Jesús huin chrun uba yàngàꞌa
15
’Ñùnj huin chrun uba yàngàꞌa,
ni̱ Ma̱ꞌan Rê Ñaꞌanj an huin sa giꞌhiaj sun ngàj.
2 Ni̱ si hua̱ ꞌngo̱ raꞌa chrun nnùn riñânj nitaj si gahiu chruj uba,
ni̱ ga̱ꞌne̱ Ma̱ꞌan Reꞌ Ñaꞌanj an riñânj;
sani̱ si ga̱hiu chruj uba raꞌa chrun nnùn riñanj ni̱ na̱gi̱ꞌhiaj sàꞌaj doj,
daꞌnga ni̱ gahiu doj uba.
La vid y las ramas (Juan 15.1-17)
3 Ni̱ gàꞌ ganahuin hueꞌê nej suj rayiꞌî nej nuguanꞌ gaꞌmînj riñan nej suj.
4 Daranꞌ diû gi̱nikaj duguiꞌ nej suj ngàj,
hiôꞌ ni̱ gi̱nikaj duguiꞌí ngà nej suj.
Dàj rûnꞌ raꞌa ꞌngo̱ chrun uba ni̱ si̱ gaꞌhue ga̱hiu chruj uba raꞌa,
si nitaj si nnunj riñan chrun uba mánj,
ni̱ huê danj na̱nj nej suj ni̱ si̱ gaꞌhue giꞌhiaj nej suj sa sàꞌa,
si nitaj si ni̱ka̱j duguiꞌ nej suj ngàj daranꞌ diû mánj.
5 ’Ñùnj huin chrun uba,
ni̱ nej suj huin chrun raꞌá;
ni̱ guiì ni̱ka̱j duguiꞌ ngàj daranꞌ diû ni̱ gi̱nikaj duguiꞌí ngà ninj,
guiì nânj ga̱ꞌhue gi̱ꞌhiaj ûta nìko sa sàꞌaj;
dadinꞌ si nitaj si ni̱ka̱j duguiꞌí ngà nej suj ni̱ nitaj nùnj ga̱ꞌhue gi̱ꞌhiaj nej suj mánj.
6 Guiì nitaj si ni̱ka̱j duguiꞌ ngàj,
ni̱ gi̱ꞌhiaj anê ninj riñânj dàj rûnꞌ gaꞌneꞌ nej sij chrun nitaj si gahiu chruj uba,
ni̱ ganako̱ man;
ni̱ ga̱na̱ranꞌ nej guiì,
ni̱ ga̱ꞌnï̱nj ninj riñan ñaꞌaan ni̱ ga̱ka̱ man.
7 ’Ni̱ si ni̱ka̱j duguiꞌ nej suj ngàj,
ni̱ ni̱ka̱j duguiꞌ si-nùguànꞌànj ngà nej suj,
ni̱ gàchìnj nej suj riñânj daranꞌ sa garanꞌ ruhuâ nej suj ni̱ rìkìj ga̱na̱huin ra̱ꞌa nej suj.
8 Ni̱ si ûta giꞌhiaj nej suj sa sàꞌa ni̱ ûta ga̱ꞌmi̱n hueꞌê nej guiì rayiꞌî Ma̱ꞌan Rê Ñaꞌanj an,
ni̱ ga̱ꞌhue ga̱huin nej suj guiì gi̱nikòꞌ rukû Maꞌán.
9 Dàj rûnꞌ ga ꞌì ruhuâ Ma̱ꞌan Rê Ñaꞌanj an niꞌin ñùnj,
ni̱ huê danj ga ꞌì ruhuâj niꞌín nej suj;
ni̱ dàj rûnꞌ ga ꞌì ruhuâj niꞌín nej suj ni̱ huê danj ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj.
10 Si da̱gahuin nej suj sun giyiꞌnïnꞌ giꞌhiâ riñan nej suj,
ni̱ daranꞌ diû ga̱ ꞌì ruhuâj niꞌín nej suj;
dàj rûnꞌ ꞌì ruhuâ Ma̱ꞌan Rê Ñaꞌanj an niꞌin ñùnj,
dadinꞌ dagahuín daranꞌ sun gaꞌnïnꞌ su̱nj riñânj.
11 ’Huê nej nuguanꞌ nan gaꞌmînj,
daꞌnga ni̱ ga̱na̱huin nìhiàꞌ ruhuâ nej suj ngàj,
ni̱ ûta ga̱na̱huin nìhiàꞌ ruhuâ nej suj.
12 Huê nan huin sun gaꞌnïnꞌ su̱nj riñan nej suj:
Ni̱ ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj,
dàj rûnꞌ giꞌhiâ ga̱ ꞌì ruhuâj niꞌín nej suj.
13 Si ꞌngo̱ síi ga ruhuâ gahuiꞌ rayiꞌî ꞌngo̱ sí ni̱ka̱j duguiꞌ ngà sôꞌ,
ni̱ si ꞌì staꞌu ruhuâ sôꞌ niꞌin sôꞌ sí danj rayiꞌî dan giꞌhiaj sôꞌ dànanj.
14 Ni̱ nej suj huin guiì ni̱ka̱j duguiꞌ ngàj,
si dagahuin nej suj sun gaꞌnïnꞌ sùnj riñan nej suj.
15 Ni̱ si̱ gatâ si huin nej suj musu gàꞌ mánj,
dadinꞌ guiì huin musu ni̱ nun niꞌin ninj sa giꞌhiaj si-yi̱ruꞌhue ninj mánj;
ni̱ gàtà si huin nej suj guiì ni̱ka̱j duguiꞌ ngàj,
dadinꞌ daranꞌ nej nuguanꞌ gunḯn gataj Ma̱ꞌan Rê,
ni̱ nadigán riñan nej suj.
16 Sê nej suj huin sa ganagui ñùnj mánj,
ñùnj huin sa ganagui nej suj,
ni̱ duguta sùnj si ga̱ꞌa̱nj nej suj ni̱ ûta gi̱ꞌhiaj nej suj sa sàꞌaj,
ni̱ nìgànj nï̀nꞌ ga̱ sa sàꞌ dânj gi̱ꞌhiaj nej suj;
hiôꞌ ni̱ daranꞌ sa gàchìnj nej suj riñan Ma̱ꞌan Rê Ñaꞌanj an ngà siyu̱guí,
ni̱ rìkìj sa gàchìnj nej suj na̱nj ánj.
17 Huê dànanj,
gaꞌnïnꞌ sùnj riñan nej suj:
Ni̱ ga̱ ꞌì ruhuâ nej suj niꞌin nej suj ꞌngo̱ ni̱ aꞌngô nej duguiꞌ nej suj.
Gininj ꞌì Ma̱ꞌan Jesús ngà nej guiì nìkòꞌ rukuj riñan nej guiì nitaj si dagahuin riñan Ma̱ꞌan Ñaꞌanj an
18 ’Ni̱ si gininj ꞌì nej suj riñan nej guiì nàsìnùnj un,
ni̱ ga̱ya̱ka̱j guendâ nej suj si gàꞌ si̱nï̱n ñùnj gininj ꞌì riñan ninj gàꞌ da̱ꞌ nej suj na̱nj ánj.
Jesús advierte sobre la persecución (Juan 15.18-16.4)
19 Ni̱ si huin nej suj dàj rûnꞌ huin nej guiì màn ruhuâ yumiguìi,
hiôꞌ ni̱ ga̱ ꞌì ruhuâ ninj niꞌin ninj nej suj dàj rûnꞌ ꞌì ruhuâ ninj niꞌin ninj nej duguiꞌ ninj;
sani̱ ñan nitaj si huin nej suj dàj rûnꞌ huin nej guiì nânj,
dadinꞌ gàꞌ ganaguîj nej suj siganï̂nj nej guiì nàsìnùnj un,
ni̱ rayiꞌî dan ni̱ gininj ꞌì nej suj riñan ninj.
20 Ga̱na̱nun ruhuâ nej suj niꞌin nej suj nej nuguanꞌ gaꞌmînj riñan nej suj:
“Gàꞌ si ꞌngo̱ musu ni̱ sê si̱ huin sôꞌ doj gàꞌ daꞌ si-yi̱ruꞌhue sôꞌ mánj.”
Ni̱ si gata rùhuà nej sij ñùnj,
ni̱ huê danj ga̱ta̱ rùhuà nej sij nej suj;
si dagahuin nej suj si-nùguànꞌànj,
ni̱ nga gaꞌmin nej suj riñan nej sij ni̱ da̱gahuin nej sij si-nùguànꞌ nej suj.
21 Sani̱ huê dànanj gi̱ranꞌ sa̱ñu̱n nej suj rayiꞌí gi̱ꞌhiaj nej sij,
dadinꞌ nun niꞌin nej sij Ma̱ꞌan sa gaꞌnḯn gaꞌná mánj.
22 ’Si nuhuiꞌ si gaꞌná,
ni̱ nuhuiꞌ si gaꞌmînj si-nùguànꞌ Ma̱ꞌan Ñaꞌanj an riñan nej sij,
hiôꞌ ni̱ nitaj gakï̱nꞌïn hua̱ riñan nej sij saj mánj,
sani̱ hia̱j ni̱ nitaj sa gìrìꞌ nej sij ga̱chru̱n nej sij rayiꞌî si-ga̱kïnꞌ nej sij gàꞌ mánj.
23 Si gininj ꞌìj riñan nej guiì,
ni̱ huê danj na̱nj gi̱ni̱nj ꞌì Ma̱ꞌan Rê riñan ninj.
24 Ga̱ꞌ si ꞌngo̱ gakï̱nꞌïn nitaj si hua̱ riñan nej sij,
si nuhuiꞌ si giniꞌin nej sij giꞌhiâ ganahuin nej guiì siganï̂nj nej sij saj mánj,
dadinꞌ gàꞌ si ꞌngo̱ síi nun gi̱ꞌhia̱j nej sa giꞌhia mánj,
sani̱ ga̱ꞌ giniꞌin nej sij si ganahuin nej guiì giꞌhiâ,
sani̱ gàꞌ danj,
ni̱ hua̱ na̱nj gininj ꞌìj riñan nej sij ni̱ huê danj na̱nj gininj ꞌì Ma̱ꞌan Rê riñan nej sij.
25 Sani̱ huê dànanj ga̱huin daꞌnga ni̱ gisij nuguanꞌ nnùn riñan ñanj si-nùguànꞌ Ma̱ꞌan Ñaꞌanj an:
“Nitaj gàꞌ si ꞌngo̱ sa yiꞌìi giꞌhiâ riñan nej sij sani̱ gininj ꞌìj riñan nej sij.”
26 ’Sani̱ nga ga̱ꞌna̱ꞌ Ma̱ꞌan sa Na̱gi̱ꞌhiaj nùkuaj ruhuâ nej suj,
ni̱ nne ngà Ma̱ꞌan Rê Ñaꞌanj an ni̱ gàꞌnï̀n ga̱ꞌna̱ꞌ Ma̱ꞌan riñan nej suj,
ni̱ huej huin Ma̱ꞌan Espíritu yàngàꞌa,
ni̱ huej huin sa ga̱na̱nï̱n riñan nej guiì rayiꞌí.
27 Ni̱ huê danj na̱nj ga̱na̱nï̱n nej suj rayiꞌí riñan aꞌngô nej guiì,
dadinꞌ àsìj nga gàyìꞌì sìnï̀nj gidigán si-nùguànꞌ Ma̱ꞌan Ñaꞌanj an ni̱ gàꞌ gane nej suj ngàj na̱nj ánj.