Ganaꞌnï̂nj Ma̱ꞌan Jesús
16
Nga gachîn gui ganarânj ruhuâ,
ni̱ gaꞌanj gi̱ra̱n María Magdalena,
María huin nni Jacobo,
nga Salomé sa gïnꞌ dàj a guendâ gu̱ta̱ ninj nneè kú Ma̱ꞌan Jesús.
2 Ni̱ hua̱ ni̱ganꞌ staꞌu gaꞌnaꞌ ninj ñan gachinꞌ nej sôꞌ nneè kú Ma̱ꞌan Jesús,
ni̱ gui gudûngu huin,
sani̱ gàꞌ gisîj gui nga guyumân ninj ñan gachinꞌ nej sôꞌ nneè kú Ma̱ꞌan Jesús.
3 Ni̱ aꞌmin nej Ma̱ꞌan ninj ni̱ gataj ninj:
—Ahuin sa guruguñuꞌunj gu̱xu̱n hiëj garán ñan gachinꞌ ninj nneè kú Ma̱ꞌan Jesús ràꞌaj.
4 Sani̱ nga giniꞌhiaj ninj hiuj dânj,
ni̱ giniꞌin ninj si gàꞌ giyiꞌnï̂nj hiëj garán riñan hiuꞌuj dânj,
ni̱ ûta nìko hua hiëj dânj.
5 Ni̱ nga gatûj ninj ñan gachinꞌ nej sôꞌ nneè kú Ma̱ꞌan Jesús,
ni̱ giniꞌin ninj nne ꞌngo̱ sí ña̱an neꞌ huàꞌ ninj,
ni̱ nu̱n sôꞌ ꞌngo̱ atsîj yeꞌèe ni̱ hua̱ gàtsì nï̀nꞌ atsîj dânj;
ni̱ nga giniꞌin ninj sí dânj ni̱ ûta guyuꞌhuiꞌ ninj.
6 Sani̱ gataj sôꞌ gu̱nïn ninj:
—Si̱ guyuꞌhuiꞌ nej suj mánj,
nanaꞌhuiꞌ nej suj Ma̱ꞌan Jesús Nazareno Ma̱ꞌan sa dunikòꞌ rùgùtsì nej sij riñan rugutsìi nîꞌ.
Gàꞌ ganaꞌnïn siganï̂nj nej nîman ni̱ nitaj nngaj hiuj nânj gàꞌ mánj;
gi̱ni̱ꞌhiaj nej suj ñan guchruj nej sij ginga.
7 Ga̱ꞌa̱nj nej suj,
ni̱ gànàtàꞌ nej suj gunïn nej sôꞌ gaꞌnaꞌ ga̱huin chru̱n riñanj ni̱ huê danj na̱nj ga̱ta̱j nej suj gu̱nïn Pedro.
“Dadinꞌ gàꞌ hua neꞌ ña̱n doj riñan nej suj nda Galilea;
ni̱ hiuj dânj gi̱ni̱ꞌin nej suj Ma̱ꞌan dàj rûnꞌ gatâ gu̱nïn nej suj.”
8 Ni̱ gunânj nej siyànà dânj ni̱ guxun ninj Ma̱ꞌan ninj ñan gachinꞌ nej sôꞌ nneè kû Ma̱ꞌan Jesús,
dadinꞌ ûta guyuꞌhuiꞌ ninj ni̱ nda nagunanj nneè kú ninj;
ni̱ gàꞌ si ꞌngo̱ nuguanꞌan nun ga̱ꞌmi̱n ninj.
Ganikïn Ma̱ꞌan riñan María Magdalena
9 Ni̱ nga ganaꞌnï̂nj Ma̱ꞌan Jesús neꞌ ni̱ganꞌ gui si̱nï̱n gayiꞌì semana,
ni̱ gàꞌ si̱nï̱n ganikïnj riñan María Magdalena,
siyànà rùhuà nimân girij nda chi̱j nej nanè kï̱j huaa.
10 Ni̱ gaꞌanj gànàtàꞌ siyànà nânj,
gu̱nïn aꞌngô nej sí ni̱ka̱j duguiꞌ ngà Ma̱ꞌan Jesús,
sani̱ do̱ꞌ si dugueꞌe nej sôꞌ mân nej sôꞌ ni̱ ûta gananï̂n ruhuâ nej sôꞌ.
11 Ni̱ nga gunïn nej sôꞌ si hua̱ nìꞌnàꞌ Ma̱ꞌan Jesús,
dadinꞌ gataj nej siyànà nânj si giniꞌin ninj Ma̱ꞌan Jesús,
sani̱ gàꞌ danj ni̱ nun gùyùmàn ruhuâ nej sôꞌ sa gataj ninj.
Ganikïnꞌ Ma̱ꞌan Jesús riñan huìj sôꞌ gaꞌnaꞌ ga̱huin chru̱n riñanj
12 Sani̱ neꞌ rùkù ni̱ ganikïnꞌ Ma̱ꞌan Jesús riñan huìj sôꞌ gaché huaj,
dadinꞌ hua̱j nguèj sôꞌ kïj ï.
13 Ni̱ gaꞌanj nguèj sí nânj ni̱ ganataꞌ nguèj sôꞌ gu̱nïn aꞌngô nej sí gaꞌnaꞌ ga̱huin chru̱n riñan Ma̱ꞌan Jesús,
sani̱ gàꞌ dânj ni̱ nun gùyùmàn ruhuâ nej sôꞌ sa gataj nguèj sí dânj.
Sun duguta su̱n Ma̱ꞌan Jesús riñan nej sôꞌ gaꞌnaꞌ gahuin chru̱n riñanj
14 Ni̱ nda neꞌ rùkù nï̀nꞌ ni̱ ganikïnꞌ Ma̱ꞌan Jesús riñan nej yùhuìj sí gaꞌnaꞌ ga̱huin chru̱n riñanj,
nga nne nej sôꞌ rukû mesa ni̱ gahuin hu̱e riñan nej sôꞌ guendâ nun gùyùmàn ruhuâ nej sôꞌ sa ganataꞌ aꞌngô nej sí gàꞌ giniꞌin si gàꞌ ganaꞌnï̂nj Ma̱ꞌan siganï̂nj nej nîman.
15 Ni̱ gataj Ma̱ꞌan Jesús gu̱nïn nej sij:
—Ga̱ꞌa̱nj nej suj nï̀nꞌ gàchràꞌ ruhuâ yumiguìi ni̱ gànàtàꞌ nej suj nuguanꞌ gi̱ꞌhiaj ga̱na̱ni̱n nej guiì.
16 Ni̱ guiì guyumân ruhuâ ni̱ gataꞌ nne ninj,
ni̱ ga̱na̱ni̱n ninj;
sani̱ guiì nun gùyùmàn ruhuâ ni̱ ga̱ꞌa̱nj ni̱ꞌhia̱ ninj.
17 Ni̱ nej daꞌngaꞌ nânj huin sa gi̱ꞌhiaj nej sí guyumân ruhuâ niꞌin ñùnj:
Ni̱ ngà siyu̱guí ni̱ gi̱ri̱ nej sôꞌ nej nanè kï̱j huaa ruhuâ nimân nej guiì,
ni̱ ga̱ꞌmi̱n nej sôꞌ aꞌngô nuguanꞌ nàkàa.
18 Ni̱ gi̱daꞌa nej sij yukuáa ngà raꞌa nej sij,
ni̱ si̱ go̱ꞌo̱ nej sij nne da̱gahuiꞌ guiì,
ni̱ si̱ gahuiꞌ nej sij gi̱ꞌhiaj nne dânj;
gùtàꞌ nej sij raꞌa nej sij yichrá nej guiì aꞌnanꞌan,
ni̱ ga̱na̱huin ninj gi̱ꞌhiaj nej sij.
Gahui Ma̱ꞌan Jesús gaꞌan yàtàꞌa
19 Ni̱ neꞌ rùkù nga gaꞌmin Ma̱ꞌan Señor ngà nej sij,
ni̱ gahui ni̱ gaꞌan neꞌ yàtàꞌa,
ni̱ gaꞌanj ga̱ne raꞌa neꞌ huàꞌ Ma̱ꞌan Ñaꞌanj an.
20 Ni̱ nga gahui nej sij gaꞌanj nej sij,
ni̱ ganataꞌ nej sij si-nùguànꞌ Ma̱ꞌan Ñaꞌanj an nï̀nꞌ gàchràꞌ,
ni̱ gurugûñuꞌunj Ma̱ꞌan Señor rukû nej sij ni̱ nagiꞌhiaj yi̱tïn si-nùguànꞌanj riñan nej sí gaꞌnaꞌ ga̱huin chru̱un,
dadinꞌ ganahuin nej guiì aꞌnanꞌan giꞌhiaj nej sôꞌ.
Ni̱ huê danj huin rûꞌhuaj na̱nj ánj.