Gachín nìꞌhiaj Ma̱ꞌan Jesús rayiꞌî nej sí unïnꞌ nngaj
17
Nej nuguanꞌ nânj gaꞌmin Ma̱ꞌan Jesús:
Ni̱ ganachi nikaj ñanj yàtàꞌa,
ni̱ gata:
—Taj:
Gàꞌ guyumân orâ gi̱ranꞌ sàñùnj;
ni̱ ga̱ꞌmi̱n hueꞌê nej guiì rayiꞌí,
ni̱ huê danj na̱nj ga̱ꞌmi̱n hueꞌê ninj rayiꞌî Ma̱ꞌân rèꞌ gi̱ꞌhia;
2 dadinꞌ Ma̱ꞌân rèꞌ riki si gi̱nikaj sùnj riñan daranꞌ nej guiì,
gaꞌnḯn Ma̱ꞌân rèꞌ gaꞌnaꞌ riñânj,
ni̱ ga̱ꞌhue na̱gi̱ꞌhiaj nìꞌnàj ni̱ gane nìgànj ninj gi̱ꞌhia.
Jesús ora por sus seguidores (Juan 17.1-26)
3 Ni̱ gi̱ni̱ꞌin ninj sòꞌ,
ni̱ ga̱na̱huin nìꞌnàꞌ ninj ni̱ ga̱ne nìgànj ninj.
Dadinꞌ ꞌngo̱ rïnꞌ Ma̱ꞌân rèꞌ huin Ma̱ꞌan Ñaꞌanj yàngàꞌa,
ni̱ gi̱ni̱ꞌin ninj si hué huin Ma̱ꞌan Jesucristo,
Ma̱ꞌan sa gaꞌnḯn Ma̱ꞌân rèꞌ gaꞌnaꞌ ruhuâ yumiguìi.
4 ’Gàꞌ gaꞌmin hueꞌé rayiꞌî Ma̱ꞌân rèꞌ riñan hioꞌóo;
ni̱ gàꞌ ganahui giꞌhiaj sûnj sun gataj Ma̱ꞌân rèꞌ gi̱ꞌhia.
5 Hia̱j ni̱ na̱ri̱ki̱ ñûn Ma̱ꞌân rèꞌ sun ginikâ,
nga gané ngà Ma̱ꞌân rèꞌ nga nï̀nꞌ gàchin ga̱huin yumiguìi.
6 ’Nej guiì ganagui Ma̱ꞌân rèꞌ ruhuâ yumiguìi ni̱ narikî Ma̱ꞌân rèꞌ riñânj;
ni̱ gidigán riñan ninj ahuin sa huin Ma̱ꞌân rèꞌ,
ni̱ gi̱ꞌhia si ga̱huin ninj daꞌní Ma̱ꞌan rèꞌ,
ni̱ narikî Ma̱ꞌan rèꞌ ninj riñânj,
ni̱ dagahuin ninj si-nùguànꞌ Ma̱ꞌân rèꞌ giꞌhiâ.
7 Hia̱j ni̱ giniꞌin ninj si daranꞌ nej rasu̱un rikî Ma̱ꞌân rèꞌ raꞌá,
ni̱ riñan Ma̱ꞌân rèꞌ gahui nej rasu̱n dânj gaꞌnaj;
8 dadinꞌ nej nuguanꞌ rikî Ma̱ꞌân rèꞌ riñânj,
ni̱ nej nuguanꞌ dânj nagaꞌhuí raꞌa nej sij;
ni̱ ganahuin ra̱ꞌa nej sij nej nuguanꞌ dânj,
ni̱ giniꞌin yàngàꞌ nej sij si gahuî gaꞌná ñan nnê Ma̱ꞌân rèꞌ,
ni̱ guyumân ruhuâ nej sij si Ma̱ꞌân rèꞌ gaꞌnḯn gaꞌná.
9 ’Ni̱ gachín ni̱ꞌhia rayiꞌî nej sij;
sani̱ sê si̱ gachín nìꞌhia rayiꞌî nej guiì màn ruhuâ yumiguìi mánj,
gachín ni̱ꞌhia rayiꞌî nej guiì rikî Ma̱ꞌan rèꞌ raꞌá;
dadinꞌ daꞌní Ma̱ꞌân rèꞌ huin ninj.
10 Daranꞌ nej sa huin siꞌhiâ huin siꞌhiaj Ma̱ꞌân rèꞌ,
ni̱ nej sa huin siꞌhiaj Ma̱ꞌân rèꞌ huin siꞌhiâ;
ni̱ gaꞌmin hueꞌê nej guiì rayiꞌí ngà nej dânj.
11 ’Si̱ gané ruhuâ yumiguì nânj gàꞌ mánj;
sani̱ nej guiì huin daꞌní Maꞌân rèꞌ ni̱ ga̱ne ninj ruhuâ yumiguì nânj,
ni̱ ñùnj ni̱ gùnùkuìj ñan nne Ma̱ꞌân rèꞌ na̱nj Tâꞌ,
ni̱ sa gè nï̀nꞌïn huin Ma̱ꞌân rèꞌ,
nej guiì girikî Ma̱ꞌân rèꞌ riñânj,
ni̱ du̱gumîn hueꞌe Ma̱ꞌân rèꞌ nej guiì dânj ngà siyu̱gui Ma̱ꞌân rèꞌ,
daꞌnga ni̱ gahuin ninj ꞌngo̱ rïn guiì,
dàj rûn huin nêꞌ.
12 Nga gané ngà ninj ruhuâ yumiguìi,
ni̱ dugumînj ninj ngà siyu̱gui Ma̱ꞌân rèꞌ;
nej guiì rikî Ma̱ꞌân rèꞌ riñânj,
ni̱ gàꞌ si ꞌngo̱ ninj nun ga̱ꞌa̱nj ni̱ꞌhia̱ gi̱ꞌhia mánj,
man sí gaꞌanj ni̱ꞌhia̱ huin sí huin daꞌní sa gaꞌanj ni̱ꞌhia̱a,
ni̱ huê dànanj ga̱huin daꞌnga ni̱ gisîj sa taj riñan ñanj si-nùguànꞌ Ma̱ꞌan Ñaꞌanj an.
13 ’Hia̱j gùnùkuìj ñan nne Ma̱ꞌan rèꞌ;
ni̱ dànanj gaꞌmînj nga nï̀nꞌ nné ruhuâ yumiguìi,
daꞌnga ni̱ ganahuin nìhiàꞌ ruhuâ nej sij dàj rûnꞌ hua nìhiàꞌ ruhuâj.
14 Gaꞌhuí si-nùguànꞌ Ma̱ꞌân rèꞌ riñan nej sij;
sani̱ gininj ꞌì nej sij riñan nej guiì màn ruhuâ yumiguìi,
dadinꞌ sê nej guiì màn ruhuâ yumiguì nânj huin nej sij,
ni̱ huê danj na̱nj ñùnj ni̱ sê sí màn ruhuâ yumiguì nânj huín.
15 Sê si̱ gachín ni̱ꞌhia si ga̱ꞌne̱ Ma̱ꞌân rèꞌ nej sij ruhuâ yumiguì nânj mánj,
gachín ni̱ꞌhia si du̱gumîn Ma̱ꞌân rèꞌ nej sij riñan sa yìꞌìi.
16 Sê guiì màn ruhuâ yumiguìi huin nej sij mánj,
huê danj ñùnj ni̱ sê guiì màn ruhuâ yumiguìi huin mánj.
17 Na̱gi̱ꞌhiaj gè Ma̱ꞌân rèꞌ nej sij ngà nuguanꞌ yàngàꞌa;
ni̱ nuguanꞌ yàngàꞌa huin si-nùguànꞌ Ma̱ꞌân rèꞌ.
18 Dàj rûnꞌ gaꞌnḯn Ma̱ꞌân rèꞌ gaꞌân ruhuâ yumiguìi,
ni̱ huê danj na̱nj gaꞌnï̂n gaꞌanj nej sij ruhuâ yumiguìi.
19 Ni̱ rayiꞌî nej sij nagiꞌhiaj gèj Maꞌán,
daꞌnga ni̱ ganahuin gè nej sij ngà nuguanꞌ yàngàꞌa.
20 ’Sani̱ sê man rayiꞌî nej sôꞌ màn nânj gachín ni̱ꞌhia riñan Ma̱ꞌan rèꞌ mánj,
gachín ni̱ꞌhia riñan Ma̱ꞌan rèꞌ rayiꞌî nej sôꞌ gùyùmàn ruhuâ niꞌin Ma̱ꞌân rèꞌ ngà nej nuguanꞌ ga̱ꞌmi̱n nej daꞌní Ma̱ꞌân rèꞌ.
21 Gachín ni̱ꞌhia si gi̱ꞌhiaj Ma̱ꞌân rèꞌ si ga̱ nùguànꞌàn ruhuâ nej sij;
dàj rûnꞌ hua nùguànꞌàn ruhuâ nguèj nêꞌ,
ni̱ ga̱ nùguànꞌàn ruhuâ nej sij ngòꞌ,
daꞌnga ni̱ guyumân ruhuâ nej guiì màn ruhuâ yumiguìi si gaꞌnḯn Ma̱ꞌân rèꞌ gaꞌná.
22 Sun rikî Ma̱ꞌan rèꞌ raꞌá,
ni̱ huê sun dânj gaꞌhuí raꞌa nej sij,
daꞌnga ni̱ ga̱huin nej sij ꞌngo̱ rïn guiì,
dàj rûnꞌ huin nguèj nêꞌ.
23 Ñùnj nikaj duguiꞌ ngà nej sij,
ni̱ sòꞌ nikaj duguiꞌ ngàj,
ni̱ gahuin yàngàꞌ nej sij ꞌngo̱ rïn guiì,
daꞌnga ni̱ giniꞌin nej guiì màn ruhuâ yumiguìi si sòꞌ gaꞌnḯn gaꞌná,
ni̱ giniꞌin ninj si ꞌì ruhuâ Ma̱ꞌân rèꞌ niꞌin rèꞌ ñùnj,
ni̱ ꞌì ruhuâꞌ Ma̱ꞌân rèꞌ niꞌîn rèꞌ nej sij dàj rûnꞌ ꞌì ruhuâ Ma̱ꞌân rèꞌ niꞌîn rèꞌ ñùnj.
24 ’Tâj,
nej guiì rikî Ma̱ꞌân rèꞌ riñânj,
ni̱ garanꞌ ruhuâj si ñan gané,
ni̱ hiuj dânj ga̱ne ninj ngàj,
daꞌnga ni̱ giniꞌin ninj dàj hua sun nìkà giꞌhiaj Ma̱ꞌân rèꞌ;
dadinꞌ ga ꞌì ruhuâ Ma̱ꞌân rèꞌ niꞌîn rèꞌ ñùnj àsìj nga nï̀nꞌ ga̱chin gi̱ꞌhiaj Ma̱ꞌân rèꞌ yumiguìi.
25 Tâj Ma̱ꞌân rèꞌ huin sa giꞌhiaj sa nìkàa,
sani̱ nun gi̱ni̱ꞌin nej guiì nàsìnùnj un sòꞌ mánj,
sani̱ nej sôꞌ man nânj ni̱ giniꞌin nej sôꞌ si gaꞌnḯn Ma̱ꞌán rèꞌ gaꞌná.
26 Ni̱ gidigán siyu̱gui Ma̱ꞌân rèꞌ riñan nej sij,
ni̱ hua̱ na̱nj gi̱di̱gán doj rayiꞌî Maꞌân rèꞌ riñan nej sij,
hiôꞌ ni̱ sa ꞌì ruhuâ Ma̱ꞌân rèꞌ ngàj,
ni̱ sa ꞌì dânj ga̱ne ngà nej sij.