16
’Huê rayiꞌî nej nuguanꞌ nânj gaꞌmînj riñan nej suj,
daꞌnga ni̱ si̱ gu̱dunâj nej suj si gi̱nun ñan nej suj ñùnj.
2 Ni̱ gi̱ri̱ nej sij ruhuâ si-nùhuì nej sij nej suj;
ni̱ gùyùmàn ꞌngo̱ gui ni̱ si hua̱ ꞌngo̱ sí da̱gahuiꞌ ꞌngo̱ nej suj nìkòꞌ rukú,
ni̱ ga̱nï̱n ruhuâ sôꞌ si dagahuin nej sôꞌ riñan Ma̱ꞌan Ñaꞌanj an.
3 Ni̱ dànanj giꞌhiaj nej sôꞌ dadinꞌ nun niꞌin nej sôꞌ Ma̱ꞌan Rê ni̱ nun niꞌin nej sôꞌ ñùnj mánj.
4 Sani̱ huê dànanj gatâ,
hiôꞌ ni̱ nga gùyùmàn gui dânj riñan nej suj,
hiôꞌ ni̱ ga̱na̱nun ruhuâ nej suj si huê dànanj ga̱huin dadinꞌ gàꞌ danj gatâ riñan nej suj.
Sun giꞌhiaj Ma̱ꞌan Espíritu Santo
’Àsìj si̱nï̱ïn ni̱ nun gàtà nej nuguanꞌ nânj riñan nej suj,
dadinꞌ nï̀nꞌ nné ngà nej suj.
5 Sani̱ hia̱j ni̱ na̱ꞌa̱nj ñan nne Ma̱ꞌan sa gaꞌnḯn gaꞌná;
ni̱ gàꞌ si ꞌngo̱ nej suj nitaj si gachín naꞌanj:
Dànèꞌ ga̱ꞌa̱nj Ma̱ꞌân rèꞌ ràꞌaj.
Más enseñanza sobre el Espíritu Santo (Juan 16.5-33)
6 Sani̱ do̱ꞌ,
si gananï̂n ruhuâ nej suj,
rayiꞌî guendâ gatâ nej nuguanꞌ nânj riñan nej suj.
7 Sani̱ yàngàꞌ hia huin sa gatâ:
Sani̱ dùgùnàj huaj si gàꞌàn:
Dadinꞌ sisi̱ si̱ gaꞌân,
ni̱ si̱ gaꞌnaꞌ Ma̱ꞌan sa Na̱gi̱ꞌhiaj nùkuaj ruhuâ nej suj mánj;
sani̱ si gàꞌàn,
hiôꞌ ni̱ gàꞌnï̀n gàꞌnaj riñan nej suj.
8 Ni̱ nga ga̱ꞌna̱ꞌ Ma̱ꞌan sa Na̱giꞌhiaj nùkuaj ruhuâ nej guiì,
ni̱ gi̱ꞌhia si ga̱na̱ka̱j guendâ nej guiì rayiꞌî si-ga̱kïnꞌ ninj,
ni̱ giꞌhia si ga̱ dïnꞌïnj ruhuâ nej guiì giꞌhiaj sa ni̱ka̱a,
ni̱ hua̱ ni̱ña̱n si gànàchìnꞌ Ma̱ꞌan Ñaꞌanj an guenda riñan daꞌ goꞌngo̱ nej guiì.
9 Rayiꞌî gakï̱nꞌïn,
guendâ nun gùyùmàn ruhuâ ninj niꞌin ninj ñùnj;
10 rayiꞌî guiì giꞌhiaj sa ni̱ka̱a,
dadinꞌ gàꞌàn ñan nne Ma̱ꞌan Rê Ñaꞌanj an huê danj ni̱ si̱ giniꞌin nej suj ñùnj gàꞌ mánj.
11 Ni̱ gànàchìnꞌ Ma̱ꞌan Ñaꞌanj an guenda riñan sí huin ña̱n ni̱ka̱j su̱n ruhuâ yumiguì nânj dadinꞌ gàꞌ ganakaj guendâ Ma̱ꞌan rayiꞌî nej gakï̱nꞌ giꞌhiaj sôꞌ.
12 ’Hua̱ ûta gàꞌì nuguanꞌ gàtà gu̱nïn nej suj,
sani̱ si̱ gaꞌhue ga̱na̱chra sàꞌ nej suj daranꞌanj mánj.
13 Sani̱ nga ga̱ꞌna̱ꞌ Ma̱ꞌan Espíritu yàngàꞌa,
ni̱ Ma̱ꞌan huin sa gi̱di̱gân daranꞌ sa yàngàꞌa;
sani̱ sê guendâ Ma̱ꞌan huin sa ga̱ꞌmin mánj,
daranꞌ nej nuguanꞌ gunïn ni̱ huê nej nuguanꞌ dânj huin sa ga̱ꞌmin,
ni̱ ga̱na̱taj dàj ga̱huin nej gui ga̱ꞌna̱ꞌ neꞌ ña̱an na̱nj ánj.
14 Ni̱ Ma̱ꞌan huin sa ga̱ꞌmi̱n hueꞌê rayiꞌí;
dadinꞌ gi̱daꞌa nej nuguanꞌ niꞌín ni̱ gi̱di̱ganj riñan nej suj.
15 Daranꞌ nej sa hua̱ riñan Ma̱ꞌan Rê Ñaꞌanj an ni̱ siꞌhiâ huin nej sa hua̱ riñan Ma̱ꞌan;
rayiꞌî dan gatâ si gi̱daꞌa nej sa huin siꞌhiâ,
ni̱ nej sa huin siꞌhiâ ga̱na̱di̱ganj riñan nej suj.
Do̱j ga̱na̱nï̱n ruhuâ nej sij ni̱ neꞌ rùkù ni̱ ga̱na̱huin nìhiàꞌ ruhuâ nej sij
16 ’Ga̱chi̱n do̱j gui,
ni̱ si̱ giniꞌin nej suj ñùnj mánj;
sani̱ neꞌ rùkù doj,
ni̱ gi̱ni̱ꞌin ñûn nej suj ñùnj;
dadinꞌ gàꞌàn ñan nne Ma̱ꞌan Rê Ñaꞌanj an.
17 Hiôꞌ ni̱ gataj nej sí ꞌna̱ꞌ ga̱huin chru̱un gunïn ꞌngo̱ ni̱ aꞌngô nej duguiꞌ nej sôꞌ:
—Nùnj huin si ga̱ta̱j Ma̱ꞌan Jesús ruhuaj nga gata dànanj:
Do̱j nï̀nꞌ gui ni̱ si̱ giniꞌin nej suj ñùnj;
sani̱ neꞌ rùkù doj,
ni̱ gi̱niꞌin ñûn nej suj ñùnj;
dadinꞌ gàꞌàn ñan nne Ma̱ꞌan Rê.
18 Ni̱ gataj nej sôꞌ:
Nùnj huin si ga̱ta̱j Maꞌan ruhuaj nga gata:
“Do̱j gui.”
Ni̱ naꞌhue ga̱ra̱n daꞌngaꞌ ruhuôꞌ sa gaꞌmin gàꞌ ûnj.
19 Ni̱ niꞌin Ma̱ꞌan Jesús si gàchìnj naꞌanj nej sij ruhuâ nej sij,
ni̱ gata:
—Gachín naꞌanj nej suj siganï̂nj nej ma̱ꞌan nej suj rayiꞌî guendâ gatâ:
Do̱j gui ni̱ si̱ giniꞌin nej suj ñùnj,
ni̱ neꞌ rùkù doj,
ni̱ gi̱ni̱ꞌin nej suj ñùnj.
20 Yàngàꞌ ni̱ yàngà hia nï̀nꞌ gàtà,
ni̱ gu̱du̱gue̱ꞌe nej suj ni̱ ga̱gua̱j hia nej suj,
sani̱ nej guiì màn ruhuâ yumiguìi ni̱ dànanj ûta ganahuin nìhiàꞌ ruhuâ ninj;
sani̱ nùnj huin si ûta ga̱na̱nï̱n ruhuâ nej suj,
sani̱ sa gananîn ruhuâ nej suj dânj,
ni̱ nda nanè chre gi̱yi̱ꞌne,
ni̱ ga̱na̱huin nìhiàꞌ ruhuâ nej suj.
21 Nga ga̱ꞌnga̱ daꞌní ꞌngo̱ siyànà dânj,
ni̱ ûta aꞌì nneè ku,
dadinꞌ gàꞌ gisîj orâ ga̱ꞌnga̱ daꞌnin neꞌej;
sani̱ neꞌ rùkù nga gisîj gaꞌnga daꞌní siyànà dânj ni̱ ꞌngo̱ neꞌej naꞌu huin neꞌej dânj,
ni̱ si̱ gananun ruhuaj si ûta sàꞌ gàꞌì nneè ku gàꞌ mánj,
dadinꞌ gaꞌnga ꞌngo̱ síi ruhuâ yumiguìi.
22 Huê danj na̱nj nej suj ni̱ ga̱na̱nï̱n ruhuâ nej suj hia̱j;
sani̱ neꞌ rùkù ni̱ gi̱ni̱ꞌin ñûn nej suj ñùnj,
ni̱ ga̱na̱huin nìhiàꞌ ruhuâ nimân nej suj,
ni̱ gàꞌ si ꞌngo̱ síi si gaꞌnêj sa ga̱na̱huin nìhiàꞌ ruhuâ nej suj mánj.
23 ’Gui dânj ni̱ nitaj nùnj sa gàchìnj nej suj riñânj gàꞌ mánj.
Yàngàꞌ ni̱ yàngàꞌ hia nï̀nꞌ gàtà,
si daranꞌ sa gàchìnj nej suj riñan Ma̱ꞌan Rê ngà siyu̱guí,
ni̱ ri̱kij sa gàchìnj nej suj.
24 Nda akuanꞌ nï̀n ni̱ nitaj nùnj gachín nej suj ngà siyu̱guí;
sani̱ gàchìnj nej suj ni̱ ga̱na̱huin ra̱ꞌa nej suj,
hiôꞌ ni̱ ga̱na̱huin nìhiàꞌ staꞌu ruhuâ nej suj.
Ma̱ꞌan Jesús huin sa gunukuaj giꞌhiaj ga̱nan nej guiì nitaj si dagahuin riñanj
25 ’Nej nuguanꞌ nânj gaꞌmîn ni̱ garânj sûnj nej rasu̱un nga gaꞌmînj nuguanꞌ ráan riñan nej suj;
sani̱ gùyùmàn gui ni̱ gàꞌmìn sani̱ si garânj sûnj nej rasu̱un ngà nuguanꞌ ráan nga gàꞌmìn riñan nej suj gàꞌ mánj,
ni̱ nda niꞌnï̀nj chre gàꞌmìn rayiꞌî Ma̱ꞌan Rê.
26 Gui dânj ni̱ gàchìnj nej suj ngà siyu̱guí,
ni̱ sê gàꞌ gatâ si gaꞌmin àkó rayiꞌî nej suj riñan Ma̱ꞌan Rê ràꞌ saj ûnꞌ.
27 Dadinꞌ ꞌì ruhuâ Ma̱ꞌan rê Ñaꞌanj an niꞌin nej suj,
dadinꞌ ꞌì ruhuâ nej suj niꞌin nej suj ñùnj,
dadinꞌ guyumân ruhuâ nej suj si gahuî gaꞌná ñan nne Ma̱ꞌan Rê Ñaꞌanj an.
28 Gahuî gaꞌná ñan nne Ma̱ꞌan Rê Ñaꞌanj an,
ni̱ guyumanj ruhuâ yumiguì nânj;
sani̱ gu̱du̱naj ñún yumiguì nânj,
ni̱ nàꞌànj ñan nne Ma̱ꞌan Rê Ñaꞌanj an.
29 Ni̱ gataj nej sí ꞌna̱ꞌ gahuin chru̱n riñan Ma̱ꞌan Jesús:
—Hia̱j ni̱ nda niꞌnï̀nj chre gaꞌmin Ma̱ꞌân rèꞌ,
ni̱ nitaj si gaꞌmin rán Ma̱ꞌân rèꞌ riñan nej ñûnj mánj.
30 Hia̱j ni̱ niꞌin nej ñûnj si yàngàꞌ hia nï̀nꞌ ni̱ niꞌin Ma̱ꞌân rèꞌ daranꞌanj,
ni̱ nitaj si ànàꞌhuìj Ma̱ꞌân rèꞌ si gàchìnj naꞌanj nej síi Ma̱ꞌân rèꞌ dadinꞌ gàꞌ niꞌin Ma̱ꞌân rèꞌ daranꞌ sa anï̂n ruhuâ nej sij:
Rayiꞌî dan ni̱ guyumân ruhuâ nej ñûnj si gahui Ma̱ꞌân rèꞌ gaꞌnaꞌ Ma̱ꞌân rèꞌ ñan nne Ma̱ꞌan Ñaꞌanj an.
31 Nanikàj Ma̱ꞌan Jesús ni̱ gata:
—Guyumân ruhuâ nej suj hia̱j nîꞌ.
32 Hia̱j ni̱ ꞌna̱ꞌ gùyùmàn ora,
ni̱ gàꞌ guyumanj,
ni̱ gàyàꞌnï̀n nej suj ni̱ ga̱ꞌa̱nj daꞌ goꞌngo̱ nej suj si-chrej nej suj,
ni̱ gu̱du̱nâj nej suj ꞌngo̱ rḯn;
sani̱ sê si̱ ga̱ne ꞌngo̱ rḯn mánj,
dadinꞌ nne Ma̱ꞌan Rê Ñaꞌanj an ngàj na̱nj ánj.
33 Gatâ nej nuguanꞌ nânj gu̱nïn nej suj hiôꞌ ni̱ ga̱ dïnꞌïnj ruhuâ nej suj niꞌin nej suj ñùnj.
Ni̱ gi̱ranꞌ sa̱ñu̱n nej suj ruhuâ yumiguì nânj;
sani̱ gùyùmàn ruhuâ nej suj niꞌin nej suj ñùnj,
dadinꞌ gàꞌ gunukuâ giꞌhiaj ga̱nânj yumiguìi na̱nj ánj.