Ganaꞌnï̂nj Ma̱ꞌan Jesús siganï̂nj nej nîman
24
Ni̱ gui gu̱dûngu nga gayiꞌì semana,
nga nï̀nꞌ hua ni̱ganꞌ staꞌu,
ni̱ gaꞌnaꞌ nej siyànà dânj ña̱n gachinꞌ sôꞌ nneè kú Ma̱ꞌan Jesús,
ni̱ ni̱ka̱j ninj sa gïnꞌ dàj a ngà nne gïnꞌ dàj giꞌhiaj yu̱gui ninj gaꞌnaꞌ ninj,
ni̱ huê danj na̱nj gaꞌnaꞌ aꞌngô nej siyànàa ngà ninj.
2 Ni̱ ganariꞌ ninj si gàꞌ gahuin anêj hiëj garân riñan hiuꞌuj ñan gachinꞌ sôꞌ nneè kú Ma̱ꞌan Jesús;
3 Ni̱ nga gatûj ninj ruhuâ hiuꞌuj dânj ni̱ nun gànàrìꞌ ninj nneè kú Ma̱ꞌan Jesús.
4 Nga nï̀nꞌ ûta ganï̂n gi̱tsi ruhuâ ninj nùnj huin si gahuin hiuj dânj,
huê danj ni̱ guyumân huìj sí nun atsîj raa̱n chre ña̱n ni̱kï̱nꞌ ninj.
5 Ni̱ nga giniꞌin ninj nguèj sôꞌ ni̱ guyuꞌhuiꞌ ninj,
ni̱ guduguaꞌ ninj riñan ninj riñan hioꞌóo,
ni̱ gataj nguèj sí dânj gu̱nïn ninj:
—Nùnj huin saj ni̱ nanaꞌhuiꞌ nej suj siganï̂nj nej nîman Ma̱ꞌan sa nne nìꞌnàꞌ ràꞌaj.
6 Nitaj nngaj hiuj nan gàꞌ mánj,
gàꞌ ganahuin nìꞌnàj siganï̂nj nej nîman.
Ga̱na̱nun ruhuâ nej suj dàj gatâ gu̱nïn nej suj,
nga gané riñan hioꞌó Galilea,
7 dadinꞌ ga̱ꞌ gatâ:
Si hua̱ ni̱ña̱n si nàgàꞌhuìꞌ nej sij ñùnj raꞌa nej sí gakï̱nꞌïn,
ni̱ du̱nikòꞌ rùgùtsì nej sôꞌ ñùnj riñan rugutsìi,
sani̱ gànàꞌnï̀n gachin huàꞌnï̀nj gui siganï̂nj nej nîman.
8 Hiôꞌ ni̱ gananun ruhuâ nej siyànà nânj nej nuguanꞌ gataj Ma̱ꞌan Jesús.
9 Ni̱ gudunâj ninj ña̱n gachinꞌ nej sôꞌ nneè kú Ma̱ꞌan Jesús,
ni̱ gaꞌanj gànàtàꞌ ninj nej nuguanꞌ gu̱nïn ninj ni̱ nej sa giniꞌin ninj riñan nej yàn nej sí gaꞌnaꞌ ga̱huin chru̱n riñan Ma̱ꞌan Jesús ngà aꞌngô nej sôꞌ màn hiuj dânj.
10 Nej siyànà dânj huin María Magdalena,
Juana ngà María huin nni sôꞌ gùꞌnàj Jacobo,
ni̱ hua̱j aꞌngô nej siyànàa ngà nej siyànà nânj,
ni̱ ganataꞌ ninj nej sa giniꞌin ninj riñan nej sí gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an.
11 Sani̱ ganï̂n ruhuâ nej sôꞌ si sinún nej siyànà nânj,
ni̱ nun gùyùmàn ruhuâ nej sôꞌ sa gataj ninj.
12 Sani̱ ganayumàn Pedro,
ni̱ gunânj sôꞌ gaꞌanj gi̱ni̱ꞌhiaj sôꞌ ña̱n gachinꞌ nej sij nneè kú Ma̱ꞌan Jesús;
ni̱ nga guchiꞌ sôꞌ ni̱ giniꞌhiaj sôꞌ ruhuâ hiuꞌuj dânj,
ni̱ giniꞌin sôꞌ si nngaj man atsîj garán nej sij nneè kú Ma̱ꞌan Jesús ruhuâ hiuꞌuj dânj,
ni̱ ûta gahuin ña̱ꞌanj ruhuâ sôꞌ rayiꞌî sa gahuin ni̱ nanꞌ sôꞌ hueꞌ ñan màn aꞌngô nej sí ni̱ka̱j duguiꞌ ngà sôꞌ.
Hua̱j nej sij chrej hua̱j yumanꞌ Emaús
13 Hiôꞌ ni̱ huê gè gui dânj,
huaj huìj sí gaꞌnaꞌ ga̱huin chru̱n riñan Ma̱ꞌan Jesús ña̱n nngaj ꞌngo̱ ranchu gùꞌnàj Emaús,
ni̱ yàn kilometru gànꞌ nnga ngà yumanꞌ snàꞌànj Jerusalén.
14 Ni̱ ganarïsnaꞌanj nguèj sôꞌ hua̱j nguèj sôꞌ rayiꞌî daranꞌ nej sa gahuin.
15 Ni̱ nga nï̀nꞌ hua̱j nguèj sôꞌ ganarïsnaꞌanj nguèj sôꞌ,
ni̱ gaꞌanj nichì Ma̱ꞌan Jesús ñan hua̱j nguèj sôꞌ,
ni̱ ache hua ngà nguèj sôꞌ.
16 Sani̱ nun ga̱ꞌhue ga̱na̱ni̱ꞌin nguèj sôꞌ Ma̱ꞌan Jesús,
dadinꞌ hua̱ nï̀nꞌ hua̱ huì Ma̱ꞌan riñan nguèj sôꞌ.
17 Ni̱ gataj Ma̱ꞌan Jesús gu̱nïn nguèj sôꞌ:
—Ahuin nuguanꞌ huin nej sa ganarïsnaꞌanj nguèj suj nga aché nguèj suj ꞌna̱ꞌ nguèj suj ràꞌaj,
ni̱ nùnj huin saj ni̱ gananï̂n ruhuâ nguèj suj ràꞌaj.
18 Nanikàj Cleofas,
ꞌngo̱ sí gaꞌnaꞌ ga̱huin chru̱n riñan Ma̱ꞌan Jesús ni̱ gataj sôꞌ:
—ꞌNgo̱ rï̂n rèꞌ huin sí ꞌna̱ꞌ aꞌngô yumanꞌan ni̱ nun gi̱ni̱ꞌinꞌ nùnj huin si gahuin ruhuâ yumanꞌ snàꞌànj Jerusalén nej gui nânj na̱nj nîꞌ.
19 Hiôꞌ ni̱ gataj Ma̱ꞌan Jesús:
—Nùnj huin si̱ gahuin na̱nj únj.
Ni̱ gataj nguèj sí dânj:
—Huê rayiꞌî Ma̱ꞌan Jesús sôꞌ ꞌna̱ꞌ yumanꞌ gùꞌnàj Nazaret ganarïsnaꞌanj nguèj nûnj,
dadinꞌ gahuin sôꞌ ꞌngo̱ sí ganataꞌ dàj gahuin,
ni̱ ûta nìko hua nej sa giꞌhiaj sôꞌ ni̱ ûta nùkuaj hua nuguanꞌ ga̱ꞌmi̱n sôꞌ giꞌhiaj Ma̱ꞌan Ñaꞌanj an ni̱ huê danj na̱nj gahuin sôꞌ ꞌngo̱ sí ni̱ka̱j sun nìko riñan nej guiì yùmànꞌan.
20 Dadinꞌ nagaꞌhuiꞌ nej rej huin ña̱an ngà nej sí ni̱ka̱j su̱n riñan nej ñûnj guendâ da̱gahuiꞌ nej sôꞌ Ma̱ꞌan Jesús ni̱ gudunikòꞌ rùgùtsì nej sôꞌ riñan rugutsìi Ma̱ꞌan.
21 Dadinꞌ ganaꞌhuìj nej ñûnj si sôꞌ huin sí gi̱ꞌhiaj ga̱na̱ni̱n Israel;
sani̱ huê danj na̱nj,
gàꞌ gisîj huàꞌnï̀nj gui gahuin daranꞌ nej nânj.
22 Huê danj na̱nj gàꞌ duyuꞌhuiꞌ da̱ꞌa̱j nej siyànà ni̱ka̱j duguiꞌ ngà nej ñûnj,
ni̱ àsìj hua ni̱ganꞌ gui hia̱j gaꞌanj gi̱ni̱ꞌhiaj ninj ña̱n gachinꞌ nej sôꞌ nneè Ma̱ꞌan Jesús;
23 sani̱ nun gi̱ni̱ꞌin ninj nneè kú sôꞌ hiuj dânj,
ni̱ gaꞌnaꞌ gànàtàꞌ ninj gu̱nïn nej ñûnj si giniꞌin ninj nej ángel,
ni̱ gataj nej ángel dânj gu̱nïn ninj si hua̱ nìꞌnàꞌ Ma̱ꞌan Jesús.
24 Ni̱ gaꞌanj da̱ꞌa̱j nej sí ni̱ka̱j duguiꞌ ngà nej ñûnj ña̱n gachinꞌ nej sí nneè kú Ma̱ꞌan Jesús,
ni̱ huê dàj rûnꞌ gataj nej siyànà nânj huê danj hua ya̱ngaj giniꞌin nej sôꞌ taj nej sô,
sani̱ nun gi̱ni̱ꞌin nej sôꞌ nneè kú Ma̱ꞌan Jesús taj nej sôꞌ mánj.
25 Hiôꞌ ni̱ gataj Ma̱ꞌan Jesús:
—Aya̱ꞌ nej sí suj ni̱ naꞌhue ga̱ya̱ka̱j guendâ nej suj gàꞌ mánj,
ni̱ ûta ràn gùyùmàn ruhuâ nimân nej suj daranꞌ nej nuguanꞌ gataj nej sí gataj dàj ga̱huin.
26 Sê hua̱ ni̱ña̱n si̱ huê dànanj gi̱ranꞌ Ma̱ꞌan Cristo,
ni̱ neꞌ rùkù na̱ꞌanj yàtàꞌa ñan gane ginikaj sunj ràꞌ saj ûnꞌ.
27 Ni̱ gayiꞌij ni̱ ganataj nuguanꞌ nnùn riñan librû àsìj nga gachrûn sachij Moisés,
ni̱ ganataj dàj gachrûn nej sôꞌ gataj dàj gahuin,
ni̱ nadiganj daranꞌ nej nuguanꞌ gaꞌmin rayiꞌij riñan nej sôꞌ.
28 Huê danj ni̱ guchiꞌ nej sij ña̱n nngaj ranchu ña̱n hua̱j nej sij dânj,
ni̱ man si̱ giꞌhiaj Ma̱ꞌan Jesús si̱ nda ga̱nꞌ doj hua gàꞌan.
29 Sani̱ giꞌhiaj guesâ nguèj sij si gùnàj Ma̱ꞌan Jesús ñan gùnàj nguèj sij ni̱ gataj nguèj sij:
—Gùnàj sôꞌ hiuj nan,
dadinꞌ gàꞌ ꞌna̱ꞌ gìnìn ni̱ gàꞌ ꞌna̱ꞌ ga̱tu̱ gui.
Huê danj ni̱ gatûj Ma̱ꞌan Jesús guendâ gu̱na hueꞌ ñan gùnàj nguèj sij.
30 Ni̱ nga nne Ma̱ꞌan Jesús yiꞌnḯn Mesa ngà nej sij,
ni̱ gidaꞌa rachrúun ni̱ gaꞌhuij si̱ guruhuâ Ma̱ꞌan Ñaꞌanj an,
ni̱ guchraꞌ da̱ꞌa rachrúun,
ni̱ gaꞌhuij yâ nej sij.
31 Hiôꞌ ni̱ ganayigï̀n rune ñan nguèj sij,
ni̱ gananiꞌin nguèj sij Ma̱ꞌan;
sani̱ nun gi̱ni̱ꞌin daꞌngaꞌ nguèj sij ni̱ nitaj nne ngà nguèj sij gàꞌ mánj.
32 Ni̱ gataj daꞌ goꞌngo̱ nguèj sij:
—Sê nda ñaꞌan chre giꞌhia ruhuâ nimûnꞌ,
nga nï̀nꞌ gaꞌmin ngòꞌ nga ꞌnoꞌ ruhuâ chre̱j e ni̱ ganataj si-nùguànꞌ Ma̱ꞌan Ñaꞌanj an riñunꞌ ràꞌ saj ûnꞌ.
33 Ni̱ huê gè orâ dânj ganayumàn nguèj sij,
ni̱ ganaꞌnaꞌ nguèj sij yumanꞌ snàꞌànj Jerusalén,
ni̱ ganariꞌ nguèj sij nej yàn nej sôꞌ gaꞌnaꞌ ga̱huin chru̱n riñan Ma̱ꞌan Jesús,
ni̱ nne aꞌngô da̱ꞌa̱j nej sí guyumân ruhuâ niꞌin Ma̱ꞌan Jesús hiuj dânj,
34 Aꞌmin nej sôꞌ mân nej sôꞌ ni̱ gataj nej sôꞌ:
—Yàngàꞌ hia nï̀nꞌ ni̱ ganaꞌnï̂nj Ma̱ꞌan Jesús siganï̂nj nej nîman,
dadinꞌ gidiganj Ma̱ꞌan riñan Simón na̱nj ánj.
35 Hiôꞌ ni̱ gayiꞌì nguèj sij ni̱ ganataꞌ nguèj sij dàj giranꞌ nguèj sij nga huaj nguèj sij ruhuâ chre̱j e,
dadinꞌ gananiꞌin nguèj sij Ma̱ꞌan Jesús nga gaꞌneꞌ da̱ꞌa rachrúun ni̱ dàj gaꞌmin nga gaꞌhuij si guruhuâ Ma̱ꞌan Ñaꞌanj an.
Ganikïnꞌ Ma̱ꞌan Jesús siganï̂nj nej sôꞌ gaꞌnaꞌ ga̱huin chru̱n riñanj
36 Nga nï̀nꞌ aꞌmin nej sij nej nuguanꞌ nânj mân nej sij,
ni̱ ganikïnꞌ Ma̱ꞌan Jesús da̱nï̱n ña̱n màn nej sij,
ni̱ gata:
—Ga̱ dïnꞌïnj ruhuâ nej suj.
37 Hiôꞌ ni̱ ûta guyuꞌhuiꞌ nej sij ni̱ ûta gahuin ña̱ꞌanj ruhuâ nej sij,
ni̱ ganï̂n ruhuâ nej sij si ꞌngo̱ staꞌnaj a huin sa ni̱kï̱nꞌ giniꞌhiaj nej sij ruhuâ nej sij.
38 Sani̱ gataj Ma̱ꞌan Jesús gu̱nïn nej sij:
—Nùnj huin saj ni̱ ûta yuꞌhuiꞌ nej suj,
ni̱ ganï̂n ruhuâ nej suj dànanj ràꞌaj.
39 Gi̱ni̱ꞌhiaj nej suj dàj hua raꞌá ni̱ dàj hua dakô,
dadinꞌ huê ñùnj huin sa ni̱kï̱nꞌ giniꞌhiaj nej suj;
ni̱ gàgànꞌ raꞌa nej suj ñùnj,
ni̱ giniꞌhiaj nej suj ñùnj;
dadinꞌ ꞌngo̱ staꞌnaj a ni̱ sê nneè ngà kúu huin,
dadinꞌ ñùnj ni̱ nneè ni̱ kúu huin nikḯn riñan nej suj na̱nj ánj.
40 Ni̱ nga gata nej nuguanꞌ nânj,
ni̱ gidiganj dàj hua raꞌa ngà dako ñan giꞌnïnj gakḯï.
41 Ûta gahuin nìhiàꞌ ruhuâ nej sij,
sani̱ huê danj na̱nj hua̱ na̱nj naꞌhue gùyùmàn sàꞌ ruhuâ nej sij,
ni̱ ûta gahuin ña̱ꞌanj ruhuâ nej sij,
ni̱ gata gu̱nïn nej sij:
—Ni̱ka̱j nej suj doj sa yo̱ꞌ nîꞌ.
42 Hiôꞌ ni̱ gaꞌhuiꞌ nej sij ꞌngo̱ dasû yukuaj ginitï̂n,
ni̱ ꞌngo̱ sikôj màn ga̱tsi̱ yutan raꞌa Ma̱ꞌan Jesús.
43 Ni̱ gidaꞌa Ma̱ꞌan Jesús,
ni̱ yaj giniꞌin daranꞌ nej sij.
44 Ni̱ gataj Ma̱ꞌan Jesús:
—Huê nej nuguanꞌ nânj huin sa gaꞌmînj,
nga nï̀n gané ngà nej suj:
Si ña̱ꞌa̱n huaj si gìsìj daranꞌ nej nuguanꞌ nnùn riñan ñanj gachrûn Moisés rayiꞌí,
ngà nej nuguanꞌ gachrûn nej sôꞌ gataj dàj ga̱huin,
ni̱ nej nuguanꞌ nnùn riñan ñanj librû salmos.
45 Hiôꞌ ni̱ giꞌhia si ga̱na̱yi̱ꞌnï̱n daꞌnga nej sij,
ni̱ ga̱ꞌhue garânj daꞌngaꞌ ruhuâ nej sij dàj taj riñan ñanj si-nùguànꞌ Ma̱ꞌan Ñaꞌanj an.
46 Ni̱ gata gu̱nïn nej sij:
—Huê danj nnunj riñan ñanj,
ni̱ hua̱ ni̱ña̱n si gàhuìꞌ Ma̱ꞌan Cristo,
ni̱ ga̱chi̱n huàꞌnï̀nj gui ni̱ ganaꞌnïn siganï̂nj nej nîman;
47 ni̱ ga̱ra̱n sun nej suj siyu̱gui Maꞌán nga ga̱ꞌmi̱n nej suj ni̱ gànàtàꞌ naꞌanj nej suj si ña̱ꞌa̱n hua̱j si̱ nànìkàj ruhuâ nej guiì rayiꞌî si-ga̱kïnꞌ ninj,
ni̱ giniꞌin ninj si ga̱ꞌhue gi̱nikâ nimân nìko rayiꞌî si-ga̱kïnꞌ daranꞌ ninj màn nï̀nꞌ gàchràꞌ ruhuâ yumiguìi,
ni̱ gàyìꞌì nej suj ga̱ꞌmi̱n nej suj àsìj Jerusalén.
48 Nej suj huin sa giniꞌin dàj gahuin nej nânj.
49 Hia̱j ni̱,
gàꞌnï̀n gaꞌnaꞌ Ma̱ꞌan Espíritu Santo riñan nej suj dàj rûnꞌ rikî Ma̱ꞌan Rê si-nùguànꞌanj,
sani̱ gànàꞌhuìj nej suj gimàn nej suj ruhuâ yumanꞌ snàꞌànj Jerusalén,
nda ga̱na̱huin nùkuaj nej suj gi̱ꞌhia̱j Ma̱ꞌan Ñaꞌanj nne yàtàꞌa.
Gahui Ma̱ꞌan Jesús gaꞌan yàtàꞌa
50 Neꞌ rùkù ni̱ ginikaj Ma̱ꞌan Jesús gaꞌan nej sij nda Betania,
ni̱ ganachi nikaj raꞌa yàtàꞌa,
ni̱ gata si ga̱ꞌna̱ꞌ sa hua̱ hueꞌê riñan nej sij.
51 Ni̱ nga nï̀nꞌ nikïnj nagaꞌhuij nuguanꞌ hua̱ hueꞌê riñan nej sij,
ni̱ gahui ni̱ gaꞌan yàtàꞌa.
52 Ni̱ nga gisîj ginûn ña̱ꞌa̱nj nej sij Ma̱ꞌan,
ni̱ ûta ganahuin nìhiàꞌ ruhuâ nej sij ni̱ nanikàj nej sij nanꞌ nej sij yumanꞌ snàꞌànj Jerusalén;
53 ni̱ daranꞌ nej gui nne nej sij ruhuâ hueꞌ nûhui,
ni̱ gachrá nej sij chraꞌa ni̱ aꞌmin hueꞌê nej sij yiꞌî Ma̱ꞌan Ñaꞌanj an.
Ni̱ huê danj huin rûꞌhuaj na̱nj ánj.