Ni̱kï̱nꞌ Ma̱ꞌan Jesús riñan Pilato
23
Hiôꞌ ni̱ ganayumàn daranꞌ nej sí rigì màn hiuj dânj,
ni̱ ni̱ka̱j nej sôꞌ gaꞌanj nej sôꞌ Ma̱ꞌan Jesús riñan Pilato.
2 Ni̱ gayiꞌì nej sôꞌ ni̱ garânj ruhuâ nej sôꞌ rayiꞌî Ma̱ꞌan.
Ni̱ gataj nej sôꞌ:
—Ni̱ giniꞌin nej ñûnj si sí nânj ni̱ gidigân sôꞌ aꞌngô chrej e riñan nej guiì màn yiñán nej ñûnj,
ni̱ nagiꞌhiaj ha̱i̱ sôꞌ si gàꞌhuìꞌ nej ñûnj saꞌanj huin kuestu riñan César,
ni̱ gataj sôꞌ si huê sôꞌ huin Ma̱ꞌan Cristo,
ni̱ huê sôꞌ huin rey.
3 Hiôꞌ ni̱ gachín naꞌanj Pilato,
ni̱ gataj sôꞌ:
—Huê rèꞌ huin rey ni̱ka̱j su̱n riñan nej sí judío nîꞌ.
Nanikàj Ma̱ꞌan Jesús,
ni̱ gata:
—Huê dàj rûnꞌ tajꞌ ni̱ huê danj huín.
4 Ni̱ gataj Pilato gu̱nïn nej rej huin ña̱an ngà riñan nej guiì:
—Nitaj gàꞌ si ꞌngo̱ gakï̱nꞌïn ganariꞌí giꞌhiaj sí nan mánj.
5 Sani̱ ûta ginûn huin nej sí dânj garânj ruhuâ nej sôꞌ rayiꞌî Ma̱ꞌan Jesús,
ni̱ gataj nej sôꞌ:
—Ûta dugunïnꞌ sí nânj ni̱ giꞌhiaj sôꞌ si ûta gaguâj nej guiì nej duguiꞌ ninj ngà nej sa gidigân sôꞌ,
ni̱ gayiꞌì sij gidigân sij àsìj nda riñan hioꞌó Galilea ni̱ nda ganûn sij gidigân sij riñan hioꞌó Judea,
ni̱ gàꞌ guyumân sij dangaꞌ nan na̱nj ánj.
Ni̱kï̱nꞌ Ma̱ꞌan Jesús riñan Herodes
6 Hiôꞌ ni̱ nga gunïn Pilato sa gataj nej sí nânj,
ni̱ gachín naꞌanj sôꞌ si riñan hioꞌó Galilea huin yiñán Ma̱ꞌan Jesús.
7 Ni̱ nga gunïn Pilato si Herodes ginikaj su̱n riñan hioꞌó Galilea,
ni̱ gaꞌnḯn sôꞌ gaꞌanj Ma̱ꞌan Jesús riñan Herodes,
dadinꞌ nej gui dânj ni̱ nne Herodes ruhuâ yumanꞌ snàꞌànj Jerusalén.
8 Ni̱ nga giniꞌin Herodes Ma̱ꞌan Jesús,
ni̱ ûta gahuin nìhiàꞌ ruhuâ sôꞌ,
dadinꞌ àsìj nngaj gui ni̱ ûta gahuin ruhuâ sôꞌ gi̱ni̱ꞌin sôꞌ Ma̱ꞌan Jesús;
dadinꞌ gunïn sôꞌ si ûta gàꞌì hua nej sa giꞌhiaj Ma̱ꞌan Jesús,
ni̱ ruhuâ sôꞌ gi̱ni̱ꞌin sôꞌ si gi̱ꞌhiaj Ma̱ꞌan Jesús ꞌngo̱ daꞌngaꞌa riñan sôꞌ.
9 Ni̱ ûta gachín naꞌanj sôꞌ Ma̱ꞌan Jesús,
sani̱ gàꞌ si̱ ꞌngo̱ nuguanꞌan nun du̱nanikàj Ma̱ꞌan Jesús riñan sôꞌ.
10 Ni̱ màn nej rej huin ña̱an ni̱ màn nej sí chru̱n ley ni̱ ûta garânj ruhuâ nej sôꞌ rayiꞌî Ma̱ꞌan Jesús.
11 Hiôꞌ ni̱ ganari ninj Herodes ngà nej si-stadû sôꞌ Ma̱ꞌan Jesús ni̱ ûta gaꞌmin duku nej sôꞌ riñan Ma̱ꞌan,
ni̱ gaꞌnḯn nej sôꞌ ꞌngo̱ atsîj nu̱n rey Ma̱ꞌan Jesús;
ni̱ ganaꞌnḯn ñûn sôꞌ gaꞌanj Ma̱ꞌan Jesús riñan Pilato.
12 Ni̱ nej gui gâchin ni̱ nitaj si ni̱ka̱j duguiꞌ hueꞌê Pilato ngà Herodes dadinꞌ si nu̱n naꞌan ruhuâ nguèj sôꞌ niꞌin nguèj sôꞌ duguiꞌ nguèj sôꞌ sani̱ àsìj gui dânj ni̱ ganaꞌmin nguèj sôꞌ ni̱ ginikaj duguiꞌ hueꞌê nguèj sôꞌ.
Giriꞌ nìꞌhiaj Ma̱ꞌan Jesús ga̱huij
13 Hiôꞌ ni̱ ganakḯn Pilato,
daranꞌ nej rej huin ña̱an,
ni̱ nej sí ni̱ka̱j su̱n riñan yumanꞌan,
ni̱ huê danj na̱nj ganakḯn sôꞌ daꞌ hua̱ nï̀nꞌ gàchràꞌ yumanꞌan,
14 Ni̱ gataj sôꞌ:
—Gi̱nikaj nej suj ga̱ꞌna̱ꞌ nej suj sí dânj riñânj dadinꞌ gataj nej suj si dugunïnꞌ sij nej guiì yùmànꞌan;
sani̱ gàꞌ giniꞌin nej suj si gachín naꞌan sij,
sani̱ nun gànàrìꞌìj gàꞌ si ꞌngo̱ nej gakï̱nꞌ garânj ruhuâ nej suj rayiꞌî sij mánj.
15 Ni̱ gàꞌ si ꞌngo̱ gakï̱nꞌïn nun gànàrìꞌ Herodes rayiꞌî sij,
nga gaꞌnï̂n nej suj gaꞌanj sij riñan sôꞌ;
rayiꞌî dan ni̱ ganaꞌnï̂n ñûn sôꞌ gunumân sij riñan nêꞌ,
huê dan ni̱ nitaj gakï̱nꞌ giꞌhiaj sij si gàhuìꞌ sij mánj.
16 Gùdùguañûnj sij ni̱ neꞌ rùkù ni̱ gànàꞌnï̀nj raꞌá sij na̱nj ánj.
17 Ni̱ daranꞌ hioꞌo ni̱ ganaꞌnḯn raꞌa Pilato ꞌngo̱ sí giꞌhiaj gakï̱nꞌïn nga guyumân giꞌñanj pascua.
18 Sani̱ gaguâj daranꞌ nej guiì ni̱ gataj ninj:
—Da̱gahuiꞌ sòꞌ sij ni̱ gànàꞌnï̀nj raꞌâꞌ sí gùꞌnàj Barrabás na̱nj ánj.
19 Dadinꞌ gatûj Barrabás dukuâ ga̱ꞌa guendâ ganachi nikaj nej dùguìꞌ sôꞌ ni̱ gunïnꞌ sôꞌ nga nej sí ni̱ka̱j su̱n nne yumanꞌ snàꞌànj dânj,
ni̱ dagahuiꞌ sôꞌ ꞌngo̱ guiì.
20 Ni̱ gaꞌmin ñûn Pilato dadinꞌ ruhuâ sôꞌ,
gànàꞌnï̀nj raꞌa sôꞌ Ma̱ꞌan Jesús;
21 sani̱ gayiꞌì nej sí nânj ni̱ gaguâj ñûn nej sôꞌ,
ni̱ gataj nej sôꞌ:
—Du̱nikòꞌ rùgùtsì rèꞌ sí dan riñan rugutsìi,
dunikòꞌ rùgùtsì rèꞌ sí dan riñan rugutsìi.
22 Ni̱ gisîj huàꞌnï̀nj gachín naꞌanj Pilato ni̱ gataj sôꞌ:
—Ahuin sa aꞌnanꞌ giꞌhiaj sí nânj ràꞌaj.
Dadinꞌ gàꞌ si̱ ꞌngo̱ gakï̱nꞌïn nun gànàrìꞌìj giꞌhiaj sij si gàhuìꞌ sij mánj,
sani̱ du̱guañun ñûn sij ni̱ neꞌ rùkù ni̱ gànàꞌnï̀nj raꞌá sij na̱nj ánj.
23 Sani̱ gayiꞌì ñûn nej sí nânj ni̱ ûta nùkuaj gaguâj nej sôꞌ ni̱ gachín nej sôꞌ si̱ du̱nikòꞌ rùgùtsì nej sij Ma̱ꞌan Jesús.
Ni̱ ûta nâ gaguâj nej sôꞌ ni̱ gataj nej sôꞌ dànanj.
24 Huê danj ni̱ garânj yina Pilato ni̱ giꞌhiaj sôꞌ dàj rûnꞌ gachín nìꞌhiaj nej sí dânj;
25 Huê danj ni̱ ganaꞌnḯn raꞌa sôꞌ Barrabás sí gunïnꞌ ngà nej sí ni̱ka̱j suun sí dagahuiꞌ nîman,
dadinꞌ rayiꞌî sôꞌ gachín nìꞌhiaj nej sij si ga̱hui̱ sôꞌ ruhuâ dukuâ ga̱ꞌa;
ni̱ nàgàꞌhuìꞌ Pilato Ma̱ꞌan Jesús raꞌa nej sij ni̱ giꞌhiaj nej sij dàj garanꞌ ruhuâ nej sij ngà Ma̱ꞌan Jesús.
Dunikòꞌ nej sij riñan rugutsìi Ma̱ꞌan Jesús
26 Ni̱ ni̱ka̱j nej sij gaꞌanj nej sij Ma̱ꞌan Jesús,
ni̱ gidaꞌa nej sij sí gùꞌnàj Simón sí ꞌna̱ꞌ riñan hioꞌó Sirene,
dadinꞌ hia̱j ꞌna̱ꞌ niki sôꞌ gaꞌanj sôꞌ kïj ï,
ni̱ giꞌhiaj guesâ nej sij si ga̱ta sôꞌ rugutsìi ni̱ ginikòꞌ sôꞌ neꞌ rukû Ma̱ꞌan Jesús ga̱ꞌanj sôꞌ.
27 Ni̱ ûta gàꞌì nej guiì rigì màn yumanꞌ dânj nìkòꞌ huaj rukû Ma̱ꞌan Jesús,
ni̱ huê danj na̱nj huaj ûta gàꞌì nej siyànàa ni̱ gudugueꞌe ninj ni̱ aguâj hia ninj huaj ninj rayiꞌî Ma̱ꞌan Jesús.
28 Sani̱ nanikàj Ma̱ꞌan Jesús,
ni̱ giniꞌhia riñan ninj,
ni̱ gata gu̱nïn ninj:
—Daꞌnin yànà yumanꞌ snàꞌànj Jerusalén,
si̱ gudugueꞌe nej suj rayiꞌí mánj,
gu̱du̱gue̱ꞌe nej suj rayiꞌî ma̱ꞌan nej suj ni̱ rayiꞌî nej daꞌní nej suj na̱nj ánj.
29 Dadinꞌ gùyùmàn gui ni̱ gataj nej guiì:
“Ga̱na̱huin nìhiàꞌ ruhuâ nej siyànà nun ga̱ daꞌní ni̱ nej siyànà nun gi̱nun ri̱ki neꞌej,
ni̱ nej siyànà nun du̱gutsi neꞌej.”
30 Hiôꞌ ni̱ gàyìꞌì ninj ni̱ gataj ninj gu̱nïn nej kïj ï:
“Gi̱ni̱nj nej suj yichrá nej ñûnj”;
ni̱ ga̱ta̱j ninj gu̱nïn nej dakan:
“Ganarán nej suj yichrá nej ñûnj.”
31 Dadinꞌ si dànanj giꞌhiaj nej sij ngà chrun ꞌhuìi.
Ni̱ hua̱j doj gi̱ꞌhiaj nej sij ngà chrun nakòo na̱nj ánj.
32 Ni̱ ni̱ka̱j nej sij huìj sí dânj hua̱j nej sij ngà Ma̱ꞌan Jesús,
ni̱ sí tu̱u ngà sí dagahuiꞌ guiì huin nguèj sôꞌ ni̱ hua̱j nguèj sôꞌ guendâ gàhuìꞌ nguèj sôꞌ.
33 Ni̱ nga guchiꞌ nej sij dakan gùꞌnàj ñan màn kúu,
ni̱ hiuj dânj dunikòꞌ rùgùtsì nej sij Ma̱ꞌan Jesús riñan rugutsìi ngà huìj sí giꞌhiaj gakï̱nꞌïn,
ꞌngo̱ sí dânj dunikòꞌ nej sij raꞌa neꞌ huàꞌaj ni̱ aꞌngô sí dânj dunikòꞌ nej sij raꞌa neꞌ chrïn.
34 Ni̱ gataj Ma̱ꞌan Jesús:
—Taj ginikaj Ma̱ꞌân rèꞌ nimân nìko rayiꞌî nej guiì nânj,
dadinꞌ nun niꞌin daꞌngaꞌ ninj sa giꞌhiaj ninj mánj.
Ni̱ gunuchraꞌ da̱ꞌa̱j nej sij atsîj yèꞌè nu̱n Ma̱ꞌan Jesús,
ni̱ guduku nej sij número daꞌnga ni̱ giniꞌin nej sij ahuin goꞌngo̱ riñan nej sij gùnàj si-gaꞌanj.
35 Ni̱ màn nej guiì giniꞌhiaj ninj;
ni̱ huê danj na̱nj gaꞌmin duku nej sí ni̱ka̱j suun riñan Ma̱ꞌan Jesús,
ni̱ gataj nej sôꞌ:
—Giꞌhiaj sij gananin aꞌngô nej guiì;
hia̱j ni̱ gi̱ꞌhiaj sij ga̱na̱ni̱n Ma̱ꞌan sij,
si yàngàꞌ huê si huin Ma̱ꞌan Cristo,
Ma̱ꞌan sa ganagui Ma̱ꞌan Ñaꞌanj an na̱nj ánj.
36 Ni̱ huê danj na̱nj gaꞌmin duku nej sí huin stâdu riñan Ma̱ꞌan Jesús,
ni̱ gaꞌnaꞌ nichì nej sôꞌ ni̱ duguaneꞌ nej sôꞌ nne binagre go̱ꞌo̱ Ma̱ꞌan Jesús.
37 Ni̱ gataj nej sôꞌ gu̱nïn Ma̱ꞌan Jesús:
—Si yàngàꞌ huêꞌ huin Ma̱ꞌan rey ni̱ka̱j su̱n riñan nej sí judío,
ni̱ giꞌhia sòꞌ si ga̱na̱ni̱n Ma̱ꞌan àj nï̂n.
38 Ni̱ gachrûn nej sij ꞌngo̱ nuguanꞌan neꞌ a̱hui Ma̱ꞌan Jesús,
ni̱ huin letra griega,
letra latín,
letra hebrea ni̱ ta:
“SÍ NÂNJ HUIN REY NI̱KA̱J SU̱N RIÑAN NEJ JUDÍO.”
39 Ni̱ gaꞌmin kï̱j ꞌngo̱ sí nìkòꞌ riñan rugutsìi riñan Ma̱ꞌan Jesús,
ni̱ gataj sôꞌ:
—Si huînꞌ Ma̱ꞌan Cristo,
ni̱ giꞌhiâꞌ si ga̱na̱ni̱n Ma̱ꞌânꞌ,
ni̱ giꞌhiâꞌ si̱ ga̱na̱ni̱n nêꞌ aj nï̂nj.
40 Nanikàj aꞌngô sí dânj ni̱ dugunïn gàꞌì sôꞌ sí gaꞌmin kï̱j riñan Maꞌan Jesús ni̱ gataj sôꞌ:
—Nitaj si guyuꞌhuiꞌ niꞌînꞌ Ma̱ꞌan Ñaꞌanj an ûnꞌ;
dadinꞌ dàj rûnꞌ giranꞌ Ma̱ꞌan Jesús huê danj runꞌ mínj.
41 Nguèꞌ ni̱ yàngàꞌ hia,
ni̱ hua̱ ni̱ña̱n si gi̱ranꞌ sa̱ñu̱nꞌ,
ni̱ ga̱na̱huin ro̱ꞌoꞌ kastîgu rayiꞌî nej gakï̱nꞌ giꞌhiôꞌ;
sani̱ sí nânj ni̱ nitaj gàꞌ si ꞌngo̱ sa aꞌnanꞌan giꞌhiaj sôꞌ mánj.
42 Ni̱ gataj sí nânj gu̱nïn Ma̱ꞌan Jesús:
—Ga̱na̱nun ruhuâ Ma̱ꞌân rèꞌ niꞌin Ma̱ꞌân rèꞌ ñùnj nga ga̱ꞌna̱ꞌ gi̱ni̱kaj su̱n Ma̱ꞌân rèꞌ.
43 Hiôꞌ ni̱ gataj Ma̱ꞌan Jesús gu̱nïn sí nânj:
—Yàngàꞌ hia nï̀nꞌ gàtà gu̱nïnꞌ,
ni̱ àsìj gui hia̱j ni̱ ga̱neꞌ ngàj ñan nngaj yumanꞌ ña̱ꞌa̱nj na̱nj ánj.
Gahuiꞌ Ma̱ꞌan Jesús
44 Ni̱ nga gìsìj agaꞌ yùhuìj i,
ni̱ gahuin ru̱mi̱n nï̀nꞌ gàchràꞌ riñan hioꞌóo nda gisîj agaꞌ hua̱ꞌnï̀nj ïn.
45 Gahuin ru̱mi̱n riñan gui,
ni̱ giyiꞌneꞌ da̱ꞌa̱j atsîj manj xi nìkòꞌ ruhuâ nuhuî nìko nne Jerusalén.
46 Hiôꞌ ni̱ ûta nùkuaj gaꞌmin Ma̱ꞌan Jesús,
ni̱ gata:
—Taj,
nàrìkìj nanè nimânj raꞌa Ma̱ꞌân rèꞌ.
Ni̱ nga gisîj gaꞌmin Ma̱ꞌan Jesús nuguanꞌ nânj,
ni̱ gahuij.
47 Ni̱ nga giniꞌin stadû kapitán dàj gahuin,
ni̱ ûta gaꞌmin hueꞌê sôꞌ riñan Ma̱ꞌan Ñaꞌanj an,
ni̱ gataj sôꞌ:
—Yàngàꞌ hia nï̀nꞌ ni̱ sí nânj ni̱ ꞌngo̱ sí giꞌhiaj sa ni̱ka̱a huin sôꞌ.
48 Ni̱ nga giniꞌin daranꞌ nej guiì rìgì màn hiuj nânj,
dàj gahuin ni̱ nanꞌ ninj dukuâ ninj ni̱ gayiꞌì ninj ni̱ gaꞌhuiꞌ ninj yiꞌñanj ninj guendâ gananï̂n ruhuâ ninj rayiꞌî sa aꞌnanꞌ giꞌhiaj ninj.
49 Sani̱ nda ga̱nꞌ nikïnꞌ daranꞌ nej guiì nìkòꞌ rukû Ma̱ꞌan Jesús,
ni̱ nej siyànà ginikòꞌ gaꞌnaꞌ rukuj nda riñan hioꞌó Galilea,
ni̱ ni̱kï̱nꞌ ninj giniꞌhiaj ninj dàj gahuin.
Gachinꞌ nej sij Ma̱ꞌan Jesús
50 Ni̱ nne ꞌngo̱ sí gùꞌnàj José,
ni̱ yiñán sôꞌ huin yumanꞌ snàꞌànj gùꞌnàj Arimetea,
huin hioꞌó Judea,
ni̱ sí nânj huin ꞌngo̱ sí ꞌnï̱nj riki yiꞌnïnꞌ nej sí ni̱ka̱j su̱n riñan yumanꞌan,
ni̱ huin sôꞌ ꞌngo̱ sí sàꞌa ni̱ ꞌngo̱ sí giꞌhiaj sa ni̱ka̱a.
51 Ni̱ huê danj na̱nj nne sí nânj ganaꞌhuìj sôꞌ àmàn ga̱ꞌna̱ꞌ gi̱nikaj su̱n Ma̱ꞌan Ñaꞌanj an,
ni̱ nun ga̱ gu̱ña̱n ruhuâ sôꞌ ni̱ nun ga̱ra̱nꞌ ruhuâ sôꞌ sa giꞌhiaj nej sí nânj ngà Ma̱ꞌan Jesús.
52 Ni̱ gaꞌanj sôꞌ riñan Pilato,
ni̱ ganachinꞌ sôꞌ nneè kú Ma̱ꞌan Jesús.
53 Ni̱ gaꞌnêj sôꞌ nneè kú Ma̱ꞌan Jesús riñan rugutsìi,
ni̱ duriꞌñânj sôꞌ atsîj gàtsìi nneè kú Ma̱ꞌan Jesús,
ni̱ gaꞌanj gàchìnꞌ sôꞌ nneè kú Ma̱ꞌan ñan gàꞌ hua̱ yu̱gui ꞌngo̱ hiuꞌuj u riñan huej e giꞌhiaj sôꞌ,
ni̱ gàꞌ si̱ ꞌngo̱ nîman nun gàchìnꞌ nej sôꞌ ruhuâ hiuꞌuj dânj.
54 Gahuin ꞌngo̱ gui nga giꞌhiaj yu̱gui nej sij sa ya̱ nej sij,
ni̱ huin niìn stiꞌnïn gui hia̱j gayiꞌì gui ganarânj rûhua.
55 Ni̱ ginikòꞌ nej siyànà ꞌna̱ꞌ nda riñan hioꞌó Galilea rukû José,
ni̱ gaꞌanj ninj ngà sôꞌ,
ni̱ giniꞌin ninj dàj hua ña̱n ga̱chi̱nꞌ sôꞌ nneè kú Ma̱ꞌan Jesús dadinꞌ gàꞌ hua̱ yu̱gui ñan ga̱chi̱nꞌ sôꞌ Ma̱ꞌan.
56 Ni̱ nga nanikàj nej siyànà dânj ni̱ nanꞌ ninj dukuâ ninj,
ni̱ giꞌhiaj yu̱gui ninj nej sa gïnꞌ dàj a ngà nne gïnꞌ dàj a;
ni̱ ganarânj ruhuâ ninj gui ganarânj rûhua dàj rûnꞌ giyiꞌnïnꞌ suun riñan si-ley Ma̱ꞌan Ñaꞌanj an.