Ganikïnꞌ Ma̱ꞌan Jesús riñan chi̱j nej sôꞌ gaꞌnaꞌ ga̱huin chru̱n riñanj
21
Neꞌ rùkù nga gahuin nej nânj,
ni̱ ganikïnꞌ ñûn Ma̱ꞌan Jesús riñan nej sí gaꞌnaꞌ ga̱huin chru̱n riñanj nga mân nej sôꞌ nìchrùnꞌ duꞌhua nne ña̱ꞌa̱nj gùꞌnàj Tiberia;
ni̱ dànanj gidigán Ma̱ꞌan riñan nej sôꞌ:
Jesús en el mar de Galilea (Juan 21.1-25)
2 Nu̱n nùguànꞌàn Simón Pedro ngà Tomás sôꞌ gùꞌnàj ñaꞌàan,
ni̱ nu̱n Natanael sí ꞌna̱ꞌ Kaná huin doꞌó Galilea,
nej daꞌní Zebedeo,
ni̱ nu̱n ahuîj ranꞌ sí gaꞌnaꞌ ga̱huin chru̱n riñanj.
3 Ni̱ gataj Simón Pedro gunïn aꞌngô nej sôꞌ màn hiuj dânj:
—Ga̱ꞌa̱nj gìrìj yukuaj a ruhuâ nne ña̱ꞌa̱nj ni̱ gàꞌnàj.
Ni̱ gataj nej sí màn hiuj dânj gunïn sôꞌ:
—Ga̱ꞌa̱nj gi̱ri̱ nej ñûnj yukuaj a ngàꞌ nej na̱nj ánj.
Huê danj ni̱ gatûj nej sij,
ruhuâ barku ni̱ gaꞌanj nej sij;
sani̱ gàꞌ si ꞌngo̱ yukuaj a nun gi̱ri̱ nej sij ñanꞌ dânj.
4 Sani̱ nga ruhuâ giyigï̀n mánj,
ni̱ guchiꞌ Ma̱ꞌan Jesús duꞌhua nne ña̱ꞌa̱nj;
sani̱ nun ga̱na̱ꞌin nej sí ꞌna̱ꞌ ga̱huin chru̱n riñanj si huej huin sa nï̱kï̱nꞌ hiuj dânj.
5 Ni̱ gataj Ma̱ꞌan gunïn nej sij:
—Nej daꞌninj lij,
ni̱ka̱j nej suj do̱j sa yo̱ꞌ nîꞌ.
Nanikàj nej sij,
ni̱ gataj nej sij.
—Nitaj si ni̱ka̱j nej ñûnj mánj.
6 Ni̱ gataj Ma̱ꞌan Jesús gunïn nej sij:
—Gàꞌnï̀nj nej suj nnanj giri yukuaj a neꞌ huàꞌ barku aché riñan nne ña̱ꞌa̱nj,
ni̱ gìrìꞌ nej suj yukuaj a na̱nj ánj.
Hiôꞌ ni̱ gaꞌnḯn nej sij nnanj giri yukuaj a dàj rûnꞌ gataj Ma̱ꞌan Jesús,
ni̱ naꞌhue gùnùkuaj nej sij giri nej sij nnanj,
dadinꞌ nda nìchra chre mân yukuaj a ruhuâj.
7 Hiôꞌ ni̱ gataj sí ꞌì ruhuâ niꞌin Ma̱ꞌan Jesús gunïn Pedro:
—Simón Pedro,
Ma̱ꞌan Señor huin na̱nj ánj.
Ni̱ nga gunïn sôꞌ si Ma̱ꞌan Jesús huin,
ni̱ nda nanè chre ni̱ gananun sôꞌ siganꞌ sôꞌ,
dadinꞌ hua̱ daj nneè kú sôꞌ,
ni̱ guduguêj sôꞌ Ma̱ꞌan sô ruhuâ nne ña̱ꞌa̱nj.
8 Ni̱ ni̱ka̱j aꞌngô da̱ꞌa̱j nej sí gaꞌnaꞌ ga̱huin chru̱un barku ꞌna̱ꞌ nej sôꞌ ni̱ gunùkuaj nej sôꞌ nnanj màn yukuaj a ꞌna̱ꞌ nej sôꞌ,
dadinꞌ nitaj si nda ûta ga̱nꞌ mân nej sôꞌ duꞌhua nne ña̱ꞌa̱nj dadinꞌ daꞌnga ꞌngo̱ si ꞌngo̱ siêntu metru ga̱nꞌ mân nej sôꞌ.
9 Ni̱ nga guyumân nej sij riñan hioꞌóo,
ni̱ giniꞌin nej sij si nda ane chre hua ñaꞌaan nùnj hiuj dânj,
ni̱ tàj ꞌngo̱ yukuaj ginitï̂n yôꞌ riñan ñaꞌan dânj,
ni̱ màn rachrúun nej.
10 Ni̱ gataj Ma̱ꞌan Jesús:
—Gi̱nikaj nej suj ga̱ꞌna̱ꞌ nej suj yukuaj hia̱j giriꞌ nej suj ruhuâ nne ña̱ꞌa̱nj.
11 Gahui Simón Pedro,
ni̱ giri sôꞌ nnanj màn yukuaj a ni̱ ni̱ka̱j sôꞌ gaꞌnaꞌ sôꞌ duꞌhua hioꞌó nàkòo,
ni̱ nda nìchra chre ruhuâ nnanj dânj mân nej yukuaj yàchìj xi,
ni̱ ꞌngo̱ siêntu tá huìj xia yàꞌnï̀nj nej yukuaj a huin;
ni̱ ûta gàꞌì nej yôꞌ huin sani̱ gàꞌ dânj ni̱ nun gùyùtù nnanj giri yukuaj a mánj.
12 Ni̱ gataj Ma̱ꞌan Jesús gunïn nej sij:
—Ga̱ꞌna̱ꞌ nej suj,
ni̱ ya̱ nej suj.
Ni̱ gàꞌ si ꞌngo̱ nej sí gaꞌnaꞌ ga̱huin chru̱un nun gìsìj ruhuâ gàchìnj naꞌanj:
Ni̱ gataj nej sôꞌ,
ahuin sí huin sòꞌ ràꞌaj.
Dadinꞌ gàꞌ niꞌin nej sôꞌ si Ma̱ꞌan Señor huin sa nne ngà nej sôꞌ.
13 Gaꞌnaꞌ Ma̱ꞌan Jesús,
ni̱ gidaꞌa rachrúun,
ni̱ gaꞌhuij yâ nej sôꞌ,
ni̱ huê danj na̱nj gaꞌhuij yukuaj a yâ nej sôꞌ.
14 Ni̱ nânj huin gisîj huàꞌnï̀nj gidigân Jesús Ma̱ꞌan riñan nej sí gaꞌnaꞌ ga̱huin chru̱n riñanj,
neꞌ rùkù nga gisîj ganahuin nìꞌnàj siganï̂nj nej nîman.
Gataj Ma̱ꞌan Jesús gu̱nïn Simón Pedro, du̱gumîn sòꞌ dán matsïj ï
15 Nga gisîj gahuin rá ruhuâ nej sij,
ni̱ gataj Ma̱ꞌan Jesús gunïn Simón Pedro:
—Simônj,
daꞌní Jonás,
ꞌì doj ruhuâꞌ niꞌînꞌ ñùnj gàꞌ daꞌ nej sôꞌ màn hiuj nânj nîꞌ.
Nanikàj Pedro ni̱ gataj sôꞌ:
—ꞌÌ doj ruhuâj niꞌín sòꞌ na̱nj Señor;
ni̱ gàꞌ niꞌin Ma̱ꞌân rèꞌ si ꞌì doj ruhuâj niꞌín Ma̱ꞌân rèꞌ na̱nj ánj.
Ni̱ gataj Ma̱ꞌan Jesús:
—Gàꞌhuìꞌ sòꞌ ya̱ nej dán matsïj ꞌnìnj lij na̱nj ánj.
16 Ni̱ nânj huin gisîj huàꞌ gataj Ma̱ꞌan Jesús gunïn Pedro:
—Simón,
huin daꞌní Jonás,
ꞌì ruhuâꞌ niꞌînꞌ ñùnj nîꞌ.
Nanikàj Pedro ni̱ gataj sôꞌ:
—ꞌÌ ruhuâj niꞌín sòꞌ na̱nj Señor;
huê gàꞌ niꞌin Ma̱ꞌân rèꞌ si ꞌì ruhuâj niꞌín Ma̱ꞌân rèꞌ na̱nj ánj.
Ni̱ gataj Ma̱ꞌan Jesús:
—Dugumîn sòꞌ nej dán matsïj ï na̱nj ánj.
17 Ni̱ nânj huin gisîj huàꞌnï̀nj gataj Ma̱ꞌan Jesús:
—Simón,
huin daꞌní Jonás,
ꞌì ruhuâꞌ niꞌînꞌ ñùnj nîꞌ.
Ni̱ gananï̂n ruhuâ Pedro dadinꞌ nânj huin gàꞌ gisîj huàꞌnï̀nj gachín naꞌan si ꞌì ruhuâ sôꞌ niꞌin sòꞌ Ma̱ꞌan.
Ni̱ gataj sôꞌ:
—Señor,
gàꞌ niꞌîn Ma̱ꞌân rèꞌ daranꞌanj ni̱ gàꞌ niꞌîn Ma̱ꞌân rèꞌ si ꞌì ruhuâj niꞌín Ma̱ꞌân rèꞌ na̱nj ánj.
Hiôꞌ ni̱ gataj Ma̱ꞌan Jesús:
—Gàꞌhuìꞌ ya̱ nej dán matsïj na̱nj ánj.
18 Yàngàꞌ ni̱ yàngàꞌ hia nï̀nꞌ gàtà gunï̂nꞌ:
Ni̱ nga gahuînꞌ sí hua lij,
ni̱ gananun ma̱ꞌânꞌ sigânt,
ni̱ huaꞌanj dànèꞌ garanꞌ ruhuâꞌ,
sani̱ nga ga̱huînꞌ ꞌngo̱ belu,
ni̱ du̱nukuâꞌ raꞌât ni̱ gànàꞌnï̀nj aꞌngô nej sij sigânt,
ni̱ gi̱ni̱kaj nej sij ga̱ꞌa̱nj nej sij sòꞌ ñan nun ga̱ra̱nꞌ ruhuâꞌ ga̱ꞌa̱njꞌ na̱nj ánj.
19 Dànanj gataj Ma̱ꞌan Jesús,
ni̱ gidiganj dàj gi̱ranꞌ sa̱ñu̱n Pedro nga gàhuìꞌ sôꞌ ni̱ dàj na̱gi̱ꞌhiaj yàchìj sôꞌ siyu̱gui Ma̱ꞌan Ñaꞌanj an.
Ni̱ nga gisîj gaꞌmin nej nuguanꞌ nânj,
ni̱ gata gu̱nïn sôꞌ:
—Gi̱nikòꞌ sòꞌ rukú.
Sôꞌ gaꞌnaꞌ ga̱huin chru̱n ꞌì doj ruhuâ Ma̱ꞌan Jesús niꞌin
20 Ni̱ nga nanikàj Pedro giniꞌhiaj sôꞌ,
ni̱ giniꞌin sôꞌ si̱ nìkòꞌ sí ꞌì ruhuâ Ma̱ꞌan Jesús niꞌin,
huê gè sí nânj gachrûn ahui yiꞌñanj Ma̱ꞌan nga mân nej sij gahuin stiꞌnï̀n nej sij nga gachín naꞌanj sôꞌ ni̱ gataj sôꞌ:
“Señor,
ahuin sí nàgàꞌhuìꞌ sòꞌ ràꞌaj.”
21 Ni̱ nga giniꞌin Pedro sí nânj,
ni̱ gataj sôꞌ gunïn Ma̱ꞌan Jesús:
—Señor,
ni̱ dàj gi̱ranꞌ sí nânj ràꞌaj.
22 Ni̱ gataj Ma̱ꞌan Jesús:
—Ni̱ si garanꞌ ruhuâj si gùnàj sij nda gui nànìkàj ñûn gàꞌnàj,
ni̱ nùnj huin si gi̱ꞌhiâꞌ ganahuîꞌ ruhuâꞌ ràꞌaj.
Gi̱nikòꞌ sòꞌ ñùnj na̱nj ánj.
23 Ni̱ gayaꞌnï̀n nuguanꞌ gataj Ma̱ꞌan Jesús siganï̂nj nej sí gaꞌnaꞌ gahuin chru̱n riñanj,
ni̱ ganï̂n ruhuâ nej sôꞌ sisi̱ si̱ gahuiꞌ sí nânj.
Sani̱ sê si̱ gataj Ma̱ꞌan Jesús si guendâ gahuiꞌ sôꞌ huin mánj,
ni̱ gataj Ma̱ꞌan Jesús gunïn Pedro:
“Si ñùnj garanꞌ ruhuâ.
Si gùnàj sôꞌ ga̱ne sôꞌ nda gui nànìkàj ñûn gàꞌnàj.
Ni̱ nùnj huin si gi̱ꞌhiâꞌ ganahuîꞌ ruhuâꞌ ûnj.”
24 Huê sí gaꞌnaꞌ gahuin chru̱n riñan Ma̱ꞌan Jesús huê sôꞌ huin sí ganataꞌ dàj gahuin,
ni̱ gachrûn sôꞌ nej sa gahuin;
ni̱ niꞌin hueꞌê nêꞌ si yàngàꞌ hia nï̀nꞌ gahuin nej nuguanꞌ ganataꞌ sôꞌ.
25 Ni̱ hua̱ aꞌngô nej daꞌngaꞌ giꞌhiaj Ma̱ꞌan Señor,
ni̱ si gàchrùnj daꞌ goꞌngo̱ nej daꞌnga giꞌhiaj Ma̱ꞌan riñan ñanj,
ni̱ ganï̂n ruhuâj sisi̱ si̱ guchiꞌ ruhuâ yumiguì nânj gimàn nej librû dânj mánj.
Ni̱ huê danj huin rûꞌhuaj na̱nj ánj.