Ganaꞌnï̂nj Ma̱ꞌan Jesús
28
Nga gachîn gui ganarânj rûhua, ni̱ nga nï̀nꞌ ruhuâ gìyìgï̀n gui gu̱dûngu, ni̱ gaꞌnaꞌ gi̱ni̱ꞌhiaj María Magdalena ngà aꞌngô María, ñan gachinꞌ nej sij nneè kú Ma̱ꞌan Jesús.
2 Ni̱ ûta nùkuaj gaꞌhuij ꞌngo̱ ñûn dadinꞌ gaꞌnaꞌ ꞌngo̱ si-ángel Ma̱ꞌan Señor, neꞌ yàtàꞌa ni̱ nga guyumanj hiuj dânj, ni̱ guxunj hiëj garán ñan gachinꞌ nej sij Ma̱ꞌan Jesús, ni̱ gaꞌanj ga̱ne riñan hiëj dânj.
3 Ni̱ huaj dàj rûnꞌ hua ꞌngo̱ sa giràn giꞌhiaj duꞌhui, ni̱ dàj rûnꞌ gàtsì hua ꞌhueꞌe huê danj hua gàtsì siganꞌanj.
4 Ni̱ nga giniꞌin nej stâdu dàj gahuin ni̱ ûta guyuꞌhuiꞌ nej sôꞌ dadinꞌ gaꞌnaꞌ ꞌngo̱ ángel ni̱ nda nagunanj nneè kú nej sôꞌ ni̱ nda gininj ruminꞌ nej sôꞌ giꞌhia;
5 Sani̱ nanikàj ángel ni̱ gata, gu̱nïn nej siyànà ni̱kï̱nꞌ hiuj dânj:
—Si̱ guyuꞌhuiꞌ nej suj mánj; dadinꞌ niꞌín si nanaꞌhuiꞌ nej suj Ma̱ꞌan Jesús, sôꞌ dunikòꞌ rùgùtsì nej síi riñan rugutsìi.
6 Nitaj nngaj hiuj nânj gàꞌ mánj, dadinꞌ gàꞌ ganaꞌnïn siganï̂nj nej nîman dàj rûnꞌ gata, ni̱ ga̱ꞌna̱ꞌ gi̱ni̱ꞌhiaj nej suj ñan ginga.
7 Hiôꞌ ni̱ ga̱ꞌa̱nj nej suj, ni̱ gànàtàꞌ nej suj gu̱nïn nej sí gaꞌnaꞌ ga̱huin chru̱n riñanj: “Si gàꞌ ganaꞌnï̂n siganï̂nj nej nîman, ni̱ gàꞌ hua neꞌ ña̱an riñan nej suj nda yumanꞌ Galilea; ni̱ hiuj dânj gi̱ni̱ꞌin nej suj Ma̱ꞌan.” Ni̱ huê dànanj gatâ riñan nej suj na̱nj ánj.
8 Hiôꞌ ni̱ gahui nej siyànà dânj, ñan gachinꞌ nej sij Ma̱ꞌan Jesús ni̱ nu̱n yuꞌhuiꞌ ruhuâ ninj ni̱ huê danj na̱nj ûta ganahuin nìhiàꞌ ruhuâ ninj, ni̱ gunânj ninj gaꞌanj gànàtàꞌ ninj sa gu̱nïn ninj dânj riñan nej sí gaꞌnaꞌ ga̱huin chru̱n riñan Ma̱ꞌan Jesús,
9 Hiôꞌ ni̱ ganikïnꞌ Ma̱ꞌan Jesús riñan ninj ni̱ gata: Man yu̱gueꞌ. Ni̱ gaꞌnaꞌ nichì ninj, ni̱ ganana̱n ninj dakó Ma̱ꞌan, ni̱ ginûn ña̱ꞌa̱nj ninj Ma̱ꞌan.
10 Hiôꞌ ni̱ gataj Ma̱ꞌan Jesús:
—Si̱ gahuin ña̱ꞌanj ruhuâ nej suj mánj; ga̱ꞌa̱nj nej suj ni̱ gànàtàꞌ nej suj sa giniꞌin nej suj riñan nej dinï̂n, daꞌnga ni̱ ga̱ꞌa̱nj nej sij yumanꞌ Galilea, ni̱ hiuj dânj gi̱ni̱ꞌin nej sij ñùnj.
Ganataꞌ nej stâdu dàj gahuin
11 Nga nï̀nꞌ aché nej siyànà nânj huaj ninj, ni̱ gaꞌanj da̱ꞌa̱j nej sí stâdu ni̱kï̱nꞌ dugumîn hiuj dânj yumanꞌ snàꞌànj Jerusalén, ni̱ ganataꞌ nej sôꞌ riñan nej rej huin ña̱an daranꞌ nej sa giniꞌin nej sôꞌ gahuin.
12 Ni̱ gaꞌanj ga̱na̱rï̱snaꞌanj nej rej huin ña̱an ngà nej síchìj achij i, ni̱ dagaꞌmin duguiꞌ nej sij ni̱ ûta nìko sanꞌanj an gaꞌhuiꞌ nej sij riñan nej sí stadû.
13 Ni̱ gataj nej sij:
—Ga̱ta̱j nej suj ni̱ nga nï̀nꞌ gatoj nej ñûnj neꞌ ñànꞌan ni̱ gaꞌnaꞌ nej sí ꞌna̱ꞌ ga̱huin chru̱n riñan sí dânj ni̱ giꞌhiaj tu̱ nej sôꞌ nneè kú sij.
14 Ni̱ asàꞌ gunïn gobernador nej nuguanꞌ nânj, ni̱ si̱ giriñun ruhuâ nej suj dadinꞌ du̱naꞌhuej nej ñûnj rayiꞌî nej suj, ni̱ gi̱ꞌhiaj nej ñûnj si ga̱na̱ni̱n nej suj.
15 Ni̱ gidaꞌa nej sí stadû sanꞌanj an, ni̱ duyaꞌnï̀n nej sôꞌ nej nuguanꞌan dàj rûnꞌ gataj nej rej huin ña̱an, ni̱ nuguanꞌ nânj huin sa gayaꞌnï̀n siganï̂nj daran nej judío nda gui hia̱j.
Sun duguta su̱n Ma̱ꞌan Jesús riñan nej sôꞌ gaꞌnaꞌ gahuin chru̱n riñanj
16 Ni̱ gaꞌanj nej yàn nej sí gaꞌnaꞌ ga̱huin chru̱n riñan Ma̱ꞌan Jesús nda Galilea, raa̱ kïj ñan gataj Ma̱ꞌan Jesús si gànàꞌhuìj nej sij.
17 Ni̱ nga giniꞌin nej sij Ma̱ꞌan Jesús ni̱ ganikïnꞌ rúdàkòj nej sij riñanj; sani̱ hua̱ da̱ꞌa̱j nej sij guruguiꞌ chìꞌ ruhuâ niꞌin Ma̱ꞌan.
18 Ni̱ gaꞌanj nichì Ma̱ꞌan Jesús riñan nej sij ni̱ gata:
—Daranꞌ nej suun ga̱na̱huin raꞌá ni̱ gi̱nikaj sùnj yàtàꞌa ngà riñan hioꞌóo.
19 Huê danj ni̱ ga̱ꞌa̱nj nej suj, ni̱ gi̱digân nej suj si gahuin chru̱n nej guiì si-nùguànꞌ Ma̱ꞌan Ñaꞌanj an nï̀nꞌ gàchràꞌ ruhuâ yumiguìi ni̱ du̱guataꞌ nne nej suj nej guiì ngà siyu̱gui Ma̱ꞌan Rê Ñaꞌanj an, ngà siyu̱gui Ma̱ꞌan Daꞌnin, ni̱ ngà siyu̱gui Ma̱ꞌan Espíritu Santo;
20 Ni̱ gi̱di̱gân nej suj si da̱gahuin nej guiì daranꞌ nej nuguanꞌ gaꞌnïnꞌ sùnj; hiôꞌ ni̱ nné ngà nej suj daranꞌ nej gui nda ga̱na̱huij yumiguìi. Ni̱ huê danj huin rûꞌhuaj.