱ nda dugunûn ahui nej sôꞌ ni̱ gataj nej sôꞌ:
—Sòꞌ taj si ga̱ꞌhue du̱guaneꞌ hueꞌ huin si-nùhuì Ma̱ꞌan Ñaꞌanj an,
ni̱ yichrá huàꞌnï̀nj gui ni̱ ga̱ꞌhue na̱gi̱ꞌhiaj ñûnꞌ aꞌngôj gatajꞌ.
30 Gi̱ꞌhia sòꞌ si ga̱na̱ni̱n Ma̱ꞌânꞌ,
ni̱ ga̱na̱ni̱njꞌ riñan rugutsìi dan àj nï̂n.
31 Ni̱ huê danj na̱nj gaꞌmin duku nej rej,
ni̱ huê danj na̱nj giꞌhiaj nej sí chru̱n ley ni̱ gataj nej sôꞌ gu̱nïn nej duguiꞌ nej sô:
—Gananin aꞌngô nej guiì giꞌhiaj sij,
ni̱ naꞌhue du̱nanin sij Ma̱ꞌan sij ûnꞌ.
32 Hia̱j ni̱ ga̱na̱ni̱nj Ma̱ꞌan Cristo huin Rey riñan yumanꞌ Israel riñan rugutsìi,
ni̱ gùyùmàn ruhuôꞌ niꞌînꞌ sij.
Ni̱ huê danj na̱nj gachîn nguèj sí nìkòꞌ riñan rugutsìi nuguanꞌan riñan Ma̱ꞌan Jesús.
Gahuiꞌ Ma̱ꞌan Jesús
33 Nga gisîj agaꞌ yùhuìj i,
ni̱ gahuin ru̱mi̱nꞌ nï̀nꞌ gàchràꞌ ruhuâ yumiguìi nda gisîj agaꞌ huàꞌnï̀nj ïn
34 Ni̱ nga gisîj agaꞌ huàꞌnï̀nj ïn ni̱ gaꞌmin nùkuaj Ma̱ꞌan Jesús ni̱ gata:
—Eloi,
Eloi,
lama sabactani —nuguanꞌ nânj ruhuaj ga̱ta:
Sòꞌ huin Daꞌân,
ni̱ sòꞌ huin Daꞌan,
nùnj saj ni̱ gudunâj ꞌngo̱ rïn Ma̱ꞌân rèꞌ ñùnj ràꞌaj.
35 Ni̱ nga gunïn da̱ꞌa̱j nej sí màn hiuj dânj ni̱ gataj nej sôꞌ:
—Gi̱ni̱ꞌhiaj nej suj dadinꞌ gakḯn sij ga̱ꞌna̱ꞌ Elias.
36 Ni̱ gunânj ꞌngo̱ sí dânj gaꞌanj sôꞌ nga gunïn sôꞌ gaꞌmin Ma̱ꞌan Jesús,
ni̱ gidaꞌa sôꞌ ꞌngo̱ rumin lij gachïj ï ni̱ gutaꞌ sôꞌ raa̱ ꞌngo̱ chrun ni̱ gutâj sôꞌ nne ganachej ngà naꞌhui hiùu ni̱ gaꞌhuiꞌ sôꞌ goꞌo Ma̱ꞌan Jesús ni̱ gataj sôꞌ:
—Gu̱dunâj nej suj,
ni̱ gi̱niꞌhiaj nêꞌ si ga̱ꞌna̱ꞌ du̱naninj Elias sij na̱nj ánj.
37 Sani̱ ûta nùkuaj gaꞌmin Ma̱ꞌan Jesús,
huê danj ni̱ gahuij.
38 Hiôꞌ ni̱ giyiꞌneꞌ da̱ꞌa̱j atsîj mmanj nìkòꞌ ruhuâ hueꞌ huin nûhui dânj ni̱ ganahuin huìj dasû,
àsìj gayakaj neꞌ yìchràj a nda gininj neꞌ ri̱ki.
39 Ni̱ nga giniꞌin stadû Kapitán ni̱kï̱nꞌ dugumîn hiuj dânj gaꞌmin Ma̱ꞌan Jesús ni̱ gataj sôꞌ:
—Yàngàꞌ hia nï̀nꞌ ni̱ Daꞌní Ma̱ꞌan Ñaꞌanj an huin sí nânj.
40 Ni̱ nda gànꞌ nikïnꞌ da̱ꞌa̱j nej siyànàa giniꞌhiaj ninj,
ni̱ siganï̂nj nej siyànà dânj nikïnꞌ María Magdalena,
nni Jacobo sôꞌ hua̱ lij doj ni̱ huê siyànà nânj huin nni José ngà Salomé.
41 Ni̱ nej siyànà nânj huin sa nìkòꞌ rukû Ma̱ꞌan Jesús,
nga nne yumanꞌ Galilea ni̱ gunânj gi̱tsi ninj riñanj;
ni̱ ûta gàꞌì nej siyànàa gaꞌnaꞌ ngà Jesús nda yumanꞌ snàꞌànj Jerusalén.
Gachinꞌ nej sij Ma̱ꞌan Jesús
42 Gui nânj huin gui gi̱ꞌhiaj yu̱gui nej sij,
dadinꞌ gahuin niìn stiꞌnï̀ïn gui ganarânj rûhua ni̱ gàꞌ ꞌna̱ꞌ gahuin ru̱mi̱nꞌ gui dânj.
43 Ni̱ yiñán José huin Yumanꞌ Arimetea,
ni̱ huin sôꞌ ꞌngo̱ sí ni̱ka̱j su̱n riñan yumanꞌan,
ni̱ nne sôꞌ anaꞌhuìj sôꞌ nga gùyùmàn diû gi̱nikaj su̱n Ma̱ꞌan Ñaꞌanj an riñan nej guiì,
dadinꞌ nitaj si yuꞌhuiꞌ sôꞌ ni̱ gaꞌnaꞌ sôꞌ ni̱ ganachinꞌ sôꞌ nneè kú Ma̱ꞌan Jesús riñan Pilato.
44 Ni̱ gahuin ña̱ꞌanj ruhuâ Pilato nga gunïn sôꞌ si gàꞌ gahuiꞌ Ma̱ꞌan Jesús;
ni̱ gakḯn sôꞌ gaꞌnaꞌ sí huin kapitán,
ni̱ gachín naꞌanj sôꞌ sí dânj si yàngàꞌ gàꞌ gahuiꞌ Ma̱ꞌan Jesús.
45 Ni̱ nga gunïn sôꞌ gataj stadû kapitán si yàngàꞌ hia gahuiꞌ Ma̱ꞌan Jesús,
huê danj ni̱ nagaꞌhuiꞌ sôꞌ nneè kú Ma̱ꞌan Jesús raꞌa José,
46 Ni̱ gaꞌanj gi̱ra̱n José ꞌngo̱ atsîj gàtsìi,
ni̱ naduninj sôꞌ nneè kú Ma̱ꞌan Jesús riñan rugutsìi,
ni̱ duriꞌñânj sôꞌ atsîj gàtsìi nneè kú Ma̱ꞌan Jesús,
ni̱ gaꞌanj gàchìnꞌ sôꞌ ruhuâ hiuꞌuj gàꞌ hua̱ yu̱gui riñan ꞌngo̱ huej e,
ni̱ garán sôꞌ hiëj neꞌ ri̱ña̱n huej ñan gachinꞌ sôꞌ nneè kú Ma̱ꞌan Jesús.
47 Ni̱ giniꞌin María Magdalena ngà María nni José ñan gachinꞌ nej sij nneè kú Ma̱ꞌan Jesús.