Giri rà nej sij dàj giꞌhiaj nej sij ga̱ꞌhue gi̱da̱ꞌa nej sij Ma̱ꞌan Jesús
14
Ni̱ gàchin ahuîj gui nga gùyùmàn giꞌñanj pascua,
giꞌñanj yâ nej judío rachrún nitaj si ꞌnï̱nj chru dunuꞌmanꞌan;
ni̱ nanaꞌhuiꞌ nej rej huin ña̱an ngà nej sí chru̱n ley dàj giꞌhiaj nej sôꞌ ga̱ꞌhue gi̱di̱gañuꞌunj nej sôꞌ Ma̱ꞌan Jesús ni̱ ga̱ꞌhue gìrìꞌ nej sôꞌ da̱gahuiꞌ nej sôꞌ Ma̱ꞌan.
2 Ni̱ gataj nej sôꞌ:
—Si̱ gidaꞌa nêꞌ sí dânj gui nga ga̱huin giꞌñanj an,
dadinꞌ ûta ga̱gua̱j nej guiì yumanꞌan gi̱ni̱ꞌin ninj nêꞌ na̱nj ánj.
Betania nne Ma̱ꞌan Jesús nga gachrîj ꞌngo̱ siyànàa gasîti Ma̱ꞌan
3 Ni̱ nga nne Ma̱ꞌan Jesús yumanꞌ Betania,
dukuâ Simón sí gùꞌnàj leproso,
ni̱ nne yiꞌnḯn mesa ni̱ gaꞌnaꞌ ꞌngo̱ siyànà ni̱ka̱j ꞌngo̱ basû nu̱n nne gïnꞌ dàj gùꞌnàj nardo sa hua̱ hueꞌê nï̀nꞌ ni̱ ûta du̱ꞌhue̱;
ni̱ guchraꞌ siyànà dânj basû nu̱n nne gïnꞌ dàj a ni̱ guta ahui Ma̱ꞌan Jesús.
4 Ni̱ ginaꞌan ruhuâ da̱ꞌa̱j nej sí dânj,
ngà nda ruhuâ nimân nej sôꞌ ni̱ gataj nej sôꞌ:
—Nùnj huin saj ni̱ gi̱rë̱ꞌ chre nne gïnꞌ dàj nânj ràꞌaj.
5 Dadinꞌ ga̱ꞌhue ga̱nej ni̱ gìrìꞌ duꞌhue huàꞌnï̀nj sientu denario,
ni̱ ga̱ꞌhue gàꞌhuìꞌ riñan nej guiì ga̱ni̱ki.
Ni̱ gaꞌmin nej sôꞌ yiꞌî siyànà nânj.
6 Sani̱ gataj Ma̱ꞌan Jesús:
—Gu̱du̱nâj nej suj si gi̱ꞌhiaj siyànà nânj dànanj;
ni̱ nùnj huin saj ni̱ garanꞌ ñuꞌunj nej suj siyànà nânj ràꞌaj.
Ûta dùgùnàj hua sa giꞌhia ngàj na̱nj ánj.
7 Daranꞌ nej diû gimàn nej guiì ga̱ni̱ki ngà nej suj,
ni̱ si ruhuâ nej suj ni̱ ga̱ꞌhue gu̱ru̱gûñuꞌunj nej suj ninj;
sani̱ ñùnj ni̱ sê daranꞌ diû ga̱né ngà nej suj mánj.
8 Giꞌhiaj siyànà nânj nda andaꞌ gunukua;
dadinꞌ giꞌhiaj yu̱gui ni̱ guta nne gïnꞌ dàj a nneè kû guendâ gàchìnꞌ nej sij ñùnj.
9 Yàngàꞌ hia nï̀nꞌ ni̱ dànèꞌ gahuin nga ga̱ꞌmi̱n nej sij si-nùguànꞌ Ma̱ꞌan Ñaꞌanj an,
ni̱ nï̀nꞌ gàchràꞌ ruhuâ yumiguìi,
ni̱ huê dànanj gu̱nu̱na̱ nej sij sa giꞌhiaj siyànà nânj ngàj.
Duguaneꞌ Judas ma̱ꞌan sôꞌ si ga̱ꞌhue nàgàꞌhuìꞌ sôꞌ Ma̱ꞌan Jesús
10 Hiôꞌ ni̱ Judas Iscariote,
huin ꞌngo̱ nej yùhuìj sí ꞌna̱ꞌ ga̱huin chru̱n riñanj,
ni̱ gaꞌanj sôꞌ riñan nej rej huin ña̱an guendâ nàgàꞌhuìꞌ sôꞌ Ma̱ꞌan.
11 Ni̱ nga gunïn nej rej huin ña̱an,
nej nuguanꞌ nânj ni̱ ûta gahuin nìhiàꞌ ruhuâ nej sôꞌ ni̱ gataj nej sôꞌ si ga̱ꞌhue gàꞌhuìꞌ nej sôꞌ sanꞌanj an.
Ni̱ ûta sàꞌ nadigiꞌñun Judas dàj gi̱ꞌhiaj sôꞌ ga̱ꞌhue nàgàꞌhuìꞌ sôꞌ Ma̱ꞌan Jesús.
Gaꞌnïnꞌ su̱n Ma̱ꞌan Jesús si gidaꞌa nej sij si-sena Ma̱ꞌan
12 Gui si̱nï̱n nga gayiꞌì giꞌñanj yâ nej sij rachrún nitaj si ꞌnï̱nj chru dunuꞌmanꞌan,
nga da̱gahuiꞌ nej sij matsïj ꞌnìnj in ya̱ nej sij pascua ni̱ gataj nej sí ꞌna̱ꞌ ga̱huin chru̱un gu̱nïn Ma̱ꞌan Jesús:
—Dànèꞌ ruhuâ Ma̱ꞌan rèꞌ si ga̱ꞌa̱nj gi̱ꞌhiaj yu̱gui nej ñûnj ñan ya̱ Ma̱ꞌan rèꞌ pascua ràꞌaj.
13 Ni̱ gaꞌnïn gaꞌanj huìj sí ꞌna̱ꞌ ga̱huin chru̱n riñanj ni̱ gata gu̱nïn nguèj sôꞌ:
—Ga̱ꞌa̱nj nguèj suj yumanꞌ snàꞌànj nânj,
ni̱ ga̱hui̱ ꞌngo̱ sí dânj gànàrìꞌ nguèj suj ni̱ ata sôꞌ ꞌngo̱ sigù nnee huaj sôꞌ;
ni̱ ginikòꞌ nguèj suj sí dânj ga̱ꞌa̱nj nguèj suj,
14 ni̱ hueꞌ ñan ga̱tu̱ sí dânj,
ni̱ ga̱ta̱j nguèj suj gu̱nïn sí dùkuà hueꞌ dânj:
“Taj Ma̱ꞌan Maestrû:
Ni̱ dànèꞌ tá hueꞌ hua̱ niꞌnï̱nj giꞌhiâꞌ ñan ga̱ꞌhue yàj matsïj ï guendâ pascua ngà nej sí ꞌna̱ꞌ ga̱huin chru̱n riñânj ràꞌaj.”
15 Ni̱ gidigân sí dânj ꞌngo̱ hueꞌ hua̱ niꞌnï̂nj tàj yichrá aꞌngô hueꞌe ni̱ gàꞌ hua̱ yu̱gui;
ni̱ hiuj dânj gi̱ꞌhiaj yu̱gui nej suj ya̱ nêꞌ.
16 Ni̱ gaꞌanj nguèj sí ꞌna̱ꞌ ga̱huin chru̱n riñan Ma̱ꞌan Jesús ni̱ gatûj nguèj sôꞌ ruhuâ yumanꞌ snàꞌànj dânj;
ni̱ ganariꞌ nguèj sôꞌ dàj rûnꞌ gataj Ma̱ꞌan Jesús;
ni̱ giꞌhiaj yu̱gui nguèj sôꞌ sa ya̱ nej sij guendâ giꞌñanj pascua.
17 Ni̱ nga ginìn ni̱ gaꞌnaꞌ Ma̱ꞌan Jesús ngà nej yùhuìj sí ꞌna̱ꞌ ga̱huin chru̱n riñanj.
18 Ni̱ gaꞌanj ga̱ne nej sij yiꞌnḯn mesa ni̱ nga gayiꞌì nej sij yâ nej sij,
ni̱ gataj Ma̱ꞌan Jesús:
—Yàngàꞌ hia nï̀nꞌ tâ ni̱ hua̱ ꞌngo̱ nej suj nne ya ngàj,
ni̱ nej suj huin sí nàgàꞌhuìꞌ ñùnj.
19 Hiôꞌ ni̱ gayiꞌì nej sí nne hiuj dânj ni̱ gananï̂n ruhuâ nej sôꞌ,
ni̱ gataj nej sôꞌ riñan daꞌ goꞌngo̱ nej sôꞌ:
—Ñùnj huin nîꞌ.
Ni̱ gataj ꞌngo̱ ni̱ aꞌngô nej sôꞌ:
—Ñùnj huin nîꞌ.
20 Nanikàj Ma̱ꞌan Jesús ni̱ gata:
—ꞌNgo̱ nej yùhuìj ranꞌ nej suj huin,
ni̱ sí gidigï̂j raꞌa ruhuâ goꞌo ngàj huin.
21 Yàngàꞌ hia nï̀nꞌ ni̱ hua̱ gàꞌàn dàj rûnꞌ taj si-nùguànꞌ Ma̱ꞌan Ñaꞌanj an rayiꞌí,
sani̱ ûta gi̱ranꞌ sa̱ñu̱n sí nàgàꞌhuìꞌ ñùnj riñan nej rej huin ña̱an.
Dànanj dùgùnàj huaj si nun ga̱ꞌnga̱ sí dânj.
22 Ni̱ nga nï̀nꞌ yâ nej sij mân nej sij,
ni̱ gidaꞌa Ma̱ꞌan Jesús rachrúun ni̱ gaꞌhuij si guruhuâ Ma̱ꞌan Ñaꞌanj an,
ni̱ guchraꞌ da̱ꞌa ni̱ gaꞌhuij raꞌa nej sí ꞌna̱ꞌ ga̱huin chru̱n riñanj,
ni̱ gata:
—Gi̱daꞌa nej suj ni̱ ya̱ nej suj dadinꞌ huê nânj huin nneè ku.
23 Ni̱ gidaꞌa basû nun nne chruj uba,
ni̱ nga gisîj gaꞌhuij si guruhuâ Ma̱ꞌan Ñaꞌanj an,
ni̱ gaꞌhuij raꞌa nej sí ꞌna̱ꞌ ga̱huin chru̱n riñanj;
ni̱ goꞌo daranꞌ nej sôꞌ nne chruj uba.
24 Ni̱ gata:
—Huê nânj huin tun Maꞌán sa na̱gi̱ꞌhiaj nàkàj si-nùguànꞌ Ma̱ꞌan Ñaꞌanj an ngà nej guiì,
ni̱ gañan rayiꞌî ûta gàꞌì nej guiì.
25 Yàngàꞌ hia nï̀nꞌ gàtà gu̱nïn nej suj si si̱ goꞌôj nne chruj uba,
nda gui go̱ꞌo̱ nàkà ñún ñan gi̱nikaj sun Ma̱ꞌan Ñaꞌanj an na̱nj ánj.
Gataj Ma̱ꞌan Jesús si gùyùmàn ꞌngo̱ orâ ni̱ ga̱ta̱j Pedro si nun niꞌin sôꞌ Ma̱ꞌan
26 Nga gisîj gachrá nej sij chraꞌa riñan Ma̱ꞌan Ñaꞌanj an,
ni̱ gahui nej sij gaꞌanj nej sij raa̱ kïj ñan màn chrun olibo.
27 Hiôꞌ ni̱ gataj Ma̱ꞌan Jesús:
—Daranꞌ nej suj ga̱na̱nï̱n ruhuâ ni̱ du̱gueꞌe nej suj niꞌin nej suj ñùnj ñanꞌ hia̱j;
dadinꞌ huê danj taj riñan ñanj:
“Dagahuí Ma̱ꞌan sí ni̱kï̱nꞌ dugumîn nej matsïj ï ni̱ gàyàꞌnï̀n nej matsïj ï.”
28 Sani̱ neꞌ rùkù nga gànàꞌnï̀nj siganï̂nj nej nîman,
ni̱ gàꞌàn neꞌ ña̱an riñan nej suj nda Galilea.
29 Hiôꞌ ni̱ gataj Pedro:
—Nùnj huin si ga̱na̱nï̱n ruhuâ aꞌngô nej sij ni̱ du̱gueꞌe nej sij niꞌin sij Ma̱ꞌán rèꞌ,
sani̱ ñùnj ni̱ si̱ gudugueꞌé mánj.
30 Ni̱ gataj Ma̱ꞌan Jesús:
—Yàngàꞌ hia nï̀nꞌ gàtà riñanꞌ si ñanꞌ hia̱j,
ni̱ nga nï̀nꞌ gàchin gìsìj huàꞌ ga̱gua̱j dêꞌlo̱j o ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj.
31 Hiôꞌ ni̱ nun gìyìchìnꞌ si ga̱ꞌmi̱n Pedro ni̱ gataj sôꞌ:
—Asàꞌ dàj huaj ni̱ ga̱ꞌhue gàhuìj ngà Maꞌân rèꞌ,
ni̱ si̱ gudunâ Maꞌân rèꞌ mánj.
Ni̱ huê dànanj gataj daranꞌ nej sí gaꞌnaꞌ ga̱huin chru̱n riñan Ma̱ꞌan Jesús.
Nne Ma̱ꞌan Jesús ñan gùꞌnàj Getsemaní aꞌmin ngà Ma̱ꞌan Ñaꞌanj an
32 Huê danj ni̱ gaꞌnaꞌ nej sij ñan gùꞌnàj Getsamaní,
ni̱ gataj Ma̱ꞌan Jesús gu̱nïn nej sí ꞌna̱ꞌ ga̱huin chru̱n riñanj.
—Ga̱ne nej suj hiuj nânj,
dadinꞌ ga̱ꞌa̱nj gàꞌmìn ngà Ma̱ꞌan Ñaꞌanj an.
33 Ni̱ gaꞌanj ane doj ngà Pedro,
ngà Jacobo ni̱ ngà Juan,
ni̱ gayi̱ꞌij ni̱ ûta gananï̂n ruhuaj ni̱ ûta gahuin rùguìꞌi ruhuaj.
34 Ni̱ gata gu̱nïn nej sôꞌ:
—Ûta gananï̂n ruhuâ ma̱ꞌan nimânj ni̱ nda gàhuìj rûnꞌ hia;
gùnàj nej suj hiuj nânj ni̱ hueꞌê du̱gumîn nej suj ma̱ꞌan nej suj ni̱ si̱ gatoj nej suj mánj.
35 Ni̱ gaꞌan neꞌ ña̱n doj ni̱ ganikïnꞌ rúdàko riñan hioꞌóo,
ni̱ gachín ni̱ꞌhia riñan Ma̱ꞌan Ñaꞌanj an ni̱ gata si ga̱ꞌhue,
ni̱ ga̱chi̱n orâ chìꞌ nânj riñânj.
36 Nga gaꞌmin ngà Ma̱ꞌan Ñaꞌanj an ni̱ gata:
—Ta̱ lij Ma̱ꞌân rèꞌ huin Rê ni̱ daranꞌ nej rasu̱un huin sa ga̱ꞌhue gi̱ꞌhiaj Ma̱ꞌân rèꞌ;
gi̱ꞌhiaj anêj Ma̱ꞌân rèꞌ basû nânj riñânj;
sani̱ sê sa garanꞌ ruhuâj huin sa gi̱ꞌhiaj Ma̱ꞌân rèꞌ mánj,
gi̱ꞌhiaj Ma̱ꞌân rèꞌ dàj garanꞌ ruhuâ Ma̱ꞌân rèꞌ na̱nj ánj.
37 Ni̱ orâ nga nanikàj Ma̱ꞌan Jesús gaꞌnaj ñan màn nej sij ni̱ ganariꞌij si gàꞌ gatoj nej sij mân nej sij,
ni̱ gata gu̱nïn Pedro:
—Simón.
Gàꞌ gatojꞌ na̱nj nîꞌ.
Nun gu̱nu̱kuáꞌ ga̱ne nìꞌnàꞌ ꞌngo̱ rïn orâ ngàj mínj.
38 Ga̱ne nìꞌnàꞌ nej suj ni̱ ga̱ꞌmi̱n nej suj ngà Ma̱ꞌan Ñaꞌanj an,
daꞌnga ni̱ si gininj nej suj riñan gakï̱nꞌïn nga duguaneꞌ sichre riñan nej suj;
dadinꞌ nanè nimân nej suj ni̱ hua̱ ruhuaj si nànàꞌhuìꞌ nej suj Ma̱ꞌan Ñaꞌanj an,
sani̱ nneè kú nej suj ni̱ gininaj ruhuaj.
39 Hiôꞌ ni̱ gaꞌanj ga̱ꞌmi̱n ñûn Ma̱ꞌan Jesús ngà Ma̱ꞌan Ñaꞌanj an,
ni̱ huê dàj rûnꞌ gataj sìnï̀nj ni̱ huê danj gataj ñunj.
40 Ni̱ nga nanika gaꞌnaꞌ ñunj ni̱ gàꞌ gatoj ñûn nej sij mân nej sij ganariꞌij,
dadinꞌ ûta ꞌna̱ꞌ nnej e riñan nej sij;
ni̱ naꞌhue gìrìꞌ nej sij sa ga̱ta̱j nej sij gu̱nïn.
41 Ni̱ gàꞌ gisîj huàꞌnï̀nj nanika gaꞌnaj ni̱ gata gu̱nïn nej sij:
—Ga̱to̱j nej suj ni̱ ga̱na̱ra̱n ruhuâ nej suj.
Dadinꞌ gàꞌ gisîj ora,
ni̱ gi̱ni̱ꞌhiaj nej suj dadinꞌ nàgàꞌhuìꞌ ꞌngo̱ sí dânj ñùnj riñan nej sí gakï̱nꞌïn.
42 Ga̱na̱chi nej suj ni̱ ga̱ꞌa̱nj nêꞌ;
dadinꞌ gàꞌ gahuin nìchrùnꞌ sí nàgàꞌhuìꞌ ñùnj.
Gidaꞌa nej sí dânj Ma̱ꞌan Jesús guendâ ga̱chri̱ nej sôꞌ dukuâ gaꞌa
43 Orâ chre ni̱ nga nï̀nꞌ aꞌmin Ma̱ꞌan Jesús nikïnj hiuj dânj,
ni̱ gaꞌnaꞌ Judas,
ni̱ sôꞌ huin ꞌngo̱ sí ni̱ka̱j duguiꞌ ngà nej yùhuìj,
ni̱ ûta gàꞌì nej síi ꞌna̱ꞌ ngà sôꞌ ni̱ ni̱ka̱j nej sí dânj yîti ngà chrun gurûtin ꞌna̱ꞌ nej sôꞌ,
dadinꞌ gaꞌnḯn nej rej huin ña̱an ngà nej sí chru̱n ley ni̱ nej síchìj achij i gaꞌnaꞌ nej sô.
44 Ni̱ gataj sí nagaꞌhuiꞌ dânj ahuin daꞌngaꞌ gi̱digân sôꞌ nga nàgàꞌhuìꞌ sôꞌ Ma̱ꞌan Jesús ni̱ gataj sôꞌ:
—Sí ri̱ña̱n ga̱chru̱n duꞌhuá ni̱ huê sí dânj huin;
ni̱ gi̱daꞌa nej suj ni̱ gi̱nikaj nej suj ga̱ꞌa̱nj nej suj sôꞌ ni̱ si̱ giriñun ruhuâ nej suj dadinꞌ yìtï̀nj ni̱ huê sôꞌ huin.
45 Ni̱ nga guyumân Judas Iscariote,
ni̱ gaꞌanj nichì sôꞌ riñan Ma̱ꞌan Jesús ni̱ gataj sôꞌ:
—Maestrûj,
Maestrûj gataj sôꞌ.
Ni̱ gachrûn du̱ꞌhua sôꞌ yiꞌnḯn riñan Ma̱ꞌan Jesús.
46 Hiôꞌ ni̱ gidaꞌa nej sí ꞌna̱ꞌ ngà Judas Iscariote Ma̱ꞌan Jesús.
47 Sani̱ ꞌngo̱ sí ni̱kï̱nꞌ hiuj dânj ni̱ giri sôꞌ si-yitî sôꞌ,
ni̱ guduranꞌ yiꞌì sôꞌ si-musû rej huin ña̱n nï̀nꞌïn ni̱ gaꞌneꞌ sôꞌ rakïj sí dânj.
48 Ni̱ nanikàj Ma̱ꞌan Jesús ni̱ gata:
—Dàj rûnꞌ giꞌhiaj ꞌngo̱ nej sí nìkòꞌ sí tu̱u nga nikaj nej sôꞌ yiti ni̱ gu̱rûtin ꞌnaꞌ nej sôꞌ huê danj giꞌhiaj nej suj nga gaꞌnaꞌ gi̱daꞌa nej suj ñùnj.
49 Daranꞌ nej gui gané ngà nej suj ni̱ gidigán ruhuâ hueꞌ huin nûhui,
ni̱ nun gi̱daꞌa nej suj ñùnj;
sani̱ huê dànanj ga̱huin daꞌnga ni̱ gisîj nuguanꞌan dàj rûnꞌ taj riñan ñanj si-nùguànꞌ Ma̱ꞌan Ñaꞌanj an.
50 Hiôꞌ ni̱ gudunâj daranꞌ nej sí ꞌna̱ꞌ ga̱huin chru̱un Ma̱ꞌan Jesús,
ni̱ gunânj nej sôꞌ ni̱ gaꞌanj nej sôꞌ.
Sí ña̱n gunânj
51 Sani̱ nìkòꞌ ꞌngo̱ sí ña̱an huaj sôꞌ rukû Ma̱ꞌan Jesús,
ni̱ garán sôꞌ ꞌngo̱ atsîj gàtsìi nneè kú sôꞌ sani̱ gidaꞌa nej sí hua̱j ngà Judas Iscariote sí nânj;
52 sani̱ gudunâj sôꞌ,
atsîj gàtsì garán sôꞌ nneè kú sôꞌ,
ni̱ hua̱ nneè sôꞌ ni̱ gunânj sôꞌ ni̱ gaꞌanj sôꞌ.
Ni̱ka̱j nej sij gaꞌanj ne sij Ma̱ꞌan Jesús riñan junta nìko ñan giyiꞌnïnꞌ daranꞌ nej gakï̱nꞌïn
53 Ni̱ ni̱ka̱j nej sí dânj gaꞌanj nej sôꞌ Ma̱ꞌan Jesús riñan rej huin ña̱n nï̀nꞌïn,
ni̱ ganaraꞌhuiꞌ daranꞌ nej rej huin ña̱an ngà nej sí chru̱n ley ni̱ ngà nej síchìj achij màn ruhuâ yumanꞌan.
54 Ni̱ nda gànꞌ nikòꞌ Pedro huaj sôꞌ ni̱ guchiꞌ sôꞌ nda neꞌ rùhuà riñan hueꞌ huin dukuâ rej huin ña̱n nï̀nꞌïn,
ni̱ nne sôꞌ ganahuin gï̀n sôꞌ ñaꞌaan,
ngà nej policia.
55 Sani̱ nanaꞌhuiꞌ nej rej huin ña̱an ngà daranꞌ nej sí huin yiꞌnïnꞌ nej sí ni̱ka̱j su̱n riñan yumanꞌan ꞌngo̱ sí gànàtàꞌ ꞌngo̱ sa aꞌnanꞌ giꞌhiaj Ma̱ꞌan Jesús,
daꞌnga ni̱ gaꞌhue nàgàꞌhuìꞌ nej sôꞌ guendâ da̱gahuiꞌ nej síi Ma̱ꞌan Jesús;
sani̱ naꞌhue gànàrìꞌ nej sôꞌ sí gànàtàꞌ.
56 Dadinꞌ ûta gàꞌì nej síi gaꞌmin nuguanꞌ gidigañuꞌunj un rayiꞌî Ma̱ꞌan Jesús,
sani̱ ûta gachej gaꞌmin nej sôꞌ.
57 Hiôꞌ ni̱ ganayumàn ꞌngo̱ sí dânj,
ni̱ gaꞌmin sôꞌ nuguanꞌ gidigañuꞌunj un rayiꞌî Ma̱ꞌan Jesús ni̱ gataj sôꞌ.
58 —Gunïn nej ñûnj sa gataj sí dânj:
“Gaꞌhue du̱guanêj hueꞌ nûhui nìko sa giꞌhiaj ra̱ꞌa nej síi,
ni̱ yichrá huàꞌnï̀nj gui ni̱ gànàsìj ñûn aꞌngoj gi̱ꞌhia sani̱ sê ngà raꞌa síi ga̱na̱huin mánj.”
59 Sani̱ gàꞌ danj ni̱ naꞌhue gànàtàꞌ gu̱ña̱n nej sí dânj.
60 Hiôꞌ ni̱ ganayumàn rej huin ña̱n nï̀nꞌïn siganï̂nj nej guiì ni̱ gaꞌanj sôꞌ nda da̱nï̱n dânj,
ni̱ gachín naꞌanj sôꞌ Ma̱ꞌan Jesús ni̱ gataj sôꞌ:
—Nitaj gàꞌ si ꞌngo̱ nuguanꞌan du̱nanikàj rèꞌ,
yiꞌî sa garânj ruhuâ nej sij rayiꞌî rè ûnꞌ.
61 Sani̱ dḯn huin duꞌhua Ma̱ꞌan Jesús,
ni̱ nitaj gàꞌ si ꞌngo̱ nuguanꞌan dunani̱ka riñan rej dânj.
Ni̱ gachín naꞌanj ñûn rej huin ña̱n nï̀nꞌïn Ma̱ꞌan Jesús,
ni̱ gataj sôꞌ:
—Huê Ma̱ꞌân rèꞌ huin Cristo,
Daꞌní Ma̱ꞌan Ñaꞌanj an nîꞌ.
62 Ni̱ nanikàj Ma̱ꞌan Jesús ni̱ gata:
—Huê ñùnj huin ruꞌmínj;
ni̱ gi̱ni̱ꞌin nej suj si ga̱né neꞌ ra̱ꞌa huàꞌ Ma̱ꞌan Ñaꞌanj an ñan ni̱ka̱j sunj ni̱ gàꞌnàj riñan nnga màn neꞌ yàtàꞌa.
63 Hiôꞌ ni̱ nga gunïn rej huin ña̱an nï̀nꞌïn nej nuguanꞌ nânj,
ni̱ gutù sôꞌ siganꞌ sôꞌ ni̱ gataj sôꞌ:
—Nùnj huin si gi̱ꞌhiaj nêꞌ nànàꞌhuìꞌ nêꞌ aꞌngô sí gànàtàꞌ gàꞌ ûnj.
64 Gunïn nej suj si gaꞌmin kï̱j sij riñan Ma̱ꞌan Ñaꞌanj an ni̱ dàj huin ruhuâ nej suj ràꞌaj.
Ni̱ daranꞌ nej sí màn hiuj dânj gataj si hua̱ ni̱ña̱n si gahuin kastîgu Ma̱ꞌan Jesús,
ni̱ daꞌhui ga̱huij.
65 Ni̱ gayiꞌì nej sí dânj ni̱ gachra stanûj nej sôꞌ riñan Ma̱ꞌan,
ni̱ garán nej sôꞌ riñanj ni̱ gaꞌhuiꞌ nej sôꞌ guchruꞌu Ma̱ꞌan,
ni̱ gataj nej sôꞌ:
—Ga̱ta̱j sòꞌ ahuin sí gaꞌhuiꞌ ni̱ꞌhiâꞌ staj.
Ni̱ garaꞌhui nej sí policia riñan Ma̱ꞌan Jesús.
Gataj Pedro si nun niꞌin sôꞌ Ma̱ꞌan Jesús
66 Ni̱ ni̱kï̱nꞌ Pedro neꞌ nìkàꞌ riñan hueꞌ huin dukuâ rej huin ña̱n nï̀nꞌïn,
ni̱ gaꞌnaꞌ ꞌngo̱ siyànà giꞌhiaj sun riñan rej huin ñan nï̀nꞌïn.
67 Ni̱ giniꞌin siyànà dânj ni̱kï̱nꞌ Pedro ganahuin gï̀n sôꞌ ñaꞌaan,
ni̱ giniꞌhiaj siyànà dânj riñan sôꞌ ni̱ gata:
—Huêꞌ huin sa ni̱ka̱j duguiꞌ ngà Ma̱ꞌan Jesús ꞌna̱ꞌ riñan hioꞌó Nazaret huaj.
68 Sani̱ nun ga̱ꞌhue̱j sôꞌ si ni̱ka̱j duguiꞌ sôꞌ ngà Ma̱ꞌan Jesús,
ni̱ gataj sôꞌ:
—Nun niꞌín sí gatajꞌ dânj,
ni̱ gàꞌ nun garânj daꞌngaꞌ ruhuâj sa gatajꞌ dan mánj.
Ni̱ gahui sôꞌ ni̱ gaꞌanj ga̱nikïnꞌ sôꞌ ñan gatûj nej guiì riñan rahueꞌe.
69 Ni̱ giniꞌin ñûn siyànà huin musû dânj,
ni̱ gayiꞌij ni̱ gata gunïn aꞌngô nej sí ni̱kï̱nꞌ hiuj dânj:
—Sinaꞌu nânj huin sa ni̱ka̱j duguiꞌ ngà Jesús.
70 Sani̱ nun ga̱ꞌhue̱j ñûn Pedro si ni̱ka̱j duguiꞌ sôꞌ ngà Ma̱ꞌan Jesús.
Ni̱ neꞌ rùkù doj ni̱ gayiꞌì nej sí màn hiuj dânj ni̱ gataj nej sôꞌ gu̱nïn Pedro:
—Yàngàꞌ hia nï̀nꞌ ni̱ huêꞌ huin sí ni̱ka̱j duguiꞌ ngà Ma̱ꞌan Jesús;
dadinꞌ sí màn yumanꞌ Galilea huînꞌ.
71 Hiôꞌ ni̱ gayiꞌì Pedro ni̱ gaꞌmin yiꞌì sôꞌ rayiꞌî Ma̱ꞌan Jesús ni̱ gataj sôꞌ:
—Niꞌin yàngàꞌ Ma̱ꞌan Ñaꞌanj an si nun niꞌín sí ràyìꞌì gaꞌmin nej suj dânj mánj.
72 Ni̱ gisîj huàꞌ gaguâj dêꞌlo̱j o,
hiôꞌ ni̱ gananun ruhuâ Pedro nej nuguanꞌ gataj Ma̱ꞌan Jesús:
“Nga nï̀nꞌ ga̱chin gìsìj huàꞌ gaguâj dêꞌlo̱j o ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj.”
Ni̱ gananun ruhuâ Pedro nej nuguanꞌ nânj ni̱ gayiꞌì sôꞌ ni̱ ûta gudugueꞌe sôꞌ.