Jesús huin chrej e guendâ ga̱ꞌhue gùchìꞌ ñan nne Ma̱ꞌan Ñaꞌanj an
14
’Ni̱ si ga̱huin chìꞌ ruhuâ nimân nej suj mánj;
gùyùmàn ruhuâ nej suj niꞌin nej suj Ma̱ꞌan Ñaꞌanj an,
ni̱ gùyùmàn ruhuâ nej suj niꞌin nej suj ñùnj.
2 Ñan nne dukuâ Ma̱ꞌan Rê Ñaꞌanj an ni̱ ûta gàꞌì hueꞌe mân;
ni̱ si̱ sê danj huaj,
ni̱ gàꞌ gatâ sa áj;
gàꞌàn hiôꞌ ni gi̱ꞌhiaj yuguí ñan ga̱ne nej suj.
El único camino a Dios (Juan 14.1-14)
3 Ni̱ asàꞌ gaꞌan,
ni̱ gi̱ꞌhiaj yu̱guí ꞌngo̱ lugâ,
ni̱ ga̱ꞌna̱ꞌ ñún,
ni̱ gànàkà nej suj huin si-nùhuìj,
ni̱ ñan gané,
ni̱ hiuj dânj ga̱ne nej suj.
4 Ni̱ gi̱ni̱ꞌin nej suj ñan gàꞌàn,
ni̱ gi̱ni̱ꞌin nej suj chrej e.
5 Ni̱ gataj Tomás:
—Señor,
nun niꞌin nej ñûnj dànèꞌ gaꞌanj Ma̱ꞌân rèꞌ mánj;
dàj gi̱ꞌhiaj nej ñûnj,
gi̱ni̱ꞌin nej ñûnj,
chrej ga̱ꞌa̱nj Ma̱ꞌân rèꞌ ràꞌaj.
6 Gataj Ma̱ꞌan Jesús:
—Ñùnj huin chrej e,
ni̱ hué huin sa yàngàꞌa,
ni̱ hué huin sa gi̱ꞌhiaj ga̱na̱huin nìꞌnàꞌ nej guiì;
ni̱ gàꞌ si ꞌngo̱ nej guiì si̱ gaꞌhue gùchìꞌ ñan nne Ma̱ꞌan Rê,
si nuhuí gi̱ꞌhiaj mánj.
7 Si giniꞌin nej suj ñùnj,
ni̱ gàꞌ giniꞌin nej suj Ma̱ꞌan Rê Ñaꞌanj an;
ni̱ àsìj gui hia̱j ni̱ gàꞌ giniꞌin nej suj Ma̱ꞌan na̱nj ánj.
8 Ni̱ gataj Felipe:
—Señor,
gi̱di̱gân sòꞌ dàj hua Ma̱ꞌan Reꞌ Ñaꞌanj an,
ni̱ nitaj si gi̱ꞌhiaj nej ñûnj gàchìnj naꞌanj nej ñûnj sòꞌ gàꞌ mánj.
9 Nanikàj Ma̱ꞌan Jesús ni gata:
—Felipe ûta gàꞌì gui gané ngà nej suj,
ni̱ hua̱ na̱nj nun niꞌin nej suj ñùnj ûnꞌ.
Ni̱ guiì giniꞌin ñùnj,
ni̱ gàꞌ giniꞌin ninj Ma̱ꞌan Rê Ñaꞌanj an;
nùnj huin saj ni̱ gatajꞌ:
Gi̱di̱gân sòꞌ Ma̱ꞌan Reꞌ Ñaꞌanj an riñan nej ñûnj.
10 Nun niꞌînꞌ si huín ngà Ma̱ꞌan Re Ñaꞌanj an,
ni̱ nne Ma̱ꞌan Re Ñaꞌanj an ngàj ràꞌ saj ûnꞌ,
nej nuguanꞌ gaꞌmînj,
ni̱ sê si̱ gaꞌmînj guendâ Maꞌán mánj,
dadinꞌ Ma̱ꞌan Re Ñaꞌanj an nne ngàj,
huin sa giꞌhiaj nej sa sàꞌaj na̱nj ánj.
11 Gùyùmàn ruhuâ nej suj si nne Ma̱ꞌan Re Ñaꞌanj an ngàj ni̱ nné ngà Ma̱ꞌan;
ni̱ si naꞌhue gùyùmàn ruhuâ nej suj niꞌin nej suj ñùnj ni̱ gùyùmàn ruhuâ nej suj rayiꞌî nej sa sàꞌ giꞌhiâ.
12 Yàngàꞌ ni̱ yàngàꞌ hiaꞌ nï̀nꞌ tâ:
Guiì guyumân ruhuâ niꞌin ñùnj:
Ni̱ dàj rûnꞌ giꞌhiâ nej sa sàꞌa,
ni̱ huê danj gi̱ꞌhiaj ninj;
ni̱ dànanj hua̱j doj ga̱ nej sa sàꞌ gi̱ꞌhiaj ninj gàꞌ daꞌ ñùnj,
dadinꞌ gàꞌàn ñan nne Ma̱ꞌan Re Ñaꞌanj an.
13 Ni̱ daranꞌ nej sa gàchìnj nej suj riñan Ma̱ꞌan Re Ñaꞌanj an ngà siyu̱guí,
ni̱ rìkìj ni̱ ga̱ꞌmi̱n hueꞌê nej guiì rayiꞌí ni̱ huê danj na̱nj ga̱ꞌmi̱n hueꞌê ninj rayiꞌî Ma̱ꞌan Re Ñaꞌanj an.
14 Ni̱ si gàchìnj nej suj ngà siyu̱guí ni̱ rìkìj sa gàchìnj nej suj.
Gataj Ma̱ꞌan Jesús si ga̱ꞌnïn ga̱ꞌna̱ꞌ Ma̱ꞌan Espíritu Santo
15 ’Ni̱ si ꞌì ruhuâ nej suj niꞌin nej suj ñùnj,
ni̱ da̱gahuin nej suj sun gaꞌnïnꞌ sùnj riñan nej suj.
Jesús habla del Espíritu Santo (Juan 14.15-31)
16 Ni̱ gàchìnj niꞌhiâ riñan Ma̱ꞌan Rê,
ni̱ ri̱ki̱ Ma̱ꞌan sa Na̱gi̱ꞌhiaj nùkuaj ruhuâ nej suj,
hiôꞌ ni̱ ga̱ne ngà nej suj nìgànj nï̀nꞌ:
17 Ma̱ꞌan Espíritu yàngàꞌa,
ni̱ si̱ gaꞌhue ga̱na̱huin ra̱ꞌa nej guiì màn ruhuâ yumiguìi Ma̱ꞌan mánj,
dadinꞌ nun niꞌin ninj dàj huaj,
sani̱ nej suj ni̱ niꞌin nej suj Ma̱ꞌan,
dadinꞌ nne ngà nej suj,
ni̱ nne ruhuâ nimân nej suj.
18 Ni̱ si̱ gudunâj ga̱ni̱kí nej suj mánj;
gàꞌnàj ñan nne nej suj.
19 Do̱j nï̀nꞌ gui,
ni̱ si̱ giniꞌin nej guiì màn ruhuâ yumiguìi nânj ñùnj mánj;
sani̱ nej suj ni̱ gi̱ni̱ꞌin nej suj ñùnj;
dadinꞌ hua̱ nìꞌnàj,
ni̱ rayiꞌî dan ni̱ hua̱ nìꞌnàꞌ nej suj.
20 Gui dânj ni̱ gi̱ni̱ꞌin nej suj si nné ngà Ma̱ꞌan Rê,
ni̱ nne nej suj ngàj,
ni̱ nné ngà nej suj.
21 Guiì ni̱ka̱j si-nùguànꞌànj,
ni̱ dagahuin ninj,
ni̱ guiì dânj huin sa ꞌì ruhuâ niꞌin ñùnj;
ni̱ ga̱ ꞌì ruhuâ Ma̱ꞌan Rê Ñaꞌanj an niꞌin ninj ni̱ huê danj ga̱ ꞌì ruhuâj niꞌín ninj,
ni̱ gi̱di̱gân Maꞌán riñan ninj.
22 Ni̱ gataj Judas Tadeo:
—Señor.
Nùnj huin saj ni̱ man riñan nej ñûnj gi̱di̱gân rèꞌ Maꞌân rèꞌ,
ni̱ si̱ gidigân rèꞌ Ma̱ꞌan rèꞌ riñan nej guiì màn ruhuâ yumiguìi ràꞌaj.
23 Nanikàj Ma̱ꞌan Jesús ni̱ gata:
—Si hua̱ ꞌngo̱ guiì ꞌì ruhuâ niꞌin ñùnj,
ni̱ dagahuin ninj si-nùguànꞌànj;
ni̱ ga̱ ꞌì ruhuâ Ma̱ꞌan Rê niꞌin ninj,
ni̱ ga̱ꞌna̱ꞌ nej ñûnj,
ni̱ ga̱ne nej ñûnj ngà ninj.
24 Nej guiì nitaj si ꞌì ruhuâ niꞌin ñùnj,
ni̱ nitaj si dagahuin ninj si-nùguànꞌànj;
dadinꞌ nej nuguanꞌ gunïn ninj gaꞌmînj ni̱ sê si-nùguànꞌànj huin mánj,
si-nùguànꞌ Ma̱ꞌan Rê Ñaꞌanj an huin dadinꞌ huej gaꞌnḯn gaꞌná.
25 ’Huê nej nuguanꞌ nânj gaꞌmînj ngà nï̀nꞌ nné ngà nej suj.
26 Sani̱ Ma̱ꞌan sa Na̱gi̱ꞌhiaj nùkuaj ruhuâ nej suj,
huej huin Ma̱ꞌan Espíritu Santo,
ni̱ ngà siyu̱guí gaꞌnḯn Ma̱ꞌan Rê Ñaꞌanj an gaꞌnaj,
ni̱ huê Ma̱ꞌan huin sa gi̱di̱gân daranꞌ nuguanꞌ sàꞌaj riñan nej suj,
ni̱ du̱nanunj ruhuâ nej suj daranꞌ nej nuguanꞌ gaꞌmînj riñan nej suj.
27 ’Ni̱ gu̱du̱na sa dïnꞌïnj dânj riñan nej suj,
ni̱ sa dïnꞌïnj dânj huin siꞌhiâ ni̱ rìkìj riñan nej suj;
ni̱ si rikîj dàj rûnꞌ riki yumiguìi mánj.
Ni̱ si̱ guruguiꞌ chìꞌ ruhuâ nimân nej suj,
ni̱ si̱ guyuꞌhuiꞌ nej suj mánj.
28 Ga̱ꞌ gunïn nej suj dàj gatâ:
Gàꞌàn,
sani̱ ga̱ꞌna̱ꞌ ñûn ni̱ gané ngà nej suj.
Ni̱ si ꞌì ruhuâ nej suj niꞌin nej suj ñùnj,
hiôꞌ ni̱ ga̱na̱huin nìhiàꞌ ruhuâ nej suj niꞌin nej suj ñùnj.
29 Sani̱ nga nï̀nꞌ ga̱chin ga̱huin ni̱ gàꞌ gatâ,
hiôꞌ ni̱ nga gahuin dàj rûnꞌ gatâ,
hiôꞌ ni̱ gùyùmàn ruhuâ nej suj.
30 ’Si̱ gaꞌmin ni̱kó ngà nej suj gàꞌ mánj;
dadinꞌ ꞌna̱ꞌ sí aꞌnïnꞌ ni̱ka̱j su̱n nne ruhuâ yumiguì nânj,
sani̱ nitaj si ni̱ka̱j su̱n sôꞌ riñânj.
31 Sani̱ guendâ gi̱ni̱ꞌin nej guiì màn ruhuâ yumiguìi si ꞌì ruhuâj niꞌín Ma̱ꞌan Rê Ñaꞌanj an,
ni̱ dàj rûnꞌ gaꞌnïnj suun riñânj nga gaꞌná,
ni̱ huê danj giꞌhia.
Gànàyùmàn nej suj,
ni̱ ga̱ꞌa̱nj nêꞌ.