Ni̱kï̱nꞌ Ma̱ꞌan Jesús riñan Pilato
27
Ni̱ neꞌ nìgànꞌ aꞌngô gui dânj, ni̱ dagaꞌmin duguiꞌ daranꞌ nej rej huin ña̱an ngà nej síchìj achij màn ruhuâ yumanꞌan, dàj gi̱ꞌhiaj nej sôꞌ ga̱ꞌhue ga̱ra̱n ruhuâ nej sôꞌ ni̱ gàhuìꞌ Ma̱ꞌan Jesús.
2 Ni̱ gumînj nej sôꞌ Ma̱ꞌan Jesús, ni̱ ni̱ka̱j nej sôꞌ gaꞌanj nej sôꞌ riñan Poncio Pilato, dadinꞌ sí nânj huin gobernador.
Gahuiꞌ Judas
3 Nga giniꞌin Judas, sôꞌ nagaꞌhuiꞌ Ma̱ꞌan Jesús si giriꞌ nìꞌhia gàhuij, ni̱ nitaj si hua̱ dïnꞌïnj ruhuâ sôꞌ rayiꞌî sa giꞌhiaj sôꞌ, huê danj ni̱ nagaꞌhuiꞌ sôꞌ ko̱ chi̱ꞌ sanꞌanj plata ganahuin ra̱ꞌa sôꞌ, riñan nej rej ngà riñan nej síchìj achij i.
4 Ni̱ gataj sôꞌ:
—Giꞌhiâ gakï̱nꞌïn dadinꞌ nagaꞌhuí ꞌngo̱ sí nitaj gakï̱nꞌ ata.
Sani̱ nanikàj nej sí dânj ni̱ gataj nej sôꞌ:
—Nùnj huin si gi̱ꞌhiaj nej ñûnj ganahuij nej ñûnj ruhuâ nej ñûnj ràꞌaj. Niꞌhiaj sòꞌ dàj ranꞌ na̱nj ánj.
5 Ni̱ guduguêj sôꞌ nej sanꞌanj plata ganahuin ra̱ꞌa sôꞌ ruhuâ nuhuî nìko, ni̱ gahui sôꞌ ni̱ gaꞌanj go̱dokoꞌ sôꞌ ma̱ꞌan sôꞌ yàtàꞌ huê danj ni̱ gahuiꞌ sôꞌ.
6 Ni̱ ganakaj nej rej huin ña̱an, nej sanꞌanj dânj, ni̱ nadigiꞌñûn nej sôꞌ nùnj huin si gi̱ꞌhiaj nej sôꞌ ngà sanꞌanj dânj ni̱ gataj nej sôꞌ:
—Nitaj si dùgùnàj huaj si gàꞌnï̀nꞌ gi̱nun sanꞌanj nânj siganï̂nj nej sanꞌanj ofrenda, dadinꞌ sanꞌanj gahuin duꞌhue tun huin na̱nj ánj.
7 Ni̱ neꞌ rùkù nga gisîj naduyâ nej sij nuguanꞌan nùnj huin si gi̱ꞌhiaj nej sij ngà sanꞌanj nânj, ni̱ girânj nej sij doꞌó sí giꞌhiaj ruj, ni̱ ga̱huin hioꞌó ñan gàchìnꞌ nej sij nej sí ꞌna̱ꞌ aꞌngô yumanꞌan.
8 Rayiꞌî dânj ni̱ gùꞌnàj hioꞌó dânj nda gui hia̱j: Hioꞌó gahuin duꞌhue tun.
9 Ni̱ huê danj ni̱ gisîj nuguanꞌ gaꞌmin Jeremías sôꞌ gataj dàj ga̱huin nga gataj sôꞌ: “Ni̱ gidaꞌa nej sij ko̱ chi̱ꞌ sanꞌanj plata, sanꞌanj gahuin duꞌhue Ma̱ꞌan sa guduꞌhuêj nej daꞌní Israel dadinꞌ huê danj ga duꞌhue giꞌhiaj nej sij,
10 ni̱ ngà sanꞌanj dânj girânj nej sij doꞌó sí giꞌhiaj ruj, dàj rûnꞌ gaꞌnïnꞌ Ma̱ꞌan Señor suun riñânj.”
Gachín naꞌanj Pilato Ma̱ꞌan Jesús
11 Hiôꞌ ni̱ ni̱kï̱nꞌ Ma̱ꞌan Jesús riñan síchìj gobernador; ni̱ gachîn naꞌanj sôꞌ Ma̱ꞌan ni̱ gataj sôꞌ:
—Huê rèꞌ huin Rey ni̱ka̱j su̱n riñan nej judío nîꞌ.
Nanikàj Ma̱ꞌan Jesús ni̱ gata: Huê dàj rûnꞌ tajꞌ ni̱ huê danj huín.
12 Nga garânj ruhuâ nej rej huin ña̱an ngà nej síchìj achij i rayiꞌij ni̱ gàꞌ si ꞌngo̱ nuguanꞌan nun du̱nani̱ka riñan nej sôꞌ.
13 Hiôꞌ ni̱ gataj Pilato gu̱nïn Ma̱ꞌan Jesús:
—Nunï̂nꞌ dadinꞌ ûta garânj ruhuâ nej sij rayiꞌîꞌ mínj.
14 Sani̱ nun dunanikàj Ma̱ꞌan Jesús gàꞌ si ꞌngo̱ nuguanꞌan riñan gobernador; hiôꞌ ni̱ ûta gahuin ña̱ꞌanj ruhuâ sôꞌ sa giꞌhiaj Ma̱ꞌan Jesús.
Giriꞌ nìꞌhiaj Ma̱ꞌan Jesús ga̱huij
15 Gui nga gùyùmàn giꞌñanj pascua ni̱ gàꞌ guꞌñûn síchìj gobernador guendâ gi̱ri̱ sôꞌ ga̱hui̱ ꞌngo̱ sí ꞌnï̱nj dukuâ gaꞌa sí garanꞌ ruhuâ nej sí yùmànꞌan.
16 Ni̱ ꞌnï̱nj ꞌngo̱ sí gùꞌnàj Barrabás dukuâ gaꞌa, ni̱ daranꞌ nej guiì yùmànꞌan niꞌin si ûta ga̱ninï̀nꞌ hua sôꞌ.
17 Ni̱ màn chre̱ꞌ nej sij ni̱ gataj Pilato gu̱nïn nej sij:
—Ahuin goꞌngo̱ nguèj sí nânj garanꞌ ruhuâ nej suj si gìrìj ruhuâ dukuâ gaꞌa ràꞌaj: Ruhuâ nej suj si gìrìj Ma̱ꞌan Jesús, sôꞌ gùꞌnàj Cristo nîꞌ.
18 Dadinꞌ gàꞌ niꞌin Pilato sisi̱ si̱ huin yìkòj ruhuâ nej sij niꞌin nej sij Ma̱ꞌan Jesús rayiꞌî dan ni̱ nagaꞌhuiꞌ nej sij Ma̱ꞌan riñan sôꞌ.
19 Nga nï̀nꞌ nne Pilato ñan giꞌhiaj hia sôꞌ gakï̱nꞌïn, ni̱ gaꞌnḯn nika sôꞌ ꞌngo̱ nuguanꞌan guchiꞌ riñan sôꞌ ni̱ gataj yugûnꞌ dânj: “Si̱ gata rùhuàꞌ sinaꞌu dan dadinꞌ nitaj gakï̱nꞌïn ata mánj; dadinꞌ ñanꞌ hia̱j ni̱ ûta gaꞌnḯn rayiꞌij na̱nj ánj.”
20 Sani̱ ûta dagaꞌmin nej rej huin ña̱an ngà nej síchìj achij màn ruhuâ yumanꞌan si gàchìnj nìꞌhiaj nej guiì riñan gobernador si gi̱ꞌhiaj sôꞌ sunuj u ni̱ gi̱ri̱ sôꞌ dukuâ gaꞌa síchìj gùꞌnàj Barrabás, ni̱ gachín nìꞌhiaj ninj si gàhuìꞌ Ma̱ꞌan Jesús.
21 Nanikàj gobernador ni̱ gataj ñûn sôꞌ:
—Ahuin goꞌngo̱ nguèj sí nânj garanꞌ ruhuâ nej suj si gìrìj dukuâ gaꞌa ràꞌaj.
Ni̱ gataj nej sij:
—Ruhuâ nej ñûnj si gi̱ri̱ rèꞌ dukuâ gaꞌa sí gùꞌnàj Barrabás.
22 Ni̱ gachín naꞌanj Pilato ni̱ gataj sôꞌ:
—Nùnj huin si gi̱ꞌhia ngà Ma̱ꞌan Jesús sôꞌ gùꞌnàj Cristo ràꞌaj.
Ni̱ gataj daranꞌ nej guiì:
—Ruhuâ nej ñûnj si du̱nikòꞌ rùgùtsì rèꞌ sí dan riñan rugutsìi na̱nj ánj.
23 Ni̱ gataj gobernador:
—Ni̱ ahuin sa aꞌnanꞌ giꞌhiaj sôꞌ ràꞌaj.
Sani̱ dànanj duguꞌnïnꞌ nej sij gaguâj nùkuaj nej sij doj ni̱ gataj nej sij:
—Ruhuâ nej ñûnj si go̱dokoꞌ rùgùtsì rèꞌ sí dan.
24 Ni̱ gayakaj guendâ Pilato si naꞌhuej ruhuâ nej sij gi̱daꞌa nej sij si-nùguànꞌ sôꞌ, dadinꞌ dànanj nùkuaj doj gaguâj nej guiì naruꞌhuiꞌ hiuj dânj, huê danj ni̱ gidaꞌa sôꞌ nne huìj i ni̱ naniꞌhiaꞌ sôꞌ raꞌa sôꞌ riñan daranꞌ nej guiì yùmànꞌan ni̱ gataj sôꞌ:
—Sê ñùnj gi̱ꞌhiaj gàhuìꞌ sí nânj mánj, yichrá nej suj tá gakï̱nꞌ dan na̱nj ánj.
25 Ni̱ nanikàj daꞌ hua̱ gè nej guiì yùmànꞌan ni̱ gataj ninj:
—Ga̱ꞌhue gitàj gakï̱nꞌ dânj yichrá nej ñûnj, ni̱ gita yichrá nej daꞌní nej ñûnj na̱nj ánj.
26 Hiôꞌ ni̱ giri Pilato ruhuâ dukuâ gaꞌa sí gùꞌnàj Barrabás; ni̱ nga gisîj gutaꞌ nej sij nneꞌ tàj agaꞌa raa̱ yichrá Ma̱ꞌan Jesús, ni̱ nagaꞌhuiꞌ Pilato Ma̱ꞌan Jesús guendâ du̱nikòꞌ rùgùtsì nej sij.
27 Hiôꞌ ni̱ ni̱ka̱j nej si-stadû síchìj gobernador gaꞌanj nej sôꞌ Ma̱ꞌan Jesús ñan nne dukuâ suun, ni̱ nagiꞌhiaj chre̱ꞌ sôꞌ daranꞌ nej stadû màn hiuj dânj ni̱ nda ganikàj chre mân daranꞌ nej sij neꞌ rùkù Ma̱ꞌan Jesús.
28 Ni̱ giri nej sí dânj siganꞌ Ma̱ꞌan Jesús, ni̱ gutaꞌ nej sij ꞌngo̱ atsîj ma̱re yichrá Ma̱ꞌan guendâ gi̱nikej.
29 Ni̱ gaꞌnḯn nej sij ꞌngo̱ korona tanj ganachrâj nej ma̱ꞌan nej sij ahui Ma̱ꞌan Jesús, ni̱ gachrîj nej sij ꞌngo̱ chrun giꞌnïnj raꞌa neꞌ huàꞌaj; ni̱ ganikïnꞌ rúdàkòj nej sij riñanj, ni̱ gaꞌmin duku nej sij riñanj ni̱ gataj nej sij:
—Nne nìꞌnàꞌ Ma̱ꞌan Rey ni̱ka̱j su̱n riñan nej judío.
30 Ni̱ gachra stanûj nej sij riñan Ma̱ꞌan Jesús, ni̱ gidaꞌa nej sij chrun ꞌnï̱nj raꞌa ni̱ garrûn nej sij ahui Ma̱ꞌan.
31 Neꞌ rùkù nga gisîj gaꞌmin duku nej sij riñanj, ni̱ gaꞌnêj nej sij atsîj gutaꞌ nej sij yichra, ni̱ ganaꞌnḯn nej sij siganꞌanj, ni̱ ginikaj nej sij gaꞌanj du̱nikòꞌ rùgùtsì nej sij Ma̱ꞌan.
Dunikòꞌ nej sij riñan rugutsìi Ma̱ꞌan Jesús ni̱ gahuij
32 Nga gahui nej sij huaj nej sij ngà Ma̱ꞌan Jesús, ni̱ ganariꞌ nej sij ꞌngo̱ sí ꞌna̱ꞌ yumanꞌ Sirene ni̱ Simón gùꞌnàj sôꞌ; ni̱ giꞌhiaj guesâ nej sij si ga̱ta sôꞌ rugutsìi ga̱ꞌa̱nj sôꞌ.
33 Ni̱ nga guchiꞌ nej sij ñan gùꞌnàj Gólgota, ni̱ nânj ruhuaj ga̱ta dakan ñan màn kúu.
34 Ni̱ dunachej nej sij nne chruj uba ngà si-gàìꞌ yuku ni̱ gaꞌhuiꞌ nej sij goꞌo Ma̱ꞌan Jesús; sani̱ neꞌ rùkù nga gayakaj Ma̱ꞌan Jesús daꞌngaꞌa, ni̱ nun go̱ꞌoj nne dânj.
35 Nga gisîj dunikòꞌ rùgùtsì nej sij Ma̱ꞌan, ni̱ gunuchraꞌ da̱ꞌa̱j nej sij siganꞌanj, ni̱ guduguêj nej sij número riñan siganꞌanj, ni̱ huê dànanj gahuin daꞌnga gisîj nuguanꞌ gataj sôꞌ gaꞌmin dàj ga̱huin nga gataj sôꞌ: “Gunuchraꞌ da̱ꞌa̱j nej sij si-gaꞌán ni̱ riñan si-gaꞌán guduguêj nej sij número.”
36 Ni̱ gaꞌanj ga̱ne nej sij dugumîn nej sij ni̱ ûta sàꞌ giniꞌhiaj nej sij.
37 Ni̱ gachrûn nej sij ꞌngo̱ ruguechràꞌa neꞌ a̱hui Ma̱ꞌan Jesús ni̱ nuguanꞌ gachrûn nej sij huin: “NÂNJ HUIN JESÚS, MA̱ꞌAN REY NI̱KA̱J SU̱N RIÑAN NEJ JUDÍO.”
38 Huê danj na̱nj godokoꞌ nej sij riñan rugutsìi huìj sí tu̱u ngà Ma̱ꞌan ni̱ ꞌngo̱ sôꞌ ginikòꞌ raꞌa neꞌ huàꞌaj, ni̱ aꞌngô sôꞌ ginikòꞌ raꞌa neꞌ chrïn.
39 Nej sí gachîn huaj hiuj dânj ni̱ gachîn nej sôꞌ nuguanꞌan riñan Ma̱ꞌan Jesús, ni̱ nda dugunûn ahui nej sôꞌ.
40 Ni̱ gataj nej sôꞌ:
—Sòꞌ gataj si du̱guaneꞌ nûhui, ni̱ ga̱chi̱n huàꞌnï̀nj gui ni̱ gànàsìj ñûn aꞌngoj gi̱ꞌhiáꞌ gataj, hia̱j ni̱ giꞌhiâ sòꞌ si ga̱na̱ni̱n Ma̱ꞌânꞌ; si yàngàꞌ huînꞌ Daꞌní Ma̱ꞌan Ñaꞌanj an, ni̱ ga̱na̱ni̱nj riñan rugutsìi àj nï̂n.
41 Ni̱ huê danj na̱nj gaꞌmin duku nej rej huin ña̱an, ni̱ huê danj na̱nj gaꞌmin duku nej maestrû chru̱n ley, ngà nej sí chru̱n ley ni̱ nej síchìj achij i riñan Ma̱ꞌan Jesús, ni̱ gataj nej sôꞌ:
42 —Gananin aꞌngô nej guiì giꞌhiaj sí dan, sani̱ naꞌhue ga̱na̱ni̱n Ma̱ꞌan si gi̱ꞌhiaj sij; ni̱ si huin sij Rey riñan yumanꞌ Israel, ni̱ ga̱na̱ni̱nj sij riñan rugutsìi, ni̱ gùyùmàn ruhuôꞌ niꞌin sij àj nï̂n.
43 Nu̱n ñan sij Ma̱ꞌan Ñaꞌanj an: Hia̱j ni̱ ga̱na̱ni̱n sij gi̱ꞌhia si ꞌì ruhuaj niꞌin sij, dadinꞌ gataj sij: Hué huin Daꞌní Ma̱ꞌan Ñaꞌanj an.
44 Ni̱ huê danj na̱nj gachîn nej sí tu̱ nìkòꞌ riñan rugutsìi nuguanꞌ riñan Ma̱ꞌan Jesús.
Gahuiꞌ Ma̱ꞌan Jesús
45 Ni̱ àsìj agaꞌ yùhuìj i gahuin ru̱mi̱nꞌ nï̀nꞌ gàchràꞌ riñan hioꞌóo nda gisîj agaꞌ huàꞌnï̀nj ïn.
46 Nga huaj gìsìj agaꞌ huàꞌnï̀nj ïn ni̱ ûta nùkuaj gaꞌmin Ma̱ꞌan Jesús, ni̱ gata:
—Elí, Elí, lama sabactani. Ni̱ nânj ruhuaj gata: Huê Ma̱ꞌân rèꞌ huin Daꞌân, huê Ma̱ꞌân rèꞌ huin Daꞌân, nùnj huin saj ni̱ gudunâj ꞌngo̱ rïnꞌ Ma̱ꞌân rèꞌ ñùnj ràꞌaj.
47 Ni̱ gunïn da̱ꞌa̱j nej guiì màn hiuj dânj nuguanꞌ gataj Ma̱ꞌan Jesús: Ni̱ gataj ninj:
—Gakḯn sij ga̱ꞌna̱ꞌ Elías.
48 Ni̱ orâ chre ni̱ gunânj ꞌngo̱ nej sí màn hiuj dânj gaꞌnaꞌ sôꞌ ni̱ gidaꞌa sôꞌ ꞌngo̱ rumin gachïj ï, ni̱ gutâj sôꞌ nne ganachej chruj uba ngà nne naꞌhui hiùu, ni̱ gutaꞌ sôꞌ ra̱ ꞌngo̱ chrun ni̱ gaꞌhuiꞌ sôꞌ go̱ꞌo̱ Ma̱ꞌan Jesús.
49 Sani̱ gataj aꞌngô da̱ꞌa̱j nej sí dânj:
—Gànàꞌhuìj akuanꞌ sòꞌ ni̱ gi̱ni̱ꞌînꞌ ga̱ꞌna̱ꞌ du̱naninj Elías sij na̱nj ánj.
50 Sani̱ ûta nùkuaj gaꞌmin ñûn Ma̱ꞌan Jesús, ni̱ nagaꞌhuij nanè nimanj riñan Ma̱ꞌan Ñaꞌanj an.
51 Hiôꞌ ni̱ giyiꞌneꞌ da̱ꞌa̱j atsîj mmanj nìkòꞌ ruhuâ hueꞌ huin nûhui ni̱ gahuin huìj dasû, àsìj gayakaj neꞌ yàtàꞌa nda guchij neꞌ ri̱ki, ni̱ gaꞌhuij ñûn riñan hioꞌóo, ni̱ giyichraꞌ da̱ꞌa̱j nej huej e;
52 ni̱ ganayiꞌnï̂nj duꞌhua nej hiuꞌuj ñan gachinꞌ nej sij nej nîman, ni̱ ûta gàꞌì nneè kú nej sí gèe nej sôꞌ gàꞌ gahuiꞌ àsìj ri̱ki, ni̱ ganaꞌnï̂nj nej nîman;
53 ni̱ gàꞌ si̱nï̱n ganaꞌnï̂nj Ma̱ꞌan Jesús siganï̂nj nej nîman, ni̱ neꞌ rùkù ni̱ gahui aꞌngô nej sí gèe ñan gingaj nej sôꞌ, ni̱ gaꞌnaꞌ nej sôꞌ ñan nngaj yuman snàꞌànj gèe, ni̱ giniꞌin ûta gàꞌì nej guiì nej sôꞌ.
54 Gaꞌhuij ñûn giniꞌin stadû kapitán ngà nej stadû màn dugumîn ñan gachinꞌ nej sij nneè kú Ma̱ꞌan Jesús, ni̱ huê danj na̱nj giniꞌin nej sij aꞌngô nej sa gahuin hiuj dânj, ni̱ ûta guyuꞌhuiꞌ nej sij ni̱ gataj nej sij:
—Yàngàꞌ hia nï̀nꞌ ni̱ sí nânj huin Daꞌní Ma̱ꞌan Ñaꞌanj an.
55 Ni̱ nda gànꞌ nikïnꞌ ûta gàꞌì nej siyànàa giniꞌhiaj ninj, ni̱ nej siyànà nânj huin sa ginikòꞌ gaꞌnaꞌ rukû Ma̱ꞌan Jesús àsìj nda Galilea, ni̱ gunânj gi̱tsi ninj riñan Ma̱ꞌan.
56 Ni̱ siganï̂nj nej siyànà nânj nikïnꞌ María Magdalena, María nni Jacobo ngà nni José, ngà nni nej daꞌní Zebedeo.
Gachinꞌ nej sij Ma̱ꞌan Jesús
57 Ni̱ nga ginìn gui dânj, ni̱ gaꞌnaꞌ ꞌngo̱ sí yi̱ruꞌhue nne yumanꞌ Arimetea, ni̱ gùꞌnàj sôꞌ José; ni̱ sôꞌ huin sí gaꞌnaꞌ gahuin chru̱n riñan Ma̱ꞌan Jesús.
58 Sí nânj gaꞌanj gànàchìnꞌ nneè kú Ma̱ꞌan Jesús riñan Pilato. Hiôꞌ ni̱ gaꞌnïnꞌ Pilato suun si ga̱ꞌhue nàgàꞌhuìꞌ nej sí màn dugumîn hiuj dânj nneè kú Ma̱ꞌan Jesús riñan sôꞌ.
59 Ni̱ gidaꞌa José nneè kú Ma̱ꞌan Jesús, ni̱ duriꞌñânj sôꞌ atsîj gàtsìi nneè kú Ma̱ꞌan Jesús.
60 Ni̱ guchruj sôꞌ nneè kú Ma̱ꞌan Jesús ñan gàꞌ hua yu̱gui giꞌhiaj sôꞌ, ni̱ neꞌ rùkù ni̱ durumin sôꞌ hiëj yàchìj hua garán duꞌhua hiuꞌuj ñan gachinꞌ sôꞌ nneè kú Ma̱ꞌan Jesús; huê danj ni̱ gaꞌanj sôꞌ.
61 Sani̱ gunâj María Magdalena ngà aꞌngô María hiuj dânj, ni̱ nne nguèj ninj neꞌ ña̱n ñan gachinꞌ sôꞌ nneè kú Ma̱ꞌan Jesús.
Ni̱kï̱nꞌ nej stâdu dugumîn nej sôꞌ ñan gachinꞌ nej sij Ma̱ꞌan Jesús
62 Aꞌngô gui dânj ni̱ neꞌ rùkù nga gàꞌ gisîj giꞌhiaj yu̱gui nej sij sa ya̱ nej sij, ni̱ ganahuin chre̱ꞌ nej rej huin ña̱an ngà nej sí chru̱n ley riñan Pilato,
63 ni̱ gataj nej sôꞌ:
—Señor, gananun ruhuâ nej ñûnj si gataj sí gidigañuꞌunj nânj, nga nï̀nꞌ gane nìꞌnàꞌ sôꞌ: Si ga̱chi̱n huàꞌnï̀nj gui ni̱ gànàꞌnï̀nj sôꞌ siganï̂nj nej nîman.
64 Gàꞌnï̀nꞌ rèꞌ suun riñan nej si-stadû rèꞌ, ni̱ gi̱ꞌhiaj yìtï̀nj nej sôꞌ ñan nngaj nneè kú sí dânj nda gìsìj huàꞌnï̀nj gui, dadinꞌ ga̱ꞌhue ga̱ꞌna̱ꞌ nej sí gaꞌnaꞌ ga̱huin chru̱n riñan sij neꞌ ñànꞌan, ni̱ gi̱ꞌhiaj tu̱ nej sôꞌ nneè kú sij, ni̱ ga̱ta̱j nej sôꞌ gu̱nïn nej sí yùmànꞌan: “Si ganaꞌnï̂nj sij siganï̂nj nej nîman.” Ni̱ dànanj ûta aꞌnanꞌ doj gaj gàꞌ daꞌ sa si̱nï̱ïn na̱nj ánj.
65 Ni̱ gataj Pilato gu̱nïn nej sij:
—Hiuj dânj mân ꞌngo̱ yiꞌnïnꞌ nej stâdu, ni̱ ga̱ꞌhue gi̱nikaj nej suj ga̱ꞌa̱nj nej suj ni̱ gi̱ꞌhiaj yìtï̀nj nej suj duꞌhua hiuꞌuj dânj dàj rûnꞌ huaj giniꞌin nej suj.
66 Hiôꞌ ni̱ gaꞌanj gi̱ꞌhiaj yìtï̀nj nej sij ñan nngaj nneè kú Ma̱ꞌan Jesús, ni̱ gachrîj nej sij daꞌngaꞌa riñan hiëj garán duꞌhua hiuꞌuj dânj ni̱ ganï̂n nej sij stâdu ganikïnꞌ dugumîn hiuj dânj.