Ganaꞌnï̂nj Ma̱ꞌan Jesús siganï̂nj nej nîman
20
Ni̱ nga nï̀nꞌ hua ru̱mi̱nꞌ nga gàràngàꞌ gui gu̱dûngu,
ni̱ gaꞌanj María Magdalena ñan gachinꞌ nej sij nneè kú Ma̱ꞌan Jesús;
ni̱ giniꞌin si gàꞌ giyîꞌnej hiëj garán duꞌhua hiuꞌuj dânj.
2 Hiôꞌ ni̱ gunan gaꞌan ñan nne Simón ngà aꞌngô sôꞌ gaꞌnaꞌ ga̱huin chru̱n riñan Ma̱ꞌan Jesús,
sí ꞌì ruhuâ Jesús niꞌin,
ni̱ gata gunïn nguèj sôꞌ:
—Giri nej guiì ruhuâ hiuꞌuj ñan gachinꞌ ninj Ma̱ꞌan Jesús ni̱ ni̱ka̱j ninj gaꞌanj ninj,
ni̱ nun niꞌînꞌ dànèꞌ nikaj ninj gaꞌanj ninj gàꞌ mánj.
3 Huê danj ni̱ gaꞌanj Pedro ngà aꞌngô sí gaꞌnaꞌ ga̱huin chru̱un ñan gachinꞌ nej sij Ma̱ꞌan Jesús.
4 Ni̱ guñan chre gunânj nguèj sij gaꞌanj nguèj sij;
sani̱ gunânj hio aꞌngô sí gaꞌnaꞌ ga̱huin chru̱n riñan Ma̱ꞌan Jesús gaꞌanj sôꞌ neꞌ ña̱n doj riñan Pedro,
ni̱ gàꞌ si̱nï̱n sôꞌ guchiꞌ ñan gachinꞌ nej sij Ma̱ꞌan Jesús.
5 Ni̱ guduguaꞌ sôꞌ ma̱ꞌan sôꞌ ni̱ giniꞌhiaj sôꞌ ruhuâ hiuꞌuj dânj,
sani̱ man atsîj garán nej sij nneè kú Ma̱ꞌan Jesús tá giniꞌin sôꞌ,
sani̱ nun ga̱tu̱ sôꞌ ruhuâ hiuꞌuj dânj.
6 Ni̱ neꞌ rùkù doj ni̱ guchiꞌ Pedro rukû sí nânj,
ni̱ gatûj sôꞌ ruhuâ hiuꞌuj ñan gachinꞌ nej sij Ma̱ꞌan Jesús,
ni̱ giniꞌin sôꞌ si man atsîj nadutâj ñan giranꞌ yiꞌìi ngaj hiuj dânj,
7 huê danj na̱nj giniꞌin sôꞌ atsîj,
gudutâj nej sij ahui Ma̱ꞌan Jesús,
sani̱ nitaj si nngaj nùguànꞌàn nguèj atsîj dânj,
sani̱ hua̱ narumin ngue nngaj anêj ngue.
8 Hiôꞌ ni̱ gatûj aꞌngô sí gaꞌnaꞌ ga̱huin chru̱n riñan Ma̱ꞌan Jesús,
sí guyumân si̱nï̱n hiuj dânj ruhuâ hiuꞌuj ñan gachinꞌ nej sij Ma̱ꞌan Jesús;
ni̱ giniꞌin sôꞌ ni̱ guyumân ruhuâ sôꞌ.
9 Dadinꞌ hua̱ nun ga̱ra̱n dangaꞌ ruhuâ nej sij dàj taj riñan ñanj si-nùguànꞌ Ma̱ꞌan Ñaꞌanj an,
si ña̱ꞌa̱n ni̱ña̱n huaj si gànàꞌnï̀nj Ma̱ꞌan Jesús siganï̂nj nej nîman.
10 Ni̱ nanꞌ nguèj sí gaꞌnaꞌ ga̱huin chru̱un ñan màn nej sôꞌ ni̱ka̱j duguiꞌ ngà nguèj sôꞌ.
Ganikïnꞌ Ma̱ꞌan Jesús riñan María Magdalena
11 Ni̱ dugueꞌe María nikïnj nìchrùnꞌ neꞌ ye̱ꞌ ñan gachinꞌ nej sij Ma̱ꞌan Jesús;
ni̱ nga nï̀nꞌ dugueꞌe nikïnj,
ni̱ guduguaꞌaj ma̱ꞌan ni̱ giniꞌhia ruhuâ hiuꞌuj ñan gachinꞌ nej sij Ma̱ꞌan Jesús;
12 ni̱ giniꞌin nne huìj ángel ñan gingaj nneè kú Ma̱ꞌan Jesús ni̱ nu̱n nguèj ángel dânj atsîj gàtsìi,
ni̱ ꞌngo̱ ángel dânj nne neꞌ gingaj ahui Ma̱ꞌan Jesús ni̱ aꞌngô ángel dânj nne ñan gingaj dakó Ma̱ꞌan Jesús.
13 Ni̱ gataj nguèj ángel dânj:
—Nùnj huin saj ni̱ dugueꞌê rèꞌ ràꞌaj yu̱guej.
Ni̱ gata gu̱nïn nguèj ángel dânj:
—Dugueꞌé dadinꞌ ni̱ka̱j ninj gaꞌanj ninj si-Señoj,
ni̱ nun niꞌín dànèꞌ ni̱ka̱j ninj gaꞌanj ninj mánj.
14 Nga gisîj gata nej nuguanꞌ nânj,
ni̱ nanikàj rùkuj ni̱ giniꞌhiaj ñunj,
ni̱ giniꞌin nikïnꞌ Ma̱ꞌan Jesús hiuj nânj;
sani̱ nun ga̱na̱ni̱ꞌin si Ma̱ꞌan Jesús huin sa ni̱kï̱nꞌ hiuj dânj.
15 Ni̱ gataj Ma̱ꞌan Jesús gu̱nïn siyànà dânj:
—Nùnj huin saj ni̱ dugueꞌêꞌ ràꞌaj,
ahuin si nanaꞌhuîꞌ ràꞌaj.
Sani̱ ganï̂n ruhuâ siyànà dânj,
si do̱ꞌ sí dugumîn nej chrun ahiu chruj tsìꞌi huin sí ni̱kï̱nꞌ gaꞌmin nngaj,
ni̱ gata gu̱nïn sôꞌ:
—Yu̱guej,
si sòꞌ ni̱ka̱j gaꞌanj si-Señoj,
ni̱ gataj sòꞌ dànèꞌ gaꞌanj gùtàꞌ,
ni̱ ginikâ gàꞌàn nneè kú Ma̱ꞌan na̱nj ánj.
16 Hiôꞌ ni̱ gataj Ma̱ꞌan Jesús:
—María.
Ni̱ nanikàj María ni̱ gata:
—Raboni.
—Nuguanꞌ nan ruhuaj ga̱ta,
maestrûj.
17 Ni̱ gataj Ma̱ꞌan Jesús:
—Si gaganꞌ raꞌâꞌ ñùnj,
dadinꞌ hua̱ nun gànàhuì gàꞌàn ñan nne Ma̱ꞌan Rê gàꞌ mánj;
sani̱ ga̱ꞌa̱njꞌ ñan nne nej dinï̂n,
ni̱ gànàtàꞌ gu̱nïn nej sij:
Si gàꞌàn ñan nne Ma̱ꞌan Rê ni̱ ñan nne Ma̱ꞌan Rêj nej suj,
Ma̱ꞌan sa huin Daꞌân ni̱ Ma̱ꞌan sa huin Daꞌanj nej suj.
18 Huê danj ni̱ gaꞌanj gànàtàꞌ María Magdalena riñan aꞌngô nej sôꞌ gaꞌnaꞌ ga̱huin chru̱un si giniꞌin Ma̱ꞌan Señor Jesús,
ni̱ ganataj si huê Ma̱ꞌan Jesús huin sa gataj nej nuguanꞌ nânj gunïn.
Ganikïnꞌ Ma̱ꞌan Jesús riñan nej sôꞌ gaꞌnaꞌ ga̱huin chru̱n riñanj
19 Nga gahuin dàchrèj nin gui dânj,
ni̱ gui gudûngu gahuin gui dânj,
ni̱ hua̱ garán riñan rahueꞌ mân nej sí gaꞌnaꞌ ga̱huin chru̱n riñan Ma̱ꞌan Jesús dadinꞌ yuꞌhuiꞌ nej sôꞌ niꞌin nej sôꞌ nej sí judío,
ni̱ ganikïnꞌ Ma̱ꞌan Jesús da̱nï̱n ñan màn nej sôꞌ,
ni̱ gata gu̱nïn nej sôꞌ:
—Ga̱ dïnꞌïnj ruhuâ nej suj na̱nj ánj.
Jesús se aparece a los discípulos (Juan 20.19-31)
20 Ni̱ nga gata nej nuguanꞌ nânj,
ni̱ gidiganj raꞌa ñan gatûj gakḯï ni̱ gidiganj yirùkuàj ñan gatûj lansa.
Ni̱ ûta ganahuin nìhiàꞌ ruhuâ nej sí gaꞌnaꞌ ga̱huin chru̱n riñanj niꞌin nej sôꞌ Ma̱ꞌan.
21 Hiôꞌ ni̱ gataj ñûn Ma̱ꞌan Jesús:
—Ga̱huin dïnꞌïnj ruhuâ nej suj na̱nj ánj.
Dàj rûnꞌ gaꞌnḯn Ma̱ꞌan Rê gaꞌná,
ni̱ huê danj gàꞌnï̀n ga̱ꞌa̱nj nej suj.
22 Ni̱ nga gisîj gaꞌmin Ma̱ꞌan Jesús nej nuguanꞌ nânj,
ni̱ gaꞌñan riñan nej sij ni̱ gata:
—Ga̱na̱huin ra̱ꞌa nej suj Ma̱ꞌan Espíritu Santo.
23 Ni̱ si gachín nìꞌhiaj ꞌngo̱ síi riñan nej suj rayiꞌî si-ga̱kïnꞌ sôꞌ ni̱ ginikaj nej suj nimân nìko rayiꞌî si-ga̱kïnꞌ sôꞌ huê danj ni̱ gi̱nikaj Ma̱ꞌan Ñaꞌanj an nimân nìko rayiꞌî si-ga̱kïnꞌ sôꞌ,
sani̱ si nun gànàchìnꞌ sôꞌ nimân nìko riñan nej suj rayiꞌî si-ga̱kïnꞌ sôꞌ huê danj ni̱ hua̱ na̱nj nun gi̱nikaj Maꞌan Ñaꞌanj an nimân nìko rayiꞌî si-ga̱kïnꞌ sôꞌ mánj.
Naꞌhue gùyùmàn ruhuâ Tomás si ganaꞌnï̂nj Ma̱ꞌan Jesús
24 Sani̱ nitaj Tomás nne nga guyumân Ma̱ꞌan Jesús,
ni̱ huê sôꞌ huin ꞌngo̱ nej yùhuìj sí ni̱ka̱j duguiꞌ ngà Ma̱ꞌan Jesús,
ni̱ huê sôꞌ gùꞌnàj ñaꞌàan.
25 Ni̱ gataj aꞌngô da̱ꞌa̱j nej sí gaꞌnaꞌ ga̱huin chru̱un gunïn Tomás:
—Giniꞌin nej ñûnj Ma̱ꞌan Señor na̱nj ánj.
Sani̱ gataj Tomás nga gunïn sôꞌ nuguanꞌ nânj:
—Sisi̱ si̱ giniꞌín dàj hua ñan gatûj gakḯï raꞌa Ma̱ꞌan Señor ni̱ sisi̱ si̱ gidigï̂ dë̂j raꞌá ñan gatûj gakḯï,
ni̱ sisi̱ si̱ gidigï̂ dë̂j raꞌá ñan gatûj lansa yiru̱kua̱ Ma̱ꞌan,
ni̱ si̱ guyumân ruhuâj mánj gataj sôꞌ.
26 Ni̱ gachin tï̱nj gui,
ni̱ màn ñûn nej sí gaꞌnaꞌ gahuin chru̱un ruhuâ hueꞌe,
ni̱ nne Tomás ngà nej sij,
ni̱ hua̱ rán riñan rahueꞌe mân nej sij,
ni̱ ganikïnꞌ ñûn Ma̱ꞌan Jesús da̱nï̱n ñan màn nej sij ni̱ gata:
—Ga̱huin dïnꞌïnj ruhuâ nej suj.
27 Ni̱ gataj Ma̱ꞌan Jesús gunïn Tomás:
—Di̱gïj sòꞌ dë̂j raꞌât hiuj na̱n ni̱ gi̱ꞌniꞌhiaj dàj hua nguèj raꞌá;
ni̱ du̱guatûj dë̂j raꞌât yirùkuàj;
ni̱ si guruguiꞌ chìꞌ ruhuâꞌ mánj,
gahuin sòꞌ ꞌngo̱ sí gùyùmàn ruhuâ.
28 Hiôꞌ ni̱ nanikàj Tomás ni̱ gataj sôꞌ:
—Huê rèꞌ huin Ma̱ꞌan Señor nìkòj,
ni̱ huê rèꞌ huin Ma̱ꞌan Daꞌân.
29 Ni̱ gataj Ma̱ꞌan Jesús gunïn Tomás:
—Dadinꞌ guendâ giniꞌînꞌ ñùnj,
ni̱ guyumân ruhuâꞌ;
ga̱na̱huin nìhiàꞌ ruhuâ nej guiì nun gi̱ni̱ꞌin ñùnj,
dadinꞌ guyumân ruhuâ ninj.
Rayiꞌî Ma̱ꞌan Jesús huin sa ña̱ꞌa̱n gananï̂n librû nânj
30 Ni̱ ûta gàꞌì hua aꞌngô nej sa hueꞌê giꞌhiaj Ma̱ꞌan Jesús giniꞌin nej sí gaꞌnaꞌ gahuin chru̱n riñanj,
sani̱ nun gàtàꞌ nej sa hueꞌê giꞌhia riñan ñanj librû nânj mánj.
31 Sani̱ gachrûn nej ñûnj rayiꞌî nej sa sàꞌ giꞌhiaj Ma̱ꞌan Jesús riñan ñanj librû nânj daꞌnga ni̱ gùyùmàn ruhuâ nej suj si Ma̱ꞌan Jesús huin Cristo,
ni̱ huej huin Daꞌní Ma̱ꞌan Ñaꞌanj an,
ni̱ si gùyùmàn ruhuâ nej suj niꞌin nej suj Ma̱ꞌan,
ni̱ ga̱na̱huin nìꞌnàꞌ nej suj ngà siyu̱gui Ma̱ꞌan na̱nj ánj.