Jesús ngà Nicodemo
3
Hua̱ ꞌngo̱ sí dânj ni̱ huin sôꞌ yiꞌnïnꞌ nej fariseo,
ni̱ gùꞌnàj sôꞌ Nicodemo,
ni̱ huin ña̱n sôꞌ riñan nej judío.
2 Ni̱ gaꞌnaꞌ sí nânj neꞌ ñànꞌan ñan nne Ma̱ꞌan Jesús,
ni̱ gataj sôꞌ:
—Maestrûj,
niꞌin nej ñûnj si Maestrû huin Ma̱ꞌân rèꞌ dadinꞌ Ma̱ꞌan Ñaꞌanj an gaꞌnḯn gaꞌnaꞌ Ma̱ꞌân rèꞌ;
dadinꞌ gàꞌ si ꞌngo̱ síi si̱ gaꞌhue gi̱ꞌhiaj nej daꞌngaꞌa dàj rûnꞌ giꞌhiaj Ma̱ꞌân rèꞌ,
si nitaj Ma̱ꞌan Ñaꞌanj an nne ngà sij mánj.
Jesus habla con Nicodemo (Juan 3.1-21)
3 Nanikàj Ma̱ꞌan Jesús ni̱ gata:
—Yàngàꞌ,
ni̱ yàngàꞌ hia nï̀nꞌ gàtà gu̱nï̂nꞌ,
ni̱ guiì si̱ gaꞌnga nàkà ñûn ni̱ si̱ gaꞌhue ga̱huin ninj daꞌní Ma̱ꞌan Ñaꞌanj an mánj.
4 Ni̱ gataj Nicodemo gu̱nïn Ma̱ꞌan Jesús:
—Dàj gi̱ꞌhiaj ꞌngo̱ guiì ga̱ꞌhue ga̱ꞌnga̱ nàkà ñûn ninj nga gàꞌ achij ninj ràꞌaj.
Ga̱ꞌhue ga̱tu̱ ñûn ninj ruhuâ riki nni ninj,
ni̱ ga̱ꞌnga̱ ñûn ninj na̱nj nîꞌ.
5 Nanikàj Ma̱ꞌan Jesús ni̱ gata:
—Yàngàꞌ,
ni̱ yàngàꞌ hia nï̀nꞌ gàtà gu̱nïnꞌ,
ni̱ guiì si̱ gaꞌnga nàkà ngà nnee ni̱ sisi̱ si̱ ga̱ꞌnga̱ nàkà ninj gi̱ꞌhiaj Ma̱ꞌan Espíritu Santo,
ni̱ si̱ gaꞌhue ga̱huin ninj Daꞌní Ma̱ꞌan Ñaꞌanj an mánj.
6 Guiì gaꞌnga riki nni,
ni̱ nneè huin ninj;
ni̱ guiì gaꞌnga nàkà giꞌhiaj Ma̱ꞌan Espíritu Santo,
ni̱ ganahuin nìꞌnàꞌ nimân ninj.
7 Si̱ gahuin ña̱ꞌanj ruhuâꞌ guendâ gatâ gu̱nï̱nꞌ:
“Si ña̱ꞌa̱n huaj si ga̱ꞌnga̱ nàkà daranꞌ nej guiì mánj.”
8 Dadinꞌ nanèe ni̱ gaꞌhuij dànèꞌ garanꞌ ruhuaj,
ni̱ gunïnꞌ si gayïj gachinj hua;
sani̱ nun niꞌînꞌ dànèꞌ ꞌnaj,
ni̱ nun niꞌînꞌ dànèꞌ hua mánj;
ni̱ huê danj huin guiì gaꞌnga nàkà ñûn giꞌhiaj Ma̱ꞌan Espíritu.
9 Nanikàj Nicodemo ni̱ gataj sôꞌ:
—Dàj ga̱ꞌhue ga̱huin sa gataj Ma̱ꞌan rèꞌ ràꞌaj.
10 Nanikàj Ma̱ꞌan Jesús ni̱ gata gu̱nïn sôꞌ:
—Maestrû huînꞌ riñan yumanꞌ Israel,
ni̱ nun garânj daꞌngaꞌ ruhuâ rayiꞌî nuguanꞌ nânj ràꞌ sa ûnꞌ.
11 Yàngàꞌ,
ni̱ yàngàꞌ hia nï̀nꞌ gàtà gunï̂nꞌ,
ni̱ man sa niꞌin nej ñûnj gaꞌmin nej nûnj,
ni̱ man sa giniꞌin nej ñûnj huê dan huin sa ganataꞌ nej ñûnj;
sani̱ naꞌhuej nej suj ga̱na̱huin ra̱ꞌa nej suj sa ganataꞌ nej ñûnj mánj.
12 Ni̱ si gaꞌmînj rayiꞌî nej sa màn riñan hioꞌóo riñan nej suj,
ni̱ naꞌhue gùyùmàn ruhuâ nej suj,
ni̱ dàj gi̱ꞌhiaj nej suj ga̱ꞌhue gùyùmàn ruhuâ nej suj si gànàtàj rayiꞌî nej sa màn yàtàꞌa ràꞌaj.
13 ’Gàꞌ si ꞌngo̱ guiì nun ga̱ꞌa̱nj yàtàꞌa mánj,
man ꞌngo̱ rïn sa gininj gaꞌnaꞌ neꞌ yàtàꞌa,
ni̱ huê dânj huin Maꞌán.
14 Ni̱ dàj rûnꞌ giꞌhiaj Moisés nga godokoꞌ sôꞌ ꞌngo̱ yukuáa riñan ꞌngo̱ chrun riñan hioꞌó nàkòo,
ni̱ huê danj na̱nj ña̱ꞌa̱n huaj si go̱dokoꞌ nej sij ñùnj riñan rugutsìi.
15 Daꞌnga ni̱ daranꞌ nej guiì gùyùmàn ruhuâ niꞌin ñùnj,
ni̱ si̱ gaꞌanj ni̱ꞌhia̱ ninj,
dadinꞌ gànàꞌnï̀nj ninj ni̱ ga̱ne nìgànj ninj yiñán Ma̱ꞌan Ñaꞌanj an na̱nj ánj.
ꞌÌ ruhuâ Ma̱ꞌan Ñaꞌanj an niꞌin nej guiì màn ruhuâ yumiguìi
16 ’Dadinꞌ huê danj ni̱ ga ꞌì ruhuâ Ma̱ꞌan Ñaꞌanj an niꞌin nej guiì màn ruhuâ yumiguìi,
rayiꞌî dânj ni̱ gaꞌnïn gaꞌnaꞌ ꞌngo̱ rïn Daꞌnin riñan ninj,
ni̱ daranꞌ nej guiì gùyùmàn ruhuâ niꞌin Daꞌní Ma̱ꞌan,
ni̱ si̱ gaꞌanj ni̱ꞌhia̱ ninj,
ni̱ ga̱ne nìgànj ninj ngà Ma̱ꞌan.
17 Dadinꞌ nun gàꞌnï̀nj Ma̱ꞌan Ñaꞌanj an ga̱ꞌna̱ꞌ Daꞌnin ruhuâ yumiguìi nânj guendâ gi̱ꞌhia si ga̱ꞌa̱nj ni̱ꞌhia̱ nej guiì mánj,
gaꞌnaꞌ Ma̱ꞌan Daꞌnin guendâ gi̱ꞌhia si ga̱na̱ni̱n nej guiì.
18 ’Guiì guyumân ruhuâ niꞌin Daꞌní Ma̱ꞌan,
ni̱ si̱ gaꞌanj ni̱ꞌhia̱ ninj;
sani̱ guiì nun gùyùmàn ruhuâ niꞌin Daꞌní Ma̱ꞌan,
ni̱ ga̱ꞌa̱nj ni̱ꞌhia̱ ninj,
dadinꞌ nun gùyùmàn ruhuâ ninj niꞌin ninj siyu̱guí Daꞌní Ma̱ꞌan mánj.
19 Ni̱ nej guiì nun gùyùmàn ruhuâ niꞌin si-nùguànꞌ Ma̱ꞌan Ñaꞌanj an ni̱ gaꞌanj ni̱ꞌhia̱ ninj:
Dadinꞌ gaꞌnaꞌ sa yigï̀ïn dânj ruhuâ yumiguìi,
sani̱ dànanj ga ꞌì doj ruhuâ ninj niꞌin ninj gakï̱nꞌïn gàꞌ daꞌ sa yigï̀n dânj,
dadinꞌ ûta nìhiàꞌ ruhuâ ninj giꞌhiaj ninj gakï̱nꞌïn.
20 Dadinꞌ daran nej guiì giꞌhiaj gakï̱nꞌïn,
ni̱ nitaj si gininj hueꞌé sa yigï̀n dânj riñan ninj,
huê danj ni̱ nitaj si gaꞌnaꞌ nichì ninj riñan sa yigï̀n dânj,
dadinꞌ naꞌhuej ruhuâ ninj gu̱nïn gàꞌì ninj rayiꞌî si-ga̱kïnꞌ ninj.
21 Sani̱ nej guiì gaꞌmin nuguanꞌ yàngàꞌa ni̱ ꞌna̱ꞌ ninj riñan Ma̱ꞌan Jesús,
dadinꞌ nitaj sinàꞌaj a hua riñan ninj dadinꞌ gàꞌ nagiꞌhiaj nàkà Ma̱ꞌan Ñaꞌanj an ninj na̱nj ánj.
Gaꞌmin hueꞌê ñûn Juan Bautista rayiꞌî Ma̱ꞌan Jesús
22 Neꞌ rùkù nej nânj,
ni̱ gaꞌanj Ma̱ꞌan Jesús ngà nej sí ꞌna̱ꞌ ga̱huin chru̱n riñanj riñan hioꞌó Judea,
ni̱ gane ruhuâ yumanꞌ dânj ngà nej sij,
ni̱ duguataꞌ nnej nej guiì.
Juan testifica acerca de Jesús (Juan 3.22-36)
23 Ni̱ nu̱n Juan duguataꞌ nne sôꞌ nej guiì riñan hioꞌó Enón,
nìchrùnꞌ hiuj dânj nngaj yumanꞌ Salín,
dadinꞌ ûta hua nnee hiuj dânj;
ni̱ ꞌna̱ꞌ nej guiì riñan sôꞌ,
ni̱ duguataꞌ nne sôꞌ ninj hiuj dânj.
24 Dadinꞌ hua̱ nun ga̱tu̱ Juan dukuá gaꞌa.
25 Hiôꞌ ni̱ gunïnꞌ nej sí gaꞌnaꞌ ga̱huin chru̱n riñan Juan ngà ꞌngo̱ nej síchìj judío rayiꞌî guendâ dàj nagiꞌhiaj sàꞌ nej sôꞌ ma̱ꞌan nej sôꞌ.
26 Ni̱ gaꞌanj niꞌhiaj nej sôꞌ ñan nne Juan ni̱ gataj nej sôꞌ:
—Maestrûj,
sí ni̱kï̱nꞌ gaꞌmin ngà rèꞌ neꞌ ané duꞌhua kïn Jordán,
sí ràyìꞌì ganatâꞌ rèꞌ riñan nej ñûnj,
ni̱ nu̱n sij duguataꞌ nne sij nej guiì,
ni̱ huaꞌanj daranꞌ nej guiì riñan sij na̱nj ánj.
27 Nanikàj Juan ni̱ gataj sôꞌ:
—Nitaj nùnj ga̱ꞌhue gi̱ꞌhiaj ꞌngo̱ síi,
si sê Ma̱ꞌan Ñaꞌanj nne yàtàꞌa gaꞌhuiꞌ sun dânj raꞌa sôꞌ mánj.
28 Ni̱ gàꞌ niꞌin nej suj si gatâ:
Si sé huin Ma̱ꞌan Cristo,
dadinꞌ gaꞌnḯn Ma̱ꞌan Ñaꞌanj an gaꞌná neꞌ ña̱an riñan Ma̱ꞌan Cristo.
29 Giꞌñanj ñan garan ra̱ꞌa ꞌngo̱ síi,
ni̱ sí garan ra̱ꞌa ngà siyànà dânj,
huê sí nânj ga̱huin nìkà siyànà dânj,
sani̱ sí ni̱ka̱j duguiꞌ ngà sí ga̱ya̱ka̱j nika,
ni̱ nne sôꞌ nìchrùnꞌ yiꞌnḯn sí ga̱ya̱ka̱j nika ni̱ gunïn sôꞌ dàj aꞌmin sí dânj,
huê danj ni̱ nga gunïn sôꞌ sa gaꞌmin sí dânj ni̱ ûta ganahuin nìhiàꞌ ruhuâ sôꞌ.
30 Ña̱ꞌa̱n huaj si ga̱chi̱j sôꞌ,
ni̱ ñùnj daꞌhui gànàgàꞌ na̱nj ánj.
Ma̱ꞌan sa gaꞌnaꞌ yàtàꞌa
31 ’Ma̱ꞌan Jesús Ma̱ꞌan sa gaꞌna̱ꞌ neꞌ yàtàꞌa,
ni̱ ni̱ka̱j sunj riñan daranꞌanj;
sani̱ guiì gaꞌnga riñan hioꞌóo,
ni̱ sa màn riñan hioꞌó huin ninj,
ni̱ aꞌmin ninj rayiꞌî nej rasu̱n màn riñan hioꞌóo,
sani̱ Ma̱ꞌan Jesús sa gaꞌnaꞌ neꞌ yàtàꞌa,
ni̱ ni̱ka̱j sunj riñan daranꞌanj.
32 Ni̱ sa giniꞌin Ma̱ꞌan Jesús ngà sa gunïn Ma̱ꞌan Jesús ni̱ huê rayiꞌî dânj huin sa ganataj;
sani̱ gàꞌ si ꞌngo̱ nej guiì naꞌhuej gu̱nïn sa ganataj mánj.
33 Guiì guyumân ruhuâ niꞌin sa ganataj,
ni̱ nataꞌ ninj si Ma̱ꞌan Ñaꞌanj an huin sa yàngàꞌa.
34 Dadinꞌ Ma̱ꞌan Ñaꞌanj an huin sa gaꞌnḯn ga̱ꞌna̱ꞌ Ma̱ꞌan Jesús,
ni̱ ganataj si-nùguànꞌ Ma̱ꞌan Ñaꞌanj an;
dadinꞌ Ma̱ꞌan Espíritu Santo huin sa gaꞌhuiꞌ nuguanꞌan ni̱ nitaj si giriñunj dàj nìko nuguanꞌan ga̱ꞌmin mánj.
35 Ni̱ ꞌì ruhuâ Ma̱ꞌan Ñaꞌanj an niꞌin Daꞌnin Jesús,
ni̱ daranꞌ nej rasu̱un ganachri raꞌá Jesús huin Daꞌní Ma̱ꞌan.
36 Guiì guyumân ruhuâ niꞌin Ma̱ꞌan Jesús huin Daꞌnin Ma̱ꞌân Ñaꞌanj an ni̱ ga̱ne nìgànj ninj ngà Ma̱ꞌan;
sani̱ guiì naꞌhuej gùyùmàn ruhuâ niꞌin Ma̱ꞌan Jesús huin Daꞌní Ma̱ꞌan Ñaꞌanj an ni̱ si̱ guchiꞌ ninj ga̱ne ninj ñan nne Ma̱ꞌan Ñaꞌanj an mánj,
dadinꞌ ga̱na̱huin ra̱ꞌa ninj kastîgu gi̱ꞌhiaj Ma̱ꞌan Ñaꞌanj an na̱nj ánj.