Ganaꞌnïnꞌ Ma̱ꞌan Jesús dakó nej sôꞌ gaꞌnaꞌ ga̱huin chru̱n riñanj
13
Nga nï̀nꞌ gàchin gùyùmàn giꞌñanj pascua,
ni̱ niꞌin Ma̱ꞌan Jesús si gàꞌ guyumân orâ gudunâj Ma̱ꞌan yumiguì nânj ni̱ naꞌanj ñan nne Ma̱ꞌan Rê Ñaꞌanj an,
dàj rûnꞌ ꞌì ruhuâ Ma̱ꞌan niꞌin nej sí ginikaj duguiꞌ nngaj ruhuâ yumiguì nânj,
ni̱ huê danj ga ꞌì ruhuâj niꞌin nej sij nda aꞌngô rïn gui gane riñan hioꞌóo nânj.
2 Ni̱ nga gahuin stiꞌnï̀n nej sij,
ni̱ gàꞌ giꞌhiaj sa nàsàꞌa si ganï̂n ruhuâ nimân Judas Iscariote,
sôꞌ huin daꞌní Simón,
guendâ nàgàꞌhuìꞌ sôꞌ Ma̱ꞌan riñan nej sí fariseo.
Jesús lava los pies de los discipulos (Juan 13.1-17)
3 Ni̱ niꞌin Ma̱ꞌan Jesús si gàꞌ nagaꞌhuiꞌ Ma̱ꞌan Re Ñaꞌanj an daranꞌ nej sa màn ruhuâ yumiguìi riñanj,
ni̱ gàꞌ niꞌin si gahui gaꞌnaj ñan nne Ma̱ꞌan Ñaꞌanj an,
ni̱ niꞌin hueꞌej si na̱nꞌ ñunj ñan nne Ma̱ꞌan Ñaꞌanj an,
4 ni̱ nga mân nej sij gahuin stiꞌnï̀n nej sij ni̱ ganayumàn Ma̱ꞌan Jesús,
ni̱ guxunj atsîj ni̱kej,
ni̱ gidaꞌa ꞌngo̱ toaya,
ni̱ gumin gatïnj.
5 Ni̱ gaꞌnïn nnee ruhuâ ꞌngo̱ rago̱ꞌo,
ni̱ gayi̱ꞌij ni̱ ganaꞌnïnj dakó nej sí ꞌna̱ꞌ ga̱huin chru̱n riñanj,
ni̱ neꞌ rùkù ni̱ gidaꞌa toaya ànùmin gatïnj ni̱ duna̱koj dakó nej sôꞌ.
6 Hiôꞌ ni̱ gaꞌnaj riñan Simón Pedro;
ni̱ nga giniꞌin sôꞌ gaꞌnaj riñan sôꞌ ni̱ gataj sôꞌ gu̱nïn:
—Señor.
Sòꞌ gànàꞌnï̀nꞌ dakó nanj nîꞌ.
7 Nanikàj Ma̱ꞌan Jesús ni̱ gata:
—Sa giꞌhiâ ni̱ si̱ gaꞌhue ga̱ra̱n daꞌnga ruhuâꞌ hia̱j mánj;
sani̱ neꞌ rùkù ni̱ ga̱ꞌhue ga̱ra̱n daꞌngaꞌ ruhuâꞌ na̱nj ánj.
8 Ni̱ gataj Pedro:
—Nitaj àmàn huaj gànàꞌnï̀nꞌ rèꞌ dakô mánj.
Nanikàj Ma̱ꞌan Jesús ni̱ gata:
—Sisi̱ si̱ gaꞌhuej gànàꞌnï̀nj dakót,
ni̱ si̱ gaꞌhue gi̱nikaj duguiꞌ ngàj mánj.
9 Ni̱ gataj Simón Pedro:
—Señor,
sê man ꞌngo̱ rïn dakó gànàꞌnï̀nꞌ Ma̱ꞌân rèꞌ mánj,
gànàꞌnï̀nꞌ Ma̱ꞌân rèꞌ raꞌá ngà ahuí nej nanj ánj.
10 Ni̱ gataj Ma̱ꞌan Jesús:
—Sa gàꞌ ganaruhui,
ni̱ nitaj si huaj gànàꞌnï̀nꞌ mánj,
dadinꞌ sa hua̱ ga̱na̱ru̱hui̱ huin dakót,
dadinꞌ daranꞌ nneè kút ni̱ hua̱ sàꞌ man;
ni̱ gàꞌ hua̱ sàꞌ nej suj,
nùnj huin si sê daranꞌ nej suj hua sàꞌ mánj.
11 Dadinꞌ gàꞌ niꞌin Ma̱ꞌan Jesús ahuin sôꞌ nàgàꞌhuìꞌ Ma̱ꞌan;
rayiꞌî dânj gata:
“Sê daranꞌ nej suj hua sàꞌ mánj.”
12 Huê danj ni̱,
neꞌ rùkù nga gisîj ganaꞌnïnꞌ Ma̱ꞌan Jesús dakó nej sí ꞌna̱ꞌ ga̱huin chru̱n riñanj,
ni̱ gunutaj atsîj ni̱kej yichra,
ni̱ gaꞌanj ga̱ne yiꞌnḯn mesa,
ni̱ gata:
—Garânj daꞌngaꞌ ruhuâ nej suj sa giꞌhiâ ngà nej suj nîꞌ.
13 Maestrû huín,
ni̱ Señor huín taj nej suj;
ni̱ dùgùnàj gataj nej suj,
dadinꞌ huê danj huin yàngàꞌ.
14 Dadinꞌ si ñùnj,
ni̱ huín Señor ni̱ huín Maestrû,
ni̱ ganaꞌnḯn dakó nej suj,
ni̱ huê danj ni̱ gànàꞌnï̀nꞌ nej suj dakó daꞌ goꞌngo̱ nej suj.
15 Dadinꞌ huê danj gàꞌ gidigán riñan nej suj,
ni̱ huê dàj rûnꞌ giꞌhiâ,
ni̱ huê danj gi̱ꞌhiaj nej suj.
16 Yàngàꞌ ni̱ yàngàꞌ hia nï̀nꞌ tâ:
Dadinꞌ sí huin musu ni̱ sê si̱ huin sôꞌ doj gàꞌ daꞌ si-yi̱ruꞌhue sôꞌ mánj,
ni̱ sí gaꞌanj ꞌngo̱ suun ni̱ sê si huin sôꞌ doj gàꞌ daꞌ sí gaꞌnḯn gaꞌanj sô sun dânj mánj.
17 Ni̱ si niꞌin nej suj si dànanj daꞌhui nej suj gi̱ꞌhiaj nej suj,
ni̱ ga̱na̱huin nìhiàꞌ ruhuâ nej suj si huê dànanj dagahuin nej suj.
18 ’Sê daranꞌ nej suj huin sa niꞌín aꞌmînj mánj;
gàꞌ niꞌín ahuin nej suj ganaguîj;
sani̱ guendâ gìsìj sa taj riñan ñanj si-nùguànꞌ Ma̱ꞌan Ñaꞌanj an:
“Ni̱ sí yâ rachrúun ngàj,
ni̱ sôꞌ huin sí nànìkàj gata rùhuà ñùnj.”
Jesús predice la traición (Juan 13.18-38)
19 Ni̱ nga nï̀nꞌ gàchin gìsìj nej nuguanꞌ nânj ni̱ ga̱ꞌ gata si huê dànanj ga̱huin,
ni̱ gùyùmàn ruhuâ nej suj niꞌin nej suj si hué huin.
20 Yàngàꞌ ni̱ yàngàꞌ hia nï̀nꞌ tâ:
Ni̱ sí ganahuin ra̱ꞌa sí gaꞌnï̂n gaꞌanj,
ni̱ ñùnj ganahuin ra̱ꞌa sôꞌ;
ni̱ sí ganahuin ra̱ꞌa ñùnj,
ni̱ ganahuin ra̱ꞌa sôꞌ Ma̱ꞌan sa gaꞌnḯn gaꞌná.
Gataj Ma̱ꞌan Jesús si Judas huin sí nàgàꞌhuìꞌ Ma̱ꞌan riñan nej rej
21 Ni̱ nga gisîj gaꞌmin Ma̱ꞌan Jesús nej nuguanꞌ nânj,
ni̱ ûta gananï̂n ruhuâj ni̱ ûta gahuin rùguìꞌi ruhuâj ngà nda ruhuâ nimanj ni̱ ganataj ni̱ gata:
—Yàngàꞌ ni̱ yàngàꞌ hia nï̀nꞌ tâ,
ni̱ ꞌngo̱ nej suj huin sí nàgàꞌhuìꞌ ñùnj.
22 Hiôꞌ ni̱ giniꞌhiaj daꞌ goꞌngo̱ nej sí ꞌna̱ꞌ gahuin chru̱un riñan daꞌ goꞌngo̱ nej duguiꞌ nej sôꞌ,
ni̱ guruguiꞌ chìꞌ ruhuâ nej sôꞌ ahuin goꞌngo̱ nej sôꞌ huin niꞌin Ma̱ꞌan Jesús nga gaꞌmin dànanj.
23 Ni̱ yiꞌñanj Ma̱ꞌan Jesús,
nnûn ahui ꞌngo̱ sí ꞌì ruhuâ niꞌin Ma̱ꞌan.
24 Ni̱ riñan sí nânj,
giꞌhiaj ra̱ꞌa Pedro,
si gàchìnj naꞌanj sôꞌ,
ahuin sí ràyìꞌì huin gaꞌmin Ma̱ꞌan Jesús.
25 Hiôꞌ ni̱ gachín naꞌanj sí nnùn ahui yiꞌñanj Ma̱ꞌan Jesús,
ni̱ gataj sôꞌ:
—Señor,
ahuin sôꞌ huîn ràꞌaj.
26 Nanikàj Ma̱ꞌan Jesús ni̱ gata:
—Sí ra̱ꞌa gàꞌhuìj rachrún duguchrêj sí dânj huin.
Ni̱ duguchre Ma̱ꞌan Jesús rachrúun,
ni̱ gaꞌhuij raꞌa Judas Iscariote sí huin daꞌní síchìj gùꞌnàj Simón Iscariote.
27 Ni̱ neꞌ rùkù nga gisîj ya sôꞌ rachrúun,
ni̱ gatûj sichre ruhuâ nimân sôꞌ.
Hiôꞌ ni̱ gataj Ma̱ꞌan Jesús gu̱nïn sôꞌ:
—Sa gi̱ꞌhiáꞌ,
ni̱ râꞌñanj gi̱ꞌhiáꞌ râj.
28 Sani̱ gàꞌ si ꞌngo̱ nej sí nne yiꞌnḯn mesa ngà Ma̱ꞌan Jesús nun ga̱ꞌhue ga̱ra̱nꞌ daꞌngaꞌ ruhuâ nùnj huin saj ni̱ gataj Ma̱ꞌan Jesús dànanj.
29 Dadinꞌ da̱ꞌa̱j nej sôꞌ ganï̂n ruhuâ,
si rayiꞌî guendâ ni̱ka̱j Judas sanꞌanj an ni̱ ga̱ꞌa̱nj gi̱ra̱n sôꞌ sa gi̱ni̱ꞌña̱nj nej sij giꞌñanj an;
nej si gàꞌhuìꞌ sôꞌ do̱j sanꞌanj an raꞌa nej guiì ga̱ni̱ki.
30 Ni̱ nga gisîj ya sôꞌ rachrúun,
ni̱ gahui sôꞌ ni̱ gaꞌanj sôꞌ;
ni̱ gàꞌ gahuin ru̱mi̱nꞌ.
Su̱n nàkà giyiꞌnïnꞌ su̱n
31 Hiôꞌ ni̱ nga gahui Judas gaꞌanj sôꞌ,
ni̱ gataj Ma̱ꞌan Jesús:
—Hia̱j ni̱ na̱gi̱ꞌhiaj yàchìj Ma̱ꞌan Ñaꞌanj an ñùnj,
ni̱ na̱gi̱ꞌhiaj yàchì rayiꞌî Ma̱ꞌan Ñaꞌanj an.
32 Ni̱ si ñùnj giꞌhiaj ni̱ gaꞌmin hueꞌê nej guiì rayiꞌî Ma̱ꞌan Ñaꞌanj an,
ni̱ huê danj na̱nj gaꞌmin hueꞌê Ma̱ꞌan Ñaꞌanj an rayiꞌí riñan nej guiì,
ni̱ ûta râꞌñanj ni̱ ga̱ꞌmin hueꞌê Ma̱ꞌan Ñaꞌanj an rayiꞌí.
33 Nej suj daꞌninj lij,
hua̱ na̱nj gané doj sînj ngà nej suj.
Ni̱ nànàꞌhuìꞌ nej suj ñùnj;
sani̱ dàj rûnꞌ gatâ gu̱nïn nej judío,
ni̱ huê danj ga̱ta̱ gunïn nej suj hia̱j:
Ñan gàꞌàn,
ni̱ si̱ gaꞌhue ga̱ꞌa̱nj nej suj mánj.
34 Ni̱ gìyìꞌnï̀nꞌ ꞌngo̱ sun nàkàa giꞌhiâ riñan nej suj:
Ga̱ ꞌì ruhuâ nej suj niꞌin nej suj daꞌ goꞌngo̱ nej duguiꞌ nej suj;
dàj rûnꞌ ga ꞌì ruhuâj niꞌín nej suj,
ni̱ huê danj ga̱ ꞌì ruhuâ nej suj niꞌin nej suj daꞌ goꞌngo̱ nej duguiꞌ nej suj.
35 Ni̱ si ꞌì ruhuâ nej suj niꞌin nej suj daꞌ goꞌngo̱ nej duguiꞌ nej suj hiôꞌ ni̱ ga̱huin nej suj sí ꞌna̱ꞌ ga̱huin chru̱n riñânj.
Gàꞌ niꞌin Ma̱ꞌan Ma̱ꞌan Jesús si ga̱ta̱j Pedro si nun niꞌin sôꞌ Ma̱ꞌan
36 Ni̱ gataj Simón Pedro:
—Señor,
dànèꞌ ga̱ꞌa̱nj Ma̱ꞌân rèꞌ ràꞌaj.
Nanikàj Ma̱ꞌan Jesús ni̱ gata:
—Ñan gàꞌàn,
ni̱ si̱ gaꞌhue ga̱ꞌa̱njꞌ ngàj hia̱j mánj;
sani̱ neꞌ rùkù ni̱ ga̱ꞌhue gùchìꞌ râj.
37 Ni̱ gataj Pedro:
—Señor.
Nùnj huin saj ni̱ si̱ gaꞌhue gàꞌàn ngà Ma̱ꞌân rèꞌ hia̱j ràꞌaj.
Ga̱ꞌhue gàhuìj rayiꞌî Ma̱ꞌân rèꞌ na̱nj ánj.
38 Nanikàj Ma̱ꞌan Jesús ni̱ gata:
—Ga̱ꞌhue gàhuìꞌ rayiꞌí na̱nj nîꞌ.
Yàngàꞌ ni̱ yàngàꞌ hia nï̀nꞌ tâ:
Ni̱ nga nï̀nꞌ gàchin ga̱gua̱j dêꞌlo̱j o,
ni̱ gàꞌ gisîj huàꞌnï̀nj ga̱ta̱jꞌ si nun niꞌînꞌ ñùnj.