19
Hiôꞌ nga ni̱,
gaꞌnïnꞌ Pilato suun si ga̱chri̱ nej si-stadû sôꞌ nneꞌe yichrá Ma̱ꞌan Jesús.
2 Ni̱ ganachrâj nej stâdu ꞌngo̱ korona tanj an,
ni̱ gaꞌnḯn nej sôꞌ ahui Ma̱ꞌan Jesús,
ni̱ gutaꞌ nej sôꞌ ꞌngo̱ atsîj ma̱re yichrá Ma̱ꞌan Jesús;
Jesús condenado a muerte (Juan 19.1-16)
—Nne nìꞌnàꞌ,
Ma̱ꞌan Rey ni̱ka̱j sun riñan nej judío,
ni̱ garaꞌhui nej sôꞌ yiꞌnḯn riñan Ma̱ꞌan Jesús.
4 Hiôꞌ ni̱ gahui ñûn Pilato,
ni̱ gataj sôꞌ:
—Gi̱niꞌhiaj nej suj,
dadinꞌ girîj sij ni̱ nìkà gaꞌná neꞌ ye̱ꞌe,
daꞌnga ni̱ ga̱ra̱n daꞌngaꞌ ruhuâ nej suj si nitaj gakï̱nꞌïn ata sij mánj.
5 Ni̱ gahui Ma̱ꞌan Jesús,
ni̱ nu̱n korona tanj an ahui ni̱ nunj ꞌngo̱ atsîj ma̱re.
Ni̱ gataj Pilato:
—Huê sí dan nikïnꞌ riñan nej suj na̱nj ánj.
6 Ni̱ nga giniꞌin nej rej huin ña̱an ni̱ nej sí policia ni̱ gaguâj nùkuaj nej sôꞌ ni̱ gataj nej sôꞌ:
—Du̱nikòꞌ rùgùtsì rèꞌ sí dânj,
du̱nikòꞌ rùgùtsì rèꞌ sí dânj.
Ni̱ gataj Pilato:
—Gi̱nikaj nej suj ga̱ꞌa̱nj nej suj sij,
ni̱ du̱nikòꞌ rùgùtsì nej ma̱ꞌan nej suj sij na̱nj ánj;
dadinꞌ nun gànàrìꞌìj gàꞌ si ꞌngo̱ gakï̱nꞌïn gi̱ꞌhiaj sij mánj.
7 Nanikàj nej sí judío ni̱ gataj nej sôꞌ:
—Ni̱ka̱j nej ñûnj ꞌngo̱ chrej yìñànj an,
ni̱ chrej yìñànj dânj taj si daꞌhui sij gàhuìꞌ sij,
dadinꞌ gataj sij si huin sij Daꞌní Ma̱ꞌan Ñaꞌanj an.
8 Nga gunïn Pilato gataj nej sij nej nuguanꞌ nânj,
ni̱ ûta guyuꞌhuiꞌ sôꞌ.
9 Ni̱ gatûj ñûn Pilato ruhuâ dukuâ si-su̱n sôꞌ ni̱ gataj sôꞌ gu̱nïn Ma̱ꞌan Jesús:
—Dànèꞌ huin yiñánt ràꞌaj.
Sani̱ gàꞌ si ꞌngo̱ nuguanꞌan nun du̱nanikàj Ma̱ꞌan Jesús riñan sôꞌ.
10 Hiôꞌ ni̱ gataj Pilato:
—Nùnj huin saj ni̱ naꞌhuej du̱nanikàj nuguanꞌan riñânj ràꞌaj.
Nun niꞌînꞌ si ni̱ka̱j sùnj ni̱ si garanꞌ ruhuâj ni̱ ga̱ꞌhue du̱nikó riñan rugutsìi sòꞌ ni̱ si garanꞌ ruhuâj ni̱ ga̱ꞌhue gànàꞌnï̀nj raꞌâ sôꞌ mínj.
11 Nanikàj Ma̱ꞌan Jesús ni̱ gata:
—Nitaj gàꞌ si ꞌngo̱ suun nikajꞌ riñânj,
si nuhuiꞌ Ma̱ꞌan Ñaꞌanj nne yàtàꞌa rikî sun dânj riñanꞌ mánj;
hia̱j ni̱ sí ganarikî ñùnj riñanꞌ ni̱ dànanj nìko gakï̱nꞌïn ata sôꞌ gàꞌ daꞌ na̱nj ánj.
12 Àsìj gui dânj ni̱ ûta huin ruhuâ Pilato gànàꞌnï̀nj raꞌa sôꞌ Ma̱ꞌan Jesús;
sani̱ ûta gaguâj nej judío ni̱ gataj nej sôꞌ:
—Si gànàꞌnï̀nj raꞌâꞌ sí nânj,
ni̱ nitaj si̱ ni̱ka̱j duguiꞌ ngà César mánj;
dadinꞌ daranꞌ sí gataj si huin sôꞌ ꞌngo̱ rey,
ni̱ unïnꞌ sôꞌ ngà César.
13 Nga gunïn Pilato,
nej nuguanꞌ nânj ni̱ giri sôꞌ neꞌ ye̱ꞌe Ma̱ꞌan Jesús,
ni̱ ni̱ka̱j sôꞌ gaꞌanj sôꞌ ñan ganachrâj nej sij hiëj gàchràꞌa,
ni̱ hiuj danj ni̱kï̱nꞌ ꞌngo̱ chrun yîla ñan huaꞌanj ga̱ne sij nga giꞌhiaj hia sij gakï̱nꞌïn.
14 Gui nânj giꞌhiaj yu̱gui nej sij guendâ ya̱ nej sij giꞌñanj pascua.
Ni̱ nga gisîj agaꞌ yùhuìj i,
hiôꞌ ni̱ gataj Pilato gunïn nej sí judío:
—Si-Rey nej suj nikïnꞌ hiuj nânj na̱nj ánj.
15 Sani̱ gaguâj nùkuaj nej sí dânj ni̱ gataj nej sôꞌ:
—Ga̱hui̱ꞌ sí dan,
ni̱ ga̱hui̱ꞌ sí dan,
ni̱ dunikôꞌ rèꞌ riñan rùgùtsìꞌ sij.
Ni̱ gataj Pilato:
—Ni̱ dunikòꞌ rùgùtsìj si-Rey nej suj na̱nj nîꞌ.
Nanikàj nej rej huin ña̱an ni̱ gataj nej sôꞌ:
—Nitaj aꞌngô rey hua riñan nej ñûnj dadinꞌ ꞌngo̱ rïn César huin rey riñan nej ñûnj na̱nj ánj.
16 Huê danj ni̱ nagaꞌhuiꞌ Pilato Ma̱ꞌan Jesús raꞌa nej sij ni̱ gaꞌanj dunikòꞌ nej sij riñan rugutsìi.
Ni̱ gidaꞌa nej sij Ma̱ꞌan Jesús,
ni̱ ginikaj nej sij gaꞌanj nej sij.
La crucifixión (Juan 19.17-37)
Dunikòꞌ nej sij riñan rugutsìi Ma̱ꞌan Jesús
17 Ni̱ gahui Ma̱ꞌan Jesús,
gaꞌan ñan gùꞌnàj dakan ñan màn kúu,
ni̱ gata rugutsìi hua,
ni̱ Golgota gùꞌnàj dakan dânj sani̱ huin nânj hebreo.
18 Ni̱ hiuj dânj dunikòꞌ rùgùtsì nej sij Ma̱ꞌan Jesús riñan rugutsìi,
ni̱ huê danj na̱nj dunikòꞌ rùgùtsì nej sij huìj ranꞌ sí dânj ànèj ané raꞌa Ma̱ꞌan,
ni̱ da̱nï̱n nguèj sí dânj nikòꞌ Ma̱ꞌan Jesús.
19 Ni̱ gachrûn Pilato letra,
neꞌ rà rugutsì nìkòꞌ Ma̱ꞌan Jesús,
ni̱ taj letra dânj:
“JESÚS NAZARENO,
REY NI̱KA̱J SUN RIÑAN NEJ JUDÍO.”
20 Ni̱ ûta gàꞌì nej judío gahia nuguanꞌ nnùn raa̱ Ma̱ꞌan Jesús;
dadinꞌ nìchrùnꞌ duꞌhua yumanꞌ snàꞌànj Jerusalén nngaj ñan dunikòꞌ rùgùtsì nej sij Ma̱ꞌan,
ni̱ nej nânj gachrûn nej sij huin nânj hebreo,
nânj griego,
nânj latín.
21 Ni̱ gataj nej rej huin ña̱n riñan nej judío gunïn Pilato:
—Si̱ gachrûn sòꞌ:
“Rey ni̱ka̱j su̱n riñan nej judío mánj”;
sa ga̱chru̱n sòꞌ ga̱huin,
sí nânj gataj si huin sôꞌ:
“Ñùnj huin rey ni̱ka̱j su̱n riñan nej judío.”
22 Nanikàj Pilato ni̱ gataj sôꞌ:
—Sa gachrúnj ni̱ huê danj gàꞌ gachrúnj.
23 Nga gisîj dunikòꞌ rùgùtsì nej stâdu Ma̱ꞌan Jesús,
ni̱ ganakaj nej sôꞌ atsîj ye̱ꞌe̱ nu̱n Ma̱ꞌan,
ni̱ gaꞌneꞌ nej sôꞌ gaꞌânj dasû atsîj dânj,
ni̱ ganakaj da̱ꞌ goꞌngo̱ nej sôꞌ ꞌngo̱ dasû,
ni̱ ganakaj nej sôꞌ si-gatô Ma̱ꞌan Jesús,
sani̱ sê atsîj ganachrâj nej sôꞌ huin atsîj dânj,
ni̱ man ꞌngo̱ rïn man yeꞌèe huin atsîj dânj.
24 Hiôꞌ ni̱ gataj nej sí dânj gu̱nïn daꞌ goꞌngo̱ nej dùguìꞌ nej sôꞌ:
—Si̱ guꞌchra da̱ꞌa̱j nêꞌ gatô dan mánj,
gu̱duku nêꞌ número ngà gatô dan,
ni̱ gi̱ni̱ꞌinꞌ ahuin riñan goꞌngo̱ nêꞌ gu̱na.
Huê dànanj gahuin daꞌnga ni̱ gisîj sa taj si-nùguànꞌ Ma̱ꞌan Ñaꞌanj an,
dadinꞌ ta:
“Gùchràꞌ da̱ꞌa̱j nej sij atsîj ye̱ꞌe̱ nùnj,
ni̱ gu̱du̱guêj nej sij número rayiꞌî si-gató.”
Ni̱ huê danj giꞌhiaj nej stâdu.
25 Ni̱ nìchrùnꞌ yiꞌî rugutsì nìkòꞌ Ma̱ꞌan Jesús nikïnꞌ nni,
ni̱ hiuj dânj nikïnꞌ yuguij nni,
ni̱ hiuj dânj nikïnꞌ María nika sôꞌ gùꞌnàj Cleofas,
ni̱ huê danj na̱nj ni̱kï̱nꞌ María Magdalena.
26 Ni̱ nga giniꞌin Ma̱ꞌan Jesús nikïnꞌ nni hiuj dânj,
ni̱ giniꞌin nikïnꞌ sôꞌ gaꞌnaꞌ gahuin chru̱n riñanj ni̱ sí nânj huin sí ûta ꞌì ruhuâj niꞌin,
—ni̱ gata gu̱nïn nni,
hiuj dan nikïnꞌ daꞌní rèꞌ na̱nj ánj.
27 Neꞌ rùkù ni̱ gata gunïn sí gaꞌnaꞌ ga̱huin chru̱n riñanj:
—Siyànà ni̱kï̱nꞌ hiuj dânj ga̱na̱huin nnî râj.
Ni̱ àsìj orâ dânj ni̱ ganahuin ra̱ꞌa sí dânj María ni̱ gane María dukuâ sôꞌ.
Gahuiꞌ Ma̱ꞌan Jesús
28 Neꞌ rùkù nga gisîj gaꞌmin Ma̱ꞌan Jesús nej nuguanꞌ nânj,
ni̱ niꞌin si gàꞌ gisîj daranꞌ nej nuguanꞌ nnùn riñan ñanj rayiꞌij,
ni̱ gata,
guendâ gìsìj si-nùguànꞌ Ma̱ꞌan Ñaꞌanj an:
—Ganakó nnee.
29 Ni̱ nne ꞌngo̱ sigù nu̱n nne ganachej uba ngà nne naꞌhui hiu̱u hiuj dânj;
ni̱ gutaꞌ nej sij ꞌngo̱ rumin lij gachïj ï raa̱ ꞌngo̱ chrun ni̱ duguchre nej sij gachïj dânj ngà nne ganachej dânj,
ni̱ gachrûn nej sij duꞌhua Ma̱ꞌan Jesús.
30 Ni̱ nga gisîj goꞌo Ma̱ꞌan Jesús nne ganachej uba ngà naꞌhui hiu̱u,
ni̱ gata:
—Gàꞌ ganahuij daranꞌanj dagahuín na̱nj ánj.
Ni̱ guduguaꞌaj ahui ni̱ nagaꞌhuij nanè nimanj huê danj ni̱ gahuij.
Gachîn lansa yiru̱kua̱ Ma̱ꞌan Jesús
31 Ni̱ ñan huin gui giꞌhiaj yu̱gui nej sí judío,
guendâ ya̱ nej sij giꞌñanj pascua,
ni̱ nun daꞌhui gùnàj nneè kú nej nîman gi̱nikoj riñan rugutsìi nga gùyùmàn gui ganarânj ruhuâ (dadinꞌ ûta nìko hua giꞌñanj dânj gui ganarânj rûhua giꞌhiaj nej sij),
ni̱ gachín nìꞌhiaj nej sij riñan Pilato si du̱guachranꞌ sôꞌ daꞌman nej sí nìkòꞌ riñan rugutsì dânj,
daꞌnga ni̱ gaꞌhue gu̱xu̱n nej sij nneè kú nej sôꞌ riñan rugutsìi.
32 Hiôꞌ ni̱ gaꞌnaꞌ nej stâdu,
ni̱ duguachranꞌ nej sôꞌ nguèj daꞌman nguèj sí dunikòꞌ rùgùtsì nej sij ngà Ma̱ꞌan Jesús.
33 Sani̱ nga guchiꞌ nej sôꞌ riñan Ma̱ꞌan Jesús,
ni̱ giniꞌin nej sôꞌ si gàꞌ gahuiꞌ Ma̱ꞌan Jesús,
huê danj ni̱ nun du̱guachranꞌ nej sôꞌ nguèj daꞌmanj gàꞌ mánj.
34 Ni̱ gidigï̂j ꞌngo̱ nej sí stadû dânj si-lansa sôꞌ yiru̱kua̱ Ma̱ꞌan Jesús,
ni̱ orâ chre ni̱ gahui tun ngà nnee ñan gatûj raa̱ lansa.
35 Ni̱ sí giniꞌin dàj gahuin ni̱ huê sôꞌ ganataꞌ,
ni̱ sa yàngàꞌa huin nuguanꞌ ganataꞌ sôꞌ;
ni̱ niꞌin sôꞌ si yàngàꞌ huin sa gataj sôꞌ,
daꞌnga ni̱ ga̱ꞌhue gùyùmàn ruhuâ nej suj sa ganataꞌ sôꞌ.
36 Ni̱ hua̱ ni̱ña̱n si huê dànanj gahuin daꞌnga ni̱ gisîj nej nuguanꞌ nnùn riñan ñanj si-nùguànꞌ Ma̱ꞌan Ñaꞌanj an:
“Ni̱ si̱ gachranꞌ gàꞌ si ꞌngo̱ kú sij mánj.”
37 Ni̱ huê danj taj aꞌngô hiuj u riñan ñanj si-nùguànꞌ Ma̱ꞌan Ñaꞌanj an:
“Ni̱ giniꞌhiaj nej sij dàj huaj nga gisîj gachrîj nej sij lansa.”
Gachinꞌ nej sij Ma̱ꞌan Jesús
38 Neꞌ rùkù nga gisîj gahuin daranꞌ nej nânj,
ni̱ José ꞌna̱ꞌ yumanꞌ Arimetea,
huin ꞌngo̱ nej sí gaꞌnaꞌ gahuin chru̱n riñan Ma̱ꞌan Jesús,
ni̱ gaꞌanj huì sôꞌ riñan Pilato dadinꞌ yuꞌhuiꞌ sôꞌ niꞌin sôꞌ nej judío,
ni̱ gaꞌmin àko sôꞌ riñan Pilato si ga̱ra̱n yina Pilato ni̱ ginikaj sôꞌ nneè kú Ma̱ꞌan Jesús gaꞌanj sôꞌ;
huê danj ni̱ garânj yina Pilato ni̱ nagaꞌhuiꞌ sôꞌ nneè kú Ma̱ꞌan Jesús.
Hiôꞌ ni̱ gaꞌnaꞌ sôꞌ,
ni̱ ganakaj sôꞌ nneè kú Ma̱ꞌan Jesús ni̱ gaꞌanj sôꞌ.
La resurrección (Juan 19.38-20.18)
39 Ni̱ huê danj na̱nj gaꞌnaꞌ Nicodemo,
sí gaꞌanj giniꞌhiaj neꞌ niìn ñan gane Ma̱ꞌan Jesús,
ni̱ gaꞌnaꞌ sôꞌ ni̱ ni̱ka̱j sôꞌ daꞌnga ꞌngo̱ si ko̱ chi̱ꞌ kilu sikí gùꞌnàj mirra ni̱ ganachej duguiꞌij nga sa gùꞌnàj áloes.
40 Ganakaj nej sôꞌ,
nneè kú Ma̱ꞌan Jesús ni̱ duriꞌñânj nej sôꞌ atsìj i ni̱ gachrîj nej sôꞌ sa gï̀nꞌ dàj a nneè kú Ma̱ꞌan Jesús,
dadinꞌ huê danj hua chrej ni̱ka̱j nej judío nga gachinꞌ nej sôꞌ nîman.
41 Ni̱ ñan dunikòꞌ rùgùtsì nej sij Ma̱ꞌan Jesús,
nngaj nìchrùnꞌ ñan màn chrun gahiu chruj tsìꞌi,
ni̱ hiuj dânj nun ꞌngo̱ hiuꞌuj nàkà gàꞌ hua̱ yu̱gui ni̱ gàꞌ si ꞌngo̱ nîman nun ga̱chi̱nꞌ nej sij ruhuâ hiuꞌuj dânj.
42 Ni̱ hiuj dânj gachinꞌ nej sij nneè kú Ma̱ꞌan Jesús,
dadinꞌ nu̱n nìchrùnꞌ hiuꞌuj u hiuj dânj ni̱ gàꞌ doj gàyìꞌì gui ganarânj ruhuâ nej sí judío.