Garan ràꞌa ꞌngo̱ sí dânj ruhuâ yumanꞌ Kaná
2
Ni̱ yichrá huàꞌnï̀nj gui ni̱ ga̱ra̱n ra̱ꞌa ꞌngo̱ sí dânj ruhuâ yumanꞌ gùꞌnàj Kaná huin doꞌó Galilea;
ni̱ nne nni Ma̱ꞌan Jesús hiuj dânj.
2 Ni̱ gakḯn nej sij gaꞌanj Ma̱ꞌan Jesús ni̱ huê danj na̱nj gaꞌanj nej sí gaꞌnaꞌ ga̱huin chru̱n riñan Ma̱ꞌan giꞌñanj hua̱ hiuj dânj.
3 Ni̱ ganahuij nne bino,
ni̱ gataj nni Ma̱ꞌan Jesús gu̱nïn:
—Nitaj nne bino nun gàꞌ mánj.
4 Ni̱ gataj Ma̱ꞌan Jesús:
—Nùnj huin saj ni̱ gatajꞌ dànanj gu̱nḯn.
Ni̱ hua̱ na̱nj ga̱chin gàyìꞌìj si-sùnj ràꞌaj.
El milagro en Caná (Juan 2.1-12)
5 Ni̱ gataj nni Ma̱ꞌan Jesús gu̱nïn nej sí màn giꞌhiaj sun hiuj dânj:
—Daranꞌ sa ga̱ta̱j Ma̱ꞌan Jesús gu̱nïn nej suj ni̱ da̱gahuin nej suj na̱nj ánj.
6 Ni̱ nne huàtànꞌ hiëj ruhuâ ku̱sala xi hiuj dânj,
ni̱ ruhuâ nej hiëj dânj gachra nej judío nne garânj sun nej sôꞌ nga nagiꞌhiaj sàꞌ nej sôꞌ ma̱ꞌan nej sôꞌ,
ni̱ gatûj huìj xia chìꞌ litrûj nnee ruhuâ da̱ꞌa̱j nej hiëj dânj ni̱ aꞌngô da̱ꞌa̱j nej hiëj dânj gatûj huàꞌnï̀nj xia chìꞌ litrûj nnee.
7 Ni̱ gataj Ma̱ꞌan Jesús:
—Ga̱chra nej suj nnee ruhuâ nej hiëj ku̱sala dânj.
Ni̱ nda ganahuin gu̱ña̱n riñanj nej hiëj ku̱sala dânj gachra nnee giꞌhiaj nej sij.
8 Hiôꞌ ni̱ gataj Ma̱ꞌan Jesús:
—Gi̱ri̱ nej suj do̱j nne nnùn ruhuâ hiëj ku̱sala dan,
ni̱ gi̱nikaj nej suj ga̱ꞌa̱nj nej suj riñan sí gayakaj guendâ dàj goꞌoj ánj.
Ni̱ ginikaj nej sij gaꞌanj nej sij riñan sí gayakaj guendâ dàj goꞌo nne dânj.
9 Ni̱ nga gisîj gayakaj guendâ sí nânj dàj goꞌo nne ganahuin nne bino,
sani̱ nun niꞌin sôꞌ dànèꞌ gaꞌnaꞌ nne bino dânj,
sani̱ niꞌin sàꞌ nej sí màn giꞌhiaj suun si nne huìj i ginun ruhuâ nej hiëj ku̱sala ni̱ ganahuin nne bino,
huê danj ni̱ gakḯn sôꞌ gaꞌnaꞌ sí garan ràꞌa.
10 Ni̱ gataj sôꞌ:
—Daranꞌ nej síi goꞌo si̱nï̱n nne bino sàꞌa,
ni̱ nga gàꞌ ûta goꞌo staꞌu nej sí guyumân giꞌñanj dânj,
ni̱ neꞌ rùkù ni̱ gaꞌhuiꞌ sij nne bino ninaj doj huaa goꞌo nej sí dânj;
sani̱ sòꞌ ni̱ hua̱ na̱nj nu̱n nne bino sàꞌa giꞌhiâꞌ nda orâ nânj.
11 Huê nânj huin ꞌngo̱ daꞌnga si̱nï̱n giꞌhiaj Ma̱ꞌan Jesús yumanꞌ Kaná huin doꞌó Galilea,
ni̱ gidiganj si huin ꞌngo̱ sí ni̱ka̱j suun;
ni̱ guyumân ruhuâ nej sí ꞌna̱ꞌ ga̱huin chru̱n riñanj niꞌin nej sôꞌ Ma̱ꞌan.
12 Neꞌ rùkù nga gisîj gahuin nej nânj ni̱ gaꞌanj nej sij Kapernaúm,
ni̱ hua̱j nni,
ni̱ huaj nej dinïn ni̱ huê danj na̱nj hua̱j nej sí gaꞌnaꞌ ga̱huin chru̱n riñanj nngaj,
sani̱ do̱j gui gane nej sij ruhuâ yumanꞌ dânj.
Nagiꞌhiaj sàꞌ Ma̱ꞌan Jesús ruhuâ nuhuî nìko
13 Ni̱ gàꞌ gahuin nichrunꞌ gùyùmàn giꞌñanj pascua huin si-gi̱ꞌña̱nj nej sí judío;
ni̱ gaꞌanj Ma̱ꞌan Jesús yumanꞌ snàꞌànj Jerusalén,
Jesús en el patio del templo (Juan 2.13-25)
14 ni̱ ganariꞌij si màn nej sí guduꞌhuêj rô,
ni̱ màn nej sí guduꞌhuêj matsïj ï ni̱ màn nej sí guduꞌhuêj yaꞌàan,
ni̱ nne nej sí nadunâ sanꞌanj an ruhuâ hueꞌ huin nuhuî nìko.
15 Ni̱ nga giniꞌin si dànanj hua ruhuâ nûhui,
ni̱ giꞌhia ꞌngo̱ yu̱guati ni̱ duguañunj,
ni̱ girij daranꞌ nej guiì màn ruhuâ hueꞌ dânj,
ni̱ huê danj na̱nj girij nej matsïj ï,
nej rô,
ni̱ guduyaꞌnï̱nj si-sanꞌanj nej sí nadunâ sanꞌanj an,
ni̱ dunatu si-mesa nej sôꞌ;
16 ni̱ gataj Ma̱ꞌan gu̱nïn nej sí guduꞌhuêj yaꞌàan:
—Gu̱xu̱n nej suj si-ꞌhiaj nej suj hiuj nânj,
ni̱ si̱ giꞌhiaj nej suj si dukuâ Ma̱ꞌan Rê ni̱ ga̱huin ñan gànèꞌ rasu̱un mánj.
17 Hiôꞌ ni̱ gananun ruhuâ nej sí ꞌna̱ꞌ ga̱huin chru̱n riñan Ma̱ꞌan Jesús si huê dànanj taj riñan ñanj:
“Ni̱ ûta gaꞌman ruhuâj dadinꞌ giꞌhiaj kï̱j nej suj ruhuâ dukuâ Ma̱ꞌân rèꞌ.”
18 Hiôꞌ ni̱ nanikàj nej sí judío ni̱ gataj nej sôꞌ.
—Ahuin ꞌngo̱ daꞌngaꞌ gidigânꞌ riñan nej ñûnj ni̱ giꞌhiâꞌ daranꞌ nej nânj ràꞌaj.
19 Nanikàj Ma̱ꞌan Jesús ni̱ gata:
—Du̱guane nej suj hueꞌ nuhuî nânj,
ni̱ yichrá huàꞌnï̀nj gui ni̱ gànàsìj ñûn aꞌngoj gi̱ꞌhia.
20 Hiôꞌ ni̱ gataj nej sí judío:
—Huìj xia huàtànꞌ hioꞌo ginûn huin nej sij daꞌnga gisîj hueꞌ nuhuî nânj.
Ni̱ sòꞌ taj si huàꞌnï̀nj gui ni̱ gànàsìj ñunj gi̱ꞌhiáꞌ na̱nj nîꞌ.
21 Sani̱ gaꞌmin Ma̱ꞌan Jesús dànanj rayiꞌî nuhuî huin nneè kú Ma̱ꞌan.
22 Ni̱ nga ganaꞌnï̂nj Ma̱ꞌan Jesús siganï̂nj nej nîman,
ni̱ gananun ruhuâ nej sí gaꞌnaꞌ ga̱huin chru̱n riñanj rayiꞌî nej nuguanꞌ gaꞌmin;
ni̱ guyumân ruhuâ nej sôꞌ niꞌin nej sôꞌ sa taj riñan ñanj si-nùguànꞌ Ma̱ꞌan Ñaꞌanj an ngà nej nuguanꞌ gaꞌmin Ma̱ꞌan Jesús.
Niꞌin Ma̱ꞌan Jesús dàj hua ruhuâ nimân nej guiì
23 Ni̱ nne Ma̱ꞌan Jesús yumanꞌ snàꞌànj Jerusalén nej gui nga ginun giꞌñanj pascua,
ni̱ ûta gàꞌì nej guiì guyumân ruhuâ niꞌin siyu̱gui Ma̱ꞌan,
dadinꞌ giniꞌin ninj ganahuin nej guiì giꞌhiaj Ma̱ꞌan.
24 Sani̱ nitaj si guyumân nìko ruhuâ Ma̱ꞌan Jesús niꞌin si-nùguànꞌ nej guiì dânj,
dadinꞌ niꞌin dàj ganï̂n ruhuâ daranꞌ ninj,
25 ni̱ nitaj si ganaꞌhuìj Ma̱ꞌan Jesús si gànàtàꞌ aꞌngô nej guiì dàj hua sa giꞌhiaj nej guiì,
dadinꞌ ûta hueꞌê niꞌin Ma̱ꞌan dàj hua ruhuâ nimân ninj.